| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
மாரகதா²வண்ணனா
Mārakathāvaṇṇanā
32. இதா³னி ஸரணக³மனூபஸம்பத³ங் த³ஸ்ஸேதுங் ‘‘அத² கோ² ப⁴க³வா’’திஆதி³ ஆரத்³த⁴ங். தத்ராயங் அனுபுப்³ப³பத³வண்ணனா (ஸங்॰ நி॰ அட்ட²॰ 1.1.141) – முத்தாஹந்தி முத்தோ அஹங். சாரிகந்தி அனுபுப்³ப³க³மனசாரிகங், கா³மனிக³மராஜதா⁴னீஸு அனுக்கமேன க³மனஸங்கா²தங் சாரிகந்தி அத்தோ². சரதா²தி தி³வஸங் யோஜனபரமங் க³ச்ச²ந்தா சரத². மா ஏகேன த்³வே அக³மித்தா²தி ஏகேன மக்³கே³ன த்³வீஸு க³தேஸு ஏகஸ்மிங் த⁴ம்மங் தே³ஸெந்தே ஏகேன துண்ஹீபூ⁴தேன டா²தப்³ப³ங் ஹோதி, தஸ்மா ஏவமாஹ. ஆதி³கல்யாணந்தி ஆதி³ம்ஹி கல்யாணங் ஸுந்த³ரங் ப⁴த்³த³கங், ததா² மஜ்ஜ²பரியோஸானேஸு. ஆதி³மஜ்ஜ²பரியோஸானஞ்ச நாமேதங் ஸாஸனஸ்ஸ ச தே³ஸனாய ச வஸேன து³ப்³பி³த⁴ங். தத்த² ஸாஸனஸ்ஸ ஸீலங் ஆதி³, ஸமத²விபஸ்ஸனாமக்³கா³ மஜ்ஜ²ங், ப²லனிப்³பா³னானி பரியோஸானங். ஸீலஸமாத⁴யோ வா ஆதி³, விபஸ்ஸனாமக்³கா³ மஜ்ஜ²ங், ப²லனிப்³பா³னானி பரியோஸானங். ஸீலஸமாதி⁴விபஸ்ஸனா வா ஆதி³, மக்³கோ³ மஜ்ஜ²ங், ப²லனிப்³பா³னானி பரியோஸானங். தே³ஸனாய பன சதுப்பதி³ககா³தா²ய தாவ பட²மபாதோ³ ஆதி³, து³தியததியா மஜ்ஜ²ங், சதுத்தோ² பரியோஸானங். பஞ்சபத³ச²ப்பதா³னங் பட²மபாதோ³ ஆதி³, அவஸானபாதோ³ பரியோஸானங், ஸேஸா மஜ்ஜ²ங். ஏகானுஸந்தி⁴கஸ்ஸ ஸுத்தஸ்ஸ நிதா³னங் ஆதி³, இத³மவோசாதி பரியோஸானங், ஸேஸங் மஜ்ஜ²ங். அனேகானுஸந்தி⁴கஸ்ஸ ஸுத்தஸ்ஸ மஜ்ஜே² ப³ஹுகம்பி அனுஸந்தி⁴ மஜ்ஜ²மேவ, நிதா³னங் ஆதி³, இத³மவோசாதி பரியோஸானங். ஸாத்த²ந்தி ஸாத்த²கங் கத்வா தே³ஸேத². ஸப்³யஞ்ஜனந்தி ப்³யஞ்ஜனேஹி சேவ பதே³ஹி ச பரிபூரங் கத்வா தே³ஸேத². கேவலபரிபுண்ணந்தி ஸகலபரிபுண்ணங். பரிஸுத்³த⁴ந்தி நிருபக்கிலேஸங். ப்³ரஹ்மசரியந்தி ஸிக்க²த்தயஸங்க³ஹங் ஸாஸனப்³ரஹ்மசரியங். பகாஸேதா²தி ஆவி கரோத².
