| Library / Tipiṭaka / திபிடக • Tipiṭaka / மஹாவக்³க³-அட்ட²கதா² • Mahāvagga-aṭṭhakathā |
மாதுகா⁴தகாதி³வத்து²கதா²
Mātughātakādivatthukathā
112. மாதுகா⁴தகாதி³வத்தூ²ஸு – நிக்க²ந்திங் கரெய்யந்தி நிக்க²மனங் நிக்³க³மனங் அபவாஹனங் கரெய்யந்தி அத்தோ². மாதுகா⁴தகோ பி⁴க்க²வேதி எத்த² யேன மனுஸ்ஸித்தி²பூ⁴தா ஜனிகா மாதா ஸயம்பி மனுஸ்ஸஜாதிகேனேவ ஸதா ஸஞ்சிச்ச ஜீவிதா வோரோபிதா, அயங் ஆனந்தரியேன மாதுகா⁴தககம்மேன மாதுகா⁴தகோ, ஏதஸ்ஸ பப்³ப³ஜ்ஜா ச உபஸம்பதா³ ச படிக்கி²த்தா. யேன பன மனுஸ்ஸித்தி²பூ⁴தாபி அஜனிகா போஸாவனிகா மாதா வா மஹாமாதா வா சூளமாதா வா ஜனிகாபி வா ந மனுஸ்ஸித்தி²பூ⁴தா மாதா கா⁴திதா, தஸ்ஸ பப்³ப³ஜ்ஜா ந வாரிதா, ந ச ஆனந்தரிகோ ஹோதி. யேன ஸயங் திரச்சா²னபூ⁴தேன மனுஸ்ஸித்தி²பூ⁴தா மாதா கா⁴திதா, ஸோபி ஆனந்தரிகோ ந ஹோதி, திரச்சா²னக³தத்தா பனஸ்ஸ பப்³ப³ஜ்ஜா படிக்கி²த்தா. ஸேஸங் உத்தானமேவ. பிதுகா⁴தகேபி ஏஸேவ நயோ. ஸசேபி ஹி வேஸியா புத்தோ ஹோதி, ‘‘அயங் மே பிதா’’தி ந ஜானாதி, யஸ்ஸ ஸம்ப⁴வேன நிப்³ப³த்தோ, ஸோ சே அனேன கா⁴திதோ, பிதுகா⁴தகொத்வேவ ஸங்க்²யங் க³ச்ச²தி, ஆனந்தரியஞ்ச பு²ஸதி.
112. Mātughātakādivatthūsu – nikkhantiṃ kareyyanti nikkhamanaṃ niggamanaṃ apavāhanaṃ kareyyanti attho. Mātughātako bhikkhaveti ettha yena manussitthibhūtā janikā mātā sayampi manussajātikeneva satā sañcicca jīvitā voropitā, ayaṃ ānantariyena mātughātakakammena mātughātako, etassa pabbajjā ca upasampadā ca paṭikkhittā. Yena pana manussitthibhūtāpi ajanikā posāvanikā mātā vā mahāmātā vā cūḷamātā vā janikāpi vā na manussitthibhūtā mātā ghātitā, tassa pabbajjā na vāritā, na ca ānantariko hoti. Yena sayaṃ tiracchānabhūtena manussitthibhūtā mātā ghātitā, sopi ānantariko na hoti, tiracchānagatattā panassa pabbajjā paṭikkhittā. Sesaṃ uttānameva. Pitughātakepi eseva nayo. Sacepi hi vesiyā putto hoti, ‘‘ayaṃ me pitā’’ti na jānāti, yassa sambhavena nibbatto, so ce anena ghātito, pitughātakotveva saṅkhyaṃ gacchati, ānantariyañca phusati.
