| Library / Tipiṭaka / তিপিটক • Tipiṭaka / পটিসম্ভিদামগ্গ-অট্ঠকথা • Paṭisambhidāmagga-aṭṭhakathā |
১০. মাতিকাকথা
10. Mātikākathā
মাতিকাকথাৰণ্ণনা
Mātikākathāvaṇṇanā
৪০. ইদানি মহাথেরো ৰিপস্সনাকথানন্তরং সকলে পটিসম্ভিদামগ্গে নিদ্দিট্ঠে সমথৰিপস্সনামগ্গনিব্বানধম্মে আকারনানত্তৰসেন নানাপরিযাযেহি থোমেতুকামো নিচ্ছাতোতিআদীনি একূনৰীসতি মাতিকাপদানি উদ্দিসিত্ৰা তেসং নিদ্দেসৰসেন মাতিকাকথং নাম কথেসি। তস্সা অযং অপুব্বত্থানুৰণ্ণনা। মাতিকায তাৰ নিচ্ছাতোতি অমিলাতো। সব্বেপি হি কিলেসা পীল়াযোগতো মিলাতা, রাগোপি তাৰ নিরন্তরপ্পৰত্তো সরীরং দহতি, কিং পনঞ্ঞে কিলেসা । ‘‘তযোমে, ভিক্খৰে, অগ্গী রাগগ্গি দোসগ্গি মোহগ্গী’’তি (ইতিৰু॰ ৯৩; দী॰ নি॰ ৩.৩০৫) পন কিলেসনাযকা তযো এৰ কিলেসা ৰুত্তা, তংসম্পযুত্তাপি পন দহন্তিযেৰ। এৰং ছাতকিলেসাভাৰতো নিচ্ছাতো। কো সো? ৰিমোক্খসম্বন্ধেন ৰিমোক্খোতি দট্ঠব্বো। মুচ্চতীতি মোক্খো। ৰিমুচ্চতীতি ৰিমোক্খোতি অত্থো। ইদমেকং মাতিকাপদং। ৰিজ্জাৰিমুত্তীতি ৰিজ্জাযেৰ ৰিমুত্তি। ইদমেকং মাতিকাপদং। ঝানৰিমোক্খোতি ঝানমেৰ ৰিমোক্খো। ইদমেকং মাতিকাপদং। সেসানি একেকানেৰাতি এৰং একূনৰীসতি মাতিকাপদানি।
40. Idāni mahāthero vipassanākathānantaraṃ sakale paṭisambhidāmagge niddiṭṭhe samathavipassanāmagganibbānadhamme ākāranānattavasena nānāpariyāyehi thometukāmo nicchātotiādīni ekūnavīsati mātikāpadāni uddisitvā tesaṃ niddesavasena mātikākathaṃ nāma kathesi. Tassā ayaṃ apubbatthānuvaṇṇanā. Mātikāya tāva nicchātoti amilāto. Sabbepi hi kilesā pīḷāyogato milātā, rāgopi tāva nirantarappavatto sarīraṃ dahati, kiṃ panaññe kilesā . ‘‘Tayome, bhikkhave, aggī rāgaggi dosaggi mohaggī’’ti (itivu. 93; dī. ni. 3.305) pana kilesanāyakā tayo eva kilesā vuttā, taṃsampayuttāpi pana dahantiyeva. Evaṃ chātakilesābhāvato nicchāto. Ko so? Vimokkhasambandhena vimokkhoti daṭṭhabbo. Muccatīti mokkho. Vimuccatīti vimokkhoti attho. Idamekaṃ mātikāpadaṃ. Vijjāvimuttīti vijjāyeva vimutti. Idamekaṃ mātikāpadaṃ. Jhānavimokkhoti jhānameva vimokkho. Idamekaṃ mātikāpadaṃ. Sesāni ekekānevāti evaṃ ekūnavīsati mātikāpadāni.
