| Library / Tipiṭaka / ತಿಪಿಟಕ • Tipiṭaka / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi |
೨೨೫. ಮತಸನ್ತಕಕಥಾ
225. Matasantakakathā
೩೬೭. ಕಾಲಙ್ಕತೇತಿ ಏತ್ಥ ಕರಣಂ ಕತನ್ತಿ ದಸ್ಸೇನ್ತೋ ಆಹ ‘‘ಕಾಲಕಿರಿಯಾಯಾ’’ತಿ। ಅಪಲೋಕೇತ್ವಾತಿ ‘‘ಇತ್ಥನ್ನಾಮೋ ಭನ್ತೇ ಭಿಕ್ಖು ಕಾಲಙ್ಕತೋ, ತಸ್ಸ ತಿಚೀವರಞ್ಚ ಪತ್ತಞ್ಚ ಗಿಲಾನುಪಟ್ಠಾಕಾನಂ ದಾತುಂ ಸಙ್ಘಂ ಅಪಲೋಕೇಮೀ’’ತಿ ಅಪಲೋಕೇತ್ವಾ।
367.Kālaṅkateti ettha karaṇaṃ katanti dassento āha ‘‘kālakiriyāyā’’ti. Apaloketvāti ‘‘itthannāmo bhante bhikkhu kālaṅkato, tassa ticīvarañca pattañca gilānupaṭṭhākānaṃ dātuṃ saṅghaṃ apalokemī’’ti apaloketvā.
೩೬೯. ಗಿಲಾನುಪಟ್ಠಾಕಲಾಭೇತಿ ಗಿಲಾನುಪಟ್ಠಾಕಾನಂ ಲಭಿತಬ್ಬೇ।
369.Gilānupaṭṭhākalābheti gilānupaṭṭhākānaṃ labhitabbe.
ಸಬ್ಬೇಪಿ ಭಿಕ್ಖೂತಿ ಸಮ್ಬನ್ಧೋ। ತತ್ಥಾತಿ ತಸ್ಮಿಂ ಕಾಲಙ್ಕತೇ। ಕಿಂ ವದನ್ತಿ? ‘‘ಸಬ್ಬೇಪಿ…ಪೇ॰… ಸಾಮಿನೋ’’ತಿ ವದನ್ತೀತಿ ಯೋಜನಾ। ದ್ವೀಸು ವಾದೇಸು ಪಚ್ಛಿಮವಾದೋ ಅಟ್ಠಕಥಾಚರಿಯೇನ ರುಚ್ಚತೀತಿ ವದನ್ತಿ। ಯನ್ತಿ ಯಂ ವತ್ಥು। ‘‘ಯಂ ಅತ್ಥಿ, ತಂ ದಾತಬ್ಬ’’ನ್ತಿ ವುತ್ತಮೇವತ್ಥಂ ಆವಿಕರೋನ್ತೋ ಆಹ ‘‘ಅಞ್ಞಸ್ಮಿಂ…ಪೇ॰… ದಾತಬ್ಬ’’ನ್ತಿ। ತನ್ತಿ ಪರಿಕ್ಖಾರಂ।
Sabbepi bhikkhūti sambandho. Tatthāti tasmiṃ kālaṅkate. Kiṃ vadanti? ‘‘Sabbepi…pe… sāmino’’ti vadantīti yojanā. Dvīsu vādesu pacchimavādo aṭṭhakathācariyena ruccatīti vadanti. Yanti yaṃ vatthu. ‘‘Yaṃ atthi, taṃ dātabba’’nti vuttamevatthaṃ āvikaronto āha ‘‘aññasmiṃ…pe… dātabba’’nti. Tanti parikkhāraṃ.
ಸಮಕೋತಿ ಸಮಂ ಪಮಾಣಮೇತಸ್ಸ ಭಾಗಸ್ಸಾತಿ ಸಮಕೋ। ಸಂವಿದಹನಮತ್ತಮೇವಾತಿ ಇದಞ್ಚಿದಞ್ಚ ಕರೋಹೀತಿ ಸಜ್ಜನಮತ್ತಮೇವ। ಜೇಟ್ಠಕಭಾಗೋತಿ ದಿಗುಣಭಾಗೋ।
Samakoti samaṃ pamāṇametassa bhāgassāti samako. Saṃvidahanamattamevāti idañcidañca karohīti sajjanamattameva. Jeṭṭhakabhāgoti diguṇabhāgo.
