| Library / Tipiṭaka / തിപിടക • Tipiṭaka / പേതവത്ഥു-അട്ഠകഥാ • Petavatthu-aṭṭhakathā |
൫. മട്ഠകുണ്ഡലീപേതവത്ഥുവണ്ണനാ
5. Maṭṭhakuṇḍalīpetavatthuvaṇṇanā
അലങ്കതോ മട്ഠകുണ്ഡലീതി ഇദം സത്ഥരി ജേതവനേ വിഹരന്തേ മട്ഠകുണ്ഡലിദേവപുത്തം ആരബ്ഭ വുത്തം. തത്ഥ യം വത്തബ്ബം, തം പരമത്ഥദീപനിയം വിമാനവത്ഥുവണ്ണനായം മട്ഠകുണ്ഡലീവിമാനവത്ഥുവണ്ണനായ (വി॰ വ॰ അട്ഠ॰ ൧൨൦൬ മട്ഠകുണ്ഡലീവിമാനവണ്ണനാ) വുത്തമേവ, തസ്മാ തത്ഥ വുത്തനയേനേവ വേദിതബ്ബം.
Alaṅkato maṭṭhakuṇḍalīti idaṃ satthari jetavane viharante maṭṭhakuṇḍalidevaputtaṃ ārabbha vuttaṃ. Tattha yaṃ vattabbaṃ, taṃ paramatthadīpaniyaṃ vimānavatthuvaṇṇanāyaṃ maṭṭhakuṇḍalīvimānavatthuvaṇṇanāya (vi. va. aṭṭha. 1206 maṭṭhakuṇḍalīvimānavaṇṇanā) vuttameva, tasmā tattha vuttanayeneva veditabbaṃ.
ഏത്ഥ ച മട്ഠകുണ്ഡലീദേവപുത്തസ്സ വിമാനദേവതാഭാവതോ തസ്സ വത്ഥു യദിപി വിമാനവത്ഥുപാളിയം സങ്ഗഹം ആരോപിതം, യസ്മാ പന സോ ദേവപുത്തോ അദിന്നപുബ്ബകബ്രാഹ്മണസ്സ പുത്തസോകേന സുസാനം ഗന്ത്വാ ആളാഹനം അനുപരിയായിത്വാ രോദന്തസ്സ സോകഹരണത്ഥം അത്തനോ ദേവരൂപം പടിസംഹരിത്വാ ഹരിചന്ദനുസ്സദോ ബാഹാ പഗ്ഗയ്ഹ കന്ദന്തോ ദുക്ഖാഭിഭൂതാകാരേന പേതോ വിയ അത്താനം ദസ്സേസി. മനുസ്സത്തഭാവതോ അപേതത്താ പേതപരിയായോപി ലബ്ഭതി ഏവാതി തസ്സ വത്ഥു പേതവത്ഥുപാളിയമ്പി സങ്ഗഹം ആരോപിതന്തി ദട്ഠബ്ബം.
Ettha ca maṭṭhakuṇḍalīdevaputtassa vimānadevatābhāvato tassa vatthu yadipi vimānavatthupāḷiyaṃ saṅgahaṃ āropitaṃ, yasmā pana so devaputto adinnapubbakabrāhmaṇassa puttasokena susānaṃ gantvā āḷāhanaṃ anupariyāyitvā rodantassa sokaharaṇatthaṃ attano devarūpaṃ paṭisaṃharitvā haricandanussado bāhā paggayha kandanto dukkhābhibhūtākārena peto viya attānaṃ dassesi. Manussattabhāvato apetattā petapariyāyopi labbhati evāti tassa vatthu petavatthupāḷiyampi saṅgahaṃ āropitanti daṭṭhabbaṃ.
മട്ഠകുണ്ഡലീപേതവത്ഥുവണ്ണനാ നിട്ഠിതാ.
Maṭṭhakuṇḍalīpetavatthuvaṇṇanā niṭṭhitā.
Related texts:
തിപിടക (മൂല) • Tipiṭaka (Mūla) / സുത്തപിടക • Suttapiṭaka / ഖുദ്ദകനികായ • Khuddakanikāya / പേതവത്ഥുപാളി • Petavatthupāḷi / ൫. മട്ഠകുണ്ഡലീപേതവത്ഥു • 5. Maṭṭhakuṇḍalīpetavatthu
