| Library / Tipiṭaka / ཏིཔིཊཀ • Tipiṭaka / མཛྫྷིམནིཀཱཡ (ཊཱིཀཱ) • Majjhimanikāya (ṭīkā) |
༡༠. མཱརཏཛྫནཱིཡསུཏྟཝཎྞནཱ
10. Māratajjanīyasuttavaṇṇanā
༥༠༦. ཀོཊྛམནུཔཝིཊྛོཏི ཨཱསཡོ ཝཙྩགུཏྟཊྛཱནཏཱཡ ཀོཊྛཾ, ཏསྶ ཨབྦྷནྟརཉྷེཏྠ ཀོཊྛཾ། ཨནུརཱུཔོ ཧུཏྭཱ པཝིཊྛོ ཨནུཔཝིཊྛོ། སུཁུམཉྷི ཏདནུཙྪཝིཀཾ ཨཏྟབྷཱཝཾ མཱཔེཏྭཱ ཨཡཾ ཏཏྠ པཝིཊྛོ། གརུགརོ ཝིཡཱཏི གརུཀགརུཀོ ཝིཡ། ཨུ-ཀཱརསྶ ཧི ཨོ-ཀཱརཾ ཀཏྭཱ ཨཡཾ ནིདྡེསོ, ཨཏིཝིཡ གརུཀོ མཉྙེཏི ཨཏྠོ། གརུགརུ ཝིཡ ཨིཙྩེཝ ཝཱ པཱཋོ། མཱསབྷཏྟཾ མཱསོ ཨུཏྟརཔདལོཔེན, མཱསབྷཏྟེན ཨཱཙིཏཾ པཱུརིཏཾ མཱསཱཙིཏཾ མཉྙེ། ཏེནཱཧ ‘‘མཱསབྷཏྟཾ བྷུཏྟསྶ ཀུཙྪི ཝིཡཱ’’ཏི། ཨུཏྟརཔདལོཔེན ཝིནཱ ཨཏྠཾ དསྶེཏུཾ ‘‘མཱསཔཱུརིཏཔསིབྦཀོ ཝིཡཱ’’ཏི ཝུཏྟཾ། ཏིནྟམཱསོ ཝིཡཱཏི ཏིནྟམཱསོ པསིབྦཀོ ཝིཡ། ཀིཾ ནུ ཁོ ཨེཏཾ མམ ཀུཙྪིཡཾ པུབྦཾ བྷཱརིཀཏྟཾ, ཀིཾ ནུ ཁོ ཀཐཾ ནུ ཁོ ཛཱཏནྟི ཨདྷིཔྤཱཡོ? ཨུཔཱཡེནཱཏི པཐེན ཉཱཡེན། བྱཏིརེཀཏོ པནསྶ ཨནུཔཱཡཾ དསྶེཏུཾ ‘‘སཙེ པནཱ’’ཏིཨཱདི ཝུཏྟཾ། ཨཏྟཱནམེཝ ཝཱ སནྡྷཱཡ ‘‘མཱ ཏཐཱགཏཾ ཝིཧེསེསཱི’’ཏི ཨཱཧ། ཡཐཱ ཧི ཨརིཡསངྒྷོ ‘‘ཏཐཱགཏཾ དེཝམནུསྶཔཱུཛིཏཾ, སངྒྷཾ ནམསྶཱམ སུཝཏྠི ཧོཏཱུ’’ཏིཨཱདཱིསུ (ཁུ॰ པཱ॰ ༦.༡༨; སུ॰ ནི॰ ༢༤༡) ཏཐཱགཏོཏི ཝུཙྩཏི, ཨེཝཾ ཏཔྤརིཡཱཔནྣཱ ཨརིཡཔུགྒལཱ, ཡཐཱ ཙ པུརིམཀཱ དུཏིཡཨགྒསཱཝཀཱ ཀཔྤཱནཾ སཏསཧསྶཱདྷིཀཾ ཨེཀཾ ཨསངྑྱེཡྻཾ པཱརམིཡོ པཱུརེཏྭཱ ཨཱགཏཱ, ཨཡམྤི མཧཱཐེརོ ཏཐཱ ཨཱགཏོཏི ཏཐཱགཏོཏི། པཏིཨགྒལེ༹ཝ ཨཊྛཱསཱིཏི ཨགྒལ༹སྶ བཧིབྷཱགེ ཨཊྛཱསི།
506.Koṭṭhamanupaviṭṭhoti āsayo vaccaguttaṭṭhānatāya koṭṭhaṃ, tassa abbhantarañhettha koṭṭhaṃ. Anurūpo hutvā paviṭṭho anupaviṭṭho. Sukhumañhi tadanucchavikaṃ attabhāvaṃ māpetvā ayaṃ tattha paviṭṭho. Garugaro viyāti garukagaruko viya. U-kārassa hi o-kāraṃ katvā ayaṃ niddeso, ativiya garuko maññeti attho. Garugaru viya icceva vā pāṭho. Māsabhattaṃ māso uttarapadalopena, māsabhattena ācitaṃ pūritaṃ māsācitaṃ maññe. Tenāha ‘‘māsabhattaṃ bhuttassa kucchi viyā’’ti. Uttarapadalopena vinā atthaṃ dassetuṃ ‘‘māsapūritapasibbako viyā’’ti vuttaṃ. Tintamāso viyāti tintamāso pasibbako viya. Kiṃ nu kho etaṃ mama kucchiyaṃ pubbaṃ bhārikattaṃ, kiṃ nu kho kathaṃ nu kho jātanti adhippāyo? Upāyenāti pathena ñāyena. Byatirekato panassa anupāyaṃ dassetuṃ ‘‘sace panā’’tiādi vuttaṃ. Attānameva vā sandhāya ‘‘mā tathāgataṃ vihesesī’’ti āha. Yathā hi ariyasaṅgho ‘‘tathāgataṃ devamanussapūjitaṃ, saṅghaṃ namassāma suvatthi hotū’’tiādīsu (khu. pā. 6.18; su. ni. 241) tathāgatoti vuccati, evaṃ tappariyāpannā ariyapuggalā, yathā ca purimakā dutiyaaggasāvakā kappānaṃ satasahassādhikaṃ ekaṃ asaṅkhyeyyaṃ pāramiyo pūretvā āgatā, ayampi mahāthero tathā āgatoti tathāgatoti. Patiaggaḷeva aṭṭhāsīti aggaḷassa bahibhāge aṭṭhāsi.
