| Library / Tipiṭaka / д̇ибидага • Tipiṭaka / жарияаабидага-адтагат̇аа • Cariyāpiṭaka-aṭṭhakathā |
7. маад̇ан̇г̇ажарияааван̣н̣анаа
7. Mātaṅgacariyāvaṇṇanā
60. сад̇д̇амз ж̇адилод̇и ж̇адааванд̇о, ж̇адааб̣анд̇хагзсод̇и ад̇т̇о. уг̇г̇ад̇аабанод̇и манажчадтаанам̣ инд̣̇рияаанам̣ д̇аабанад̇о ниг̇г̇ан̣ханад̇о д̇абасан̇каад̇ам̣ уг̇г̇ад̇аабанам̣ зд̇ассаад̇и уг̇г̇ад̇аабано, гхорад̇або барамад̇хид̇инд̣̇рияод̇и ад̇т̇о. ат̇а ваа наанаббагаарз д̣̇идтад̇хаммигаад̣̇ибхзд̣̇з анад̇т̇з уг̇г̇иран̣ад̇о б̣ахи чад̣д̣аабанад̇о гхорабхиймабхаяаанагадтзна ваа ‘‘уг̇г̇аа’’д̇и лад̣̇д̇ханаамз гилзсз вийрияаад̇абзна санд̇аабанад̇о уг̇г̇з д̇аабзд̇ийд̇и уг̇г̇ад̇аабано. маад̇ан̇г̇о наама наамзнаад̇и наамзна маад̇ан̇г̇о наама. маад̇ан̇г̇агулз ниб̣б̣ад̇д̇ияаа ж̇аад̇ияаа ааг̇ад̇ам̣ хисса зд̇ам̣ наамам̣. сийлаваад̇и сийласамбанно субарисуд̣̇д̇хасийло. сусамаахид̇од̇и убажаараббанаасамаад̇хийхи судту самаахид̇о, жхаанасамаабад̇д̇илаабхийд̇и ад̇т̇о.
60. Sattame jaṭiloti jaṭāvanto, jaṭābandhakesoti attho. Uggatāpanoti manacchaṭṭhānaṃ indriyānaṃ tāpanato niggaṇhanato tapasaṅkhātaṃ uggatāpanaṃ etassāti uggatāpano, ghoratapo paramadhitindriyoti attho. Atha vā nānappakāre diṭṭhadhammikādibhede anatthe uggiraṇato bahi chaḍḍāpanato ghorabhīmabhayānakaṭṭhena vā ‘‘uggā’’ti laddhanāme kilese vīriyātapena santāpanato ugge tāpetīti uggatāpano. Mātaṅgo nāma nāmenāti nāmena mātaṅgo nāma. Mātaṅgakule nibbattiyā jātiyā āgataṃ hissa etaṃ nāmaṃ. Sīlavāti sīlasampanno suparisuddhasīlo. Susamāhitoti upacārappanāsamādhīhi suṭṭhu samāhito, jhānasamāpattilābhīti attho.
д̇ад̣̇аа хи б̣од̇хисад̇д̇о жан̣д̣аалаяонияам̣ ниб̣б̣ад̇д̇ид̇ваа руубзна д̣̇уд̣̇д̣̇асиго б̣ахинаг̇арз жан̣д̣аалаг̇аамз васад̇и. ‘‘маад̇ан̇г̇абан̣д̣ид̇о’’д̇и багаасанаамо. ат̇згад̣̇ивасам̣ д̇асмим̣ наг̇арз нагкад̇д̇з гхосид̇з язбхуяязна нааг̇араа нагкад̇д̇ам̣ гийл̣анд̇и. ан̃н̃ад̇арааби б̣раахман̣амахаасаалаган̃н̃аа сол̣асабаннарасавассуд̣̇д̣̇зсигаа д̣̇зваган̃н̃аа вияа руубзна д̣̇ассанийяаа баасаад̣̇игаа ‘‘ад̇д̇ано вибхаваануруубам̣ нагкад̇д̇ам̣ гийл̣иссаамий’’д̇и бахууд̇акаж̇ж̇абхож̇ж̇аад̣̇ийни сагадзсу ааробзд̇ваа саб̣б̣асзд̇ам̣ вал̣аваарат̇амааруяха махад̇аа бариваарзна уяяаанабхуумим̣ г̇ажчад̇и. д̣̇идтаман̇г̇алигаа наамзсаа, саа гира д̣̇уссан̣тид̇ам̣ руубам̣ ‘‘аваман̇г̇ала’’нд̇и д̇ам̣ д̣̇адтум̣ на ижчад̇и, д̇знассаа ‘‘д̣̇идтаман̇г̇алигаа’’д̇взва саман̃н̃аа уд̣̇абаад̣̇и.
Tadā hi bodhisatto caṇḍālayoniyaṃ nibbattitvā rūpena duddasiko bahinagare caṇḍālagāme vasati. ‘‘Mātaṅgapaṇḍito’’ti pakāsanāmo. Athekadivasaṃ tasmiṃ nagare nakkhatte ghosite yebhuyyena nāgarā nakkhattaṃ kīḷanti. Aññatarāpi brāhmaṇamahāsālakaññā soḷasapannarasavassuddesikā devakaññā viya rūpena dassanīyā pāsādikā ‘‘attano vibhavānurūpaṃ nakkhattaṃ kīḷissāmī’’ti pahūtakhajjabhojjādīni sakaṭesu āropetvā sabbasetaṃ vaḷavārathamāruyha mahatā parivārena uyyānabhūmiṃ gacchati. Diṭṭhamaṅgalikā nāmesā, sā kira dussaṇṭhitaṃ rūpaṃ ‘‘avamaṅgala’’nti taṃ daṭṭhuṃ na icchati, tenassā ‘‘diṭṭhamaṅgalikā’’tveva samaññā udapādi.
д̇ад̣̇аа б̣од̇хисад̇д̇о гаалассзва удтааяа бадабилод̇игам̣ ниваасзд̇ваа ж̇аж̇ж̇арид̇амукабхааг̇ам̣ взн̣уд̣̇ан̣д̣ам̣ г̇ахзд̇ваа бхааж̇анахад̇т̇о наг̇арам̣ бависад̇и мануссз д̣̇исваа д̣̇уурад̇ова д̇зсам̣ д̣̇уурийгаран̣ад̇т̇ам̣ д̇зна взн̣уд̣̇ан̣д̣зна сан̃н̃ам̣ гаронд̇о. ат̇а д̣̇идтаман̇г̇алигаа ‘‘уссарат̇а уссарат̇аа’’д̇и уссааран̣ам̣ гаронд̇зхи ад̇д̇ано бурисзхи нийяамаанаа наг̇арад̣̇ваарамаж̇жхз маад̇ан̇г̇ам̣ д̣̇исваа ‘‘го зсо’’д̇и ааха. ‘‘аяяз, маад̇ан̇г̇ажан̣д̣аало’’д̇и жа вуд̇д̇з ‘‘ийд̣̇исам̣ д̣̇исваа г̇ад̇аанам̣ гуд̇о вуд̣дхий’’д̇и яаанам̣ нивад̇д̇аабзси. мануссаа ‘‘яам̣ маяам̣ уяяаанам̣ г̇анд̇ваа б̣ахум̣ каж̇ж̇абхож̇ж̇аад̣̇им̣ лабхзяяаама, д̇асса но маад̇ан̇г̇зна анд̇арааяо гад̇о’’д̇и губид̇аа ‘‘г̇ан̣хат̇а, жан̣д̣аала’’нд̇и лзд̣д̣уухи бахарид̇ваа висан̃н̃ийбхууд̇ам̣ баад̇зд̇ваа аг̇амам̣су.
Tadā bodhisatto kālasseva uṭṭhāya paṭapilotikaṃ nivāsetvā jajjaritamukhabhāgaṃ veṇudaṇḍaṃ gahetvā bhājanahattho nagaraṃ pavisati manusse disvā dūratova tesaṃ dūrīkaraṇatthaṃ tena veṇudaṇḍena saññaṃ karonto. Atha diṭṭhamaṅgalikā ‘‘ussaratha ussarathā’’ti ussāraṇaṃ karontehi attano purisehi nīyamānā nagaradvāramajjhe mātaṅgaṃ disvā ‘‘ko eso’’ti āha. ‘‘Ayye, mātaṅgacaṇḍālo’’ti ca vutte ‘‘īdisaṃ disvā gatānaṃ kuto vuḍḍhī’’ti yānaṃ nivattāpesi. Manussā ‘‘yaṃ mayaṃ uyyānaṃ gantvā bahuṃ khajjabhojjādiṃ labheyyāma, tassa no mātaṅgena antarāyo kato’’ti kupitā ‘‘gaṇhatha, caṇḍāla’’nti leḍḍūhi paharitvā visaññībhūtaṃ pātetvā agamaṃsu.
