| Library / Tipiṭaka / д̇ибидага • Tipiṭaka / вимаанавад̇т̇у-адтагат̇аа • Vimānavatthu-aṭṭhakathā |
9. мадтагун̣д̣алийвимаанаван̣н̣анаа
9. Maṭṭhakuṇḍalīvimānavaṇṇanā
алан̇гад̇о мадтагун̣д̣алийд̇и мадтагун̣д̣алийвимаанам̣. д̇асса гаа уббад̇д̇и? бхаг̇аваа саавад̇т̇ияам̣ вихарад̇и ж̇зд̇аванз. д̇зна самаязна саавад̇т̇иваасий зго б̣раахман̣о ад̣̇д̇хо махад̣̇д̇хано махаабхог̇о ассад̣̇д̇хо аббасанно мижчаад̣̇идтиго гассажи гин̃жи на д̣̇зд̇и, ад̣̇аанад̇о зва ‘‘ад̣̇иннабуб̣б̣аго’’д̇и бан̃н̃ааяид̇т̇а. со мижчаад̣̇идтибхаавзна жа луд̣̇д̇хабхаавзна жа д̇ат̇ааг̇ад̇ам̣ ваа д̇ат̇ааг̇ад̇асаавагам̣ ваа д̣̇адтумби на ижчад̇и. мадтагун̣д̣алам̣ наама ад̇д̇ано буд̇д̇ан̃жа сигкаабзси ‘‘д̇аад̇а , д̇аяаа саман̣о г̇од̇амо д̇асса саавагаа жа на убасан̇гамид̇аб̣б̣аа на д̣̇адтаб̣б̣аа’’д̇и. соби д̇ат̇аа агааси. ат̇асса буд̇д̇о г̇илаано ахоси, б̣раахман̣о д̇ханагкаяабхаязна бхзсаж̇ж̇ам̣ на гаарзси, рог̇з бана вад̣дхид̇зва взж̇ж̇з баггосид̇ваа д̣̇ассзси. взж̇ж̇аа д̇асса сарийрам̣ ологзд̇ваа ‘‘ад̇згижчо’’д̇и д̇ам̣ н̃ад̇ваа абаггамим̣су. б̣раахман̣о ‘‘буд̇д̇з аб̣бханд̇арз мад̇з нийхаран̣ам̣ д̣̇угка’’нд̇и буд̇д̇ам̣ б̣ахид̣̇ваарагодтагз нибаж̇ж̇аабзси.
Alaṅkatomaṭṭhakuṇḍalīti maṭṭhakuṇḍalīvimānaṃ. Tassa kā uppatti? Bhagavā sāvatthiyaṃ viharati jetavane. Tena samayena sāvatthivāsī eko brāhmaṇo addho mahaddhano mahābhogo assaddho appasanno micchādiṭṭhiko kassaci kiñci na deti, adānato eva ‘‘adinnapubbako’’ti paññāyittha. So micchādiṭṭhibhāvena ca luddhabhāvena ca tathāgataṃ vā tathāgatasāvakaṃ vā daṭṭhumpi na icchati. Maṭṭhakuṇḍalaṃ nāma attano puttañca sikkhāpesi ‘‘tāta , tayā samaṇo gotamo tassa sāvakā ca na upasaṅkamitabbā na daṭṭhabbā’’ti. Sopi tathā akāsi. Athassa putto gilāno ahosi, brāhmaṇo dhanakkhayabhayena bhesajjaṃ na kāresi, roge pana vaḍḍhiteva vejje pakkositvā dassesi. Vejjā tassa sarīraṃ oloketvā ‘‘atekiccho’’ti taṃ ñatvā apakkamiṃsu. Brāhmaṇo ‘‘putte abbhantare mate nīharaṇaṃ dukkha’’nti puttaṃ bahidvārakoṭṭhake nipajjāpesi.
бхаг̇аваа рад̇д̇ияаа бажжуусасамаяз махаагарун̣аасамаабад̇д̇ид̇о вудтааяа логам̣ вологзнд̇о ад̣̇д̣̇аса мадтагун̣д̣алиймаан̣авам̣ кийн̣ааяугам̣ д̇ад̣̇ахзва жаванад̇хаммам̣, нираяасам̣вад̇д̇аниган̃жасса гаммам̣ гад̇огаасам̣. ‘‘сажз банаахам̣ д̇ад̇т̇а г̇амиссаами, со маяи жид̇д̇ам̣ басаад̣̇зд̇ваа д̣̇звалогз ниб̣б̣ад̇д̇ид̇ваа бид̇арам̣ аал̣ааханз род̣̇амаанам̣ убаг̇анд̇ваа сам̣взж̇зссад̇и, звам̣ со жа д̇асса бид̇аа жа мама санд̇игам̣ ааг̇амиссад̇и, махааж̇анагааяо саннибад̇иссад̇и д̇ад̇т̇а маяаа д̇хаммз д̣̇зсид̇з махаад̇хаммаабхисамаяо бхависсад̇ий’’д̇и звам̣ бана н̃ад̇ваа буб̣б̣ан̣хасамаяам̣ ниваасзд̇ваа бад̇д̇ажийварамаад̣̇ааяа махад̇аа бхигкусан̇гхзна сад̣̇д̇хим̣ саавад̇т̇им̣ бин̣д̣ааяа бавидто мадтагун̣д̣алиймаан̣авасса бид̇у г̇зхасамийбз тад̇ваа чаб̣б̣ан̣н̣аб̣уд̣̇д̇харам̣сияо виссаж̇ж̇зси. д̇аа д̣̇исваа маан̣аво ‘‘гимзд̇а’’нд̇и ид̇о жид̇о жа вилогзнд̇о ад̣̇д̣̇аса бхаг̇аванд̇ам̣ д̣̇анд̇ам̣ г̇уд̇д̇ам̣ санд̇инд̣̇рияам̣ д̣̇вад̇д̇им̣сааяа махаабурисалагкан̣зхи асийд̇ияаа ануб̣яан̃ж̇анзхи б̣яаамаббабхааяа гзд̇умаалааяа жа виж̇ж̇од̇амаанам̣ анубамааяа б̣уд̣̇д̇хасирияаа ажинд̇зяязна б̣уд̣̇д̇хаанубхаавзна вирожамаанам̣. д̣̇исваа д̇асса зд̇ад̣̇ахоси ‘‘б̣уд̣̇д̇хо ну ко бхаг̇аваа ид̇хаануббад̇д̇о, яассааяам̣ руубасамбад̣̇аа ад̇д̇ано д̇зж̇асаа суурияамби абхибхавад̇и, ганд̇абхаавзна жанд̣̇имам̣, убасанд̇абхаавзна саб̣б̣зби саман̣аб̣раахман̣з, убасамзна наама зд̇т̇зва бхавид̇аб̣б̣ам̣, аяамзва жа ман̃н̃з имасмим̣ логз аг̇г̇абуг̇г̇ало, мамзва жа анугамбааяа ид̇хаануббад̇д̇о’’д̇и б̣уд̣̇д̇хаарамман̣ааяа бийд̇ияаа ниранд̇арам̣ пудасарийро анаббагам̣ бийд̇исоманассам̣ бадисам̣взд̣̇знд̇о басаннажид̇д̇о ан̃ж̇алим̣ баг̇г̇аяха нибаж̇ж̇и. д̇ам̣ д̣̇исваа бхаг̇аваа ‘‘алам̣ имасса зд̇д̇агзна саг̇г̇уубабад̇д̇ияаа’’д̇и баггаами.
