| Library / Tipiṭaka / திபிடக • Tipiṭaka / கு²த்³த³ஸிக்கா²-மூலஸிக்கா² • Khuddasikkhā-mūlasikkhā |
மாதிகாவண்ணனா
Mātikāvaṇṇanā
(க²-ஜ) இதா³னி ‘‘ஸமாதிக’’ந்தி வுத்தத்தா மாதிகங் தாவ த³ஸ்ஸேதுங் ‘‘பாராஜிகா ச சத்தாரோ’’திஆதி³ ஆரத்³த⁴ங். ஸப்³ப³ஸிக்கா²னங் பன மூலபூ⁴தத்தா அதி⁴ஸீலஸிக்கா²வ பட²மங் வுத்தா. ‘‘ஸீலே பதிட்டா²யா’’தி (ஸுங்॰ நி॰ 1.1.23, 192; பேடகோ॰ 22; மி॰ ப॰ 2.1.9) ஹி வுத்தங். தத்ராபி மஹாஸாவஜ்ஜத்தா, மூலச்சே²ஜ்ஜவஸேன பவத்தனதோ ச ஸப்³ப³பட²மங் ஜானிதப்³பா³தி பாராஜிகாவ பட²மங் வுத்தாதி. இதா³னி யதா²னிக்கி²த்தானி மாதிகாபதா³னி படிபாடியா வித்தா²ரெத்வா த³ஸ்ஸேதுங் ‘‘பாராஜிகா ச சத்தாரோ’’தி பட²மபத³ங் உத்³த⁴டங், தஸ்ஸாயமத்தோ² – பாராஜிகாதி பராஜிதா பராஜயமாபன்னா, ஸிக்கா²பத³ங் அதிக்கமித்வா தேனேவ ஆபத்திங் ஆபஜ்ஜித்வா, தாய வா பராஜயமாபாதி³தானமேதங் அதி⁴வசனங், தே பன சத்தாரோதி வுத்தங் ஹோதி.
(Kha-ja) idāni ‘‘samātika’’nti vuttattā mātikaṃ tāva dassetuṃ ‘‘pārājikā ca cattāro’’tiādi āraddhaṃ. Sabbasikkhānaṃ pana mūlabhūtattā adhisīlasikkhāva paṭhamaṃ vuttā. ‘‘Sīle patiṭṭhāyā’’ti (suṃ. ni. 1.1.23, 192; peṭako. 22; mi. pa. 2.1.9) hi vuttaṃ. Tatrāpi mahāsāvajjattā, mūlacchejjavasena pavattanato ca sabbapaṭhamaṃ jānitabbāti pārājikāva paṭhamaṃ vuttāti. Idāni yathānikkhittāni mātikāpadāni paṭipāṭiyā vitthāretvā dassetuṃ ‘‘pārājikā ca cattāro’’ti paṭhamapadaṃ uddhaṭaṃ, tassāyamattho – pārājikāti parājitā parājayamāpannā, sikkhāpadaṃ atikkamitvā teneva āpattiṃ āpajjitvā, tāya vā parājayamāpāditānametaṃ adhivacanaṃ, te pana cattāroti vuttaṃ hoti.