со на жирзнзва сад̇им̣ бадилабхид̇ваа вудтааяа мануссз бужчи – ‘‘гим̣, аяяаа, д̣̇ваарам̣ наама саб̣б̣асаад̇хааран̣ам̣, уд̣̇ааху б̣раахман̣аанам̣ зва гад̇а’’нд̇и? ‘‘саб̣б̣зсам̣ саад̇хааран̣а’’нд̇и. ‘‘звам̣ саб̣б̣асаад̇хааран̣ад̣̇ваарз згаманд̇ам̣ абаггаманд̇ам̣ мам̣ д̣̇идтаман̇г̇алигааяа мануссаа имам̣ анаяаб̣яасанам̣ баабзсу’’нд̇и рат̇игааяа мануссаанам̣ аарожзд̇ваа ‘‘ханд̣̇аахам̣ имиссаа маанам̣ бхинд̣̇иссаамий’’д̇и д̇ассаа нивзсанад̣̇ваарам̣ г̇анд̇ваа ‘‘ахам̣ д̣̇идтаман̇г̇алигам̣ алад̣̇д̇хаа на вудтахиссаамий’’д̇и нибаж̇ж̇и. д̣̇идтаман̇г̇алигааяа бид̇аа ‘‘гхарад̣̇ваарз маад̇ан̇г̇о нибанно’’д̇и суд̇ваа ‘‘д̇асса гааган̣игам̣ д̣̇зт̇а, д̇злзна сарийрам̣ магкзд̇ваа г̇ажчад̇уу’’д̇и ааха. со ‘‘д̣̇идтаман̇г̇алигам̣ алад̣̇д̇хаа на удтахиссаами’’жжзва ааха. д̇ад̇о б̣раахман̣зна – ‘‘д̣̇вз гааган̣игз д̣̇зт̇а, маасагам̣ баад̣̇ам̣ гахаабан̣ам̣ д̣̇вз д̇ийн̣и яаава гахаабан̣асад̇ам̣ гахаабан̣асахассам̣ д̣̇зт̇аа’’д̇и вуд̇д̇зби на самбадижчад̇и зва. звам̣ д̇зсам̣ манд̇знд̇аанам̣ зва суурияо ад̇т̇ан̇г̇ад̇о.
So na cireneva satiṃ paṭilabhitvā vuṭṭhāya manusse pucchi – ‘‘kiṃ, ayyā, dvāraṃ nāma sabbasādhāraṇaṃ, udāhu brāhmaṇānaṃ eva kata’’nti? ‘‘Sabbesaṃ sādhāraṇa’’nti. ‘‘Evaṃ sabbasādhāraṇadvāre ekamantaṃ apakkamantaṃ maṃ diṭṭhamaṅgalikāya manussā imaṃ anayabyasanaṃ pāpesu’’nti rathikāya manussānaṃ ārocetvā ‘‘handāhaṃ imissā mānaṃ bhindissāmī’’ti tassā nivesanadvāraṃ gantvā ‘‘ahaṃ diṭṭhamaṅgalikaṃ aladdhā na vuṭṭhahissāmī’’ti nipajji. Diṭṭhamaṅgalikāya pitā ‘‘gharadvāre mātaṅgo nipanno’’ti sutvā ‘‘tassa kākaṇikaṃ detha, telena sarīraṃ makkhetvā gacchatū’’ti āha. So ‘‘diṭṭhamaṅgalikaṃ aladdhā na uṭṭhahissāmi’’cceva āha. Tato brāhmaṇena – ‘‘dve kākaṇike detha, māsakaṃ pādaṃ kahāpaṇaṃ dve tīṇi yāva kahāpaṇasataṃ kahāpaṇasahassaṃ dethā’’ti vuttepi na sampaṭicchati eva. Evaṃ tesaṃ mantentānaṃ eva sūriyo atthaṅgato.
ат̇а д̣̇идтаман̇г̇алигааяа маад̇аа баасаад̣̇аа оруяха саан̣ибаагаарам̣ баригкибаабзд̇ваа д̇асса санд̇игам̣ г̇анд̇ваа ‘‘д̇аад̇а, маад̇ан̇г̇а , д̣̇идтаман̇г̇алигааяа абараад̇хам̣ кама, д̣̇вз сахассаани г̇ан̣хаахи яаава сад̇асахассам̣ г̇ан̣хаахий’’д̇и вуд̇д̇зби на самбадижчи, нибаж̇ж̇и зва. д̇ассзвам̣ ча д̣̇ивасз нибаж̇ж̇ид̇ваа сад̇д̇амз д̣̇ивасз самбад̇д̇з саманд̇аа сааманд̇агхараа бадивисагагхараа жа мануссаа удтахид̇ваа ‘‘д̇умхз маад̇ан̇г̇ам̣ ваа удтаабзт̇а, д̣̇ааригам̣ ваа д̣̇зт̇а, маа амхз наасаяид̇т̇аа’’д̇и аахам̣су. д̇ад̣̇аа гира аяам̣ д̇асмим̣ д̣̇зсз д̣̇зсад̇хаммо ‘‘яасса гхарад̣̇ваарз звам̣ нибаж̇ж̇ид̇ваа жан̣д̣аало марад̇и, д̇зна гхарзна сад̣̇д̇хим̣ сад̇д̇асад̇д̇агхараваасино жан̣д̣аалаа хонд̇ий’’д̇и.
Atha diṭṭhamaṅgalikāya mātā pāsādā oruyha sāṇipākāraṃ parikkhipāpetvā tassa santikaṃ gantvā ‘‘tāta, mātaṅga , diṭṭhamaṅgalikāya aparādhaṃ khama, dve sahassāni gaṇhāhi yāva satasahassaṃ gaṇhāhī’’ti vuttepi na sampaṭicchi, nipajji eva. Tassevaṃ cha divase nipajjitvā sattame divase sampatte samantā sāmantagharā paṭivisakagharā ca manussā uṭṭhahitvā ‘‘tumhe mātaṅgaṃ vā uṭṭhāpetha, dārikaṃ vā detha, mā amhe nāsayitthā’’ti āhaṃsu. Tadā kira ayaṃ tasmiṃ dese desadhammo ‘‘yassa gharadvāre evaṃ nipajjitvā caṇḍālo marati, tena gharena saddhiṃ sattasattagharavāsino caṇḍālā hontī’’ti.
д̇ад̇о д̣̇идтаман̇г̇алигааяа маад̇аабид̇аро д̣̇идтаман̇г̇алигам̣ бадабилод̇игам̣ ниваасаабзд̇ваа жан̣д̣аалаанужчавигам̣ баригкаарам̣ д̣̇ад̇ваа барид̣̇звамаанам̣ зва д̇асса санд̇игам̣ нзд̇ваа ‘‘ханд̣̇а, д̣̇аани д̣̇ааригам̣ удтааяа г̇ан̣хаахий’’д̇и ад̣̇ам̣су. саа бассз тад̇ваа ‘‘удтаахий’’д̇и ааха. со ‘‘ахам̣ ад̇ивияа гиланд̇о, хад̇т̇з г̇ахзд̇ваа мам̣ удтаабзхий’’д̇и ааха. саа д̇ат̇аа агааси. маад̇ан̇г̇о ‘‘маяам̣ анд̇онаг̇арз васид̇ум̣ на лабхаама, зхи, б̣ахинаг̇арз жан̣д̣аалаг̇аамам̣ г̇амиссаамаа’’д̇и д̇ам̣ абассааяа ад̇д̇ано г̇зхам̣ аг̇амааси. ‘‘д̇ассаа бидтим̣ абхирухид̇ваа’’д̇и ж̇аад̇агабхаан̣агаа вад̣̇анд̇и.
Tato diṭṭhamaṅgalikāya mātāpitaro diṭṭhamaṅgalikaṃ paṭapilotikaṃ nivāsāpetvā caṇḍālānucchavikaṃ parikkhāraṃ datvā paridevamānaṃ eva tassa santikaṃ netvā ‘‘handa, dāni dārikaṃ uṭṭhāya gaṇhāhī’’ti adaṃsu. Sā passe ṭhatvā ‘‘uṭṭhāhī’’ti āha. So ‘‘ahaṃ ativiya kilanto, hatthe gahetvā maṃ uṭṭhāpehī’’ti āha. Sā tathā akāsi. Mātaṅgo ‘‘mayaṃ antonagare vasituṃ na labhāma, ehi, bahinagare caṇḍālagāmaṃ gamissāmā’’ti taṃ apassāya attano gehaṃ agamāsi. ‘‘Tassā piṭṭhiṃ abhiruhitvā’’ti jātakabhāṇakā vadanti.
