| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
৫. মাতাপুত্তসুত্তং
5. Mātāputtasuttaṃ
৫৫. একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন সাৰত্থিযং উভো মাতাপুত্তা ৰস্সাৰাসং উপগমিংসু 1 – ভিক্খু চ ভিক্খুনী চ। তে অঞ্ঞমঞ্ঞস্স অভিণ্হং দস্সনকামা অহেসুং। মাতাপি পুত্তস্স অভিণ্হং দস্সনকামা অহোসি; পুত্তোপি মাতরং অভিণ্হং দস্সনকামো অহোসি। তেসং অভিণ্হং দস্সনা সংসগ্গো অহোসি। সংসগ্গে সতি ৰিস্সাসো অহোসি। ৰিস্সাসে সতি ওতারো অহোসি। তে ওতিণ্ণচিত্তা সিক্খং অপচ্চক্খায দুব্বল্যং অনাৰিকত্ৰা মেথুনং ধম্মং পটিসেৰিংসু।
55. Ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena sāvatthiyaṃ ubho mātāputtā vassāvāsaṃ upagamiṃsu 2 – bhikkhu ca bhikkhunī ca. Te aññamaññassa abhiṇhaṃ dassanakāmā ahesuṃ. Mātāpi puttassa abhiṇhaṃ dassanakāmā ahosi; puttopi mātaraṃ abhiṇhaṃ dassanakāmo ahosi. Tesaṃ abhiṇhaṃ dassanā saṃsaggo ahosi. Saṃsagge sati vissāso ahosi. Vissāse sati otāro ahosi. Te otiṇṇacittā sikkhaṃ apaccakkhāya dubbalyaṃ anāvikatvā methunaṃ dhammaṃ paṭiseviṃsu.
অথ খো সম্বহুলা ভিক্খূ যেন ভগৰা তেনুপসঙ্কমিংসু; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদিংসু। একমন্তং নিসিন্নো খো তে ভিক্খূ ভগৰন্তং এতদৰোচুং – ‘‘ইধ, ভন্তে, সাৰত্থিযং উভো মাতাপুত্তা ৰস্সাৰাসং উপগমিংসু – ভিক্খু চ ভিক্খুনী চ, তে অঞ্ঞমঞ্ঞস্স অভিণ্হং দস্সনকামা অহেসুং, মাতাপি পুত্তস্স অভিণ্হং দস্সনকামা অহোসি, পুত্তোপি মাতরং অভিণ্হং দস্সনকামো অহোসি। তেসং অভিণ্হং দস্সনা সংসগ্গো অহোসি, সংসগ্গে সতি ৰিস্সাসো অহোসি, ৰিস্সাসে সতি ওতারো অহোসি, তে ওতিণ্ণচিত্তা সিক্খং অপচ্চক্খায দুব্বল্যং অনাৰিকত্ৰা মেথুনং ধম্মং পটিসেৰিংসূ’’তি।
Atha kho sambahulā bhikkhū yena bhagavā tenupasaṅkamiṃsu; upasaṅkamitvā bhagavantaṃ abhivādetvā ekamantaṃ nisīdiṃsu. Ekamantaṃ nisinno kho te bhikkhū bhagavantaṃ etadavocuṃ – ‘‘idha, bhante, sāvatthiyaṃ ubho mātāputtā vassāvāsaṃ upagamiṃsu – bhikkhu ca bhikkhunī ca, te aññamaññassa abhiṇhaṃ dassanakāmā ahesuṃ, mātāpi puttassa abhiṇhaṃ dassanakāmā ahosi, puttopi mātaraṃ abhiṇhaṃ dassanakāmo ahosi. Tesaṃ abhiṇhaṃ dassanā saṃsaggo ahosi, saṃsagge sati vissāso ahosi, vissāse sati otāro ahosi, te otiṇṇacittā sikkhaṃ apaccakkhāya dubbalyaṃ anāvikatvā methunaṃ dhammaṃ paṭiseviṃsū’’ti.
‘‘কিং নু সো, ভিক্খৰে, মোঘপুরিসো মঞ্ঞতি – ‘ন মাতা পুত্তে সারজ্জতি, পুত্তো ৰা পন মাতরী’তি? নাহং, ভিক্খৰে, অঞ্ঞং একরূপম্পি সমনুপস্সামি এৰং 3 রজনীযং এৰং কমনীযং এৰং মদনীযং এৰং বন্ধনীযং এৰং মুচ্ছনীযং এৰং অন্তরাযকরং অনুত্তরস্স যোগক্খেমস্স অধিগমায যথযিদং, ভিক্খৰে, ইত্থিরূপং। ইত্থিরূপে, ভিক্খৰে, সত্তা রত্তা গিদ্ধা গথিতা 4 মুচ্ছিতা অজ্ঝোসন্না 5। তে দীঘরত্তং সোচন্তি ইত্থিরূপৰসানুগা।
‘‘Kiṃ nu so, bhikkhave, moghapuriso maññati – ‘na mātā putte sārajjati, putto vā pana mātarī’ti? Nāhaṃ, bhikkhave, aññaṃ ekarūpampi samanupassāmi evaṃ 6 rajanīyaṃ evaṃ kamanīyaṃ evaṃ madanīyaṃ evaṃ bandhanīyaṃ evaṃ mucchanīyaṃ evaṃ antarāyakaraṃ anuttarassa yogakkhemassa adhigamāya yathayidaṃ, bhikkhave, itthirūpaṃ. Itthirūpe, bhikkhave, sattā rattā giddhā gathitā 7 mucchitā ajjhosannā 8. Te dīgharattaṃ socanti itthirūpavasānugā.
