| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
225. மதஸந்தககதா²
225. Matasantakakathā
367. காலங்கதேதி எத்த² கரணங் கதந்தி த³ஸ்ஸெந்தோ ஆஹ ‘‘காலகிரியாயா’’தி. அபலோகெத்வாதி ‘‘இத்த²ன்னாமோ ப⁴ந்தே பி⁴க்கு² காலங்கதோ, தஸ்ஸ திசீவரஞ்ச பத்தஞ்ச கி³லானுபட்டா²கானங் தா³துங் ஸங்க⁴ங் அபலோகேமீ’’தி அபலோகெத்வா.
367.Kālaṅkateti ettha karaṇaṃ katanti dassento āha ‘‘kālakiriyāyā’’ti. Apaloketvāti ‘‘itthannāmo bhante bhikkhu kālaṅkato, tassa ticīvarañca pattañca gilānupaṭṭhākānaṃ dātuṃ saṅghaṃ apalokemī’’ti apaloketvā.
369. கி³லானுபட்டா²கலாபே⁴தி கி³லானுபட்டா²கானங் லபி⁴தப்³பே³.
369.Gilānupaṭṭhākalābheti gilānupaṭṭhākānaṃ labhitabbe.
ஸப்³பே³பி பி⁴க்கூ²தி ஸம்ப³ந்தோ⁴. தத்தா²தி தஸ்மிங் காலங்கதே. கிங் வத³ந்தி? ‘‘ஸப்³பே³பி…பே॰… ஸாமினோ’’தி வத³ந்தீதி யோஜனா. த்³வீஸு வாதே³ஸு பச்சி²மவாதோ³ அட்ட²கதா²சரியேன ருச்சதீதி வத³ந்தி. யந்தி யங் வத்து². ‘‘யங் அத்தி², தங் தா³தப்³ப³’’ந்தி வுத்தமேவத்த²ங் ஆவிகரொந்தோ ஆஹ ‘‘அஞ்ஞஸ்மிங்…பே॰… தா³தப்³ப³’’ந்தி. தந்தி பரிக்கா²ரங்.
Sabbepi bhikkhūti sambandho. Tatthāti tasmiṃ kālaṅkate. Kiṃ vadanti? ‘‘Sabbepi…pe… sāmino’’ti vadantīti yojanā. Dvīsu vādesu pacchimavādo aṭṭhakathācariyena ruccatīti vadanti. Yanti yaṃ vatthu. ‘‘Yaṃ atthi, taṃ dātabba’’nti vuttamevatthaṃ āvikaronto āha ‘‘aññasmiṃ…pe… dātabba’’nti. Tanti parikkhāraṃ.
ஸமகோதி ஸமங் பமாணமேதஸ்ஸ பா⁴க³ஸ்ஸாதி ஸமகோ. ஸங்வித³ஹனமத்தமேவாதி இத³ஞ்சித³ஞ்ச கரோஹீதி ஸஜ்ஜனமத்தமேவ. ஜெட்ட²கபா⁴கோ³தி தி³கு³ணபா⁴கோ³.
Samakoti samaṃ pamāṇametassa bhāgassāti samako. Saṃvidahanamattamevāti idañcidañca karohīti sajjanamattameva. Jeṭṭhakabhāgoti diguṇabhāgo.
யோ பனாதி பி⁴க்கு² பன. எத்தா²தி ப³ஹூஸு பி⁴க்கூ²ஸு. யேனாதி யேன கேனசி, தி³ன்னங் படியாதி³தந்தி ஸம்ப³ந்தோ⁴. ஏகதி³வஸம்பீதி பிஸத்³தோ³ பகே³வ த்³வீஹாதி³கேதி த³ஸ்ஸேதி. ஸோபீதி பிஸத்³தோ³ ந கேவலங் ப³ஹுதி³வஸங் உபட்டா²கோயேவ, அத² கோ² ஸோபீதி த³ஸ்ஸேதி. ஸமீபந்தி கி³லானஸ்ஸ ஸந்திகங். ஆக³ச்ச²தீதி ஸமீபமாக³ச்ச²தி.
Yo panāti bhikkhu pana. Etthāti bahūsu bhikkhūsu. Yenāti yena kenaci, dinnaṃ paṭiyāditanti sambandho. Ekadivasampīti pisaddo pageva dvīhādiketi dasseti. Sopīti pisaddo na kevalaṃ bahudivasaṃ upaṭṭhākoyeva, atha kho sopīti dasseti. Samīpanti gilānassa santikaṃ. Āgacchatīti samīpamāgacchati.
பச்சாஸீஸாயாதி பா⁴க³ஸ்ஸ பச்சாஸீஸாய. ‘‘புன ஆக³ந்த்வா ஜக்³கி³ஸ்ஸாமீ’’தி இமினா ‘‘புன ஆக³ந்த்வா ந ஜக்³கி³ஸ்ஸாமீ’’தி க³ச்ச²ந்தஸ்ஸ ந தா³தப்³ப³ந்தி த³ஸ்ஸேதி. து⁴ரங் நிக்கி²பித்வாதி உபட்ட²ஹனே து⁴ரங் நிக்கி²பித்வா.