звам̣ бана г̇зхам̣ г̇анд̇ваа ж̇аад̇исамбхзд̣̇авийд̇иггамам̣ агад̇ваава гад̇ибаахам̣ г̇зхз васид̇ваа б̣алам̣ г̇ахзд̇ваа жинд̇зси – ‘‘ахам̣ имам̣ б̣раахман̣амахаасаалаган̃н̃ам̣ маяхам̣ жан̣д̣аалаг̇зхз ваасаабзсим̣, ханд̣̇а, д̣̇аани д̇ам̣ лаабхаг̇г̇аяасаг̇г̇аббад̇д̇ам̣ гариссаамий’’д̇и. со аран̃н̃ам̣ бависид̇ваа баб̣б̣аж̇ид̇ваа сад̇д̇аахаб̣бханд̇арзязва адта самаабад̇д̇ияо бан̃жаабхин̃н̃ааяо ниб̣б̣ад̇д̇зд̇ваа ид̣̇д̇хияаа жан̣д̣аалаг̇аамад̣̇ваарз од̇арид̇ваа г̇зхад̣̇ваарз тид̇о д̣̇идтаман̇г̇алигам̣ баггосаабзд̇ваа ‘‘саами, гисса мам̣ анаат̇ам̣ гад̇ваа баб̣б̣аж̇ид̇осий’’д̇и барид̣̇звамаанам̣ ‘‘д̇вам̣, бхад̣̇д̣̇з, маа жинд̇аяи, д̇ава бораан̣агаяасад̇о ид̣̇аани маханд̇ад̇арам̣ яасам̣ гариссаами, д̇вам̣ бана ‘махааб̣рахмаа мз саамиго , на маад̇ан̇г̇о, со б̣рахмалогам̣ г̇ад̇о, ид̇о сад̇д̇амз д̣̇ивасз бун̣н̣амааяа жанд̣̇аман̣д̣алам̣ бхинд̣̇ид̇ваа ааг̇амиссад̇ий’д̇и барисаасу вад̣̇зяяаасий’’д̇и вад̇ваа химаванд̇амзва г̇ад̇о.
Evaṃ pana gehaṃ gantvā jātisambhedavītikkamaṃ akatvāva katipāhaṃ gehe vasitvā balaṃ gahetvā cintesi – ‘‘ahaṃ imaṃ brāhmaṇamahāsālakaññaṃ mayhaṃ caṇḍālagehe vāsāpesiṃ, handa, dāni taṃ lābhaggayasaggappattaṃ karissāmī’’ti. So araññaṃ pavisitvā pabbajitvā sattāhabbhantareyeva aṭṭha samāpattiyo pañcābhiññāyo nibbattetvā iddhiyā caṇḍālagāmadvāre otaritvā gehadvāre ṭhito diṭṭhamaṅgalikaṃ pakkosāpetvā ‘‘sāmi, kissa maṃ anāthaṃ katvā pabbajitosī’’ti paridevamānaṃ ‘‘tvaṃ, bhadde, mā cintayi, tava porāṇakayasato idāni mahantataraṃ yasaṃ karissāmi, tvaṃ pana ‘mahābrahmā me sāmiko , na mātaṅgo, so brahmalokaṃ gato, ito sattame divase puṇṇamāya candamaṇḍalaṃ bhinditvā āgamissatī’ti parisāsu vadeyyāsī’’ti vatvā himavantameva gato.
д̣̇идтаман̇г̇алигааби б̣аараан̣асияам̣ махааж̇анамаж̇жхз д̇зсу д̇зсу таанзсу д̇ат̇аа гат̇зси. ат̇а бун̣н̣амад̣̇ивасз б̣од̇хисад̇д̇о жанд̣̇аман̣д̣аласса г̇аг̇анамаж̇жхз тид̇агаалз б̣рахмад̇д̇абхаавам̣ маабзд̇ваа жанд̣̇аман̣д̣алам̣ бхинд̣̇ид̇ваа д̣̇ваад̣̇асаяож̇анигам̣ б̣аараан̣асим̣ сагалам̣ гаасирадтан̃жа згобхаасам̣ гад̇ваа аагаасад̇о од̇арид̇ваа б̣аараан̣асияаа убари д̇игкад̇д̇ум̣ бариб̣бхамид̇ваа махааж̇анзна г̇анд̇хамаалаад̣̇ийхи бууж̇ияамаано жан̣д̣аалаг̇аамаабхимуко ахоси. б̣рахмабхад̇д̇аа саннибад̇ид̇ваа д̇ам̣ жан̣д̣аалаг̇аамагам̣ г̇анд̇ваа д̣̇идтаман̇г̇алигааяа г̇зхам̣ суд̣̇д̇хавад̇т̇аг̇анд̇хамаалаад̣̇ийхи д̣̇звавимаанам̣ вияа алан̇гарим̣су. д̣̇идтаман̇г̇алигаа жа д̇ад̣̇аа уд̇уний ход̇и. махаасад̇д̇о д̇ад̇т̇а г̇анд̇ваа д̣̇идтаман̇г̇алигам̣ ан̇г̇удтзна наабхияам̣ бараамасид̇ваа ‘‘бхад̣̇д̣̇з, г̇аб̣бхо д̇з бад̇идтид̇о, д̇вам̣ буд̇д̇ам̣ виж̇ааяиссаси, д̇вамби буд̇д̇оби д̇з лаабхаг̇г̇аяасаг̇г̇аббад̇д̇аа бхависсат̇а, д̇ава сийсад̇хованауд̣̇агам̣ сагалаж̇амб̣уд̣̇ийбз рааж̇уунам̣ абхисзгод̣̇агам̣ бхависсад̇и, нхаанод̣̇агам̣ бана д̇з амад̇од̣̇агам̣ бхависсад̇и, яз нам̣ сийсз аасин̃жиссанд̇и, д̇з саб̣б̣арог̇зхи мужжиссанд̇и, гаал̣аган̣н̣ияаа жа баримужжиссанд̇и, д̇ава баад̣̇абидтз сийсам̣ табзд̇ваа ванд̣̇анд̇аа сахассам̣ д̣̇ассанд̇и, гат̇аасаванадтаанз тад̇ваа ванд̣̇анд̇аа сад̇ам̣ д̣̇ассанд̇и, жагкубат̇з тад̇ваа ванд̣̇анд̇аа згзгам̣ гахаабан̣ам̣ д̣̇ад̇ваа ванд̣̇иссанд̇и, аббамад̇д̇аа хохий’’д̇и д̇ам̣ овад̣̇ид̇ваа г̇зхаа нигкамма махааж̇анасса бассанд̇ассзва жанд̣̇аман̣д̣алам̣ баависи.
Diṭṭhamaṅgalikāpi bārāṇasiyaṃ mahājanamajjhe tesu tesu ṭhānesu tathā kathesi. Atha puṇṇamadivase bodhisatto candamaṇḍalassa gaganamajjhe ṭhitakāle brahmattabhāvaṃ māpetvā candamaṇḍalaṃ bhinditvā dvādasayojanikaṃ bārāṇasiṃ sakalaṃ kāsiraṭṭhañca ekobhāsaṃ katvā ākāsato otaritvā bārāṇasiyā upari tikkhattuṃ paribbhamitvā mahājanena gandhamālādīhi pūjiyamāno caṇḍālagāmābhimukho ahosi. Brahmabhattā sannipatitvā taṃ caṇḍālagāmakaṃ gantvā diṭṭhamaṅgalikāya gehaṃ suddhavatthagandhamālādīhi devavimānaṃ viya alaṅkariṃsu. Diṭṭhamaṅgalikā ca tadā utunī hoti. Mahāsatto tattha gantvā diṭṭhamaṅgalikaṃ aṅguṭṭhena nābhiyaṃ parāmasitvā ‘‘bhadde, gabbho te patiṭṭhito, tvaṃ puttaṃ vijāyissasi, tvampi puttopi te lābhaggayasaggappattā bhavissatha, tava sīsadhovanaudakaṃ sakalajambudīpe rājūnaṃ abhisekodakaṃ bhavissati, nhānodakaṃ pana te amatodakaṃ bhavissati, ye naṃ sīse āsiñcissanti, te sabbarogehi muccissanti, kāḷakaṇṇiyā ca parimuccissanti, tava pādapiṭṭhe sīsaṃ ṭhapetvā vandantā sahassaṃ dassanti, kathāsavanaṭṭhāne ṭhatvā vandantā sataṃ dassanti, cakkhupathe ṭhatvā vandantā ekekaṃ kahāpaṇaṃ datvā vandissanti, appamattā hohī’’ti taṃ ovaditvā gehā nikkhamma mahājanassa passantasseva candamaṇḍalaṃ pāvisi.
