| Library / Tipiṭaka / д̇ибидага • Tipiṭaka / маж̇жхиманигааяа • Majjhimanikāya |
10. маарад̇аж̇ж̇анийяасуд̇д̇ам̣
10. Māratajjanīyasuttaṃ
506. звам̣ мз суд̇ам̣ – згам̣ самаяам̣ ааяасмаа махаамог̇г̇аллаано бхаг̇г̇зсу вихарад̇и сусумаараг̇ирз бхзсагал̣ааванз миг̇ад̣̇ааяз. д̇зна ко бана самаязна ааяасмаа махаамог̇г̇аллаано аб̣бхогаасз жан̇гамад̇и. д̇зна ко бана самаязна мааро баабимаа ааяасмад̇о махаамог̇г̇аллаанасса гужчиг̇ад̇о ход̇и годтаманубавидто. ат̇а ко ааяасмад̇о махаамог̇г̇аллаанасса зд̇ад̣̇ахоси – ‘‘гим̣ ну ко мз гужчи г̇аруг̇аро вияа 1? маасаажид̇ам̣ ман̃н̃з’’д̇и. ат̇а ко ааяасмаа махаамог̇г̇аллаано жан̇гамаа орохид̇ваа вихаарам̣ бависид̇ваа бан̃н̃ад̇д̇з аасанз нисийд̣̇и. нисаж̇ж̇а ко ааяасмаа махаамог̇г̇аллаано бажжад̇д̇ам̣ яонисо манасаагааси. ад̣̇д̣̇асаа ко ааяасмаа махаамог̇г̇аллаано маарам̣ баабиманд̇ам̣ гужчиг̇ад̇ам̣ годтаманубавидтам̣. д̣̇исваана маарам̣ баабиманд̇ам̣ зд̇ад̣̇авожа – ‘‘нигкама, баабима; нигкама, баабима! маа д̇ат̇ааг̇ад̇ам̣ вихзсзси, маа д̇ат̇ааг̇ад̇асаавагам̣. маа д̇з ахоси д̣̇ийгхарад̇д̇ам̣ ахид̇ааяа д̣̇угкааяаа’’д̇и. ат̇а ко маарасса баабимад̇о зд̇ад̣̇ахоси – ‘‘аж̇аанамзва ко мам̣ аяам̣ саман̣о абассам̣ звамааха – ‘нигкама, баабима; нигкама, баабима! маа д̇ат̇ааг̇ад̇ам̣ вихзсзси, маа д̇ат̇ааг̇ад̇асаавагам̣. маа д̇з ахоси д̣̇ийгхарад̇д̇ам̣ ахид̇ааяа д̣̇угкааяаа’д̇и. яобисса со сад̇т̇аа соби мам̣ нзва киббам̣ ж̇аанзяяа, гуд̇о бана 2 мам̣ аяам̣ сааваго ж̇ааниссад̇ий’’д̇и? ат̇а ко ааяасмаа махаамог̇г̇аллаано маарам̣ баабиманд̇ам̣ зд̇ад̣̇авожа – ‘‘звамби ко д̇аахам̣, баабима, ж̇аанаами, маа д̇вам̣ ман̃н̃ид̇т̇о – ‘на мам̣ ж̇аанаад̇ий’д̇и. мааро д̇вамаси, баабима; д̇уяхан̃хи, баабима, звам̣ ход̇и – ‘аж̇аанамзва ко мам̣ аяам̣ саман̣о абассам̣ звамааха – нигкама, баабима; нигкама, баабима! маа д̇ат̇ааг̇ад̇ам̣ вихзсзси, маа д̇ат̇ааг̇ад̇асаавагам̣. маа д̇з ахоси д̣̇ийгхарад̇д̇ам̣ ахид̇ааяа д̣̇угкааяаад̇и. яобисса со сад̇т̇аа соби мам̣ нзва киббам̣ ж̇аанзяяа, гуд̇о бана мам̣ аяам̣ сааваго ж̇ааниссад̇ий’’’д̇и?
506. Evaṃ me sutaṃ – ekaṃ samayaṃ āyasmā mahāmoggallāno bhaggesu viharati susumāragire bhesakaḷāvane migadāye. Tena kho pana samayena āyasmā mahāmoggallāno abbhokāse caṅkamati. Tena kho pana samayena māro pāpimā āyasmato mahāmoggallānassa kucchigato hoti koṭṭhamanupaviṭṭho. Atha kho āyasmato mahāmoggallānassa etadahosi – ‘‘kiṃ nu kho me kucchi garugaro viya 3? Māsācitaṃ maññe’’ti. Atha kho āyasmā mahāmoggallāno caṅkamā orohitvā vihāraṃ pavisitvā paññatte āsane nisīdi. Nisajja kho āyasmā mahāmoggallāno paccattaṃ yoniso manasākāsi. Addasā kho āyasmā mahāmoggallāno māraṃ pāpimantaṃ kucchigataṃ koṭṭhamanupaviṭṭhaṃ. Disvāna māraṃ pāpimantaṃ etadavoca – ‘‘nikkhama, pāpima; nikkhama, pāpima! Mā tathāgataṃ vihesesi, mā tathāgatasāvakaṃ. Mā te ahosi dīgharattaṃ ahitāya dukkhāyā’’ti. Atha kho mārassa pāpimato etadahosi – ‘‘ajānameva kho maṃ ayaṃ samaṇo apassaṃ evamāha – ‘nikkhama, pāpima; nikkhama, pāpima! Mā tathāgataṃ vihesesi, mā tathāgatasāvakaṃ. Mā te ahosi dīgharattaṃ ahitāya dukkhāyā’ti. Yopissa so satthā sopi maṃ neva khippaṃ jāneyya, kuto pana 4 maṃ ayaṃ sāvako jānissatī’’ti? Atha kho āyasmā mahāmoggallāno māraṃ pāpimantaṃ etadavoca – ‘‘evampi kho tāhaṃ, pāpima, jānāmi, mā tvaṃ maññittho – ‘na maṃ jānātī’ti. Māro tvamasi, pāpima; tuyhañhi, pāpima, evaṃ hoti – ‘ajānameva kho maṃ ayaṃ samaṇo apassaṃ evamāha – nikkhama, pāpima; nikkhama, pāpima! Mā tathāgataṃ vihesesi, mā tathāgatasāvakaṃ. Mā te ahosi dīgharattaṃ ahitāya dukkhāyāti. Yopissa so satthā sopi maṃ neva khippaṃ jāneyya, kuto pana maṃ ayaṃ sāvako jānissatī’’’ti?
ат̇а ко маарасса баабимад̇о зд̇ад̣̇ахоси – ‘‘ж̇аанамз ко мам̣ аяам̣ саман̣о бассам̣ звамааха – ‘нигкама, баабима; нигкама, баабима! маа д̇ат̇ааг̇ад̇ам̣ вихзсзси, маа д̇ат̇ааг̇ад̇асаавагам̣. маа д̇з ахоси д̣̇ийгхарад̇д̇ам̣ ахид̇ааяа д̣̇угкааяаа’’’д̇и. ат̇а ко мааро баабимаа ааяасмад̇о махаамог̇г̇аллаанасса мукад̇о уг̇г̇анд̇ваа бажжаг̇г̇ал̣з адтааси.
