| Library / Tipiṭaka / ਤਿਪਿਟਕ • Tipiṭaka / ਮਜ੍ਝਿਮਨਿਕਾਯ (ਟੀਕਾ) • Majjhimanikāya (ṭīkā) |
੧੦. ਮਾਰਤਜ੍ਜਨੀਯਸੁਤ੍ਤવਣ੍ਣਨਾ
10. Māratajjanīyasuttavaṇṇanā
੫੦੬. ਕੋਟ੍ਠਮਨੁਪવਿਟ੍ਠੋਤਿ ਆਸਯੋ વਚ੍ਚਗੁਤ੍ਤਟ੍ਠਾਨਤਾਯ ਕੋਟ੍ਠਂ, ਤਸ੍ਸ ਅਬ੍ਭਨ੍ਤਰਞ੍ਹੇਤ੍ਥ ਕੋਟ੍ਠਂ। ਅਨੁਰੂਪੋ ਹੁਤ੍વਾ ਪવਿਟ੍ਠੋ ਅਨੁਪવਿਟ੍ਠੋ। ਸੁਖੁਮਞ੍ਹਿ ਤਦਨੁਚ੍ਛવਿਕਂ ਅਤ੍ਤਭਾવਂ ਮਾਪੇਤ੍વਾ ਅਯਂ ਤਤ੍ਥ ਪવਿਟ੍ਠੋ। ਗਰੁਗਰੋ વਿਯਾਤਿ ਗਰੁਕਗਰੁਕੋ વਿਯ। ਉ-ਕਾਰਸ੍ਸ ਹਿ ਓ-ਕਾਰਂ ਕਤ੍વਾ ਅਯਂ ਨਿਦ੍ਦੇਸੋ, ਅਤਿવਿਯ ਗਰੁਕੋ ਮਞ੍ਞੇਤਿ ਅਤ੍ਥੋ। ਗਰੁਗਰੁ વਿਯ ਇਚ੍ਚੇવ વਾ ਪਾਠੋ। ਮਾਸਭਤ੍ਤਂ ਮਾਸੋ ਉਤ੍ਤਰਪਦਲੋਪੇਨ, ਮਾਸਭਤ੍ਤੇਨ ਆਚਿਤਂ ਪੂਰਿਤਂ ਮਾਸਾਚਿਤਂ ਮਞ੍ਞੇ। ਤੇਨਾਹ ‘‘ਮਾਸਭਤ੍ਤਂ ਭੁਤ੍ਤਸ੍ਸ ਕੁਚ੍ਛਿ વਿਯਾ’’ਤਿ। ਉਤ੍ਤਰਪਦਲੋਪੇਨ વਿਨਾ ਅਤ੍ਥਂ ਦਸ੍ਸੇਤੁਂ ‘‘ਮਾਸਪੂਰਿਤਪਸਿਬ੍ਬਕੋ વਿਯਾ’’ਤਿ વੁਤ੍ਤਂ। ਤਿਨ੍ਤਮਾਸੋ વਿਯਾਤਿ ਤਿਨ੍ਤਮਾਸੋ ਪਸਿਬ੍ਬਕੋ વਿਯ। ਕਿਂ ਨੁ ਖੋ ਏਤਂ ਮਮ ਕੁਚ੍ਛਿਯਂ ਪੁਬ੍ਬਂ ਭਾਰਿਕਤ੍ਤਂ, ਕਿਂ ਨੁ ਖੋ ਕਥਂ ਨੁ ਖੋ ਜਾਤਨ੍ਤਿ ਅਧਿਪ੍ਪਾਯੋ? ਉਪਾਯੇਨਾਤਿ ਪਥੇਨ ਞਾਯੇਨ। ਬ੍ਯਤਿਰੇਕਤੋ ਪਨਸ੍ਸ ਅਨੁਪਾਯਂ ਦਸ੍ਸੇਤੁਂ ‘‘ਸਚੇ ਪਨਾ’’ਤਿਆਦਿ વੁਤ੍ਤਂ। ਅਤ੍ਤਾਨਮੇવ વਾ ਸਨ੍ਧਾਯ ‘‘ਮਾ ਤਥਾਗਤਂ વਿਹੇਸੇਸੀ’’ਤਿ ਆਹ। ਯਥਾ ਹਿ ਅਰਿਯਸਙ੍ਘੋ ‘‘ਤਥਾਗਤਂ ਦੇવਮਨੁਸ੍ਸਪੂਜਿਤਂ, ਸਙ੍ਘਂ ਨਮਸ੍ਸਾਮ ਸੁવਤ੍ਥਿ ਹੋਤੂ’’ਤਿਆਦੀਸੁ (ਖੁ॰ ਪਾ॰ ੬.੧੮; ਸੁ॰ ਨਿ॰ ੨੪੧) ਤਥਾਗਤੋਤਿ વੁਚ੍ਚਤਿ, ਏવਂ ਤਪ੍ਪਰਿਯਾਪਨ੍ਨਾ ਅਰਿਯਪੁਗ੍ਗਲਾ, ਯਥਾ ਚ ਪੁਰਿਮਕਾ ਦੁਤਿਯਅਗ੍ਗਸਾવਕਾ ਕਪ੍ਪਾਨਂ ਸਤਸਹਸ੍ਸਾਧਿਕਂ ਏਕਂ ਅਸਙ੍ਖ੍ਯੇਯ੍ਯਂ ਪਾਰਮਿਯੋ ਪੂਰੇਤ੍વਾ ਆਗਤਾ, ਅਯਮ੍ਪਿ ਮਹਾਥੇਰੋ ਤਥਾ ਆਗਤੋਤਿ ਤਥਾਗਤੋਤਿ। ਪਤਿਅਗ੍ਗਲ਼ੇવ ਅਟ੍ਠਾਸੀਤਿ ਅਗ੍ਗਲ਼ਸ੍ਸ ਬਹਿਭਾਗੇ ਅਟ੍ਠਾਸਿ।
506.Koṭṭhamanupaviṭṭhoti āsayo vaccaguttaṭṭhānatāya koṭṭhaṃ, tassa abbhantarañhettha koṭṭhaṃ. Anurūpo hutvā paviṭṭho anupaviṭṭho. Sukhumañhi tadanucchavikaṃ attabhāvaṃ māpetvā ayaṃ tattha paviṭṭho. Garugaro viyāti garukagaruko viya. U-kārassa hi o-kāraṃ katvā ayaṃ niddeso, ativiya garuko maññeti attho. Garugaru viya icceva vā pāṭho. Māsabhattaṃ māso uttarapadalopena, māsabhattena ācitaṃ pūritaṃ māsācitaṃ maññe. Tenāha ‘‘māsabhattaṃ bhuttassa kucchi viyā’’ti. Uttarapadalopena vinā atthaṃ dassetuṃ ‘‘māsapūritapasibbako viyā’’ti vuttaṃ. Tintamāso viyāti tintamāso pasibbako viya. Kiṃ nu kho etaṃ mama kucchiyaṃ pubbaṃ bhārikattaṃ, kiṃ nu kho kathaṃ nu kho jātanti adhippāyo? Upāyenāti pathena ñāyena. Byatirekato panassa anupāyaṃ dassetuṃ ‘‘sace panā’’tiādi vuttaṃ. Attānameva vā sandhāya ‘‘mā tathāgataṃ vihesesī’’ti āha. Yathā hi ariyasaṅgho ‘‘tathāgataṃ devamanussapūjitaṃ, saṅghaṃ namassāma suvatthi hotū’’tiādīsu (khu. pā. 6.18; su. ni. 241) tathāgatoti vuccati, evaṃ tappariyāpannā ariyapuggalā, yathā ca purimakā dutiyaaggasāvakā kappānaṃ satasahassādhikaṃ ekaṃ asaṅkhyeyyaṃ pāramiyo pūretvā āgatā, ayampi mahāthero tathā āgatoti tathāgatoti. Patiaggaḷeva aṭṭhāsīti aggaḷassa bahibhāge aṭṭhāsi.