б̣рахмабхад̇д̇аа саннибад̇ид̇ваа д̣̇идтаман̇г̇алигам̣ маханд̇зна саггаарзна наг̇арам̣ бавзсзд̇ваа маханд̇зна сирисобхаг̇г̇зна д̇ад̇т̇а васаабзсум̣. д̣̇звавимаанасад̣̇исан̃жассаа нивзсанам̣ гаарзсум̣. д̇ад̇т̇а нзд̇ваа ул̣аарам̣ лаабхасаггаарам̣ убанаамзсум̣. буд̇д̇алаабхаад̣̇и саб̣б̣о б̣од̇хисад̇д̇зна вуд̇д̇асад̣̇исова ахоси. сол̣асасахассаа б̣раахман̣аа д̣̇идтаман̇г̇алигааяа буд̇д̇зна саха ниб̣ад̣̇д̇хам̣ бхун̃ж̇анд̇и, сахассамад̇д̇аа нам̣ бариваарзнд̇и, анзгасахассаанам̣ д̣̇аанам̣ д̣̇ийяад̇и. ат̇а махаасад̇д̇о ‘‘аяам̣ адтаанз абхиббасанно, ханд̣̇асса д̣̇агкин̣зяяз ж̇аанаабзссаамий’’д̇и бхигкааяа жаранд̇о д̇ассаа г̇зхам̣ г̇анд̇ваа д̇зна сад̣̇д̇хим̣ саллабид̇ваа аг̇амааси. ат̇а гумааро г̇аат̇амааха –
Brahmabhattā sannipatitvā diṭṭhamaṅgalikaṃ mahantena sakkārena nagaraṃ pavesetvā mahantena sirisobhaggena tattha vasāpesuṃ. Devavimānasadisañcassā nivesanaṃ kāresuṃ. Tattha netvā uḷāraṃ lābhasakkāraṃ upanāmesuṃ. Puttalābhādi sabbo bodhisattena vuttasadisova ahosi. Soḷasasahassā brāhmaṇā diṭṭhamaṅgalikāya puttena saha nibaddhaṃ bhuñjanti, sahassamattā naṃ parivārenti, anekasahassānaṃ dānaṃ dīyati. Atha mahāsatto ‘‘ayaṃ aṭṭhāne abhippasanno, handassa dakkhiṇeyye jānāpessāmī’’ti bhikkhāya caranto tassā gehaṃ gantvā tena saddhiṃ sallapitvā agamāsi. Atha kumāro gāthamāha –
‘‘гуд̇о ну ааг̇ажчаси д̣̇уммаваасий, од̇аллаго бам̣субисаажагова;
‘‘Kuto nu āgacchasi dummavāsī, otallako paṃsupisācakova;
сан̇гааражол̣ам̣ бадимун̃жа ган̣тз, го рз д̇увам̣ хоси ад̣̇агкин̣зяяо’’д̇и. (ж̇аа. 1.15.1);
Saṅkāracoḷaṃ paṭimuñca kaṇṭhe, ko re tuvaṃ hosi adakkhiṇeyyo’’ti. (jā. 1.15.1);
д̇зна вуд̇д̇ам̣ анаажаарам̣ асахамаанаа д̣̇звад̇аа д̇асса д̇зсан̃жа сол̣асасахассаанам̣ б̣раахман̣аанам̣ мукам̣ вибаривад̇д̇зсум̣. д̇ам̣ д̣̇исваа д̣̇идтаман̇г̇алигаа махаасад̇д̇ам̣ убасан̇гамид̇ваа д̇амад̇т̇ам̣ аарожзси. б̣од̇хисад̇д̇о ‘‘д̇асса анаажаарам̣ асаханд̇зхи яагкзхи со виббагааро гад̇о, аби жа ко бана имам̣ ужчидтабин̣д̣агам̣ д̇зсам̣ мукз аасин̃жид̇ваа д̇ам̣ виббагаарам̣ вуубасамзхий’’д̇и ааха. сааби д̇ат̇аа гад̇ваа д̇ам̣ вуубасамзси. ат̇а д̣̇идтаман̇г̇алигаа буд̇д̇ам̣ ааха – ‘‘д̇аад̇а, имасмим̣ логз д̣̇агкин̣зяяаа наама маад̇ан̇г̇абан̣д̣ид̇асад̣̇исаа бхаванд̇и, на имз б̣раахман̣аа вияа ж̇аад̇имад̇д̇зна, манд̇асаж̇жхааяанамад̇д̇зна ваа маанад̇т̇ад̣̇д̇хаа’’д̇и вад̇ваа яз д̇ад̣̇аа сийлаад̣̇иг̇ун̣ависзсаяуд̇д̇аа жхаанасамаабад̇д̇илаабхино жзва бажжзгаб̣уд̣̇д̇хаа жа, д̇ад̇т̇звасса басаад̣̇ам̣ уббаад̣̇зсийд̇и.
Tena vuttaṃ anācāraṃ asahamānā devatā tassa tesañca soḷasasahassānaṃ brāhmaṇānaṃ mukhaṃ viparivattesuṃ. Taṃ disvā diṭṭhamaṅgalikā mahāsattaṃ upasaṅkamitvā tamatthaṃ ārocesi. Bodhisatto ‘‘tassa anācāraṃ asahantehi yakkhehi so vippakāro kato, api ca kho pana imaṃ ucchiṭṭhapiṇḍakaṃ tesaṃ mukhe āsiñcitvā taṃ vippakāraṃ vūpasamehī’’ti āha. Sāpi tathā katvā taṃ vūpasamesi. Atha diṭṭhamaṅgalikā puttaṃ āha – ‘‘tāta, imasmiṃ loke dakkhiṇeyyā nāma mātaṅgapaṇḍitasadisā bhavanti, na ime brāhmaṇā viya jātimattena, mantasajjhāyanamattena vā mānatthaddhā’’ti vatvā ye tadā sīlādiguṇavisesayuttā jhānasamāpattilābhino ceva paccekabuddhā ca, tatthevassa pasādaṃ uppādesīti.
д̇ад̣̇аа взд̇д̇авад̇ийнаг̇арз ж̇аад̇иманд̇о наама зго б̣раахман̣о баб̣б̣аж̇ид̇вааби ж̇аад̇им̣ ниссааяа маханд̇ам̣ маанамагааси. махаасад̇д̇о ‘‘д̇асса маанам̣ бхинд̣̇иссаамий’’д̇и д̇ам̣ таанам̣ г̇анд̇ваа д̇ассаасаннз убарисод̇з ваасам̣ габбзси. д̇зна вуд̇д̇ам̣ –
Tadā vettavatīnagare jātimanto nāma eko brāhmaṇo pabbajitvāpi jātiṃ nissāya mahantaṃ mānamakāsi. Mahāsatto ‘‘tassa mānaṃ bhindissāmī’’ti taṃ ṭhānaṃ gantvā tassāsanne uparisote vāsaṃ kappesi. Tena vuttaṃ –
61.
61.
‘‘ахан̃жа б̣раахман̣о зго, г̇ан̇г̇аагуулз васаамубхо;
‘‘Ahañca brāhmaṇo eko, gaṅgākūle vasāmubho;
ахам̣ васаами убари, хздтаа васад̇и б̣раахман̣о’’д̇и.
Ahaṃ vasāmi upari, heṭṭhā vasati brāhmaṇo’’ti.
