Library / Tipiṭaka / д̇ибидага • Tipiṭaka / бзд̇авад̇т̇у-адтагат̇аа • Petavatthu-aṭṭhakathā

3. мад̇д̇аабзд̇ивад̇т̇уван̣н̣анаа

3. Mattāpetivatthuvaṇṇanā

наг̇г̇аа д̣̇уб̣б̣ан̣н̣аруубаасийд̇и ид̣̇ам̣ сад̇т̇ари ж̇зд̇аванз вихаранд̇з мад̇д̇ам̣ наама бзд̇им̣ аараб̣бха вуд̇д̇ам̣. саавад̇т̇ияам̣ гира ан̃н̃ад̇аро гудумб̣иго сад̣̇д̇хо басанно ахоси. д̇асса бхарияаа ассад̣̇д̇хаа аббасаннаа год̇ханаа ван̃жхаа жа ахоси наамзна мад̇д̇аа наама. ат̇а со гудумб̣иго гулавам̣суубажчзд̣̇анабхаязна сад̣̇исагулад̇о д̇иссам̣ наама ан̃н̃ам̣ ган̃н̃ам̣ аанзси. саа ахоси сад̣̇д̇хаа басаннаа саамино жа бияаа манаабаа, саа нажирассзва г̇аб̣бхиний худ̇ваа д̣̇асамаасажжаязна буд̇д̇ам̣ виж̇ааяи, ‘‘бхууд̇о’’д̇исса наамам̣ ахоси. саа г̇зхассааминий худ̇ваа жад̇д̇ааро бхигкуу саггажжам̣ убадтахи, ван̃жхаа бана д̇ам̣ усууяад̇и.

Naggā dubbaṇṇarūpāsīti idaṃ satthari jetavane viharante mattaṃ nāma petiṃ ārabbha vuttaṃ. Sāvatthiyaṃ kira aññataro kuṭumbiko saddho pasanno ahosi. Tassa bhariyā assaddhā appasannā kodhanā vañjhā ca ahosi nāmena mattā nāma. Atha so kuṭumbiko kulavaṃsūpacchedanabhayena sadisakulato tissaṃ nāma aññaṃ kaññaṃ ānesi. Sā ahosi saddhā pasannā sāmino ca piyā manāpā, sā nacirasseva gabbhinī hutvā dasamāsaccayena puttaṃ vijāyi, ‘‘bhūto’’tissa nāmaṃ ahosi. Sā gehassāminī hutvā cattāro bhikkhū sakkaccaṃ upaṭṭhahi, vañjhā pana taṃ usūyati.

д̇аа убхоби згасмим̣ д̣̇ивасз сийсам̣ нхад̇ваа аллагзсаа адтам̣су, гудумб̣иго г̇ун̣авасзна д̇иссааяа ааб̣ад̣̇д̇хасинзхо манун̃н̃зна хад̣̇аязна д̇ааяа сад̣̇д̇хим̣ б̣ахум̣ саллабанд̇о адтааси. д̇ам̣ асахамаанаа мад̇д̇аа иссаабагад̇аа г̇зхз саммаж̇ж̇ид̇ваа табид̇ам̣ сан̇гаарам̣ д̇иссааяа мад̇т̇агз огири. саа абарзна самаязна гаалам̣ гад̇ваа бзд̇аяонияам̣ ниб̣б̣ад̇д̇ид̇ваа ад̇д̇ано гаммаб̣алзна бан̃жавид̇хам̣ д̣̇угкам̣ анубхавад̇и. д̇ам̣ бана д̣̇угкам̣ баал̣ид̇о зва вин̃н̃ааяад̇и. ат̇згад̣̇ивасам̣ саа бзд̇ий сан̃жхааяа вийд̇ивад̇д̇ааяа г̇зхасса бидтибассз нхааяанд̇ияаа д̇иссааяа ад̇д̇аанам̣ д̣̇ассзси. д̇ам̣ д̣̇исваа д̇иссаа –

Tā ubhopi ekasmiṃ divase sīsaṃ nhatvā allakesā aṭṭhaṃsu, kuṭumbiko guṇavasena tissāya ābaddhasineho manuññena hadayena tāya saddhiṃ bahuṃ sallapanto aṭṭhāsi. Taṃ asahamānā mattā issāpakatā gehe sammajjitvā ṭhapitaṃ saṅkāraṃ tissāya matthake okiri. Sā aparena samayena kālaṃ katvā petayoniyaṃ nibbattitvā attano kammabalena pañcavidhaṃ dukkhaṃ anubhavati. Taṃ pana dukkhaṃ pāḷito eva viññāyati. Athekadivasaṃ sā petī sañjhāya vītivattāya gehassa piṭṭhipasse nhāyantiyā tissāya attānaṃ dassesi. Taṃ disvā tissā –

134.

‘‘наг̇г̇аа д̣̇уб̣б̣ан̣н̣аруубааси, гисаа д̇хаманисант̇ад̇аа;

‘‘Naggā dubbaṇṇarūpāsi, kisā dhamanisanthatā;

убпаасулигз гисигз, гаа ну д̇вам̣ ид̇ха д̇идтасий’’д̇и. –

Upphāsulike kisike, kā nu tvaṃ idha tiṭṭhasī’’ti. –

г̇аат̇ааяа бадибужчи. ид̇араа –

Gāthāya paṭipucchi. Itarā –

135.

‘‘ахам̣ мад̇д̇аа д̇увам̣ д̇иссаа, сабад̇д̇ий д̇з бурз ахум̣;

‘‘Ahaṃ mattā tuvaṃ tissā, sapattī te pure ahuṃ;

баабагаммам̣ гарид̇ваана, бзд̇алогам̣ ид̇о г̇ад̇аа’’д̇и. –

Pāpakammaṃ karitvāna, petalokaṃ ito gatā’’ti. –

г̇аат̇ааяа бадиважанам̣ ад̣̇ааси. д̇ад̇т̇а ахам̣ мад̇д̇аа д̇увам̣ д̇иссаад̇и ахам̣ мад̇д̇аа наама, д̇увам̣ д̇иссаа наама. бурзд̇и буримад̇д̇абхаавз. д̇зд̇и д̇уяхам̣ сабад̇д̇ий ахум̣, ахосинд̇и ад̇т̇о. буна д̇иссаа –

Gāthāya paṭivacanaṃ adāsi. Tattha ahaṃ mattā tuvaṃ tissāti ahaṃ mattā nāma, tuvaṃ tissā nāma. Pureti purimattabhāve. Teti tuyhaṃ sapattī ahuṃ, ahosinti attho. Puna tissā –

136.

