| Library / Tipiṭaka / তিপিটক • Tipiṭaka / মহাৰগ্গপাল়ি • Mahāvaggapāḷi |
২২৫. মতসন্তককথা
225. Matasantakakathā
৩৬৭. তেন খো পন সমযেন দ্ৰে ভিক্খূ কোসলেসু জনপদে অদ্ধানমগ্গপ্পটিপন্না হোন্তি। তে অঞ্ঞতরং আৰাসং উপগচ্ছিংসু। তত্থ অঞ্ঞতরো ভিক্খু গিলানো হোতি। অথ খো তেসং ভিক্খূনং এতদহোসি – ‘‘ভগৰতা খো, আৰুসো, গিলানুপট্ঠানং ৰণ্ণিতং। হন্দ, মযং, আৰুসো, ইমং ভিক্খুং উপট্ঠহেমা’’তি। তে তং উপট্ঠহিংসু। সো তেহি উপট্ঠহিযমানো কালমকাসি। অথ খো তে ভিক্খূ তস্স ভিক্খুনো পত্তচীৰরমাদায সাৰত্থিং গন্ত্ৰা ভগৰতো এতমত্থং আরোচেসুং। ‘‘ভিক্খুস্স, ভিক্খৰে, কালঙ্কতে সঙ্ঘো সামী পত্তচীৰরে, অপিচ গিলানুপট্ঠাকা বহূপকারা। অনুজানামি, ভিক্খৰে, সঙ্ঘেন তিচীৰরঞ্চ পত্তঞ্চ গিলানুপট্ঠাকানং দাতুং। এৰঞ্চ পন, ভিক্খৰে, দাতব্বং। তেন গিলানুপট্ঠাকেন ভিক্খুনা সঙ্ঘং উপসঙ্কমিত্ৰা এৰমস্স ৰচনীযো – ‘ইত্থন্নামো, ভন্তে, ভিক্খু কালঙ্কতো। ইদং তস্স তিচীৰরঞ্চ পত্তো চা’’’তি। ব্যত্তেন ভিক্খুনা পটিবলেন সঙ্ঘো ঞাপেতব্বো –
367. Tena kho pana samayena dve bhikkhū kosalesu janapade addhānamaggappaṭipannā honti. Te aññataraṃ āvāsaṃ upagacchiṃsu. Tattha aññataro bhikkhu gilāno hoti. Atha kho tesaṃ bhikkhūnaṃ etadahosi – ‘‘bhagavatā kho, āvuso, gilānupaṭṭhānaṃ vaṇṇitaṃ. Handa, mayaṃ, āvuso, imaṃ bhikkhuṃ upaṭṭhahemā’’ti. Te taṃ upaṭṭhahiṃsu. So tehi upaṭṭhahiyamāno kālamakāsi. Atha kho te bhikkhū tassa bhikkhuno pattacīvaramādāya sāvatthiṃ gantvā bhagavato etamatthaṃ ārocesuṃ. ‘‘Bhikkhussa, bhikkhave, kālaṅkate saṅgho sāmī pattacīvare, apica gilānupaṭṭhākā bahūpakārā. Anujānāmi, bhikkhave, saṅghena ticīvarañca pattañca gilānupaṭṭhākānaṃ dātuṃ. Evañca pana, bhikkhave, dātabbaṃ. Tena gilānupaṭṭhākena bhikkhunā saṅghaṃ upasaṅkamitvā evamassa vacanīyo – ‘itthannāmo, bhante, bhikkhu kālaṅkato. Idaṃ tassa ticīvarañca patto cā’’’ti. Byattena bhikkhunā paṭibalena saṅgho ñāpetabbo –
‘‘সুণাতু মে, ভন্তে, সঙ্ঘো। ইত্থন্নামো ভিক্খু কালঙ্কতো। ইদং তস্স তিচীৰরঞ্চ পত্তো চ। যদি সঙ্ঘস্স পত্তকল্লং, সঙ্ঘো ইমং তিচীৰরঞ্চ পত্তঞ্চ গিলানুপট্ঠাকানং দদেয্য। এসা ঞত্তি।
‘‘Suṇātu me, bhante, saṅgho. Itthannāmo bhikkhu kālaṅkato. Idaṃ tassa ticīvarañca patto ca. Yadi saṅghassa pattakallaṃ, saṅgho imaṃ ticīvarañca pattañca gilānupaṭṭhākānaṃ dadeyya. Esā ñatti.