༥༠༧. རུཀྑདེཝཏཱ ནཱམ ཙཱཏུམཧཱརཱཛིཀེསུ ནིཧཱིནོ ཀཱཡོ, ཏསྨཱ ནེསཾ མནུསྶགནྡྷོ པརིཙིཏཏྟཱ ནཱཏིཛེགུཙྪོཏི ཨཱཧ ‘‘ཨཱཀཱསཊྛདེཝཏཱན’’ནྟི། ཨཱབཱདྷཾ ཀརོཏཱིཏི དུཀྑཾ ཛནེཏི། ནཱགརིཀོཏི སུཀུམཱརོ། པརིཙོཀྑོཏི སབྦསོ སུཙིརཱུཔོ། ཉཱཏིཀོཊིནྟི ཉཱཏིབྷཱགཾ། ཨནཱདིམཏི ཧི སཾསཱརེ ཉཱཏིབྷཱགརཧིཏོ ནཱམ སཏྟོ ཀསྶཙིཔི ནཏྠཱིཏི ཨདྷིཔྤཱཡོ། ཨིདནྟི ‘‘སོ མེ ཏྭཾ བྷཱགིནེཡྻོ ཧོསཱི’’ཏི ཨིདཾ ཝཙནཾ། པཝེཎིཝསེནཱཏི ཏདཱ མཡ྄ཧཾ བྷཱགིནེཡྻོ ཧུཏྭཱ ཨིདཱནི མཱརཊྛཱནེ ཋིཏོཏི ཨིམིསྶཱ པཝེཎིཡཱ ཝསེན ཝུཏྟཾ། ཨཉྙསྶ ཝཱ ཝེསམཾ དྷུརོ ཝིདྷུརོ། ཏེནཱཧ ‘‘ཨཉྙེཧི སདྡྷིཾ ཨསདིསོ’’ཏི། ཨཔྤདུཀྑེནཱཏི སུཁེནེཝ། པནྠཱནཾ ཨཝནྟི གཙྪནྟཱིཏི པཐཱཝིནོ། ཨེཏྟཀེནཱཏི ཨེཏྟཱཝཏཱ ཙིཏཀསནྣིསཡེན། ཨུདཀལེཎནྟི ཨུདཀནིསྶནྡནལེཎཾ། སམཱཔཏྟིཏོཏི ནིརོདྷསམཱཔཏྟིཏོ། སམཱཔཏྟིཕལནྟི ནིརོདྷསམཱཔཏྟིཕལཾ།
507. Rukkhadevatā nāma cātumahārājikesu nihīno kāyo, tasmā nesaṃ manussagandho paricitattā nātijegucchoti āha ‘‘ākāsaṭṭhadevatāna’’nti. Ābādhaṃ karotīti dukkhaṃ janeti. Nāgarikoti sukumāro. Paricokkhoti sabbaso sucirūpo. Ñātikoṭinti ñātibhāgaṃ. Anādimati hi saṃsāre ñātibhāgarahito nāma satto kassacipi natthīti adhippāyo. Idanti ‘‘so me tvaṃ bhāgineyyo hosī’’ti idaṃ vacanaṃ. Paveṇivasenāti tadā mayhaṃ bhāgineyyo hutvā idāni māraṭṭhāne ṭhitoti imissā paveṇiyā vasena vuttaṃ. Aññassa vā vesamaṃ dhuro vidhuro. Tenāha ‘‘aññehi saddhiṃ asadiso’’ti. Appadukkhenāti sukheneva. Panthānaṃ avanti gacchantīti pathāvino. Ettakenāti ettāvatā citakasannisayena. Udakaleṇanti udakanissandanaleṇaṃ. Samāpattitoti nirodhasamāpattito. Samāpattiphalanti nirodhasamāpattiphalaṃ.