‘‘гим̣ ну гааязна ваажааяа, манасаа д̣̇уггадам̣ гад̇ам̣;

‘‘Kiṃ nu kāyena vācāya, manasā dukkaṭaṃ kataṃ;

гиссагаммавибаагзна, бзд̇алогам̣ ид̇о г̇ад̇аа’’д̇и. –

Kissakammavipākena, petalokaṃ ito gatā’’ti. –

г̇аат̇ааяа гад̇агаммам̣ бужчи. буна ид̇араа –

Gāthāya katakammaṃ pucchi. Puna itarā –

137.

‘‘жан̣д̣ий жа парусаа жаасим̣, иссугий мажчарий сатаа;

‘‘Caṇḍī ca pharusā cāsiṃ, issukī maccharī saṭhā;

д̇аахам̣ д̣̇уруд̇д̇ам̣ вад̇ваана, бзд̇алогам̣ ид̇о г̇ад̇аа’’д̇и. –

Tāhaṃ duruttaṃ vatvāna, petalokaṃ ito gatā’’ti. –

г̇аат̇ааяа ад̇д̇анаа гад̇агаммам̣ аажигки. д̇ад̇т̇а жан̣д̣ийд̇и год̇ханаа. парусаад̇и парусаважанаа. аасинд̇и ахосим̣. д̇ааханд̇и д̇ам̣ ахам̣. д̣̇уруд̇д̇анд̇и д̣̇уб̣бхаасид̇ам̣ нирад̇т̇агаважанам̣. ид̇о барамби д̇аасам̣ важанабадиважанавасзнзва г̇аат̇аа бавад̇д̇аа –

Gāthāya attanā katakammaṃ ācikkhi. Tattha caṇḍīti kodhanā. Pharusāti pharusavacanā. Āsinti ahosiṃ. Tāhanti taṃ ahaṃ. Duruttanti dubbhāsitaṃ niratthakavacanaṃ. Ito parampi tāsaṃ vacanapaṭivacanavaseneva gāthā pavattā –

138.

‘‘саб̣б̣ам̣ ахамби ж̇аанаами, яат̇аа д̇вам̣ жан̣д̣игаа аху;

‘‘Sabbaṃ ahampi jānāmi, yathā tvaṃ caṇḍikā ahu;

ан̃н̃ан̃жа ко д̇ам̣ бужчаами, гзнааси бам̣сугунт̇ид̇аа.

Aññañca kho taṃ pucchāmi, kenāsi paṃsukunthitā.

139.

‘‘сийсам̣нхаад̇аа д̇увам̣ ааси, суживад̇т̇аа алан̇гад̇аа;

‘‘Sīsaṃnhātā tuvaṃ āsi, sucivatthā alaṅkatā;

ахан̃жа ко ад̇химад̇д̇ам̣, самалан̇гад̇ад̇араа д̇аяаа.

Ahañca kho adhimattaṃ, samalaṅkatatarā tayā.

140.

‘‘д̇ассаа мз бзгкамаанааяа, саамигзна саманд̇аяи;

‘‘Tassā me pekkhamānāya, sāmikena samantayi;

д̇ад̇о мз иссаа вибулаа, год̇хо мз самаж̇ааяат̇а.

Tato me issā vipulā, kodho me samajāyatha.

141.

‘‘д̇ад̇о бам̣сум̣ г̇ахзд̇ваана, бам̣сунаа д̇ан̃хи огирим̣;

‘‘Tato paṃsuṃ gahetvāna, paṃsunā tañhi okiriṃ;

д̇ассагаммавибаагзна, д̇знамхи бам̣сугунт̇ид̇аа.

Tassakammavipākena, tenamhi paṃsukunthitā.

142.

‘‘саб̣б̣ам̣ ахамби ж̇аанаами, бам̣сунаа мам̣ д̇вамогири;

‘‘Sabbaṃ ahampi jānāmi, paṃsunā maṃ tvamokiri;

ан̃н̃ан̃жа ко д̇ам̣ бужчаами, гзна каж̇ж̇аси гажчуяаа.

Aññañca kho taṃ pucchāmi, kena khajjasi kacchuyā.

143.

‘‘бхзсаж̇ж̇ахаарий убхаяо, вананд̇ам̣ аг̇амимхасз;

‘‘Bhesajjahārī ubhayo, vanantaṃ agamimhase;

д̇ван̃жа бхзсаж̇ж̇амаахари, ахан̃жа габигажчуно.

Tvañca bhesajjamāhari, ahañca kapikacchuno.

144.

‘‘д̇ассаа д̇яааж̇аанамаанааяа, сзяяам̣ д̇яаахам̣ самогирим̣;

‘‘Tassā tyājānamānāya, seyyaṃ tyāhaṃ samokiriṃ;

д̇ассагаммавибаагзна, д̇зна каж̇ж̇аами гажчуяаа.

Tassakammavipākena, tena khajjāmi kacchuyā.

145.

‘‘саб̣б̣ам̣ ахамби ж̇аанаами, сзяяам̣ мз д̇вам̣ самогири;

‘‘Sabbaṃ ahampi jānāmi, seyyaṃ me tvaṃ samokiri;

ан̃н̃ан̃жа ко д̇ам̣ бужчаами, гзнааси наг̇г̇ияаа д̇увам̣.

Aññañca kho taṃ pucchāmi, kenāsi naggiyā tuvaṃ.

146.