32. Idāni saraṇagamanūpasampadaṃ dassetuṃ ‘‘atha kho bhagavā’’tiādi āraddhaṃ. Tatrāyaṃ anupubbapadavaṇṇanā (saṃ. ni. aṭṭha. 1.1.141) – muttāhanti mutto ahaṃ. Cārikanti anupubbagamanacārikaṃ, gāmanigamarājadhānīsu anukkamena gamanasaṅkhātaṃ cārikanti attho. Carathāti divasaṃ yojanaparamaṃ gacchantā caratha. Mā ekena dve agamitthāti ekena maggena dvīsu gatesu ekasmiṃ dhammaṃ desente ekena tuṇhībhūtena ṭhātabbaṃ hoti, tasmā evamāha. Ādikalyāṇanti ādimhi kalyāṇaṃ sundaraṃ bhaddakaṃ, tathā majjhapariyosānesu. Ādimajjhapariyosānañca nāmetaṃ sāsanassa ca desanāya ca vasena dubbidhaṃ. Tattha sāsanassa sīlaṃ ādi, samathavipassanāmaggā majjhaṃ, phalanibbānāni pariyosānaṃ. Sīlasamādhayo vā ādi, vipassanāmaggā majjhaṃ, phalanibbānāni pariyosānaṃ. Sīlasamādhivipassanā vā ādi, maggo majjhaṃ, phalanibbānāni pariyosānaṃ. Desanāya pana catuppadikagāthāya tāva paṭhamapādo ādi, dutiyatatiyā majjhaṃ, catuttho pariyosānaṃ. Pañcapadachappadānaṃ paṭhamapādo ādi, avasānapādo pariyosānaṃ, sesā majjhaṃ. Ekānusandhikassa suttassa nidānaṃ ādi, idamavocāti pariyosānaṃ, sesaṃ majjhaṃ. Anekānusandhikassa suttassa majjhe bahukampi anusandhi majjhameva, nidānaṃ ādi, idamavocāti pariyosānaṃ. Sātthanti sātthakaṃ katvā desetha. Sabyañjananti byañjanehi ceva padehi ca paripūraṃ katvā desetha. Kevalaparipuṇṇanti sakalaparipuṇṇaṃ. Parisuddhanti nirupakkilesaṃ. Brahmacariyanti sikkhattayasaṅgahaṃ sāsanabrahmacariyaṃ. Pakāsethāti āvi karotha.
அப்பரஜக்க²ஜாதிகாதி பஞ்ஞாசக்கு²ம்ஹி அப்பகிலேஸரஜஸபா⁴வா, து³கூலஸாணியா படிச்ச²ன்னா விய சதுப்பதி³ககா³தா²பரியோஸானே அரஹத்தங் பத்துங் ஸமத்தா² ஸத்தா ஸந்தீதி அத்தோ². பரிஹாயந்தீதி அலாப⁴பரிஹானியா த⁴ம்மதோ பரிஹாயந்தி. தேனேவாஹ ‘‘அனதி⁴க³தங் நாதி⁴க³ச்ச²ந்தா விஸேஸாதி⁴க³மதோ பரிஹாயந்தீ’’தி. ஸேனானிக³மோதி ஸேனாய நிக³மோ. பட²மகப்பிகானங் கிர தஸ்மிங் டா²னே ஸேனானிவேஸோ அஹோஸி, தஸ்மா ஸோ பதே³ஸோ ‘‘ஸேனானிக³மோ’’தி வுச்சதி. ‘‘ஸேனானிகா³மோ’’திபி பாடோ², ஸேனானி நாம ஸுஜாதாய பிதா, தஸ்ஸ கா³மோதி அத்தோ². தேனுபஸங்கமிஸ்ஸாமீதி நாஹங் தும்ஹே உய்யோஜெத்வா பரிவேணாதீ³னி காரெத்வா உபட்டா²காதீ³ஹி பரிசரியமானோ விஹரிஸ்ஸாமி, திண்ணங் பன ஜடிலானங் அட்³டு⁴ட்³டா⁴னி பாடிஹாரியஸஹஸ்ஸானி த³ஸ்ஸெத்வா த⁴ம்மமேவ தே³ஸேதுங் உபஸங்கமிஸ்ஸாமி.
