| Library / Tipiṭaka / திபிடக • Tipiṭaka / மஜ்ஜி²மனிகாய (டீகா) • Majjhimanikāya (ṭīkā) |
10. மாரதஜ்ஜனீயஸுத்தவண்ணனா
10. Māratajjanīyasuttavaṇṇanā
506. கொட்ட²மனுபவிட்டோ²தி ஆஸயோ வச்சகு³த்தட்டா²னதாய கொட்ட²ங், தஸ்ஸ அப்³ப⁴ந்தரஞ்ஹெத்த² கொட்ட²ங். அனுரூபோ ஹுத்வா பவிட்டோ² அனுபவிட்டோ². ஸுகு²மஞ்ஹி தத³னுச்ச²விகங் அத்தபா⁴வங் மாபெத்வா அயங் தத்த² பவிட்டோ². க³ருக³ரோ வியாதி க³ருகக³ருகோ விய. உ-காரஸ்ஸ ஹி ஓ-காரங் கத்வா அயங் நித்³தே³ஸோ, அதிவிய க³ருகோ மஞ்ஞேதி அத்தோ². க³ருக³ரு விய இச்சேவ வா பாடோ². மாஸப⁴த்தங் மாஸோ உத்தரபத³லோபேன, மாஸப⁴த்தேன ஆசிதங் பூரிதங் மாஸாசிதங் மஞ்ஞே. தேனாஹ ‘‘மாஸப⁴த்தங் பு⁴த்தஸ்ஸ குச்சி² வியா’’தி. உத்தரபத³லோபேன வினா அத்த²ங் த³ஸ்ஸேதுங் ‘‘மாஸபூரிதபஸிப்³ப³கோ வியா’’தி வுத்தங். திந்தமாஸோ வியாதி திந்தமாஸோ பஸிப்³ப³கோ விய. கிங் நு கோ² ஏதங் மம குச்சி²யங் புப்³ப³ங் பா⁴ரிகத்தங், கிங் நு கோ² கத²ங் நு கோ² ஜாதந்தி அதி⁴ப்பாயோ? உபாயேனாதி பதே²ன ஞாயேன. ப்³யதிரேகதோ பனஸ்ஸ அனுபாயங் த³ஸ்ஸேதுங் ‘‘ஸசே பனா’’திஆதி³ வுத்தங். அத்தானமேவ வா ஸந்தா⁴ய ‘‘மா ததா²க³தங் விஹேஸேஸீ’’தி ஆஹ. யதா² ஹி அரியஸங்கோ⁴ ‘‘ததா²க³தங் தே³வமனுஸ்ஸபூஜிதங், ஸங்க⁴ங் நமஸ்ஸாம ஸுவத்தி² ஹோதூ’’திஆதீ³ஸு (கு²॰ பா॰ 6.18; ஸு॰ நி॰ 241) ததா²க³தோதி வுச்சதி, ஏவங் தப்பரியாபன்னா அரியபுக்³க³லா, யதா² ச புரிமகா து³தியஅக்³க³ஸாவகா கப்பானங் ஸதஸஹஸ்ஸாதி⁴கங் ஏகங் அஸங்க்²யெய்யங் பாரமியோ பூரெத்வா ஆக³தா, அயம்பி மஹாதே²ரோ ததா² ஆக³தோதி ததா²க³தோதி. பதிஅக்³க³ளேவ அட்டா²ஸீதி அக்³க³ளஸ்ஸ ப³ஹிபா⁴கே³ அட்டா²ஸி.
506.Koṭṭhamanupaviṭṭhoti āsayo vaccaguttaṭṭhānatāya koṭṭhaṃ, tassa abbhantarañhettha koṭṭhaṃ. Anurūpo hutvā paviṭṭho anupaviṭṭho. Sukhumañhi tadanucchavikaṃ attabhāvaṃ māpetvā ayaṃ tattha paviṭṭho. Garugaro viyāti garukagaruko viya. U-kārassa hi o-kāraṃ katvā ayaṃ niddeso, ativiya garuko maññeti attho. Garugaru viya icceva vā pāṭho. Māsabhattaṃ māso uttarapadalopena, māsabhattena ācitaṃ pūritaṃ māsācitaṃ maññe. Tenāha ‘‘māsabhattaṃ bhuttassa kucchi viyā’’ti. Uttarapadalopena vinā atthaṃ dassetuṃ ‘‘māsapūritapasibbako viyā’’ti vuttaṃ. Tintamāso viyāti tintamāso pasibbako viya. Kiṃ nu kho etaṃ mama kucchiyaṃ pubbaṃ bhārikattaṃ, kiṃ nu kho kathaṃ nu kho jātanti adhippāyo? Upāyenāti pathena ñāyena. Byatirekato panassa anupāyaṃ dassetuṃ ‘‘sace panā’’tiādi vuttaṃ. Attānameva vā sandhāya ‘‘mā tathāgataṃ vihesesī’’ti āha. Yathā hi ariyasaṅgho ‘‘tathāgataṃ devamanussapūjitaṃ, saṅghaṃ namassāma suvatthi hotū’’tiādīsu (khu. pā. 6.18; su. ni. 241) tathāgatoti vuccati, evaṃ tappariyāpannā ariyapuggalā, yathā ca purimakā dutiyaaggasāvakā kappānaṃ satasahassādhikaṃ ekaṃ asaṅkhyeyyaṃ pāramiyo pūretvā āgatā, ayampi mahāthero tathā āgatoti tathāgatoti. Patiaggaḷeva aṭṭhāsīti aggaḷassa bahibhāge aṭṭhāsi.