Bhagavā rattiyā paccūsasamaye mahākaruṇāsamāpattito vuṭṭhāya lokaṃ volokento addasa maṭṭhakuṇḍalīmāṇavaṃ khīṇāyukaṃ tadaheva cavanadhammaṃ, nirayasaṃvattanikañcassa kammaṃ katokāsaṃ. ‘‘Sace panāhaṃ tattha gamissāmi, so mayi cittaṃ pasādetvā devaloke nibbattitvā pitaraṃ āḷāhane rodamānaṃ upagantvā saṃvejessati, evaṃ so ca tassa pitā ca mama santikaṃ āgamissati, mahājanakāyo sannipatissati tattha mayā dhamme desite mahādhammābhisamayo bhavissatī’’ti evaṃ pana ñatvā pubbaṇhasamayaṃ nivāsetvā pattacīvaramādāya mahatā bhikkhusaṅghena saddhiṃ sāvatthiṃ piṇḍāya paviṭṭho maṭṭhakuṇḍalīmāṇavassa pitu gehasamīpe ṭhatvā chabbaṇṇabuddharaṃsiyo vissajjesi. Tā disvā māṇavo ‘‘kimeta’’nti ito cito ca vilokento addasa bhagavantaṃ dantaṃ guttaṃ santindriyaṃ dvattiṃsāya mahāpurisalakkhaṇehi asītiyā anubyañjanehi byāmappabhāya ketumālāya ca vijjotamānaṃ anupamāya buddhasiriyā acinteyyena buddhānubhāvena virocamānaṃ. Disvā tassa etadahosi ‘‘buddho nu kho bhagavā idhānuppatto, yassāyaṃ rūpasampadā attano tejasā sūriyampi abhibhavati, kantabhāvena candimaṃ, upasantabhāvena sabbepi samaṇabrāhmaṇe, upasamena nāma ettheva bhavitabbaṃ, ayameva ca maññe imasmiṃ loke aggapuggalo, mameva ca anukampāya idhānuppatto’’ti buddhārammaṇāya pītiyā nirantaraṃ phuṭasarīro anappakaṃ pītisomanassaṃ paṭisaṃvedento pasannacitto añjaliṃ paggayha nipajji. Taṃ disvā bhagavā ‘‘alaṃ imassa ettakena saggūpapattiyā’’ti pakkāmi.
соби д̇ам̣ бийд̇исоманассам̣ авиж̇аханд̇ова гаалам̣ гад̇ваа д̇аавад̇им̣сзсу д̣̇ваад̣̇асаяож̇анигз вимаанз ниб̣б̣ад̇д̇и. бид̇аа банасса сарийрасаггаарам̣ гарид̇ваа д̣̇уд̇ияад̣̇ивасз бажжуусавзлааяам̣ аал̣ааханам̣ г̇анд̇ваа ‘‘хаа хаа мадтагун̣д̣али, хаа хаа мадтагун̣д̣алий’’д̇и барид̣̇звамаано аал̣ааханам̣ анубариггаманд̇о род̣̇ад̇и. д̣̇звабуд̇д̇о ад̇д̇ано вибхавасамбад̇д̇им̣ ологзд̇ваа ‘‘гуд̇о ну ко ахам̣ ид̇хааг̇ад̇о гин̃жа гаммам̣ гад̇ваа’’д̇и убад̇хаарзнд̇о ад̇д̇ано буримад̇д̇абхаавам̣ н̃ад̇ваа д̇ад̇т̇а жа маран̣агаалз бхаг̇авад̇и бавад̇д̇ид̇ам̣ жид̇д̇аббасаад̣̇ам̣ манохарам̣ ан̃ж̇алигаран̣амад̇д̇ам̣ д̣̇исваа ‘‘ахо махаанубхааваа б̣уд̣̇д̇хаа бхаг̇аванд̇о’’д̇и саад̇исаяам̣ д̇ат̇ааг̇ад̇з сан̃ж̇аад̇аббасаад̣̇аб̣ахумаано ‘‘ад̣̇иннабуб̣б̣агаб̣раахман̣о ну ко гим̣ гарод̇ий’’д̇и убад̇хаарзнд̇о аал̣ааханз род̣̇амаанам̣ д̣̇исваа ‘‘аяам̣ маяхам̣ буб̣б̣з бхзсаж̇ж̇амад̇д̇амби агад̇ваа ид̣̇аани нирад̇т̇агам̣ аал̣ааханз род̣̇ад̇и, ханд̣̇а нам̣ сам̣взж̇зд̇ваа гусалз бад̇идтаабзссаамий’’д̇и д̣̇звалогад̇о ааг̇анд̇ваа мадтагун̣д̣алийруубзна род̣̇амаано ‘‘хаа хаа жанд̣̇а, хаа хаа суурияаа’’д̇и б̣аахаа баг̇г̇аяха ганд̣̇анд̇о бид̇у самийбз адтааси. ат̇а нам̣ б̣раахман̣о ‘‘аяам̣ мадтагун̣д̣алий ааг̇ад̇о’’д̇и жинд̇зд̇ваа г̇аат̇ааяа аж̇жхабхааси –