༥༠༨. དསཧི ཨཀྐོསཝཏྠཱུཧཱིཏི དསཧིཔི ཨཀྐོསཝཏྠཱུཧི, ཏཏོ ཀིཉྩི ཨཧཱཔེནྟཱ། པརིབྷཱསཐཱཏི གརཧཐ། གྷཊྚེཐཱཏི ཨནཱུནཱཧི ཀཐཱཧི ཨིམེསུ ཨོཝིཛ྄ཛྷཐ། དུཀྑཱཔེཐཱཏི ཙིཏྟེ དུཀྑཾ ཛནེཐ། ཨེཏེསནྟི ཏེསཾ བྷིཀྑཱུནཾ ཏུམྷཱཀཾ ཨཀྐོསནཱདཱིཧི བྷིཀྑཱུནཾ ཀིལེསུཔྤཏྟིཡཱ། ཏེནེཏྠ དཱུསཱི མཱརོ ཨོཏཱརཾ ལབྷཏི ནཱམཱཏི ཨདྷིཔྤཱཡོ། ཨུཔཊྛཱཏབྦཾ ཨིབྷཾ ཨརཧནྟཱིཏི ཨིབྦྷཱ, ཧཏྠིབྷཎྜཀཱ, ཧཱིནཛཱིཝིཀཏཱཡ ཧེཏེ ཨིབྦྷཱ ཝིཡཱཏི ཨིབྦྷཱ, ཏེ པན སདུཏིཡཀཝསེན ‘‘གཧཔཏིཀཱ’’ཏི ཝུཏྟཱ། ཀཎྷཱཏི ཀཎྷཱབྷིཛཱཏིཀཱ། པཱདཏོ ཛཱཏཏྟཱ པཱདཱནཾ ཨཔཙྩཱ། ཨཱལསིཡཛཱཏཱཏི ཀསིཝཎིཛྫཱདིཀམྨསྶ ཨཀརཎེན སཉྫཱཏཱལསིཡཱ། གཱུཐནིདྡྷམནཔནཱལཱི༹ཏི ཝཙྩཀཱུཔཏོ གཱུཐསྶ ནིཀྑམཔདེསོ།
508.Dasahi akkosavatthūhīti dasahipi akkosavatthūhi, tato kiñci ahāpentā. Paribhāsathāti garahatha. Ghaṭṭethāti anūnāhi kathāhi imesu ovijjhatha. Dukkhāpethāti citte dukkhaṃ janetha. Etesanti tesaṃ bhikkhūnaṃ tumhākaṃ akkosanādīhi bhikkhūnaṃ kilesuppattiyā. Tenettha dūsī māro otāraṃ labhati nāmāti adhippāyo. Upaṭṭhātabbaṃ ibhaṃ arahantīti ibbhā, hatthibhaṇḍakā, hīnajīvikatāya hete ibbhā viyāti ibbhā, te pana sadutiyakavasena ‘‘gahapatikā’’ti vuttā. Kaṇhāti kaṇhābhijātikā. Pādato jātattā pādānaṃ apaccā. Ālasiyajātāti kasivaṇijjādikammassa akaraṇena sañjātālasiyā. Gūthaniddhamanapanāḷīti vaccakūpato gūthassa nikkhamapadeso.
མནུསྶཱནཾ ཨཀུསལཾ ན བྷཝེཡྻ ཏེསཾ ཏཱདིསཱཡ ཨབྷིསནྡྷིཡཱ ཨབྷཱཝཏོ། ཨཱཝེསཀསྶ ཨཱནུབྷཱཝེན ཨཱཝིཊྛསྶ ཙིཏྟསནྟཏི ཝིཔརིཝཏྟཏཱིཏི ཝུཏྟོཝཱཡམཏྠོ། ཝིསབྷཱགཝཏྠུནྟི བྷིཀྑཱུནཾ སནྟིཀེ ཨིཏྠིརཱུཔཾ, བྷིཀྑུནཱིནཾ སནྟིཀེ པུརིསརཱུཔནྟི ཨཱིདིསཾ, ཨཉྙཾ ཝཱ པབྦཛིཏཱནཾ ཨསཱརུཔྤཾ ཝིསབྷཱགཝཏྠུཾ། ཝིཔྤཊིསཱརཱརམྨཎནྟི པསྶནྟཱནཾ ཝིཔྤཊིསཱརསྶ པཙྩཡཾ། ལེཔཡཊྛིནྟི ལེཔལིཏྟཾ ཝཱཀུརཡཊྛིཾ།
Manussānaṃ akusalaṃ na bhaveyya tesaṃ tādisāya abhisandhiyā abhāvato. Āvesakassa ānubhāvena āviṭṭhassa cittasantati viparivattatīti vuttovāyamattho. Visabhāgavatthunti bhikkhūnaṃ santike itthirūpaṃ, bhikkhunīnaṃ santike purisarūpanti īdisaṃ, aññaṃ vā pabbajitānaṃ asāruppaṃ visabhāgavatthuṃ. Vippaṭisārārammaṇanti passantānaṃ vippaṭisārassa paccayaṃ. Lepayaṭṭhinti lepalittaṃ vākurayaṭṭhiṃ.