507. ருக்க²தே³வதா நாம சாதுமஹாராஜிகேஸு நிஹீனோ காயோ, தஸ்மா நேஸங் மனுஸ்ஸக³ந்தோ⁴ பரிசிதத்தா நாதிஜேகு³ச்சோ²தி ஆஹ ‘‘ஆகாஸட்ட²தே³வதான’’ந்தி. ஆபா³த⁴ங் கரோதீதி து³க்க²ங் ஜனேதி. நாக³ரிகோதி ஸுகுமாரோ. பரிசொக்கோ²தி ஸப்³ப³ஸோ ஸுசிரூபோ. ஞாதிகோடிந்தி ஞாதிபா⁴க³ங். அனாதி³மதி ஹி ஸங்ஸாரே ஞாதிபா⁴க³ரஹிதோ நாம ஸத்தோ கஸ்ஸசிபி நத்தீ²தி அதி⁴ப்பாயோ. இத³ந்தி ‘‘ஸோ மே த்வங் பா⁴கி³னெய்யோ ஹோஸீ’’தி இத³ங் வசனங். பவேணிவஸேனாதி ததா³ மய்ஹங் பா⁴கி³னெய்யோ ஹுத்வா இதா³னி மாரட்டா²னே டி²தோதி இமிஸ்ஸா பவேணியா வஸேன வுத்தங். அஞ்ஞஸ்ஸ வா வேஸமங் து⁴ரோ விது⁴ரோ. தேனாஹ ‘‘அஞ்ஞேஹி ஸத்³தி⁴ங் அஸதி³ஸோ’’தி. அப்பது³க்கே²னாதி ஸுகே²னேவ. பந்தா²னங் அவந்தி க³ச்ச²ந்தீதி பதா²வினோ. எத்தகேனாதி எத்தாவதா சிதகஸன்னிஸயேன. உத³கலேணந்தி உத³கனிஸ்ஸந்த³னலேணங். ஸமாபத்திதோதி நிரோத⁴ஸமாபத்திதோ. ஸமாபத்திப²லந்தி நிரோத⁴ஸமாபத்திப²லங்.
507. Rukkhadevatā nāma cātumahārājikesu nihīno kāyo, tasmā nesaṃ manussagandho paricitattā nātijegucchoti āha ‘‘ākāsaṭṭhadevatāna’’nti. Ābādhaṃ karotīti dukkhaṃ janeti. Nāgarikoti sukumāro. Paricokkhoti sabbaso sucirūpo. Ñātikoṭinti ñātibhāgaṃ. Anādimati hi saṃsāre ñātibhāgarahito nāma satto kassacipi natthīti adhippāyo. Idanti ‘‘so me tvaṃ bhāgineyyo hosī’’ti idaṃ vacanaṃ. Paveṇivasenāti tadā mayhaṃ bhāgineyyo hutvā idāni māraṭṭhāne ṭhitoti imissā paveṇiyā vasena vuttaṃ. Aññassa vā vesamaṃ dhuro vidhuro. Tenāha ‘‘aññehi saddhiṃ asadiso’’ti. Appadukkhenāti sukheneva. Panthānaṃ avanti gacchantīti pathāvino. Ettakenāti ettāvatā citakasannisayena. Udakaleṇanti udakanissandanaleṇaṃ. Samāpattitoti nirodhasamāpattito. Samāpattiphalanti nirodhasamāpattiphalaṃ.
