| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
50. மாதுகா⁴தகாதி³வத்து²கதா²
50. Mātughātakādivatthukathā
112. நிக்க²ந்திந்தி எத்த² ‘‘இமஸ்ஸ பாபகம்மஸ்ஸா’’தி ச²ட்டீ²யோக³த்தா பா⁴வத்தே² திபச்சயோதி ஆஹ ‘‘நிக்க²மன’’ந்தி. அபவாஹனந்தி அபாயபடிஸந்தி⁴வஹனதோ அபக³மனங். யேனாதி மனுஸ்ஸபூ⁴தேன யேன ஜீவிதா வோரோபிதாதி ஸம்ப³ந்தோ⁴. மனுஸ்ஸித்தி²பூ⁴தாதி மனுஸ்ஸித்தீ² ஹுத்வா பூ⁴தா, மனுஸ்ஸித்தீ²பா⁴வங் வா பூ⁴தா பத்தா. இமினா திரச்சா²னக³தித்தி²ஆத³யோ நிவத்தேதி. ‘‘ஜனிகா’’தி இமினா போஸாவனிகமாதாத³யோ நிவத்தேதி. ஸயம்பீதி எத்த² பிஸத்³தோ³ ந கேவலங் மாதாயேவ, அத² கோ² புத்தேனாபீதி த³ஸ்ஸேதி. ஸதாதி ஸந்தேன. மனுஸ்ஸஜாதிகேனேவ ஸதா மனுஸ்ஸஜாதிகோ ஏவ ஹுத்வா வோரோபிதாதி யோஜனா. அனந்தரே ப⁴வே ப²லங் நிப்³ப³த்தேதீதி ஆனந்தரியங், மாதுகா⁴தககம்மங், தேன ஜாதிஸாமஞ்ஞம்பி அஜனிகங் கா⁴தெந்தோ ச ஜனிகம்பி ஜாதிபே⁴த³ங் கா⁴தெந்தோ ச ந அனந்தரிகோ ஹோதி, தஸ்ஸ பப்³ப³ஜ்ஜா ச உபஸம்பதா³ ச ந வாரிதாதி த³ஸ்ஸெந்தோ ஆஹ ‘‘யேன பனா’’திஆதி³. தத்த² போஸேதி வத்³தே⁴தீதி போஸாபனியா, ஸா ஏவ போஸாவனிகா பகாரஸ்ஸ வகாரங், யகாரஸ்ஸ ச ககாரங் கத்வா, போஸாவனிகா ச ஸா மாதா சேதி போஸாவனிகமாதா. அஸ்ஸாதி புத்தஸ்ஸ. இத³ங் பத³ங் புப்³பா³பராபெக்க²ங். தத்த² புப்³ப³பதே³ பா⁴வஸம்ப³ந்தோ⁴, பச்சி²மபதே³ ஸாமிஸம்ப³ந்தோ⁴. ஸப்³ப³தா² ஏஸேவ நயோ ஹோதீதி ஆஹ ‘‘ஸசேபீ’’திஆதி³. வேஸியாதி உபலக்க²ணவஸேன வுத்தங் . யாய காயசி இத்தி²யா புத்தஸ்ஸாபி க³ஹேதப்³ப³த்தா. ‘‘அயங் மே பிதா’’தி அஜானநமேவ ஹி பமாணங். அனேனாதி இமினா புத்தேன. ‘‘பிதுகா⁴தகொத்வேவ ஸங்க்²யங் க³ச்ச²தீ’’தி இமினா மாதுகா⁴தகேபி ‘‘அயங் மே மாதா’’தி அஜானித்வா கா⁴தெந்தோபி மாதுகா⁴தகொத்வேவ ஸங்க்²யங் க³ச்ச²தீதி த³ஸ்ஸேதி.