Atha kho mārassa pāpimato etadahosi – ‘‘jāname kho maṃ ayaṃ samaṇo passaṃ evamāha – ‘nikkhama, pāpima; nikkhama, pāpima! Mā tathāgataṃ vihesesi, mā tathāgatasāvakaṃ. Mā te ahosi dīgharattaṃ ahitāya dukkhāyā’’’ti. Atha kho māro pāpimā āyasmato mahāmoggallānassa mukhato uggantvā paccaggaḷe aṭṭhāsi.
507. ад̣̇д̣̇асаа ко ааяасмаа махаамог̇г̇аллаано маарам̣ баабиманд̇ам̣ бажжаг̇г̇ал̣з тид̇ам̣; д̣̇исваана маарам̣ баабиманд̇ам̣ зд̇ад̣̇авожа – ‘зд̇т̇ааби ко д̇аахам̣, баабима, бассаами; маа д̇вам̣ ман̃н̃ид̇т̇о ‘‘на мам̣ бассад̇ий’’д̇и. зсо д̇вам̣, баабима, бажжаг̇г̇ал̣з тид̇о. бхууд̇абуб̣б̣аахам̣, баабима, д̣̇уусий наама мааро ахосим̣, д̇асса мз гаал̣ий наама бхаг̇иний. д̇ассаа д̇вам̣ буд̇д̇о. со мз д̇вам̣ бхааг̇инзяяо ахоси. д̇зна ко бана, баабима, самаязна гагусанд̇хо бхаг̇аваа арахам̣ саммаасамб̣уд̣̇д̇хо логз уббанно ход̇и. гагусанд̇хасса ко бана, баабима, бхаг̇авад̇о арахад̇о саммаасамб̣уд̣̇д̇хасса вид̇хурасан̃ж̇ийвам̣ наама саавагаяуг̇ам̣ ахоси аг̇г̇ам̣ бхад̣̇д̣̇аяуг̇ам̣. яаавад̇аа ко бана, баабима, гагусанд̇хасса бхаг̇авад̇о арахад̇о саммаасамб̣уд̣̇д̇хасса саавагаа. д̇зсу на жа гожи ааяасмад̇аа вид̇хурзна самасамо ход̇и яад̣̇ид̣̇ам̣ д̇хаммад̣̇зсанааяа. иминаа ко звам̣ 5, баабима, барияааязна ааяасмад̇о вид̇хурасса вид̇хурод̇зва 6 саман̃н̃аа уд̣̇абаад̣̇и.
507. Addasā kho āyasmā mahāmoggallāno māraṃ pāpimantaṃ paccaggaḷe ṭhitaṃ; disvāna māraṃ pāpimantaṃ etadavoca – ‘etthāpi kho tāhaṃ, pāpima, passāmi; mā tvaṃ maññittho ‘‘na maṃ passatī’’ti. Eso tvaṃ, pāpima, paccaggaḷe ṭhito. Bhūtapubbāhaṃ, pāpima, dūsī nāma māro ahosiṃ, tassa me kāḷī nāma bhaginī. Tassā tvaṃ putto. So me tvaṃ bhāgineyyo ahosi. Tena kho pana, pāpima, samayena kakusandho bhagavā arahaṃ sammāsambuddho loke uppanno hoti. Kakusandhassa kho pana, pāpima, bhagavato arahato sammāsambuddhassa vidhurasañjīvaṃ nāma sāvakayugaṃ ahosi aggaṃ bhaddayugaṃ. Yāvatā kho pana, pāpima, kakusandhassa bhagavato arahato sammāsambuddhassa sāvakā. Tesu na ca koci āyasmatā vidhurena samasamo hoti yadidaṃ dhammadesanāya. Iminā kho evaṃ 7, pāpima, pariyāyena āyasmato vidhurassa vidhuroteva 8 samaññā udapādi.
‘‘ааяасмаа бана, баабима, сан̃ж̇ийво аран̃н̃аг̇ад̇оби ругкамуулаг̇ад̇оби сун̃н̃ааг̇аараг̇ад̇оби аббагасирзнзва сан̃н̃аавзд̣̇аяид̇анирод̇хам̣ самаабаж̇ж̇ад̇и. бхууд̇абуб̣б̣ам̣, баабима, ааяасмаа сан̃ж̇ийво ан̃н̃ад̇арасмим̣ ругкамуулз сан̃н̃аавзд̣̇аяид̇анирод̇хам̣ самаабанно нисинно ход̇и. ад̣̇д̣̇асам̣су ко, баабима, г̇обаалагаа басубаалагаа гассагаа бат̇аавино ааяасманд̇ам̣ сан̃ж̇ийвам̣ ан̃н̃ад̇арасмим̣ ругкамуулз сан̃н̃аавзд̣̇аяид̇анирод̇хам̣ самаабаннам̣ нисиннам̣; д̣̇исваана д̇зсам̣ зд̇ад̣̇ахоси – ‘ажчарияам̣ вад̇а, бхо, аб̣бхуд̇ам̣ вад̇а, бхо! аяам̣ саман̣о нисиннагова гаалан̇гад̇о! ханд̣̇а нам̣ д̣̇ахаамаа’д̇и. ат̇а ко д̇з, баабима, г̇обаалагаа басубаалагаа гассагаа бат̇аавино д̇ин̣ан̃жа гадтан̃жа г̇омаяан̃жа сам̣гад̣дхид̇ваа ааяасмад̇о сан̃ж̇ийвасса гааяз убажинид̇ваа аг̇г̇им̣ д̣̇ад̇ваа баггамим̣су. ат̇а ко, баабима, ааяасмаа сан̃ж̇ийво д̇ассаа рад̇д̇ияаа ажжаязна д̇ааяа самаабад̇д̇ияаа вудтахид̇ваа жийвараани бабподзд̇ваа буб̣б̣ан̣хасамаяам̣ ниваасзд̇ваа бад̇д̇ажийварамаад̣̇ааяа г̇аамам̣ бин̣д̣ааяа баависи. ад̣̇д̣̇асам̣су ко д̇з, баабима, г̇обаалагаа басубаалагаа гассагаа бат̇аавино ааяасманд̇ам̣ сан̃ж̇ийвам̣ бин̣д̣ааяа жаранд̇ам̣; д̣̇исваана нзсам̣ зд̇ад̣̇ахоси – ‘ажчарияам̣ вад̇а, бхо, аб̣бхуд̇ам̣ вад̇а, бхо! аяам̣ саман̣о нисиннагова гаалан̇гад̇о, свааяам̣ бадисан̃ж̇ийвид̇о’д̇и . иминаа ко звам̣, баабима, барияааязна ааяасмад̇о сан̃ж̇ийвасса сан̃ж̇ийвод̇зва 9 саман̃н̃аа уд̣̇абаад̣̇и.