੫੦੭. ਰੁਕ੍ਖਦੇવਤਾ ਨਾਮ ਚਾਤੁਮਹਾਰਾਜਿਕੇਸੁ ਨਿਹੀਨੋ ਕਾਯੋ, ਤਸ੍ਮਾ ਨੇਸਂ ਮਨੁਸ੍ਸਗਨ੍ਧੋ ਪਰਿਚਿਤਤ੍ਤਾ ਨਾਤਿਜੇਗੁਚ੍ਛੋਤਿ ਆਹ ‘‘ਆਕਾਸਟ੍ਠਦੇવਤਾਨ’’ਨ੍ਤਿ। ਆਬਾਧਂ ਕਰੋਤੀਤਿ ਦੁਕ੍ਖਂ ਜਨੇਤਿ। ਨਾਗਰਿਕੋਤਿ ਸੁਕੁਮਾਰੋ। ਪਰਿਚੋਕ੍ਖੋਤਿ ਸਬ੍ਬਸੋ ਸੁਚਿਰੂਪੋ। ਞਾਤਿਕੋਟਿਨ੍ਤਿ ਞਾਤਿਭਾਗਂ। ਅਨਾਦਿਮਤਿ ਹਿ ਸਂਸਾਰੇ ਞਾਤਿਭਾਗਰਹਿਤੋ ਨਾਮ ਸਤ੍ਤੋ ਕਸ੍ਸਚਿਪਿ ਨਤ੍ਥੀਤਿ ਅਧਿਪ੍ਪਾਯੋ। ਇਦਨ੍ਤਿ ‘‘ਸੋ ਮੇ ਤ੍વਂ ਭਾਗਿਨੇਯ੍ਯੋ ਹੋਸੀ’’ਤਿ ਇਦਂ વਚਨਂ। ਪવੇਣਿવਸੇਨਾਤਿ ਤਦਾ ਮਯ੍ਹਂ ਭਾਗਿਨੇਯ੍ਯੋ ਹੁਤ੍વਾ ਇਦਾਨਿ ਮਾਰਟ੍ਠਾਨੇ ਠਿਤੋਤਿ ਇਮਿਸ੍ਸਾ ਪવੇਣਿਯਾ વਸੇਨ વੁਤ੍ਤਂ। ਅਞ੍ਞਸ੍ਸ વਾ વੇਸਮਂ ਧੁਰੋ વਿਧੁਰੋ। ਤੇਨਾਹ ‘‘ਅਞ੍ਞੇਹਿ ਸਦ੍ਧਿਂ ਅਸਦਿਸੋ’’ਤਿ। ਅਪ੍ਪਦੁਕ੍ਖੇਨਾਤਿ ਸੁਖੇਨੇવ। ਪਨ੍ਥਾਨਂ ਅવਨ੍ਤਿ ਗਚ੍ਛਨ੍ਤੀਤਿ ਪਥਾવਿਨੋ। ਏਤ੍ਤਕੇਨਾਤਿ ਏਤ੍ਤਾવਤਾ ਚਿਤਕਸਨ੍ਨਿਸਯੇਨ। ਉਦਕਲੇਣਨ੍ਤਿ ਉਦਕਨਿਸ੍ਸਨ੍ਦਨਲੇਣਂ। ਸਮਾਪਤ੍ਤਿਤੋਤਿ ਨਿਰੋਧਸਮਾਪਤ੍ਤਿਤੋ। ਸਮਾਪਤ੍ਤਿਫਲਨ੍ਤਿ ਨਿਰੋਧਸਮਾਪਤ੍ਤਿਫਲਂ।
507. Rukkhadevatā nāma cātumahārājikesu nihīno kāyo, tasmā nesaṃ manussagandho paricitattā nātijegucchoti āha ‘‘ākāsaṭṭhadevatāna’’nti. Ābādhaṃ karotīti dukkhaṃ janeti. Nāgarikoti sukumāro. Paricokkhoti sabbaso sucirūpo. Ñātikoṭinti ñātibhāgaṃ. Anādimati hi saṃsāre ñātibhāgarahito nāma satto kassacipi natthīti adhippāyo. Idanti ‘‘so me tvaṃ bhāgineyyo hosī’’ti idaṃ vacanaṃ. Paveṇivasenāti tadā mayhaṃ bhāgineyyo hutvā idāni māraṭṭhāne ṭhitoti imissā paveṇiyā vasena vuttaṃ. Aññassa vā vesamaṃ dhuro vidhuro. Tenāha ‘‘aññehi saddhiṃ asadiso’’ti. Appadukkhenāti sukheneva. Panthānaṃ avanti gacchantīti pathāvino. Ettakenāti ettāvatā citakasannisayena. Udakaleṇanti udakanissandanaleṇaṃ. Samāpattitoti nirodhasamāpattito. Samāpattiphalanti nirodhasamāpattiphalaṃ.
