| Library / Tipiṭaka / ཏིཔིཊཀ • Tipiṭaka / པཱཙིཏྱཱདིཡོཛནཱཔཱལི༹ • Pācityādiyojanāpāḷi |
༢༢༥. མཏསནྟཀཀཐཱ
225. Matasantakakathā
༣༦༧. ཀཱལངྐཏེཏི ཨེཏྠ ཀརཎཾ ཀཏནྟི དསྶེནྟོ ཨཱཧ ‘‘ཀཱལཀིརིཡཱཡཱ’’ཏི། ཨཔལོཀེཏྭཱཏི ‘‘ཨིཏྠནྣཱམོ བྷནྟེ བྷིཀྑུ ཀཱལངྐཏོ, ཏསྶ ཏིཙཱིཝརཉྩ པཏྟཉྩ གིལཱནུཔཊྛཱཀཱནཾ དཱཏུཾ སངྒྷཾ ཨཔལོཀེམཱི’’ཏི ཨཔལོཀེཏྭཱ།
367.Kālaṅkateti ettha karaṇaṃ katanti dassento āha ‘‘kālakiriyāyā’’ti. Apaloketvāti ‘‘itthannāmo bhante bhikkhu kālaṅkato, tassa ticīvarañca pattañca gilānupaṭṭhākānaṃ dātuṃ saṅghaṃ apalokemī’’ti apaloketvā.
༣༦༩. གིལཱནུཔཊྛཱཀལཱབྷེཏི གིལཱནུཔཊྛཱཀཱནཾ ལབྷིཏབྦེ།
369.Gilānupaṭṭhākalābheti gilānupaṭṭhākānaṃ labhitabbe.
སབྦེཔི བྷིཀྑཱུཏི སམྦནྡྷོ། ཏཏྠཱཏི ཏསྨིཾ ཀཱལངྐཏེ། ཀིཾ ཝདནྟི? ‘‘སབྦེཔི…པེ॰… སཱམིནོ’’ཏི ཝདནྟཱིཏི ཡོཛནཱ། དྭཱིསུ ཝཱདེསུ པཙྪིམཝཱདོ ཨཊྛཀཐཱཙརིཡེན རུཙྩཏཱིཏི ཝདནྟི། ཡནྟི ཡཾ ཝཏྠུ། ‘‘ཡཾ ཨཏྠི, ཏཾ དཱཏབྦ’’ནྟི ཝུཏྟམེཝཏྠཾ ཨཱཝིཀརོནྟོ ཨཱཧ ‘‘ཨཉྙསྨིཾ…པེ॰… དཱཏབྦ’’ནྟི། ཏནྟི པརིཀྑཱརཾ།
Sabbepi bhikkhūti sambandho. Tatthāti tasmiṃ kālaṅkate. Kiṃ vadanti? ‘‘Sabbepi…pe… sāmino’’ti vadantīti yojanā. Dvīsu vādesu pacchimavādo aṭṭhakathācariyena ruccatīti vadanti. Yanti yaṃ vatthu. ‘‘Yaṃ atthi, taṃ dātabba’’nti vuttamevatthaṃ āvikaronto āha ‘‘aññasmiṃ…pe… dātabba’’nti. Tanti parikkhāraṃ.
སམཀོཏི སམཾ པམཱཎམེཏསྶ བྷཱགསྶཱཏི སམཀོ། སཾཝིདཧནམཏྟམེཝཱཏི ཨིདཉྩིདཉྩ ཀརོཧཱིཏི སཛྫནམཏྟམེཝ། ཛེཊྛཀབྷཱགོཏི དིགུཎབྷཱགོ།
Samakoti samaṃ pamāṇametassa bhāgassāti samako. Saṃvidahanamattamevāti idañcidañca karohīti sajjanamattameva. Jeṭṭhakabhāgoti diguṇabhāgo.