‘‘Āyasmā pana, pāpima, sañjīvo araññagatopi rukkhamūlagatopi suññāgāragatopi appakasireneva saññāvedayitanirodhaṃ samāpajjati. Bhūtapubbaṃ, pāpima, āyasmā sañjīvo aññatarasmiṃ rukkhamūle saññāvedayitanirodhaṃ samāpanno nisinno hoti. Addasaṃsu kho, pāpima, gopālakā pasupālakā kassakā pathāvino āyasmantaṃ sañjīvaṃ aññatarasmiṃ rukkhamūle saññāvedayitanirodhaṃ samāpannaṃ nisinnaṃ; disvāna tesaṃ etadahosi – ‘acchariyaṃ vata, bho, abbhutaṃ vata, bho! Ayaṃ samaṇo nisinnakova kālaṅkato! Handa naṃ dahāmā’ti. Atha kho te, pāpima, gopālakā pasupālakā kassakā pathāvino tiṇañca kaṭṭhañca gomayañca saṃkaḍḍhitvā āyasmato sañjīvassa kāye upacinitvā aggiṃ datvā pakkamiṃsu. Atha kho, pāpima, āyasmā sañjīvo tassā rattiyā accayena tāya samāpattiyā vuṭṭhahitvā cīvarāni papphoṭetvā pubbaṇhasamayaṃ nivāsetvā pattacīvaramādāya gāmaṃ piṇḍāya pāvisi. Addasaṃsu kho te, pāpima, gopālakā pasupālakā kassakā pathāvino āyasmantaṃ sañjīvaṃ piṇḍāya carantaṃ; disvāna nesaṃ etadahosi – ‘acchariyaṃ vata, bho, abbhutaṃ vata, bho! Ayaṃ samaṇo nisinnakova kālaṅkato, svāyaṃ paṭisañjīvito’ti . Iminā kho evaṃ, pāpima, pariyāyena āyasmato sañjīvassa sañjīvoteva 10 samaññā udapādi.
508. ‘‘ат̇а ко, баабима, д̣̇уусисса маарасса зд̇ад̣̇ахоси – ‘имзсам̣ ко ахам̣ бхигкуунам̣ сийлаванд̇аанам̣ галяаан̣ад̇хаммаанам̣ нзва ж̇аанаами ааг̇ад̇им̣ ваа г̇ад̇им̣ ваа. яам̣нуунаахам̣ б̣раахман̣аг̇ахабад̇игз анваависзяяам̣ – зт̇а, д̇умхз бхигкуу сийлаванд̇з галяаан̣ад̇хаммз аггосат̇а барибхаасат̇а росзт̇а вихзсзт̇а. аббзва наама д̇умхзхи аггосияамаанаанам̣ барибхаасияамаанаанам̣ росияамаанаанам̣ вихзсияамаанаанам̣ сияаа жид̇д̇асса ан̃н̃ат̇ад̇д̇ам̣, яат̇аа д̇ам̣ д̣̇уусий мааро лабхзт̇а од̇аара’нд̇и. ат̇а ко д̇з, баабима, д̣̇уусий мааро б̣раахман̣аг̇ахабад̇игз анваависи – ‘зт̇а, д̇умхз бхигкуу сийлаванд̇з галяаан̣ад̇хаммз аггосат̇а барибхаасат̇а росзт̇а вихзсзт̇а. аббзва наама д̇умхзхи аггосияамаанаанам̣ барибхаасияамаанаанам̣ росияамаанаанам̣ вихзсияамаанаанам̣ сияаа жид̇д̇асса ан̃н̃ат̇ад̇д̇ам̣, яат̇аа д̇ам̣ д̣̇уусий мааро лабхзт̇а од̇аара’нд̇и.
508. ‘‘Atha kho, pāpima, dūsissa mārassa etadahosi – ‘imesaṃ kho ahaṃ bhikkhūnaṃ sīlavantānaṃ kalyāṇadhammānaṃ neva jānāmi āgatiṃ vā gatiṃ vā. Yaṃnūnāhaṃ brāhmaṇagahapatike anvāviseyyaṃ – etha, tumhe bhikkhū sīlavante kalyāṇadhamme akkosatha paribhāsatha rosetha vihesetha. Appeva nāma tumhehi akkosiyamānānaṃ paribhāsiyamānānaṃ rosiyamānānaṃ vihesiyamānānaṃ siyā cittassa aññathattaṃ, yathā taṃ dūsī māro labhetha otāra’nti. Atha kho te, pāpima, dūsī māro brāhmaṇagahapatike anvāvisi – ‘etha, tumhe bhikkhū sīlavante kalyāṇadhamme akkosatha paribhāsatha rosetha vihesetha. Appeva nāma tumhehi akkosiyamānānaṃ paribhāsiyamānānaṃ rosiyamānānaṃ vihesiyamānānaṃ siyā cittassa aññathattaṃ, yathā taṃ dūsī māro labhetha otāra’nti.
‘‘ат̇а ко д̇з, баабима, б̣раахман̣аг̇ахабад̇игаа анваависидтаа д̣̇уусинаа маарзна бхигкуу сийлаванд̇з галяаан̣ад̇хаммз аггосанд̇и барибхаасанд̇и росзнд̇и вихзсзнд̇и – ‘имз бана мун̣д̣агаа саман̣агаа иб̣бхаа гин̣хаа 11 б̣анд̇хубаад̣̇аабажжаа ‘‘жхааяиносмаа жхааяиносмаа’’д̇и бад̇д̇агканд̇хаа ад̇хомукаа мад̇хурагаж̇аад̇аа жхааяанд̇и баж̇жхааяанд̇и ниж̇жхааяанд̇и абаж̇жхааяанд̇и. сзяяат̇ааби наама улууго ругкасаакааяам̣ муусигам̣ маг̇г̇аяамаано жхааяад̇и баж̇жхааяад̇и ниж̇жхааяад̇и абаж̇жхааяад̇и; звамзвимз мун̣д̣агаа саман̣агаа иб̣бхаа гин̣хаа б̣анд̇хубаад̣̇аабажжаа ‘‘жхааяиносмаа жхааяиносмаа’’д̇и бад̇д̇агканд̇хаа ад̇хомукаа мад̇хурагаж̇аад̇аа жхааяанд̇и баж̇жхааяанд̇и ниж̇жхааяанд̇и абаж̇жхааяанд̇и. сзяяат̇ааби наама год̇т̇у над̣̇ийд̇ийрз мажчз маг̇г̇аяамаано жхааяад̇и баж̇жхааяад̇и ниж̇жхааяад̇и абаж̇жхааяад̇и; звамзвимз мун̣д̣агаа саман̣агаа иб̣бхаа гин̣хаа б̣анд̇хубаад̣̇аабажжаа ‘‘жхааяиносмаа жхааяиносмаа’’д̇и бад̇д̇агканд̇хаа ад̇хомукаа мад̇хурагаж̇аад̇аа жхааяанд̇и баж̇жхааяанд̇и ниж̇жхааяанд̇и абаж̇жхааяанд̇и. сзяяат̇ааби наама б̣ил̣ааро санд̇хисамаласан̇гадийрз муусигам̣ маг̇г̇аяамаано жхааяад̇и баж̇жхааяад̇и ниж̇жхааяад̇и абаж̇жхааяад̇и; звамзвимз мун̣д̣агаа саман̣агаа иб̣бхаа гин̣хаа б̣анд̇хубаад̣̇аабажжаа ‘‘жхааяиносмаа жхааяиносмаа’’д̇и бад̇д̇агканд̇хаа ад̇хомукаа мад̇хурагаж̇аад̇аа жхааяанд̇и баж̇жхааяанд̇и ниж̇жхааяанд̇и абаж̇жхааяанд̇и. сзяяат̇ааби наама г̇ад̣̇рабхо вахажчинно санд̇хисамаласан̇гадийрз жхааяад̇и баж̇жхааяад̇и ниж̇жхааяад̇и абаж̇жхааяад̇и, звамзвимз мун̣д̣агаа саман̣агаа иб̣бхаа гин̣хаа б̣анд̇хубаад̣̇аабажжаа ‘‘жхааяиносмаа жхааяиносмаа’’д̇и бад̇д̇агканд̇хаа ад̇хомукаа мад̇хурагаж̇аад̇аа жхааяанд̇и баж̇жхааяанд̇и ниж̇жхааяанд̇и абаж̇жхааяанд̇ий’’д̇и.