੫੦੮. ਦਸਹਿ ਅਕ੍ਕੋਸવਤ੍ਥੂਹੀਤਿ ਦਸਹਿਪਿ ਅਕ੍ਕੋਸવਤ੍ਥੂਹਿ, ਤਤੋ ਕਿਞ੍ਚਿ ਅਹਾਪੇਨ੍ਤਾ। ਪਰਿਭਾਸਥਾਤਿ ਗਰਹਥ। ਘਟ੍ਟੇਥਾਤਿ ਅਨੂਨਾਹਿ ਕਥਾਹਿ ਇਮੇਸੁ ਓવਿਜ੍ਝਥ। ਦੁਕ੍ਖਾਪੇਥਾਤਿ ਚਿਤ੍ਤੇ ਦੁਕ੍ਖਂ ਜਨੇਥ। ਏਤੇਸਨ੍ਤਿ ਤੇਸਂ ਭਿਕ੍ਖੂਨਂ ਤੁਮ੍ਹਾਕਂ ਅਕ੍ਕੋਸਨਾਦੀਹਿ ਭਿਕ੍ਖੂਨਂ ਕਿਲੇਸੁਪ੍ਪਤ੍ਤਿਯਾ। ਤੇਨੇਤ੍ਥ ਦੂਸੀ ਮਾਰੋ ਓਤਾਰਂ ਲਭਤਿ ਨਾਮਾਤਿ ਅਧਿਪ੍ਪਾਯੋ। ਉਪਟ੍ਠਾਤਬ੍ਬਂ ਇਭਂ ਅਰਹਨ੍ਤੀਤਿ ਇਬ੍ਭਾ, ਹਤ੍ਥਿਭਣ੍ਡਕਾ, ਹੀਨਜੀવਿਕਤਾਯ ਹੇਤੇ ਇਬ੍ਭਾ વਿਯਾਤਿ ਇਬ੍ਭਾ, ਤੇ ਪਨ ਸਦੁਤਿਯਕવਸੇਨ ‘‘ਗਹਪਤਿਕਾ’’ਤਿ વੁਤ੍ਤਾ। ਕਣ੍ਹਾਤਿ ਕਣ੍ਹਾਭਿਜਾਤਿਕਾ। ਪਾਦਤੋ ਜਾਤਤ੍ਤਾ ਪਾਦਾਨਂ ਅਪਚ੍ਚਾ। ਆਲਸਿਯਜਾਤਾਤਿ ਕਸਿવਣਿਜ੍ਜਾਦਿਕਮ੍ਮਸ੍ਸ ਅਕਰਣੇਨ ਸਞ੍ਜਾਤਾਲਸਿਯਾ। ਗੂਥਨਿਦ੍ਧਮਨਪਨਾਲ਼ੀਤਿ વਚ੍ਚਕੂਪਤੋ ਗੂਥਸ੍ਸ ਨਿਕ੍ਖਮਪਦੇਸੋ।
508.Dasahi akkosavatthūhīti dasahipi akkosavatthūhi, tato kiñci ahāpentā. Paribhāsathāti garahatha. Ghaṭṭethāti anūnāhi kathāhi imesu ovijjhatha. Dukkhāpethāti citte dukkhaṃ janetha. Etesanti tesaṃ bhikkhūnaṃ tumhākaṃ akkosanādīhi bhikkhūnaṃ kilesuppattiyā. Tenettha dūsī māro otāraṃ labhati nāmāti adhippāyo. Upaṭṭhātabbaṃ ibhaṃ arahantīti ibbhā, hatthibhaṇḍakā, hīnajīvikatāya hete ibbhā viyāti ibbhā, te pana sadutiyakavasena ‘‘gahapatikā’’ti vuttā. Kaṇhāti kaṇhābhijātikā. Pādato jātattā pādānaṃ apaccā. Ālasiyajātāti kasivaṇijjādikammassa akaraṇena sañjātālasiyā. Gūthaniddhamanapanāḷīti vaccakūpato gūthassa nikkhamapadeso.
ਮਨੁਸ੍ਸਾਨਂ ਅਕੁਸਲਂ ਨ ਭવੇਯ੍ਯ ਤੇਸਂ ਤਾਦਿਸਾਯ ਅਭਿਸਨ੍ਧਿਯਾ ਅਭਾવਤੋ। ਆવੇਸਕਸ੍ਸ ਆਨੁਭਾવੇਨ ਆવਿਟ੍ਠਸ੍ਸ ਚਿਤ੍ਤਸਨ੍ਤਤਿ વਿਪਰਿવਤ੍ਤਤੀਤਿ વੁਤ੍ਤੋવਾਯਮਤ੍ਥੋ। વਿਸਭਾਗવਤ੍ਥੁਨ੍ਤਿ ਭਿਕ੍ਖੂਨਂ ਸਨ੍ਤਿਕੇ ਇਤ੍ਥਿਰੂਪਂ, ਭਿਕ੍ਖੁਨੀਨਂ ਸਨ੍ਤਿਕੇ ਪੁਰਿਸਰੂਪਨ੍ਤਿ ਈਦਿਸਂ, ਅਞ੍ਞਂ વਾ ਪਬ੍ਬਜਿਤਾਨਂ ਅਸਾਰੁਪ੍ਪਂ વਿਸਭਾਗવਤ੍ਥੁਂ। વਿਪ੍ਪਟਿਸਾਰਾਰਮ੍ਮਣਨ੍ਤਿ ਪਸ੍ਸਨ੍ਤਾਨਂ વਿਪ੍ਪਟਿਸਾਰਸ੍ਸ ਪਚ੍ਚਯਂ। ਲੇਪਯਟ੍ਠਿਨ੍ਤਿ ਲੇਪਲਿਤ੍ਤਂ વਾਕੁਰਯਟ੍ਠਿਂ।
Manussānaṃ akusalaṃ na bhaveyya tesaṃ tādisāya abhisandhiyā abhāvato. Āvesakassa ānubhāvena āviṭṭhassa cittasantati viparivattatīti vuttovāyamattho. Visabhāgavatthunti bhikkhūnaṃ santike itthirūpaṃ, bhikkhunīnaṃ santike purisarūpanti īdisaṃ, aññaṃ vā pabbajitānaṃ asāruppaṃ visabhāgavatthuṃ. Vippaṭisārārammaṇanti passantānaṃ vippaṭisārassa paccayaṃ. Lepayaṭṭhinti lepalittaṃ vākurayaṭṭhiṃ.
