| Library / Tipiṭaka / திபிடக • Tipiṭaka / வஜிரபு³த்³தி⁴-டீகா • Vajirabuddhi-ṭīkā |
மதஸந்தககதா²வண்ணனா
Matasantakakathāvaṇṇanā
369. பி⁴க்கு²ஸ்ஸாதி பி⁴க்கு²ஸ்மிங் காலங்கதே. தத்த² ‘‘பத்தசீவரே’’தி பதா⁴னபரிக்கா²ரத³ஸ்ஸனமுகே²ன ஸப்³ப³பரிக்கா²ரனித³ஸ்ஸனந்தி வேதி³தப்³ப³ங். அத⁴ம்மேன உப்பன்னஞ்சேதங் ஹோதி, ஸங்க⁴ஸ்ஸ கப்பியமேவ மதத்தாதி ஏகே. நோதி தக்கோ பத்தசதுக்கே ஸப்³ப³தா² அகப்பியபத்தனயவிரோத⁴தோ. அத⁴ம்மேன உப்பன்னஸேனாஸனே ச வஸதோ அனாபத்தி. அஞ்ஞதரஸ்மிங் ஆவாஸே த்³வே பி⁴க்கூ² வஸந்தி, தத்த² சேகோ காலங்கதோ, இதரோ தஸ்ஸ பரிக்கா²ரங் அபாபெத்வா தங் தெ²ய்யசித்தேன க³ண்ஹாதி, ஸங்க⁴ஸந்தகங் க³ஹிதங் ஹோதி, ப⁴ண்ட³க்³கே⁴ன காரேதப்³போ³. அனாவாஸே க³ண்ஹாதி, ந காரேதப்³போ³ அஸ்ஸாமிகஸ்ஸ க³ஹிதத்தா. மரணஸமயே வத்துங் அஸஹந்தோ சே சித்தேனேவ தே³தி, புஞ்ஞங் பஸவதி, ஸங்கோ⁴வ தஸ்ஸ ஸாமீ. பரோ வா அவிஸ்ஸாஸிகோ ஸயமேவ க³ண்ஹாதி, க³ஹணங் ந ருஹதி, தெ²ய்யசித்தேன சே, ப⁴ண்ட³க்³கே⁴ன காரேதப்³போ³. தஸ்ஸ ச ஆவாஸக³தஸ்ஸ கோ ஸாமீ. ‘‘ஸங்கோ⁴ ஸாமீ’’தி வசனதோ ஸங்கே⁴ன ப³லக்காரேன ஸோ வாரேதப்³போ³தி ஏகே. ஜீவமானகாலே க³ஹிதத்தா ந ஸங்கோ⁴ ஸாமீதி ஏகே. ஸாமிகோ சே ஸயங் பஸ்ஸித்வா அச்சி²ந்தி³துங் லப⁴தி, ஸங்கோ⁴பி லப⁴தி ஸாமிடா²னே டி²தத்தாதி இதரே, விசாரெத்வா க³ஹேதப்³ப³ங்.
369.Bhikkhussāti bhikkhusmiṃ kālaṃkate. Tattha ‘‘pattacīvare’’ti padhānaparikkhāradassanamukhena sabbaparikkhāranidassananti veditabbaṃ. Adhammena uppannañcetaṃ hoti, saṅghassa kappiyameva matattāti eke. Noti takko pattacatukke sabbathā akappiyapattanayavirodhato. Adhammena uppannasenāsane ca vasato anāpatti. Aññatarasmiṃ āvāse dve bhikkhū vasanti, tattha ceko kālaṃkato, itaro tassa parikkhāraṃ apāpetvā taṃ theyyacittena gaṇhāti, saṅghasantakaṃ gahitaṃ hoti, bhaṇḍagghena kāretabbo. Anāvāse gaṇhāti, na kāretabbo assāmikassa gahitattā. Maraṇasamaye vattuṃ asahanto ce citteneva deti, puññaṃ pasavati, saṅghova tassa sāmī. Paro vā avissāsiko sayameva gaṇhāti, gahaṇaṃ na ruhati, theyyacittena ce, bhaṇḍagghena kāretabbo. Tassa ca āvāsagatassa ko sāmī. ‘‘Saṅgho sāmī’’ti vacanato saṅghena balakkārena so vāretabboti eke. Jīvamānakāle gahitattā na saṅgho sāmīti eke. Sāmiko ce sayaṃ passitvā acchindituṃ labhati, saṅghopi labhati sāmiṭhāne ṭhitattāti itare, vicāretvā gahetabbaṃ.