ཡོ པནཱཏི བྷིཀྑུ པན། ཨེཏྠཱཏི བཧཱུསུ བྷིཀྑཱུསུ། ཡེནཱཏི ཡེན ཀེནཙི, དིནྣཾ པཊིཡཱདིཏནྟི སམྦནྡྷོ། ཨེཀདིཝསམྤཱིཏི པིསདྡོ པགེཝ དྭཱིཧཱདིཀེཏི དསྶེཏི། སོཔཱིཏི པིསདྡོ ན ཀེཝལཾ བཧུདིཝསཾ ཨུཔཊྛཱཀོཡེཝ, ཨཐ ཁོ སོཔཱིཏི དསྶེཏི། སམཱིཔནྟི གིལཱནསྶ སནྟིཀཾ། ཨཱགཙྪཏཱིཏི སམཱིཔམཱགཙྪཏི།
Yo panāti bhikkhu pana. Etthāti bahūsu bhikkhūsu. Yenāti yena kenaci, dinnaṃ paṭiyāditanti sambandho. Ekadivasampīti pisaddo pageva dvīhādiketi dasseti. Sopīti pisaddo na kevalaṃ bahudivasaṃ upaṭṭhākoyeva, atha kho sopīti dasseti. Samīpanti gilānassa santikaṃ. Āgacchatīti samīpamāgacchati.
པཙྩཱསཱིསཱཡཱཏི བྷཱགསྶ པཙྩཱསཱིསཱཡ། ‘‘པུན ཨཱགནྟྭཱ ཛགྒིསྶཱམཱི’’ཏི ཨིམིནཱ ‘‘པུན ཨཱགནྟྭཱ ན ཛགྒིསྶཱམཱི’’ཏི གཙྪནྟསྶ ན དཱཏབྦནྟི དསྶེཏི། དྷུརཾ ནིཀྑིཔིཏྭཱཏི ཨུཔཊྛཧནེ དྷུརཾ ནིཀྑིཔིཏྭཱ།
Paccāsīsāyāti bhāgassa paccāsīsāya. ‘‘Puna āgantvā jaggissāmī’’ti iminā ‘‘puna āgantvā na jaggissāmī’’ti gacchantassa na dātabbanti dasseti. Dhuraṃ nikkhipitvāti upaṭṭhahane dhuraṃ nikkhipitvā.
མཱཏུགཱམོཔི ཧོཏཱུཏི ཡོཛནཱ། ཏསྶ བྷིཀྑུནོཏི ཀཱལངྐཏསྶ ཏསྶ བྷིཀྑུནོ། སཙེཔི སཧསྶཾ ཨགྒྷཏི, གིལཱནུཔཊྛཱཀཱནཾཡེཝ དཱཏབྦནྟི ཡོཛནཱ། ཨཉྙནྟི པཏྟཙཱིཝརཏོ ཨཉྙཾ། ཏེཏི གིལཱནུཔཊྛཱཀཱ། ཨཝསེསནྟི པཏྟཙཱིཝརཏོ ཨཝསེསཾ། ཏཏོཏི བཧུཀམཧགྒྷཏོ། ཏིཙཱིཝརཔརིཀྑཱརོཏི ཏིཎྞཾ ཙཱིཝརཱནཾ པརིཝཱརོ། སབྦཉྩེཏནྟི སབྦམེཝ ཨེཏཾ པརིཀྑཱརཾ། ལབྷཏཱིཏི གིལཱནུཔཊྛཱཀོ ལབྷཏི།
Mātugāmopi hotūti yojanā. Tassa bhikkhunoti kālaṅkatassa tassa bhikkhuno. Sacepi sahassaṃ agghati, gilānupaṭṭhākānaṃyeva dātabbanti yojanā. Aññanti pattacīvarato aññaṃ. Teti gilānupaṭṭhākā. Avasesanti pattacīvarato avasesaṃ. Tatoti bahukamahagghato. Ticīvaraparikkhāroti tiṇṇaṃ cīvarānaṃ parivāro. Sabbañcetanti sabbameva etaṃ parikkhāraṃ. Labhatīti gilānupaṭṭhāko labhati.