508. த³ஸஹி அக்கோஸவத்தூ²ஹீதி த³ஸஹிபி அக்கோஸவத்தூ²ஹி, ததோ கிஞ்சி அஹாபெந்தா. பரிபா⁴ஸதா²தி க³ரஹத². க⁴ட்டேதா²தி அனூனாஹி கதா²ஹி இமேஸு ஓவிஜ்ஜ²த². து³க்கா²பேதா²தி சித்தே து³க்க²ங் ஜனேத². ஏதேஸந்தி தேஸங் பி⁴க்கூ²னங் தும்ஹாகங் அக்கோஸனாதீ³ஹி பி⁴க்கூ²னங் கிலேஸுப்பத்தியா. தேனெத்த² தூ³ஸீ மாரோ ஓதாரங் லப⁴தி நாமாதி அதி⁴ப்பாயோ. உபட்டா²தப்³ப³ங் இப⁴ங் அரஹந்தீதி இப்³பா⁴, ஹத்தி²ப⁴ண்ட³கா, ஹீனஜீவிகதாய ஹேதே இப்³பா⁴ வியாதி இப்³பா⁴, தே பன ஸது³தியகவஸேன ‘‘க³ஹபதிகா’’தி வுத்தா. கண்ஹாதி கண்ஹாபி⁴ஜாதிகா. பாத³தோ ஜாதத்தா பாதா³னங் அபச்சா. ஆலஸியஜாதாதி கஸிவணிஜ்ஜாதி³கம்மஸ்ஸ அகரணேன ஸஞ்ஜாதாலஸியா. கூ³த²னித்³த⁴மனபனாளீதி வச்சகூபதோ கூ³த²ஸ்ஸ நிக்க²மபதே³ஸோ.
508.Dasahi akkosavatthūhīti dasahipi akkosavatthūhi, tato kiñci ahāpentā. Paribhāsathāti garahatha. Ghaṭṭethāti anūnāhi kathāhi imesu ovijjhatha. Dukkhāpethāti citte dukkhaṃ janetha. Etesanti tesaṃ bhikkhūnaṃ tumhākaṃ akkosanādīhi bhikkhūnaṃ kilesuppattiyā. Tenettha dūsī māro otāraṃ labhati nāmāti adhippāyo. Upaṭṭhātabbaṃ ibhaṃ arahantīti ibbhā, hatthibhaṇḍakā, hīnajīvikatāya hete ibbhā viyāti ibbhā, te pana sadutiyakavasena ‘‘gahapatikā’’ti vuttā. Kaṇhāti kaṇhābhijātikā. Pādato jātattā pādānaṃ apaccā. Ālasiyajātāti kasivaṇijjādikammassa akaraṇena sañjātālasiyā. Gūthaniddhamanapanāḷīti vaccakūpato gūthassa nikkhamapadeso.
மனுஸ்ஸானங் அகுஸலங் ந ப⁴வெய்ய தேஸங் தாதி³ஸாய அபி⁴ஸந்தி⁴யா அபா⁴வதோ. ஆவேஸகஸ்ஸ ஆனுபா⁴வேன ஆவிட்ட²ஸ்ஸ சித்தஸந்ததி விபரிவத்ததீதி வுத்தோவாயமத்தோ². விஸபா⁴க³வத்து²ந்தி பி⁴க்கூ²னங் ஸந்திகே இத்தி²ரூபங், பி⁴க்கு²னீனங் ஸந்திகே புரிஸரூபந்தி ஈதி³ஸங், அஞ்ஞங் வா பப்³ப³ஜிதானங் அஸாருப்பங் விஸபா⁴க³வத்து²ங். விப்படிஸாராரம்மணந்தி பஸ்ஸந்தானங் விப்படிஸாரஸ்ஸ பச்சயங். லேபயட்டி²ந்தி லேபலித்தங் வாகுரயட்டி²ங்.
Manussānaṃ akusalaṃ na bhaveyya tesaṃ tādisāya abhisandhiyā abhāvato. Āvesakassa ānubhāvena āviṭṭhassa cittasantati viparivattatīti vuttovāyamattho. Visabhāgavatthunti bhikkhūnaṃ santike itthirūpaṃ, bhikkhunīnaṃ santike purisarūpanti īdisaṃ, aññaṃ vā pabbajitānaṃ asāruppaṃ visabhāgavatthuṃ. Vippaṭisārārammaṇanti passantānaṃ vippaṭisārassa paccayaṃ. Lepayaṭṭhinti lepalittaṃ vākurayaṭṭhiṃ.