மதகஸ்ஸ ஹிரஞ்ஞாதி³அகப்பியப⁴ண்ட³ங் ஹோதி. உக்³க³ஹிதஞ்சேதங் ஹோதி, உக்³க³ஹிதே வுத்தனயேன படிபஜ்ஜிதப்³ப³ங். த⁴ம்மேன உப்பன்னங் சே, கப்பியகாரகோ ஆசிக்கி²தப்³போ³. தா³ஸோ சே க³ஹிதோ ஹோதி, ந ஸங்கோ⁴ ஸாமீ, ஆராமிகோ சே, ஸங்கோ⁴ ஸாமீ. கா³வீமஹிங்ஸீஆத³யோ ஹொந்தி, ஆவாஸக³தானங் ஸங்கோ⁴ ஸாமீ, அனாவாஸக³தானங் ந ஸங்கோ⁴ ஸாமீ. ஸங்கோ⁴ சே ஆவாஸங் ஆனெத்வா அத்தனோ ஸந்தகங் கத்வா பச்சா² ஸமீபே ப³ஹிஸீமாய ட²பேதி, காரகஸங்கோ⁴ ஸாமீ, ததா² ஆராமிகே. மதகஸ்ஸ பரிக்கா²ரோ நிக்கே²பவஸேன ட²பிதோ ஹோதி, ஏஸோவ ஸாமீ. மஹக்³கோ⁴ சே ஹோதி, ஸேஸஸ்ஸ ஸங்கோ⁴ ஸாமீ. ‘‘கேனசி கி³லானுபட்டா²கேனா’’தி வத்தப்³ப³க்கமோ ஏதேன த³ஸ்ஸிதோ. புன உபட்டா²கானங் ப³ஹுபா⁴வே ஸதி ஸப்³பே³ஸங் தா³தப்³ப³கம்மங் த³ஸ்ஸெந்தேன ப⁴க³வதா கம்மவாசாயங் ‘‘கி³லானுபட்டா²கான’’ந்தி வுத்தங். ஸாமணேரவாரே ‘‘சீவர’’ந்தி பாடோ². ‘‘இமங் துய்ஹங் தே³மி த³தா³மி த³ஜ்ஜாமி ஓணோஜேமி பரிச்சஜாமி விஸ்ஸஜ்ஜாமி நிஸ்ஸஜ்ஜாமீ’தி வா ‘இத்த²ன்னாமஸ்ஸ தே³மி…பே॰… நிஸ்ஸஜ்ஜாமீ’தி வா வத³தி, ‘ஸம்முகா² வா பரம்முகா² வா வுத்தே தி³ன்னங்யேவ ஹோதீ’தி தா³னலக்க²ணஸ்ஸ ச ‘துய்ஹங் க³ண்ஹாஹீ’தி வுத்தே ‘மய்ஹங் க³ண்ஹாமீ’தி வத³தி, ‘ஸுதி³ன்னங் ஸுக்³க³ஹிதஞ்சா’தி (பாரா॰ அட்ட²॰ 2.469) க³ஹணலக்க²ணஸ்ஸ ச வுத்தத்தா ‘மம ஸந்தகங் தவ ச மம ச ஹோதூ’தி ஏவமாதி³வசனேன ஸமானபரிக்கா²ரங் காதுங் வட்டதீதி ஆசரியா’’தி லிகி²தங்.
