Library / Literary Works

Mario Rapisardi

A Manfuriu

Manfurio, a cui la bile e l'appetito
In legittimo amor par che s'unisca,
Grammatico, retorico, erudito.
Onniloqnente ancor che balbutisca :
Un filologo insomma alla tedesca :
Ferreo cul, cor di stoppia e faccia fresca.

(Versi omessi dall' «Atlantide»)

O eruditissimu
Cacapurtenti,
Ca libri in foliu
Crei di lu nenti,

O tunna e lucida
Vissica, china
Di lingua sanscrita,
Greca e latina;

O filologicu
Mostru a chiù branchi,
Ca ppi discipuli
Pigghi li vanchi,

E picàti applichi
Miraculusi
Su li murroidi
Di li carusi;

Tu ca a Terenziu
E a Ciciruni
Scardi li zòddiri
Di li cugghiuni,

Ed a Vergiliu
Ccu manu junti
Rapitu in estasi
Li pila cunti;

Tu 'ntra 'stu seculu
Di surdi e muti
Si' l'arcinfànfaru
Di li saputi.

Chiantannu in catrida
La dotta natica,
La gran teorica
Tu metti in pratica,

Alta teorica
Ca fa prudiggi,
Tutta basannusi
Su lu cocciggi;

E china d'ètimi
Grecu - latini,
Di punti e virguli,
Di calapini,

D'ermeneùtica,
Di testi rari,
Vunghia li vèrtuli
Di li sculari.

Scupriu Cristofulu
Un munnu ingratu;
Ma lu to geniu
Chiù furtunatu,

Minannu codici,
Testi arraspannu,
Sgargiannu lapidi,
Cullaziunannu

Ccu scientificu
Metudu dottu
Arrivò a scòpriri,
Quattru e quattr' ottu,

Ca 'ddu gianfuttiri
Di Catilina
Tinìa 'na papira
Ppi concubina;

Ca la bisavula
Di Gneu Pompeu
Tra coscia e natica
Ci aveva un neu ;

E Boccu, jenniru
Di re Giugurta,
Avìa la gnagnula
Rascusa e curta.

Tu di l'anedduti
Hai l'inventariu :
Teni ppi archiviu
Lu tafanariu.

Tu sai ca Cesari
Quannu cadìu
Dissi: La guàddira
Mi si rumpìu;

E a Semiramidi
'N cauci di mulu
Ci tagghio l' istimu
Tra cunnu e culu,

Unni lu poviru
Ninuzzu amatu,
Natannu ammatula,
Morsi annijatu.

O testa, o célibru
Di basiliscu,
Cori vandalicu,
Schinu todiscu,

Tu 'ntra 'stu populu
Di surdi e muti
Si' l'arcinfanfaru
Di li saputi.

Vapuri, elettricu,
Stradi firrati,
Populi libiri,
Nazioni armati,

Navi, telegrafi,
Fotografia,
Gassi, fonografu,
Chi su' ppi tia?

Tu ccu grammatichi,
Temi e radici
Pòi fari l' omini
Tutti filici.

Chi voli Dàrvini?
Ittassi coppi:
Li veri genii
Su' Curziu e Boppi

Glossari, lessici,
Cummenti, chiosi
Sunu di l'essiri
Li chiù gran cosi.

Ch'importa a un populu
Si è mortu o vivu ?
Basta la storia
Di lu dativu.

In tra 'stu seculu
Di veru lumi
E' lu filolugu
L'unicu numi.

Iddu di l'essiri
Ha lu sicretu :
Sapi ca pétiri
Veni da petu;

Iddu (o miraculu
Spicchiatu e tunnu!)
Cu quattru pidita
Vota lu munnu ;.

Iddu (s'arrizzanu
Li mei capiddi)
Mutari in pecuri
Pò li chiattiddi;

Iddu, arraspannusi
Unni ci mangia,
'Nventa la storia,
Li razzi cangia,

'Nsumma è la ciaccula,
La torcia a ventu,
Ca a tutti illumina
Lu funnamentu.

4 febbraio 1889

POTRESTI ANCHE ESSERE INTERESSATO A