| Library / Tipiṭaka / д̇ибидага • Tipiṭaka / бадисамбхид̣̇аамаг̇г̇абаал̣и • Paṭisambhidāmaggapāḷi |
10. маад̇игаагат̇аа
10. Mātikākathā
41. нижчаад̇од̇и нзгкаммзна гаамажчанд̣̇ад̇о нижчаад̇о, аб̣яаабаад̣̇зна б̣яаабаад̣̇ад̇о нижчаад̇о…бз… батамзна жхаанзна нийваран̣зхи нижчаад̇о…бз… арахад̇д̇амаг̇г̇зна саб̣б̣агилзсзхи нижчаад̇о.
41.Nicchātoti nekkhammena kāmacchandato nicchāto, abyāpādena byāpādato nicchāto…pe… paṭhamena jhānena nīvaraṇehi nicchāto…pe… arahattamaggena sabbakilesehi nicchāto.
могко вимогкод̇и нзгкаммзна гаамажчанд̣̇ад̇о мужжад̇ийд̇и – могко вимогко. аб̣яаабаад̣̇зна б̣яаабаад̣̇ад̇о мужжад̇ийд̇и – могко вимогко…бз… батамзна жхаанзна нийваран̣зхи мужжад̇ийд̇и – могко вимогко…бз… арахад̇д̇амаг̇г̇зна саб̣б̣агилзсзхи мужжад̇ийд̇и – могко вимогко.
Mokkho vimokkhoti nekkhammena kāmacchandato muccatīti – mokkho vimokkho. Abyāpādena byāpādato muccatīti – mokkho vimokkho…pe… paṭhamena jhānena nīvaraṇehi muccatīti – mokkho vimokkho…pe… arahattamaggena sabbakilesehi muccatīti – mokkho vimokkho.
виж̇ж̇аавимуд̇д̇ийд̇и нзгкаммам̣ виж̇ж̇ад̇ийд̇и виж̇ж̇аа, гаамажчанд̣̇ад̇о мужжад̇ийд̇и вимуд̇д̇и. виж̇ж̇анд̇о мужжад̇и, мужжанд̇о виж̇ж̇ад̇ийд̇и – виж̇ж̇аавимуд̇д̇и. аб̣яаабаад̣̇о 5 виж̇ж̇ад̇ийд̇и виж̇ж̇аа, б̣яаабаад̣̇ад̇о вимужжад̇ийд̇и вимуд̇д̇и. виж̇ж̇анд̇о мужжад̇и, мужжанд̇о виж̇ж̇ад̇ийд̇и – виж̇ж̇аавимуд̇д̇и…бз… арахад̇д̇амаг̇г̇о виж̇ж̇ад̇ийд̇и виж̇ж̇аа, саб̣б̣агилзсзхи мужжад̇ийд̇и вимуд̇д̇и. виж̇ж̇анд̇о мужжад̇и, мужжанд̇о виж̇ж̇ад̇ийд̇и – виж̇ж̇аавимуд̇д̇и.
Vijjāvimuttīti nekkhammaṃ vijjatīti vijjā, kāmacchandato muccatīti vimutti. Vijjanto muccati, muccanto vijjatīti – vijjāvimutti. Abyāpādo 6 vijjatīti vijjā, byāpādato vimuccatīti vimutti. Vijjanto muccati, muccanto vijjatīti – vijjāvimutti…pe… arahattamaggo vijjatīti vijjā, sabbakilesehi muccatīti vimutti. Vijjanto muccati, muccanto vijjatīti – vijjāvimutti.