Matakassa hiraññādiakappiyabhaṇḍaṃ hoti. Uggahitañcetaṃ hoti, uggahite vuttanayena paṭipajjitabbaṃ. Dhammena uppannaṃ ce, kappiyakārako ācikkhitabbo. Dāso ce gahito hoti, na saṅgho sāmī, ārāmiko ce, saṅgho sāmī. Gāvīmahiṃsīādayo honti, āvāsagatānaṃ saṅgho sāmī, anāvāsagatānaṃ na saṅgho sāmī. Saṅgho ce āvāsaṃ ānetvā attano santakaṃ katvā pacchā samīpe bahisīmāya ṭhapeti, kārakasaṅgho sāmī, tathā ārāmike. Matakassa parikkhāro nikkhepavasena ṭhapito hoti, esova sāmī. Mahaggho ce hoti, sesassa saṅgho sāmī. ‘‘Kenaci gilānupaṭṭhākenā’’ti vattabbakkamo etena dassito. Puna upaṭṭhākānaṃ bahubhāve sati sabbesaṃ dātabbakammaṃ dassentena bhagavatā kammavācāyaṃ ‘‘gilānupaṭṭhākāna’’nti vuttaṃ. Sāmaṇeravāre ‘‘cīvara’’nti pāṭho. ‘‘Imaṃ tuyhaṃ demi dadāmi dajjāmi oṇojemi pariccajāmi vissajjāmi nissajjāmī’ti vā ‘itthannāmassa demi…pe… nissajjāmī’ti vā vadati, ‘sammukhā vā parammukhā vā vutte dinnaṃyeva hotī’ti dānalakkhaṇassa ca ‘tuyhaṃ gaṇhāhī’ti vutte ‘mayhaṃ gaṇhāmī’ti vadati, ‘sudinnaṃ suggahitañcā’ti (pārā. aṭṭha. 2.469) gahaṇalakkhaṇassa ca vuttattā ‘mama santakaṃ tava ca mama ca hotū’ti evamādivacanena samānaparikkhāraṃ kātuṃ vaṭṭatīti ācariyā’’ti likhitaṃ.
அனுக³ண்டி²பதே³ பன அதீவ பபஞ்சங் கத்வா புன ‘‘இத³மெத்த² ஆசரியானங் ஸன்னிட்டா²னங் – ஸசேஸம்ப³ஹுலா, த்³வே வா ஸமானபரிக்கா²ரங் கத்துகாமா ஹொந்தி, தே ஸப்³பே³ அத்தனோ ஸந்தகங் வத்தமானங் உப்பஜ்ஜனகேன ஸத்³தி⁴ங் பேஸலஸ்ஸ ஏகஸ்ஸ பரிச்சஜந்தி, ஸோ புன தேஸமேவ பரிச்சஜதி, எத்தாவதா தே ஸமானபரிக்கா²ரிகா ஹொந்தீதி. இத³ங் ஸமானபரிக்கா²ரலக்க²ணங் பாளிஆதீ³ஸு வுத்தலக்க²ணேயேவ பதனதோ அசலப்பத்தங் ஹோதி, ததா²பி போராணவிதி⁴ங் அஜ்ஜொ²த்த²ரித்வா வத்தனதோ படிஸேதே⁴தப்³போ³, ஆசரியானங் மதானுஸாரேன காதப்³ப³ங் காதுகாமேனாதி அபரே’’தி வுத்தங், ‘‘வஸ்ஸங்வுத்த²ஸாமணேரோ பஞ்சஸு ஸிக்கா²பதே³ஸு ஏகங் அதிக்கமித்வா புன க³ஹிதோ லாப⁴ங் ந லப⁴தி, அந்திமவத்து²ங் அஜ்ஜா²பன்னோ நாம ஹோதீ’’தி வத³ந்தி.
Anugaṇṭhipade pana atīva papañcaṃ katvā puna ‘‘idamettha ācariyānaṃ sanniṭṭhānaṃ – sacesambahulā, dve vā samānaparikkhāraṃ kattukāmā honti, te sabbe attano santakaṃ vattamānaṃ uppajjanakena saddhiṃ pesalassa ekassa pariccajanti, so puna tesameva pariccajati, ettāvatā te samānaparikkhārikā hontīti. Idaṃ samānaparikkhāralakkhaṇaṃ pāḷiādīsu vuttalakkhaṇeyeva patanato acalappattaṃ hoti, tathāpi porāṇavidhiṃ ajjhottharitvā vattanato paṭisedhetabbo, ācariyānaṃ matānusārena kātabbaṃ kātukāmenāti apare’’ti vuttaṃ, ‘‘vassaṃvutthasāmaṇero pañcasu sikkhāpadesu ekaṃ atikkamitvā puna gahito lābhaṃ na labhati, antimavatthuṃ ajjhāpanno nāma hotī’’ti vadanti.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 225. மதஸந்தககதா² • 225. Matasantakakathā
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / மதஸந்தககதா² • Matasantakakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / மதஸந்தககதா²வண்ணனா • Matasantakakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / மதஸந்தககதா²தி³வண்ணனா • Matasantakakathādivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 225. மதஸந்தககதா² • 225. Matasantakakathā