112.Nikkhantinti ettha ‘‘imassa pāpakammassā’’ti chaṭṭhīyogattā bhāvatthe tipaccayoti āha ‘‘nikkhamana’’nti. Apavāhananti apāyapaṭisandhivahanato apagamanaṃ. Yenāti manussabhūtena yena jīvitā voropitāti sambandho. Manussitthibhūtāti manussitthī hutvā bhūtā, manussitthībhāvaṃ vā bhūtā pattā. Iminā tiracchānagatitthiādayo nivatteti. ‘‘Janikā’’ti iminā posāvanikamātādayo nivatteti. Sayampīti ettha pisaddo na kevalaṃ mātāyeva, atha kho puttenāpīti dasseti. Satāti santena. Manussajātikeneva satā manussajātiko eva hutvā voropitāti yojanā. Anantare bhave phalaṃ nibbattetīti ānantariyaṃ, mātughātakakammaṃ, tena jātisāmaññampi ajanikaṃ ghātento ca janikampi jātibhedaṃ ghātento ca na anantariko hoti, tassa pabbajjā ca upasampadā ca na vāritāti dassento āha ‘‘yena panā’’tiādi. Tattha poseti vaddhetīti posāpaniyā, sā eva posāvanikā pakārassa vakāraṃ, yakārassa ca kakāraṃ katvā, posāvanikā ca sā mātā ceti posāvanikamātā. Assāti puttassa. Idaṃ padaṃ pubbāparāpekkhaṃ. Tattha pubbapade bhāvasambandho, pacchimapade sāmisambandho. Sabbathā eseva nayo hotīti āha ‘‘sacepī’’tiādi. Vesiyāti upalakkhaṇavasena vuttaṃ . Yāya kāyaci itthiyā puttassāpi gahetabbattā. ‘‘Ayaṃ me pitā’’ti ajānanameva hi pamāṇaṃ. Anenāti iminā puttena. ‘‘Pitughātakotveva saṅkhyaṃ gacchatī’’ti iminā mātughātakepi ‘‘ayaṃ me mātā’’ti ajānitvā ghātentopi mātughātakotveva saṅkhyaṃ gacchatīti dasseti.
114. ஸங்கே²பேன வுத்தமத்த²ங் வித்தா²ரேன த³ஸ்ஸெந்தோ ஆஹ ‘‘மனுஸ்ஸஜாதியங் ஹீ’’திஆதி³. அபப்³ப³ஜிதந்தி கி³ஹிபூ⁴தங். பப்³ப³ஜ்ஜா சஸ்ஸாதி எத்த² சஸத்³தே³ன உபஸம்பதா³பி வாரிதாதி த³ஸ்ஸேதி. அஸ்ஸாதி அரஹந்தகா⁴தகஸ்ஸ. அவஸேஸந்தி அரஹந்ததோ அவஸேஸங். அஸ்ஸாதி அரியகா⁴தகஸ்ஸ. ஆனந்தரியோ ந ஹோதி திரச்சா²னக³தத்தா பனஸ்ஸ பப்³ப³ஜ்ஜா வாரிதாதி அத்தோ² நேதப்³போ³. எத்தா²தி மாதுகா⁴தகாதி³கம்மேஸு. வதா⁴யாதி தத³த்தே² சதுத்தீ²தி ஆஹ ‘‘வத⁴த்தா²யா’’தி. ‘‘மாரேது’’ந்தி இமினா ‘‘வத⁴த்தா²யா’’தி எத்த² ஹனதா⁴து ஹிங்ஸனத்தோ²தி த³ஸ்ஸேதி. ‘‘நீயந்தீ’’தி இமினா ஓனீயந்தீதி எத்த² ஒத்யூபஸக்³கோ³ தா⁴த்வத்தா²னுவத்தகோதி த³ஸ்ஸேதி. யங் பன வசனங் வுத்தந்தி ஸம்ப³ந்தோ⁴. தஸ்ஸ வசனஸ்ஸ அத்தோ²தி யோஜனா. ‘‘ஸசா ச இதி அயங் நிபாதோ வுத்தோ’’தி இமினா ப⁴யபீளிதத்தா ச நிருத்தீஸு அகுஸலத்தா ச த³வாப⁴ணனேன ரவாப⁴ணனேன அயங் நிபாதோ சோரேஹி வுத்தோதி த³ஸ்ஸேதி. ‘‘ஸசே ச இச்சேவ வா பாடோ²’’தி இமினா தேஹி ததா² வுத்தேபி ஸங்கீ³திகாலே வா பொத்த²காரூள்ஹகாலே வா யதா²பூ⁴தங் ஸங்கீ³தத்தா, பொத்த²காரூள்ஹத்தா ச யதா²பூ⁴தோ பாடோ² அத்தீ²தி த³ஸ்ஸேதி. தத்தா²தி தேஸு பதே³ஸு. நித்³தா⁴ரணே பு⁴ம்மங். தஸ்ஸாதி ‘‘ஸசஜ்ஜ மய’’ந்தி பாட²ஸ்ஸ. ‘‘ஸசே அஜ்ஜ மய’’ந்தி இமினா ஏகாரலோபஸந்தி⁴ங் த³ஸ்ஸேதி. ‘‘ஸசேஜ்ஜ மய’’ந்தி அகாரலோபஸந்தி⁴னாபி பாடோ² அத்தி².
114. Saṅkhepena vuttamatthaṃ vitthārena dassento āha ‘‘manussajātiyaṃ hī’’tiādi. Apabbajitanti gihibhūtaṃ. Pabbajjā cassāti ettha casaddena upasampadāpi vāritāti dasseti. Assāti arahantaghātakassa. Avasesanti arahantato avasesaṃ. Assāti ariyaghātakassa. Ānantariyo na hoti tiracchānagatattā panassa pabbajjā vāritāti attho netabbo. Etthāti mātughātakādikammesu. Vadhāyāti tadatthe catutthīti āha ‘‘vadhatthāyā’’ti. ‘‘Māretu’’nti iminā ‘‘vadhatthāyā’’ti ettha hanadhātu hiṃsanatthoti dasseti. ‘‘Nīyantī’’ti iminā onīyantīti ettha otyūpasaggo dhātvatthānuvattakoti dasseti. Yaṃ pana vacanaṃ vuttanti sambandho. Tassa vacanassa atthoti yojanā. ‘‘Sacā ca iti ayaṃ nipāto vutto’’ti iminā bhayapīḷitattā ca niruttīsu akusalattā ca davābhaṇanena ravābhaṇanena ayaṃ nipāto corehi vuttoti dasseti. ‘‘Sace ca icceva vā pāṭho’’ti iminā tehi tathā vuttepi saṅgītikāle vā potthakārūḷhakāle vā yathābhūtaṃ saṅgītattā, potthakārūḷhattā ca yathābhūto pāṭho atthīti dasseti. Tatthāti tesu padesu. Niddhāraṇe bhummaṃ. Tassāti ‘‘sacajja maya’’nti pāṭhassa. ‘‘Sace ajja maya’’nti iminā ekāralopasandhiṃ dasseti. ‘‘Sacejja maya’’nti akāralopasandhināpi pāṭho atthi.
115. பகதத்தந்தி பகதியா ஸீலஸங்கா²தோ அத்தா ஸபா⁴வோ ஏதிஸ்ஸாதி பகதத்தா, தங். காயஸங்ஸக்³கே³ன பி⁴க்கு²னீனங் பாராஜிகத்தா வுத்தங் ‘‘ஸீலவினாஸங் பாபேதீ’’தி. அனிச்ச²மானங்யேவ பி⁴க்கு²னிந்தி ஸம்ப³ந்தோ⁴.