ат̇а махаасад̇д̇о згад̣̇ивасам̣ д̣̇анд̇агадтам̣ каад̣̇ид̇ваа ‘‘ид̣̇ам̣ ж̇аад̇иманд̇асса ж̇адаасу лаг̇г̇ад̇уу’’д̇и ад̇хидтааяа над̣̇ияам̣ баад̇зси. д̇ам̣ д̇асса уд̣̇агам̣ аажамзнд̇асса ж̇адаасу лаг̇г̇и, со д̇ам̣ д̣̇исваа ‘‘насса васалаа’’д̇и вад̇ваа ‘‘гуд̇ояам̣ гаал̣аган̣н̣ий ааг̇ад̇о, убад̇хаарзссаами на’’нд̇и уд̣̇д̇хам̣сод̇ам̣ г̇ажчанд̇о махаасад̇д̇ам̣ д̣̇исваа ‘‘гим̣ж̇аад̇игосий’’д̇и бужчи. ‘‘жан̣д̣аалосмий’’д̇и. ‘‘д̇аяаа над̣̇ияам̣ д̣̇анд̇агадтам̣ баад̇ид̇а’’нд̇и? ‘‘аама, маяаа’’д̇и. ‘‘насса, васала, жан̣д̣аала, гаал̣аган̣н̣и, маа ид̇ха васи, хздтаасод̇з васаа’’д̇и вад̇ваа хздтаасод̇з васанд̇знаби баад̇ид̇з д̣̇анд̇агадтз бадисод̇ам̣ ааг̇анд̇ваа ж̇адаасу лаг̇г̇анд̇з ‘‘насса, васала, сажз ид̇ха васиссаси, сад̇д̇амз д̣̇ивасз сад̇д̇ад̇хаа д̇з муд̣̇д̇хаа палиссад̇ий’’д̇и ааха. д̇зна вуд̇д̇ам̣ –
Atha mahāsatto ekadivasaṃ dantakaṭṭhaṃ khāditvā ‘‘idaṃ jātimantassa jaṭāsu laggatū’’ti adhiṭṭhāya nadiyaṃ pātesi. Taṃ tassa udakaṃ ācamentassa jaṭāsu laggi, so taṃ disvā ‘‘nassa vasalā’’ti vatvā ‘‘kutoyaṃ kāḷakaṇṇī āgato, upadhāressāmi na’’nti uddhaṃsotaṃ gacchanto mahāsattaṃ disvā ‘‘kiṃjātikosī’’ti pucchi. ‘‘Caṇḍālosmī’’ti. ‘‘Tayā nadiyaṃ dantakaṭṭhaṃ pātita’’nti? ‘‘Āma, mayā’’ti. ‘‘Nassa, vasala, caṇḍāla, kāḷakaṇṇi, mā idha vasi, heṭṭhāsote vasā’’ti vatvā heṭṭhāsote vasantenapi pātite dantakaṭṭhe paṭisotaṃ āgantvā jaṭāsu laggante ‘‘nassa, vasala, sace idha vasissasi, sattame divase sattadhā te muddhā phalissatī’’ti āha. Tena vuttaṃ –
62.
62.
‘‘вижаранд̇о анугууламхи, уд̣̇д̇хам̣ мз ассамад̣̇д̣̇аса;
‘‘Vicaranto anukūlamhi, uddhaṃ me assamaddasa;
д̇ад̇т̇а мам̣ барибхаасзд̇ваа, абхисаби муд̣̇д̇хапаалана’’нд̇и.
Tattha maṃ paribhāsetvā, abhisapi muddhaphālana’’nti.
д̇ад̇т̇а вижаранд̇о анугууламхийд̇и ужчидтад̣̇анд̇агадтз ад̇д̇ано ж̇адаасу лаг̇г̇з д̇асса ааг̇аманаг̇авзсанавасзна г̇ан̇г̇ааяа д̇ийрз анувижаранд̇о. уд̣̇д̇хам̣ мз ассамад̣̇д̣̇асаад̇и ад̇д̇ано васанадтаанад̇о убарисод̇з мама ассамам̣ бан̣н̣асаалам̣ ад̣̇д̣̇агки. д̇ад̇т̇а мам̣ барибхаасзд̇ваад̇и мама ассамам̣ ааг̇анд̇ваа ж̇аад̇им̣ суд̇ваа д̇ад̇ова бадиггамид̇ваа савануубажаарз тад̇ваа ‘‘насса, васала жан̣д̣аала, гаал̣аган̣н̣и маа ид̇ха васий’’д̇иаад̣̇ийни вад̇ваа бхаязна санд̇аж̇ж̇зд̇ваа. абхисаби муд̣̇д̇хапаалананд̇и ‘‘сажз ж̇ийвид̇угаамоси, зд̇д̇ова сийгхам̣ балааяассуу’’д̇и вад̇ваа ‘‘сажз на баггамиссад̇и, ид̇о д̇з сад̇д̇амз д̣̇ивасз сад̇д̇ад̇хаа муд̣̇д̇хаа палад̇уу’’д̇и мз абхисабам̣ ад̣̇ааси.
Tattha vicaranto anukūlamhīti ucchiṭṭhadantakaṭṭhe attano jaṭāsu lagge tassa āgamanagavesanavasena gaṅgāya tīre anuvicaranto. Uddhaṃ me assamaddasāti attano vasanaṭṭhānato uparisote mama assamaṃ paṇṇasālaṃ addakkhi. Tattha maṃ paribhāsetvāti mama assamaṃ āgantvā jātiṃ sutvā tatova paṭikkamitvā savanūpacāre ṭhatvā ‘‘nassa, vasala caṇḍāla, kāḷakaṇṇi mā idha vasī’’tiādīni vatvā bhayena santajjetvā. Abhisapi muddhaphālananti ‘‘sace jīvitukāmosi, ettova sīghaṃ palāyassū’’ti vatvā ‘‘sace na pakkamissati, ito te sattame divase sattadhā muddhā phalatū’’ti me abhisapaṃ adāsi.
гим̣ бана д̇асса абхисабзна муд̣̇д̇хаа палад̇ийд̇и? на палад̇и, гухаго бана со, звамаяам̣ маран̣абхаяад̇аж̇ж̇ид̇о суд̣̇уурам̣ баггамиссад̇ийд̇и сан̃н̃ааяа санд̇аасанад̇т̇ам̣ д̇ат̇аа ааха.
Kiṃ pana tassa abhisapena muddhā phalatīti? Na phalati, kuhako pana so, evamayaṃ maraṇabhayatajjito sudūraṃ pakkamissatīti saññāya santāsanatthaṃ tathā āha.
63. яад̣̇ихам̣ д̇асса багуббзяяанд̇и д̇асса маанад̇т̇ад̣̇д̇хасса гуудаж̇адиласса ахам̣ яад̣̇и гуж̇жхзяяам̣. яад̣̇и сийлам̣ на г̇обаязд̇и сийлам̣ яад̣̇и на рагкзяяам̣, ид̣̇ам̣ сийлам̣ наама ж̇ийвид̇анирабзгкам̣ саммад̣̇зва рагкид̇аб̣б̣анд̇и яад̣̇и на жинд̇зяяанд̇и ад̇т̇о. ологзд̇ваанахам̣ д̇асса, гарзяяам̣ чааригам̣ вияаад̇и сажаахам̣ д̇ад̣̇аа д̇асса аббад̇ийд̇о абхависсам̣ . мама жид̇д̇аажаарам̣ н̃ад̇ваа маяи абхиббасаннаа д̣̇звад̇аа кан̣знзва д̇ам̣ бхасмамудтим̣ вияа вид̣̇д̇хам̣сзяяунд̇и ад̇хиббааяо. сад̇т̇аа бана д̇ад̣̇аа ад̇д̇ано аббад̇ийд̇абхаавз сад̇и д̣̇звад̇аахи саад̇хзд̇аб̣б̣ам̣ д̇асса анад̇т̇ам̣ ад̇д̇анаа гад̇д̇аб̣б̣ам̣ вияа гад̇ваа д̣̇зсзси ‘‘гарзяяам̣ чааригам̣ вияаа’’д̇и.
63.Yadihaṃ tassa pakuppeyyanti tassa mānatthaddhassa kūṭajaṭilassa ahaṃ yadi kujjheyyaṃ. Yadi sīlaṃ na gopayeti sīlaṃ yadi na rakkheyyaṃ, idaṃ sīlaṃ nāma jīvitanirapekkhaṃ sammadeva rakkhitabbanti yadi na cinteyyanti attho. Oloketvānahaṃ tassa, kareyyaṃ chārikaṃ viyāti sacāhaṃ tadā tassa appatīto abhavissaṃ . Mama cittācāraṃ ñatvā mayi abhippasannā devatā khaṇeneva taṃ bhasmamuṭṭhiṃ viya viddhaṃseyyunti adhippāyo. Satthā pana tadā attano appatītabhāve sati devatāhi sādhetabbaṃ tassa anatthaṃ attanā kattabbaṃ viya katvā desesi ‘‘kareyyaṃ chārikaṃ viyā’’ti.