৪১. নেক্খম্মেন কামচ্ছন্দতো নিচ্ছাতোতি নেক্খম্মেন কামচ্ছন্দতো অপেতত্তা কামচ্ছন্দতো নিক্কিলেসো যোগী। তেন পটিলদ্ধং নেক্খম্মম্পি নিচ্ছাতো নিক্কিলেসো ৰিমোক্খো। এৰং সেসেসুপি। নেক্খম্মেন কামচ্ছন্দতো মুচ্চতীতি ৰিমোক্খোতি নেক্খম্মেন কামচ্ছন্দতো যোগী মুচ্চতীতি তং নেক্খম্মং ৰিমোক্খোতি অত্থো। এৰং সেসেসুপি। ৰিজ্জতীতি ৰিজ্জাতি সভাৰতো ৰিজ্জতি অত্থি উপলব্ভতীতি ৰিজ্জা নামাতি অত্থো। অথ ৰা সভাৰজাননত্থং পটিপন্নেহি যোগীহি সভাৰং ৰেদীযতি জানীযতীতি ৰিজ্জা নামাতি অত্থো। অথ ৰা ৰিসেসলাভত্থং পটিপন্নেহি যোগীহি ৰেদীযতি পটিলাভীযতীতি ৰিজ্জা নামাতি অত্থো। অথ ৰা অত্তনা ৰিন্দিতব্বং ভূমিং ৰিন্দতি লভতীতি ৰিজ্জা নামাতি অত্থো। অথ ৰা সভাৰদস্সনহেতুত্তা সভাৰং ৰিদিতং করোতীতি ৰিজ্জা নামাতি অত্থো। ৰিজ্জন্তো মুচ্চতি, মুচ্চন্তো ৰিজ্জতীতি যথাৰুত্তো ধম্মো যথাৰুত্তেনত্থেন ৰিজ্জমানো যথাৰুত্ততো মুচ্চতি, যথাৰুত্ততো মুচ্চমানো যথাৰুত্তেনত্থেন ৰিজ্জতীতি ৰিজ্জাৰিমুত্তি নামাতি অত্থো।
41.Nekkhammena kāmacchandato nicchātoti nekkhammena kāmacchandato apetattā kāmacchandato nikkileso yogī. Tena paṭiladdhaṃ nekkhammampi nicchāto nikkileso vimokkho. Evaṃ sesesupi. Nekkhammena kāmacchandato muccatīti vimokkhoti nekkhammena kāmacchandato yogī muccatīti taṃ nekkhammaṃ vimokkhoti attho. Evaṃ sesesupi. Vijjatīti vijjāti sabhāvato vijjati atthi upalabbhatīti vijjā nāmāti attho. Atha vā sabhāvajānanatthaṃ paṭipannehi yogīhi sabhāvaṃ vedīyati jānīyatīti vijjā nāmāti attho. Atha vā visesalābhatthaṃ paṭipannehi yogīhi vedīyati paṭilābhīyatīti vijjā nāmāti attho. Atha vā attanā vinditabbaṃ bhūmiṃ vindati labhatīti vijjā nāmāti attho. Atha vā sabhāvadassanahetuttā sabhāvaṃ viditaṃ karotīti vijjā nāmāti attho. Vijjanto muccati, muccantovijjatīti yathāvutto dhammo yathāvuttenatthena vijjamāno yathāvuttato muccati, yathāvuttato muccamāno yathāvuttenatthena vijjatīti vijjāvimutti nāmāti attho.
কামচ্ছন্দং সংৰরট্ঠেনাতি কামচ্ছন্দনিৰারণট্ঠেন তং নেক্খম্মং সীলৰিসুদ্ধি নামাতি অত্থো। তংযেৰ অৰিক্খেপহেতুত্তা অৰিক্খেপট্ঠেন চিত্তৰিসুদ্ধি। দস্সনহেতুত্তা দস্সনট্ঠেন দিট্ঠিৰিসুদ্ধি। সেসেসুপি এসেৰ নযো। পটিপ্পস্সম্ভেতীতি নেক্খম্মাদিনা কামচ্ছন্দাদিকং যোগাৰচরো পটিপ্পস্সম্ভেতীতি নেক্খম্মাদিকো ধম্মো পস্সদ্ধি নামাতি অত্থো। পহীনত্তাতি তেন তেন পহানেন পহীনত্তা। ঞাতট্ঠেন ঞাণন্তি ঝানপচ্চৰেক্খণাৰসেন ৰিপস্সনাৰসেন মগ্গপচ্চৰেক্খণাৰসেন ঞাতট্ঠেন নেক্খম্মাদিকং ঞাণং নামাতি অত্থো। দিট্ঠত্তা দস্সনন্তি এত্থাপি এসেৰ নযো। ৰিসুজ্ঝতীতি যোগী, নেক্খম্মাদিকা ৰিসুদ্ধি।
Kāmacchandaṃ saṃvaraṭṭhenāti kāmacchandanivāraṇaṭṭhena taṃ nekkhammaṃ sīlavisuddhi nāmāti attho. Taṃyeva avikkhepahetuttā avikkhepaṭṭhena cittavisuddhi. Dassanahetuttā dassanaṭṭhena diṭṭhivisuddhi. Sesesupi eseva nayo. Paṭippassambhetīti nekkhammādinā kāmacchandādikaṃ yogāvacaro paṭippassambhetīti nekkhammādiko dhammo passaddhi nāmāti attho. Pahīnattāti tena tena pahānena pahīnattā. Ñātaṭṭhena ñāṇanti jhānapaccavekkhaṇāvasena vipassanāvasena maggapaccavekkhaṇāvasena ñātaṭṭhena nekkhammādikaṃ ñāṇaṃ nāmāti attho. Diṭṭhattā dassananti etthāpi eseva nayo. Visujjhatīti yogī, nekkhammādikā visuddhi.