510. ஸோமனஸ்ஸவஸேனாதி கே³ஹஸ்ஸிதஸோமனஸ்ஸவஸேன. அஞ்ஞத²த்தந்தி உப்பிலாவிதத்தங். புரிமனயேனேவாதி ‘‘ஸசே மாரோ மனுஸ்ஸானங் ஸரீரே அதி⁴முச்சித்வா’’திஆதி³னா புப்³பே³ வுத்தனயேன. யதி³ மாரோவ ததா² கரெய்ய, மனுஸ்ஸானங் குஸலங் ந ப⁴வெய்ய, மாரஸ்ஸேவ ப⁴வெய்ய, ஸரீரே பன அனதி⁴முச்சித்வா தாதி³ஸங் பஸாத³னீயங் பஸாத³வத்து²ங் த³ஸ்ஸேஸி. தேனாஹ ‘‘யதா² ஹீ’’திஆதி³.
510.Somanassavasenāti gehassitasomanassavasena. Aññathattanti uppilāvitattaṃ. Purimanayenevāti ‘‘sace māro manussānaṃ sarīre adhimuccitvā’’tiādinā pubbe vuttanayena. Yadi mārova tathā kareyya, manussānaṃ kusalaṃ na bhaveyya, mārasseva bhaveyya, sarīre pana anadhimuccitvā tādisaṃ pasādanīyaṃ pasādavatthuṃ dassesi. Tenāha ‘‘yathā hī’’tiādi.
511. அஸுப⁴ஸஞ்ஞாபரிசிதேனாதி ஸகலங் காயங் அஸுப⁴ந்தி பவத்தாய ஸஞ்ஞாய ஸஹக³தஜ்ஜா²னங் அஸுப⁴ஸஞ்ஞா, தேன பரிசிதேன பரிபா⁴விதேன. சேதஸா சித்தேன. ப³ஹுலந்தி அபி⁴ண்ஹங். விஹரதோதி விஹரந்தஸ்ஸ, அஸுப⁴ஸமாபத்திப³ஹுலஸ்ஸாதி அத்தோ². பதிலீயதீதி ஸங்குசதி தத்த² படிகூலதாய ஸண்டி²தத்தா. பதிகுடதீதி அபஸக்கதி. பதிவத்ததீதி நிவத்ததி. ததோ ஏவ ந ஸம்பஸாரியதி. ரஸதண்ஹாயாதி மது⁴ராதி³ரஸவிஸயாய தண்ஹாய.
511.Asubhasaññāparicitenāti sakalaṃ kāyaṃ asubhanti pavattāya saññāya sahagatajjhānaṃ asubhasaññā, tena paricitena paribhāvitena. Cetasā cittena. Bahulanti abhiṇhaṃ. Viharatoti viharantassa, asubhasamāpattibahulassāti attho. Patilīyatīti saṅkucati tattha paṭikūlatāya saṇṭhitattā. Patikuṭatīti apasakkati. Pativattatīti nivattati. Tato eva na sampasāriyati. Rasataṇhāyāti madhurādirasavisayāya taṇhāya.
ஸப்³ப³லோகே அனபி⁴ரதிஸஞ்ஞாதி தீஸுபி ப⁴வேஸு அருச்சனவஸேன பவத்தா விபஸ்ஸனாபா⁴வனா. நிப்³பி³தா³னுபஸ்ஸனா ஹேஸா. லோகசித்ரேஸூதி ஹத்தி²அஸ்ஸரத²பாஸாத³கூடாகா³ராதி³பே⁴தே³ஸு சேவ ஆராமராமணெய்யகாதி³பே⁴தே³ஸு ச லோகே சித்தவிசித்தேஸு. ராக³ஸந்தானி வூபஸந்தராகா³னி. தோ³ஸமோஹஸந்தானீதி எத்தா²பி ஏஸேவ நயோ. இமேஸங் ஏவங் கம்மட்டா²னக்³க³ஹணங் ஸப்³பே³ஸங் ஸப்பாயபா⁴வதோ.
Sabbaloke anabhiratisaññāti tīsupi bhavesu aruccanavasena pavattā vipassanābhāvanā. Nibbidānupassanā hesā. Lokacitresūti hatthiassarathapāsādakūṭāgārādibhedesu ceva ārāmarāmaṇeyyakādibhedesu ca loke cittavicittesu. Rāgasantāni vūpasantarāgāni. Dosamohasantānīti etthāpi eseva nayo. Imesaṃ evaṃ kammaṭṭhānaggahaṇaṃ sabbesaṃ sappāyabhāvato.
