| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ • Saṃyuttanikāya |
೨. ರಾಧಸಂಯುತ್ತಂ
2. Rādhasaṃyuttaṃ
೧. ಪಠಮವಗ್ಗೋ
1. Paṭhamavaggo
೧. ಮಾರಸುತ್ತಂ
1. Mārasuttaṃ
೧೬೦. ಸಾವತ್ಥಿನಿದಾನಂ । ಅಥ ಖೋ ಆಯಸ್ಮಾ ರಾಧೋ ಯೇನ ಭಗವಾ ತೇನುಪಸಙ್ಕಮಿ ; ಉಪಸಙ್ಕಮಿತ್ವಾ ಭಗವನ್ತಂ ಅಭಿವಾದೇತ್ವಾ ಏಕಮನ್ತಂ ನಿಸೀದಿ। ಏಕಮನ್ತಂ ನಿಸಿನ್ನೋ ಖೋ ಆಯಸ್ಮಾ ರಾಧೋ ಭಗವನ್ತಂ ಏತದವೋಚ –
160. Sāvatthinidānaṃ . Atha kho āyasmā rādho yena bhagavā tenupasaṅkami ; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā rādho bhagavantaṃ etadavoca –
‘‘‘ಮಾರೋ, ಮಾರೋ’ತಿ, ಭನ್ತೇ, ವುಚ್ಚತಿ। ಕಿತ್ತಾವತಾ ನು ಖೋ, ಭನ್ತೇ, ಮಾರೋ’’ತಿ? ‘‘ರೂಪೇ ಖೋ, ರಾಧ, ಸತಿ ಮಾರೋ ವಾ ಅಸ್ಸ ಮಾರೇತಾ ವಾ ಯೋ ವಾ ಪನ ಮೀಯತಿ। ತಸ್ಮಾತಿಹ ತ್ವಂ, ರಾಧ, ರೂಪಂ ಮಾರೋತಿ ಪಸ್ಸ, ಮಾರೇತಾತಿ ಪಸ್ಸ, ಮೀಯತೀತಿ ಪಸ್ಸ, ರೋಗೋತಿ ಪಸ್ಸ, ಗಣ್ಡೋತಿ ಪಸ್ಸ, ಸಲ್ಲನ್ತಿ ಪಸ್ಸ, ಅಘನ್ತಿ ಪಸ್ಸ, ಅಘಭೂತನ್ತಿ ಪಸ್ಸ। ಯೇ ನಂ ಏವಂ ಪಸ್ಸನ್ತಿ ತೇ ಸಮ್ಮಾ ಪಸ್ಸನ್ತಿ। ವೇದನಾಯ ಸತಿ… ಸಞ್ಞಾಯ ಸತಿ… ಸಙ್ಖಾರೇಸು ಸತಿ… ವಿಞ್ಞಾಣೇ ಸತಿ ಮಾರೋ ವಾ ಅಸ್ಸ ಮಾರೇತಾ ವಾ ಯೋ ವಾ ಪನ ಮೀಯತಿ। ತಸ್ಮಾತಿಹ ತ್ವಂ, ರಾಧ, ವಿಞ್ಞಾಣಂ ಮಾರೋತಿ ಪಸ್ಸ, ಮಾರೇತಾತಿ ಪಸ್ಸ, ಮೀಯತೀತಿ ಪಸ್ಸ, ರೋಗೋತಿ ಪಸ್ಸ, ಗಣ್ಡೋತಿ ಪಸ್ಸ, ಸಲ್ಲನ್ತಿ ಪಸ್ಸ, ಅಘನ್ತಿ ಪಸ್ಸ, ಅಘಭೂತನ್ತಿ ಪಸ್ಸ। ಯೇ ನಂ ಏವಂ ಪಸ್ಸನ್ತಿ, ತೇ ಸಮ್ಮಾ ಪಸ್ಸನ್ತೀ’’ತಿ।
‘‘‘Māro, māro’ti, bhante, vuccati. Kittāvatā nu kho, bhante, māro’’ti? ‘‘Rūpe kho, rādha, sati māro vā assa māretā vā yo vā pana mīyati. Tasmātiha tvaṃ, rādha, rūpaṃ māroti passa, māretāti passa, mīyatīti passa, rogoti passa, gaṇḍoti passa, sallanti passa, aghanti passa, aghabhūtanti passa. Ye naṃ evaṃ passanti te sammā passanti. Vedanāya sati… saññāya sati… saṅkhāresu sati… viññāṇe sati māro vā assa māretā vā yo vā pana mīyati. Tasmātiha tvaṃ, rādha, viññāṇaṃ māroti passa, māretāti passa, mīyatīti passa, rogoti passa, gaṇḍoti passa, sallanti passa, aghanti passa, aghabhūtanti passa. Ye naṃ evaṃ passanti, te sammā passantī’’ti.