‘‘Atha kho te, pāpima, brāhmaṇagahapatikā anvāvisiṭṭhā dūsinā mārena bhikkhū sīlavante kalyāṇadhamme akkosanti paribhāsanti rosenti vihesenti – ‘ime pana muṇḍakā samaṇakā ibbhā kiṇhā 12 bandhupādāpaccā ‘‘jhāyinosmā jhāyinosmā’’ti pattakkhandhā adhomukhā madhurakajātā jhāyanti pajjhāyanti nijjhāyanti apajjhāyanti. Seyyathāpi nāma ulūko rukkhasākhāyaṃ mūsikaṃ maggayamāno jhāyati pajjhāyati nijjhāyati apajjhāyati; evamevime muṇḍakā samaṇakā ibbhā kiṇhā bandhupādāpaccā ‘‘jhāyinosmā jhāyinosmā’’ti pattakkhandhā adhomukhā madhurakajātā jhāyanti pajjhāyanti nijjhāyanti apajjhāyanti. Seyyathāpi nāma kotthu nadītīre macche maggayamāno jhāyati pajjhāyati nijjhāyati apajjhāyati; evamevime muṇḍakā samaṇakā ibbhā kiṇhā bandhupādāpaccā ‘‘jhāyinosmā jhāyinosmā’’ti pattakkhandhā adhomukhā madhurakajātā jhāyanti pajjhāyanti nijjhāyanti apajjhāyanti. Seyyathāpi nāma biḷāro sandhisamalasaṅkaṭīre mūsikaṃ maggayamāno jhāyati pajjhāyati nijjhāyati apajjhāyati; evamevime muṇḍakā samaṇakā ibbhā kiṇhā bandhupādāpaccā ‘‘jhāyinosmā jhāyinosmā’’ti pattakkhandhā adhomukhā madhurakajātā jhāyanti pajjhāyanti nijjhāyanti apajjhāyanti. Seyyathāpi nāma gadrabho vahacchinno sandhisamalasaṅkaṭīre jhāyati pajjhāyati nijjhāyati apajjhāyati, evamevime muṇḍakā samaṇakā ibbhā kiṇhā bandhupādāpaccā ‘‘jhāyinosmā jhāyinosmā’’ti pattakkhandhā adhomukhā madhurakajātā jhāyanti pajjhāyanti nijjhāyanti apajjhāyantī’’ti.
‘‘яз ко бана, баабима, д̇зна самаязна мануссаа гаалан̇гаронд̇и язбхуяязна гааяасса бхзд̣̇аа барам̣ маран̣аа абааяам̣ д̣̇уг̇г̇ад̇им̣ винибаад̇ам̣ нираяам̣ убабаж̇ж̇анд̇и.
‘‘Ye kho pana, pāpima, tena samayena manussā kālaṅkaronti yebhuyyena kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjanti.
509. ‘‘ат̇а ко, баабима, гагусанд̇хо бхаг̇аваа арахам̣ саммаасамб̣уд̣̇д̇хо бхигкуу ааманд̇зси – ‘анваавидтаа ко, бхигкавз, б̣раахман̣аг̇ахабад̇игаа д̣̇уусинаа маарзна – зт̇а, д̇умхз бхигкуу сийлаванд̇з галяаан̣ад̇хаммз аггосат̇а барибхаасат̇а росзт̇а вихзсзт̇а, аббзва наама д̇умхзхи аггосияамаанаанам̣ барибхаасияамаанаанам̣ росияамаанаанам̣ вихзсияамаанаанам̣ сияаа жид̇д̇асса ан̃н̃ат̇ад̇д̇ам̣, яат̇аа д̇ам̣ д̣̇уусий мааро лабхзт̇а од̇аара’нд̇и. зт̇а, д̇умхз, бхигкавз, мзд̇д̇аасахаг̇ад̇зна жзд̇асаа згам̣ д̣̇исам̣ парид̇ваа вихарат̇а, д̇ат̇аа д̣̇уд̇ияам̣, д̇ат̇аа д̇ад̇ияам̣, д̇ат̇аа жад̇уд̇т̇ам̣. ид̇и уд̣̇д̇хамад̇хо д̇ирияам̣ саб̣б̣ад̇хи саб̣б̣ад̇д̇ад̇ааяа саб̣б̣ааванд̇ам̣ логам̣ мзд̇д̇аасахаг̇ад̇зна жзд̇асаа вибулзна махаг̇г̇ад̇зна аббамаан̣зна авзрзна аб̣яааб̣аж̇жхзна парид̇ваа вихарат̇а. гарун̣аасахаг̇ад̇зна жзд̇асаа…бз… муд̣̇ид̇аасахаг̇ад̇зна жзд̇асаа…бз… убзгкаасахаг̇ад̇зна жзд̇асаа згам̣ д̣̇исам̣ парид̇ваа вихарат̇а, д̇ат̇аа д̣̇уд̇ияам̣, д̇ат̇аа д̇ад̇ияам̣, д̇ат̇аа жад̇уд̇т̇ам̣. ид̇и уд̣̇д̇хамад̇хо д̇ирияам̣ саб̣б̣ад̇хи саб̣б̣ад̇д̇ад̇ааяа саб̣б̣ааванд̇ам̣ логам̣ убзгкаасахаг̇ад̇зна жзд̇асаа вибулзна махаг̇г̇ад̇зна аббамаан̣зна авзрзна аб̣яааб̣аж̇жхзна парид̇ваа вихарат̇аа’д̇и.
509. ‘‘Atha kho, pāpima, kakusandho bhagavā arahaṃ sammāsambuddho bhikkhū āmantesi – ‘anvāviṭṭhā kho, bhikkhave, brāhmaṇagahapatikā dūsinā mārena – etha, tumhe bhikkhū sīlavante kalyāṇadhamme akkosatha paribhāsatha rosetha vihesetha, appeva nāma tumhehi akkosiyamānānaṃ paribhāsiyamānānaṃ rosiyamānānaṃ vihesiyamānānaṃ siyā cittassa aññathattaṃ, yathā taṃ dūsī māro labhetha otāra’nti. Etha, tumhe, bhikkhave, mettāsahagatena cetasā ekaṃ disaṃ pharitvā viharatha, tathā dutiyaṃ, tathā tatiyaṃ, tathā catutthaṃ. Iti uddhamadho tiriyaṃ sabbadhi sabbattatāya sabbāvantaṃ lokaṃ mettāsahagatena cetasā vipulena mahaggatena appamāṇena averena abyābajjhena pharitvā viharatha. Karuṇāsahagatena cetasā…pe… muditāsahagatena cetasā…pe… upekkhāsahagatena cetasā ekaṃ disaṃ pharitvā viharatha, tathā dutiyaṃ, tathā tatiyaṃ, tathā catutthaṃ. Iti uddhamadho tiriyaṃ sabbadhi sabbattatāya sabbāvantaṃ lokaṃ upekkhāsahagatena cetasā vipulena mahaggatena appamāṇena averena abyābajjhena pharitvā viharathā’ti.