নেক্খম্মনিদ্দেসে নেক্খম্মং অলোভত্তা কামরাগতো নিস্সটন্তি নিস্সরণং। ততো নিক্খন্তন্তি নেক্খম্মং। ‘‘রূপানমেতং নিস্সরণং যদিদং নেক্খম্ম’’ন্তি ৰুচ্চমানে আরুপ্পৰিসেসস্স অদিস্সনতো ৰিসেসস্স দস্সনত্থং অঞ্ঞত্থ ৰুত্তপাঠক্কমেনেৰ যদিদং আরুপ্পন্তি ৰুত্তং। তঞ্চ আরুপ্পং রূপতো নিক্খন্তত্তা নেক্খম্মং নামাতি অধিকারৰসেনেৰ ৰুত্তং হোতি। ভূতন্তি উপ্পাদসমাযোগদীপনং। সঙ্খতন্তি পচ্চযবলৰিসেসদস্সনং। পটিচ্চসমুপ্পন্নন্তি পচ্চযসমাযোগেপি পচ্চযানং অব্যাপারভাৰদস্সনং। নিরোধো তস্স নেক্খম্মন্তি নিব্বানং ততো সঙ্খততো নিক্খন্তত্তা তস্স সঙ্খতস্স নেক্খম্মং নাম। আরুপ্পস্স চ নিরোধস্স চ গহণং অঞ্ঞত্থ পাঠে ৰুত্তক্কমেনেৰ কতং। ‘‘কামচ্ছন্দস্স নেক্খম্মং নেক্খম্ম’’ন্তি ৰুচ্চমানে পুনরুত্তং হোতি। নেক্খম্মৰচনেনেৰ চ তস্স নেক্খম্মসিদ্ধীতি তং অৰত্ৰা সেসনেক্খম্মমেৰ ৰুত্তং। তং উজুকমেৰ। নিস্সরণনিদ্দেসেপি ইমিনাৰ নযেন অত্থো ৰেদিতব্বো। নিস্সরণীযা ধাতুযো পনেত্থ উজুকমেৰ নেক্খম্মন্তি ৰুত্তং। পৰিৰেকোতি পৰিৰিত্তভাৰো নেক্খম্মাদিকোযেৰ। ৰোসজ্জতীতি যোগী, নেক্খম্মাদযো ৰোসগ্গো। নেক্খম্মং পৰত্তেন্তো যোগী নেক্খম্মেন চরতীতি ৰুচ্চতি। তং পন নেক্খম্মং চরিযা। এস নযো সেসেসুপি। ঝানৰিমোক্খনিদ্দেসে ৰত্তব্বং ৰিমোক্খকথাযং ৰুত্তং। কেৰলং তত্থ ‘‘জানাতীতি ঝানৰিমোক্খো’’তি (পটি॰ ম॰ ১.২১৭) ৰুত্তং, ইধ পন ‘‘জানাতীতি, ঝাযতী’’তি পুগ্গলাধিট্ঠানাৰ দেসনা কতাতি অযং ৰিসেসো।
Nekkhammaniddese nekkhammaṃ alobhattā kāmarāgato nissaṭanti nissaraṇaṃ. Tato nikkhantanti nekkhammaṃ. ‘‘Rūpānametaṃ nissaraṇaṃ yadidaṃ nekkhamma’’nti vuccamāne āruppavisesassa adissanato visesassa dassanatthaṃ aññattha vuttapāṭhakkameneva yadidaṃ āruppanti vuttaṃ. Tañca āruppaṃ rūpato nikkhantattā nekkhammaṃ nāmāti adhikāravaseneva vuttaṃ hoti. Bhūtanti uppādasamāyogadīpanaṃ. Saṅkhatanti paccayabalavisesadassanaṃ. Paṭiccasamuppannanti paccayasamāyogepi paccayānaṃ abyāpārabhāvadassanaṃ. Nirodho tassa nekkhammanti nibbānaṃ tato saṅkhatato nikkhantattā tassa saṅkhatassa nekkhammaṃ nāma. Āruppassa ca nirodhassa ca gahaṇaṃ aññattha pāṭhe vuttakkameneva kataṃ. ‘‘Kāmacchandassa nekkhammaṃ nekkhamma’’nti