‘‘сахааяаанам̣ самаяо ааси, н̃аад̇ийнам̣ самид̇ий аху;

‘‘Sahāyānaṃ samayo āsi, ñātīnaṃ samitī ahu;

д̇ван̃жа ааманд̇ид̇аа ааси, сасааминий но жа кохам̣.

Tvañca āmantitā āsi, sasāminī no ca khohaṃ.

147.

‘‘д̇ассаа д̇яааж̇аанамаанааяа, д̣̇уссам̣ д̇яаахам̣ абаануд̣̇им̣;

‘‘Tassā tyājānamānāya, dussaṃ tyāhaṃ apānudiṃ;

д̇ассагаммавибаагзна, д̇знамхи наг̇г̇ияаа ахам̣.

Tassakammavipākena, tenamhi naggiyā ahaṃ.

148.

‘‘саб̣б̣ам̣ ахамби ж̇аанаами, д̣̇уссам̣ мз д̇вам̣ абаануд̣̇и;

‘‘Sabbaṃ ahampi jānāmi, dussaṃ me tvaṃ apānudi;

ан̃н̃ан̃жа ко д̇ам̣ бужчаами, гзнааси г̇уут̇аг̇анд̇хиний.

Aññañca kho taṃ pucchāmi, kenāsi gūthagandhinī.

149.

‘‘д̇ава г̇анд̇хан̃жа маалан̃жа, бажжаг̇гхан̃жа вилзбанам̣;

‘‘Tava gandhañca mālañca, paccagghañca vilepanaṃ;

г̇уут̇агуубз ад̇аарзсим̣, д̇ам̣ баабам̣ багад̇ам̣ маяаа;

Gūthakūpe atāresiṃ, taṃ pāpaṃ pakataṃ mayā;

д̇ассагаммавибаагзна, д̇знамхи г̇уут̇аг̇анд̇хиний.

Tassakammavipākena, tenamhi gūthagandhinī.

150.

‘‘саб̣б̣ам̣ ахамби ж̇аанаами, д̇ам̣ баабам̣ багад̇ам̣ д̇аяаа;

‘‘Sabbaṃ ahampi jānāmi, taṃ pāpaṃ pakataṃ tayā;

ан̃н̃ан̃жа ко д̇ам̣ бужчаами, гзнааси д̣̇уг̇г̇ад̇аа д̇увам̣.

Aññañca kho taṃ pucchāmi, kenāsi duggatā tuvaṃ.

151.

‘‘убхиннам̣ самагам̣ ааси, яам̣ г̇зхз виж̇ж̇ад̇з д̇ханам̣;

‘‘Ubhinnaṃ samakaṃ āsi, yaṃ gehe vijjate dhanaṃ;

санд̇зсу д̣̇зяяад̇хаммзсу, д̣̇ийбам̣ наагаасимад̇д̇ано;

Santesu deyyadhammesu, dīpaṃ nākāsimattano;

д̇ассагаммавибаагзна, д̇знамхи д̣̇уг̇г̇ад̇аа ахам̣.

Tassakammavipākena, tenamhi duggatā ahaṃ.

152.

‘‘д̇ад̣̇зва мам̣ д̇вам̣ аважа, баабагаммам̣ нисзваси;

‘‘Tadeva maṃ tvaṃ avaca, pāpakammaṃ nisevasi;

на хи баабзхи гаммзхи, сулабхаа ход̇и суг̇г̇ад̇и.

Na hi pāpehi kammehi, sulabhā hoti suggati.

153.

‘‘ваамад̇о мам̣ д̇вам̣ бажжзси, ат̇оби мам̣ усууяаси;

‘‘Vāmato maṃ tvaṃ paccesi, athopi maṃ usūyasi;

басса баабаанам̣ гаммаанам̣, вибааго ход̇и яаад̣̇исо.

Passa pāpānaṃ kammānaṃ, vipāko hoti yādiso.

154.

‘‘д̇з гхараа д̇аа жа д̣̇аасияо, д̇аанзваабхаран̣аанимз;

‘‘Te gharā tā ca dāsiyo, tānevābharaṇānime;

д̇з ан̃н̃з барижаарзнд̇и, на бхог̇аа хонд̇и сассад̇аа.

Te aññe paricārenti, na bhogā honti sassatā.

155.

‘‘ид̣̇аани бхууд̇асса бид̇аа, аабан̣аа г̇зхамзхид̇и;

‘‘Idāni bhūtassa pitā, āpaṇā gehamehiti;

аббзва д̇з д̣̇ад̣̇з гин̃жи, маа су д̇аава ид̇о аг̇аа.

Appeva te dade kiñci, mā su tāva ito agā.

156.

‘‘наг̇г̇аа д̣̇уб̣б̣ан̣н̣аруубаамхи, гисаа д̇хаманисант̇ад̇аа;

‘‘Naggā dubbaṇṇarūpāmhi, kisā dhamanisanthatā;

гобийнамзд̇ам̣ ид̇т̇ийнам̣, маа мам̣ бхууд̇абид̇аад̣̇д̣̇аса.

Kopīnametaṃ itthīnaṃ, mā maṃ bhūtapitāddasa.

157.

‘‘ханд̣̇а гим̣ ваа д̇яаахам̣ д̣̇амми, гим̣ ваа д̇зжа гаромахам̣;

‘‘Handa kiṃ vā tyāhaṃ dammi, kiṃ vā teca karomahaṃ;

язна д̇вам̣ сукид̇аа асса, саб̣б̣агаамасамид̣̇д̇хиний.

Yena tvaṃ sukhitā assa, sabbakāmasamiddhinī.

158.

‘‘жад̇д̇ааро бхигкуу сан̇гхад̇о, жад̇д̇ааро бана буг̇г̇алз;

‘‘Cattāro bhikkhū saṅghato, cattāro pana puggale;

адта бхигкуу бхож̇аяид̇ваа, мама д̣̇агкин̣амаад̣̇иса;

Aṭṭha bhikkhū bhojayitvā, mama dakkhiṇamādisa;

д̇ад̣̇аахам̣ сукид̇аа хзссам̣, саб̣б̣агаамасамид̣̇д̇хиний.

