| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
২২৫. মতসন্তককথা
225. Matasantakakathā
৩৬৭. কালঙ্কতেতি এত্থ করণং কতন্তি দস্সেন্তো আহ ‘‘কালকিরিযাযা’’তি। অপলোকেত্ৰাতি ‘‘ইত্থন্নামো ভন্তে ভিক্খু কালঙ্কতো, তস্স তিচীৰরঞ্চ পত্তঞ্চ গিলানুপট্ঠাকানং দাতুং সঙ্ঘং অপলোকেমী’’তি অপলোকেত্ৰা।
367.Kālaṅkateti ettha karaṇaṃ katanti dassento āha ‘‘kālakiriyāyā’’ti. Apaloketvāti ‘‘itthannāmo bhante bhikkhu kālaṅkato, tassa ticīvarañca pattañca gilānupaṭṭhākānaṃ dātuṃ saṅghaṃ apalokemī’’ti apaloketvā.
৩৬৯. গিলানুপট্ঠাকলাভেতি গিলানুপট্ঠাকানং লভিতব্বে।
369.Gilānupaṭṭhākalābheti gilānupaṭṭhākānaṃ labhitabbe.
সব্বেপি ভিক্খূতি সম্বন্ধো। তত্থাতি তস্মিং কালঙ্কতে। কিং ৰদন্তি? ‘‘সব্বেপি…পে॰… সামিনো’’তি ৰদন্তীতি যোজনা। দ্ৰীসু ৰাদেসু পচ্ছিমৰাদো অট্ঠকথাচরিযেন রুচ্চতীতি ৰদন্তি। যন্তি যং ৰত্থু। ‘‘যং অত্থি, তং দাতব্ব’’ন্তি ৰুত্তমেৰত্থং আৰিকরোন্তো আহ ‘‘অঞ্ঞস্মিং…পে॰… দাতব্ব’’ন্তি। তন্তি পরিক্খারং।
Sabbepi bhikkhūti sambandho. Tatthāti tasmiṃ kālaṅkate. Kiṃ vadanti? ‘‘Sabbepi…pe… sāmino’’ti vadantīti yojanā. Dvīsu vādesu pacchimavādo aṭṭhakathācariyena ruccatīti vadanti. Yanti yaṃ vatthu. ‘‘Yaṃ atthi, taṃ dātabba’’nti vuttamevatthaṃ āvikaronto āha ‘‘aññasmiṃ…pe… dātabba’’nti. Tanti parikkhāraṃ.
সমকোতি সমং পমাণমেতস্স ভাগস্সাতি সমকো। সংৰিদহনমত্তমেৰাতি ইদঞ্চিদঞ্চ করোহীতি সজ্জনমত্তমেৰ। জেট্ঠকভাগোতি দিগুণভাগো।
Samakoti samaṃ pamāṇametassa bhāgassāti samako. Saṃvidahanamattamevāti idañcidañca karohīti sajjanamattameva. Jeṭṭhakabhāgoti diguṇabhāgo.
যো পনাতি ভিক্খু পন। এত্থাতি বহূসু ভিক্খূসু। যেনাতি যেন কেনচি, দিন্নং পটিযাদিতন্তি সম্বন্ধো। একদিৰসম্পীতি পিসদ্দো পগেৰ দ্ৰীহাদিকেতি দস্সেতি। সোপীতি পিসদ্দো ন কেৰলং বহুদিৰসং উপট্ঠাকোযেৰ, অথ খো সোপীতি দস্সেতি। সমীপন্তি গিলানস্স সন্তিকং। আগচ্ছতীতি সমীপমাগচ্ছতি।
Yo panāti bhikkhu pana. Etthāti bahūsu bhikkhūsu. Yenāti yena kenaci, dinnaṃ paṭiyāditanti sambandho. Ekadivasampīti pisaddo pageva dvīhādiketi dasseti. Sopīti pisaddo na kevalaṃ bahudivasaṃ upaṭṭhākoyeva, atha kho sopīti dasseti. Samīpanti gilānassa santikaṃ. Āgacchatīti samīpamāgacchati.
পচ্চাসীসাযাতি ভাগস্স পচ্চাসীসায। ‘‘পুন আগন্ত্ৰা জগ্গিস্সামী’’তি ইমিনা ‘‘পুন আগন্ত্ৰা ন জগ্গিস্সামী’’তি গচ্ছন্তস্স ন দাতব্বন্তি দস্সেতি। ধুরং নিক্খিপিত্ৰাতি উপট্ঠহনে ধুরং নিক্খিপিত্ৰা।
Paccāsīsāyāti bhāgassa paccāsīsāya. ‘‘Puna āgantvā jaggissāmī’’ti iminā ‘‘puna āgantvā na jaggissāmī’’ti gacchantassa na dātabbanti dasseti. Dhuraṃ nikkhipitvāti upaṭṭhahane dhuraṃ nikkhipitvā.
