| Library / Tipiṭaka / तिपिटक • Tipiṭaka / पेतवत्थु-अट्ठकथा • Petavatthu-aṭṭhakathā |
५. मट्ठकुण्डलीपेतवत्थुवण्णना
5. Maṭṭhakuṇḍalīpetavatthuvaṇṇanā
अलङ्कतो मट्ठकुण्डलीति इदं सत्थरि जेतवने विहरन्ते मट्ठकुण्डलिदेवपुत्तं आरब्भ वुत्तं। तत्थ यं वत्तब्बं, तं परमत्थदीपनियं विमानवत्थुवण्णनायं मट्ठकुण्डलीविमानवत्थुवण्णनाय (वि॰ व॰ अट्ठ॰ १२०६ मट्ठकुण्डलीविमानवण्णना) वुत्तमेव, तस्मा तत्थ वुत्तनयेनेव वेदितब्बं।
Alaṅkato maṭṭhakuṇḍalīti idaṃ satthari jetavane viharante maṭṭhakuṇḍalidevaputtaṃ ārabbha vuttaṃ. Tattha yaṃ vattabbaṃ, taṃ paramatthadīpaniyaṃ vimānavatthuvaṇṇanāyaṃ maṭṭhakuṇḍalīvimānavatthuvaṇṇanāya (vi. va. aṭṭha. 1206 maṭṭhakuṇḍalīvimānavaṇṇanā) vuttameva, tasmā tattha vuttanayeneva veditabbaṃ.
एत्थ च मट्ठकुण्डलीदेवपुत्तस्स विमानदेवताभावतो तस्स वत्थु यदिपि विमानवत्थुपाळियं सङ्गहं आरोपितं, यस्मा पन सो देवपुत्तो अदिन्नपुब्बकब्राह्मणस्स पुत्तसोकेन सुसानं गन्त्वा आळाहनं अनुपरियायित्वा रोदन्तस्स सोकहरणत्थं अत्तनो देवरूपं पटिसंहरित्वा हरिचन्दनुस्सदो बाहा पग्गय्ह कन्दन्तो दुक्खाभिभूताकारेन पेतो विय अत्तानं दस्सेसि। मनुस्सत्तभावतो अपेतत्ता पेतपरियायोपि लब्भति एवाति तस्स वत्थु पेतवत्थुपाळियम्पि सङ्गहं आरोपितन्ति दट्ठब्बं।
Ettha ca maṭṭhakuṇḍalīdevaputtassa vimānadevatābhāvato tassa vatthu yadipi vimānavatthupāḷiyaṃ saṅgahaṃ āropitaṃ, yasmā pana so devaputto adinnapubbakabrāhmaṇassa puttasokena susānaṃ gantvā āḷāhanaṃ anupariyāyitvā rodantassa sokaharaṇatthaṃ attano devarūpaṃ paṭisaṃharitvā haricandanussado bāhā paggayha kandanto dukkhābhibhūtākārena peto viya attānaṃ dassesi. Manussattabhāvato apetattā petapariyāyopi labbhati evāti tassa vatthu petavatthupāḷiyampi saṅgahaṃ āropitanti daṭṭhabbaṃ.
मट्ठकुण्डलीपेतवत्थुवण्णना निट्ठिता।
Maṭṭhakuṇḍalīpetavatthuvaṇṇanā niṭṭhitā.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / खुद्दकनिकाय • Khuddakanikāya / पेतवत्थुपाळि • Petavatthupāḷi / ५. मट्ठकुण्डलीपेतवत्थु • 5. Maṭṭhakuṇḍalīpetavatthu