སོཏི ཀཱལངྐཏོ། ཀསྶཙཱིཏི གཧཊྛསྶ ཝཱ པབྦཛིཏསྶ ཝཱ། ཏསྶེཝཱཏི དིནྣགཱཧཀསྶེཝ། རུཙིཡཱ ཨེཝཱཏི ཀཱམཱ ཨེཝ། ཏཏྠ ཏཏྠ སངྒྷསྶེཝཱཏི ཏསྨིཾ ཏསྨིཾ ཝིཧཱརེ ཋིཏསྶ སངྒྷསྶེཝ། ཨིདཾ ཝིཧཱརེ ཋཔིཏཔརིཀྑཱརེ སནྡྷཱཡ ཝུཏྟཾ། སཙེ གཱམེ ཝཱ ཨརཉྙེ ཝཱ ཋཔིཏཱ ཧོནྟི, སཀལོཝ སངྒྷོ ཨིསྶརོ། ཀསྨཱ? སངྒྷསྶེཝ དཱཡཛྫབྷཱཝཏོ། བཧཱུནམྤཱིཏི ཏཱིཧི པཊྛཱཡ བཧཱུནམྤི། ཨཱིདིསཝཙནཾ ཨུཔནིདྷཱཡ སཱསནེཔི ཨེཀོ དྭེ བཧཱུཏི ཏཱིཎི ཝཙནཱནི ཨཏྠེ དིསྶནྟི, སདྡེ པན དྭིཝཙནབཧུཝཙནཱནཾ ཝིསེསཱབྷཱཝཏོ དྭིཝཙནཾ ནཏྠཱིཏི དཊྛབྦཾ། ཨདིནྣམེཝཱཏི ཨཏྟནོཡེཝ ཨསནྟཀཏྟཱ, ཨཉྙེསམྤི སཱདྷཱརཎཏྟཱ ཙ ཨདིནྣམེཝ། སཙེ སབྦེ མཏཱ ཨནུམཏིཡཱ དེནྟི, སུདིནྣམེཝ། ཏནྟི སནྟཀཾ། ཏེསཱུཏི ཏེསུ སབྦེསུ།
Soti kālaṅkato. Kassacīti gahaṭṭhassa vā pabbajitassa vā. Tassevāti dinnagāhakasseva. Ruciyā evāti kāmā eva. Tattha tattha saṅghassevāti tasmiṃ tasmiṃ vihāre ṭhitassa saṅghasseva. Idaṃ vihāre ṭhapitaparikkhāre sandhāya vuttaṃ. Sace gāme vā araññe vā ṭhapitā honti, sakalova saṅgho issaro. Kasmā? Saṅghasseva dāyajjabhāvato. Bahūnampīti tīhi paṭṭhāya bahūnampi. Īdisavacanaṃ upanidhāya sāsanepi eko dve bahūti tīṇi vacanāni atthe dissanti, sadde pana dvivacanabahuvacanānaṃ visesābhāvato dvivacanaṃ natthīti daṭṭhabbaṃ. Adinnamevāti attanoyeva asantakattā, aññesampi sādhāraṇattā ca adinnameva. Sace sabbe matā anumatiyā denti, sudinnameva. Tanti santakaṃ. Tesūti tesu sabbesu.
Related texts:
ཏིཔིཊཀ (མཱུལ) • Tipiṭaka (Mūla) / ཝིནཡཔིཊཀ • Vinayapiṭaka / མཧཱཝགྒཔཱལི༹ • Mahāvaggapāḷi / ༢༢༥. མཏསནྟཀཀཐཱ • 225. Matasantakakathā
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / མཧཱཝགྒ-ཨཊྛཀཐཱ • Mahāvagga-aṭṭhakathā / མཏསནྟཀཀཐཱ • Matasantakakathā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / མཏསནྟཀཀཐཱཝཎྞནཱ • Matasantakakathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / མཏསནྟཀཀཐཱཝཎྞནཱ • Matasantakakathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / མཏསནྟཀཀཐཱདིཝཎྞནཱ • Matasantakakathādivaṇṇanā