༥༡༠. སོམནསྶཝསེནཱཏི གེཧསྶིཏསོམནསྶཝསེན། ཨཉྙཐཏྟནྟི ཨུཔྤིལཱཝིཏཏྟཾ། པུརིམནཡེནེཝཱཏི ‘‘སཙེ མཱརོ མནུསྶཱནཾ སརཱིརེ ཨདྷིམུཙྩིཏྭཱ’’ཏིཨཱདིནཱ པུབྦེ ཝུཏྟནཡེན། ཡདི མཱརོཝ ཏཐཱ ཀརེཡྻ, མནུསྶཱནཾ ཀུསལཾ ན བྷཝེཡྻ, མཱརསྶེཝ བྷཝེཡྻ, སརཱིརེ པན ཨནདྷིམུཙྩིཏྭཱ ཏཱདིསཾ པསཱདནཱིཡཾ པསཱདཝཏྠུཾ དསྶེསི། ཏེནཱཧ ‘‘ཡཐཱ ཧཱི’’ཏིཨཱདི།
510.Somanassavasenāti gehassitasomanassavasena. Aññathattanti uppilāvitattaṃ. Purimanayenevāti ‘‘sace māro manussānaṃ sarīre adhimuccitvā’’tiādinā pubbe vuttanayena. Yadi mārova tathā kareyya, manussānaṃ kusalaṃ na bhaveyya, mārasseva bhaveyya, sarīre pana anadhimuccitvā tādisaṃ pasādanīyaṃ pasādavatthuṃ dassesi. Tenāha ‘‘yathā hī’’tiādi.
༥༡༡. ཨསུབྷསཉྙཱཔརིཙིཏེནཱཏི སཀལཾ ཀཱཡཾ ཨསུབྷནྟི པཝཏྟཱཡ སཉྙཱཡ སཧགཏཛ྄ཛྷཱནཾ ཨསུབྷསཉྙཱ, ཏེན པརིཙིཏེན པརིབྷཱཝིཏེན། ཙེཏསཱ ཙིཏྟེན། བཧུལནྟི ཨབྷིཎྷཾ། ཝིཧརཏོཏི ཝིཧརནྟསྶ, ཨསུབྷསམཱཔཏྟིབཧུལསྶཱཏི ཨཏྠོ། པཏིལཱིཡཏཱིཏི སངྐུཙཏི ཏཏྠ པཊིཀཱུལཏཱཡ སཎྛིཏཏྟཱ། པཏིཀུཊཏཱིཏི ཨཔསཀྐཏི། པཏིཝཏྟཏཱིཏི ནིཝཏྟཏི། ཏཏོ ཨེཝ ན སམྤསཱརིཡཏི། རསཏཎྷཱཡཱཏི མདྷུརཱདིརསཝིསཡཱཡ ཏཎྷཱཡ།
511.Asubhasaññāparicitenāti sakalaṃ kāyaṃ asubhanti pavattāya saññāya sahagatajjhānaṃ asubhasaññā, tena paricitena paribhāvitena. Cetasā cittena. Bahulanti abhiṇhaṃ. Viharatoti viharantassa, asubhasamāpattibahulassāti attho. Patilīyatīti saṅkucati tattha paṭikūlatāya saṇṭhitattā. Patikuṭatīti apasakkati. Pativattatīti nivattati. Tato eva na sampasāriyati. Rasataṇhāyāti madhurādirasavisayāya taṇhāya.
སབྦལོཀེ ཨནབྷིརཏིསཉྙཱཏི ཏཱིསུཔི བྷཝེསུ ཨརུཙྩནཝསེན པཝཏྟཱ ཝིཔསྶནཱབྷཱཝནཱ། ནིབྦིདཱནུཔསྶནཱ ཧེསཱ། ལོཀཙིཏྲེསཱུཏི ཧཏྠིཨསྶརཐཔཱསཱདཀཱུཊཱགཱརཱདིབྷེདེསུ ཙེཝ ཨཱརཱམརཱམཎེཡྻཀཱདིབྷེདེསུ ཙ ལོཀེ ཙིཏྟཝིཙིཏྟེསུ། རཱགསནྟཱནི ཝཱུཔསནྟརཱགཱནི། དོསམོཧསནྟཱནཱིཏི ཨེཏྠཱཔི ཨེསེཝ ནཡོ། ཨིམེསཾ ཨེཝཾ ཀམྨཊྛཱནགྒཧཎཾ སབྦེསཾ སཔྤཱཡབྷཱཝཏོ།
Sabbaloke anabhiratisaññāti tīsupi bhavesu aruccanavasena pavattā vipassanābhāvanā. Nibbidānupassanā hesā. Lokacitresūti hatthiassarathapāsādakūṭāgārādibhedesu ceva ārāmarāmaṇeyyakādibhedesu ca loke cittavicittesu. Rāgasantāni vūpasantarāgāni. Dosamohasantānīti etthāpi eseva nayo. Imesaṃ evaṃ kammaṭṭhānaggahaṇaṃ sabbesaṃ sappāyabhāvato.
