| Library / Tipiṭaka / திபிடக • Tipiṭaka / மஹாவக்³க³பாளி • Mahāvaggapāḷi |
225. மதஸந்தககதா²
225. Matasantakakathā
367. தேன கோ² பன ஸமயேன த்³வே பி⁴க்கூ² கோஸலேஸு ஜனபதே³ அத்³தா⁴னமக்³க³ப்படிபன்னா ஹொந்தி. தே அஞ்ஞதரங் ஆவாஸங் உபக³ச்சி²ங்ஸு. தத்த² அஞ்ஞதரோ பி⁴க்கு² கி³லானோ ஹோதி. அத² கோ² தேஸங் பி⁴க்கூ²னங் ஏதத³ஹோஸி – ‘‘ப⁴க³வதா கோ², ஆவுஸோ, கி³லானுபட்டா²னங் வண்ணிதங். ஹந்த³, மயங், ஆவுஸோ, இமங் பி⁴க்கு²ங் உபட்ட²ஹேமா’’தி. தே தங் உபட்ட²ஹிங்ஸு. ஸோ தேஹி உபட்ட²ஹியமானோ காலமகாஸி. அத² கோ² தே பி⁴க்கூ² தஸ்ஸ பி⁴க்கு²னோ பத்தசீவரமாதா³ய ஸாவத்தி²ங் க³ந்த்வா ப⁴க³வதோ ஏதமத்த²ங் ஆரோசேஸுங். ‘‘பி⁴க்கு²ஸ்ஸ, பி⁴க்க²வே, காலங்கதே ஸங்கோ⁴ ஸாமீ பத்தசீவரே, அபிச கி³லானுபட்டா²கா ப³ஹூபகாரா. அனுஜானாமி, பி⁴க்க²வே, ஸங்கே⁴ன திசீவரஞ்ச பத்தஞ்ச கி³லானுபட்டா²கானங் தா³துங். ஏவஞ்ச பன, பி⁴க்க²வே, தா³தப்³ப³ங். தேன கி³லானுபட்டா²கேன பி⁴க்கு²னா ஸங்க⁴ங் உபஸங்கமித்வா ஏவமஸ்ஸ வசனீயோ – ‘இத்த²ன்னாமோ, ப⁴ந்தே, பி⁴க்கு² காலங்கதோ. இத³ங் தஸ்ஸ திசீவரஞ்ச பத்தோ சா’’’தி. ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –
367. Tena kho pana samayena dve bhikkhū kosalesu janapade addhānamaggappaṭipannā honti. Te aññataraṃ āvāsaṃ upagacchiṃsu. Tattha aññataro bhikkhu gilāno hoti. Atha kho tesaṃ bhikkhūnaṃ etadahosi – ‘‘bhagavatā kho, āvuso, gilānupaṭṭhānaṃ vaṇṇitaṃ. Handa, mayaṃ, āvuso, imaṃ bhikkhuṃ upaṭṭhahemā’’ti. Te taṃ upaṭṭhahiṃsu. So tehi upaṭṭhahiyamāno kālamakāsi. Atha kho te bhikkhū tassa bhikkhuno pattacīvaramādāya sāvatthiṃ gantvā bhagavato etamatthaṃ ārocesuṃ. ‘‘Bhikkhussa, bhikkhave, kālaṅkate saṅgho sāmī pattacīvare, apica gilānupaṭṭhākā bahūpakārā. Anujānāmi, bhikkhave, saṅghena ticīvarañca pattañca gilānupaṭṭhākānaṃ dātuṃ. Evañca pana, bhikkhave, dātabbaṃ. Tena gilānupaṭṭhākena bhikkhunā saṅghaṃ upasaṅkamitvā evamassa vacanīyo – ‘itthannāmo, bhante, bhikkhu kālaṅkato. Idaṃ tassa ticīvarañca patto cā’’’ti. Byattena bhikkhunā paṭibalena saṅgho ñāpetabbo –
‘‘ஸுணாது மே, ப⁴ந்தே, ஸங்கோ⁴. இத்த²ன்னாமோ பி⁴க்கு² காலங்கதோ. இத³ங் தஸ்ஸ திசீவரஞ்ச பத்தோ ச. யதி³ ஸங்க⁴ஸ்ஸ பத்தகல்லங், ஸங்கோ⁴ இமங் திசீவரஞ்ச பத்தஞ்ச கி³லானுபட்டா²கானங் த³தெ³ய்ய. ஏஸா ஞத்தி.
‘‘Suṇātu me, bhante, saṅgho. Itthannāmo bhikkhu kālaṅkato. Idaṃ tassa ticīvarañca patto ca. Yadi saṅghassa pattakallaṃ, saṅgho imaṃ ticīvarañca pattañca gilānupaṭṭhākānaṃ dadeyya. Esā ñatti.
