| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
மாதுகா⁴தகாதி³கதா²வண்ணனா
Mātughātakādikathāvaṇṇanā
112. அபவாஹனந்தி ஸோத⁴னங். திரச்சா²னாதி³அமனுஸ்ஸஜாதிதோ மனுஸ்ஸஜாதிகானஞ்ஞேவ புத்தேஸு மெத்தாத³யோபி திக்க²விஸதா³ ஹொந்தி லோகுத்தரகு³ணா வியாதி ஆஹ ‘‘மனுஸ்ஸித்தி²பூ⁴தா ஜனிகா மாதா’’தி. யதா² மனுஸ்ஸானஞ்ஞேவ குஸலப்பவத்தி திக்க²விஸதா³, ஏவங் அகுஸலப்பவத்திபீதி ஆஹ ‘‘ஸயம்பி மனுஸ்ஸஜாதிகேனேவா’’திஆதி³. ஆனந்தரியேனாதி எத்த² சுதிஅனந்தரங் நிரயே படிஸந்தி⁴ப²லங் அனந்தரங் நாம, தஸ்மிங் அனந்தரே ஜனகத்தேன நியுத்தங் ஆனந்தரியங், தேன. வேஸியா புத்தோதி உபலக்க²ணமத்தங், குலித்தி²யா அதிசாரினியா புத்தோபி அத்தனோ பிதரங் அஜானித்வா கா⁴தெந்தோ பிதுகா⁴தகோவ ஹோதி.
112.Apavāhananti sodhanaṃ. Tiracchānādiamanussajātito manussajātikānaññeva puttesu mettādayopi tikkhavisadā honti lokuttaraguṇā viyāti āha ‘‘manussitthibhūtā janikā mātā’’ti. Yathā manussānaññeva kusalappavatti tikkhavisadā, evaṃ akusalappavattipīti āha ‘‘sayampi manussajātikenevā’’tiādi. Ānantariyenāti ettha cutianantaraṃ niraye paṭisandhiphalaṃ anantaraṃ nāma, tasmiṃ anantare janakattena niyuttaṃ ānantariyaṃ, tena. Vesiyā puttoti upalakkhaṇamattaṃ, kulitthiyā aticāriniyā puttopi attano pitaraṃ ajānitvā ghātento pitughātakova hoti.
114. அவஸேஸந்தி அனாகா³மிஆதி³கங். யங் பனெத்த² வத்தப்³ப³ங், தங் மனுஸ்ஸவிக்³க³ஹபாராஜிகே வுத்தமேவ.
114.Avasesanti anāgāmiādikaṃ. Yaṃ panettha vattabbaṃ, taṃ manussaviggahapārājike vuttameva.
115. அயங் ஸங்க⁴பே⁴த³கோதி பகதத்தங் பி⁴க்கு²ங் ஸந்தா⁴ய வுத்தங். புப்³பே³ ஏவ பாராஜிகங் ஸமாபன்னோ வா வத்தா²தி³தோ³ஸேன விபன்னோபஸம்பதோ³ வா ஸங்க⁴ங் பி⁴ந்த³ந்தோபி அனந்தரியங் ந பு²ஸதி, ஸங்கோ⁴ பன பி⁴ன்னோவ ஹோதி, பப்³ப³ஜ்ஜா சஸ்ஸ ந வாரிதாதி த³ட்ட²ப்³ப³ங்.
115.Ayaṃ saṅghabhedakoti pakatattaṃ bhikkhuṃ sandhāya vuttaṃ. Pubbe eva pārājikaṃ samāpanno vā vatthādidosena vipannopasampado vā saṅghaṃ bhindantopi anantariyaṃ na phusati, saṅgho pana bhinnova hoti, pabbajjā cassa na vāritāti daṭṭhabbaṃ.
‘‘து³ட்ட²சித்தேனா’’தி வுத்தமேவத்த²ங் விபா⁴வேதி ‘‘வத⁴கசித்தேனா’’தி. லோஹிதங் உப்பாதே³தீதி ததா²க³தஸ்ஸ வேரீஹி அபே⁴ஜ்ஜகாயதாய கேனசி ப³லக்காரேன சம்மாதி³சே²த³ங் கத்வா ப³ஹி லோஹிதங் பக்³க⁴ராபேதுங் ந ஸக்கா, ஆவுதா⁴தி³பஹாரேன பன லோஹிதங் டா²னதோ சலித்வா குப்பமானங் ஏகத்த² ஸஞ்சிதங் ஹோதி, எத்தகேன பன பஹாரதா³யகோ லோஹிதுப்பாத³கோ நாம ஹோதி தே³வத³த்தோ விய. சேதியங் பன போ³தி⁴ங் வா படிமாதி³ங் வா பி⁴ந்த³தோ ஆனந்தரியங் ந ஹோதி, ஆனந்தரியஸதி³ஸங் மஹாஸாவஜ்ஜங் ஹோதி. போ³தி⁴ருக்க²ஸ்ஸ பன ஓஜோஹரணஸாகா² சேவ ஸதா⁴துகங் சேதியங் பா³த⁴யமானா ச சி²ந்தி³தப்³பா³, புஞ்ஞமேவெத்த² ஹோதி.
‘‘Duṭṭhacittenā’’ti vuttamevatthaṃ vibhāveti ‘‘vadhakacittenā’’ti. Lohitaṃ uppādetīti tathāgatassa verīhi abhejjakāyatāya kenaci balakkārena cammādichedaṃ katvā bahi lohitaṃ paggharāpetuṃ na sakkā, āvudhādipahārena pana lohitaṃ ṭhānato calitvā kuppamānaṃ ekattha sañcitaṃ hoti, ettakena pana pahāradāyako lohituppādako nāma hoti devadatto viya. Cetiyaṃ pana bodhiṃ vā paṭimādiṃ vā bhindato ānantariyaṃ na hoti, ānantariyasadisaṃ mahāsāvajjaṃ hoti. Bodhirukkhassa pana ojoharaṇasākhā ceva sadhātukaṃ cetiyaṃ bādhayamānā ca chinditabbā, puññamevettha hoti.
மாதுகா⁴தகாதி³கதா²வண்ணனா நிட்டி²தா.
Mātughātakādikathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi
50. மாதுகா⁴தகவத்து² • 50. Mātughātakavatthu
52. அரஹந்தகா⁴தகவத்து² • 52. Arahantaghātakavatthu
53. பி⁴க்கு²னீதூ³ஸகவத்து² • 53. Bhikkhunīdūsakavatthu
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / மாதுகா⁴தகாதி³வத்து²கதா² • Mātughātakādivatthukathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / மாதுகா⁴தகாதி³வத்து²கதா²வண்ணனா • Mātughātakādivatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / மாதுகா⁴தகாதி³வத்து²கதா²வண்ணனா • Mātughātakādivatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 50. மாதுகா⁴தகாதி³வத்து²கதா² • 50. Mātughātakādivatthukathā