Apparajakkhajātikāti paññācakkhumhi appakilesarajasabhāvā, dukūlasāṇiyā paṭicchannā viya catuppadikagāthāpariyosāne arahattaṃ pattuṃ samatthā sattā santīti attho. Parihāyantīti alābhaparihāniyā dhammato parihāyanti. Tenevāha ‘‘anadhigataṃ nādhigacchantā visesādhigamato parihāyantī’’ti. Senānigamoti senāya nigamo. Paṭhamakappikānaṃ kira tasmiṃ ṭhāne senāniveso ahosi, tasmā so padeso ‘‘senānigamo’’ti vuccati. ‘‘Senānigāmo’’tipi pāṭho, senāni nāma sujātāya pitā, tassa gāmoti attho. Tenupasaṅkamissāmīti nāhaṃ tumhe uyyojetvā pariveṇādīni kāretvā upaṭṭhākādīhi paricariyamāno viharissāmi, tiṇṇaṃ pana jaṭilānaṃ aḍḍhuḍḍhāni pāṭihāriyasahassāni dassetvā dhammameva desetuṃ upasaṅkamissāmi.
33. மாரோ பாபிமாதி அத்தனோ விஸயங் அதிக்கமிதுங் படிபன்னே ஸத்தே மாரேதீதி மாரோ, பரே பாபே நியோஜேதி, ஸயங் வா பாபே நியுத்தோதி பாபிமா. அஞ்ஞானிபிஸ்ஸ கண்ஹோ அதி⁴பதி வஸவத்தீ அந்தகோ நமுசி பமத்தப³ந்தூ⁴திஆதீ³னி ப³ஹூனி நாமானி, இத⁴ பன நாமத்³வயமேவ க³ஹிதங். உபஸங்கமீதி ‘‘அயங் ஸமணோ கோ³தமோ மஹாயுத்³த⁴ங் விசாரெந்தோ விய ‘மா ஏகேன த்³வே அக³மித்த², த⁴ம்மங் தே³ஸேதா²’தி ஸட்டி² ஜனே உய்யோஜேதி, இமஸ்மிங் பன ஏகஸ்மிம்பி த⁴ம்மங் தே³ஸெந்தே மய்ஹங் சித்தஸ்ஸ ஸாதங் நத்தி², ஏவங் ப³ஹூஸு தே³ஸெந்தேஸு குதோ ப⁴விஸ்ஸதி, படிபா³ஹாமி ந’’ந்தி சிந்தெத்வா உபஸங்கமி.
33.Māro pāpimāti attano visayaṃ atikkamituṃ paṭipanne satte māretīti māro, pare pāpe niyojeti, sayaṃ vā pāpe niyuttoti pāpimā. Aññānipissa kaṇho adhipati vasavattī antako namuci pamattabandhūtiādīni bahūni nāmāni, idha pana nāmadvayameva gahitaṃ. Upasaṅkamīti ‘‘ayaṃ samaṇo gotamo mahāyuddhaṃ vicārento viya ‘mā ekena dve agamittha, dhammaṃ desethā’ti saṭṭhi jane uyyojeti, imasmiṃ pana ekasmimpi dhammaṃ desente mayhaṃ cittassa sātaṃ natthi, evaṃ bahūsu desentesu kuto bhavissati, paṭibāhāmi na’’nti cintetvā upasaṅkami.