ад̇хисийлам̣ ад̇хижид̇д̇ам̣ ад̇хибан̃н̃аад̇и нзгкаммзна гаамажчанд̣̇ам̣, сам̣варадтзна сийлависуд̣̇д̇хи, авигкзбадтзна жид̇д̇ависуд̣̇д̇хи, д̣̇ассанадтзна д̣̇идтивисуд̣̇д̇хи. яо д̇ад̇т̇а сам̣варадто, аяам̣ ад̇хисийласигкаа . яо д̇ад̇т̇а авигкзбадто, аяам̣ ад̇хижид̇д̇асигкаа. яо д̇ад̇т̇а д̣̇ассанадто, аяам̣ ад̇хибан̃н̃аасигкаа. аб̣яаабаад̣̇зна б̣яаабаад̣̇ам̣ сам̣варадтзна сийлависуд̣̇д̇хи…бз… арахад̇д̇амаг̇г̇зна саб̣б̣агилзсз сам̣варадтзна сийлависуд̣̇д̇хи, авигкзбадтзна жид̇д̇ависуд̣̇д̇хи. д̣̇ассанадтзна д̣̇идтивисуд̣̇д̇хи. яо д̇ад̇т̇а сам̣варадто, аяам̣ ад̇хисийласигкаа. яо д̇ад̇т̇а авигкзбадто, аяам̣ ад̇хижид̇д̇асигкаа. яо д̇ад̇т̇а д̣̇ассанадто, аяам̣ ад̇хибан̃н̃аасигкаа.
Adhisīlaṃ adhicittaṃ adhipaññāti nekkhammena kāmacchandaṃ, saṃvaraṭṭhena sīlavisuddhi, avikkhepaṭṭhena cittavisuddhi, dassanaṭṭhena diṭṭhivisuddhi. Yo tattha saṃvaraṭṭho, ayaṃ adhisīlasikkhā . Yo tattha avikkhepaṭṭho, ayaṃ adhicittasikkhā. Yo tattha dassanaṭṭho, ayaṃ adhipaññāsikkhā. Abyāpādena byāpādaṃ saṃvaraṭṭhena sīlavisuddhi…pe… arahattamaggena sabbakilese saṃvaraṭṭhena sīlavisuddhi, avikkhepaṭṭhena cittavisuddhi. Dassanaṭṭhena diṭṭhivisuddhi. Yo tattha saṃvaraṭṭho, ayaṃ adhisīlasikkhā. Yo tattha avikkhepaṭṭho, ayaṃ adhicittasikkhā. Yo tattha dassanaṭṭho, ayaṃ adhipaññāsikkhā.
бассад̣̇д̇хийд̇и нзгкаммзна гаамажчанд̣̇ам̣ бадиббассамбхзд̇и, аб̣яаабаад̣̇зна б̣яаабаад̣̇ам̣ бадиббассамбхзд̇и…бз… арахад̇д̇амаг̇г̇зна саб̣б̣агилзсз бадиббассамбхзд̇и.
Passaddhīti nekkhammena kāmacchandaṃ paṭippassambheti, abyāpādena byāpādaṃ paṭippassambheti…pe… arahattamaggena sabbakilese paṭippassambheti.
н̃аан̣анд̇и гаамажчанд̣̇асса бахийнад̇д̇аа нзгкаммам̣ н̃аад̇адтзна н̃аан̣ам̣ ; б̣яаабаад̣̇асса бахийнад̇д̇аа аб̣яаабаад̣̇о н̃аад̇адтзна н̃аан̣ам̣…бз… саб̣б̣агилзсаанам̣ бахийнад̇д̇аа арахад̇д̇амаг̇г̇о н̃аад̇адтзна н̃аан̣ам̣.
Ñāṇanti kāmacchandassa pahīnattā nekkhammaṃ ñātaṭṭhena ñāṇaṃ ; byāpādassa pahīnattā abyāpādo ñātaṭṭhena ñāṇaṃ…pe… sabbakilesānaṃ pahīnattā arahattamaggo ñātaṭṭhena ñāṇaṃ.
д̣̇ассананд̇и гаамажчанд̣̇асса бахийнад̇д̇аа нзгкаммам̣ д̣̇идтад̇д̇аа д̣̇ассанам̣. б̣яаабаад̣̇асса бахийнад̇д̇аа аб̣яаабаад̣̇о д̣̇идтад̇д̇аа д̣̇ассанам̣…бз… саб̣б̣агилзсаанам̣ бахийнад̇д̇аа арахад̇д̇амаг̇г̇о д̣̇идтад̇д̇аа д̣̇ассанам̣.
Dassananti kāmacchandassa pahīnattā nekkhammaṃ diṭṭhattā dassanaṃ. Byāpādassa pahīnattā abyāpādo diṭṭhattā dassanaṃ…pe… sabbakilesānaṃ pahīnattā arahattamaggo diṭṭhattā dassanaṃ.