Tadāhaṃ sukhitā hessaṃ, sabbakāmasamiddhinī.

159.

‘‘саад̇хууд̇и саа бадиссуд̇ваа, бхож̇аяид̇ваадта бхигкаво;

‘‘Sādhūti sā paṭissutvā, bhojayitvāṭṭha bhikkhavo;

вад̇т̇зхажчаад̣̇аяид̇ваана, д̇ассаа д̣̇агкин̣амаад̣̇исий.

Vatthehacchādayitvāna, tassā dakkhiṇamādisī.

160.

‘‘самананд̇араануд̣̇д̣̇идтз, вибааго уд̣̇абаж̇ж̇ат̇а;

‘‘Samanantarānuddiṭṭhe, vipāko udapajjatha;

бхож̇анажчаад̣̇анабаанийяам̣, д̣̇агкин̣ааяа ид̣̇ам̣ палам̣.

Bhojanacchādanapānīyaṃ, dakkhiṇāya idaṃ phalaṃ.

161.

‘‘д̇ад̇о суд̣̇д̇хаа суживасанаа, гаасигуд̇д̇амад̇хаариний;

‘‘Tato suddhā sucivasanā, kāsikuttamadhārinī;

вижид̇д̇авад̇т̇аабхаран̣аа, сабад̇д̇им̣ убасан̇гами.

Vicittavatthābharaṇā, sapattiṃ upasaṅkami.

162.

‘‘абхигганд̇зна ван̣н̣зна, яаа д̇вам̣ д̇идтаси д̣̇звад̇з;

‘‘Abhikkantena vaṇṇena, yā tvaṃ tiṭṭhasi devate;

обхаасзнд̇ий д̣̇исаа саб̣б̣аа, осад̇хий вияа д̇аарагаа.

Obhāsentī disā sabbā, osadhī viya tārakā.

163.

‘‘гзна д̇зд̇аад̣̇исо ван̣н̣о, гзна д̇з ид̇ха миж̇жхад̇и;

‘‘Kena tetādiso vaṇṇo, kena te idha mijjhati;

уббаж̇ж̇анд̇и жа д̇з бхог̇аа, яз гзжи манасо бияаа.

Uppajjanti ca te bhogā, ye keci manaso piyā.

164.

‘‘бужчаами д̇ам̣ д̣̇зви махаанубхаавз, мануссабхууд̇аа гимагаасий бун̃н̃ам̣;

‘‘Pucchāmi taṃ devi mahānubhāve, manussabhūtā kimakāsī puññaṃ;

гзнааси звам̣ ж̇алид̇аанубхааваа, ван̣н̣о жа д̇з саб̣б̣ад̣̇исаа бабхаасад̇ийд̇и.

Kenāsi evaṃ jalitānubhāvā, vaṇṇo ca te sabbadisā pabhāsatīti.

165.

‘‘ахам̣ мад̇д̇аа д̇увам̣ д̇иссаа, сабад̇д̇ий д̇з бурз ахум̣;

‘‘Ahaṃ mattā tuvaṃ tissā, sapattī te pure ahuṃ;

баабагаммам̣ гарид̇ваана, бзд̇алогам̣ ид̇о г̇ад̇аа.

Pāpakammaṃ karitvāna, petalokaṃ ito gatā.

166.

‘‘д̇ава д̣̇иннзна д̣̇аанзна, мод̣̇аами агуд̇обхаяаа;

‘‘Tava dinnena dānena, modāmi akutobhayā;

жирам̣ ж̇ийваахи бхаг̇ини, саха саб̣б̣зхи н̃аад̇ибхи;

Ciraṃ jīvāhi bhagini, saha sabbehi ñātibhi;

асогам̣ вираж̇ам̣ таанам̣, ааваасам̣ васавад̇д̇инам̣.

Asokaṃ virajaṃ ṭhānaṃ, āvāsaṃ vasavattinaṃ.

167.

‘‘ид̇ха д̇хаммам̣ жарид̇ваана, д̣̇аанам̣ д̣̇ад̇ваана собханз;

‘‘Idha dhammaṃ caritvāna, dānaṃ datvāna sobhane;

винзяяа мажчзрамалам̣ самуулам̣, анинд̣̇ид̇аа саг̇г̇амубзхи таана’’нд̇и.

Vineyya maccheramalaṃ samūlaṃ, aninditā saggamupehi ṭhāna’’nti.

138. д̇ад̇т̇а саб̣б̣ам̣ ахамби ж̇аанаами, яат̇аа д̇вам̣ жан̣д̣игаа ахууд̇и ‘‘жан̣д̣ий жа парусаа жааси’’нд̇и яам̣ д̇аяаа вуд̇д̇ам̣, д̇ам̣ саб̣б̣ам̣ ахамби ж̇аанаами, яат̇аа д̇вам̣ жан̣д̣игаа год̇ханаа парусаважанаа иссугий мажчарий сатаа жа ахоси. ан̃н̃ан̃жа ко д̇ам̣ бужчаамийд̇и ан̃н̃ам̣ буна д̇ам̣ ид̣̇аани бужчаами. гзнааси бам̣сугунт̇ид̇аад̇и гзна гаммзна сан̇гаарабам̣сууд̇и ог̇ун̣тид̇аа саб̣б̣асо огин̣н̣асарийраа ахууд̇и ад̇т̇о.

138. Tattha sabbaṃ ahampi jānāmi, yathā tvaṃ caṇḍikā ahūti ‘‘caṇḍī ca pharusā cāsi’’nti yaṃ tayā vuttaṃ, taṃ sabbaṃ ahampi jānāmi, yathā tvaṃ caṇḍikā kodhanā pharusavacanā issukī maccharī saṭhā ca ahosi. Aññañca kho taṃ pucchāmīti aññaṃ puna taṃ idāni pucchāmi. Kenāsi paṃsukunthitāti kena kammena saṅkārapaṃsūti oguṇṭhitā sabbaso okiṇṇasarīrā ahūti attho.