‘‘ат̇а ко д̇з, баабима, бхигкуу гагусанд̇хзна бхаг̇авад̇аа арахад̇аа саммаасамб̣уд̣̇д̇хзна звам̣ овад̣̇ияамаанаа звам̣ анусаасияамаанаа аран̃н̃аг̇ад̇ааби ругкамуулаг̇ад̇ааби сун̃н̃ааг̇аараг̇ад̇ааби мзд̇д̇аасахаг̇ад̇зна жзд̇асаа згам̣ д̣̇исам̣ парид̇ваа вихарим̣су, д̇ат̇аа д̣̇уд̇ияам̣, д̇ат̇аа д̇ад̇ияам̣, д̇ат̇аа жад̇уд̇т̇ам̣. ид̇и уд̣̇д̇хамад̇хо д̇ирияам̣ саб̣б̣ад̇хи саб̣б̣ад̇д̇ад̇ааяа саб̣б̣ааванд̇ам̣ логам̣ мзд̇д̇аасахаг̇ад̇зна жзд̇асаа вибулзна махаг̇г̇ад̇зна аббамаан̣зна авзрзна аб̣яааб̣аж̇жхзна парид̇ваа вихарим̣су. гарун̣аасахаг̇ад̇зна жзд̇асаа…бз… муд̣̇ид̇аасахаг̇ад̇зна жзд̇асаа…бз… убзгкаасахаг̇ад̇зна жзд̇асаа згам̣ д̣̇исам̣ парид̇ваа вихарим̣су, д̇ат̇аа д̣̇уд̇ияам̣, д̇ат̇аа д̇ад̇ияам̣, д̇ат̇аа жад̇уд̇т̇ам̣. ид̇и уд̣̇д̇хамад̇хо д̇ирияам̣ саб̣б̣ад̇хи саб̣б̣ад̇д̇ад̇ааяа саб̣б̣ааванд̇ам̣ логам̣ убзгкаасахаг̇ад̇зна жзд̇асаа вибулзна махаг̇г̇ад̇зна аббамаан̣зна авзрзна аб̣яааб̣аж̇жхзна парид̇ваа вихарим̣су .
‘‘Atha kho te, pāpima, bhikkhū kakusandhena bhagavatā arahatā sammāsambuddhena evaṃ ovadiyamānā evaṃ anusāsiyamānā araññagatāpi rukkhamūlagatāpi suññāgāragatāpi mettāsahagatena cetasā ekaṃ disaṃ pharitvā vihariṃsu, tathā dutiyaṃ, tathā tatiyaṃ, tathā catutthaṃ. Iti uddhamadho tiriyaṃ sabbadhi sabbattatāya sabbāvantaṃ lokaṃ mettāsahagatena cetasā vipulena mahaggatena appamāṇena averena abyābajjhena pharitvā vihariṃsu. Karuṇāsahagatena cetasā…pe… muditāsahagatena cetasā…pe… upekkhāsahagatena cetasā ekaṃ disaṃ pharitvā vihariṃsu, tathā dutiyaṃ, tathā tatiyaṃ, tathā catutthaṃ. Iti uddhamadho tiriyaṃ sabbadhi sabbattatāya sabbāvantaṃ lokaṃ upekkhāsahagatena cetasā vipulena mahaggatena appamāṇena averena abyābajjhena pharitvā vihariṃsu .
510. ‘‘ат̇а ко, баабима, д̣̇уусисса маарасса зд̇ад̣̇ахоси – ‘звамби ко ахам̣ гаронд̇о имзсам̣ бхигкуунам̣ сийлаванд̇аанам̣ галяаан̣ад̇хаммаанам̣ нзва ж̇аанаами ааг̇ад̇им̣ ваа г̇ад̇им̣ ваа, яам̣нуунаахам̣ б̣раахман̣аг̇ахабад̇игз анваависзяяам̣ – зт̇а, д̇умхз бхигкуу сийлаванд̇з галяаан̣ад̇хаммз саггарот̇а г̇арум̣ гарот̇а маанзт̇а бууж̇зт̇а , аббзва наама д̇умхзхи саггарияамаанаанам̣ г̇аругарияамаанаанам̣ маанияамаанаанам̣ бууж̇ияамаанаанам̣ сияаа жид̇д̇асса ан̃н̃ат̇ад̇д̇ам̣, яат̇аа д̇ам̣ д̣̇уусий мааро лабхзт̇а од̇аара’нд̇и . ат̇а ко д̇з, баабима, д̣̇уусий мааро б̣раахман̣аг̇ахабад̇игз анваависи – ‘зт̇а, д̇умхз бхигкуу сийлаванд̇з галяаан̣ад̇хаммз саггарот̇а г̇арум̣ гарот̇а маанзт̇а бууж̇зт̇а, аббзва наама д̇умхзхи саггарияамаанаанам̣ г̇аругарияамаанаанам̣ маанияамаанаанам̣ бууж̇ияамаанаанам̣ сияаа жид̇д̇асса ан̃н̃ат̇ад̇д̇ам̣, яат̇аа д̇ам̣ д̣̇уусий мааро лабхзт̇а од̇аара’нд̇и. ат̇а ко д̇з, баабима, б̣раахман̣аг̇ахабад̇игаа анваавидтаа д̣̇уусинаа маарзна бхигкуу сийлаванд̇з галяаан̣ад̇хаммз саггаронд̇и г̇арум̣ гаронд̇и маанзнд̇и бууж̇знд̇и.
510. ‘‘Atha kho, pāpima, dūsissa mārassa etadahosi – ‘evampi kho ahaṃ karonto imesaṃ bhikkhūnaṃ sīlavantānaṃ kalyāṇadhammānaṃ neva jānāmi āgatiṃ vā gatiṃ vā, yaṃnūnāhaṃ brāhmaṇagahapatike anvāviseyyaṃ – etha, tumhe bhikkhū sīlavante kalyāṇadhamme sakkarotha garuṃ karotha mānetha pūjetha , appeva nāma tumhehi sakkariyamānānaṃ garukariyamānānaṃ māniyamānānaṃ pūjiyamānānaṃ siyā cittassa aññathattaṃ, yathā taṃ dūsī māro labhetha otāra’nti . Atha kho te, pāpima, dūsī māro brāhmaṇagahapatike anvāvisi – ‘etha, tumhe bhikkhū sīlavante kalyāṇadhamme sakkarotha garuṃ karotha mānetha pūjetha, appeva nāma tumhehi sakkariyamānānaṃ garukariyamānānaṃ māniyamānānaṃ pūjiyamānānaṃ siyā cittassa aññathattaṃ, yathā taṃ dūsī māro labhetha otāra’nti. Atha kho te, pāpima, brāhmaṇagahapatikā anvāviṭṭhā dūsinā mārena bhikkhū sīlavante kalyāṇadhamme sakkaronti garuṃ karonti mānenti pūjenti.