Sopi taṃ pītisomanassaṃ avijahantova kālaṃ katvā tāvatiṃsesu dvādasayojanike vimāne nibbatti. Pitā panassa sarīrasakkāraṃ karitvā dutiyadivase paccūsavelāyaṃ āḷāhanaṃ gantvā ‘‘hā hā maṭṭhakuṇḍali, hā hā maṭṭhakuṇḍalī’’ti paridevamāno āḷāhanaṃ anuparikkamanto rodati. Devaputto attano vibhavasampattiṃ oloketvā ‘‘kuto nu kho ahaṃ idhāgato kiñca kammaṃ katvā’’ti upadhārento attano purimattabhāvaṃ ñatvā tattha ca maraṇakāle bhagavati pavattitaṃ cittappasādaṃ manoharaṃ añjalikaraṇamattaṃ disvā ‘‘aho mahānubhāvā buddhā bhagavanto’’ti sātisayaṃ tathāgate sañjātappasādabahumāno ‘‘adinnapubbakabrāhmaṇo nu kho kiṃ karotī’’ti upadhārento āḷāhane rodamānaṃ disvā ‘‘ayaṃ mayhaṃ pubbe bhesajjamattampi akatvā idāni niratthakaṃ āḷāhane rodati, handa naṃ saṃvejetvā kusale patiṭṭhāpessāmī’’ti devalokato āgantvā maṭṭhakuṇḍalīrūpena rodamāno ‘‘hā hā canda, hā hā sūriyā’’ti bāhā paggayha kandanto pitu samīpe aṭṭhāsi. Atha naṃ brāhmaṇo ‘‘ayaṃ maṭṭhakuṇḍalī āgato’’ti cintetvā gāthāya ajjhabhāsi –
1207.
1207.
‘‘алан̇гад̇о мадтагун̣д̣алий, маалад̇хаарий харижанд̣̇ануссад̣̇о;
‘‘Alaṅkato maṭṭhakuṇḍalī, māladhārī haricandanussado;
б̣аахаа баг̇г̇аяха ганд̣̇аси, ванамаж̇жхз гим̣ д̣̇угкид̇о д̇ува’’нд̇и.
Bāhā paggayha kandasi, vanamajjhe kiṃ dukkhito tuva’’nti.
д̇ад̇т̇а алан̇гад̇од̇и вибхуусид̇о. мадтагун̣д̣алийд̇и сарийраббад̣̇зсасса агхам̣санад̇т̇ам̣ маалаалад̇аад̣̇аяо ад̣̇ассзд̇ваа мадтаагаарзнзва гад̇агун̣д̣ало. ат̇а ваа мадтагун̣д̣алийд̇и висуд̣̇д̇хагун̣д̣ало, д̇аабзд̇ваа ж̇аад̇ихин̇г̇улигааяа маж̇ж̇ид̇ваа д̇ховид̇ваа суугараломзна маж̇ж̇ид̇агун̣д̣алод̇и ад̇т̇о . маалад̇хаарийд̇и маалам̣ д̇хаарзнд̇о, бил̣анд̇хид̇амаалод̇и ад̇т̇о. харижанд̣̇ануссад̣̇од̇и рад̇д̇ажанд̣̇анзна саб̣б̣асо анулид̇д̇аг̇ад̇д̇о. гинд̇и бужчааважанам̣. д̣̇угкид̇од̇и д̣̇угкаббад̇д̇о. гим̣д̣̇угкид̇од̇и ваа згамзва бад̣̇ам̣, гзна д̣̇угкзна д̣̇угкид̇од̇и ад̇т̇о.
Tattha alaṅkatoti vibhūsito. Maṭṭhakuṇḍalīti sarīrappadesassa aghaṃsanatthaṃ mālālatādayo adassetvā maṭṭhākāreneva katakuṇḍalo. Atha vā maṭṭhakuṇḍalīti visuddhakuṇḍalo, tāpetvā jātihiṅgulikāya majjitvā dhovitvā sūkaralomena majjitakuṇḍaloti attho . Māladhārīti mālaṃ dhārento, piḷandhitamāloti attho. Haricandanussadoti rattacandanena sabbaso anulittagatto. Kinti pucchāvacanaṃ. Dukkhitoti dukkhappatto. Kiṃdukkhitoti vā ekameva padaṃ, kena dukkhena dukkhitoti attho.
ат̇а нам̣ д̣̇звабуд̇д̇о ааха –
Atha naṃ devaputto āha –
1208.
1208.
‘‘сован̣н̣амаяо бабхассаро, уббанно рат̇абан̃ж̇аро мама;
‘‘Sovaṇṇamayo pabhassaro, uppanno rathapañjaro mama;
д̇асса жаггаяуг̇ам̣ на винд̣̇аами, д̇зна д̣̇угкзна ж̇ахаами ж̇ийвид̇а’’нд̇и.
Tassa cakkayugaṃ na vindāmi, tena dukkhena jahāmi jīvita’’nti.
ат̇а нам̣ б̣раахман̣о ааха –
Atha naṃ brāhmaṇo āha –
1209.
1209.
‘‘сован̣н̣амаяам̣ ман̣имаяам̣, лохид̇агамаяам̣ ат̇а руубияамаяам̣;
‘‘Sovaṇṇamayaṃ maṇimayaṃ, lohitakamayaṃ atha rūpiyamayaṃ;
аажигка мз бхад̣̇д̣̇амаан̣ава, жаггаяуг̇ам̣ бадибаад̣̇аяаами д̇з’’д̇и.
Ācikkha me bhaddamāṇava, cakkayugaṃ paṭipādayāmi te’’ti.
д̇ам̣ суд̇ваа маан̣аво ‘‘аяам̣ буд̇д̇асса бхзсаж̇ж̇ам̣ агад̇ваа буд̇д̇абад̇ируубагам̣ мам̣ д̣̇исваа род̣̇анд̇о ‘суван̣н̣аад̣̇имаяам̣ рат̇ажаггам̣ гаромий’д̇и вад̣̇ад̇и, ход̇у ниг̇г̇ан̣хиссаами на’’нд̇и жинд̇зд̇ваа ‘‘гийва маханд̇ам̣ мз жаггаяуг̇ам̣ гариссасий’’д̇и вад̇ваа ‘‘яаава маханд̇ам̣ ааган̇касий’’д̇и вуд̇д̇з ‘‘жанд̣̇имасууриязхи мз ад̇т̇о, д̇з мз д̣̇зхий’’д̇и яаажанд̇о –
Taṃ sutvā māṇavo ‘‘ayaṃ puttassa bhesajjaṃ akatvā puttapatirūpakaṃ maṃ disvā rodanto ‘suvaṇṇādimayaṃ rathacakkaṃ karomī’ti vadati, hotu niggaṇhissāmi na’’nti cintetvā ‘‘kīva mahantaṃ me cakkayugaṃ karissasī’’ti vatvā ‘‘yāva mahantaṃ ākaṅkhasī’’ti vutte ‘‘candimasūriyehi me attho, te me dehī’’ti yācanto –
1210.
1210.
‘‘со маан̣аво д̇асса баавад̣̇и, жанд̣̇асуурияаа убхаязд̇т̇а д̣̇иссарз;
‘‘So māṇavo tassa pāvadi, candasūriyā ubhayettha dissare;
сован̣н̣амаяо рат̇о мама, д̇зна жаггаяуг̇зна собхад̇ий’’д̇и.
Sovaṇṇamayo ratho mama, tena cakkayugena sobhatī’’ti.
ат̇а нам̣ б̣раахман̣о ааха –
Atha naṃ brāhmaṇo āha –
1211.
1211.
‘‘б̣аало ко д̇вам̣ аси маан̣ава, яо д̇вам̣ бад̇т̇аяасз абад̇т̇ияам̣;
‘‘Bālo kho tvaṃ asi māṇava, yo tvaṃ patthayase apatthiyaṃ;
ман̃н̃аами д̇увам̣ мариссаси, на хи д̇вам̣ лажчаси жанд̣̇асуурияз’’д̇и.
Maññāmi tuvaṃ marissasi, na hi tvaṃ lacchasi candasūriye’’ti.
ат̇а нам̣ маан̣аво ‘‘гим̣ бана бан̃н̃ааяамаанассад̇т̇ааяа род̣̇анд̇о б̣аало ход̇и, уд̣̇ааху абан̃н̃ааяамаанассаа’’д̇и вад̇ваа –
Atha naṃ māṇavo ‘‘kiṃ pana paññāyamānassatthāya rodanto bālo hoti, udāhu apaññāyamānassā’’ti vatvā –
1212.
1212.
‘‘г̇аманааг̇аманамби д̣̇иссад̇и, ван̣н̣ад̇хаад̇у убхаяад̇т̇а вийт̇ияаа;
‘‘Gamanāgamanampi dissati, vaṇṇadhātu ubhayattha vīthiyā;
бзд̇о гаалагад̇о на д̣̇иссад̇и, го нид̇ха ганд̣̇ад̇ам̣ б̣ааляад̇аро’’д̇и.
Peto kālakato na dissati, ko nidha kandataṃ bālyataro’’ti.
д̇ам̣ суд̇ваа б̣раахман̣о ‘‘яуд̇д̇ам̣ зса вад̣̇ад̇ий’’д̇и саллагкзд̇ваа –
Taṃ sutvā brāhmaṇo ‘‘yuttaṃ esa vadatī’’ti sallakkhetvā –
1213.
1213.
‘‘сажжам̣ ко вад̣̇зси маан̣ава, ахамзва ганд̣̇ад̇ам̣ б̣ааляад̇аро;
‘‘Saccaṃ kho vadesi māṇava, ahameva kandataṃ bālyataro;
жанд̣̇ам̣ вияа д̣̇аараго руд̣̇ам̣, бзд̇ам̣ гаалагад̇аабхибад̇т̇аяи’’нд̇и. –
Candaṃ viya dārako rudaṃ, petaṃ kālakatābhipatthayi’’nti. –
вад̇ваа д̇асса гат̇ааяа ниссого худ̇ваа маан̣авасса т̇уд̇им̣ гаронд̇о имаа г̇аат̇аа абхааси –
Vatvā tassa kathāya nissoko hutvā māṇavassa thutiṃ karonto imā gāthā abhāsi –
1214.
1214.
‘‘аад̣̇ид̇д̇ам̣ вад̇а мам̣ санд̇ам̣, гхад̇асид̇д̇ам̣ва баавагам̣;
‘‘Ādittaṃ vata maṃ santaṃ, ghatasittaṃva pāvakaṃ;
вааринаа вияа осин̃жам̣, саб̣б̣ам̣ ниб̣б̣аабаяз д̣̇арам̣.
Vārinā viya osiñcaṃ, sabbaṃ nibbāpaye daraṃ.
1215.
1215.
‘‘аб̣б̣ахий вад̇а мз саллам̣, согам̣ хад̣̇аяаниссид̇ам̣;
‘‘Abbahī vata me sallaṃ, sokaṃ hadayanissitaṃ;
яо мз согабарзд̇асса, буд̇д̇асогам̣ абаануд̣̇и.
Yo me sokaparetassa, puttasokaṃ apānudi.
1216.
1216.
‘‘сваахам̣ аб̣б̣уул̣хасаллосми, сийд̇ибхууд̇осми ниб̣б̣уд̇о;
‘‘Svāhaṃ abbūḷhasallosmi, sītibhūtosmi nibbuto;
на сожаами на род̣̇аами, д̇ава суд̇ваана маан̣аваа’’д̇и.
Na socāmi na rodāmi, tava sutvāna māṇavā’’ti.
1208-10. д̇ад̇т̇а рат̇абан̃ж̇арод̇и рат̇уубад̇т̇ам̣. на винд̣̇аамийд̇и на лабхаами. бхад̣̇д̣̇амаан̣аваад̇и аалабанам̣. бадибаад̣̇аяаамийд̇и самбаад̣̇зд̇ваа д̣̇ад̣̇аами, маа жаггаяуг̇аабхаавзна ж̇ийвид̇ам̣ ж̇ахийд̇и ад̇хиббааяо. убхаязд̇т̇а д̣̇иссарзд̇и убхоби зд̇т̇а жанд̣̇асуурияаа аагаасз д̣̇иссанд̇и. яа-гааро бад̣̇асанд̇хигаро, убхаяз зд̇т̇аад̇и ваа бад̣̇авибхааг̇о.
1208-10. Tattha rathapañjaroti rathūpatthaṃ. Na vindāmīti na labhāmi. Bhaddamāṇavāti ālapanaṃ. Paṭipādayāmīti sampādetvā dadāmi, mā cakkayugābhāvena jīvitaṃ jahīti adhippāyo. Ubhayettha dissareti ubhopi ettha candasūriyā ākāse dissanti. Ya-kāro padasandhikaro, ubhaye etthāti vā padavibhāgo.
1212. г̇аманааг̇амананд̇и д̣̇ивасз д̣̇ивасз ог̇амануг̇г̇аманавасзна жанд̣̇асуурияаанам̣ г̇аманам̣ ааг̇аманан̃жа д̣̇иссад̇и. ‘‘г̇аманог̇амана’’нд̇иби баал̣и, уг̇г̇аманам̣ ог̇аманан̃жаад̇и ад̇т̇о. ван̣н̣ад̇хаад̇ууд̇и сийд̇ибхаавависидтаа ганд̇абхаавабхаасураа, ун̣хабхаавависидтаа д̇игкабхаавабхаасураа жа ван̣н̣анибхаа. убхаяад̇т̇аад̇и жанд̣̇з суурияз жаад̇и д̣̇вийсуби ван̣н̣ад̇хаад̇у д̣̇иссад̇ийд̇и яож̇зд̇аб̣б̣ам̣. вийт̇ияаад̇и бавад̇д̇анавийт̇ияам̣ аагаасз, нааг̇авийт̇ияаад̣̇ивийт̇ияам̣ ваа. ‘‘убхаязд̇т̇аа’’д̇иби баато, убхаяз зд̇т̇аад̇и бад̣̇ависанд̇хи. б̣ааляад̇арод̇и б̣аалад̇аро ад̇исаязна б̣аало.
1212.Gamanāgamananti divase divase ogamanuggamanavasena candasūriyānaṃ gamanaṃ āgamanañca dissati. ‘‘Gamanogamana’’ntipi pāḷi, uggamanaṃ ogamanañcāti attho. Vaṇṇadhātūti sītibhāvavisiṭṭhā kantabhāvabhāsurā, uṇhabhāvavisiṭṭhā tikkhabhāvabhāsurā ca vaṇṇanibhā. Ubhayatthāti cande sūriye cāti dvīsupi vaṇṇadhātu dissatīti yojetabbaṃ. Vīthiyāti pavattanavīthiyaṃ ākāse, nāgavīthiyādivīthiyaṃ vā. ‘‘Ubhayetthā’’tipi pāṭho, ubhaye etthāti padavisandhi. Bālyataroti bālataro atisayena bālo.
1213. имам̣ бана гат̇ам̣ суд̇ваа ‘‘алаб̣бханийяавад̇т̇ум̣ вад̇аахам̣ бад̇т̇зд̇ваа гзвалам̣ согаг̇г̇инаа д̣аяхаами, гим̣ мз нирад̇т̇агзна анаяаб̣яасанзнаа’’д̇и бадисан̇каанз адтааси. ат̇а д̣̇звабуд̇д̇о мадтагун̣д̣алийруубам̣ бадисам̣харид̇ваа ад̇д̇ано д̣̇иб̣б̣аруубзнзва адтааси. б̣раахман̣о бана д̇ам̣ анологзд̇ваа маан̣ававохаарзнзва вохаранд̇о ‘‘сажжам̣ ко вад̣̇зси маан̣аваа’’д̇иаад̣̇имааха. д̇ад̇т̇а жанд̣̇ам̣ вияа д̣̇аараго руд̣̇анд̇и жанд̣̇ам̣ абхибад̇т̇аяам̣ руд̣̇анд̇о д̣̇аараго вияаад̇и ад̇т̇о. гаалагад̇аабхибад̇т̇аяинд̇и гаалагад̇ам̣ абхибад̇т̇аяим̣. ‘‘абхибад̇т̇аяа’’нд̇иби баато.
1213. Imaṃ pana kathaṃ sutvā ‘‘alabbhanīyavatthuṃ vatāhaṃ patthetvā kevalaṃ sokagginā ḍayhāmi, kiṃ me niratthakena anayabyasanenā’’ti paṭisaṅkhāne aṭṭhāsi. Atha devaputto maṭṭhakuṇḍalīrūpaṃ paṭisaṃharitvā attano dibbarūpeneva aṭṭhāsi. Brāhmaṇo pana taṃ anoloketvā māṇavavohāreneva voharanto ‘‘saccaṃ kho vadesi māṇavā’’tiādimāha. Tattha candaṃ viya dārako rudanti candaṃ abhipatthayaṃ rudanto dārako viyāti attho. Kālakatābhipatthayinti kālakataṃ abhipatthayiṃ. ‘‘Abhipatthaya’’ntipi pāṭho.
1214-5. аад̣̇ид̇д̇анд̇и согаг̇г̇инаа аад̣̇ид̇д̇ам̣. ниб̣б̣аабаяз д̣̇аранд̇и ниб̣б̣аабаяи д̣̇арат̇ам̣ согабарил̣аахам̣. аб̣б̣ахийд̇и уд̣̇д̇хари.
1214-5.Ādittanti sokagginā ādittaṃ. Nibbāpaye daranti nibbāpayi darathaṃ sokapariḷāhaṃ. Abbahīti uddhari.
ат̇а б̣раахман̣о согам̣ винод̣̇зд̇ваа ад̇д̇ано убад̣̇зсад̣̇ааяагам̣ д̣̇иб̣б̣аруубзна тид̇ам̣ д̣̇исваа ‘‘го наама д̇ва’’нд̇и бужчанд̇о –
Atha brāhmaṇo sokaṃ vinodetvā attano upadesadāyakaṃ dibbarūpena ṭhitaṃ disvā ‘‘ko nāma tva’’nti pucchanto –
1217.
1217.
‘‘д̣̇звад̇аа нуси г̇анд̇хаб̣б̣о, ад̣̇у сагго буринд̣̇ад̣̇о;
‘‘Devatā nusi gandhabbo, adu sakko purindado;
го ваа д̇вам̣ гасса ваа буд̇д̇о, гат̇ам̣ ж̇аанзму д̇ам̣ маяа’’нд̇и. –
Ko vā tvaṃ kassa vā putto, kathaṃ jānemu taṃ maya’’nti. –
ааха. соби д̇асса –
Āha. Sopi tassa –
1218.
1218.
‘‘яан̃жа ганд̣̇аси яан̃жа род̣̇аси, буд̇д̇ам̣ аал̣ааханз саяам̣ д̣̇ахид̇ваа;
‘‘Yañca kandasi yañca rodasi, puttaṃ āḷāhane sayaṃ dahitvā;
сваахам̣ гусалам̣ гарид̇ваа гаммам̣, д̇ид̣̇асаанам̣ сахаб̣яад̇ам̣ г̇ад̇о’’д̇и. –
Svāhaṃ kusalaṃ karitvā kammaṃ, tidasānaṃ sahabyataṃ gato’’ti. –
ад̇д̇аанам̣ гат̇зси. д̇ад̇т̇а яан̃жа ганд̣̇аси яан̃жа род̣̇асийд̇и яам̣ д̇ава буд̇д̇ам̣ мадтагун̣д̣алим̣ уд̣̇д̣̇исса род̣̇аси, ассууни мун̃жаси.
Attānaṃ kathesi. Tattha yañca kandasi yañca rodasīti yaṃ tava puttaṃ maṭṭhakuṇḍaliṃ uddissa rodasi, assūni muñcasi.
ат̇а нам̣ б̣раахман̣о ааха –
Atha naṃ brāhmaṇo āha –
1219.
1219.
‘‘аббам̣ ваа б̣ахум̣ ваа наад̣̇д̣̇асаама, д̣̇аанам̣ д̣̇ад̣̇анд̇асса сагз аг̇аарз;
‘‘Appaṃ vā bahuṃ vā nāddasāma, dānaṃ dadantassa sake agāre;
убосат̇агаммам̣ ваа д̇аад̣̇исам̣, гзна гаммзна г̇ад̇оси д̣̇звалога’’нд̇и.
Uposathakammaṃ vā tādisaṃ, kena kammena gatosi devaloka’’nti.
д̇ад̇т̇а ‘‘убосат̇агаммам̣ ваа д̇аад̣̇исам̣ наад̣̇д̣̇асаамаа’’д̇и яож̇анаа.
Tattha ‘‘uposathakammaṃ vā tādisaṃ nāddasāmā’’ti yojanā.
ат̇а нам̣ маан̣аво ааха –
Atha naṃ māṇavo āha –
1220.
1220.
‘‘ааб̣аад̇хигохам̣ д̣̇угкид̇о г̇илаано, аад̇ураруубомхи сагз нивзсанз;
‘‘Ābādhikohaṃ dukkhito gilāno, āturarūpomhi sake nivesane;
б̣уд̣̇д̇хам̣ виг̇ад̇араж̇ам̣ вид̇ин̣н̣аган̇кам̣, ад̣̇д̣̇агким̣ суг̇ад̇ам̣ аномабан̃н̃ам̣.
Buddhaṃ vigatarajaṃ vitiṇṇakaṅkhaṃ, addakkhiṃ sugataṃ anomapaññaṃ.
1221.
1221.
‘‘сваахам̣ муд̣̇ид̇амано басаннажид̇д̇о, ан̃ж̇алим̣ агарим̣ д̇ат̇ааг̇ад̇асса;
‘‘Svāhaṃ muditamano pasannacitto, añjaliṃ akariṃ tathāgatassa;
д̇аахам̣ гусалам̣ гарид̇ваана гаммам̣, д̇ид̣̇асаанам̣ сахаб̣яад̇ам̣ г̇ад̇о’’д̇и.
Tāhaṃ kusalaṃ karitvāna kammaṃ, tidasānaṃ sahabyataṃ gato’’ti.
1220-21. д̇ад̇т̇а ааб̣аад̇хигод̇и ааб̣аад̇хасаман̇г̇ий. д̣̇угкид̇од̇и д̇знзва ааб̣аад̇хигабхаавзна ж̇аад̇ад̣̇угко. г̇илаанод̇и г̇илааяамаанод̇и ад̇т̇о. аад̇ураруубод̇и д̣̇угкавзд̣̇анаабхид̇уннагааяо. виг̇ад̇араж̇анд̇и виг̇ад̇арааг̇аад̣̇ираж̇ам̣. вид̇ин̣н̣аган̇канд̇и саб̣б̣асо сам̣саяаанам̣ самужчиннад̇д̇аа д̇ин̣н̣авижигижчам̣. аномабан̃н̃анд̇и барибун̣н̣абан̃н̃ам̣, саб̣б̣ан̃н̃унд̇и ад̇т̇о. агаринд̇и агаасим̣. д̇ааханд̇и д̇ам̣ ахам̣.
1220-21. Tattha ābādhikoti ābādhasamaṅgī. Dukkhitoti teneva ābādhikabhāvena jātadukkho. Gilānoti gilāyamānoti attho. Āturarūpoti dukkhavedanābhitunnakāyo. Vigatarajanti vigatarāgādirajaṃ. Vitiṇṇakaṅkhanti sabbaso saṃsayānaṃ samucchinnattā tiṇṇavicikicchaṃ. Anomapaññanti paripuṇṇapaññaṃ, sabbaññunti attho. Akarinti akāsiṃ. Tāhanti taṃ ahaṃ.
звам̣ д̇асмим̣ гат̇знд̇зязва б̣раахман̣асса сагаласарийрам̣ бийд̇ияаа барибуури. со д̇ам̣ бийд̇им̣ бавзд̣̇знд̇о –
Evaṃ tasmiṃ kathenteyeva brāhmaṇassa sakalasarīraṃ pītiyā paripūri. So taṃ pītiṃ pavedento –
1222.
1222.
‘‘ажчарияам̣ вад̇а аб̣бхуд̇ам̣ вад̇а,
‘‘Acchariyaṃ vata abbhutaṃ vata,
ан̃ж̇алигаммасса аяамийд̣̇исо вибааго;
Añjalikammassa ayamīdiso vipāko;
ахамби муд̣̇ид̇амано басаннажид̇д̇о,
Ahampi muditamano pasannacitto,
аж̇ж̇зва б̣уд̣̇д̇хам̣ саран̣ам̣ важ̇аамий’’д̇и. – ааха;
Ajjeva buddhaṃ saraṇaṃ vajāmī’’ti. – āha;
д̇ад̇т̇а анабхин̣хаббавад̇д̇ид̇ааяа ажчарам̣ бахарид̇ум̣ яог̇г̇анд̇и ажчарияам̣, абхууд̇абуб̣б̣ад̇ааяа аб̣бхуд̇ам̣. убхаязнаби вимхаяаавахад̇ам̣язва д̣̇ассзд̇ваа ‘‘ахамби муд̣̇ид̇амано басаннажид̇д̇о, аж̇ж̇зва б̣уд̣̇д̇хам̣ саран̣ам̣ важ̇аамий’’д̇и ааха.
Tattha anabhiṇhappavattitāya accharaṃ paharituṃ yogganti acchariyaṃ, abhūtapubbatāya abbhutaṃ. Ubhayenapi vimhayāvahataṃyeva dassetvā ‘‘ahampi muditamano pasannacitto, ajjeva buddhaṃ saraṇaṃ vajāmī’’ti āha.
ат̇а нам̣ д̣̇звабуд̇д̇о саран̣аг̇аманз сийласамаад̣̇аанз жа нияож̇знд̇о –
Atha naṃ devaputto saraṇagamane sīlasamādāne ca niyojento –
1223.
1223.
‘‘аж̇ж̇зва б̣уд̣̇д̇хам̣ саран̣ам̣ важ̇аахи, д̇хамман̃жа сан̇гхан̃жа басаннажид̇д̇о;
‘‘Ajjeva buddhaṃ saraṇaṃ vajāhi, dhammañca saṅghañca pasannacitto;
д̇ат̇зва сигкааяа бад̣̇аани бан̃жа, акан̣д̣апуллаани самаад̣̇ияассу.
Tatheva sikkhāya padāni pañca, akhaṇḍaphullāni samādiyassu.
1224.
1224.
‘‘баан̣аад̇ибаад̇аа вирамассу киббам̣, логз ад̣̇иннам̣ бариваж̇ж̇аяассу;
‘‘Pāṇātipātā viramassu khippaṃ, loke adinnaṃ parivajjayassu;
амаж̇ж̇або маа жа мусаа бхан̣аахи, сагзна д̣̇аарзна жа хохи д̇удто’’д̇и. –
Amajjapo mā ca musā bhaṇāhi, sakena dārena ca hohi tuṭṭho’’ti. –
г̇аат̇аад̣̇ваяамааха.
Gāthādvayamāha.
1223. д̇ад̇т̇а д̇ат̇зваад̇и яат̇аа басаннажид̇д̇о ‘‘саммаасамб̣уд̣̇д̇хо бхаг̇аваа’’д̇и б̣уд̣̇д̇хам̣ саран̣ам̣ важ̇зси, д̇ат̇зва ‘‘сваагкаад̇о д̇хаммо, суббадибанно сан̇гхо’’д̇и басаннажид̇д̇о д̇хамман̃жа сан̇гхан̃жа саран̣ам̣ важ̇аахи. яат̇аа ваа басаннажид̇д̇о рад̇анад̇д̇аяам̣ саран̣ам̣ важ̇зси, д̇ат̇зва ‘‘аяам̣ згам̣сад̇о д̣̇идтзва д̇хаммз абхисамбарааяан̃жа хид̇асукаавахо’’д̇и басаннажид̇д̇о сигкааяа ад̇хисийласигкааяа бад̣̇аани годтаасабхууд̇аани ад̇хижид̇д̇аад̇хибан̃н̃аасигкааяа ваа убааяабхууд̇аани бан̃жасийлаани авигобанад̇о жа асам̣гилиссанад̇о жа акан̣д̣апуллаани самаад̣̇ияассу, самаад̣̇ааяа вад̇д̇ассууд̇и ад̇т̇о.
1223. Tattha tathevāti yathā pasannacitto ‘‘sammāsambuddho bhagavā’’ti buddhaṃ saraṇaṃ vajesi, tatheva ‘‘svākkhāto dhammo, suppaṭipanno saṅgho’’ti pasannacitto dhammañca saṅghañca saraṇaṃ vajāhi. Yathā vā pasannacitto ratanattayaṃ saraṇaṃ vajesi, tatheva ‘‘ayaṃ ekaṃsato diṭṭheva dhamme abhisamparāyañca hitasukhāvaho’’ti pasannacitto sikkhāya adhisīlasikkhāya padāni koṭṭhāsabhūtāni adhicittaadhipaññāsikkhāya vā upāyabhūtāni pañcasīlāni avikopanato ca asaṃkilissanato ca akhaṇḍaphullāni samādiyassu, samādāya vattassūti attho.
звам̣ д̣̇звабуд̇д̇зна саран̣аг̇аманз сийласамаад̣̇аанз жа нияож̇ид̇о б̣раахман̣о д̇асса важанам̣ сирасаа самбадижчанд̇о –
Evaṃ devaputtena saraṇagamane sīlasamādāne ca niyojito brāhmaṇo tassa vacanaṃ sirasā sampaṭicchanto –
1225.
1225.
‘‘ад̇т̇агаамоси мз яагка, хид̇агаамоси д̣̇звад̇з;
‘‘Atthakāmosi me yakkha, hitakāmosi devate;
гароми д̇уяхам̣ важанам̣, д̇вам̣си аажарияо мамаа’’д̇и. –
Karomi tuyhaṃ vacanaṃ, tvaṃsi ācariyo mamā’’ti. –
г̇аат̇ам̣ вад̇ваа д̇ад̇т̇а бад̇идтаханд̇о –
Gāthaṃ vatvā tattha patiṭṭhahanto –
1226.
1226.
‘‘убзми саран̣ам̣ б̣уд̣̇д̇хам̣, д̇хамман̃жааби ануд̇д̇арам̣;
‘‘Upemi saraṇaṃ buddhaṃ, dhammañcāpi anuttaraṃ;
сан̇гхан̃жа нарад̣̇звасса, г̇ажчаами саран̣ам̣ ахам̣.
Saṅghañca naradevassa, gacchāmi saraṇaṃ ahaṃ.
1227.
1227.
‘‘баан̣аад̇ибаад̇аа вирамаами киббам̣, логз ад̣̇иннам̣ бариваж̇ж̇аяаами;
‘‘Pāṇātipātā viramāmi khippaṃ, loke adinnaṃ parivajjayāmi;
амаж̇ж̇або но жа мусаа бхан̣аами, сагзна д̣̇аарзна жа хоми д̇удто’’д̇и. –
Amajjapo no ca musā bhaṇāmi, sakena dārena ca homi tuṭṭho’’ti. –
г̇аат̇аад̣̇ваяамааха. д̇амби сувин̃н̃зяяамзва.
Gāthādvayamāha. Tampi suviññeyyameva.
д̇ад̇о д̣̇звабуд̇д̇о ‘‘гад̇ам̣ маяаа б̣раахман̣асса гад̇д̇аб̣б̣аяуд̇д̇агам̣, ид̣̇аани саяамзва бхаг̇аванд̇ам̣ убасан̇гамиссад̇ий’’д̇и д̇ад̇т̇зва анд̇арад̇хааяи. б̣раахман̣оби ко бхаг̇авад̇и сан̃ж̇аад̇абасаад̣̇аб̣ахумаано д̣̇звад̇ааяа жа жод̣̇ияамаано ‘‘саман̣ам̣ г̇од̇амам̣ убасан̇гамиссаамий’’д̇и вихаараабхимуко г̇ажчад̇и. д̇ам̣ д̣̇исваа махааж̇ано ‘‘аяам̣ б̣раахман̣о зд̇д̇агам̣ гаалам̣ д̇ат̇ааг̇ад̇ам̣ анубасан̇гамид̇ваа аж̇ж̇а буд̇д̇асогзна убасан̇гамад̇и, гийд̣̇исий ну ко д̇хаммад̣̇зсанаа бхависсад̇ий’’д̇и д̇ам̣ ануб̣анд̇хи.
Tato devaputto ‘‘kataṃ mayā brāhmaṇassa kattabbayuttakaṃ, idāni sayameva bhagavantaṃ upasaṅkamissatī’’ti tattheva antaradhāyi. Brāhmaṇopi kho bhagavati sañjātapasādabahumāno devatāya ca codiyamāno ‘‘samaṇaṃ gotamaṃ upasaṅkamissāmī’’ti vihārābhimukho gacchati. Taṃ disvā mahājano ‘‘ayaṃ brāhmaṇo ettakaṃ kālaṃ tathāgataṃ anupasaṅkamitvā ajja puttasokena upasaṅkamati, kīdisī nu kho dhammadesanā bhavissatī’’ti taṃ anubandhi.
б̣раахман̣о бхаг̇аванд̇ам̣ убасан̇гамид̇ваа бадисант̇аарам̣ гад̇ваа звамааха ‘‘саггаа ну ко бхо г̇од̇ама гин̃жи д̣̇аанам̣ ад̣̇ад̇ваа сийлам̣ ваа арагкид̇ваа гзвалам̣ д̇умхзсу басаад̣̇амад̇д̇зна саг̇г̇з ниб̣б̣ад̇д̇ид̇у’’нд̇и. ‘‘нану, б̣раахман̣а, аж̇ж̇а бажжуусавзлааяам̣ мадтагун̣д̣алинаа д̣̇звабуд̇д̇зна ад̇д̇ано д̣̇звалогуубабад̇д̇игааран̣ам̣ д̇уяхам̣ гат̇ига’’нд̇и бхаг̇аваа авожа. д̇асмим̣ кан̣з мадтагун̣д̣алийд̣̇звабуд̇д̇о саха вимаанзна ааг̇анд̇ваа д̣̇иссамаанаруубо вимаанад̇о оруяха бхаг̇аванд̇ам̣ абхиваад̣̇зд̇ваа ан̃ж̇алим̣ баг̇г̇аяха згаманд̇ам̣ адтааси. ат̇а бхаг̇аваа д̇ассам̣ барисад̇и д̇зна д̣̇звабуд̇д̇зна гад̇асужарид̇ам̣ гат̇зд̇ваа барисааяа жид̇д̇агаллад̇ам̣ н̃ад̇ваа саамуггам̣сигам̣ д̇хаммад̣̇зсанам̣ агааси. д̣̇зсанаабарияосаанз д̣̇звабуд̇д̇о жа б̣раахман̣о жа саннибад̇ид̇абарисаа жаад̇и жад̇ураасийд̇ияаа баан̣асахассаанам̣ д̇хаммаабхисамаяо ахосийд̇и.
Brāhmaṇo bhagavantaṃ upasaṅkamitvā paṭisanthāraṃ katvā evamāha ‘‘sakkā nu kho bho gotama kiñci dānaṃ adatvā sīlaṃ vā arakkhitvā kevalaṃ tumhesu pasādamattena sagge nibbattitu’’nti. ‘‘Nanu, brāhmaṇa, ajja paccūsavelāyaṃ maṭṭhakuṇḍalinā devaputtena attano devalokūpapattikāraṇaṃ tuyhaṃ kathika’’nti bhagavā avoca. Tasmiṃ khaṇe maṭṭhakuṇḍalīdevaputto saha vimānena āgantvā dissamānarūpo vimānato oruyha bhagavantaṃ abhivādetvā añjaliṃ paggayha ekamantaṃ aṭṭhāsi. Atha bhagavā tassaṃ parisati tena devaputtena katasucaritaṃ kathetvā parisāya cittakallataṃ ñatvā sāmukkaṃsikaṃ dhammadesanaṃ akāsi. Desanāpariyosāne devaputto ca brāhmaṇo ca sannipatitaparisā cāti caturāsītiyā pāṇasahassānaṃ dhammābhisamayo ahosīti.
мадтагун̣д̣алийвимаанаван̣н̣анаа нидтид̇аа.
Maṭṭhakuṇḍalīvimānavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / вимаанавад̇т̇убаал̣и • Vimānavatthupāḷi / 9. мадтагун̣д̣алийвимаанавад̇т̇у • 9. Maṭṭhakuṇḍalīvimānavatthu
