| Library / Tipiṭaka / তিপিটক • Tipiṭaka / সারত্থদীপনী-টীকা • Sāratthadīpanī-ṭīkā |
মারকথাৰণ্ণনা
Mārakathāvaṇṇanā
৩২. ইদানি সরণগমনূপসম্পদং দস্সেতুং ‘‘অথ খো ভগৰা’’তিআদি আরদ্ধং। তত্রাযং অনুপুব্বপদৰণ্ণনা (সং॰ নি॰ অট্ঠ॰ ১.১.১৪১) – মুত্তাহন্তি মুত্তো অহং। চারিকন্তি অনুপুব্বগমনচারিকং, গামনিগমরাজধানীসু অনুক্কমেন গমনসঙ্খাতং চারিকন্তি অত্থো। চরথাতি দিৰসং যোজনপরমং গচ্ছন্তা চরথ। মা একেন দ্ৰে অগমিত্থাতি একেন মগ্গেন দ্ৰীসু গতেসু একস্মিং ধম্মং দেসেন্তে একেন তুণ্হীভূতেন ঠাতব্বং হোতি, তস্মা এৰমাহ। আদিকল্যাণন্তি আদিম্হি কল্যাণং সুন্দরং ভদ্দকং, তথা মজ্ঝপরিযোসানেসু। আদিমজ্ঝপরিযোসানঞ্চ নামেতং সাসনস্স চ দেসনায চ ৰসেন দুব্বিধং। তত্থ সাসনস্স সীলং আদি, সমথৰিপস্সনামগ্গা মজ্ঝং, ফলনিব্বানানি পরিযোসানং। সীলসমাধযো ৰা আদি, ৰিপস্সনামগ্গা মজ্ঝং, ফলনিব্বানানি পরিযোসানং। সীলসমাধিৰিপস্সনা ৰা আদি, মগ্গো মজ্ঝং, ফলনিব্বানানি পরিযোসানং। দেসনায পন চতুপ্পদিকগাথায তাৰ পঠমপাদো আদি, দুতিযততিযা মজ্ঝং, চতুত্থো পরিযোসানং। পঞ্চপদছপ্পদানং পঠমপাদো আদি, অৰসানপাদো পরিযোসানং, সেসা মজ্ঝং। একানুসন্ধিকস্স সুত্তস্স নিদানং আদি, ইদমৰোচাতি পরিযোসানং, সেসং মজ্ঝং। অনেকানুসন্ধিকস্স সুত্তস্স মজ্ঝে বহুকম্পি অনুসন্ধি মজ্ঝমেৰ, নিদানং আদি, ইদমৰোচাতি পরিযোসানং। সাত্থন্তি সাত্থকং কত্ৰা দেসেথ। সব্যঞ্জনন্তি ব্যঞ্জনেহি চেৰ পদেহি চ পরিপূরং কত্ৰা দেসেথ। কেৰলপরিপুণ্ণন্তি সকলপরিপুণ্ণং। পরিসুদ্ধন্তি নিরুপক্কিলেসং। ব্রহ্মচরিযন্তি সিক্খত্তযসঙ্গহং সাসনব্রহ্মচরিযং। পকাসেথাতি আৰি করোথ।
32. Idāni saraṇagamanūpasampadaṃ dassetuṃ ‘‘atha kho bhagavā’’tiādi āraddhaṃ. Tatrāyaṃ anupubbapadavaṇṇanā (saṃ. ni. aṭṭha. 1.1.141) – muttāhanti mutto ahaṃ. Cārikanti anupubbagamanacārikaṃ, gāmanigamarājadhānīsu anukkamena gamanasaṅkhātaṃ cārikanti attho. Carathāti divasaṃ yojanaparamaṃ gacchantā caratha. Mā ekena dve agamitthāti ekena maggena dvīsu gatesu ekasmiṃ dhammaṃ desente ekena tuṇhībhūtena ṭhātabbaṃ hoti, tasmā evamāha. Ādikalyāṇanti ādimhi kalyāṇaṃ sundaraṃ bhaddakaṃ, tathā majjhapariyosānesu. Ādimajjhapariyosānañca nāmetaṃ sāsanassa ca desanāya ca vasena dubbidhaṃ. Tattha sāsanassa sīlaṃ ādi, samathavipassanāmaggā majjhaṃ, phalanibbānāni pariyosānaṃ. Sīlasamādhayo vā ādi, vipassanāmaggā majjhaṃ, phalanibbānāni pariyosānaṃ. Sīlasamādhivipassanā vā ādi, maggo majjhaṃ, phalanibbānāni pariyosānaṃ. Desanāya pana catuppadikagāthāya tāva paṭhamapādo ādi, dutiyatatiyā majjhaṃ, catuttho pariyosānaṃ. Pañcapadachappadānaṃ paṭhamapādo ādi, avasānapādo pariyosānaṃ, sesā majjhaṃ. Ekānusandhikassa suttassa nidānaṃ ādi, idamavocāti pariyosānaṃ, sesaṃ majjhaṃ. Anekānusandhikassa suttassa majjhe bahukampi anusandhi majjhameva, nidānaṃ ādi, idamavocāti pariyosānaṃ. Sātthanti sātthakaṃ katvā desetha. Sabyañjananti byañjanehi ceva padehi ca paripūraṃ katvā desetha. Kevalaparipuṇṇanti sakalaparipuṇṇaṃ. Parisuddhanti nirupakkilesaṃ. Brahmacariyanti sikkhattayasaṅgahaṃ sāsanabrahmacariyaṃ. Pakāsethāti āvi karotha.