੫੧੦. ਸੋਮਨਸ੍ਸવਸੇਨਾਤਿ ਗੇਹਸ੍ਸਿਤਸੋਮਨਸ੍ਸવਸੇਨ। ਅਞ੍ਞਥਤ੍ਤਨ੍ਤਿ ਉਪ੍ਪਿਲਾવਿਤਤ੍ਤਂ। ਪੁਰਿਮਨਯੇਨੇવਾਤਿ ‘‘ਸਚੇ ਮਾਰੋ ਮਨੁਸ੍ਸਾਨਂ ਸਰੀਰੇ ਅਧਿਮੁਚ੍ਚਿਤ੍વਾ’’ਤਿਆਦਿਨਾ ਪੁਬ੍ਬੇ વੁਤ੍ਤਨਯੇਨ। ਯਦਿ ਮਾਰੋવ ਤਥਾ ਕਰੇਯ੍ਯ, ਮਨੁਸ੍ਸਾਨਂ ਕੁਸਲਂ ਨ ਭવੇਯ੍ਯ, ਮਾਰਸ੍ਸੇવ ਭવੇਯ੍ਯ, ਸਰੀਰੇ ਪਨ ਅਨਧਿਮੁਚ੍ਚਿਤ੍વਾ ਤਾਦਿਸਂ ਪਸਾਦਨੀਯਂ ਪਸਾਦવਤ੍ਥੁਂ ਦਸ੍ਸੇਸਿ। ਤੇਨਾਹ ‘‘ਯਥਾ ਹੀ’’ਤਿਆਦਿ।
510.Somanassavasenāti gehassitasomanassavasena. Aññathattanti uppilāvitattaṃ. Purimanayenevāti ‘‘sace māro manussānaṃ sarīre adhimuccitvā’’tiādinā pubbe vuttanayena. Yadi mārova tathā kareyya, manussānaṃ kusalaṃ na bhaveyya, mārasseva bhaveyya, sarīre pana anadhimuccitvā tādisaṃ pasādanīyaṃ pasādavatthuṃ dassesi. Tenāha ‘‘yathā hī’’tiādi.
੫੧੧. ਅਸੁਭਸਞ੍ਞਾਪਰਿਚਿਤੇਨਾਤਿ ਸਕਲਂ ਕਾਯਂ ਅਸੁਭਨ੍ਤਿ ਪવਤ੍ਤਾਯ ਸਞ੍ਞਾਯ ਸਹਗਤਜ੍ਝਾਨਂ ਅਸੁਭਸਞ੍ਞਾ, ਤੇਨ ਪਰਿਚਿਤੇਨ ਪਰਿਭਾવਿਤੇਨ। ਚੇਤਸਾ ਚਿਤ੍ਤੇਨ। ਬਹੁਲਨ੍ਤਿ ਅਭਿਣ੍ਹਂ। વਿਹਰਤੋਤਿ વਿਹਰਨ੍ਤਸ੍ਸ, ਅਸੁਭਸਮਾਪਤ੍ਤਿਬਹੁਲਸ੍ਸਾਤਿ ਅਤ੍ਥੋ। ਪਤਿਲੀਯਤੀਤਿ ਸਙ੍ਕੁਚਤਿ ਤਤ੍ਥ ਪਟਿਕੂਲਤਾਯ ਸਣ੍ਠਿਤਤ੍ਤਾ। ਪਤਿਕੁਟਤੀਤਿ ਅਪਸਕ੍ਕਤਿ। ਪਤਿવਤ੍ਤਤੀਤਿ ਨਿવਤ੍ਤਤਿ। ਤਤੋ ਏવ ਨ ਸਮ੍ਪਸਾਰਿਯਤਿ। ਰਸਤਣ੍ਹਾਯਾਤਿ ਮਧੁਰਾਦਿਰਸવਿਸਯਾਯ ਤਣ੍ਹਾਯ।
511.Asubhasaññāparicitenāti sakalaṃ kāyaṃ asubhanti pavattāya saññāya sahagatajjhānaṃ asubhasaññā, tena paricitena paribhāvitena. Cetasā cittena. Bahulanti abhiṇhaṃ. Viharatoti viharantassa, asubhasamāpattibahulassāti attho. Patilīyatīti saṅkucati tattha paṭikūlatāya saṇṭhitattā. Patikuṭatīti apasakkati. Pativattatīti nivattati. Tato eva na sampasāriyati. Rasataṇhāyāti madhurādirasavisayāya taṇhāya.
ਸਬ੍ਬਲੋਕੇ ਅਨਭਿਰਤਿਸਞ੍ਞਾਤਿ ਤੀਸੁਪਿ ਭવੇਸੁ ਅਰੁਚ੍ਚਨવਸੇਨ ਪવਤ੍ਤਾ વਿਪਸ੍ਸਨਾਭਾવਨਾ। ਨਿਬ੍ਬਿਦਾਨੁਪਸ੍ਸਨਾ ਹੇਸਾ। ਲੋਕਚਿਤ੍ਰੇਸੂਤਿ ਹਤ੍ਥਿਅਸ੍ਸਰਥਪਾਸਾਦਕੂਟਾਗਾਰਾਦਿਭੇਦੇਸੁ ਚੇવ ਆਰਾਮਰਾਮਣੇਯ੍ਯਕਾਦਿਭੇਦੇਸੁ ਚ ਲੋਕੇ ਚਿਤ੍ਤવਿਚਿਤ੍ਤੇਸੁ। ਰਾਗਸਨ੍ਤਾਨਿ વੂਪਸਨ੍ਤਰਾਗਾਨਿ। ਦੋਸਮੋਹਸਨ੍ਤਾਨੀਤਿ ਏਤ੍ਥਾਪਿ ਏਸੇવ ਨਯੋ। ਇਮੇਸਂ ਏવਂ ਕਮ੍ਮਟ੍ਠਾਨਗ੍ਗਹਣਂ ਸਬ੍ਬੇਸਂ ਸਪ੍ਪਾਯਭਾવਤੋ।
Sabbaloke anabhiratisaññāti tīsupi bhavesu aruccanavasena pavattā vipassanābhāvanā. Nibbidānupassanā hesā. Lokacitresūti hatthiassarathapāsādakūṭāgārādibhedesu ceva ārāmarāmaṇeyyakādibhedesu ca loke cittavicittesu. Rāgasantāni vūpasantarāgāni. Dosamohasantānīti etthāpi eseva nayo. Imesaṃ evaṃ kammaṭṭhānaggahaṇaṃ sabbesaṃ sappāyabhāvato.