114. அரஹந்தகா⁴தகோபி மனுஸ்ஸஅரஹந்தவஸேனேவ வேதி³தப்³போ³. மனுஸ்ஸஜாதியஞ்ஹி அந்தமஸோ அபப்³ப³ஜிதம்பி கீ²ணாஸவங் தா³ரகங் தா³ரிகங் வா ஸஞ்சிச்ச ஜீவிதா வோரோபெந்தோ அரஹந்தகா⁴தகோவ ஹோதி, ஆனந்தரியஞ்ச பு²ஸதி, பப்³ப³ஜ்ஜா சஸ்ஸ வாரிதா. அமனுஸ்ஸஜாதிகங் பன அரஹந்தங் மனுஸ்ஸஜாதிகங் வா அவஸேஸங் அரியபுக்³க³லங் கா⁴தெத்வா ஆனந்தரியோ ந ஹோதி, பப்³ப³ஜ்ஜாபிஸ்ஸ ந வாரிதா, கம்மங் பன ப³லவங் ஹோதி. திரச்சா²னோ மனுஸ்ஸஅரஹந்தம்பி கா⁴தெத்வா ஆனந்தரியோ ந ஹோதி, கம்மங் பன பா⁴ரியந்தி அயமெத்த² வினிச்ச²யோ. தே வதா⁴ய ஓனீயந்தீதி வத⁴த்தா²ய ஓனீயந்தி, மாரேதுங் நீயந்தீதி அத்தோ². யங் பன பாளியங் ‘‘ஸசா ச மய’’ந்தி வுத்தங், தஸ்ஸ ஸசே மயந்தி அயமேவத்தோ². ‘‘ஸசே’’தி ஹி வத்தப்³பே³ எத்த² ‘‘ஸசா ச’’ இதி அயங் நிபாதோ வுத்தோ. ‘‘ஸசே ச’’ இச்சேவ வா பாடோ². தத்த² ஸசேதி ஸம்பா⁴வனத்தே² நிபாதோ; ச இதி பத³பூரணமத்தே. ‘‘ஸசஜ்ஜ மய’’ந்திபி பாடோ². தஸ்ஸ ஸசே அஜ்ஜ மயந்தி அத்தோ².
114. Arahantaghātakopi manussaarahantavaseneva veditabbo. Manussajātiyañhi antamaso apabbajitampi khīṇāsavaṃ dārakaṃ dārikaṃ vā sañcicca jīvitā voropento arahantaghātakova hoti, ānantariyañca phusati, pabbajjā cassa vāritā. Amanussajātikaṃ pana arahantaṃ manussajātikaṃ vā avasesaṃ ariyapuggalaṃ ghātetvā ānantariyo na hoti, pabbajjāpissa na vāritā, kammaṃ pana balavaṃ hoti. Tiracchāno manussaarahantampi ghātetvā ānantariyo na hoti, kammaṃ pana bhāriyanti ayamettha vinicchayo. Te vadhāya onīyantīti vadhatthāya onīyanti, māretuṃ nīyantīti attho. Yaṃ pana pāḷiyaṃ ‘‘sacā ca maya’’nti vuttaṃ, tassa sace mayanti ayamevattho. ‘‘Sace’’ti hi vattabbe ettha ‘‘sacā ca’’ iti ayaṃ nipāto vutto. ‘‘Sace ca’’ icceva vā pāṭho. Tattha saceti sambhāvanatthe nipāto; ca iti padapūraṇamatte. ‘‘Sacajja maya’’ntipi pāṭho. Tassa sace ajja mayanti attho.
115. பி⁴க்கு²னிதூ³ஸகோ பி⁴க்க²வேதி எத்த² யோ பகதத்தங் பி⁴க்கு²னிங் திண்ணங் மக்³கா³னங் அஞ்ஞதரஸ்மிங் தூ³ஸேதி, அயங் பி⁴க்கு²னிதூ³ஸகோ நாம. ஏதஸ்ஸ பப்³ப³ஜ்ஜா ச உபஸம்பதா³ ச வாரிதா. யோ பன காயஸங்ஸக்³கே³ன ஸீலவினாஸங் பாபேதி, தஸ்ஸ பப்³ப³ஜ்ஜா ச உபஸம்பதா³ ச ந வாரிதா. ப³லக்காரேன ஓதா³தவத்த²வஸனங் கத்வா அனிச்ச²மானங்யேவ தூ³ஸெந்தோபி பி⁴க்கு²னிதூ³ஸகோயேவ. ப³லக்காரேன பன ஓதா³தவத்த²வஸனங் கத்வா இச்ச²மானங் தூ³ஸெந்தோ பி⁴க்கு²னிதூ³ஸகோ ந ஹோதி. கஸ்மா? யஸ்மா கி³ஹிபா⁴வே ஸம்படிச்சி²தமத்தேயேவ ஸா அபி⁴க்கு²னீ ஹோதி. ஸகிங் ஸீலவிபன்னங் பன பச்சா² தூ³ஸெந்தோ ஸிக்க²மானாஸாமணேரீஸு ச விப்படிபஜ்ஜந்தோ நேவ பி⁴க்கு²னிதூ³ஸகோ ஹோதி, பப்³ப³ஜ்ஜம்பி உபஸம்பத³ம்பி லப⁴தி.
