| Library / Tipiṭaka / তিপিটক • Tipiṭaka / ৰিমতিৰিনোদনী-টীকা • Vimativinodanī-ṭīkā |
মাতুঘাতকাদিকথাৰণ্ণনা
Mātughātakādikathāvaṇṇanā
১১২. অপৰাহনন্তি সোধনং। তিরচ্ছানাদিঅমনুস্সজাতিতো মনুস্সজাতিকানঞ্ঞেৰ পুত্তেসু মেত্তাদযোপি তিক্খৰিসদা হোন্তি লোকুত্তরগুণা ৰিযাতি আহ ‘‘মনুস্সিত্থিভূতা জনিকা মাতা’’তি। যথা মনুস্সানঞ্ঞেৰ কুসলপ্পৰত্তি তিক্খৰিসদা, এৰং অকুসলপ্পৰত্তিপীতি আহ ‘‘সযম্পি মনুস্সজাতিকেনেৰা’’তিআদি। আনন্তরিযেনাতি এত্থ চুতিঅনন্তরং নিরযে পটিসন্ধিফলং অনন্তরং নাম, তস্মিং অনন্তরে জনকত্তেন নিযুত্তং আনন্তরিযং, তেন। ৰেসিযা পুত্তোতি উপলক্খণমত্তং, কুলিত্থিযা অতিচারিনিযা পুত্তোপি অত্তনো পিতরং অজানিত্ৰা ঘাতেন্তো পিতুঘাতকোৰ হোতি।
112.Apavāhananti sodhanaṃ. Tiracchānādiamanussajātito manussajātikānaññeva puttesu mettādayopi tikkhavisadā honti lokuttaraguṇā viyāti āha ‘‘manussitthibhūtā janikā mātā’’ti. Yathā manussānaññeva kusalappavatti tikkhavisadā, evaṃ akusalappavattipīti āha ‘‘sayampi manussajātikenevā’’tiādi. Ānantariyenāti ettha cutianantaraṃ niraye paṭisandhiphalaṃ anantaraṃ nāma, tasmiṃ anantare janakattena niyuttaṃ ānantariyaṃ, tena. Vesiyā puttoti upalakkhaṇamattaṃ, kulitthiyā aticāriniyā puttopi attano pitaraṃ ajānitvā ghātento pitughātakova hoti.
১১৪. অৰসেসন্তি অনাগামিআদিকং। যং পনেত্থ ৰত্তব্বং, তং মনুস্সৰিগ্গহপারাজিকে ৰুত্তমেৰ।
114.Avasesanti anāgāmiādikaṃ. Yaṃ panettha vattabbaṃ, taṃ manussaviggahapārājike vuttameva.
১১৫. অযং সঙ্ঘভেদকোতি পকতত্তং ভিক্খুং সন্ধায ৰুত্তং। পুব্বে এৰ পারাজিকং সমাপন্নো ৰা ৰত্থাদিদোসেন ৰিপন্নোপসম্পদো ৰা সঙ্ঘং ভিন্দন্তোপি অনন্তরিযং ন ফুসতি, সঙ্ঘো পন ভিন্নোৰ হোতি, পব্বজ্জা চস্স ন ৰারিতাতি দট্ঠব্বং।
115.Ayaṃ saṅghabhedakoti pakatattaṃ bhikkhuṃ sandhāya vuttaṃ. Pubbe eva pārājikaṃ samāpanno vā vatthādidosena vipannopasampado vā saṅghaṃ bhindantopi anantariyaṃ na phusati, saṅgho pana bhinnova hoti, pabbajjā cassa na vāritāti daṭṭhabbaṃ.
‘‘দুট্ঠচিত্তেনা’’তি ৰুত্তমেৰত্থং ৰিভাৰেতি ‘‘ৰধকচিত্তেনা’’তি। লোহিতং উপ্পাদেতীতি তথাগতস্স ৰেরীহি অভেজ্জকাযতায কেনচি বলক্কারেন চম্মাদিছেদং কত্ৰা বহি লোহিতং পগ্ঘরাপেতুং ন সক্কা, আৰুধাদিপহারেন পন লোহিতং ঠানতো চলিত্ৰা কুপ্পমানং একত্থ সঞ্চিতং হোতি, এত্তকেন পন পহারদাযকো লোহিতুপ্পাদকো নাম হোতি দেৰদত্তো ৰিয। চেতিযং পন বোধিং ৰা পটিমাদিং ৰা ভিন্দতো আনন্তরিযং ন হোতি, আনন্তরিযসদিসং মহাসাৰজ্জং হোতি। বোধিরুক্খস্স পন ওজোহরণসাখা চেৰ সধাতুকং চেতিযং বাধযমানা চ ছিন্দিতব্বা, পুঞ্ঞমেৰেত্থ হোতি।
‘‘Duṭṭhacittenā’’ti vuttamevatthaṃ vibhāveti ‘‘vadhakacittenā’’ti. Lohitaṃ uppādetīti tathāgatassa verīhi abhejjakāyatāya kenaci balakkārena cammādichedaṃ katvā bahi lohitaṃ paggharāpetuṃ na sakkā, āvudhādipahārena pana lohitaṃ ṭhānato calitvā kuppamānaṃ ekattha sañcitaṃ hoti, ettakena pana pahāradāyako lohituppādako nāma hoti devadatto viya. Cetiyaṃ pana bodhiṃ vā paṭimādiṃ vā bhindato ānantariyaṃ na hoti, ānantariyasadisaṃ mahāsāvajjaṃ hoti. Bodhirukkhassa pana ojoharaṇasākhā ceva sadhātukaṃ cetiyaṃ bādhayamānā ca chinditabbā, puññamevettha hoti.
মাতুঘাতকাদিকথাৰণ্ণনা নিট্ঠিতা।
Mātughātakādikathāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi
৫০. মাতুঘাতকৰত্থু • 50. Mātughātakavatthu
৫২. অরহন্তঘাতকৰত্থু • 52. Arahantaghātakavatthu
৫৩. ভিক্খুনীদূসকৰত্থু • 53. Bhikkhunīdūsakavatthu
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / মাতুঘাতকাদিৰত্থুকথা • Mātughātakādivatthukathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / মাতুঘাতকাদিৰত্থুকথাৰণ্ণনা • Mātughātakādivatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / মাতুঘাতকাদিৰত্থুকথাৰণ্ণনা • Mātughātakādivatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ৫০. মাতুঘাতকাদিৰত্থুকথা • 50. Mātughātakādivatthukathā