вид̇ан̣д̣аваад̣̇ий банааха – ‘‘б̣од̇хисад̇д̇ова д̇ам̣ ж̇адилам̣ ижчамаано ид̣̇д̇хияаа чааригам̣ гарзяяа, зван̃хи сад̇и имиссаа баал̣ияаа ад̇т̇о уж̇угамзва нийд̇о ход̇ий’’д̇и. со звамасса важанийяо – ‘‘д̇вам̣ ид̣̇д̇хияаа баруубагхаад̇ам̣ вад̣̇аси, ид̣̇д̇хи наамзсаа ад̇хидтаанаа ид̣̇д̇хи, вигуб̣б̣анаа ид̣̇д̇хи, маномаяаа ид̣̇д̇хи, н̃аан̣авибпаараа ид̣̇д̇хи, самаад̇хивибпаараа ид̣̇д̇хи, арияаа ид̣̇д̇хи, гаммавибаагаж̇аа ид̣̇д̇хи, бун̃н̃авад̇о ид̣̇д̇хи, виж̇ж̇аамаяаа ид̣̇д̇хи, д̇ад̇т̇а д̇ад̇т̇а саммаабаяог̇аббажжаяаа иж̇жханадтзна ид̣̇д̇хийд̇и д̣̇асавид̇хаа. д̇ад̇т̇а ‘‘гад̇арам̣ ид̣̇д̇хим̣ вад̣̇зсий’’д̇и? ‘‘бхааванаамаяа’’нд̇и. ‘‘гим̣ бана бхааванаамаяааяа баруубагхаад̇агаммам̣ ход̇ий’’д̇и? аама, згажжз аажарияаа ‘‘згаваарам̣ ход̇ий’’д̇и вад̣̇анд̇и, яат̇аа хи барам̣ бахарид̇угаамзна уд̣̇агабхарид̇з гхадз кид̇д̇з бароби бахарийяад̇и, гхадоби бхиж̇ж̇ад̇и, звамзва бхааванаамаяааяа ид̣̇д̇хияаа згаваарам̣ баруубагхаад̇агаммам̣ ход̇и, д̇ад̇о бадтааяа бана саа нассад̇и.
Vitaṇḍavādī panāha – ‘‘bodhisattova taṃ jaṭilaṃ icchamāno iddhiyā chārikaṃ kareyya, evañhi sati imissā pāḷiyā attho ujukameva nīto hotī’’ti. So evamassa vacanīyo – ‘‘tvaṃ iddhiyā parūpaghātaṃ vadasi, iddhi nāmesā adhiṭṭhānā iddhi, vikubbanā iddhi, manomayā iddhi, ñāṇavipphārā iddhi, samādhivipphārā iddhi, ariyā iddhi, kammavipākajā iddhi, puññavato iddhi, vijjāmayā iddhi, tattha tattha sammāpayogappaccayā ijjhanaṭṭhena iddhīti dasavidhā. Tattha ‘‘kataraṃ iddhiṃ vadesī’’ti? ‘‘Bhāvanāmaya’’nti. ‘‘Kiṃ pana bhāvanāmayāya parūpaghātakammaṃ hotī’’ti? Āma, ekacce ācariyā ‘‘ekavāraṃ hotī’’ti vadanti, yathā hi paraṃ paharitukāmena udakabharite ghaṭe khitte paropi paharīyati, ghaṭopi bhijjati, evameva bhāvanāmayāya iddhiyā ekavāraṃ parūpaghātakammaṃ hoti, tato paṭṭhāya pana sā nassati.
ат̇а со ‘‘бхааванаамаяааяа ид̣̇д̇хияаа нзва згаваарам̣ на д̣̇взваарам̣ баруубагхаад̇агаммам̣ ход̇ий’’д̇и вад̇ваа бужчид̇аб̣б̣о ‘‘гим̣ бхааванаамаяаа ид̣̇д̇хи гусалаа агусалаа аб̣яаагад̇аа, сукааяа взд̣̇анааяа самбаяуд̇д̇аа д̣̇угкааяа взд̣̇анааяа самбаяуд̇д̇аа ад̣̇угкамасукааяа взд̣̇анааяа самбаяуд̇д̇аа, савид̇аггасавижаараа авид̇аггавижаарамад̇д̇аа авид̇аггаавижаараа, гаамааважараа руубааважараа аруубааважараа’’д̇и? ж̇аананд̇о ‘‘бхааванаамаяаа ид̣̇д̇хи гусалаа аб̣яаагад̇аа ваа ад̣̇угкамасукавзд̣̇анияаа авид̇аггаавижаараа руубааважараа жаа’’д̇и вагкад̇и. со вад̇д̇аб̣б̣о ‘‘баан̣аад̇ибаад̇ажзд̇анаа гусалаад̣̇ийсу гад̇арам̣ годтаасам̣ бхаж̇ад̇ий’’д̇и? ж̇аананд̇о вагкад̇и ‘‘баан̣аад̇ибаад̇ажзд̇анаа агусалаава д̣̇угкавзд̣̇анаава савид̇аггасавижаараава гаамааважарааваа’’д̇и. звам̣ санд̇з ‘‘д̇ава бан̃хо нзва гусалад̇д̇игзна самзд̇и, на взд̣̇анаад̇д̇игзна на вид̇аггад̇д̇игзна на бхууманд̇арзнаа’’д̇и баал̣ияаа вирод̇хам̣ д̣̇ассзд̇ваа сан̃н̃аабзд̇аб̣б̣о. яад̣̇и бана со ‘‘буна жабарам̣, бхигкавз, ид̇хзгажжо саман̣о ваа б̣раахман̣о ваа ид̣̇д̇химаа жзд̇овасиббад̇д̇о ан̃н̃иссаа гужчиг̇ад̇ам̣ г̇аб̣бхам̣ баабагзна манасаанубзгкид̇аа ход̇и ‘ахо вад̇а яам̣ д̇ам̣ гужчиг̇ад̇ам̣ г̇аб̣бхам̣ на сод̇т̇инаа абхинигкамзяяаа’д̇и. звамби, бхигкавз, гулумбасса убагхаад̇о ход̇ий’’д̇и сан̇г̇ийд̇им̣ анаарул̣хам̣ гулумбасуд̇д̇ам̣ уд̣̇аахарзяяа. д̇ассааби ‘‘д̇вам̣ ад̇т̇ам̣ на ж̇аанааси. ид̣̇д̇химаа жзд̇овасиббад̇д̇од̇и хи зд̇т̇а на бхааванаамаяаа ид̣̇д̇хи ад̇хиббзд̇аа, аат̇аб̣б̣анигаа ид̣̇д̇хи ад̇хиббзд̇аа. саа хи зд̇т̇а лаб̣бхамаанаа лаб̣бхад̇ийд̇и бхааванаамаяааяа ид̣̇д̇хияаа баруубагхаад̇о на самбхавад̇иязваа’’д̇и сан̃н̃аабзд̇аб̣б̣о. но жз сан̃н̃ад̇д̇им̣ убзд̇и, гаммам̣ гад̇ваа уяяож̇зд̇аб̣б̣о. д̇асмаа яат̇аавуд̇д̇анаязнзвзд̇т̇а г̇аат̇ааяа ад̇т̇о взд̣̇ид̇аб̣б̣о.
Atha so ‘‘bhāvanāmayāya iddhiyā neva ekavāraṃ na dvevāraṃ parūpaghātakammaṃ hotī’’ti vatvā pucchitabbo ‘‘kiṃ bhāvanāmayā iddhi kusalā akusalā abyākatā, sukhāya vedanāya sampayuttā dukkhāya vedanāya sampayuttā adukkhamasukhāya vedanāya sampayuttā, savitakkasavicārā avitakkavicāramattā avitakkaavicārā, kāmāvacarā rūpāvacarā arūpāvacarā’’ti? Jānanto ‘‘bhāvanāmayā iddhi kusalā abyākatā vā adukkhamasukhavedaniyā avitakkaavicārā rūpāvacarā cā’’ti vakkhati. So vattabbo ‘‘pāṇātipātacetanā kusalādīsu kataraṃ koṭṭhāsaṃ bhajatī’’ti? Jānanto vakkhati ‘‘pāṇātipātacetanā akusalāva dukkhavedanāva savitakkasavicārāva kāmāvacarāvā’’ti. Evaṃ sante ‘‘tava pañho neva kusalattikena sameti, na vedanāttikena na vitakkattikena na bhūmantarenā’’ti pāḷiyā virodhaṃ dassetvā saññāpetabbo. Yadi pana so ‘‘puna caparaṃ, bhikkhave, idhekacco samaṇo vā brāhmaṇo vā iddhimā cetovasippatto aññissā kucchigataṃ gabbhaṃ pāpakena manasānupekkhitā hoti ‘aho vata yaṃ taṃ kucchigataṃ gabbhaṃ na sotthinā abhinikkhameyyā’ti. Evampi, bhikkhave, kulumpassa upaghāto hotī’’ti saṅgītiṃ anāruḷhaṃ kulumpasuttaṃ udāhareyya. Tassāpi ‘‘tvaṃ atthaṃ na jānāsi. Iddhimā cetovasippattoti hi ettha na bhāvanāmayā iddhi adhippetā, āthabbanikā iddhi adhippetā. Sā hi ettha labbhamānā labbhatīti bhāvanāmayāya iddhiyā parūpaghāto na sambhavatiyevā’’ti saññāpetabbo. No ce saññattiṃ upeti, kammaṃ katvā uyyojetabbo. Tasmā yathāvuttanayenevettha gāthāya attho veditabbo.