‘‘সুণাতু মে, ভন্তে, সঙ্ঘো। ইত্থন্নামো ভিক্খু কালঙ্কতো। ইদং তস্স তিচীৰরঞ্চ পত্তো চ। সঙ্ঘো ইমং তিচীৰরঞ্চ পত্তঞ্চ গিলানুপট্ঠাকানং দেতি। যস্সাযস্মতো খমতি ইমস্স তিচীৰরস্স চ পত্তস্স চ গিলানুপট্ঠাকানং দানং, সো তুণ্হস্স; যস্স নক্খমতি, সো ভাসেয্য।
‘‘Suṇātu me, bhante, saṅgho. Itthannāmo bhikkhu kālaṅkato. Idaṃ tassa ticīvarañca patto ca. Saṅgho imaṃ ticīvarañca pattañca gilānupaṭṭhākānaṃ deti. Yassāyasmato khamati imassa ticīvarassa ca pattassa ca gilānupaṭṭhākānaṃ dānaṃ, so tuṇhassa; yassa nakkhamati, so bhāseyya.
‘‘দিন্নং ইদং সঙ্ঘেন তিচীৰরঞ্চ পত্তো চ গিলানুপট্ঠাকানং। খমতি সঙ্ঘস্স, তস্মা তুণ্হী, এৰমেতং ধারযামী’’তি ।
‘‘Dinnaṃ idaṃ saṅghena ticīvarañca patto ca gilānupaṭṭhākānaṃ. Khamati saṅghassa, tasmā tuṇhī, evametaṃ dhārayāmī’’ti .
৩৬৮. তেন খো পন সমযেন অঞ্ঞতরো সামণেরো কালঙ্কতো হোতি। ভগৰতো এতমত্থং আরোচেসুং। সামণেরস্স, ভিক্খৰে, কালঙ্কতে সঙ্ঘো সামী পত্তচীৰরে, অপি চ গিলানুপট্ঠাকা বহূপকারা। অনুজানামি, ভিক্খৰে, সঙ্ঘেন চীৰরঞ্চ পত্তঞ্চ গিলানুপট্ঠাকানং দাতুং। এৰঞ্চ পন, ভিক্খৰে, দাতব্বং। তেন গিলানুপট্ঠাকেন ভিক্খুনা সঙ্ঘং উপসঙ্কমিত্ৰা এৰমস্স ৰচনীযো – ‘‘ইত্থন্নামো, ভন্তে, সামণেরো কালঙ্কতো, ইদং তস্স চীৰরঞ্চ পত্তো চা’’তি। ব্যত্তেন ভিক্খুনা পটিবলেন সঙ্ঘো ঞাপেতব্বো –
368. Tena kho pana samayena aññataro sāmaṇero kālaṅkato hoti. Bhagavato etamatthaṃ ārocesuṃ. Sāmaṇerassa, bhikkhave, kālaṅkate saṅgho sāmī pattacīvare, api ca gilānupaṭṭhākā bahūpakārā. Anujānāmi, bhikkhave, saṅghena cīvarañca pattañca gilānupaṭṭhākānaṃ dātuṃ. Evañca pana, bhikkhave, dātabbaṃ. Tena gilānupaṭṭhākena bhikkhunā saṅghaṃ upasaṅkamitvā evamassa vacanīyo – ‘‘itthannāmo, bhante, sāmaṇero kālaṅkato, idaṃ tassa cīvarañca patto cā’’ti. Byattena bhikkhunā paṭibalena saṅgho ñāpetabbo –
‘‘সুণাতু মে, ভন্তে, সঙ্ঘো। ইত্থন্নামো সামণেরো কালঙ্কতো। ইদং তস্স চীৰরঞ্চ পত্তো চ। যদি সঙ্ঘস্স পত্তকল্লং, সঙ্ঘো ইমং চীৰরঞ্চ পত্তঞ্চ গিলানুপট্ঠাকানং দদেয্য। এসা ঞত্তি।
‘‘Suṇātu me, bhante, saṅgho. Itthannāmo sāmaṇero kālaṅkato. Idaṃ tassa cīvarañca patto ca. Yadi saṅghassa pattakallaṃ, saṅgho imaṃ cīvarañca pattañca gilānupaṭṭhākānaṃ dadeyya. Esā ñatti.
‘‘সুণাতু মে, ভন্তে, সঙ্ঘো। ইত্থন্নামো সামণেরো কালঙ্কতো। ইদং তস্স চীৰরঞ্চ পত্তো চ। সঙ্ঘো ইমং চীৰরঞ্চ পত্তঞ্চ গিলানুপট্ঠাকানং দেতি। যস্সাযস্মতো খমতি ইমস্স চীৰরস্স চ পত্তস্স চ গিলানুপট্ঠাকানং দানং, সো তুণ্হস্স; যস্স নক্খমতি, সো ভাসেয্য।
‘‘Suṇātu me, bhante, saṅgho. Itthannāmo sāmaṇero kālaṅkato. Idaṃ tassa cīvarañca patto ca. Saṅgho imaṃ cīvarañca pattañca gilānupaṭṭhākānaṃ deti. Yassāyasmato khamati imassa cīvarassa ca pattassa ca gilānupaṭṭhākānaṃ dānaṃ, so tuṇhassa; yassa nakkhamati, so bhāseyya.
