| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
2. රාධසංයුත්‌තං
2. Rādhasaṃyuttaṃ
1. පඨමවග්‌ගො
1. Paṭhamavaggo
1. මාරසුත්‌තං
1. Mārasuttaṃ
160. සාවත්‌ථිනිදානං . අථ ඛො ආයස්‌මා රාධො යෙන භගවා තෙනුපසඞ්‌කමි ; උපසඞ්‌කමිත්‌වා භගවන්‌තං අභිවාදෙත්‌වා එකමන්‌තං නිසීදි. එකමන්‌තං නිසින්‌නො ඛො ආයස්‌මා රාධො භගවන්‌තං එතදවොච –
160. Sāvatthinidānaṃ . Atha kho āyasmā rādho yena bhagavā tenupasaṅkami ; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā rādho bhagavantaṃ etadavoca –
‘‘‘මාරො, මාරො’ති, භන්‌තෙ, වුච්‌චති. කිත්‌තාවතා නු ඛො, භන්‌තෙ, මාරො’’ති? ‘‘රූපෙ ඛො, රාධ, සති මාරො වා අස්‌ස මාරෙතා වා යො වා පන මීයති. තස්‌මාතිහ ත්‌වං, රාධ, රූපං මාරොති පස්‌ස, මාරෙතාති පස්‌ස, මීයතීති පස්‌ස, රොගොති පස්‌ස, ගණ්‌ඩොති පස්‌ස, සල්‌ලන්‌ති පස්‌ස, අඝන්‌ති පස්‌ස, අඝභූතන්‌ති පස්‌ස. යෙ නං එවං පස්‌සන්‌ති තෙ සම්‌මා පස්‌සන්‌ති. වෙදනාය සති… සඤ්‌ඤාය සති… සඞ්‌ඛාරෙසු සති… විඤ්‌ඤාණෙ සති මාරො වා අස්‌ස මාරෙතා වා යො වා පන මීයති. තස්‌මාතිහ ත්‌වං, රාධ, විඤ්‌ඤාණං මාරොති පස්‌ස, මාරෙතාති පස්‌ස, මීයතීති පස්‌ස, රොගොති පස්‌ස, ගණ්‌ඩොති පස්‌ස, සල්‌ලන්‌ති පස්‌ස, අඝන්‌ති පස්‌ස, අඝභූතන්‌ති පස්‌ස. යෙ නං එවං පස්‌සන්‌ති, තෙ සම්‌මා පස්‌සන්‌තී’’ති.
‘‘‘Māro, māro’ti, bhante, vuccati. Kittāvatā nu kho, bhante, māro’’ti? ‘‘Rūpe kho, rādha, sati māro vā assa māretā vā yo vā pana mīyati. Tasmātiha tvaṃ, rādha, rūpaṃ māroti passa, māretāti passa, mīyatīti passa, rogoti passa, gaṇḍoti passa, sallanti passa, aghanti passa, aghabhūtanti passa. Ye naṃ evaṃ passanti te sammā passanti. Vedanāya sati… saññāya sati… saṅkhāresu sati… viññāṇe sati māro vā assa māretā vā yo vā pana mīyati. Tasmātiha tvaṃ, rādha, viññāṇaṃ māroti passa, māretāti passa, mīyatīti passa, rogoti passa, gaṇḍoti passa, sallanti passa, aghanti passa, aghabhūtanti passa. Ye naṃ evaṃ passanti, te sammā passantī’’ti.
‘‘සම්‌මාදස්‌සනං පන, භන්‌තෙ, කිමත්‌ථිය’’න්‌ති? ‘‘සම්‌මාදස්‌සනං ඛො, රාධ, නිබ්‌බිදත්‌ථං’’. ‘‘නිබ්‌බිදා පන, භන්‌තෙ, කිමත්‌ථියා’’ති? ‘‘නිබ්‌බිදා ඛො, රාධ, විරාගත්‌ථා’’. ‘‘විරාගො පන, භන්‌තෙ , කිමත්‌ථියො’’ති? ‘‘විරාගො ඛො, රාධ, විමුත්‌තත්‌ථො’’. ‘‘විමුත්‌ති පන, භන්‌තෙ, කිමත්‌ථියා’’ති? ‘‘විමුත්‌ති ඛො, රාධ, නිබ්‌බානත්‌ථා’’. ‘‘නිබ්‌බානං පන, භන්‌තෙ, කිමත්‌ථිය’’න්‌ති? ‘‘අච්‌චයාසි 1, රාධ, පඤ්‌හං, නාසක්‌ඛි පඤ්‌හස්‌ස පරියන්‌තං ගහෙතුං. නිබ්‌බානොගධඤ්‌හි, රාධ, බ්‍රහ්‌මචරියං වුස්‌සති, නිබ්‌බානපරායනං නිබ්‌බානපරියොසාන’’න්‌ති. පඨමං.
‘‘Sammādassanaṃ pana, bhante, kimatthiya’’nti? ‘‘Sammādassanaṃ kho, rādha, nibbidatthaṃ’’. ‘‘Nibbidā pana, bhante, kimatthiyā’’ti? ‘‘Nibbidā kho, rādha, virāgatthā’’. ‘‘Virāgo pana, bhante , kimatthiyo’’ti? ‘‘Virāgo kho, rādha, vimuttattho’’. ‘‘Vimutti pana, bhante, kimatthiyā’’ti? ‘‘Vimutti kho, rādha, nibbānatthā’’. ‘‘Nibbānaṃ pana, bhante, kimatthiya’’nti? ‘‘Accayāsi 2, rādha, pañhaṃ, nāsakkhi pañhassa pariyantaṃ gahetuṃ. Nibbānogadhañhi, rādha, brahmacariyaṃ vussati, nibbānaparāyanaṃ nibbānapariyosāna’’nti. Paṭhamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 1. මාරසුත්‌තවණ්‌ණනා • 1. Mārasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 1. මාරසුත්‌තවණ්‌ණනා • 1. Mārasuttavaṇṇanā