‘‘ஸுணாது மே, ப⁴ந்தே, ஸங்கோ⁴. இத்த²ன்னாமோ பி⁴க்கு² காலங்கதோ. இத³ங் தஸ்ஸ திசீவரஞ்ச பத்தோ ச. ஸங்கோ⁴ இமங் திசீவரஞ்ச பத்தஞ்ச கி³லானுபட்டா²கானங் தே³தி. யஸ்ஸாயஸ்மதோ க²மதி இமஸ்ஸ திசீவரஸ்ஸ ச பத்தஸ்ஸ ச கி³லானுபட்டா²கானங் தா³னங், ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸெய்ய.
‘‘Suṇātu me, bhante, saṅgho. Itthannāmo bhikkhu kālaṅkato. Idaṃ tassa ticīvarañca patto ca. Saṅgho imaṃ ticīvarañca pattañca gilānupaṭṭhākānaṃ deti. Yassāyasmato khamati imassa ticīvarassa ca pattassa ca gilānupaṭṭhākānaṃ dānaṃ, so tuṇhassa; yassa nakkhamati, so bhāseyya.
‘‘தி³ன்னங் இத³ங் ஸங்கே⁴ன திசீவரஞ்ச பத்தோ ச கி³லானுபட்டா²கானங். க²மதி ஸங்க⁴ஸ்ஸ, தஸ்மா துண்ஹீ, ஏவமேதங் தா⁴ரயாமீ’’தி .
‘‘Dinnaṃ idaṃ saṅghena ticīvarañca patto ca gilānupaṭṭhākānaṃ. Khamati saṅghassa, tasmā tuṇhī, evametaṃ dhārayāmī’’ti .
368. தேன கோ² பன ஸமயேன அஞ்ஞதரோ ஸாமணேரோ காலங்கதோ ஹோதி. ப⁴க³வதோ ஏதமத்த²ங் ஆரோசேஸுங். ஸாமணேரஸ்ஸ, பி⁴க்க²வே, காலங்கதே ஸங்கோ⁴ ஸாமீ பத்தசீவரே, அபி ச கி³லானுபட்டா²கா ப³ஹூபகாரா. அனுஜானாமி, பி⁴க்க²வே, ஸங்கே⁴ன சீவரஞ்ச பத்தஞ்ச கி³லானுபட்டா²கானங் தா³துங். ஏவஞ்ச பன, பி⁴க்க²வே, தா³தப்³ப³ங். தேன கி³லானுபட்டா²கேன பி⁴க்கு²னா ஸங்க⁴ங் உபஸங்கமித்வா ஏவமஸ்ஸ வசனீயோ – ‘‘இத்த²ன்னாமோ, ப⁴ந்தே, ஸாமணேரோ காலங்கதோ, இத³ங் தஸ்ஸ சீவரஞ்ச பத்தோ சா’’தி. ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –
368. Tena kho pana samayena aññataro sāmaṇero kālaṅkato hoti. Bhagavato etamatthaṃ ārocesuṃ. Sāmaṇerassa, bhikkhave, kālaṅkate saṅgho sāmī pattacīvare, api ca gilānupaṭṭhākā bahūpakārā. Anujānāmi, bhikkhave, saṅghena cīvarañca pattañca gilānupaṭṭhākānaṃ dātuṃ. Evañca pana, bhikkhave, dātabbaṃ. Tena gilānupaṭṭhākena bhikkhunā saṅghaṃ upasaṅkamitvā evamassa vacanīyo – ‘‘itthannāmo, bhante, sāmaṇero kālaṅkato, idaṃ tassa cīvarañca patto cā’’ti. Byattena bhikkhunā paṭibalena saṅgho ñāpetabbo –
‘‘ஸுணாது மே, ப⁴ந்தே, ஸங்கோ⁴. இத்த²ன்னாமோ ஸாமணேரோ காலங்கதோ. இத³ங் தஸ்ஸ சீவரஞ்ச பத்தோ ச. யதி³ ஸங்க⁴ஸ்ஸ பத்தகல்லங், ஸங்கோ⁴ இமங் சீவரஞ்ச பத்தஞ்ச கி³லானுபட்டா²கானங் த³தெ³ய்ய. ஏஸா ஞத்தி.
‘‘Suṇātu me, bhante, saṅgho. Itthannāmo sāmaṇero kālaṅkato. Idaṃ tassa cīvarañca patto ca. Yadi saṅghassa pattakallaṃ, saṅgho imaṃ cīvarañca pattañca gilānupaṭṭhākānaṃ dadeyya. Esā ñatti.
‘‘ஸுணாது மே, ப⁴ந்தே, ஸங்கோ⁴. இத்த²ன்னாமோ ஸாமணேரோ காலங்கதோ. இத³ங் தஸ்ஸ சீவரஞ்ச பத்தோ ச. ஸங்கோ⁴ இமங் சீவரஞ்ச பத்தஞ்ச கி³லானுபட்டா²கானங் தே³தி. யஸ்ஸாயஸ்மதோ க²மதி இமஸ்ஸ சீவரஸ்ஸ ச பத்தஸ்ஸ ச கி³லானுபட்டா²கானங் தா³னங், ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸெய்ய.