༥༡༢. སཀྑརཾ གཧེཏྭཱཏི སཀྑརཱསཱིསེན ཏཏྟཀཾ བྷིནྣཔཱསཱཎམུཊྛིནྟི ཨཱཧ ‘‘ཨནྟོམུཊྛིཡཾ ཏིཊྛནཔམཱཎཾ པཱསཱཎ’’ནྟི། མུཊྛིཔརིཡཱཔནྣནྟི ཨཏྠོ། ཨཡཉྷི པཱསཱཎསྶ ཧེཊྛིམཀོཊི། ཧཏྠིནཱགོཏི མཧཱཧཏྠཱི། མཧནྟཔརིཡཱཡོ ནཱག-སདྡོཏི ཀེཙི། ཨཧིནཱགཱདིཏོ ཝཱ ཝིསེསནཏྠཾ ཧཏྠིནཱགོཏི ཝུཏྟཾ། སཀལསརཱིརེནེཝ ནིཝཏྟིཏྭཱ ཨཔལོཀེསཱིཏི ཝུཏྟམཏྠཾ ཝིཝརིཏུཾ ‘‘ཡཐཱ ཧཱི’’ཏིཨཱདི ཝུཏྟཾ། ན ཝཱཡནྟི ཨེཏྠ ཝཱ-སདྡོ ཨཝདྷཱརཎཏྠོཏི ཨཱཧ ‘‘ནེཝ པམཱཎཾ ཨཉྙཱསཱི’’ཏི། སཧཱཔལོཀནཱཡཱཏི ཙ ཝཙནཏོཏི ཨིམིནཱ ཝཙནེན ཨིམཾ ཝཙནམཏྟཾ གཧེཏྭཱཏི ཨདྷིཔྤཱཡོ། ཨུལཱ༹རེཏི ཨུལཱ༹རགུཎེ། བྷགཝནྟཉྷི ཋཔེཏྭཱ ནཏྠི ཏདཱ སདེཝཀེ ལོཀེ ཏཱདིསོ གུཎཝིསེསཡུཏྟོཏི།
512.Sakkharaṃgahetvāti sakkharāsīsena tattakaṃ bhinnapāsāṇamuṭṭhinti āha ‘‘antomuṭṭhiyaṃ tiṭṭhanapamāṇaṃ pāsāṇa’’nti. Muṭṭhipariyāpannanti attho. Ayañhi pāsāṇassa heṭṭhimakoṭi. Hatthināgoti mahāhatthī. Mahantapariyāyo nāga-saddoti keci. Ahināgādito vā visesanatthaṃ hatthināgoti vuttaṃ. Sakalasarīreneva nivattitvā apalokesīti vuttamatthaṃ vivarituṃ ‘‘yathā hī’’tiādi vuttaṃ. Na vāyanti ettha vā-saddo avadhāraṇatthoti āha ‘‘neva pamāṇaṃ aññāsī’’ti. Sahāpalokanāyāti ca vacanatoti iminā vacanena imaṃ vacanamattaṃ gahetvāti adhippāyo. Uḷāreti uḷāraguṇe. Bhagavantañhi ṭhapetvā natthi tadā sadevake loke tādiso guṇavisesayuttoti.
ཝིསུཾ ཝིསུཾ པཙྩཏྟཝེདནིཡོ ཨཡསཱུལེན སདྡྷིཾ བྷཱུཏཱནི ཚ ཕསྶཱཡཏནཱནི ཨེཏསྶཱཏི ཚ ཕསྶཱཡཏནཾ, དུཀྑཾ། ཏཾ ཨེཏྠ ཨཏྠཱིཏི ཚ ཕསྶཱཡཏནིཀོ, ནིརཡོ། ཏེནཱཧ ‘‘ཚསུ ཕསྶཱ…པེ॰… པཙྩཡོ’’ཏི། སམཱཧནཏཱིཏི སམཱཧཏོ, ཨནེཀསཏབྷེདོ སངྐུསམཱཧཏོ ཨེཏྠ ཨཏྠཱིཏི སངྐུསམཱཧཏོ, ནིརཡོ། ཝིསེསཔཙྩཡཏཱཡ ཝེདནཱཡ ཋིཏོཏི ཝེདནིཡོ, ཀཱརཎཱཀཱརཀེན ཝིནཱ པཙྩཏྟཾ སཡམེཝ ཝེདནིཡོཏི པཙྩཏྟཝེདནིཡོ། ཨཡསཱུལེན སདྡྷིཾ ཨཡསཱུལནྟི པཱདཔདེསཏོ པཊྛཱཡ ནིརནྟརཾ ཨབྷིཧནནཝསེན ཨཱགཏེན པཎྞཱསཱཡ ཛནེཧི གཧིཏེན ཨཡསཱུལེན སཧ སཱིསཔདེསཏོ པཊྛཱཡ ཨཱགཏཾ། ཨཡསཱུལབྷཱཝསཱམཉྙེན ཙེཏཾ ཨེཀཝཙནཾ, སཏམཏྟཱནི པཏིཏཱནི སཱུལཱནི། ཨིམིནཱ ཏེ ཋཱནེན ཙིནྟེཏྭཱཏི ནིསྶིཏཝོཧཱརེན ནིསྶཡཾ ཝདཏི། ཨེཝཾ ཝུཏྟནྟི ‘‘ཏདཱ ཛཱནེཡྻཱསི ཝསྶསཧསྶཾ མེ ནིརཡེ པཙྩམཱནསྶཱ’’ཏི ཨེཝཾ ཝུཏྟཾ། ཝུཊྛཱནིམནྟི ཝུཊྛཱནེ བྷཝཾ, ཨནྟིམནྟི ཨཏྠོ། ཏེནཱཧ ‘‘ཝིཔཱཀཝུཊྛཱནཝེདན’’ནྟི, ཝིཔཱཀསྶ པརིཡོསཱནཾ ཝེདནནྟི ཨཏྠོ། དུཀྑཏརཱ ཧོཏི པདཱིཔསྶ ཝིཛ྄ཛྷཱཡནཀྑཎེ མཧནྟབྷཱཝོ ཝིཡ།