‘‘яз ко бана, баабима, д̇зна самаязна мануссаа гаалан̇гаронд̇и язбхуяязна гааяасса бхзд̣̇аа барам̣ маран̣аа суг̇ад̇им̣ саг̇г̇ам̣ логам̣ убабаж̇ж̇анд̇и.
‘‘Ye kho pana, pāpima, tena samayena manussā kālaṅkaronti yebhuyyena kāyassa bhedā paraṃ maraṇā sugatiṃ saggaṃ lokaṃ upapajjanti.
511. ‘‘ат̇а ко, баабима, гагусанд̇хо бхаг̇аваа арахам̣ саммаасамб̣уд̣̇д̇хо бхигкуу ааманд̇зси – ‘анваавидтаа ко, бхигкавз, б̣раахман̣аг̇ахабад̇игаа д̣̇уусинаа маарзна – зт̇а, д̇умхз бхигкуу сийлаванд̇з галяаан̣ад̇хаммз саггарот̇а г̇арум̣ гарот̇а маанзт̇а бууж̇зт̇а, аббзва наама д̇умхзхи саггарияамаанаанам̣ г̇аругарияамаанаанам̣ маанияамаанаанам̣ бууж̇ияамаанаанам̣ сияаа жид̇д̇асса ан̃н̃ат̇ад̇д̇ам̣, яат̇аа д̇ам̣ д̣̇уусий мааро лабхзт̇а од̇ааранд̇и. зт̇а, д̇умхз, бхигкавз, асубхаанубассино гааяз вихарат̇а, аахаарз бадигууласан̃н̃ино, саб̣б̣алогз анабхирад̇исан̃н̃ино 13, саб̣б̣асан̇каарзсу анижжаанубассино’д̇и.
511. ‘‘Atha kho, pāpima, kakusandho bhagavā arahaṃ sammāsambuddho bhikkhū āmantesi – ‘anvāviṭṭhā kho, bhikkhave, brāhmaṇagahapatikā dūsinā mārena – etha, tumhe bhikkhū sīlavante kalyāṇadhamme sakkarotha garuṃ karotha mānetha pūjetha, appeva nāma tumhehi sakkariyamānānaṃ garukariyamānānaṃ māniyamānānaṃ pūjiyamānānaṃ siyā cittassa aññathattaṃ, yathā taṃ dūsī māro labhetha otāranti. Etha, tumhe, bhikkhave, asubhānupassino kāye viharatha, āhāre paṭikūlasaññino, sabbaloke anabhiratisaññino 14, sabbasaṅkhāresu aniccānupassino’ti.
‘‘ат̇а ко д̇з, баабима, бхигкуу гагусанд̇хзна бхаг̇авад̇аа арахад̇аа саммаасамб̣уд̣̇д̇хзна звам̣ овад̣̇ияамаанаа звам̣ анусаасияамаанаа аран̃н̃аг̇ад̇ааби ругкамуулаг̇ад̇ааби сун̃н̃ааг̇аараг̇ад̇ааби асубхаанубассино гааяз вихарим̣су, аахаарз бадигууласан̃н̃ино, саб̣б̣алогз анабхирад̇исан̃н̃ино, саб̣б̣асан̇каарзсу анижжаанубассино.
‘‘Atha kho te, pāpima, bhikkhū kakusandhena bhagavatā arahatā sammāsambuddhena evaṃ ovadiyamānā evaṃ anusāsiyamānā araññagatāpi rukkhamūlagatāpi suññāgāragatāpi asubhānupassino kāye vihariṃsu, āhāre paṭikūlasaññino, sabbaloke anabhiratisaññino, sabbasaṅkhāresu aniccānupassino.
512. ‘‘ат̇а ко, баабима, гагусанд̇хо бхаг̇аваа арахам̣ саммаасамб̣уд̣̇д̇хо буб̣б̣ан̣хасамаяам̣ ниваасзд̇ваа бад̇д̇ажийварамаад̣̇ааяа ааяасмад̇аа вид̇хурзна бажчаасаман̣зна г̇аамам̣ бин̣д̣ааяа баависи. ат̇а ко, баабима, д̣̇уусий мааро ан̃н̃ад̇арам̣ гумаарагам̣ 15 анваависид̇ваа сагкарам̣ г̇ахзд̇ваа ааяасмад̇о вид̇хурасса сийсз бахаарамад̣̇ааси; сийсам̣ вобхинд̣̇и 16. ат̇а ко, баабима, ааяасмаа вид̇хуро бхиннзна сийсзна лохид̇зна г̇ал̣анд̇зна гагусанд̇хам̣язва бхаг̇аванд̇ам̣ араханд̇ам̣ саммаасамб̣уд̣̇д̇хам̣ бидтид̇о бидтид̇о ануб̣анд̇хи. ат̇а ко , баабима, гагусанд̇хо бхаг̇аваа арахам̣ саммаасамб̣уд̣̇д̇хо нааг̇аабалогид̇ам̣ абалогзси – ‘на вааяам̣ д̣̇уусий мааро мад̇д̇аман̃н̃аасий’д̇и. сахаабалоганааяа жа бана, баабима, д̣̇уусий мааро д̇амхаа жа таанаа жави махаанираяан̃жа убабаж̇ж̇и.
512. ‘‘Atha kho, pāpima, kakusandho bhagavā arahaṃ sammāsambuddho pubbaṇhasamayaṃ nivāsetvā pattacīvaramādāya āyasmatā vidhurena pacchāsamaṇena gāmaṃ piṇḍāya pāvisi. Atha kho, pāpima, dūsī māro aññataraṃ kumārakaṃ 17 anvāvisitvā sakkharaṃ gahetvā āyasmato vidhurassa sīse pahāramadāsi; sīsaṃ vobhindi 18. Atha kho, pāpima, āyasmā vidhuro bhinnena sīsena lohitena gaḷantena kakusandhaṃyeva bhagavantaṃ arahantaṃ sammāsambuddhaṃ piṭṭhito piṭṭhito anubandhi. Atha kho , pāpima, kakusandho bhagavā arahaṃ sammāsambuddho nāgāpalokitaṃ apalokesi – ‘na vāyaṃ dūsī māro mattamaññāsī’ti. Sahāpalokanāya ca pana, pāpima, dūsī māro tamhā ca ṭhānā cavi mahānirayañca upapajji.