‘‘Suṇātu me, bhante, saṅgho. Itthannāmo sāmaṇero kālaṅkato. Idaṃ tassa cīvarañca patto ca. Saṅgho imaṃ cīvarañca pattañca gilānupaṭṭhākānaṃ deti. Yassāyasmato khamati imassa cīvarassa ca pattassa ca gilānupaṭṭhākānaṃ dānaṃ, so tuṇhassa; yassa nakkhamati, so bhāseyya.
‘‘தி³ன்னங் இத³ங் ஸங்கே⁴ன சீவரஞ்ச பத்தோ ச கி³லானுபட்டா²கானங். க²மதி ஸங்க⁴ஸ்ஸ, தஸ்மா துண்ஹீ, ஏவமேதங் தா⁴ரயாமீ’’தி.
‘‘Dinnaṃ idaṃ saṅghena cīvarañca patto ca gilānupaṭṭhākānaṃ. Khamati saṅghassa, tasmā tuṇhī, evametaṃ dhārayāmī’’ti.
369. தேன கோ² பன ஸமயேன அஞ்ஞதரோ பி⁴க்கு² ச ஸாமணேரோ ச கி³லானங் உபட்ட²ஹிங்ஸு. ஸோ தேஹி உபட்ட²ஹியமானோ காலமகாஸி. அத² கோ² தஸ்ஸ கி³லானுபட்டா²கஸ்ஸ பி⁴க்கு²னோ ஏதத³ஹோஸி – ‘‘கத²ங் நு கோ² கி³லானுபட்டா²கஸ்ஸ ஸாமணேரஸ்ஸ சீவரபடிவீஸோ தா³தப்³போ³’’தி ? ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, கி³லானுபட்டா²கஸ்ஸ ஸாமணேரஸ்ஸ ஸமகங் படிவீஸங் தா³துந்தி.
369. Tena kho pana samayena aññataro bhikkhu ca sāmaṇero ca gilānaṃ upaṭṭhahiṃsu. So tehi upaṭṭhahiyamāno kālamakāsi. Atha kho tassa gilānupaṭṭhākassa bhikkhuno etadahosi – ‘‘kathaṃ nu kho gilānupaṭṭhākassa sāmaṇerassa cīvarapaṭivīso dātabbo’’ti ? Bhagavato etamatthaṃ ārocesuṃ. Anujānāmi, bhikkhave, gilānupaṭṭhākassa sāmaṇerassa samakaṃ paṭivīsaṃ dātunti.
தேன கோ² பன ஸமயேன அஞ்ஞதரோ பி⁴க்கு² ப³ஹுப⁴ண்டோ³ ப³ஹுபரிக்கா²ரோ காலங்கதோ ஹோதி. ப⁴க³வதோ ஏதமத்த²ங் ஆரோசேஸுங். பி⁴க்கு²ஸ்ஸ, பி⁴க்க²வே, காலங்கதே ஸங்கோ⁴ ஸாமீ பத்தசீவரே, அபி ச கி³லானுபட்டா²கா ப³ஹூபகாரா. அனுஜானாமி, பி⁴க்க²வே, ஸங்கே⁴ன திசீவரஞ்ச பத்தஞ்ச கி³லானுபட்டா²கானங் தா³துங். யங் தத்த² லஹுப⁴ண்ட³ங் லஹுபரிக்கா²ரங் தங் ஸம்முகீ²பூ⁴தேன ஸங்கே⁴ன பா⁴ஜேதுங். யங் தத்த² க³ருப⁴ண்ட³ங் க³ருபரிக்கா²ரங் தங் ஆக³தானாக³தஸ்ஸ சாதுத்³தி³ஸஸ்ஸ ஸங்க⁴ஸ்ஸ அவிஸ்ஸஜ்ஜிகங் அவேப⁴ங்கி³கந்தி.
Tena kho pana samayena aññataro bhikkhu bahubhaṇḍo bahuparikkhāro kālaṅkato hoti. Bhagavato etamatthaṃ ārocesuṃ. Bhikkhussa, bhikkhave, kālaṅkate saṅgho sāmī pattacīvare, api ca gilānupaṭṭhākā bahūpakārā. Anujānāmi, bhikkhave, saṅghena ticīvarañca pattañca gilānupaṭṭhākānaṃ dātuṃ. Yaṃ tattha lahubhaṇḍaṃ lahuparikkhāraṃ taṃ sammukhībhūtena saṅghena bhājetuṃ. Yaṃ tattha garubhaṇḍaṃ garuparikkhāraṃ taṃ āgatānāgatassa cātuddisassa saṅghassa avissajjikaṃ avebhaṅgikanti.
மதஸந்தககதா² நிட்டி²தா.
Matasantakakathā niṭṭhitā.
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / மதஸந்தககதா² • Matasantakakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / மதஸந்தககதா²வண்ணனா • Matasantakakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / மதஸந்தககதா²வண்ணனா • Matasantakakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / மதஸந்தககதா²தி³வண்ணனா • Matasantakakathādivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 225. மதஸந்தககதா² • 225. Matasantakakathā