висуд̣̇д̇хийд̇и гаамажчанд̣̇ам̣ баж̇аханд̇о нзгкаммзна висуж̇жхад̇и. б̣яаабаад̣̇ам̣ баж̇аханд̇о аб̣яаабаад̣̇зна висуж̇жхад̇и…бз… саб̣б̣агилзсз баж̇аханд̇о арахад̇д̇амаг̇г̇зна висуж̇жхад̇и.
Visuddhīti kāmacchandaṃ pajahanto nekkhammena visujjhati. Byāpādaṃ pajahanto abyāpādena visujjhati…pe… sabbakilese pajahanto arahattamaggena visujjhati.
нзгкамманд̇и гаамаанамзд̇ам̣ ниссаран̣ам̣, яад̣̇ид̣̇ам̣ нзгкаммам̣. руубаанамзд̇ам̣ ниссаран̣ам̣, яад̣̇ид̣̇ам̣ ааруббам̣. яам̣ ко бана гин̃жи бхууд̇ам̣ сан̇кад̇ам̣ бадижжасамуббаннам̣, нирод̇хо д̇асса нзгкаммам̣. б̣яаабаад̣̇асса аб̣яаабаад̣̇о нзгкаммам̣. т̇инамид̣̇д̇хасса аалогасан̃н̃аа нзгкаммам̣…бз… саб̣б̣агилзсаанам̣ арахад̇д̇амаг̇г̇о нзгкаммам̣.
Nekkhammanti kāmānametaṃ nissaraṇaṃ, yadidaṃ nekkhammaṃ. Rūpānametaṃ nissaraṇaṃ, yadidaṃ āruppaṃ. Yaṃ kho pana kiñci bhūtaṃ saṅkhataṃ paṭiccasamuppannaṃ, nirodho tassa nekkhammaṃ. Byāpādassa abyāpādo nekkhammaṃ. Thinamiddhassa ālokasaññā nekkhammaṃ…pe… sabbakilesānaṃ arahattamaggo nekkhammaṃ.
ниссаран̣анд̇и гаамаанамзд̇ам̣ ниссаран̣ам̣, яад̣̇ид̣̇ам̣ нзгкаммам̣. руубаанамзд̇ам̣ ниссаран̣ам̣, яад̣̇ид̣̇ам̣ ааруббам̣. яам̣ ко бана гин̃жи бхууд̇ам̣ сан̇кад̇ам̣ бадижжасамуббаннам̣, нирод̇хо д̇асса ниссаран̣ам̣. гаамажчанд̣̇асса нзгкаммам̣ ниссаран̣ам̣. б̣яаабаад̣̇асса аб̣яаабаад̣̇о ниссаран̣ам̣…бз… саб̣б̣агилзсаанам̣ арахад̇д̇амаг̇г̇о ниссаран̣ам̣.
Nissaraṇanti kāmānametaṃ nissaraṇaṃ, yadidaṃ nekkhammaṃ. Rūpānametaṃ nissaraṇaṃ, yadidaṃ āruppaṃ. Yaṃ kho pana kiñci bhūtaṃ saṅkhataṃ paṭiccasamuppannaṃ, nirodho tassa nissaraṇaṃ. Kāmacchandassa nekkhammaṃ nissaraṇaṃ. Byāpādassa abyāpādo nissaraṇaṃ…pe… sabbakilesānaṃ arahattamaggo nissaraṇaṃ.
бавивзгод̇и гаамажчанд̣̇асса нзгкаммам̣ бавивзго …бз… саб̣б̣агилзсаанам̣ арахад̇д̇амаг̇г̇о бавивзго .
Pavivekoti kāmacchandassa nekkhammaṃ paviveko …pe… sabbakilesānaṃ arahattamaggo paviveko .
воссаг̇г̇од̇и нзгкаммзна гаамажчанд̣̇ам̣ воссаж̇ж̇ад̇ийд̇и – воссаг̇г̇о. аб̣яаабаад̣̇зна б̣яаабаад̣̇ам̣ воссаж̇ж̇ад̇ийд̇и – воссаг̇г̇о…бз… арахад̇д̇амаг̇г̇зна саб̣б̣агилзсз воссаж̇ж̇ад̇ийд̇и – воссаг̇г̇о.