115.Bhikkhunidūsako bhikkhaveti ettha yo pakatattaṃ bhikkhuniṃ tiṇṇaṃ maggānaṃ aññatarasmiṃ dūseti, ayaṃ bhikkhunidūsako nāma. Etassa pabbajjā ca upasampadā ca vāritā. Yo pana kāyasaṃsaggena sīlavināsaṃ pāpeti, tassa pabbajjā ca upasampadā ca na vāritā. Balakkārena odātavatthavasanaṃ katvā anicchamānaṃyeva dūsentopi bhikkhunidūsakoyeva. Balakkārena pana odātavatthavasanaṃ katvā icchamānaṃ dūsento bhikkhunidūsako na hoti. Kasmā? Yasmā gihibhāve sampaṭicchitamatteyeva sā abhikkhunī hoti. Sakiṃ sīlavipannaṃ pana pacchā dūsento sikkhamānāsāmaṇerīsu ca vippaṭipajjanto neva bhikkhunidūsako hoti, pabbajjampi upasampadampi labhati.
ஸங்க⁴பே⁴த³கோ பி⁴க்க²வேதி எத்த² யோ தே³வத³த்தோ விய ஸாஸனங் உத்³த⁴ம்மங் உப்³பி³னயங் கத்வா சதுன்னங் கம்மானங் அஞ்ஞதரவஸேன ஸங்க⁴ங் பி⁴ந்த³தி, அயங் ஸங்க⁴பே⁴த³கோ நாம. ஏதஸ்ஸ பப்³ப³ஜ்ஜா ச உபஸம்பதா³ ச வாரிதா.
Saṅghabhedakobhikkhaveti ettha yo devadatto viya sāsanaṃ uddhammaṃ ubbinayaṃ katvā catunnaṃ kammānaṃ aññataravasena saṅghaṃ bhindati, ayaṃ saṅghabhedako nāma. Etassa pabbajjā ca upasampadā ca vāritā.
லோஹிதுப்பாத³கோ பி⁴க்க²வேதி எத்தா²பி யோ தே³வத³த்தோ விய து³ட்ட²சித்தேன வத⁴கசித்தேன ததா²க³தஸ்ஸ ஜீவமானகஸரீரே கு²த்³த³கமக்கி²காய பிவனகமத்தம்பி லோஹிதங் உப்பாதே³தி, அயங் லோஹிதுப்பாத³கோ நாம. ஏதஸ்ஸ பப்³ப³ஜ்ஜா ச உபஸம்பதா³ ச வாரிதா. யோ பன ரோக³வூபஸமனத்த²ங் ஜீவகோ விய ஸத்தே²ன பா²லெத்வா பூதிமங்ஸஞ்ச லோஹிதஞ்ச நீஹரித்வா பா²ஸுங் கரோதி, ப³ஹுங் ஸோ புஞ்ஞங் பஸவதீதி.
Lohituppādako bhikkhaveti etthāpi yo devadatto viya duṭṭhacittena vadhakacittena tathāgatassa jīvamānakasarīre khuddakamakkhikāya pivanakamattampi lohitaṃ uppādeti, ayaṃ lohituppādako nāma. Etassa pabbajjā ca upasampadā ca vāritā. Yo pana rogavūpasamanatthaṃ jīvako viya satthena phāletvā pūtimaṃsañca lohitañca nīharitvā phāsuṃ karoti, bahuṃ so puññaṃ pasavatīti.
மாதுகா⁴தகாதி³வத்து²கதா² நிட்டி²தா.
Mātughātakādivatthukathā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi
50. மாதுகா⁴தகவத்து² • 50. Mātughātakavatthu
52. அரஹந்தகா⁴தகவத்து² • 52. Arahantaghātakavatthu
53. பி⁴க்கு²னீதூ³ஸகவத்து² • 53. Bhikkhunīdūsakavatthu
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / மாதுகா⁴தகாதி³வத்து²கதா²வண்ணனா • Mātughātakādivatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / மாதுகா⁴தகாதி³வத்து²கதா²வண்ணனா • Mātughātakādivatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / மாதுகா⁴தகாதி³கதா²வண்ணனா • Mātughātakādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 50. மாதுகா⁴தகாதி³வத்து²கதா² • 50. Mātughātakādivatthukathā