512. ஸக்க²ரங் க³ஹெத்வாதி ஸக்க²ராஸீஸேன தத்தகங் பி⁴ன்னபாஸாணமுட்டி²ந்தி ஆஹ ‘‘அந்தோமுட்டி²யங் திட்ட²னபமாணங் பாஸாண’’ந்தி. முட்டி²பரியாபன்னந்தி அத்தோ². அயஞ்ஹி பாஸாணஸ்ஸ ஹெட்டி²மகோடி. ஹத்தி²னாகோ³தி மஹாஹத்தீ². மஹந்தபரியாயோ நாக³-ஸத்³தோ³தி கேசி. அஹினாகா³தி³தோ வா விஸேஸனத்த²ங் ஹத்தி²னாகோ³தி வுத்தங். ஸகலஸரீரேனேவ நிவத்தித்வா அபலோகேஸீதி வுத்தமத்த²ங் விவரிதுங் ‘‘யதா² ஹீ’’திஆதி³ வுத்தங். ந வாயந்தி எத்த² வா-ஸத்³தோ³ அவதா⁴ரணத்தோ²தி ஆஹ ‘‘நேவ பமாணங் அஞ்ஞாஸீ’’தி. ஸஹாபலோகனாயாதி ச வசனதோதி இமினா வசனேன இமங் வசனமத்தங் க³ஹெத்வாதி அதி⁴ப்பாயோ. உளாரேதி உளாரகு³ணே. ப⁴க³வந்தஞ்ஹி ட²பெத்வா நத்தி² ததா³ ஸதே³வகே லோகே தாதி³ஸோ கு³ணவிஸேஸயுத்தோதி.
512.Sakkharaṃgahetvāti sakkharāsīsena tattakaṃ bhinnapāsāṇamuṭṭhinti āha ‘‘antomuṭṭhiyaṃ tiṭṭhanapamāṇaṃ pāsāṇa’’nti. Muṭṭhipariyāpannanti attho. Ayañhi pāsāṇassa heṭṭhimakoṭi. Hatthināgoti mahāhatthī. Mahantapariyāyo nāga-saddoti keci. Ahināgādito vā visesanatthaṃ hatthināgoti vuttaṃ. Sakalasarīreneva nivattitvā apalokesīti vuttamatthaṃ vivarituṃ ‘‘yathā hī’’tiādi vuttaṃ. Na vāyanti ettha vā-saddo avadhāraṇatthoti āha ‘‘neva pamāṇaṃ aññāsī’’ti. Sahāpalokanāyāti ca vacanatoti iminā vacanena imaṃ vacanamattaṃ gahetvāti adhippāyo. Uḷāreti uḷāraguṇe. Bhagavantañhi ṭhapetvā natthi tadā sadevake loke tādiso guṇavisesayuttoti.
விஸுங் விஸுங் பச்சத்தவேத³னியோ அயஸூலேன ஸத்³தி⁴ங் பூ⁴தானி ச² ப²ஸ்ஸாயதனானி ஏதஸ்ஸாதி ச² ப²ஸ்ஸாயதனங், து³க்க²ங். தங் எத்த² அத்தீ²தி ச² ப²ஸ்ஸாயதனிகோ, நிரயோ. தேனாஹ ‘‘ச²ஸு ப²ஸ்ஸா…பே॰… பச்சயோ’’தி. ஸமாஹனதீதி ஸமாஹதோ, அனேகஸதபே⁴தோ³ ஸங்குஸமாஹதோ எத்த² அத்தீ²தி ஸங்குஸமாஹதோ, நிரயோ. விஸேஸபச்சயதாய வேத³னாய டி²தோதி வேத³னியோ, காரணாகாரகேன வினா பச்சத்தங் ஸயமேவ வேத³னியோதி பச்சத்தவேத³னியோ. அயஸூலேன ஸத்³தி⁴ங் அயஸூலந்தி பாத³பதே³ஸதோ பட்டா²ய நிரந்தரங் அபி⁴ஹனநவஸேன ஆக³தேன பண்ணாஸாய ஜனேஹி க³ஹிதேன அயஸூலேன ஸஹ ஸீஸபதே³ஸதோ பட்டா²ய ஆக³தங். அயஸூலபா⁴வஸாமஞ்ஞேன சேதங் ஏகவசனங், ஸதமத்தானி பதிதானி ஸூலானி. இமினா தே டா²னேன சிந்தெத்வாதி நிஸ்ஸிதவோஹாரேன நிஸ்ஸயங் வத³தி. ஏவங் வுத்தந்தி ‘‘ததா³ ஜானெய்யாஸி வஸ்ஸஸஹஸ்ஸங் மே நிரயே பச்சமானஸ்ஸா’’தி ஏவங் வுத்தங். வுட்டா²னிமந்தி வுட்டா²னே ப⁴வங், அந்திமந்தி அத்தோ². தேனாஹ ‘‘விபாகவுட்டா²னவேத³ன’’ந்தி, விபாகஸ்ஸ பரியோஸானங் வேத³னந்தி அத்தோ². து³க்க²தரா ஹோதி பதீ³பஸ்ஸ விஜ்ஜா²யனக்க²ணே மஹந்தபா⁴வோ விய.