‘‘নাহং, ভিক্খৰে, অঞ্ঞং একসদ্দম্পি…পে॰… একগন্ধম্পি… একরসম্পি… একফোট্ঠব্বম্পি সমনুপস্সামি এৰং রজনীযং এৰং কমনীযং এৰং মদনীযং এৰং বন্ধনীযং এৰং মুচ্ছনীযং এৰং অন্তরাযকরং অনুত্তরস্স যোগক্খেমস্স অধিগমায যথযিদং, ভিক্খৰে, ইত্থিফোট্ঠব্বং । ইত্থিফোট্ঠব্বে, ভিক্খৰে, সত্তা রত্তা গিদ্ধা গথিতা মুচ্ছিতা অজ্ঝোসন্না। তে দীঘরত্তং সোচন্তি ইত্থিফোট্ঠব্বৰসানুগা।
‘‘Nāhaṃ, bhikkhave, aññaṃ ekasaddampi…pe… ekagandhampi… ekarasampi… ekaphoṭṭhabbampi samanupassāmi evaṃ rajanīyaṃ evaṃ kamanīyaṃ evaṃ madanīyaṃ evaṃ bandhanīyaṃ evaṃ mucchanīyaṃ evaṃ antarāyakaraṃ anuttarassa yogakkhemassa adhigamāya yathayidaṃ, bhikkhave, itthiphoṭṭhabbaṃ . Itthiphoṭṭhabbe, bhikkhave, sattā rattā giddhā gathitā mucchitā ajjhosannā. Te dīgharattaṃ socanti itthiphoṭṭhabbavasānugā.
‘‘ইত্থী, ভিক্খৰে, গচ্ছন্তীপি পুরিসস্স চিত্তং পরিযাদায তিট্ঠতি; ঠিতাপি…পে॰… নিসিন্নাপি… সযানাপি… হসন্তীপি… ভণন্তীপি… গাযন্তীপি… রোদন্তীপি… উগ্ঘাতিতাপি 9 … মতাপি পুরিসস্স চিত্তং পরিযাদায তিট্ঠতি। যঞ্হি তং, ভিক্খৰে, সম্মা ৰদমানো ৰদেয্য – ‘সমন্তপাসো মারস্সা’তি মাতুগামংযেৰ সম্মা ৰদমানো ৰদেয্য – ‘সমন্তপাসো মারস্সা’’’তি।
‘‘Itthī, bhikkhave, gacchantīpi purisassa cittaṃ pariyādāya tiṭṭhati; ṭhitāpi…pe… nisinnāpi… sayānāpi… hasantīpi… bhaṇantīpi… gāyantīpi… rodantīpi… ugghātitāpi 10 … matāpi purisassa cittaṃ pariyādāya tiṭṭhati. Yañhi taṃ, bhikkhave, sammā vadamāno vadeyya – ‘samantapāso mārassā’ti mātugāmaṃyeva sammā vadamāno vadeyya – ‘samantapāso mārassā’’’ti.
‘‘সল্লপে অসিহত্থেন, পিসাচেনাপি সল্লপে।
‘‘Sallape asihatthena, pisācenāpi sallape;
‘‘নত্ৰেৰ একো একায, মাতুগামেন সল্লপে।
‘‘Natveva eko ekāya, mātugāmena sallape;
‘‘অথোপি দুন্নিৰত্থেন, মঞ্জুনা ভণিতেন চ।
‘‘Athopi dunnivatthena, mañjunā bhaṇitena ca;
নেসো জনো স্ৰাসীসদো, অপি উগ্ঘাতিতো মতো॥
Neso jano svāsīsado, api ugghātito mato.
‘‘পঞ্চ কামগুণা এতে, ইত্থিরূপস্মিং দিস্সরে।
‘‘Pañca kāmaguṇā ete, itthirūpasmiṃ dissare;
রূপা সদ্দা রসা গন্ধা, ফোট্ঠব্বা চ মনোরমা॥
Rūpā saddā rasā gandhā, phoṭṭhabbā ca manoramā.
‘‘তেসং কামোঘৰূল়্হানং, কামে অপরিজানতং।
‘‘Tesaṃ kāmoghavūḷhānaṃ, kāme aparijānataṃ;
‘‘যে চ কামে পরিঞ্ঞায, চরন্তি অকুতোভযা।
‘‘Ye ca kāme pariññāya, caranti akutobhayā;
তে ৰে পারঙ্গতা লোকে, যে পত্তা আসৰক্খয’’ন্তি॥ পঞ্চমং।
Te ve pāraṅgatā loke, ye pattā āsavakkhaya’’nti. pañcamaṃ;
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৫. মাতাপুত্তসুত্তৰণ্ণনা • 5. Mātāputtasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ৫. মাতাপুত্তসুত্তৰণ্ণনা • 5. Mātāputtasuttavaṇṇanā