ಯೋ ಪನಾತಿ ಭಿಕ್ಖು ಪನ। ಏತ್ಥಾತಿ ಬಹೂಸು ಭಿಕ್ಖೂಸು। ಯೇನಾತಿ ಯೇನ ಕೇನಚಿ, ದಿನ್ನಂ ಪಟಿಯಾದಿತನ್ತಿ ಸಮ್ಬನ್ಧೋ। ಏಕದಿವಸಮ್ಪೀತಿ ಪಿಸದ್ದೋ ಪಗೇವ ದ್ವೀಹಾದಿಕೇತಿ ದಸ್ಸೇತಿ। ಸೋಪೀತಿ ಪಿಸದ್ದೋ ನ ಕೇವಲಂ ಬಹುದಿವಸಂ ಉಪಟ್ಠಾಕೋಯೇವ, ಅಥ ಖೋ ಸೋಪೀತಿ ದಸ್ಸೇತಿ। ಸಮೀಪನ್ತಿ ಗಿಲಾನಸ್ಸ ಸನ್ತಿಕಂ। ಆಗಚ್ಛತೀತಿ ಸಮೀಪಮಾಗಚ್ಛತಿ।
Yo panāti bhikkhu pana. Etthāti bahūsu bhikkhūsu. Yenāti yena kenaci, dinnaṃ paṭiyāditanti sambandho. Ekadivasampīti pisaddo pageva dvīhādiketi dasseti. Sopīti pisaddo na kevalaṃ bahudivasaṃ upaṭṭhākoyeva, atha kho sopīti dasseti. Samīpanti gilānassa santikaṃ. Āgacchatīti samīpamāgacchati.
ಪಚ್ಚಾಸೀಸಾಯಾತಿ ಭಾಗಸ್ಸ ಪಚ್ಚಾಸೀಸಾಯ। ‘‘ಪುನ ಆಗನ್ತ್ವಾ ಜಗ್ಗಿಸ್ಸಾಮೀ’’ತಿ ಇಮಿನಾ ‘‘ಪುನ ಆಗನ್ತ್ವಾ ನ ಜಗ್ಗಿಸ್ಸಾಮೀ’’ತಿ ಗಚ್ಛನ್ತಸ್ಸ ನ ದಾತಬ್ಬನ್ತಿ ದಸ್ಸೇತಿ। ಧುರಂ ನಿಕ್ಖಿಪಿತ್ವಾತಿ ಉಪಟ್ಠಹನೇ ಧುರಂ ನಿಕ್ಖಿಪಿತ್ವಾ।
Paccāsīsāyāti bhāgassa paccāsīsāya. ‘‘Puna āgantvā jaggissāmī’’ti iminā ‘‘puna āgantvā na jaggissāmī’’ti gacchantassa na dātabbanti dasseti. Dhuraṃ nikkhipitvāti upaṭṭhahane dhuraṃ nikkhipitvā.
ಮಾತುಗಾಮೋಪಿ ಹೋತೂತಿ ಯೋಜನಾ। ತಸ್ಸ ಭಿಕ್ಖುನೋತಿ ಕಾಲಙ್ಕತಸ್ಸ ತಸ್ಸ ಭಿಕ್ಖುನೋ। ಸಚೇಪಿ ಸಹಸ್ಸಂ ಅಗ್ಘತಿ, ಗಿಲಾನುಪಟ್ಠಾಕಾನಂಯೇವ ದಾತಬ್ಬನ್ತಿ ಯೋಜನಾ। ಅಞ್ಞನ್ತಿ ಪತ್ತಚೀವರತೋ ಅಞ್ಞಂ। ತೇತಿ ಗಿಲಾನುಪಟ್ಠಾಕಾ। ಅವಸೇಸನ್ತಿ ಪತ್ತಚೀವರತೋ ಅವಸೇಸಂ। ತತೋತಿ ಬಹುಕಮಹಗ್ಘತೋ। ತಿಚೀವರಪರಿಕ್ಖಾರೋತಿ ತಿಣ್ಣಂ ಚೀವರಾನಂ ಪರಿವಾರೋ। ಸಬ್ಬಞ್ಚೇತನ್ತಿ ಸಬ್ಬಮೇವ ಏತಂ ಪರಿಕ್ಖಾರಂ। ಲಭತೀತಿ ಗಿಲಾನುಪಟ್ಠಾಕೋ ಲಭತಿ।
Mātugāmopi hotūti yojanā. Tassa bhikkhunoti kālaṅkatassa tassa bhikkhuno. Sacepi sahassaṃ agghati, gilānupaṭṭhākānaṃyeva dātabbanti yojanā. Aññanti pattacīvarato aññaṃ. Teti gilānupaṭṭhākā. Avasesanti pattacīvarato avasesaṃ. Tatoti bahukamahagghato. Ticīvaraparikkhāroti tiṇṇaṃ cīvarānaṃ parivāro. Sabbañcetanti sabbameva etaṃ parikkhāraṃ. Labhatīti gilānupaṭṭhāko labhati.