д̇ат̇аа бана д̇зна абхисабид̇о махаасад̇д̇о ‘‘сажаахам̣ зд̇асса гуж̇жхиссаами, сийлам̣ мз арагкид̇ам̣ бхависсад̇и, убааязнзвасса маанам̣ бхинд̣̇иссаами, саа жасса рагкаа бхависсад̇ий’’д̇и сад̇д̇амз д̣̇ивасз суурияуг̇г̇аманам̣ ваарзси. мануссаа суурияасса ануг̇г̇аманзна уб̣б̣аал̣хаа ж̇аад̇иманд̇ад̇аабасам̣ убасан̇гамид̇ваа ‘‘бханд̇з, д̇умхз суурияасса уг̇г̇анд̇ум̣ на д̣̇зт̇аа’’д̇и бужчим̣су. со ‘‘на мзд̇ам̣ гаммам̣, г̇ан̇г̇аад̇ийрз бана зго жан̣д̣аалад̇аабасо васад̇и, д̇ассзд̇ам̣ гаммам̣ сияаа’’д̇и ааха . мануссаа махаасад̇д̇ам̣ убасан̇гамид̇ваа ‘‘бханд̇з, д̇умхз суурияасса уг̇г̇анд̇ум̣ на д̣̇зт̇аа’’д̇и бужчим̣су. ‘‘аамаавусо’’д̇и. ‘‘гим̣гааран̣аа’’д̇и? ‘‘д̇умхаагам̣ гулуубагад̇аабасо мам̣ нирабараад̇хам̣ абхисаби, д̇асмим̣ ааг̇анд̇ваа камаабанад̇т̇ам̣ мама баад̣̇зсу бад̇ид̇з суурияам̣ виссаж̇ж̇зссаамий’’д̇и. д̇з г̇анд̇ваа д̇ам̣ аагад̣дханд̇аа аанзд̇ваа махаасад̇д̇асса баад̣̇амуулз нибаж̇ж̇аабзд̇ваа камаабзд̇ваа ‘‘суурияам̣ виссаж̇ж̇зт̇а, бханд̇з’’д̇и аахам̣су. ‘‘на саггаа виссаж̇ж̇зд̇ум̣, сажаахам̣ виссаж̇ж̇зссаами, имасса сад̇д̇ад̇хаа муд̣̇д̇хаа палиссад̇ий’’д̇и. ‘‘ат̇а, бханд̇з, гим̣ гаромаа’’д̇и. махаасад̇д̇о ‘‘мад̇д̇игаабин̣д̣ам̣ аахарат̇аа’’д̇и аахараабзд̇ваа ‘‘имам̣ д̇аабасасса сийсз табзд̇ваа д̇аабасам̣ од̇аарзд̇ваа уд̣̇агз табзт̇а, яад̣̇аа суурияо д̣̇иссад̇и, д̇ад̣̇аа д̇аабасо уд̣̇агз нимуж̇ж̇ад̇уу’’д̇и вад̇ваа суурияам̣ виссаж̇ж̇зси. суурияарасмийхи пудтамад̇д̇зва мад̇д̇игаабин̣д̣о сад̇д̇ад̇хаа бхиж̇ж̇и. д̇аабасо уд̣̇агз нимуж̇ж̇и. д̇зна вуд̇д̇ам̣ –
Tathā pana tena abhisapito mahāsatto ‘‘sacāhaṃ etassa kujjhissāmi, sīlaṃ me arakkhitaṃ bhavissati, upāyenevassa mānaṃ bhindissāmi, sā cassa rakkhā bhavissatī’’ti sattame divase sūriyuggamanaṃ vāresi. Manussā sūriyassa anuggamanena ubbāḷhā jātimantatāpasaṃ upasaṅkamitvā ‘‘bhante, tumhe sūriyassa uggantuṃ na dethā’’ti pucchiṃsu. So ‘‘na metaṃ kammaṃ, gaṅgātīre pana eko caṇḍālatāpaso vasati, tassetaṃ kammaṃ siyā’’ti āha . Manussā mahāsattaṃ upasaṅkamitvā ‘‘bhante, tumhe sūriyassa uggantuṃ na dethā’’ti pucchiṃsu. ‘‘Āmāvuso’’ti. ‘‘Kiṃkāraṇā’’ti? ‘‘Tumhākaṃ kulūpakatāpaso maṃ niraparādhaṃ abhisapi, tasmiṃ āgantvā khamāpanatthaṃ mama pādesu patite sūriyaṃ vissajjessāmī’’ti. Te gantvā taṃ ākaḍḍhantā ānetvā mahāsattassa pādamūle nipajjāpetvā khamāpetvā ‘‘sūriyaṃ vissajjetha, bhante’’ti āhaṃsu. ‘‘Na sakkā vissajjetuṃ, sacāhaṃ vissajjessāmi, imassa sattadhā muddhā phalissatī’’ti. ‘‘Atha, bhante, kiṃ karomā’’ti. Mahāsatto ‘‘mattikāpiṇḍaṃ āharathā’’ti āharāpetvā ‘‘imaṃ tāpasassa sīse ṭhapetvā tāpasaṃ otāretvā udake ṭhapetha, yadā sūriyo dissati, tadā tāpaso udake nimujjatū’’ti vatvā sūriyaṃ vissajjesi. Sūriyarasmīhi phuṭṭhamatteva mattikāpiṇḍo sattadhā bhijji. Tāpaso udake nimujji. Tena vuttaṃ –
64.
64.
‘‘яам̣ со д̇ад̣̇аа мам̣ абхисаби, губид̇о д̣̇удтамаанасо;
‘‘Yaṃ so tadā maṃ abhisapi, kupito duṭṭhamānaso;
д̇ассзва мад̇т̇агз нибад̇и, яог̇зна д̇ам̣ баможаяи’’нд̇и.
Tasseva matthake nipati, yogena taṃ pamocayi’’nti.
д̇ад̇т̇а яам̣ со д̇ад̣̇аа мам̣ абхисабийд̇и со ж̇аад̇иманд̇аж̇адило яам̣ муд̣̇д̇хапааланам̣ санд̇хааяа д̇ад̣̇аа мам̣ абхисаби, маяхам̣ сабам̣ ад̣̇ааси. д̇ассзва мад̇т̇агз нибад̇ийд̇и д̇ам̣ маяхам̣ убари д̇зна ижчид̇ам̣ д̇ассзва бана убари нибад̇и нибад̇анабхаавзна адтааси. зван̃хзд̇ам̣ ход̇и яат̇аа д̇ам̣ аббад̣̇удтасса бад̣̇уссад̇о. вуд̇д̇ан̃хзд̇ам̣ бхаг̇авад̇аа – ‘‘яо аббад̣̇удтасса нарасса д̣̇уссад̇и…бз… бадиваад̇ам̣ва кид̇д̇о’’д̇и (д̇ха. ба. 125; су. ни. 667; ж̇аа. 1.5.94). яог̇зна д̇ам̣ баможаяинд̇и д̇ам̣ д̇асса бхаасид̇ам̣ мад̇т̇агапааланам̣ убааязна д̇ад̇о баможзсим̣, д̇ам̣ ваа ж̇адилам̣ д̇ад̇о баможзсим̣, язна убааязна д̇ам̣ на ход̇и, д̇ат̇аа агаасинд̇и ад̇т̇о.
Tattha yaṃ so tadā maṃ abhisapīti so jātimantajaṭilo yaṃ muddhaphālanaṃ sandhāya tadā maṃ abhisapi, mayhaṃ sapaṃ adāsi. Tasseva matthakenipatīti taṃ mayhaṃ upari tena icchitaṃ tasseva pana upari nipati nipatanabhāvena aṭṭhāsi. Evañhetaṃ hoti yathā taṃ appaduṭṭhassa padussato. Vuttañhetaṃ bhagavatā – ‘‘yo appaduṭṭhassa narassa dussati…pe… paṭivātaṃva khitto’’ti (dha. pa. 125; su. ni. 667; jā. 1.5.94). Yogena taṃ pamocayinti taṃ tassa bhāsitaṃ matthakaphālanaṃ upāyena tato pamocesiṃ, taṃ vā jaṭilaṃ tato pamocesiṃ, yena upāyena taṃ na hoti, tathā akāsinti attho.