Visuṃ visuṃ paccattavedaniyo ayasūlena saddhiṃ bhūtāni cha phassāyatanāni etassāti cha phassāyatanaṃ, dukkhaṃ. Taṃ ettha atthīti cha phassāyataniko, nirayo. Tenāha ‘‘chasu phassā…pe… paccayo’’ti. Samāhanatīti samāhato, anekasatabhedo saṅkusamāhato ettha atthīti saṅkusamāhato, nirayo. Visesapaccayatāya vedanāya ṭhitoti vedaniyo, kāraṇākārakena vinā paccattaṃ sayameva vedaniyoti paccattavedaniyo. Ayasūlena saddhiṃ ayasūlanti pādapadesato paṭṭhāya nirantaraṃ abhihananavasena āgatena paṇṇāsāya janehi gahitena ayasūlena saha sīsapadesato paṭṭhāya āgataṃ. Ayasūlabhāvasāmaññena cetaṃ ekavacanaṃ, satamattāni patitāni sūlāni. Iminā te ṭhānena cintetvāti nissitavohārena nissayaṃ vadati. Evaṃ vuttanti ‘‘tadā jāneyyāsi vassasahassaṃ me niraye paccamānassā’’ti evaṃ vuttaṃ. Vuṭṭhānimanti vuṭṭhāne bhavaṃ, antimanti attho. Tenāha ‘‘vipākavuṭṭhānavedana’’nti, vipākassa pariyosānaṃ vedananti attho. Dukkhatarā hoti padīpassa vijjhāyanakkhaṇe mahantabhāvo viya.
༥༡༣. གྷཊྚཡིཏྭཱ པོཐེཏྭཱ། པཱཊིཡེཀྐཝེདནཱཛནཀཱཏི པཙྩེཀཾ མཧཱདུཀྑསམུཔྤཱདཀཱ། ཨཡཏོ ཨཔགཏོ ནིརཡོ, སོ དེཝདཱུཏསུཏྟེན (མ॰ ནི॰ ༣.༢༦༡) དཱིཔེཏབྦོ། ཨཏྠཝཎྞནཱ པནསྶ པརཏོ སཡམེཝ ཨཱགམིསྶཏི། ཨིམཾ པན ཨཏཱིཏཝཏྠུཾ ཨཱཧརིཏྭཱ ཨཏྟནོ ཉཱཎཱནུབྷཱཝདཱིཔནམུཁེན མཱརཾ སནྟཛྫེནྟོ མཧཱཐེརོ ‘‘ཡོ ཨེཏམབྷིཛཱནཱཏཱི’’ཏི གཱཐམཱཧ། ཏསྶཏྠོ – ཡོ མཧཱབྷིཉྙོ ཨེཏཾ ཀམྨཾ ཀམྨཕལཉྩ ཧཏྠཏལེ ཋཔིཏཾ ཨཱམལཀཾ ཝིཡ ཨབྷིམུཁཾ ཀཏྭཱ པཙྩཀྑཏོ ཛཱནཱཏི། སབྦསོ བྷིནྣཀིལེསཏཱཡ བྷིཀྑུ སམྨཱསམྦུདྡྷསྶ ཨགྒསཱཝཀོ, ཏཱདིསཾ ཨུལཱ༹རགུཎཾ ཨཱསཛྫ གྷཊྚཡིཏྭཱ ཨེཀནྟཀཱལ༹ཀེཧི པཱཔདྷམྨེཧི སམནྣཱགཏཏྟཱ ཀཎྷ མཱར ཨཱཡཏིཾ མཧཱདུཀྑཾ ཝིནྡིསྶསི།
513.Ghaṭṭayitvā pothetvā. Pāṭiyekkavedanājanakāti paccekaṃ mahādukkhasamuppādakā. Ayato apagato nirayo, so devadūtasuttena (ma. ni. 3.261) dīpetabbo. Atthavaṇṇanā panassa parato sayameva āgamissati. Imaṃ pana atītavatthuṃ āharitvā attano ñāṇānubhāvadīpanamukhena māraṃ santajjento mahāthero ‘‘yoetamabhijānātī’’ti gāthamāha. Tassattho – yo mahābhiñño etaṃ kammaṃ kammaphalañca hatthatale ṭhapitaṃ āmalakaṃ viya abhimukhaṃ katvā paccakkhato jānāti. Sabbaso bhinnakilesatāya bhikkhu sammāsambuddhassa aggasāvako, tādisaṃ uḷāraguṇaṃ āsajja ghaṭṭayitvā ekantakāḷakehi pāpadhammehi samannāgatattā kaṇha māra āyatiṃ mahādukkhaṃ vindissasi.