Vossaggoti nekkhammena kāmacchandaṃ vossajjatīti – vossaggo. Abyāpādena byāpādaṃ vossajjatīti – vossaggo…pe… arahattamaggena sabbakilese vossajjatīti – vossaggo.
жарияаад̇и гаамажчанд̣̇ам̣ баж̇аханд̇о нзгкаммзна жарад̇и. б̣яаабаад̣̇ам̣ баж̇аханд̇о аб̣яаабаад̣̇зна жарад̇и…бз… саб̣б̣агилзсз баж̇аханд̇о арахад̇д̇амаг̇г̇зна жарад̇и.
Cariyāti kāmacchandaṃ pajahanto nekkhammena carati. Byāpādaṃ pajahanto abyāpādena carati…pe… sabbakilese pajahanto arahattamaggena carati.
жхаанавимогкод̇и нзгкаммам̣ жхааяад̇ийд̇и – жхаанам̣. гаамажчанд̣̇ам̣ жхаабзд̇ийд̇и – жхаанам̣. жхааяанд̇о мужжад̇ийд̇и – жхаанавимогко. жхаабзнд̇о мужжад̇ийд̇и – жхаанавимогко. жхааяанд̇ийд̇и д̇хаммаа. жхаабзнд̇ийд̇и гилзсз. жхаад̇з жа жхаабз жа ж̇аанаад̇ийд̇и – жхаанажхааяий 7. аб̣яаабаад̣̇о жхааяад̇ийд̇и жхаанам̣. б̣яаабаад̣̇ам̣ жхаабзд̇ийд̇и – жхаанам̣…бз… аалогасан̃н̃аа жхааяад̇ийд̇и – жхаанам̣. т̇инамид̣̇д̇хам̣ жхаабзд̇ийд̇и – жхаанам̣…бз… арахад̇д̇амаг̇г̇о жхааяад̇ийд̇и – жхаанам̣. саб̣б̣агилзсз жхаабзд̇ийд̇и – жхаанам̣. жхааяанд̇о мужжад̇ийд̇и – жхаанавимогко. жхаабзнд̇о мужжад̇ийд̇и – жхаанавимогко. жхааяанд̇ийд̇и – д̇хаммаа. жхаабзнд̇ийд̇и – гилзсз. жхаад̇з жа жхаабз жа ж̇аанаад̇ийд̇и – жхаанажхааяий.
Jhānavimokkhoti nekkhammaṃ jhāyatīti – jhānaṃ. Kāmacchandaṃ jhāpetīti – jhānaṃ. Jhāyanto muccatīti – jhānavimokkho. Jhāpento muccatīti – jhānavimokkho. Jhāyantīti dhammā. Jhāpentīti kilese. Jhāte ca jhāpe ca jānātīti – jhānajhāyī 8. Abyāpādo jhāyatīti jhānaṃ. Byāpādaṃ jhāpetīti – jhānaṃ…pe… ālokasaññā jhāyatīti – jhānaṃ. Thinamiddhaṃ jhāpetīti – jhānaṃ…pe… arahattamaggo jhāyatīti – jhānaṃ. Sabbakilese jhāpetīti – jhānaṃ. Jhāyanto muccatīti – jhānavimokkho. Jhāpento muccatīti – jhānavimokkho. Jhāyantīti – dhammā. Jhāpentīti – kilese. Jhāte ca jhāpe ca jānātīti – jhānajhāyī.