ஸப்³ப³பாஸேஹீதி ஸப்³பே³ஹி கிலேஸபாஸேஹி. யே தி³ப்³பா³ யே ச மானுஸாதி யே தி³ப்³ப³காமகு³ணஸங்கா²தா மானுஸககாமகு³ணஸங்கா²தா ச கிலேஸபாஸா நாம அத்தி², ஸப்³பே³ஹி தேஹி த்வங் ப³த்³தோ⁴தி வத³தி. மஹாப³ந்த⁴னப³த்³தோ⁴தி மஹதா கிலேஸப³ந்த⁴னேன ப³த்³தோ⁴, மஹதி வா ப³ந்த⁴னே ப³த்³தோ⁴, கிலேஸப³ந்த⁴னஸ்ஸ டா²னபூ⁴தே ப⁴வசாரகே ப³த்³தோ⁴தி அத்தோ². ந மே ஸமண மொக்க²ஸீதி ஸமண த்வங் மம விஸயதோ ந முச்சிஸ்ஸஸி. ‘‘ந மே ஸமண மொக்க²ஸீ’’தி ச இத³ங் மாரோ ‘‘முத்தாஹங், பி⁴க்க²வே, ஸப்³ப³பாஸேஹீ’’தி ப⁴க³வதோ வசனங் அஸத்³த³ஹந்தோ வத³தி, ஸத்³த³ஹந்தோபி வா ‘‘ஏவமயங் பரேஸங் ஸத்தானங் மொக்கா²ய உஸ்ஸாஹங் ந கரெய்யா’’தி ஸந்தஜ்ஜெந்தோ கோஹஞ்ஞே ட²த்வா வத³தி.
Sabbapāsehīti sabbehi kilesapāsehi. Ye dibbā ye ca mānusāti ye dibbakāmaguṇasaṅkhātā mānusakakāmaguṇasaṅkhātā ca kilesapāsā nāma atthi, sabbehi tehi tvaṃ baddhoti vadati. Mahābandhanabaddhoti mahatā kilesabandhanena baddho, mahati vā bandhane baddho, kilesabandhanassa ṭhānabhūte bhavacārake baddhoti attho. Na me samaṇa mokkhasīti samaṇa tvaṃ mama visayato na muccissasi. ‘‘Na me samaṇa mokkhasī’’ti ca idaṃ māro ‘‘muttāhaṃ, bhikkhave, sabbapāsehī’’ti bhagavato vacanaṃ asaddahanto vadati, saddahantopi vā ‘‘evamayaṃ paresaṃ sattānaṃ mokkhāya ussāhaṃ na kareyyā’’ti santajjento kohaññe ṭhatvā vadati.
நிஹதோதி த்வங் மயா நிஹதோ, நிப்³பி³ஸேவனபா⁴வங் க³மிதோ பராஜிதோதி அத்தோ². அந்தலிக்கே² சரந்தே பஞ்சாபி⁴ஞ்ஞேபி ப³ந்த⁴தீதி அந்தலிக்க²சரோ. ராக³பாஸோ ஹி அந்தலிக்க²சரேஸுபி கிச்சஸாத⁴னதோ ‘‘அந்தலிக்க²சரோ’’தி வுச்சதி, தேனேவ நங் மாரோபி அந்தலிக்க²சரோதி மஞ்ஞதி. மனஸி ஜாதோதி மானஸோ, மனஸம்பயுத்தோதி அத்தோ². ஸேஸமெத்த² உத்தானத்த²மேவ.
Nihatoti tvaṃ mayā nihato, nibbisevanabhāvaṃ gamito parājitoti attho. Antalikkhe carante pañcābhiññepi bandhatīti antalikkhacaro. Rāgapāso hi antalikkhacaresupi kiccasādhanato ‘‘antalikkhacaro’’ti vuccati, teneva naṃ māropi antalikkhacaroti maññati. Manasi jātoti mānaso, manasampayuttoti attho. Sesamettha uttānatthameva.
மாரகதா²வண்ணனா நிட்டி²தா.
Mārakathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 8. மாரகதா² • 8. Mārakathā
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / பப்³ப³ஜ்ஜாகதா² • Pabbajjākathā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / பப்³ப³ஜ்ஜாகதா²வண்ணனா • Pabbajjākathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 7. பப்³ப³ஜ்ஜாகதா² • 7. Pabbajjākathā