‘‘д̇асса ко бана, баабима, махаанираяасса д̇аяо наамад̇хзяяаа хонд̇и – чапассааяад̇аниго ид̇иби, сан̇гусамаахад̇о ид̇иби, бажжад̇д̇авзд̣̇анияо ид̇иби. ат̇а ко мам̣, баабима, нираяабаалаа убасан̇гамид̇ваа зд̇ад̣̇авожум̣ – яад̣̇аа ко д̇з 19, маариса, сан̇гунаа сан̇гу хад̣̇аяз самааг̇ажчзяяа. ат̇а нам̣ д̇вам̣ ж̇аанзяяааси – ‘вассасахассам̣ мз нираяз бажжамаанассаа’д̇и. со ко ахам̣, баабима, б̣ахууни вассаани б̣ахууни вассасад̇аани б̣ахууни вассасахассаани д̇асмим̣ махаанираяз абажжим̣. д̣̇асавассасахассаани д̇ассзва махаанираяасса уссад̣̇з абажжим̣ вудтаанимам̣ наама взд̣̇анам̣ взд̣̇ияамаано. д̇асса маяхам̣, баабима, зваруубо гааяо ход̇и, сзяяат̇ааби мануссасса. зваруубам̣ сийсам̣ ход̇и, сзяяат̇ааби мажчасса.
‘‘Tassa kho pana, pāpima, mahānirayassa tayo nāmadheyyā honti – chaphassāyataniko itipi, saṅkusamāhato itipi, paccattavedaniyo itipi. Atha kho maṃ, pāpima, nirayapālā upasaṅkamitvā etadavocuṃ – yadā kho te 20, mārisa, saṅkunā saṅku hadaye samāgaccheyya. Atha naṃ tvaṃ jāneyyāsi – ‘vassasahassaṃ me niraye paccamānassā’ti. So kho ahaṃ, pāpima, bahūni vassāni bahūni vassasatāni bahūni vassasahassāni tasmiṃ mahāniraye apacciṃ. Dasavassasahassāni tasseva mahānirayassa ussade apacciṃ vuṭṭhānimaṃ nāma vedanaṃ vediyamāno. Tassa mayhaṃ, pāpima, evarūpo kāyo hoti, seyyathāpi manussassa. Evarūpaṃ sīsaṃ hoti, seyyathāpi macchassa.
513.
513.
‘‘гийд̣̇исо нираяо ааси, яад̇т̇а д̣̇уусий абажжат̇а;
‘‘Kīdiso nirayo āsi, yattha dūsī apaccatha;
вид̇хурам̣ саавагамаасаж̇ж̇а, гагусанд̇хан̃жа б̣раахман̣ам̣.
Vidhuraṃ sāvakamāsajja, kakusandhañca brāhmaṇaṃ.
‘‘сад̇ам̣ ааси аяосан̇гуу, саб̣б̣з бажжад̇д̇авзд̣̇анаа;
‘‘Sataṃ āsi ayosaṅkū, sabbe paccattavedanā;
ийд̣̇исо нираяо ааси, яад̇т̇а д̣̇уусий абажжат̇а;
Īdiso nirayo āsi, yattha dūsī apaccatha;
вид̇хурам̣ саавагамаасаж̇ж̇а, гагусанд̇хан̃жа б̣раахман̣ам̣.
Vidhuraṃ sāvakamāsajja, kakusandhañca brāhmaṇaṃ.
‘‘яо зд̇амабхиж̇аанаад̇и, бхигку б̣уд̣̇д̇хасса сааваго;
‘‘Yo etamabhijānāti, bhikkhu buddhassa sāvako;
д̇аад̣̇исам̣ бхигкумаасаж̇ж̇а, ган̣ха д̣̇угкам̣ ниг̇ажчаси.
Tādisaṃ bhikkhumāsajja, kaṇha dukkhaṃ nigacchasi.
‘‘маж̇жхз сарасса д̇идтанд̇и, вимаанаа габбадтааяино;
‘‘Majjhe sarassa tiṭṭhanti, vimānā kappaṭṭhāyino;
взл̣урияаван̣н̣аа ружираа, ажжиманд̇о бабхассараа;
Veḷuriyavaṇṇā rucirā, accimanto pabhassarā;
ажчараа д̇ад̇т̇а нажжанд̇и, бут̇у наанад̇д̇аван̣н̣ияо.
Accharā tattha naccanti, puthu nānattavaṇṇiyo.
‘‘яо зд̇амабхиж̇аанаад̇и, бхигку б̣уд̣̇д̇хасса сааваго;
‘‘Yo etamabhijānāti, bhikkhu buddhassa sāvako;
д̇аад̣̇исам̣ бхигкумаасаж̇ж̇а, ган̣ха д̣̇угкам̣ ниг̇ажчаси.
Tādisaṃ bhikkhumāsajja, kaṇha dukkhaṃ nigacchasi.
‘‘яо вз б̣уд̣̇д̇хзна жод̣̇ид̇о, бхигку сан̇гхасса бзгкад̇о;
‘‘Yo ve buddhena codito, bhikkhu saṅghassa pekkhato;
миг̇аарамаад̇убаасаад̣̇ам̣, баад̣̇ан̇г̇удтзна гамбаяи.
Migāramātupāsādaṃ, pādaṅguṭṭhena kampayi.
‘‘яо зд̇амабхиж̇аанаад̇и, бхигку б̣уд̣̇д̇хасса сааваго;
‘‘Yo etamabhijānāti, bhikkhu buddhassa sāvako;
д̇аад̣̇исам̣ бхигкумаасаж̇ж̇а, ган̣ха д̣̇угкам̣ ниг̇ажчаси.
Tādisaṃ bhikkhumāsajja, kaṇha dukkhaṃ nigacchasi.
‘‘яо взж̇аяанд̇ам̣ баасаад̣̇ам̣, баад̣̇ан̇г̇удтзна гамбаяи;
‘‘Yo vejayantaṃ pāsādaṃ, pādaṅguṭṭhena kampayi;
ид̣̇д̇хиб̣алзнубад̇т̇ад̣̇д̇хо, сам̣взж̇зси жа д̣̇звад̇аа.
Iddhibalenupatthaddho, saṃvejesi ca devatā.
‘‘яо зд̇амабхиж̇аанаад̇и, бхигку б̣уд̣̇д̇хасса сааваго;
‘‘Yo etamabhijānāti, bhikkhu buddhassa sāvako;
д̇аад̣̇исам̣ бхигкумаасаж̇ж̇а, ган̣ха д̣̇угкам̣ ниг̇ажчаси.
Tādisaṃ bhikkhumāsajja, kaṇha dukkhaṃ nigacchasi.
‘‘яо взж̇аяанд̇абаасаад̣̇з, саггам̣ со барибужчад̇и;
‘‘Yo vejayantapāsāde, sakkaṃ so paripucchati;
аби ваасава ж̇аанааси, д̇ан̣хаагкаяавимуд̇д̇ияо;
Api vāsava jānāsi, taṇhākkhayavimuttiyo;
д̇асса сагго вияаагааси, бан̃хам̣ будто яат̇аад̇ат̇ам̣.
Tassa sakko viyākāsi, pañhaṃ puṭṭho yathātathaṃ.
‘‘яо зд̇амабхиж̇аанаад̇и, бхигку б̣уд̣̇д̇хасса сааваго;
‘‘Yo etamabhijānāti, bhikkhu buddhassa sāvako;
д̇аад̣̇исам̣ бхигкумаасаж̇ж̇а, ган̣ха д̣̇угкам̣ ниг̇ажчаси.
Tādisaṃ bhikkhumāsajja, kaṇha dukkhaṃ nigacchasi.