অপ্পরজক্খজাতিকাতি পঞ্ঞাচক্খুম্হি অপ্পকিলেসরজসভাৰা, দুকূলসাণিযা পটিচ্ছন্না ৰিয চতুপ্পদিকগাথাপরিযোসানে অরহত্তং পত্তুং সমত্থা সত্তা সন্তীতি অত্থো। পরিহাযন্তীতি অলাভপরিহানিযা ধম্মতো পরিহাযন্তি। তেনেৰাহ ‘‘অনধিগতং নাধিগচ্ছন্তা ৰিসেসাধিগমতো পরিহাযন্তী’’তি। সেনানিগমোতি সেনায নিগমো। পঠমকপ্পিকানং কির তস্মিং ঠানে সেনানিৰেসো অহোসি, তস্মা সো পদেসো ‘‘সেনানিগমো’’তি ৰুচ্চতি। ‘‘সেনানিগামো’’তিপি পাঠো, সেনানি নাম সুজাতায পিতা, তস্স গামোতি অত্থো। তেনুপসঙ্কমিস্সামীতি নাহং তুম্হে উয্যোজেত্ৰা পরিৰেণাদীনি কারেত্ৰা উপট্ঠাকাদীহি পরিচরিযমানো ৰিহরিস্সামি, তিণ্ণং পন জটিলানং অড্ঢুড্ঢানি পাটিহারিযসহস্সানি দস্সেত্ৰা ধম্মমেৰ দেসেতুং উপসঙ্কমিস্সামি।
Apparajakkhajātikāti paññācakkhumhi appakilesarajasabhāvā, dukūlasāṇiyā paṭicchannā viya catuppadikagāthāpariyosāne arahattaṃ pattuṃ samatthā sattā santīti attho. Parihāyantīti alābhaparihāniyā dhammato parihāyanti. Tenevāha ‘‘anadhigataṃ nādhigacchantā visesādhigamato parihāyantī’’ti. Senānigamoti senāya nigamo. Paṭhamakappikānaṃ kira tasmiṃ ṭhāne senāniveso ahosi, tasmā so padeso ‘‘senānigamo’’ti vuccati. ‘‘Senānigāmo’’tipi pāṭho, senāni nāma sujātāya pitā, tassa gāmoti attho. Tenupasaṅkamissāmīti nāhaṃ tumhe uyyojetvā pariveṇādīni kāretvā upaṭṭhākādīhi paricariyamāno viharissāmi, tiṇṇaṃ pana jaṭilānaṃ aḍḍhuḍḍhāni pāṭihāriyasahassāni dassetvā dhammameva desetuṃ upasaṅkamissāmi.
৩৩. মারো পাপিমাতি অত্তনো ৰিসযং অতিক্কমিতুং পটিপন্নে সত্তে মারেতীতি মারো, পরে পাপে নিযোজেতি, সযং ৰা পাপে নিযুত্তোতি পাপিমা। অঞ্ঞানিপিস্স কণ্হো অধিপতি ৰসৰত্তী অন্তকো নমুচি পমত্তবন্ধূতিআদীনি বহূনি নামানি, ইধ পন নামদ্ৰযমেৰ গহিতং। উপসঙ্কমীতি ‘‘অযং সমণো গোতমো মহাযুদ্ধং ৰিচারেন্তো ৰিয ‘মা একেন দ্ৰে অগমিত্থ, ধম্মং দেসেথা’তি সট্ঠি জনে উয্যোজেতি, ইমস্মিং পন একস্মিম্পি ধম্মং দেসেন্তে ময্হং চিত্তস্স সাতং নত্থি, এৰং বহূসু দেসেন্তেসু কুতো ভৰিস্সতি, পটিবাহামি ন’’ন্তি চিন্তেত্ৰা উপসঙ্কমি।
33.Māro pāpimāti attano visayaṃ atikkamituṃ paṭipanne satte māretīti māro, pare pāpe niyojeti, sayaṃ vā pāpe niyuttoti pāpimā. Aññānipissa kaṇho adhipati vasavattī antako namuci pamattabandhūtiādīni bahūni nāmāni, idha pana nāmadvayameva gahitaṃ. Upasaṅkamīti ‘‘ayaṃ samaṇo gotamo mahāyuddhaṃ vicārento viya ‘mā ekena dve agamittha, dhammaṃ desethā’ti saṭṭhi jane uyyojeti, imasmiṃ pana ekasmimpi dhammaṃ desente mayhaṃ cittassa sātaṃ natthi, evaṃ bahūsu desentesu kuto bhavissati, paṭibāhāmi na’’nti cintetvā upasaṅkami.