੫੧੨. ਸਕ੍ਖਰਂ ਗਹੇਤ੍વਾਤਿ ਸਕ੍ਖਰਾਸੀਸੇਨ ਤਤ੍ਤਕਂ ਭਿਨ੍ਨਪਾਸਾਣਮੁਟ੍ਠਿਨ੍ਤਿ ਆਹ ‘‘ਅਨ੍ਤੋਮੁਟ੍ਠਿਯਂ ਤਿਟ੍ਠਨਪਮਾਣਂ ਪਾਸਾਣ’’ਨ੍ਤਿ। ਮੁਟ੍ਠਿਪਰਿਯਾਪਨ੍ਨਨ੍ਤਿ ਅਤ੍ਥੋ। ਅਯਞ੍ਹਿ ਪਾਸਾਣਸ੍ਸ ਹੇਟ੍ਠਿਮਕੋਟਿ। ਹਤ੍ਥਿਨਾਗੋਤਿ ਮਹਾਹਤ੍ਥੀ। ਮਹਨ੍ਤਪਰਿਯਾਯੋ ਨਾਗ-ਸਦ੍ਦੋਤਿ ਕੇਚਿ। ਅਹਿਨਾਗਾਦਿਤੋ વਾ વਿਸੇਸਨਤ੍ਥਂ ਹਤ੍ਥਿਨਾਗੋਤਿ વੁਤ੍ਤਂ। ਸਕਲਸਰੀਰੇਨੇવ ਨਿવਤ੍ਤਿਤ੍વਾ ਅਪਲੋਕੇਸੀਤਿ વੁਤ੍ਤਮਤ੍ਥਂ વਿવਰਿਤੁਂ ‘‘ਯਥਾ ਹੀ’’ਤਿਆਦਿ વੁਤ੍ਤਂ। ਨ વਾਯਨ੍ਤਿ ਏਤ੍ਥ વਾ-ਸਦ੍ਦੋ ਅવਧਾਰਣਤ੍ਥੋਤਿ ਆਹ ‘‘ਨੇવ ਪਮਾਣਂ ਅਞ੍ਞਾਸੀ’’ਤਿ। ਸਹਾਪਲੋਕਨਾਯਾਤਿ ਚ વਚਨਤੋਤਿ ਇਮਿਨਾ વਚਨੇਨ ਇਮਂ વਚਨਮਤ੍ਤਂ ਗਹੇਤ੍વਾਤਿ ਅਧਿਪ੍ਪਾਯੋ। ਉਲ਼ਾਰੇਤਿ ਉਲ਼ਾਰਗੁਣੇ। ਭਗવਨ੍ਤਞ੍ਹਿ ਠਪੇਤ੍વਾ ਨਤ੍ਥਿ ਤਦਾ ਸਦੇવਕੇ ਲੋਕੇ ਤਾਦਿਸੋ ਗੁਣવਿਸੇਸਯੁਤ੍ਤੋਤਿ।
512.Sakkharaṃgahetvāti sakkharāsīsena tattakaṃ bhinnapāsāṇamuṭṭhinti āha ‘‘antomuṭṭhiyaṃ tiṭṭhanapamāṇaṃ pāsāṇa’’nti. Muṭṭhipariyāpannanti attho. Ayañhi pāsāṇassa heṭṭhimakoṭi. Hatthināgoti mahāhatthī. Mahantapariyāyo nāga-saddoti keci. Ahināgādito vā visesanatthaṃ hatthināgoti vuttaṃ. Sakalasarīreneva nivattitvā apalokesīti vuttamatthaṃ vivarituṃ ‘‘yathā hī’’tiādi vuttaṃ. Na vāyanti ettha vā-saddo avadhāraṇatthoti āha ‘‘neva pamāṇaṃ aññāsī’’ti. Sahāpalokanāyāti ca vacanatoti iminā vacanena imaṃ vacanamattaṃ gahetvāti adhippāyo. Uḷāreti uḷāraguṇe. Bhagavantañhi ṭhapetvā natthi tadā sadevake loke tādiso guṇavisesayuttoti.
વਿਸੁਂ વਿਸੁਂ ਪਚ੍ਚਤ੍ਤવੇਦਨਿਯੋ ਅਯਸੂਲੇਨ ਸਦ੍ਧਿਂ ਭੂਤਾਨਿ ਛ ਫਸ੍ਸਾਯਤਨਾਨਿ ਏਤਸ੍ਸਾਤਿ ਛ ਫਸ੍ਸਾਯਤਨਂ, ਦੁਕ੍ਖਂ। ਤਂ ਏਤ੍ਥ ਅਤ੍ਥੀਤਿ ਛ ਫਸ੍ਸਾਯਤਨਿਕੋ, ਨਿਰਯੋ। ਤੇਨਾਹ ‘‘ਛਸੁ ਫਸ੍ਸਾ…ਪੇ॰… ਪਚ੍ਚਯੋ’’ਤਿ। ਸਮਾਹਨਤੀਤਿ ਸਮਾਹਤੋ, ਅਨੇਕਸਤਭੇਦੋ ਸਙ੍ਕੁਸਮਾਹਤੋ ਏਤ੍ਥ ਅਤ੍ਥੀਤਿ ਸਙ੍ਕੁਸਮਾਹਤੋ, ਨਿਰਯੋ। વਿਸੇਸਪਚ੍ਚਯਤਾਯ વੇਦਨਾਯ ਠਿਤੋਤਿ વੇਦਨਿਯੋ, ਕਾਰਣਾਕਾਰਕੇਨ વਿਨਾ ਪਚ੍ਚਤ੍ਤਂ ਸਯਮੇવ વੇਦਨਿਯੋਤਿ ਪਚ੍ਚਤ੍ਤવੇਦਨਿਯੋ। ਅਯਸੂਲੇਨ ਸਦ੍ਧਿਂ ਅਯਸੂਲਨ੍ਤਿ ਪਾਦਪਦੇਸਤੋ ਪਟ੍ਠਾਯ ਨਿਰਨ੍ਤਰਂ ਅਭਿਹਨਨવਸੇਨ ਆਗਤੇਨ ਪਣ੍ਣਾਸਾਯ ਜਨੇਹਿ ਗਹਿਤੇਨ ਅਯਸੂਲੇਨ ਸਹ ਸੀਸਪਦੇਸਤੋ ਪਟ੍ਠਾਯ ਆਗਤਂ। ਅਯਸੂਲਭਾવਸਾਮਞ੍ਞੇਨ ਚੇਤਂ ਏਕવਚਨਂ, ਸਤਮਤ੍ਤਾਨਿ ਪਤਿਤਾਨਿ ਸੂਲਾਨਿ। ਇਮਿਨਾ ਤੇ ਠਾਨੇਨ ਚਿਨ੍ਤੇਤ੍વਾਤਿ ਨਿਸ੍ਸਿਤવੋਹਾਰੇਨ ਨਿਸ੍ਸਯਂ વਦਤਿ। ਏવਂ વੁਤ੍ਤਨ੍ਤਿ ‘‘ਤਦਾ ਜਾਨੇਯ੍ਯਾਸਿ વਸ੍ਸਸਹਸ੍ਸਂ ਮੇ ਨਿਰਯੇ ਪਚ੍ਚਮਾਨਸ੍ਸਾ’’ਤਿ ਏવਂ વੁਤ੍ਤਂ। વੁਟ੍ਠਾਨਿਮਨ੍ਤਿ વੁਟ੍ਠਾਨੇ ਭવਂ, ਅਨ੍ਤਿਮਨ੍ਤਿ ਅਤ੍ਥੋ। ਤੇਨਾਹ ‘‘વਿਪਾਕવੁਟ੍ਠਾਨવੇਦਨ’’ਨ੍ਤਿ, વਿਪਾਕਸ੍ਸ ਪਰਿਯੋਸਾਨਂ વੇਦਨਨ੍ਤਿ ਅਤ੍ਥੋ। ਦੁਕ੍ਖਤਰਾ ਹੋਤਿ ਪਦੀਪਸ੍ਸ વਿਜ੍ਝਾਯਨਕ੍ਖਣੇ ਮਹਨ੍ਤਭਾવੋ વਿਯ।