‘‘ಸಮ್ಮಾದಸ್ಸನಂ ಪನ, ಭನ್ತೇ, ಕಿಮತ್ಥಿಯ’’ನ್ತಿ? ‘‘ಸಮ್ಮಾದಸ್ಸನಂ ಖೋ, ರಾಧ, ನಿಬ್ಬಿದತ್ಥಂ’’। ‘‘ನಿಬ್ಬಿದಾ ಪನ, ಭನ್ತೇ, ಕಿಮತ್ಥಿಯಾ’’ತಿ? ‘‘ನಿಬ್ಬಿದಾ ಖೋ, ರಾಧ, ವಿರಾಗತ್ಥಾ’’। ‘‘ವಿರಾಗೋ ಪನ, ಭನ್ತೇ , ಕಿಮತ್ಥಿಯೋ’’ತಿ? ‘‘ವಿರಾಗೋ ಖೋ, ರಾಧ, ವಿಮುತ್ತತ್ಥೋ’’। ‘‘ವಿಮುತ್ತಿ ಪನ, ಭನ್ತೇ, ಕಿಮತ್ಥಿಯಾ’’ತಿ? ‘‘ವಿಮುತ್ತಿ ಖೋ, ರಾಧ, ನಿಬ್ಬಾನತ್ಥಾ’’। ‘‘ನಿಬ್ಬಾನಂ ಪನ, ಭನ್ತೇ, ಕಿಮತ್ಥಿಯ’’ನ್ತಿ? ‘‘ಅಚ್ಚಯಾಸಿ 1, ರಾಧ, ಪಞ್ಹಂ, ನಾಸಕ್ಖಿ ಪಞ್ಹಸ್ಸ ಪರಿಯನ್ತಂ ಗಹೇತುಂ। ನಿಬ್ಬಾನೋಗಧಞ್ಹಿ, ರಾಧ, ಬ್ರಹ್ಮಚರಿಯಂ ವುಸ್ಸತಿ, ನಿಬ್ಬಾನಪರಾಯನಂ ನಿಬ್ಬಾನಪರಿಯೋಸಾನ’’ನ್ತಿ। ಪಠಮಂ।
‘‘Sammādassanaṃ pana, bhante, kimatthiya’’nti? ‘‘Sammādassanaṃ kho, rādha, nibbidatthaṃ’’. ‘‘Nibbidā pana, bhante, kimatthiyā’’ti? ‘‘Nibbidā kho, rādha, virāgatthā’’. ‘‘Virāgo pana, bhante , kimatthiyo’’ti? ‘‘Virāgo kho, rādha, vimuttattho’’. ‘‘Vimutti pana, bhante, kimatthiyā’’ti? ‘‘Vimutti kho, rādha, nibbānatthā’’. ‘‘Nibbānaṃ pana, bhante, kimatthiya’’nti? ‘‘Accayāsi 2, rādha, pañhaṃ, nāsakkhi pañhassa pariyantaṃ gahetuṃ. Nibbānogadhañhi, rādha, brahmacariyaṃ vussati, nibbānaparāyanaṃ nibbānapariyosāna’’nti. Paṭhamaṃ.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೧. ಮಾರಸುತ್ತವಣ್ಣನಾ • 1. Mārasuttavaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) / ೧. ಮಾರಸುತ್ತವಣ್ಣನಾ • 1. Mārasuttavaṇṇanā