মাতুগামোপি হোতূতি যোজনা। তস্স ভিক্খুনোতি কালঙ্কতস্স তস্স ভিক্খুনো। সচেপি সহস্সং অগ্ঘতি, গিলানুপট্ঠাকানংযেৰ দাতব্বন্তি যোজনা। অঞ্ঞন্তি পত্তচীৰরতো অঞ্ঞং। তেতি গিলানুপট্ঠাকা। অৰসেসন্তি পত্তচীৰরতো অৰসেসং। ততোতি বহুকমহগ্ঘতো। তিচীৰরপরিক্খারোতি তিণ্ণং চীৰরানং পরিৰারো। সব্বঞ্চেতন্তি সব্বমেৰ এতং পরিক্খারং। লভতীতি গিলানুপট্ঠাকো লভতি।
Mātugāmopi hotūti yojanā. Tassa bhikkhunoti kālaṅkatassa tassa bhikkhuno. Sacepi sahassaṃ agghati, gilānupaṭṭhākānaṃyeva dātabbanti yojanā. Aññanti pattacīvarato aññaṃ. Teti gilānupaṭṭhākā. Avasesanti pattacīvarato avasesaṃ. Tatoti bahukamahagghato. Ticīvaraparikkhāroti tiṇṇaṃ cīvarānaṃ parivāro. Sabbañcetanti sabbameva etaṃ parikkhāraṃ. Labhatīti gilānupaṭṭhāko labhati.
সোতি কালঙ্কতো। কস্সচীতি গহট্ঠস্স ৰা পব্বজিতস্স ৰা। তস্সেৰাতি দিন্নগাহকস্সেৰ। রুচিযা এৰাতি কামা এৰ। তত্থ তত্থ সঙ্ঘস্সেৰাতি তস্মিং তস্মিং ৰিহারে ঠিতস্স সঙ্ঘস্সেৰ। ইদং ৰিহারে ঠপিতপরিক্খারে সন্ধায ৰুত্তং। সচে গামে ৰা অরঞ্ঞে ৰা ঠপিতা হোন্তি, সকলোৰ সঙ্ঘো ইস্সরো। কস্মা? সঙ্ঘস্সেৰ দাযজ্জভাৰতো। বহূনম্পীতি তীহি পট্ঠায বহূনম্পি। ঈদিসৰচনং উপনিধায সাসনেপি একো দ্ৰে বহূতি তীণি ৰচনানি অত্থে দিস্সন্তি, সদ্দে পন দ্ৰিৰচনবহুৰচনানং ৰিসেসাভাৰতো দ্ৰিৰচনং নত্থীতি দট্ঠব্বং। অদিন্নমেৰাতি অত্তনোযেৰ অসন্তকত্তা, অঞ্ঞেসম্পি সাধারণত্তা চ অদিন্নমেৰ। সচে সব্বে মতা অনুমতিযা দেন্তি, সুদিন্নমেৰ। তন্তি সন্তকং। তেসূতি তেসু সব্বেসু।
Soti kālaṅkato. Kassacīti gahaṭṭhassa vā pabbajitassa vā. Tassevāti dinnagāhakasseva. Ruciyā evāti kāmā eva. Tattha tattha saṅghassevāti tasmiṃ tasmiṃ vihāre ṭhitassa saṅghasseva. Idaṃ vihāre ṭhapitaparikkhāre sandhāya vuttaṃ. Sace gāme vā araññe vā ṭhapitā honti, sakalova saṅgho issaro. Kasmā? Saṅghasseva dāyajjabhāvato. Bahūnampīti tīhi paṭṭhāya bahūnampi. Īdisavacanaṃ upanidhāya sāsanepi eko dve bahūti tīṇi vacanāni atthe dissanti, sadde pana dvivacanabahuvacanānaṃ visesābhāvato dvivacanaṃ natthīti daṭṭhabbaṃ. Adinnamevāti attanoyeva asantakattā, aññesampi sādhāraṇattā ca adinnameva. Sace sabbe matā anumatiyā denti, sudinnameva. Tanti santakaṃ. Tesūti tesu sabbesu.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi / ২২৫. মতসন্তককথা • 225. Matasantakakathā
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / মতসন্তককথা • Matasantakakathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / মতসন্তককথাৰণ্ণনা • Matasantakakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / মতসন্তককথাৰণ্ণনা • Matasantakakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / মতসন্তককথাদিৰণ্ণনা • Matasantakakathādivaṇṇanā
