| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
၅. မာတာပုတ္တသုတ္တဝဏ္ဏနာ
5. Mātāputtasuttavaṇṇanā
၅၅. ပဉ္စမေ ပရိယာဒာယ တိဋ္ဌတီတိ ပရိယာဒိယိတ္ဝာ ဂဟေတ္ဝာ ခေပေတ္ဝာ တိဋ္ဌတိ။ ဥဂ္ဃာတိတာတိ ဥဒ္ဓုမာတာ။
55. Pañcame pariyādāya tiṭṭhatīti pariyādiyitvā gahetvā khepetvā tiṭṭhati. Ugghātitāti uddhumātā.
အသိဟတ္ထေနာတိ သီသစ္ဆေဒနတ္ထာယ အသိံ အာဒာယ အာဂတေနာပိ။ ပိသာစေနာတိ ခာဒိတုံ အာဂတယက္ခေနာပိ။ အာသီဒေတိ ဃဋ္ဋေယ္ယ။ မဉ္ဇုနာတိ မုဒုကေန။ ကာမောဃဝုဠ္ဟာနန္တိ ကာမောဃေန ဝုဠ္ဟာနံ ကဍ္ဎိတာနံ။ ကာလံ ဂတိ ဘဝာဘဝန္တိ ဝဋ္ဋကာလံ ဂတိဉ္စ ပုနပ္ပုနဗ္ဘဝေ စ။ ပုရက္ခတာတိ ပုရေစာရိကာ ပုရတော ဂတာယေဝ။ ယေ စ ကာမေ ပရိညာယာတိ ယေ ပဏ္ဍိတာ ဒုဝိဓေပိ ကာမေ တီဟိ ပရိညာဟိ ပရိဇာနိတ္ဝာ။ စရန္တိ အကုတောဘယာတိ ခီဏာသဝာနံ ကုတောစိ ဘယံ နာမ နတ္ထိ, တသ္မာ တေ အကုတောဘယာ ဟုတ္ဝာ စရန္တိ။ ပာရင္ဂတာတိ ပာရံ ဝုစ္စတိ နိဗ္ဗာနံ, တံ ဥပဂတာ, သစ္ဆိကတ္ဝာ ဌိတာတိ အတ္ထော။ အာသဝက္ခယန္တိ အရဟတ္တံ။ ဣမသ္မိံ သုတ္တေ ဝဋ္ဋမေဝ ကထေတ္ဝာ ဂာထာသု ဝဋ္ဋဝိဝဋ္ဋံ ကထိတံ။
Asihatthenāti sīsacchedanatthāya asiṃ ādāya āgatenāpi. Pisācenāti khādituṃ āgatayakkhenāpi. Āsīdeti ghaṭṭeyya. Mañjunāti mudukena. Kāmoghavuḷhānanti kāmoghena vuḷhānaṃ kaḍḍhitānaṃ. Kālaṃgati bhavābhavanti vaṭṭakālaṃ gatiñca punappunabbhave ca. Purakkhatāti purecārikā purato gatāyeva. Ye ca kāme pariññāyāti ye paṇḍitā duvidhepi kāme tīhi pariññāhi parijānitvā. Caranti akutobhayāti khīṇāsavānaṃ kutoci bhayaṃ nāma natthi, tasmā te akutobhayā hutvā caranti. Pāraṅgatāti pāraṃ vuccati nibbānaṃ, taṃ upagatā, sacchikatvā ṭhitāti attho. Āsavakkhayanti arahattaṃ. Imasmiṃ sutte vaṭṭameva kathetvā gāthāsu vaṭṭavivaṭṭaṃ kathitaṃ.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၅. မာတာပုတ္တသုတ္တံ • 5. Mātāputtasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၅. မာတာပုတ္တသုတ္တဝဏ္ဏနာ • 5. Mātāputtasuttavaṇṇanā