Visuṃ visuṃ paccattavedaniyo ayasūlena saddhiṃ bhūtāni cha phassāyatanāni etassāti cha phassāyatanaṃ, dukkhaṃ. Taṃ ettha atthīti cha phassāyataniko, nirayo. Tenāha ‘‘chasu phassā…pe… paccayo’’ti. Samāhanatīti samāhato, anekasatabhedo saṅkusamāhato ettha atthīti saṅkusamāhato, nirayo. Visesapaccayatāya vedanāya ṭhitoti vedaniyo, kāraṇākārakena vinā paccattaṃ sayameva vedaniyoti paccattavedaniyo. Ayasūlena saddhiṃ ayasūlanti pādapadesato paṭṭhāya nirantaraṃ abhihananavasena āgatena paṇṇāsāya janehi gahitena ayasūlena saha sīsapadesato paṭṭhāya āgataṃ. Ayasūlabhāvasāmaññena cetaṃ ekavacanaṃ, satamattāni patitāni sūlāni. Iminā te ṭhānena cintetvāti nissitavohārena nissayaṃ vadati. Evaṃ vuttanti ‘‘tadā jāneyyāsi vassasahassaṃ me niraye paccamānassā’’ti evaṃ vuttaṃ. Vuṭṭhānimanti vuṭṭhāne bhavaṃ, antimanti attho. Tenāha ‘‘vipākavuṭṭhānavedana’’nti, vipākassa pariyosānaṃ vedananti attho. Dukkhatarā hoti padīpassa vijjhāyanakkhaṇe mahantabhāvo viya.
513. க⁴ட்டயித்வா போதெ²த்வா. பாடியேக்கவேத³னாஜனகாதி பச்சேகங் மஹாது³க்க²ஸமுப்பாத³கா. அயதோ அபக³தோ நிரயோ, ஸோ தே³வதூ³தஸுத்தேன (ம॰ நி॰ 3.261) தீ³பேதப்³போ³. அத்த²வண்ணனா பனஸ்ஸ பரதோ ஸயமேவ ஆக³மிஸ்ஸதி. இமங் பன அதீதவத்து²ங் ஆஹரித்வா அத்தனோ ஞாணானுபா⁴வதீ³பனமுகே²ன மாரங் ஸந்தஜ்ஜெந்தோ மஹாதே²ரோ ‘‘யோ ஏதமபி⁴ஜானாதீ’’தி கா³த²மாஹ. தஸ்ஸத்தோ² – யோ மஹாபி⁴ஞ்ஞோ ஏதங் கம்மங் கம்மப²லஞ்ச ஹத்த²தலே ட²பிதங் ஆமலகங் விய அபி⁴முக²ங் கத்வா பச்சக்க²தோ ஜானாதி. ஸப்³ப³ஸோ பி⁴ன்னகிலேஸதாய பி⁴க்கு² ஸம்மாஸம்பு³த்³த⁴ஸ்ஸ அக்³க³ஸாவகோ, தாதி³ஸங் உளாரகு³ணங் ஆஸஜ்ஜ க⁴ட்டயித்வா ஏகந்தகாளகேஹி பாபத⁴ம்மேஹி ஸமன்னாக³தத்தா கண்ஹ மார ஆயதிங் மஹாது³க்க²ங் விந்தி³ஸ்ஸஸி.
513.Ghaṭṭayitvā pothetvā. Pāṭiyekkavedanājanakāti paccekaṃ mahādukkhasamuppādakā. Ayato apagato nirayo, so devadūtasuttena (ma. ni. 3.261) dīpetabbo. Atthavaṇṇanā panassa parato sayameva āgamissati. Imaṃ pana atītavatthuṃ āharitvā attano ñāṇānubhāvadīpanamukhena māraṃ santajjento mahāthero ‘‘yoetamabhijānātī’’ti gāthamāha. Tassattho – yo mahābhiñño etaṃ kammaṃ kammaphalañca hatthatale ṭhapitaṃ āmalakaṃ viya abhimukhaṃ katvā paccakkhato jānāti. Sabbaso bhinnakilesatāya bhikkhu sammāsambuddhassa aggasāvako, tādisaṃ uḷāraguṇaṃ āsajja ghaṭṭayitvā ekantakāḷakehi pāpadhammehi samannāgatattā kaṇha māra āyatiṃ mahādukkhaṃ vindissasi.