139-40. сийсам̣нхаад̇аад̇и сасийсам̣ нхаад̇аа. ад̇химад̇д̇анд̇и ад̇хигад̇арам̣. самалан̇гад̇ад̇араад̇и саммаа ад̇исаязна алан̇гад̇аа. ‘‘ад̇химад̇д̇аа’’д̇и ваа баато, ад̇ивияа мад̇д̇аа маанамад̣̇амад̇д̇аа, маананиссид̇аад̇и ад̇т̇о. д̇аяаад̇и бход̇ияаа . саамигзна саманд̇аяийд̇и саамигзна сад̣̇д̇хим̣ аллобасаллаабавасзна гат̇зси.

139-40.Sīsaṃnhātāti sasīsaṃ nhātā. Adhimattanti adhikataraṃ. Samalaṅkatatarāti sammā atisayena alaṅkatā. ‘‘Adhimattā’’ti vā pāṭho, ativiya mattā mānamadamattā, mānanissitāti attho. Tayāti bhotiyā . Sāmikena samantayīti sāmikena saddhiṃ allopasallāpavasena kathesi.

142-144. каж̇ж̇аси гажчуяаад̇и гажчурог̇зна каад̣̇ийяаси, б̣аад̇хийяасийд̇и ад̇т̇о. бхзсаж̇ж̇ахаарийд̇и бхзсаж̇ж̇ахааринияо осад̇хахааригааяо. убхаяод̇и д̣̇увз, д̇ван̃жа ахан̃жаад̇и ад̇т̇о. вананд̇анд̇и ванам̣. д̇ван̃жа бхзсаж̇ж̇амаахарийд̇и д̇вам̣ взж̇ж̇зхи вуд̇д̇ам̣ ад̇д̇ано убагаараавахам̣ бхзсаж̇ж̇ам̣ аахари. ахан̃жа габигажчунод̇и ахам̣ бана габигажчупалаани д̣̇упассапалаани аахарим̣. габигажчууд̇и ваа саяам̣бхууд̇аа вужжад̇и, д̇асмаа саяам̣бхууд̇ааяа бад̇д̇апалаани аахаринд̇и ад̇т̇о. сзяяам̣ д̇яаахам̣ самогиринд̇и д̇ава сзяяам̣ ахам̣ габигажчупалабад̇д̇зхи саманд̇ад̇о авагирим̣.

142-144.Khajjasi kacchuyāti kacchurogena khādīyasi, bādhīyasīti attho. Bhesajjahārīti bhesajjahāriniyo osadhahārikāyo. Ubhayoti duve, tvañca ahañcāti attho. Vanantanti vanaṃ. Tvañca bhesajjamāharīti tvaṃ vejjehi vuttaṃ attano upakārāvahaṃ bhesajjaṃ āhari. Ahañca kapikacchunoti ahaṃ pana kapikacchuphalāni duphassaphalāni āhariṃ. Kapikacchūti vā sayaṃbhūtā vuccati, tasmā sayaṃbhūtāya pattaphalāni āharinti attho. Seyyaṃ tyāhaṃ samokirinti tava seyyaṃ ahaṃ kapikacchuphalapattehi samantato avakiriṃ.

146-147. сахааяаананд̇и мид̇д̇аанам̣. самаяод̇и самааг̇амо. н̃аад̇ийнанд̇и б̣анд̇хуунам̣. самид̇ийд̇и саннибаад̇о. ааманд̇ид̇аад̇и ман̇г̇алагирияаавасзна ниманд̇ид̇аа. сасааминийд̇и сабхад̇д̇игаа, саха бхад̇д̇унаад̇и ад̇т̇о. но жа коханд̇и но жа ко ахам̣ ааманд̇ид̇аа аасинд̇и яож̇анаа. д̣̇уссам̣ д̇яааханд̇и д̣̇уссам̣ д̇з ахам̣. абаануд̣̇инд̇и жоригааяа авахарим̣ аг̇г̇ахосим̣.

146-147.Sahāyānanti mittānaṃ. Samayoti samāgamo. Ñātīnanti bandhūnaṃ. Samitīti sannipāto. Āmantitāti maṅgalakiriyāvasena nimantitā. Sasāminīti sabhattikā, saha bhattunāti attho. No ca khohanti no ca kho ahaṃ āmantitā āsinti yojanā. Dussaṃ tyāhanti dussaṃ te ahaṃ. Apānudinti corikāya avahariṃ aggahosiṃ.

149. бажжаг̇гханд̇и абхинавам̣, махаг̇гхам̣ ваа. ад̇аарзсинд̇и кибим̣. г̇уут̇аг̇анд̇хинийд̇и г̇уут̇аг̇анд̇хаг̇анд̇хиний гарийсавааяиний.

149.Paccagghanti abhinavaṃ, mahagghaṃ vā. Atāresinti khipiṃ. Gūthagandhinīti gūthagandhagandhinī karīsavāyinī.

151. яам̣ г̇зхз виж̇ж̇ад̇з д̇хананд̇и яам̣ г̇зхз д̇ханам̣ убалаб̣бхад̇и, д̇ам̣ д̇уяхам̣ маяхан̃жаад̇и амхаагам̣ убхинна самагам̣ д̇уляамзва ааси. санд̇зсууд̇и виж̇ж̇амаанзсу. д̣̇ийбанд̇и бад̇идтам̣, бун̃н̃агаммам̣ санд̇хааяа вад̣̇ад̇и.

151.Yaṃ gehe vijjate dhananti yaṃ gehe dhanaṃ upalabbhati, taṃ tuyhaṃ mayhañcāti amhākaṃ ubhinna samakaṃ tulyameva āsi. Santesūti vijjamānesu. Dīpanti patiṭṭhaṃ, puññakammaṃ sandhāya vadati.