42. бхааванаа ад̇хидтаанам̣ ж̇ийвид̇анд̇и гаамажчанд̣̇ам̣ баж̇аханд̇о нзгкаммам̣ бхаавзд̇ийд̇и – бхааванаасамбанно. нзгкаммавасзна жид̇д̇ам̣ ад̇хидтаад̇ийд̇и – ад̇хидтаанасамбанно. свааяам̣ звам̣ бхааванаасамбанно ад̇хидтаанасамбанно самам̣ ж̇ийвад̇и, но висамам̣; саммаа ж̇ийвад̇и, но мижчаа; висуд̣̇д̇хам̣ ж̇ийвад̇и, но гилидтанд̇и – ааж̇ийвасамбанно. свааяам̣ звам̣ бхааванаасамбанно ад̇хидтаанасамбанно ааж̇ийвасамбанно яан̃н̃ад̣̇зва барисам̣ убасан̇гамад̇и – яад̣̇и кад̇д̇ияабарисам̣ яад̣̇и б̣раахман̣абарисам̣ яад̣̇и г̇ахабад̇ибарисам̣ яад̣̇и саман̣абарисам̣ – висаарад̣̇о убасан̇гамад̇и аман̇губхууд̇о. д̇ам̣ гисса хзд̇у? д̇ат̇аа хи со бхааванаасамбанно ад̇хидтаанасамбанно ааж̇ийвасамбанно.
42.Bhāvanā adhiṭṭhānaṃ jīvitanti kāmacchandaṃ pajahanto nekkhammaṃ bhāvetīti – bhāvanāsampanno. Nekkhammavasena cittaṃ adhiṭṭhātīti – adhiṭṭhānasampanno. Svāyaṃ evaṃ bhāvanāsampanno adhiṭṭhānasampanno samaṃ jīvati, no visamaṃ; sammā jīvati, no micchā; visuddhaṃ jīvati, no kiliṭṭhanti – ājīvasampanno. Svāyaṃ evaṃ bhāvanāsampanno adhiṭṭhānasampanno ājīvasampanno yaññadeva parisaṃ upasaṅkamati – yadi khattiyaparisaṃ yadi brāhmaṇaparisaṃ yadi gahapatiparisaṃ yadi samaṇaparisaṃ – visārado upasaṅkamati amaṅkubhūto. Taṃ kissa hetu? Tathā hi so bhāvanāsampanno adhiṭṭhānasampanno ājīvasampanno.
б̣яаабаад̣̇ам̣ баж̇аханд̇о аб̣яаабаад̣̇ам̣ бхаавзд̇ийд̇и – бхааванаасамбанно…бз… т̇инамид̣̇д̇хам̣ баж̇аханд̇о аалогасан̃н̃ам̣ бхаавзд̇ийд̇и – бхааванаасамбанно…бз… уд̣̇д̇хажжам̣ баж̇аханд̇о авигкзбам̣ бхаавзд̇ийд̇и – бхааванаасамбанно…бз… вижигижчам̣ баж̇аханд̇о д̇хаммававад̇т̇аанам̣ бхаавзд̇ийд̇и – бхааванаасамбанно…бз… авиж̇ж̇ам̣ баж̇аханд̇о виж̇ж̇ам̣ бхаавзд̇ийд̇и – бхааванаасамбанно…бз… арад̇им̣ баж̇аханд̇о баамож̇ж̇ам̣ бхаавзд̇ийд̇и – бхааванаасамбанно…бз… нийваран̣з баж̇аханд̇о батамам̣ жхаанам̣ бхаавзд̇ийд̇и – бхааванаасамбанно…бз… саб̣б̣агилзсз баж̇аханд̇о арахад̇д̇амаг̇г̇ам̣ бхаавзд̇ийд̇и – бхааванаасамбанно. арахад̇д̇амаг̇г̇авасзна жид̇д̇ам̣ ад̇хидтаад̇ийд̇и – ад̇хидтаанасамбанно. свааяам̣ звам̣ бхааванаасамбанно ад̇хидтаанасамбанно самам̣ ж̇ийвад̇и, но висамам̣; саммаа ж̇ийвад̇и, но мижчаа; висуд̣̇д̇хам̣ ж̇ийвад̇и, но гилидтанд̇и – ааж̇ийвасамбанно. свааяам̣ звам̣ бхааванаасамбанно ад̇хидтаанасамбанно ааж̇ийвасамбанно яан̃н̃ад̣̇зва барисам̣ убасан̇гамад̇и – яад̣̇и кад̇д̇ияабарисам̣ яад̣̇и б̣раахман̣абарисам̣ яад̣̇и г̇ахабад̇ибарисам̣ яад̣̇и саман̣абарисам̣ – висаарад̣̇о убасан̇гамад̇и аман̇губхууд̇о. д̇ам̣ гисса хзд̇у? д̇ат̇аа хи со бхааванаасамбанно ад̇хидтаанасамбанно ааж̇ийвасамбаннод̇и.