ཨུདཀཾ ཝཏྠུཾ ཀཏྭཱཏི ཏཏྠ ནིབྦཏྟནཀསཏྟཱནཾ སཱདྷཱརཎཀམྨཕལེན མཧཱསམུདྡཨུདཀམེཝ ཨདྷིཊྛཱནཾ ཀཏྭཱ། ཏཐཱ ཧི ཏཱནི ཀཔྤཊྛིཏིཀཱནི ཧོནྟི། ཏེནཱཧ ‘‘ཀཔྤཊྛཱཡིནོ’’ཏི། ཏེསནྟི ཝིམཱནཱནཾ། ཨེཏཾ ཡཐཱཝུཏྟཝིམཱནཝཏྠུཾ ཏཱསཾ ཨཙྪརཱནཾ སམྤཏྟིཾ, ཏསྶ ཙ ཀཱརཎཾ ཨཏྟཔཙྩཀྑཾ ཀཏྭཱ ཛཱནཱཏི། པཱདངྒུཊྛེན ཀམྤཡཱིཏི པུབྦཱརཱམེ ཝིསཱཁཱཡ མཧཱཨུཔཱསིཀཱཡ ཀཱརིཏཾ སཧསྶགབྦྷཔཊིམཎྜིཏམཧཱཔཱསཱདཾ ཨཏྟནོ པཱདངྒུཊྛེན ཀམྤེསི། ཏེནཱཧ ‘‘ཨིདཾ པཱསཱདཀམྤནསུཏྟེན དཱིཔེཏབྦ’’ནྟི། ཨིདནྟི ‘‘ཡོ ཝེཛཡནྟ’’ནྟི ཨིམིསྶཱ གཱཐཱཡ ཨཏྠཛཱཏཾ ཙཱུལ༹ཏཎྷཱསངྑཡཝིམུཏྟིསུཏྟེནེཝ (མ॰ ནི॰ ༡.༣༩༣) དཱིཔེཏབྦཾ།
Udakaṃ vatthuṃ katvāti tattha nibbattanakasattānaṃ sādhāraṇakammaphalena mahāsamuddaudakameva adhiṭṭhānaṃ katvā. Tathā hi tāni kappaṭṭhitikāni honti. Tenāha ‘‘kappaṭṭhāyino’’ti. Tesanti vimānānaṃ. Etaṃ yathāvuttavimānavatthuṃ tāsaṃ accharānaṃ sampattiṃ, tassa ca kāraṇaṃ attapaccakkhaṃ katvā jānāti. Pādaṅguṭṭhena kampayīti pubbārāme visākhāya mahāupāsikāya kāritaṃ sahassagabbhapaṭimaṇḍitamahāpāsādaṃ attano pādaṅguṭṭhena kampesi. Tenāha ‘‘idaṃ pāsādakampanasuttena dīpetabba’’nti. Idanti ‘‘yo vejayanta’’nti imissā gāthāya atthajātaṃ cūḷataṇhāsaṅkhayavimuttisutteneva (ma. ni. 1.393) dīpetabbaṃ.
ཏསྶ བྲཧྨགཎསྶ ཏཐཱཙིནྟནསམནནྟརམེཝ ཏསྨིཾ བྲཧྨལོཀེ སུདྷམྨཾ བྲཧྨསབྷཾ གནྟྭཱ། ཏེཔཱིཏི མཧཱམོགྒལླཱནཱདཡོ། པཙྩེཀཾ དིསཱསཱུཏི མཧཱམོགྒལླཱནཏྠེརོ པུརཏྠིམདིསཱཡཾ, མཧཱཀསྶཔཏྠེརོ དཀྑིཎདིསཱཡཾ, མཧཱཀཔྤིནཏྠེརོ པཙྪིམདིསཱཡཾ, ཨནུརུདྡྷཏྠེརོ ཨུཏྟརདིསཱཡནྟི ཨེཝཾ ཙཏྟཱརོ ཐེརཱ བྲཧྨཔརིསམཏྠཀེ མཛ྄ཛྷེ ནིསིནྣསྶ བྷགཝཏོ སམནྟཏོ ཙཏུདྡིསཱ ནིསཱིདིཾསུ། གཱཐཱ ཝུཏྟཱཏི ‘‘ཡོ བྲཧྨཾ པརིཔུཙྪཏཱི’’ཏི གཱཐཱ ཝུཏྟཱ། ཨཉྙཏརབྲཧྨསུཏྟེནཱཏི – ‘‘ཏེན ཁོ པན སམཡེན ཨཉྙཏརསྶ བྲཧྨུནོ ཨེཝརཱུཔཾ པཱཔཀཾ དིཊྛིགཏཾ ཨུཔྤནྣཾ ཧོཏཱི’’ཏིཨཱདིནཱ (སཾ॰ ནི॰ ༡.༡༧༦) མཧཱཝགྒེ ཨཱགཏེན ཨཉྙཏརབྲཧྨསུཏྟེན།
Tassa brahmagaṇassa tathācintanasamanantarameva tasmiṃ brahmaloke sudhammaṃ brahmasabhaṃ gantvā. Tepīti mahāmoggallānādayo. Paccekaṃ disāsūti mahāmoggallānatthero puratthimadisāyaṃ, mahākassapatthero dakkhiṇadisāyaṃ, mahākappinatthero pacchimadisāyaṃ, anuruddhatthero uttaradisāyanti evaṃ cattāro therā brahmaparisamatthake majjhe nisinnassa bhagavato samantato catuddisā nisīdiṃsu. Gāthā vuttāti ‘‘yo brahmaṃ paripucchatī’’ti gāthā vuttā. Aññatarabrahmasuttenāti – ‘‘tena kho pana samayena aññatarassa brahmuno evarūpaṃ pāpakaṃ diṭṭhigataṃ uppannaṃ hotī’’tiādinā (saṃ. ni. 1.176) mahāvagge āgatena aññatarabrahmasuttena.