152. звам̣ саа бзд̇ий д̇иссааяа бужчид̇амад̇т̇ам̣ гад̇т̇зд̇ваа буна буб̣б̣з д̇ассаа важанам̣ агад̇ваа ад̇д̇анаа гад̇ам̣ абараад̇хам̣ багаасзнд̇ий ‘‘д̇ад̣̇зва мам̣ д̇ва’’нд̇иаад̣̇имааха. д̇ад̇т̇а д̇ад̣̇зваад̇и д̇ад̣̇аа зва, маяхам̣ мануссад̇д̇абхаавз тид̇агаалзязва. д̇ат̇зваад̇и ваа баато, яат̇аа зд̇арахи ж̇аад̇ам̣, д̇ам̣ д̇ат̇аа зваад̇и ад̇т̇о. манд̇и ад̇д̇аанам̣ нид̣̇д̣̇исад̇и, д̇ванд̇и д̇иссам̣. аважаад̇и абхан̣и. яат̇аа бана аважа, д̇ам̣ д̣̇ассзд̇ум̣ ‘‘баабагамма’’нд̇иаад̣̇и вуд̇д̇ам̣. ‘‘баабагаммааний’’д̇и баал̣и. ‘‘д̇вам̣ баабагаммааниязва гароси, баабзхи бана гаммзхи суг̇ад̇и сулабхаа на ход̇и, ат̇а ко д̣̇уг̇г̇ад̇и зва сулабхаа’’д̇и яат̇аа мам̣ д̇вам̣ буб̣б̣з аважа овад̣̇и, д̇ам̣ д̇ат̇зваад̇и вад̣̇ад̇и.

152. Evaṃ sā petī tissāya pucchitamatthaṃ katthetvā puna pubbe tassā vacanaṃ akatvā attanā kataṃ aparādhaṃ pakāsentī ‘‘tadeva maṃ tva’’ntiādimāha. Tattha tadevāti tadā eva, mayhaṃ manussattabhāve ṭhitakāleyeva. Tathevāti vā pāṭho, yathā etarahi jātaṃ, taṃ tathā evāti attho. Manti attānaṃ niddisati, tvanti tissaṃ. Avacāti abhaṇi. Yathā pana avaca, taṃ dassetuṃ ‘‘pāpakamma’’ntiādi vuttaṃ. ‘‘Pāpakammānī’’ti pāḷi. ‘‘Tvaṃ pāpakammāniyeva karosi, pāpehi pana kammehi sugati sulabhā na hoti, atha kho duggati eva sulabhā’’ti yathā maṃ tvaṃ pubbe avaca ovadi, taṃ tathevāti vadati.

153. д̇ам̣ суд̇ваа д̇иссаа ‘‘ваамад̇о мам̣ д̇вам̣ бажжзсий’’д̇иаад̣̇инаа д̇иссо г̇аат̇аа ааха. д̇ад̇т̇а ваамад̇о мам̣ д̇вам̣ бажжзсийд̇и виломад̇о мам̣ д̇вам̣ ад̇хиг̇ажчаси, д̇уяхам̣ хид̇зсимби вибажжанийгагаариним̣ гад̇ваа мам̣ г̇ан̣хааси. мам̣ усууяасийд̇и маяхам̣ усууяаси, маяи иссам̣ гароси. басса баабаанам̣ гаммаанам̣, вибааго ход̇и яаад̣̇исод̇и баабагаанам̣ наама гаммаанам̣ вибааго яаад̣̇исо яат̇аа гхорад̇аро, д̇ам̣ бажжагкад̇о бассаад̇и вад̣̇ад̇и.

153. Taṃ sutvā tissā ‘‘vāmato maṃ tvaṃ paccesī’’tiādinā tisso gāthā āha. Tattha vāmato maṃ tvaṃ paccesīti vilomato maṃ tvaṃ adhigacchasi, tuyhaṃ hitesimpi vipaccanīkakāriniṃ katvā maṃ gaṇhāsi. Maṃ usūyasīti mayhaṃ usūyasi, mayi issaṃ karosi. Passa pāpānaṃ kammānaṃ, vipāko hoti yādisoti pāpakānaṃ nāma kammānaṃ vipāko yādiso yathā ghorataro, taṃ paccakkhato passāti vadati.

154. д̇з ан̃н̃з барижаарзнд̇ийд̇и д̇з гхарз д̣̇аасияо аабхаран̣аани жа имаани д̇аяаа буб̣б̣з бариг̇г̇ахид̇аани ид̣̇аани ан̃н̃з барижаарзнд̇и барибхун̃ж̇анд̇и. ‘‘имз’’д̇и хи лин̇г̇авибаллаасзна вуд̇д̇ам̣. на бхог̇аа хонд̇и сассад̇аад̇и бхог̇аа наамзд̇з на сассад̇аа анавадтид̇аа д̇аавагаалигаа махааяаг̇аманийяаа, д̇асмаа д̇ад̣̇ад̇т̇ам̣ иссаамажчарияаад̣̇ийни на гад̇д̇аб̣б̣аанийд̇и ад̇хиббааяо.

154.Te aññe paricārentīti te ghare dāsiyo ābharaṇāni ca imāni tayā pubbe pariggahitāni idāni aññe paricārenti paribhuñjanti. ‘‘Ime’’ti hi liṅgavipallāsena vuttaṃ. Na bhogā honti sassatāti bhogā nāmete na sassatā anavaṭṭhitā tāvakālikā mahāyagamanīyā, tasmā tadatthaṃ issāmacchariyādīni na kattabbānīti adhippāyo.

155. ид̣̇аани бхууд̇асса бид̇аад̇и ид̣̇аанзва бхууд̇асса маяхам̣ буд̇д̇асса бид̇аа гудумб̣иго. аабан̣аад̇и аабан̣ад̇о имам̣ г̇зхам̣ зхид̇и ааг̇амиссад̇и. аббзва д̇з д̣̇ад̣̇з гин̃жийд̇и г̇зхам̣ ааг̇ад̇о гудумб̣иго д̇уяхам̣ д̣̇аад̇аб̣б̣аяуд̇д̇агам̣ гин̃жи д̣̇зяяад̇хаммам̣ аби наама д̣̇ад̣̇зяяа. маа су д̇аава ид̇о аг̇аад̇и ид̇о г̇зхасса бажчаа вад̇т̇уд̇о маа д̇аава аг̇амаасийд̇и д̇ам̣ анугамбамаанаа ааха.