Byāpādaṃ pajahanto abyāpādaṃ bhāvetīti – bhāvanāsampanno…pe… thinamiddhaṃ pajahanto ālokasaññaṃ bhāvetīti – bhāvanāsampanno…pe… uddhaccaṃ pajahanto avikkhepaṃ bhāvetīti – bhāvanāsampanno…pe… vicikicchaṃ pajahanto dhammavavatthānaṃ bhāvetīti – bhāvanāsampanno…pe… avijjaṃ pajahanto vijjaṃ bhāvetīti – bhāvanāsampanno…pe… aratiṃ pajahanto pāmojjaṃ bhāvetīti – bhāvanāsampanno…pe… nīvaraṇe pajahanto paṭhamaṃ jhānaṃ bhāvetīti – bhāvanāsampanno…pe… sabbakilese pajahanto arahattamaggaṃ bhāvetīti – bhāvanāsampanno. Arahattamaggavasena cittaṃ adhiṭṭhātīti – adhiṭṭhānasampanno. Svāyaṃ evaṃ bhāvanāsampanno adhiṭṭhānasampanno samaṃ jīvati, no visamaṃ; sammā jīvati, no micchā; visuddhaṃ jīvati, no kiliṭṭhanti – ājīvasampanno. Svāyaṃ evaṃ bhāvanāsampanno adhiṭṭhānasampanno ājīvasampanno yaññadeva parisaṃ upasaṅkamati – yadi khattiyaparisaṃ yadi brāhmaṇaparisaṃ yadi gahapatiparisaṃ yadi samaṇaparisaṃ – visārado upasaṅkamati amaṅkubhūto. Taṃ kissa hetu? Tathā hi so bhāvanāsampanno adhiṭṭhānasampanno ājīvasampannoti.
маад̇игаагат̇аа нидтид̇аа.
Mātikākathā niṭṭhitā.
бан̃н̃ааваг̇г̇о д̇ад̇ияо.
Paññāvaggo tatiyo.
д̇ассуд̣̇д̣̇аанам̣ –
Tassuddānaṃ –
бан̃н̃аа ид̣̇д̇хи абхисамаяо, вивзго жарияабан̃жамо;
Paññā iddhi abhisamayo, viveko cariyapañcamo;
баадихаари самасийси, сад̇ибадтаанаа вибассанаа;
Pāṭihāri samasīsi, satipaṭṭhānā vipassanā;
д̇ад̇ияз бан̃н̃ааваг̇г̇амхи, маад̇игааяа жа д̇з д̣̇асаад̇и.
Tatiye paññāvaggamhi, mātikāya ca te dasāti.
махааваг̇г̇о яуг̇анад̣̇д̇хо, бан̃н̃ааваг̇г̇о жа наамад̇о;
Mahāvaggo yuganaddho, paññāvaggo ca nāmato;
ананд̇анаяамаг̇г̇зсу, г̇амбхийро сааг̇аруубамо;
Anantanayamaggesu, gambhīro sāgarūpamo;
набхан̃жа д̇аарагаагин̣н̣ам̣, т̇ууло ж̇аад̇ассаро яат̇аа;
Nabhañca tārakākiṇṇaṃ, thūlo jātassaro yathā;
гат̇игаанам̣ висаалааяа, яог̇ийнам̣ н̃аан̣аж̇од̇ананд̇и.
Kathikānaṃ visālāya, yogīnaṃ ñāṇajotananti.
бадисамбхид̣̇аамаг̇г̇абаал̣и нидтид̇аа.
Paṭisambhidāmaggapāḷi niṭṭhitā.
Footnotes:
Related texts:
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / куд̣̇д̣̇аганигааяа (адтагат̇аа) • Khuddakanikāya (aṭṭhakathā) / бадисамбхид̣̇аамаг̇г̇а-адтагат̇аа • Paṭisambhidāmagga-aṭṭhakathā / маад̇игаагат̇ааван̣н̣анаа • Mātikākathāvaṇṇanā