115.Pakatattanti pakatiyā sīlasaṅkhāto attā sabhāvo etissāti pakatattā, taṃ. Kāyasaṃsaggena bhikkhunīnaṃ pārājikattā vuttaṃ ‘‘sīlavināsaṃ pāpetī’’ti. Anicchamānaṃyeva bhikkhuninti sambandho.
இச்ச²மானந்தி ஓதா³தவத்த²வஸனங் இச்ச²மானங். யஸ்மா அபி⁴க்கு²னீ ஹோதி, தஸ்மா பி⁴க்கு²னீதூ³ஸகோ ந ஹோதீதி யோஜனா. ஸீலவிபன்னங் பி⁴க்கு²னிந்தி ஸம்ப³ந்தோ⁴.
Icchamānanti odātavatthavasanaṃ icchamānaṃ. Yasmā abhikkhunī hoti, tasmā bhikkhunīdūsako na hotīti yojanā. Sīlavipannaṃ bhikkhuninti sambandho.
யோ தே³வத³த்தோ ஸங்க⁴ங் பி⁴ந்த³தி விய, பி⁴ந்த³தீதி யோஜனா. உத்³த⁴ம்மந்தி த⁴ம்மதோ விரஹிதங். உப்³பி³னயந்தி வினயதோ விரஹிதங். சதுன்னங் கம்மானந்தி அபலோகனாதீ³னங் சதுன்னங் கம்மானங்.
Yo devadatto saṅghaṃ bhindati viya, bhindatīti yojanā. Uddhammanti dhammato virahitaṃ. Ubbinayanti vinayato virahitaṃ. Catunnaṃ kammānanti apalokanādīnaṃ catunnaṃ kammānaṃ.
யோ தே³வத³த்தோ லோஹிதங் உப்பாதே³தி விய, உப்பாதே³தீதி யோஜனா. து³ட்ட²சித்தேனாதி எத்த² ந யங்கிஞ்சி து³ட்ட²சித்தங் து³ட்ட²சித்தங் நாம, அத² கோ² வத⁴கசித்தந்தி ஆஹ ‘‘வத⁴கசித்தேனா’’தி. ஸரீரேதி ஸரீரப்³ப⁴ந்தரே. ததா²க³தஸ்ஸ ஹி அபே⁴ஜ்ஜகாயத்தா பரூபக்கமேன சம்மச்சே²த³ங் கத்வா லோஹிதஸ்ஸ உப்பாத³னங் நாம நத்தி². யோ பன ஜீவகோ பா²ஸுங் கரோதி விய, பா²ஸுங் கரோதீதி யோஜனா. லோஹிதஞ்சாதி பூதிலோஹிதஞ்ச.
Yo devadatto lohitaṃ uppādeti viya, uppādetīti yojanā. Duṭṭhacittenāti ettha na yaṃkiñci duṭṭhacittaṃ duṭṭhacittaṃ nāma, atha kho vadhakacittanti āha ‘‘vadhakacittenā’’ti. Sarīreti sarīrabbhantare. Tathāgatassa hi abhejjakāyattā parūpakkamena cammacchedaṃ katvā lohitassa uppādanaṃ nāma natthi. Yo pana jīvako phāsuṃ karoti viya, phāsuṃ karotīti yojanā. Lohitañcāti pūtilohitañca.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi
50. மாதுகா⁴தகவத்து² • 50. Mātughātakavatthu
52. அரஹந்தகா⁴தகவத்து² • 52. Arahantaghātakavatthu
53. பி⁴க்கு²னீதூ³ஸகவத்து² • 53. Bhikkhunīdūsakavatthu
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / மாதுகா⁴தகாதி³வத்து²கதா² • Mātughātakādivatthukathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / மாதுகா⁴தகாதி³வத்து²கதா²வண்ணனா • Mātughātakādivatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / மாதுகா⁴தகாதி³வத்து²கதா²வண்ணனா • Mātughātakādivatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / மாதுகா⁴தகாதி³கதா²வண்ணனா • Mātughātakādikathāvaṇṇanā