‘‘яо б̣рахмам̣ барибужчад̇и, суд̇хаммааяаабхид̇о сабхам̣;
‘‘Yo brahmaṃ paripucchati, sudhammāyābhito sabhaṃ;
аж̇ж̇ааби д̇яаавусо д̣̇идти, яаа д̇з д̣̇идти бурз аху;
Ajjāpi tyāvuso diṭṭhi, yā te diṭṭhi pure ahu;
бассаси вийд̇ивад̇д̇анд̇ам̣, б̣рахмалогз бабхассарам̣.
Passasi vītivattantaṃ, brahmaloke pabhassaraṃ.
‘‘д̇асса б̣рахмаа вияаагааси, анубуб̣б̣ам̣ яат̇аад̇ат̇ам̣;
‘‘Tassa brahmā viyākāsi, anupubbaṃ yathātathaṃ;
на мз маариса саа д̣̇идти, яаа мз д̣̇идти бурз аху.
Na me mārisa sā diṭṭhi, yā me diṭṭhi pure ahu.
‘‘бассаами вийд̇ивад̇д̇анд̇ам̣, б̣рахмалогз бабхассарам̣;
‘‘Passāmi vītivattantaṃ, brahmaloke pabhassaraṃ;
сохам̣ аж̇ж̇а гат̇ам̣ важ̇ж̇ам̣, ахам̣ нижжомхи сассад̇о.
Sohaṃ ajja kathaṃ vajjaṃ, ahaṃ niccomhi sassato.
‘‘яо зд̇амабхиж̇аанаад̇и, бхигку б̣уд̣̇д̇хасса сааваго;
‘‘Yo etamabhijānāti, bhikkhu buddhassa sāvako;
д̇аад̣̇исам̣ бхигкумаасаж̇ж̇а, ган̣ха д̣̇угкам̣ ниг̇ажчаси.
Tādisaṃ bhikkhumāsajja, kaṇha dukkhaṃ nigacchasi.
‘‘яо махаамзруно гуудам̣, вимогкзна апассаяи;
‘‘Yo mahāmeruno kūṭaṃ, vimokkhena aphassayi;
ванам̣ буб̣б̣авид̣̇зхаанам̣, яз жа бхуумисаяаа нараа.
Vanaṃ pubbavidehānaṃ, ye ca bhūmisayā narā.
‘‘яо зд̇амабхиж̇аанаад̇и, бхигку б̣уд̣̇д̇хасса сааваго;
‘‘Yo etamabhijānāti, bhikkhu buddhassa sāvako;
д̇аад̣̇исам̣ бхигкумаасаж̇ж̇а, ган̣ха д̣̇угкам̣ ниг̇ажчаси.
Tādisaṃ bhikkhumāsajja, kaṇha dukkhaṃ nigacchasi.
‘‘на вз аг̇г̇и жзд̇аяад̇и 21, ‘ахам̣ б̣аалам̣ д̣ахаамий’д̇и;
‘‘Na ve aggi cetayati 22, ‘ahaṃ bālaṃ ḍahāmī’ti;
б̣аало жа ж̇алид̇ам̣ аг̇г̇им̣, аасаж̇ж̇а нам̣ са д̣аяхад̇и.
Bālo ca jalitaṃ aggiṃ, āsajja naṃ sa ḍayhati.
‘‘звамзва д̇увам̣ маара, аасаж̇ж̇а нам̣ д̇ат̇ааг̇ад̇ам̣;
‘‘Evameva tuvaṃ māra, āsajja naṃ tathāgataṃ;
саяам̣ д̣ахиссаси ад̇д̇аанам̣, б̣аало аг̇г̇им̣ва сам̣пусам̣.
Sayaṃ ḍahissasi attānaṃ, bālo aggiṃva saṃphusaṃ.
‘‘абун̃н̃ам̣ басавий мааро, аасаж̇ж̇а нам̣ д̇ат̇ааг̇ад̇ам̣;
‘‘Apuññaṃ pasavī māro, āsajja naṃ tathāgataṃ;
гинну ман̃н̃аси баабима, на мз баабам̣ вибажжад̇и.
Kinnu maññasi pāpima, na me pāpaṃ vipaccati.
‘‘гарод̇о жийяад̇и баабам̣, жирарад̇д̇ааяа анд̇ага;
‘‘Karoto cīyati pāpaṃ, cirarattāya antaka;
маара ниб̣б̣инд̣̇а б̣уд̣̇д̇хамхаа, аасам̣ маагааси бхигкусу.
Māra nibbinda buddhamhā, āsaṃ mākāsi bhikkhusu.
‘‘ид̇и маарам̣ ад̇аж̇ж̇зси, бхигку бхзсагал̣ааванз;
‘‘Iti māraṃ atajjesi, bhikkhu bhesakaḷāvane;
д̇ад̇о со д̣̇уммано яагко, над̇ад̇т̇званд̇арад̇хааяат̇аа’’д̇и.
Tato so dummano yakkho, natatthevantaradhāyathā’’ti.
маарад̇аж̇ж̇анийяасуд̇д̇ам̣ нидтид̇ам̣ д̣̇асамам̣.
Māratajjanīyasuttaṃ niṭṭhitaṃ dasamaṃ.
жуул̣аяамагаваг̇г̇о нидтид̇о бан̃жамо.
Cūḷayamakavaggo niṭṭhito pañcamo.
д̇ассуд̣̇д̣̇аанам̣ –
Tassuddānaṃ –
саалзяяа взран̃ж̇ад̣̇увз жа д̇удти, жуул̣амахаад̇хаммасамаад̣̇аанан̃жа;
Sāleyya verañjaduve ca tuṭṭhi, cūḷamahādhammasamādānañca;
виймам̣сагаа госамб̣и жа б̣раахман̣о, д̣̇уусий жа мааро д̣̇асамо жа ваг̇г̇о.
Vīmaṃsakā kosambi ca brāhmaṇo, dūsī ca māro dasamo ca vaggo.
саалзяяаваг̇г̇о нидтид̇о бан̃жамо.
Sāleyyavaggo niṭṭhito pañcamo.
ид̣̇ам̣ ваг̇г̇аанамуд̣̇д̣̇аанам̣ –
Idaṃ vaggānamuddānaṃ –
муулабарияааяо жзва, сийханаад̣̇о жа уд̇д̇амо;
Mūlapariyāyo ceva, sīhanādo ca uttamo;
гагажо жзва г̇осин̇г̇о, саалзяяо жа имз бан̃жа.
Kakaco ceva gosiṅgo, sāleyyo ca ime pañca.
муулабан̣н̣аасагам̣ самад̇д̇ам̣.
Mūlapaṇṇāsakaṃ samattaṃ.
Footnotes:
Related texts:
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / маж̇жхиманигааяа (адтагат̇аа) • Majjhimanikāya (aṭṭhakathā) / 10. маарад̇аж̇ж̇анийяасуд̇д̇аван̣н̣анаа • 10. Māratajjanīyasuttavaṇṇanā
дийгаа • Tīkā / суд̇д̇абидага (дийгаа) • Suttapiṭaka (ṭīkā) / маж̇жхиманигааяа (дийгаа) • Majjhimanikāya (ṭīkā) / 10. маарад̇аж̇ж̇анийяасуд̇д̇аван̣н̣анаа • 10. Māratajjanīyasuttavaṇṇanā