உத³கங் வத்து²ங் கத்வாதி தத்த² நிப்³ப³த்தனகஸத்தானங் ஸாதா⁴ரணகம்மப²லேன மஹாஸமுத்³த³உத³கமேவ அதி⁴ட்டா²னங் கத்வா. ததா² ஹி தானி கப்பட்டி²திகானி ஹொந்தி. தேனாஹ ‘‘கப்பட்டா²யினோ’’தி. தேஸந்தி விமானானங். ஏதங் யதா²வுத்தவிமானவத்து²ங் தாஸங் அச்ச²ரானங் ஸம்பத்திங், தஸ்ஸ ச காரணங் அத்தபச்சக்க²ங் கத்வா ஜானாதி. பாத³ங்கு³ட்டே²ன கம்பயீதி புப்³பா³ராமே விஸாகா²ய மஹாஉபாஸிகாய காரிதங் ஸஹஸ்ஸக³ப்³ப⁴படிமண்டி³தமஹாபாஸாத³ங் அத்தனோ பாத³ங்கு³ட்டே²ன கம்பேஸி. தேனாஹ ‘‘இத³ங் பாஸாத³கம்பனஸுத்தேன தீ³பேதப்³ப³’’ந்தி. இத³ந்தி ‘‘யோ வேஜயந்த’’ந்தி இமிஸ்ஸா கா³தா²ய அத்த²ஜாதங் சூளதண்ஹாஸங்க²யவிமுத்திஸுத்தேனேவ (ம॰ நி॰ 1.393) தீ³பேதப்³ப³ங்.
Udakaṃ vatthuṃ katvāti tattha nibbattanakasattānaṃ sādhāraṇakammaphalena mahāsamuddaudakameva adhiṭṭhānaṃ katvā. Tathā hi tāni kappaṭṭhitikāni honti. Tenāha ‘‘kappaṭṭhāyino’’ti. Tesanti vimānānaṃ. Etaṃ yathāvuttavimānavatthuṃ tāsaṃ accharānaṃ sampattiṃ, tassa ca kāraṇaṃ attapaccakkhaṃ katvā jānāti. Pādaṅguṭṭhena kampayīti pubbārāme visākhāya mahāupāsikāya kāritaṃ sahassagabbhapaṭimaṇḍitamahāpāsādaṃ attano pādaṅguṭṭhena kampesi. Tenāha ‘‘idaṃ pāsādakampanasuttena dīpetabba’’nti. Idanti ‘‘yo vejayanta’’nti imissā gāthāya atthajātaṃ cūḷataṇhāsaṅkhayavimuttisutteneva (ma. ni. 1.393) dīpetabbaṃ.
தஸ்ஸ ப்³ரஹ்மக³ணஸ்ஸ ததா²சிந்தனஸமனந்தரமேவ தஸ்மிங் ப்³ரஹ்மலோகே ஸுத⁴ம்மங் ப்³ரஹ்மஸப⁴ங் க³ந்த்வா. தேபீதி மஹாமொக்³க³ல்லானாத³யோ. பச்சேகங் தி³ஸாஸூதி மஹாமொக்³க³ல்லானத்தே²ரோ புரத்தி²மதி³ஸாயங், மஹாகஸ்ஸபத்தே²ரோ த³க்கி²ணதி³ஸாயங், மஹாகப்பினத்தே²ரோ பச்சி²மதி³ஸாயங், அனுருத்³த⁴த்தே²ரோ உத்தரதி³ஸாயந்தி ஏவங் சத்தாரோ தே²ரா ப்³ரஹ்மபரிஸமத்த²கே மஜ்ஜே² நிஸின்னஸ்ஸ ப⁴க³வதோ ஸமந்ததோ சதுத்³தி³ஸா நிஸீதி³ங்ஸு. கா³தா² வுத்தாதி ‘‘யோ ப்³ரஹ்மங் பரிபுச்ச²தீ’’தி கா³தா² வுத்தா. அஞ்ஞதரப்³ரஹ்மஸுத்தேனாதி – ‘‘தேன கோ² பன ஸமயேன அஞ்ஞதரஸ்ஸ ப்³ரஹ்முனோ ஏவரூபங் பாபகங் தி³ட்டி²க³தங் உப்பன்னங் ஹோதீ’’திஆதி³னா (ஸங்॰ நி॰ 1.176) மஹாவக்³கே³ ஆக³தேன அஞ்ஞதரப்³ரஹ்மஸுத்தேன.