ཛྷཱནཝིམོཀྑེན ཕུསཱིཏི ཛྷཱནཝིམོཀྑསནྣིསྶཡེན ཨབྷིཉྙཱཉཱཎེན ཕསྶཡི། ཝནནྟི ཛམྦུདཱིཔཾ ཨཕསྶཡཱིཏི སམྦནྡྷོ། ཛམྦུདཱིཔོ ཧི ཝནབཧུལཏཱཡ ཨིདྷ ‘‘ཝན’’ནྟི ཝུཏྟོ། ཏེནཱཧ ‘‘ཛམྦུསཎྜསྶ ཨིསྶརོ’’ཏི། པུབྦཝིདེཧཱནཾ དཱིཔནྟི པུབྦཝིདེཧཝཱསཱིནཾ དཱིཔཾ, པུབྦཝིདེཧདཱིཔནྟི ཨཏྠོ། བྷཱུམིསཡཱ ནརཱ ནཱམ ཨཔརགོཡཱནཀཱ ཨུཏྟརཀུརུཀཱ ཙ། ཡསྨཱ ཏེ གེཧཔརིགྒཧཱབྷཱཝཏོ བྷཱུམིཡཾཡེཝ སཡནྟི, ན པཱསཱདཱདཱིསུ། པཊིལབྷཱིཏི ཨུཔྤཱདེསི། ཨེཏཾ ཨཱསཾ མཱ ཨཀཱསཱིཏི ཨེསཱ ཡཐཱ པུབྦེ དཱུསིམཱརསྶ, ཨེཝཾ ཏུཡ྄ཧཾ ཨཱསཱ དཱིགྷརཏྟཾ ཨནཏྠཱཝཧཱ, ཏསྨཱ ཨེདིསཾ ཨཱསཾ མཱ ཨཀཱསཱིཏི མཱརསྶ ཨོཝཱདཾ ཨདཱསི། སེསཾ སབྦཏྠ སུཝིཉྙེཡྻམེཝ།
Jhānavimokkhena phusīti jhānavimokkhasannissayena abhiññāñāṇena phassayi. Vananti jambudīpaṃ aphassayīti sambandho. Jambudīpo hi vanabahulatāya idha ‘‘vana’’nti vutto. Tenāha ‘‘jambusaṇḍassa issaro’’ti. Pubbavidehānaṃ dīpanti pubbavidehavāsīnaṃ dīpaṃ, pubbavidehadīpanti attho. Bhūmisayā narā nāma aparagoyānakā uttarakurukā ca. Yasmā te gehapariggahābhāvato bhūmiyaṃyeva sayanti, na pāsādādīsu. Paṭilabhīti uppādesi. Etaṃ āsaṃ mā akāsīti esā yathā pubbe dūsimārassa, evaṃ tuyhaṃ āsā dīgharattaṃ anatthāvahā, tasmā edisaṃ āsaṃ mā akāsīti mārassa ovādaṃ adāsi. Sesaṃ sabbattha suviññeyyameva.
པཔཉྩསཱུདནིཡཱ མཛ྄ཛྷིམནིཀཱཡཊྛཀཐཱཡ
Papañcasūdaniyā majjhimanikāyaṭṭhakathāya
མཱརཏཛྫནཱིཡསུཏྟཝཎྞནཱཡ ལཱིནཏྠཔྤཀཱསནཱ སམཏྟཱ།
Māratajjanīyasuttavaṇṇanāya līnatthappakāsanā samattā.
ནིཊྛིཏཱ ཙ ཙཱུལ༹ཡམཀཝགྒཝཎྞནཱ།
Niṭṭhitā ca cūḷayamakavaggavaṇṇanā.
མཱུལཔཎྞཱསཊཱིཀཱ སམཏྟཱ།
Mūlapaṇṇāsaṭīkā samattā.
དུཏིཡོ བྷཱགོ ནིཊྛིཏོ།
Dutiyo bhāgo niṭṭhito.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / མཛྫྷིམནིཀཱཡ • Majjhimanikāya / ༡༠. མཱརཏཛྫནཱིཡསུཏྟཾ • 10. Māratajjanīyasuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / མཛྫྷིམནིཀཱཡ (ཨཊྛཀཐཱ) • Majjhimanikāya (aṭṭhakathā) / ༡༠. མཱརཏཛྫནཱིཡསུཏྟཝཎྞནཱ • 10. Māratajjanīyasuttavaṇṇanā