155.Idānibhūtassa pitāti idāneva bhūtassa mayhaṃ puttassa pitā kuṭumbiko. Āpaṇāti āpaṇato imaṃ gehaṃ ehiti āgamissati. Appeva te dade kiñcīti gehaṃ āgato kuṭumbiko tuyhaṃ dātabbayuttakaṃ kiñci deyyadhammaṃ api nāma dadeyya. Mā su tāva ito agāti ito gehassa pacchā vatthuto mā tāva agamāsīti taṃ anukampamānā āha.

156. д̇ам̣ суд̇ваа бзд̇ий ад̇д̇ано аж̇жхаасаяам̣ багаасзнд̇ий ‘‘наг̇г̇аа д̣̇уб̣б̣ан̣н̣аруубаамхий’’д̇и г̇аат̇амааха. д̇ад̇т̇а гобийнамзд̇ам̣ ид̇т̇ийнанд̇и зд̇ам̣ наг̇г̇ад̣̇уб̣б̣ан̣н̣ад̇аад̣̇игам̣ бадижчаад̣̇зд̇аб̣б̣ад̇ааяа ид̇т̇ийнам̣ гобийнам̣ рунд̇ханийяам̣. маа мам̣ бхууд̇абид̇аад̣̇д̣̇асаад̇и д̇асмаа бхууд̇асса бид̇аа гудумб̣иго мам̣ маа ад̣̇д̣̇агкийд̇и лаж̇ж̇амаанаа вад̣̇ад̇и.

156. Taṃ sutvā petī attano ajjhāsayaṃ pakāsentī ‘‘naggā dubbaṇṇarūpāmhī’’ti gāthamāha. Tattha kopīnametaṃ itthīnanti etaṃ naggadubbaṇṇatādikaṃ paṭicchādetabbatāya itthīnaṃ kopīnaṃ rundhanīyaṃ. Mā maṃ bhūtapitāddasāti tasmā bhūtassa pitā kuṭumbiko maṃ mā addakkhīti lajjamānā vadati.

157. д̇ам̣ суд̇ваа д̇иссаа сан̃ж̇аад̇ануд̣̇д̣̇аяаа ‘‘ханд̣̇а гим̣ ваа д̇яаахам̣ д̣̇аммий’’д̇и г̇аат̇амааха. д̇ад̇т̇а ханд̣̇аад̇и жод̣̇анад̇т̇з нибаад̇о. гим̣ ваа д̇яаахам̣ д̣̇аммийд̇и гим̣ д̇з ахам̣ д̣̇амми, гим̣ вад̇т̇ам̣ д̣̇ассаами, уд̣̇ааху бхад̇д̇анд̇и. гим̣ ваа д̇зд̇ха гаромаханд̇и гим̣ ваа ан̃н̃ам̣ д̇з ид̇ха имасмим̣ гаалз убагаарам̣ гариссаами.

157. Taṃ sutvā tissā sañjātanuddayā ‘‘handa kiṃ vā tyāhaṃ dammī’’ti gāthamāha. Tattha handāti codanatthe nipāto. Kiṃ vā tyāhaṃ dammīti kiṃ te ahaṃ dammi, kiṃ vatthaṃ dassāmi, udāhu bhattanti. Kiṃ vā tedha karomahanti kiṃ vā aññaṃ te idha imasmiṃ kāle upakāraṃ karissāmi.

158. д̇ам̣ суд̇ваа бзд̇ий ‘‘жад̇д̇ааро бхигкуу сан̇гхад̇о’’д̇и г̇аат̇амааха. д̇ад̇т̇а жад̇д̇ааро бхигкуу сан̇гхад̇о, жад̇д̇ааро бана буг̇г̇алзд̇и бхигкусан̇гхад̇о сан̇гхавасзна жад̇д̇ааро бхигкуу, буг̇г̇алавасзна жад̇д̇ааро бхигкууд̇и звам̣ адта бхигкуу яат̇ааружим̣ бхож̇зд̇ваа д̇ам̣ д̣̇агкин̣ам̣ мама аад̣̇иса, маяхам̣ бад̇д̇ид̣̇аанам̣ д̣̇зхи. д̇ад̣̇аахам̣ сукид̇аа хзссанд̇и яад̣̇аа д̇вам̣ д̣̇агкин̣ам̣ мама уд̣̇д̣̇исиссаси, д̇ад̣̇аа ахам̣ сукид̇аа сукаббад̇д̇аа саб̣б̣агаамасамид̣̇д̇хиний бхависсаамийд̇и ад̇т̇о.

158. Taṃ sutvā petī ‘‘cattāro bhikkhū saṅghato’’ti gāthamāha. Tattha cattāro bhikkhū saṅghato, cattāro pana puggaleti bhikkhusaṅghato saṅghavasena cattāro bhikkhū, puggalavasena cattāro bhikkhūti evaṃ aṭṭha bhikkhū yathāruciṃ bhojetvā taṃ dakkhiṇaṃ mama ādisa, mayhaṃ pattidānaṃ dehi. Tadāhaṃ sukhitā hessanti yadā tvaṃ dakkhiṇaṃ mama uddisissasi, tadā ahaṃ sukhitā sukhappattā sabbakāmasamiddhinī bhavissāmīti attho.

159-161. д̇ам̣ суд̇ваа д̇иссаа д̇амад̇т̇ам̣ ад̇д̇ано саамигасса аарожзд̇ваа д̣̇уд̇ияад̣̇ивасз адта бхигкуу бхож̇зд̇ваа д̇ассаа д̣̇агкин̣амаад̣̇иси, саа д̇аавад̣̇зва бадилад̣̇д̇хад̣̇иб̣б̣асамбад̇д̇игаа буна д̇иссааяа санд̇игам̣ убасан̇гами. д̇амад̇т̇ам̣ д̣̇ассзд̇ум̣ сан̇г̇ийд̇игаарзхи ‘‘саад̇хууд̇и саа бадиссуд̇ваа’’д̇иаад̣̇игаа д̇иссо г̇аат̇аа табид̇аа.