Visuṃ visuṃ paccattavedaniyo ayasūlena saddhiṃ bhūtāni cha phassāyatanāni etassāti cha phassāyatanaṃ, dukkhaṃ. Taṃ ettha atthīti cha phassāyataniko, nirayo. Tenāha ‘‘chasu phassā…pe… paccayo’’ti. Samāhanatīti samāhato, anekasatabhedo saṅkusamāhato ettha atthīti saṅkusamāhato, nirayo. Visesapaccayatāya vedanāya ṭhitoti vedaniyo, kāraṇākārakena vinā paccattaṃ sayameva vedaniyoti paccattavedaniyo. Ayasūlena saddhiṃ ayasūlanti pādapadesato paṭṭhāya nirantaraṃ abhihananavasena āgatena paṇṇāsāya janehi gahitena ayasūlena saha sīsapadesato paṭṭhāya āgataṃ. Ayasūlabhāvasāmaññena cetaṃ ekavacanaṃ, satamattāni patitāni sūlāni. Iminā te ṭhānena cintetvāti nissitavohārena nissayaṃ vadati. Evaṃ vuttanti ‘‘tadā jāneyyāsi vassasahassaṃ me niraye paccamānassā’’ti evaṃ vuttaṃ. Vuṭṭhānimanti vuṭṭhāne bhavaṃ, antimanti attho. Tenāha ‘‘vipākavuṭṭhānavedana’’nti, vipākassa pariyosānaṃ vedananti attho. Dukkhatarā hoti padīpassa vijjhāyanakkhaṇe mahantabhāvo viya.
੫੧੩. ਘਟ੍ਟਯਿਤ੍વਾ ਪੋਥੇਤ੍વਾ। ਪਾਟਿਯੇਕ੍ਕવੇਦਨਾਜਨਕਾਤਿ ਪਚ੍ਚੇਕਂ ਮਹਾਦੁਕ੍ਖਸਮੁਪ੍ਪਾਦਕਾ। ਅਯਤੋ ਅਪਗਤੋ ਨਿਰਯੋ, ਸੋ ਦੇવਦੂਤਸੁਤ੍ਤੇਨ (ਮ॰ ਨਿ॰ ੩.੨੬੧) ਦੀਪੇਤਬ੍ਬੋ। ਅਤ੍ਥવਣ੍ਣਨਾ ਪਨਸ੍ਸ ਪਰਤੋ ਸਯਮੇવ ਆਗਮਿਸ੍ਸਤਿ। ਇਮਂ ਪਨ ਅਤੀਤવਤ੍ਥੁਂ ਆਹਰਿਤ੍વਾ ਅਤ੍ਤਨੋ ਞਾਣਾਨੁਭਾવਦੀਪਨਮੁਖੇਨ ਮਾਰਂ ਸਨ੍ਤਜ੍ਜੇਨ੍ਤੋ ਮਹਾਥੇਰੋ ‘‘ਯੋ ਏਤਮਭਿਜਾਨਾਤੀ’’ਤਿ ਗਾਥਮਾਹ। ਤਸ੍ਸਤ੍ਥੋ – ਯੋ ਮਹਾਭਿਞ੍ਞੋ ਏਤਂ ਕਮ੍ਮਂ ਕਮ੍ਮਫਲਞ੍ਚ ਹਤ੍ਥਤਲੇ ਠਪਿਤਂ ਆਮਲਕਂ વਿਯ ਅਭਿਮੁਖਂ ਕਤ੍વਾ ਪਚ੍ਚਕ੍ਖਤੋ ਜਾਨਾਤਿ। ਸਬ੍ਬਸੋ ਭਿਨ੍ਨਕਿਲੇਸਤਾਯ ਭਿਕ੍ਖੁ ਸਮ੍ਮਾਸਮ੍ਬੁਦ੍ਧਸ੍ਸ ਅਗ੍ਗਸਾવਕੋ, ਤਾਦਿਸਂ ਉਲ਼ਾਰਗੁਣਂ ਆਸਜ੍ਜ ਘਟ੍ਟਯਿਤ੍વਾ ਏਕਨ੍ਤਕਾਲ਼ਕੇਹਿ ਪਾਪਧਮ੍ਮੇਹਿ ਸਮਨ੍ਨਾਗਤਤ੍ਤਾ ਕਣ੍ਹ ਮਾਰ ਆਯਤਿਂ ਮਹਾਦੁਕ੍ਖਂ વਿਨ੍ਦਿਸ੍ਸਸਿ।
513.Ghaṭṭayitvā pothetvā. Pāṭiyekkavedanājanakāti paccekaṃ mahādukkhasamuppādakā. Ayato apagato nirayo, so devadūtasuttena (ma. ni. 3.261) dīpetabbo. Atthavaṇṇanā panassa parato sayameva āgamissati. Imaṃ pana atītavatthuṃ āharitvā attano ñāṇānubhāvadīpanamukhena māraṃ santajjento mahāthero ‘‘yoetamabhijānātī’’ti gāthamāha. Tassattho – yo mahābhiñño etaṃ kammaṃ kammaphalañca hatthatale ṭhapitaṃ āmalakaṃ viya abhimukhaṃ katvā paccakkhato jānāti. Sabbaso bhinnakilesatāya bhikkhu sammāsambuddhassa aggasāvako, tādisaṃ uḷāraguṇaṃ āsajja ghaṭṭayitvā ekantakāḷakehi pāpadhammehi samannāgatattā kaṇha māra āyatiṃ mahādukkhaṃ vindissasi.
ਉਦਕਂ વਤ੍ਥੁਂ ਕਤ੍વਾਤਿ ਤਤ੍ਥ ਨਿਬ੍ਬਤ੍ਤਨਕਸਤ੍ਤਾਨਂ ਸਾਧਾਰਣਕਮ੍ਮਫਲੇਨ ਮਹਾਸਮੁਦ੍ਦਉਦਕਮੇવ ਅਧਿਟ੍ਠਾਨਂ ਕਤ੍વਾ। ਤਥਾ ਹਿ ਤਾਨਿ ਕਪ੍ਪਟ੍ਠਿਤਿਕਾਨਿ ਹੋਨ੍ਤਿ। ਤੇਨਾਹ ‘‘ਕਪ੍ਪਟ੍ਠਾਯਿਨੋ’’ਤਿ। ਤੇਸਨ੍ਤਿ વਿਮਾਨਾਨਂ। ਏਤਂ ਯਥਾવੁਤ੍ਤવਿਮਾਨવਤ੍ਥੁਂ ਤਾਸਂ ਅਚ੍ਛਰਾਨਂ ਸਮ੍ਪਤ੍ਤਿਂ, ਤਸ੍ਸ ਚ ਕਾਰਣਂ ਅਤ੍ਤਪਚ੍ਚਕ੍ਖਂ ਕਤ੍વਾ ਜਾਨਾਤਿ। ਪਾਦਙ੍ਗੁਟ੍ਠੇਨ ਕਮ੍ਪਯੀਤਿ ਪੁਬ੍ਬਾਰਾਮੇ વਿਸਾਖਾਯ ਮਹਾਉਪਾਸਿਕਾਯ ਕਾਰਿਤਂ ਸਹਸ੍ਸਗਬ੍ਭਪਟਿਮਣ੍ਡਿਤਮਹਾਪਾਸਾਦਂ ਅਤ੍ਤਨੋ ਪਾਦਙ੍ਗੁਟ੍ਠੇਨ ਕਮ੍ਪੇਸਿ। ਤੇਨਾਹ ‘‘ਇਦਂ ਪਾਸਾਦਕਮ੍ਪਨਸੁਤ੍ਤੇਨ ਦੀਪੇਤਬ੍ਬ’’ਨ੍ਤਿ। ਇਦਨ੍ਤਿ ‘‘ਯੋ વੇਜਯਨ੍ਤ’’ਨ੍ਤਿ ਇਮਿਸ੍ਸਾ ਗਾਥਾਯ ਅਤ੍ਥਜਾਤਂ ਚੂਲ਼ਤਣ੍ਹਾਸਙ੍ਖਯવਿਮੁਤ੍ਤਿਸੁਤ੍ਤੇਨੇવ (ਮ॰ ਨਿ॰ ੧.੩੯੩) ਦੀਪੇਤਬ੍ਬਂ।
Udakaṃ vatthuṃ katvāti tattha nibbattanakasattānaṃ sādhāraṇakammaphalena mahāsamuddaudakameva adhiṭṭhānaṃ katvā. Tathā hi tāni kappaṭṭhitikāni honti. Tenāha ‘‘kappaṭṭhāyino’’ti. Tesanti vimānānaṃ. Etaṃ yathāvuttavimānavatthuṃ tāsaṃ accharānaṃ sampattiṃ, tassa ca kāraṇaṃ attapaccakkhaṃ katvā jānāti. Pādaṅguṭṭhena kampayīti pubbārāme visākhāya mahāupāsikāya kāritaṃ sahassagabbhapaṭimaṇḍitamahāpāsādaṃ attano pādaṅguṭṭhena kampesi. Tenāha ‘‘idaṃ pāsādakampanasuttena dīpetabba’’nti. Idanti ‘‘yo vejayanta’’nti imissā gāthāya atthajātaṃ cūḷataṇhāsaṅkhayavimuttisutteneva (ma. ni. 1.393) dīpetabbaṃ.
ਤਸ੍ਸ ਬ੍ਰਹ੍ਮਗਣਸ੍ਸ ਤਥਾਚਿਨ੍ਤਨਸਮਨਨ੍ਤਰਮੇવ ਤਸ੍ਮਿਂ ਬ੍ਰਹ੍ਮਲੋਕੇ ਸੁਧਮ੍ਮਂ ਬ੍ਰਹ੍ਮਸਭਂ ਗਨ੍ਤ੍વਾ। ਤੇਪੀਤਿ ਮਹਾਮੋਗ੍ਗਲ੍ਲਾਨਾਦਯੋ। ਪਚ੍ਚੇਕਂ ਦਿਸਾਸੂਤਿ ਮਹਾਮੋਗ੍ਗਲ੍ਲਾਨਤ੍ਥੇਰੋ ਪੁਰਤ੍ਥਿਮਦਿਸਾਯਂ, ਮਹਾਕਸ੍ਸਪਤ੍ਥੇਰੋ ਦਕ੍ਖਿਣਦਿਸਾਯਂ, ਮਹਾਕਪ੍ਪਿਨਤ੍ਥੇਰੋ ਪਚ੍ਛਿਮਦਿਸਾਯਂ, ਅਨੁਰੁਦ੍ਧਤ੍ਥੇਰੋ ਉਤ੍ਤਰਦਿਸਾਯਨ੍ਤਿ ਏવਂ ਚਤ੍ਤਾਰੋ ਥੇਰਾ ਬ੍ਰਹ੍ਮਪਰਿਸਮਤ੍ਥਕੇ ਮਜ੍ਝੇ ਨਿਸਿਨ੍ਨਸ੍ਸ ਭਗવਤੋ ਸਮਨ੍ਤਤੋ ਚਤੁਦ੍ਦਿਸਾ ਨਿਸੀਦਿਂਸੁ। ਗਾਥਾ વੁਤ੍ਤਾਤਿ ‘‘ਯੋ ਬ੍ਰਹ੍ਮਂ ਪਰਿਪੁਚ੍ਛਤੀ’’ਤਿ ਗਾਥਾ વੁਤ੍ਤਾ। ਅਞ੍ਞਤਰਬ੍ਰਹ੍ਮਸੁਤ੍ਤੇਨਾਤਿ – ‘‘ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਸ ਬ੍ਰਹ੍ਮੁਨੋ ਏવਰੂਪਂ ਪਾਪਕਂ ਦਿਟ੍ਠਿਗਤਂ ਉਪ੍ਪਨ੍ਨਂ ਹੋਤੀ’’ਤਿਆਦਿਨਾ (ਸਂ॰ ਨਿ॰ ੧.੧੭੬) ਮਹਾવਗ੍ਗੇ ਆਗਤੇਨ ਅਞ੍ਞਤਰਬ੍ਰਹ੍ਮਸੁਤ੍ਤੇਨ।
Tassa brahmagaṇassa tathācintanasamanantarameva tasmiṃ brahmaloke sudhammaṃ brahmasabhaṃ gantvā. Tepīti mahāmoggallānādayo. Paccekaṃ disāsūti mahāmoggallānatthero puratthimadisāyaṃ, mahākassapatthero dakkhiṇadisāyaṃ, mahākappinatthero pacchimadisāyaṃ, anuruddhatthero uttaradisāyanti evaṃ cattāro therā brahmaparisamatthake majjhe nisinnassa bhagavato samantato catuddisā nisīdiṃsu. Gāthā vuttāti ‘‘yo brahmaṃ paripucchatī’’ti gāthā vuttā. Aññatarabrahmasuttenāti – ‘‘tena kho pana samayena aññatarassa brahmuno evarūpaṃ pāpakaṃ diṭṭhigataṃ uppannaṃ hotī’’tiādinā (saṃ. ni. 1.176) mahāvagge āgatena aññatarabrahmasuttena.