‘‘দিন্নং ইদং সঙ্ঘেন চীৰরঞ্চ পত্তো চ গিলানুপট্ঠাকানং। খমতি সঙ্ঘস্স, তস্মা তুণ্হী, এৰমেতং ধারযামী’’তি।
‘‘Dinnaṃ idaṃ saṅghena cīvarañca patto ca gilānupaṭṭhākānaṃ. Khamati saṅghassa, tasmā tuṇhī, evametaṃ dhārayāmī’’ti.
৩৬৯. তেন খো পন সমযেন অঞ্ঞতরো ভিক্খু চ সামণেরো চ গিলানং উপট্ঠহিংসু। সো তেহি উপট্ঠহিযমানো কালমকাসি। অথ খো তস্স গিলানুপট্ঠাকস্স ভিক্খুনো এতদহোসি – ‘‘কথং নু খো গিলানুপট্ঠাকস্স সামণেরস্স চীৰরপটিৰীসো দাতব্বো’’তি ? ভগৰতো এতমত্থং আরোচেসুং। অনুজানামি, ভিক্খৰে, গিলানুপট্ঠাকস্স সামণেরস্স সমকং পটিৰীসং দাতুন্তি।
369. Tena kho pana samayena aññataro bhikkhu ca sāmaṇero ca gilānaṃ upaṭṭhahiṃsu. So tehi upaṭṭhahiyamāno kālamakāsi. Atha kho tassa gilānupaṭṭhākassa bhikkhuno etadahosi – ‘‘kathaṃ nu kho gilānupaṭṭhākassa sāmaṇerassa cīvarapaṭivīso dātabbo’’ti ? Bhagavato etamatthaṃ ārocesuṃ. Anujānāmi, bhikkhave, gilānupaṭṭhākassa sāmaṇerassa samakaṃ paṭivīsaṃ dātunti.
তেন খো পন সমযেন অঞ্ঞতরো ভিক্খু বহুভণ্ডো বহুপরিক্খারো কালঙ্কতো হোতি। ভগৰতো এতমত্থং আরোচেসুং। ভিক্খুস্স, ভিক্খৰে, কালঙ্কতে সঙ্ঘো সামী পত্তচীৰরে, অপি চ গিলানুপট্ঠাকা বহূপকারা। অনুজানামি, ভিক্খৰে, সঙ্ঘেন তিচীৰরঞ্চ পত্তঞ্চ গিলানুপট্ঠাকানং দাতুং। যং তত্থ লহুভণ্ডং লহুপরিক্খারং তং সম্মুখীভূতেন সঙ্ঘেন ভাজেতুং। যং তত্থ গরুভণ্ডং গরুপরিক্খারং তং আগতানাগতস্স চাতুদ্দিসস্স সঙ্ঘস্স অৰিস্সজ্জিকং অৰেভঙ্গিকন্তি।
Tena kho pana samayena aññataro bhikkhu bahubhaṇḍo bahuparikkhāro kālaṅkato hoti. Bhagavato etamatthaṃ ārocesuṃ. Bhikkhussa, bhikkhave, kālaṅkate saṅgho sāmī pattacīvare, api ca gilānupaṭṭhākā bahūpakārā. Anujānāmi, bhikkhave, saṅghena ticīvarañca pattañca gilānupaṭṭhākānaṃ dātuṃ. Yaṃ tattha lahubhaṇḍaṃ lahuparikkhāraṃ taṃ sammukhībhūtena saṅghena bhājetuṃ. Yaṃ tattha garubhaṇḍaṃ garuparikkhāraṃ taṃ āgatānāgatassa cātuddisassa saṅghassa avissajjikaṃ avebhaṅgikanti.
মতসন্তককথা নিট্ঠিতা।
Matasantakakathā niṭṭhitā.
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / মতসন্তককথা • Matasantakakathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / মতসন্তককথাৰণ্ণনা • Matasantakakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / মতসন্তককথাৰণ্ণনা • Matasantakakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / মতসন্তককথাদিৰণ্ণনা • Matasantakakathādivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ২২৫. মতসন্তককথা • 225. Matasantakakathā