সব্বপাসেহীতি সব্বেহি কিলেসপাসেহি। যে দিব্বা যে চ মানুসাতি যে দিব্বকামগুণসঙ্খাতা মানুসককামগুণসঙ্খাতা চ কিলেসপাসা নাম অত্থি, সব্বেহি তেহি ত্ৰং বদ্ধোতি ৰদতি। মহাবন্ধনবদ্ধোতি মহতা কিলেসবন্ধনেন বদ্ধো, মহতি ৰা বন্ধনে বদ্ধো, কিলেসবন্ধনস্স ঠানভূতে ভৰচারকে বদ্ধোতি অত্থো। ন মে সমণ মোক্খসীতি সমণ ত্ৰং মম ৰিসযতো ন মুচ্চিস্সসি। ‘‘ন মে সমণ মোক্খসী’’তি চ ইদং মারো ‘‘মুত্তাহং, ভিক্খৰে, সব্বপাসেহী’’তি ভগৰতো ৰচনং অসদ্দহন্তো ৰদতি, সদ্দহন্তোপি ৰা ‘‘এৰমযং পরেসং সত্তানং মোক্খায উস্সাহং ন করেয্যা’’তি সন্তজ্জেন্তো কোহঞ্ঞে ঠত্ৰা ৰদতি।
Sabbapāsehīti sabbehi kilesapāsehi. Ye dibbā ye ca mānusāti ye dibbakāmaguṇasaṅkhātā mānusakakāmaguṇasaṅkhātā ca kilesapāsā nāma atthi, sabbehi tehi tvaṃ baddhoti vadati. Mahābandhanabaddhoti mahatā kilesabandhanena baddho, mahati vā bandhane baddho, kilesabandhanassa ṭhānabhūte bhavacārake baddhoti attho. Na me samaṇa mokkhasīti samaṇa tvaṃ mama visayato na muccissasi. ‘‘Na me samaṇa mokkhasī’’ti ca idaṃ māro ‘‘muttāhaṃ, bhikkhave, sabbapāsehī’’ti bhagavato vacanaṃ asaddahanto vadati, saddahantopi vā ‘‘evamayaṃ paresaṃ sattānaṃ mokkhāya ussāhaṃ na kareyyā’’ti santajjento kohaññe ṭhatvā vadati.
নিহতোতি ত্ৰং মযা নিহতো, নিব্বিসেৰনভাৰং গমিতো পরাজিতোতি অত্থো। অন্তলিক্খে চরন্তে পঞ্চাভিঞ্ঞেপি বন্ধতীতি অন্তলিক্খচরো। রাগপাসো হি অন্তলিক্খচরেসুপি কিচ্চসাধনতো ‘‘অন্তলিক্খচরো’’তি ৰুচ্চতি, তেনেৰ নং মারোপি অন্তলিক্খচরোতি মঞ্ঞতি। মনসি জাতোতি মানসো, মনসম্পযুত্তোতি অত্থো। সেসমেত্থ উত্তানত্থমেৰ।
Nihatoti tvaṃ mayā nihato, nibbisevanabhāvaṃ gamito parājitoti attho. Antalikkhe carante pañcābhiññepi bandhatīti antalikkhacaro. Rāgapāso hi antalikkhacaresupi kiccasādhanato ‘‘antalikkhacaro’’ti vuccati, teneva naṃ māropi antalikkhacaroti maññati. Manasi jātoti mānaso, manasampayuttoti attho. Sesamettha uttānatthameva.
মারকথাৰণ্ণনা নিট্ঠিতা।
Mārakathāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi / ৮. মারকথা • 8. Mārakathā
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / পব্বজ্জাকথা • Pabbajjākathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / পব্বজ্জাকথাৰণ্ণনা • Pabbajjākathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ৭. পব্বজ্জাকথা • 7. Pabbajjākathā