ਝਾਨવਿਮੋਕ੍ਖੇਨ ਫੁਸੀਤਿ ਝਾਨવਿਮੋਕ੍ਖਸਨ੍ਨਿਸ੍ਸਯੇਨ ਅਭਿਞ੍ਞਾਞਾਣੇਨ ਫਸ੍ਸਯਿ। વਨਨ੍ਤਿ ਜਮ੍ਬੁਦੀਪਂ ਅਫਸ੍ਸਯੀਤਿ ਸਮ੍ਬਨ੍ਧੋ। ਜਮ੍ਬੁਦੀਪੋ ਹਿ વਨਬਹੁਲਤਾਯ ਇਧ ‘‘વਨ’’ਨ੍ਤਿ વੁਤ੍ਤੋ। ਤੇਨਾਹ ‘‘ਜਮ੍ਬੁਸਣ੍ਡਸ੍ਸ ਇਸ੍ਸਰੋ’’ਤਿ। ਪੁਬ੍ਬવਿਦੇਹਾਨਂ ਦੀਪਨ੍ਤਿ ਪੁਬ੍ਬવਿਦੇਹવਾਸੀਨਂ ਦੀਪਂ, ਪੁਬ੍ਬવਿਦੇਹਦੀਪਨ੍ਤਿ ਅਤ੍ਥੋ। ਭੂਮਿਸਯਾ ਨਰਾ ਨਾਮ ਅਪਰਗੋਯਾਨਕਾ ਉਤ੍ਤਰਕੁਰੁਕਾ ਚ। ਯਸ੍ਮਾ ਤੇ ਗੇਹਪਰਿਗ੍ਗਹਾਭਾવਤੋ ਭੂਮਿਯਂਯੇવ ਸਯਨ੍ਤਿ, ਨ ਪਾਸਾਦਾਦੀਸੁ। ਪਟਿਲਭੀਤਿ ਉਪ੍ਪਾਦੇਸਿ। ਏਤਂ ਆਸਂ ਮਾ ਅਕਾਸੀਤਿ ਏਸਾ ਯਥਾ ਪੁਬ੍ਬੇ ਦੂਸਿਮਾਰਸ੍ਸ, ਏવਂ ਤੁਯ੍ਹਂ ਆਸਾ ਦੀਘਰਤ੍ਤਂ ਅਨਤ੍ਥਾવਹਾ, ਤਸ੍ਮਾ ਏਦਿਸਂ ਆਸਂ ਮਾ ਅਕਾਸੀਤਿ ਮਾਰਸ੍ਸ ਓવਾਦਂ ਅਦਾਸਿ। ਸੇਸਂ ਸਬ੍ਬਤ੍ਥ ਸੁવਿਞ੍ਞੇਯ੍ਯਮੇવ।
Jhānavimokkhena phusīti jhānavimokkhasannissayena abhiññāñāṇena phassayi. Vananti jambudīpaṃ aphassayīti sambandho. Jambudīpo hi vanabahulatāya idha ‘‘vana’’nti vutto. Tenāha ‘‘jambusaṇḍassa issaro’’ti. Pubbavidehānaṃ dīpanti pubbavidehavāsīnaṃ dīpaṃ, pubbavidehadīpanti attho. Bhūmisayā narā nāma aparagoyānakā uttarakurukā ca. Yasmā te gehapariggahābhāvato bhūmiyaṃyeva sayanti, na pāsādādīsu. Paṭilabhīti uppādesi. Etaṃ āsaṃ mā akāsīti esā yathā pubbe dūsimārassa, evaṃ tuyhaṃ āsā dīgharattaṃ anatthāvahā, tasmā edisaṃ āsaṃ mā akāsīti mārassa ovādaṃ adāsi. Sesaṃ sabbattha suviññeyyameva.
ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ
Papañcasūdaniyā majjhimanikāyaṭṭhakathāya
ਮਾਰਤਜ੍ਜਨੀਯਸੁਤ੍ਤવਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ।
Māratajjanīyasuttavaṇṇanāya līnatthappakāsanā samattā.
ਨਿਟ੍ਠਿਤਾ ਚ ਚੂਲ਼ਯਮਕવਗ੍ਗવਣ੍ਣਨਾ।
Niṭṭhitā ca cūḷayamakavaggavaṇṇanā.
ਮੂਲਪਣ੍ਣਾਸਟੀਕਾ ਸਮਤ੍ਤਾ।
Mūlapaṇṇāsaṭīkā samattā.
ਦੁਤਿਯੋ ਭਾਗੋ ਨਿਟ੍ਠਿਤੋ।
Dutiyo bhāgo niṭṭhito.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਮਜ੍ਝਿਮਨਿਕਾਯ • Majjhimanikāya / ੧੦. ਮਾਰਤਜ੍ਜਨੀਯਸੁਤ੍ਤਂ • 10. Māratajjanīyasuttaṃ
ਅਟ੍ਠਕਥਾ • Aṭṭhakathā / ਸੁਤ੍ਤਪਿਟਕ (ਅਟ੍ਠਕਥਾ) • Suttapiṭaka (aṭṭhakathā) / ਮਜ੍ਝਿਮਨਿਕਾਯ (ਅਟ੍ਠਕਥਾ) • Majjhimanikāya (aṭṭhakathā) / ੧੦. ਮਾਰਤਜ੍ਜਨੀਯਸੁਤ੍ਤવਣ੍ਣਨਾ • 10. Māratajjanīyasuttavaṇṇanā