ಸೋತಿ ಕಾಲಙ್ಕತೋ। ಕಸ್ಸಚೀತಿ ಗಹಟ್ಠಸ್ಸ ವಾ ಪಬ್ಬಜಿತಸ್ಸ ವಾ। ತಸ್ಸೇವಾತಿ ದಿನ್ನಗಾಹಕಸ್ಸೇವ। ರುಚಿಯಾ ಏವಾತಿ ಕಾಮಾ ಏವ। ತತ್ಥ ತತ್ಥ ಸಙ್ಘಸ್ಸೇವಾತಿ ತಸ್ಮಿಂ ತಸ್ಮಿಂ ವಿಹಾರೇ ಠಿತಸ್ಸ ಸಙ್ಘಸ್ಸೇವ। ಇದಂ ವಿಹಾರೇ ಠಪಿತಪರಿಕ್ಖಾರೇ ಸನ್ಧಾಯ ವುತ್ತಂ। ಸಚೇ ಗಾಮೇ ವಾ ಅರಞ್ಞೇ ವಾ ಠಪಿತಾ ಹೋನ್ತಿ, ಸಕಲೋವ ಸಙ್ಘೋ ಇಸ್ಸರೋ। ಕಸ್ಮಾ? ಸಙ್ಘಸ್ಸೇವ ದಾಯಜ್ಜಭಾವತೋ। ಬಹೂನಮ್ಪೀತಿ ತೀಹಿ ಪಟ್ಠಾಯ ಬಹೂನಮ್ಪಿ। ಈದಿಸವಚನಂ ಉಪನಿಧಾಯ ಸಾಸನೇಪಿ ಏಕೋ ದ್ವೇ ಬಹೂತಿ ತೀಣಿ ವಚನಾನಿ ಅತ್ಥೇ ದಿಸ್ಸನ್ತಿ, ಸದ್ದೇ ಪನ ದ್ವಿವಚನಬಹುವಚನಾನಂ ವಿಸೇಸಾಭಾವತೋ ದ್ವಿವಚನಂ ನತ್ಥೀತಿ ದಟ್ಠಬ್ಬಂ। ಅದಿನ್ನಮೇವಾತಿ ಅತ್ತನೋಯೇವ ಅಸನ್ತಕತ್ತಾ, ಅಞ್ಞೇಸಮ್ಪಿ ಸಾಧಾರಣತ್ತಾ ಚ ಅದಿನ್ನಮೇವ। ಸಚೇ ಸಬ್ಬೇ ಮತಾ ಅನುಮತಿಯಾ ದೇನ್ತಿ, ಸುದಿನ್ನಮೇವ। ತನ್ತಿ ಸನ್ತಕಂ। ತೇಸೂತಿ ತೇಸು ಸಬ್ಬೇಸು।
Soti kālaṅkato. Kassacīti gahaṭṭhassa vā pabbajitassa vā. Tassevāti dinnagāhakasseva. Ruciyā evāti kāmā eva. Tattha tattha saṅghassevāti tasmiṃ tasmiṃ vihāre ṭhitassa saṅghasseva. Idaṃ vihāre ṭhapitaparikkhāre sandhāya vuttaṃ. Sace gāme vā araññe vā ṭhapitā honti, sakalova saṅgho issaro. Kasmā? Saṅghasseva dāyajjabhāvato. Bahūnampīti tīhi paṭṭhāya bahūnampi. Īdisavacanaṃ upanidhāya sāsanepi eko dve bahūti tīṇi vacanāni atthe dissanti, sadde pana dvivacanabahuvacanānaṃ visesābhāvato dvivacanaṃ natthīti daṭṭhabbaṃ. Adinnamevāti attanoyeva asantakattā, aññesampi sādhāraṇattā ca adinnameva. Sace sabbe matā anumatiyā denti, sudinnameva. Tanti santakaṃ. Tesūti tesu sabbesu.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಮಹಾವಗ್ಗಪಾಳಿ • Mahāvaggapāḷi / ೨೨೫. ಮತಸನ್ತಕಕಥಾ • 225. Matasantakakathā
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಮಹಾವಗ್ಗ-ಅಟ್ಠಕಥಾ • Mahāvagga-aṭṭhakathā / ಮತಸನ್ತಕಕಥಾ • Matasantakakathā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ಮತಸನ್ತಕಕಥಾವಣ್ಣನಾ • Matasantakakathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ಮತಸನ್ತಕಕಥಾವಣ್ಣನಾ • Matasantakakathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ಮತಸನ್ತಕಕಥಾದಿವಣ್ಣನಾ • Matasantakakathādivaṇṇanā