Paccāsīsāyāti bhāgassa paccāsīsāya. ‘‘Puna āgantvā jaggissāmī’’ti iminā ‘‘puna āgantvā na jaggissāmī’’ti gacchantassa na dātabbanti dasseti. Dhuraṃ nikkhipitvāti upaṭṭhahane dhuraṃ nikkhipitvā.
மாதுகா³மோபி ஹோதூதி யோஜனா. தஸ்ஸ பி⁴க்கு²னோதி காலங்கதஸ்ஸ தஸ்ஸ பி⁴க்கு²னோ. ஸசேபி ஸஹஸ்ஸங் அக்³க⁴தி, கி³லானுபட்டா²கானங்யேவ தா³தப்³ப³ந்தி யோஜனா. அஞ்ஞந்தி பத்தசீவரதோ அஞ்ஞங். தேதி கி³லானுபட்டா²கா. அவஸேஸந்தி பத்தசீவரதோ அவஸேஸங். ததோதி ப³ஹுகமஹக்³க⁴தோ. திசீவரபரிக்கா²ரோதி திண்ணங் சீவரானங் பரிவாரோ. ஸப்³ப³ஞ்சேதந்தி ஸப்³ப³மேவ ஏதங் பரிக்கா²ரங். லப⁴தீதி கி³லானுபட்டா²கோ லப⁴தி.
Mātugāmopi hotūti yojanā. Tassa bhikkhunoti kālaṅkatassa tassa bhikkhuno. Sacepi sahassaṃ agghati, gilānupaṭṭhākānaṃyeva dātabbanti yojanā. Aññanti pattacīvarato aññaṃ. Teti gilānupaṭṭhākā. Avasesanti pattacīvarato avasesaṃ. Tatoti bahukamahagghato. Ticīvaraparikkhāroti tiṇṇaṃ cīvarānaṃ parivāro. Sabbañcetanti sabbameva etaṃ parikkhāraṃ. Labhatīti gilānupaṭṭhāko labhati.
ஸோதி காலங்கதோ. கஸ்ஸசீதி க³ஹட்ட²ஸ்ஸ வா பப்³ப³ஜிதஸ்ஸ வா. தஸ்ஸேவாதி தி³ன்னகா³ஹகஸ்ஸேவ. ருசியா ஏவாதி காமா ஏவ. தத்த² தத்த² ஸங்க⁴ஸ்ஸேவாதி தஸ்மிங் தஸ்மிங் விஹாரே டி²தஸ்ஸ ஸங்க⁴ஸ்ஸேவ. இத³ங் விஹாரே ட²பிதபரிக்கா²ரே ஸந்தா⁴ய வுத்தங். ஸசே கா³மே வா அரஞ்ஞே வா ட²பிதா ஹொந்தி, ஸகலோவ ஸங்கோ⁴ இஸ்ஸரோ. கஸ்மா? ஸங்க⁴ஸ்ஸேவ தா³யஜ்ஜபா⁴வதோ. ப³ஹூனம்பீதி தீஹி பட்டா²ய ப³ஹூனம்பி. ஈதி³ஸவசனங் உபனிதா⁴ய ஸாஸனேபி ஏகோ த்³வே ப³ஹூதி தீணி வசனானி அத்தே² தி³ஸ்ஸந்தி, ஸத்³தே³ பன த்³விவசனப³ஹுவசனானங் விஸேஸாபா⁴வதோ த்³விவசனங் நத்தீ²தி த³ட்ட²ப்³ப³ங். அதி³ன்னமேவாதி அத்தனோயேவ அஸந்தகத்தா, அஞ்ஞேஸம்பி ஸாதா⁴ரணத்தா ச அதி³ன்னமேவ. ஸசே ஸப்³பே³ மதா அனுமதியா தெ³ந்தி, ஸுதி³ன்னமேவ. தந்தி ஸந்தகங். தேஸூதி தேஸு ஸப்³பே³ஸு.
Soti kālaṅkato. Kassacīti gahaṭṭhassa vā pabbajitassa vā. Tassevāti dinnagāhakasseva. Ruciyā evāti kāmā eva. Tattha tattha saṅghassevāti tasmiṃ tasmiṃ vihāre ṭhitassa saṅghasseva. Idaṃ vihāre ṭhapitaparikkhāre sandhāya vuttaṃ. Sace gāme vā araññe vā ṭhapitā honti, sakalova saṅgho issaro. Kasmā? Saṅghasseva dāyajjabhāvato. Bahūnampīti tīhi paṭṭhāya bahūnampi. Īdisavacanaṃ upanidhāya sāsanepi eko dve bahūti tīṇi vacanāni atthe dissanti, sadde pana dvivacanabahuvacanānaṃ visesābhāvato dvivacanaṃ natthīti daṭṭhabbaṃ. Adinnamevāti attanoyeva asantakattā, aññesampi sādhāraṇattā ca adinnameva. Sace sabbe matā anumatiyā denti, sudinnameva. Tanti santakaṃ. Tesūti tesu sabbesu.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 225. மதஸந்தககதா² • 225. Matasantakakathā
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / மதஸந்தககதா² • Matasantakakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / மதஸந்தககதா²வண்ணனா • Matasantakakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / மதஸந்தககதா²வண்ணனா • Matasantakakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / மதஸந்தககதா²தி³வண்ணனா • Matasantakakathādivaṇṇanā