vuccamāne punaruttaṃ hoti. Nekkhammavacaneneva ca tassa nekkhammasiddhīti taṃ avatvā sesanekkhammameva vuttaṃ. Taṃ ujukameva. Nissaraṇaniddesepi imināva nayena attho veditabbo. Nissaraṇīyā dhātuyo panettha ujukameva nekkhammanti vuttaṃ. Pavivekoti pavivittabhāvo nekkhammādikoyeva. Vosajjatīti yogī, nekkhammādayo vosaggo. Nekkhammaṃ pavattento yogī nekkhammena caratīti vuccati. Taṃ pana nekkhammaṃ cariyā. Esa nayo sesesupi. Jhānavimokkhaniddese vattabbaṃ vimokkhakathāyaṃ vuttaṃ. Kevalaṃ tattha ‘‘jānātīti jhānavimokkho’’ti (paṭi. ma. 1.217) vuttaṃ, idha pana ‘‘jānātīti, jhāyatī’’ti puggalādhiṭṭhānāva desanā katāti ayaṃ viseso.
৪২. ভাৰনাধিট্ঠানজীৰিতনিদ্দেসে চ পুগ্গলাধিট্ঠানা দেসনা কতা। ধম্মতো পন ভাৰনা নাম নেক্খম্মাদযোৰ। অধিট্ঠানং নাম নেক্খম্মাদিৰসেন পতিট্ঠাপিতচিত্তমেৰ। জীৰিতং নাম নেক্খম্মাদিৰসেন পতিট্ঠাপিতচিত্তস্স সম্মাআজীৰো নাম। কো সো সম্মাআজীৰো নাম ? মিচ্ছাজীৰা ৰিরতি, ধম্মেন সমেন পচ্চযপরিযেসনৰাযামো চ। তত্থ সমং জীৰতীতি সমং জীৰিতং জীৰতি, ভাৰনপুংসকৰচনং ৰা, সমেন জীৰতীতি ৰুত্তং হোতি। নো ৰিসমন্তি ‘‘সমং জীৰতী’’তি ৰুত্তস্সেৰ অত্থস্স পটিসেধৰসেন অৰধারণং কতং। সম্মা জীৰতীতি আকারনিদস্সনং। নো মিচ্ছাতি তস্সেৰ নিযমনং। ৰিসুদ্ধং জীৰতীতি সভাৰৰিসুদ্ধিযা ৰিসুদ্ধং জীৰিতং জীৰতি। নো কিলিট্ঠন্তি তস্সেৰ নিযমনং। যঞ্ঞদেৰাতিআদীহি যথাৰুত্তানং তিস্সন্নং সম্পদানং আনিসংসং দস্সেতি। তত্থ যঞ্ঞদেৰাতি যং যং এৰ। খত্তিযপরিসন্তি খত্তিযানং সন্নিপাতং। সো হি সমন্ততো সীদন্তি এত্থ অকতবুদ্ধিনোতি পরিসাতি ৰুচ্চতি। এসেৰ নযো ইতরত্তযে। খত্তিযাদীনংযেৰ আগমনসম্পত্তিযা ঞাণসম্পত্তিযা চ সমন্নাগতত্তা তাসংযেৰ চতস্সন্নং গহণং , ন সুদ্দপরিসায। ৰিসারদোতি তীহি সম্পদাহি সম্পন্নো ৰিগতসারজ্জো, নিব্ভযোতি অত্থো। অমঙ্কুভূতোতি অসঙ্কুচিতো ন নিত্তেজভূতো। তং কিস্স হেতূতি তং ৰিসারদত্তং কেন হেতুনা কেন কারণেন হোতীতি চেতি অত্থো। ইদানি তথা হীতি তস্স কারণৰচনং। যস্মা এৰং তিসম্পদাসম্পন্নো, তস্মা ‘‘ৰিসারদো হোতী’’তি ৰিসারদভাৰস্স কারণং দস্সেত্ৰা নিট্ঠপেসীতি।