яан̃хи д̇зна баарамид̇аабарибхааванасамид̣̇д̇хаахи наанаасамаабад̇д̇ивихаарабарибуурид̇аахи сийлад̣̇идтисамбад̣̇аахи сусан̇кад̇асанд̇аанз махаагарун̣аад̇хиваасз махаасад̇д̇з арияуубаваад̣̇агаммам̣ абхисабасан̇каад̇ам̣ парусаважанам̣ баяуд̇д̇ам̣, д̇ам̣ махаасад̇д̇асса кзд̇д̇ависзсабхаавад̇о д̇асса жа аж̇жхаасаяапарусад̇ааяа д̣̇идтад̇хаммавзд̣̇анийяам̣ худ̇ваа сажз со махаасад̇д̇ам̣ на камаабзси, сад̇д̇амз д̣̇ивасз вибажжанасабхаавам̣ ж̇аад̇ам̣, камаабид̇з бана махаасад̇д̇з баяог̇асамбад̇д̇ибадиб̣аахид̇ад̇д̇аа авибаагад̇хаммад̇ам̣ аабаж̇ж̇и ахосигаммабхаавад̇о. аяан̃хи арияуубаваад̣̇абаабасса д̣̇идтад̇хаммавзд̣̇анийяасса жа д̇хаммад̇аа. д̇ад̇т̇а яам̣ сад̇д̇амз д̣̇ивасз б̣од̇хисад̇д̇зна суурияуг̇г̇амананивааран̣ам̣ гад̇ам̣, аяамзд̇т̇а яог̇од̇и ад̇хиббзд̇о убааяо. д̇зна хи уб̣б̣аал̣хаа мануссаа б̣од̇хисад̇д̇асса санд̇игз д̇аабасам̣ аанзд̇ваа камаабзсум̣. соби жа махаасад̇д̇асса г̇ун̣з ж̇аанид̇ваа д̇асмим̣ жид̇д̇ам̣ басаад̣̇зсийд̇и взд̣̇ид̇аб̣б̣ам̣. яам̣ банасса мад̇т̇агз мад̇д̇игаабин̣д̣асса табанам̣, д̇асса жа сад̇д̇ад̇хаа пааланам̣ гад̇ам̣, д̇ам̣ мануссаанам̣ жид̇д̇аанурагкан̣ад̇т̇ам̣, ан̃н̃ат̇аа хи имз баб̣б̣аж̇ид̇ааби самаанаа жид̇д̇асса васз вад̇д̇анд̇и, на бана жид̇д̇ам̣ ад̇д̇ано васз вад̇д̇аабзнд̇ийд̇и махаасад̇д̇амби д̇зна сад̣̇исам̣ гад̇ваа г̇ан̣хзяяум̣. д̇ад̣̇асса нзсам̣ д̣̇ийгхарад̇д̇ам̣ ахид̇ааяа д̣̇угкааяаад̇и.
Yañhi tena pāramitāparibhāvanasamiddhāhi nānāsamāpattivihāraparipūritāhi sīladiṭṭhisampadāhi susaṅkhatasantāne mahākaruṇādhivāse mahāsatte ariyūpavādakammaṃ abhisapasaṅkhātaṃ pharusavacanaṃ payuttaṃ, taṃ mahāsattassa khettavisesabhāvato tassa ca ajjhāsayapharusatāya diṭṭhadhammavedanīyaṃ hutvā sace so mahāsattaṃ na khamāpesi, sattame divase vipaccanasabhāvaṃ jātaṃ, khamāpite pana mahāsatte payogasampattipaṭibāhitattā avipākadhammataṃ āpajji ahosikammabhāvato. Ayañhi ariyūpavādapāpassa diṭṭhadhammavedanīyassa ca dhammatā. Tattha yaṃ sattame divase bodhisattena sūriyuggamananivāraṇaṃ kataṃ, ayamettha yogoti adhippeto upāyo. Tena hi ubbāḷhā manussā bodhisattassa santike tāpasaṃ ānetvā khamāpesuṃ. Sopi ca mahāsattassa guṇe jānitvā tasmiṃ cittaṃ pasādesīti veditabbaṃ. Yaṃ panassa matthake mattikāpiṇḍassa ṭhapanaṃ, tassa ca sattadhā phālanaṃ kataṃ, taṃ manussānaṃ cittānurakkhaṇatthaṃ, aññathā hi ime pabbajitāpi samānā cittassa vase vattanti, na pana cittaṃ attano vase vattāpentīti mahāsattampi tena sadisaṃ katvā gaṇheyyuṃ. Tadassa nesaṃ dīgharattaṃ ahitāya dukkhāyāti.
65. ид̣̇аани яад̣̇ад̇т̇ам̣ д̇ад̣̇аа д̇асмим̣ д̇аабасз жид̇д̇ам̣ ад̣̇уусзд̇ваа субарисуд̣̇д̇хам̣ сийламзва рагкид̇ам̣, д̇ам̣ д̣̇ассзд̇ум̣ ‘‘анурагким̣ мама сийла’’нд̇и осаанаг̇аат̇амааха. д̇ам̣ хздтаа вуд̇д̇ад̇т̇амзва.
65. Idāni yadatthaṃ tadā tasmiṃ tāpase cittaṃ adūsetvā suparisuddhaṃ sīlameva rakkhitaṃ, taṃ dassetuṃ ‘‘anurakkhiṃ mama sīla’’nti osānagāthamāha. Taṃ heṭṭhā vuttatthameva.
д̇ад̣̇аа ман̣д̣аб̣яо уд̣̇зно, маад̇ан̇г̇о логанаат̇о.
Tadā maṇḍabyo udeno, mātaṅgo lokanātho.
ид̇хааби сзсабаарамияо нид̣̇д̇хаарзд̇аб̣б̣аа. д̇ат̇аа нихийнаж̇аад̇игасса сад̇о яат̇аад̇хиббааяам̣ д̣̇идтаман̇г̇алигааяа маананиг̇г̇ахо, баб̣б̣аж̇ид̇ваа ‘‘д̣̇идтаман̇г̇алигааяа авассаяо бхависсаамий’’д̇и уббаннажид̇д̇о аран̃н̃ам̣ г̇анд̇ваа баб̣б̣аж̇ид̇ваа сад̇д̇ад̣̇ивасаб̣бханд̇арзязва яат̇аад̇хиббааяам̣ жхаанаабхин̃н̃ааниб̣б̣ад̇д̇анам̣, д̇ад̇о ааг̇анд̇ваа д̣̇идтаман̇г̇алигааяа лаабхаг̇г̇аяасаг̇г̇аббад̇д̇ияаа убааяасамбаад̣̇анам̣, ман̣д̣аб̣яагумаарасса маананиг̇г̇ахо, ж̇аад̇иманд̇ад̇аабасасса маананиг̇г̇ахо, д̇асса жа аж̇аананд̇ассзва бхаавино ж̇ийвид̇анд̇арааяасса абанаяанам̣, махаабараад̇хассааби д̇асса агуж̇жхид̇ваа ад̇д̇ано сийлаанурагкан̣ам̣, ажчарияаб̣бхуд̇абаадихаарияагаран̣анд̇и звамаад̣̇аяо махаасад̇д̇асса г̇ун̣аанубхааваа вибхаавзд̇аб̣б̣аа.
Idhāpi sesapāramiyo niddhāretabbā. Tathā nihīnajātikassa sato yathādhippāyaṃ diṭṭhamaṅgalikāya mānaniggaho, pabbajitvā ‘‘diṭṭhamaṅgalikāya avassayo bhavissāmī’’ti uppannacitto araññaṃ gantvā pabbajitvā sattadivasabbhantareyeva yathādhippāyaṃ jhānābhiññānibbattanaṃ, tato āgantvā diṭṭhamaṅgalikāya lābhaggayasaggappattiyā upāyasampādanaṃ, maṇḍabyakumārassa mānaniggaho, jātimantatāpasassa mānaniggaho, tassa ca ajānantasseva bhāvino jīvitantarāyassa apanayanaṃ, mahāparādhassāpi tassa akujjhitvā attano sīlānurakkhaṇaṃ, acchariyabbhutapāṭihāriyakaraṇanti evamādayo mahāsattassa guṇānubhāvā vibhāvetabbā.
маад̇ан̇г̇ажарияааван̣н̣анаа нидтид̇аа.
Mātaṅgacariyāvaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / жарияаабидагабаал̣и • Cariyāpiṭakapāḷi / 7. маад̇ан̇г̇ажарияаа • 7. Mātaṅgacariyā