Tassa brahmagaṇassa tathācintanasamanantarameva tasmiṃ brahmaloke sudhammaṃ brahmasabhaṃ gantvā. Tepīti mahāmoggallānādayo. Paccekaṃ disāsūti mahāmoggallānatthero puratthimadisāyaṃ, mahākassapatthero dakkhiṇadisāyaṃ, mahākappinatthero pacchimadisāyaṃ, anuruddhatthero uttaradisāyanti evaṃ cattāro therā brahmaparisamatthake majjhe nisinnassa bhagavato samantato catuddisā nisīdiṃsu. Gāthā vuttāti ‘‘yo brahmaṃ paripucchatī’’ti gāthā vuttā. Aññatarabrahmasuttenāti – ‘‘tena kho pana samayena aññatarassa brahmuno evarūpaṃ pāpakaṃ diṭṭhigataṃ uppannaṃ hotī’’tiādinā (saṃ. ni. 1.176) mahāvagge āgatena aññatarabrahmasuttena.
ஜா²னவிமொக்கே²ன பு²ஸீதி ஜா²னவிமொக்க²ஸன்னிஸ்ஸயேன அபி⁴ஞ்ஞாஞாணேன ப²ஸ்ஸயி. வனந்தி ஜம்பு³தீ³பங் அப²ஸ்ஸயீதி ஸம்ப³ந்தோ⁴. ஜம்பு³தீ³போ ஹி வனப³ஹுலதாய இத⁴ ‘‘வன’’ந்தி வுத்தோ. தேனாஹ ‘‘ஜம்பு³ஸண்ட³ஸ்ஸ இஸ்ஸரோ’’தி. புப்³ப³விதே³ஹானங் தீ³பந்தி புப்³ப³விதே³ஹவாஸீனங் தீ³பங், புப்³ப³விதே³ஹதீ³பந்தி அத்தோ². பூ⁴மிஸயா நரா நாம அபரகோ³யானகா உத்தரகுருகா ச. யஸ்மா தே கே³ஹபரிக்³க³ஹாபா⁴வதோ பூ⁴மியங்யேவ ஸயந்தி, ந பாஸாதா³தீ³ஸு. படிலபீ⁴தி உப்பாதே³ஸி. ஏதங் ஆஸங் மா அகாஸீதி ஏஸா யதா² புப்³பே³ தூ³ஸிமாரஸ்ஸ, ஏவங் துய்ஹங் ஆஸா தீ³க⁴ரத்தங் அனத்தா²வஹா, தஸ்மா ஏதி³ஸங் ஆஸங் மா அகாஸீதி மாரஸ்ஸ ஓவாத³ங் அதா³ஸி. ஸேஸங் ஸப்³ப³த்த² ஸுவிஞ்ஞெய்யமேவ.
Jhānavimokkhena phusīti jhānavimokkhasannissayena abhiññāñāṇena phassayi. Vananti jambudīpaṃ aphassayīti sambandho. Jambudīpo hi vanabahulatāya idha ‘‘vana’’nti vutto. Tenāha ‘‘jambusaṇḍassa issaro’’ti. Pubbavidehānaṃ dīpanti pubbavidehavāsīnaṃ dīpaṃ, pubbavidehadīpanti attho. Bhūmisayā narā nāma aparagoyānakā uttarakurukā ca. Yasmā te gehapariggahābhāvato bhūmiyaṃyeva sayanti, na pāsādādīsu. Paṭilabhīti uppādesi. Etaṃ āsaṃ mā akāsīti esā yathā pubbe dūsimārassa, evaṃ tuyhaṃ āsā dīgharattaṃ anatthāvahā, tasmā edisaṃ āsaṃ mā akāsīti mārassa ovādaṃ adāsi. Sesaṃ sabbattha suviññeyyameva.
பபஞ்சஸூத³னியா மஜ்ஜி²மனிகாயட்ட²கதா²ய
Papañcasūdaniyā majjhimanikāyaṭṭhakathāya
மாரதஜ்ஜனீயஸுத்தவண்ணனாய லீனத்த²ப்பகாஸனா ஸமத்தா.
Māratajjanīyasuttavaṇṇanāya līnatthappakāsanā samattā.
நிட்டி²தா ச சூளயமகவக்³க³வண்ணனா.
Niṭṭhitā ca cūḷayamakavaggavaṇṇanā.
மூலபண்ணாஸடீகா ஸமத்தா.
Mūlapaṇṇāsaṭīkā samattā.
து³தியோ பா⁴கோ³ நிட்டி²தோ.
Dutiyo bhāgo niṭṭhito.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 10. மாரதஜ்ஜனீயஸுத்தங் • 10. Māratajjanīyasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 10. மாரதஜ்ஜனீயஸுத்தவண்ணனா • 10. Māratajjanīyasuttavaṇṇanā