42. Bhāvanādhiṭṭhānajīvitaniddese ca puggalādhiṭṭhānā desanā katā. Dhammato pana bhāvanā nāma nekkhammādayova. Adhiṭṭhānaṃ nāma nekkhammādivasena patiṭṭhāpitacittameva. Jīvitaṃ nāma nekkhammādivasena patiṭṭhāpitacittassa sammāājīvo nāma. Ko so sammāājīvo nāma ? Micchājīvā virati, dhammena samena paccayapariyesanavāyāmo ca. Tattha samaṃ jīvatīti samaṃ jīvitaṃ jīvati, bhāvanapuṃsakavacanaṃ vā, samena jīvatīti vuttaṃ hoti. No visamanti ‘‘samaṃ jīvatī’’ti vuttasseva atthassa paṭisedhavasena avadhāraṇaṃ kataṃ. Sammā jīvatīti ākāranidassanaṃ. No micchāti tasseva niyamanaṃ. Visuddhaṃ jīvatīti sabhāvavisuddhiyā visuddhaṃ jīvitaṃ jīvati. No kiliṭṭhanti tasseva niyamanaṃ. Yaññadevātiādīhi yathāvuttānaṃ tissannaṃ sampadānaṃ ānisaṃsaṃ dasseti. Tattha yaññadevāti yaṃ yaṃ eva. Khattiyaparisanti khattiyānaṃ sannipātaṃ. So hi samantato sīdanti ettha akatabuddhinoti parisāti vuccati. Eseva nayo itarattaye. Khattiyādīnaṃyeva āgamanasampattiyā ñāṇasampattiyā ca samannāgatattā tāsaṃyeva catassannaṃ gahaṇaṃ , na suddaparisāya. Visāradoti tīhi sampadāhi sampanno vigatasārajjo, nibbhayoti attho. Amaṅkubhūtoti asaṅkucito na nittejabhūto. Taṃ kissa hetūti taṃ visāradattaṃ kena hetunā kena kāraṇena hotīti ceti attho. Idāni tathā hīti tassa kāraṇavacanaṃ. Yasmā evaṃ tisampadāsampanno, tasmā ‘‘visārado hotī’’ti visāradabhāvassa kāraṇaṃ dassetvā niṭṭhapesīti.
সদ্ধম্মপ্পকাসিনিযা পটিসম্ভিদামগ্গ-অট্ঠকথায
Saddhammappakāsiniyā paṭisambhidāmagga-aṭṭhakathāya
মাতিকাকথাৰণ্ণনা নিট্ঠিতা।
Mātikākathāvaṇṇanā niṭṭhitā.
পঞ্ঞাৰগ্গৰণ্ণনা নিট্ঠিতা।
Paññāvaggavaṇṇanā niṭṭhitā.
নিট্ঠিতা চূল়ৰগ্গস্স অপুব্বত্থানুৰণ্ণনা।
Niṭṭhitā cūḷavaggassa apubbatthānuvaṇṇanā.
এত্তাৰতা চ তিৰগ্গসঙ্গহিতস্স
Ettāvatā ca tivaggasaṅgahitassa
সমতিংসকথাপটিমণ্ডিতস্স্পটিসম্ভিদামগ্গস্স অত্থৰণ্ণনা নিট্ঠিতা হোতীতি।
Samatiṃsakathāpaṭimaṇḍitasspaṭisambhidāmaggassa atthavaṇṇanā niṭṭhitā hotīti.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / পটিসম্ভিদামগ্গপাল়ি • Paṭisambhidāmaggapāḷi / ১০. মাতিকাকথা • 10. Mātikākathā