159-161. Taṃ sutvā tissā tamatthaṃ attano sāmikassa ārocetvā dutiyadivase aṭṭha bhikkhū bhojetvā tassā dakkhiṇamādisi, sā tāvadeva paṭiladdhadibbasampattikā puna tissāya santikaṃ upasaṅkami. Tamatthaṃ dassetuṃ saṅgītikārehi ‘‘sādhūti sā paṭissutvā’’tiādikā tisso gāthā ṭhapitā.

162-167. убасан̇гамид̇ваа тид̇ам̣ бана нам̣ д̇иссаа ‘‘абхигганд̇зна ван̣н̣знаа’’д̇иаад̣̇ийхи д̇ийхи г̇аат̇аахи бадибужчи. ид̇араа ‘‘ахам̣ мад̇д̇аа’’д̇и г̇аат̇ааяа ад̇д̇аанам̣ аажигкид̇ваа ‘‘жирам̣ ж̇ийваахий’’д̇и г̇аат̇ааяа д̇ассаа анумод̣̇анам̣ д̣̇ад̇ваа ‘‘ид̇ха д̇хаммам̣ жарид̇ваанаа’’д̇и г̇аат̇ааяа оваад̣̇ам̣ ад̣̇ааси. д̇ад̇т̇а д̇ава д̣̇иннзнаад̇и д̇аяаа д̣̇иннзна. асогам̣ вираж̇ам̣ таананд̇и согаабхаавзна асогам̣, сзд̣̇аж̇аллигаанам̣ бана абхаавзна вираж̇ам̣ д̣̇иб̣б̣адтаанам̣, саб̣б̣амзд̇ам̣ д̣̇звалогам̣ санд̇хааяа вад̣̇ад̇и. ааваасанд̇и таанам̣. васавад̇д̇инанд̇и д̣̇иб̣б̣зна аад̇хибад̇зяязна ад̇д̇ано васам̣ вад̇д̇знд̇аанам̣. самууланд̇и салобхад̣̇осам̣. лобхад̣̇осаа хи мажчарияасса муулам̣ наама. анинд̣̇ид̇аад̇и аг̇арахид̇аа баасам̣саа, саг̇г̇амубзхи таананд̇и руубаад̣̇ийхи висаязхи судту аг̇г̇ад̇д̇аа ‘‘саг̇г̇а’’нд̇и лад̣̇д̇ханаамам̣ д̣̇иб̣б̣адтаанам̣ убзхи, суг̇ад̇ибарааяан̣аа хохийд̇и ад̇т̇о. сзсам̣ уд̇д̇аанамзва.

162-167. Upasaṅkamitvā ṭhitaṃ pana naṃ tissā ‘‘abhikkantena vaṇṇenā’’tiādīhi tīhi gāthāhi paṭipucchi. Itarā ‘‘ahaṃ mattā’’ti gāthāya attānaṃ ācikkhitvā ‘‘ciraṃ jīvāhī’’ti gāthāya tassā anumodanaṃ datvā ‘‘idha dhammaṃ caritvānā’’ti gāthāya ovādaṃ adāsi. Tattha tava dinnenāti tayā dinnena. Asokaṃ virajaṃ ṭhānanti sokābhāvena asokaṃ, sedajallikānaṃ pana abhāvena virajaṃ dibbaṭṭhānaṃ, sabbametaṃ devalokaṃ sandhāya vadati. Āvāsanti ṭhānaṃ. Vasavattinanti dibbena ādhipateyyena attano vasaṃ vattentānaṃ. Samūlanti salobhadosaṃ. Lobhadosā hi macchariyassa mūlaṃ nāma. Aninditāti agarahitā pāsaṃsā, saggamupehi ṭhānanti rūpādīhi visayehi suṭṭhu aggattā ‘‘sagga’’nti laddhanāmaṃ dibbaṭṭhānaṃ upehi, sugatiparāyaṇā hohīti attho. Sesaṃ uttānameva.

ат̇а д̇иссаа д̇ам̣ бавад̇д̇им̣ гудумб̣игасса аарожзси, гудумб̣иго бхигкуунам̣ аарожзси, бхигкуу бхаг̇авад̇о аарожзсум̣. бхаг̇аваа д̇амад̇т̇ам̣ адтуббад̇д̇им̣ гад̇ваа самбад̇д̇абарисааяа д̇хаммам̣ д̣̇зсзси, д̇ам̣ суд̇ваа махааж̇ано бадилад̣̇д̇хасам̣взг̇о винзяяа мажчзраад̣̇ималам̣ д̣̇аанасийлаад̣̇ирад̇о суг̇ад̇ибарааяан̣о ахосийд̇и.

Atha tissā taṃ pavattiṃ kuṭumbikassa ārocesi, kuṭumbiko bhikkhūnaṃ ārocesi, bhikkhū bhagavato ārocesuṃ. Bhagavā tamatthaṃ aṭṭhuppattiṃ katvā sampattaparisāya dhammaṃ desesi, taṃ sutvā mahājano paṭiladdhasaṃvego vineyya maccherādimalaṃ dānasīlādirato sugatiparāyaṇo ahosīti.

мад̇д̇аабзд̇ивад̇т̇уван̣н̣анаа нидтид̇аа.

Mattāpetivatthuvaṇṇanā niṭṭhitā.

Next: 4. нанд̣̇аабзд̇ивад̇т̇уван̣н̣анаа • 4. Nandāpetivatthuvaṇṇanā

Related texts:

д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / бзд̇авад̇т̇убаал̣и • Petavatthupāḷi / 3. мад̇д̇аабзд̇ивад̇т̇у • 3. Mattāpetivatthu

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact