| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
மாதுகா⁴தகாதி³வத்து²கதா²வண்ணனா
Mātughātakādivatthukathāvaṇṇanā
112. மாதுகா⁴தகாதி³வத்தூ²ஸு அபவாஹனந்தி அபக³மனங், பதிகரணந்தி அத்தோ². யதா² ஸமானஜாதிகஸ்ஸ விகோபனே கம்மங் க³ருதரங், ந ததா² விஜாதிகஸ்ஸாதி ஆஹ ‘‘மனுஸ்ஸித்தி²பூ⁴தா’’தி . புத்தஸம்ப³ந்தே⁴ன மாதுபிதுஸமஞ்ஞா , த³த்தகித்திமாதி³வஸேனபி புத்தவோஹாரோ லோகே தி³ஸ்ஸதி, ஸோ ச கோ² பரியாயதோதி நிப்பரியாயஸித்³த⁴தங் த³ஸ்ஸேதுங் ‘‘ஜனிகா மாதா’’தி வுத்தங். யதா² மனுஸ்ஸத்தபா⁴வே டி²தஸ்ஸேவ குஸலத⁴ம்மானங் திக்க²விஸத³ஸூரபா⁴வாபத்தி யதா² தங் திண்ணம்பி போ³தி⁴ஸத்தானங் போ³தி⁴த்தயனிப்³ப³த்தியங், ஏவங் மனுஸ்ஸத்தபா⁴வே டி²தஸ்ஸேவ அகுஸலத⁴ம்மானம்பி திக்க²விஸத³ஸூரபா⁴வாபத்தீதி ஆஹ ‘‘ஸயம்பி மனுஸ்ஸஜாதிகேனேவா’’தி. சுதிஅனந்தரங் ப²லங் அனந்தரங் நாம, தஸ்மிங் அனந்தரே நியுத்தங், தங்னிப்³ப³த்தனேன அனந்தரகரணஸீலங், அனந்தரபயோஜனங் வா ஆனந்தரியங், தேன ஆனந்தரியேன மாதுகா⁴தககம்மேன. பிதுகா⁴தகேபி யேன மனுஸ்ஸபூ⁴தோ ஜனகோ பிதா ஸயம்பி மனுஸ்ஸஜாதிகேனேவ ஸதா ஸஞ்சிச்ச ஜீவிதா வோரோபிதோ, அயங் ஆனந்தரியேன பிதுகா⁴தககம்மேன பிதுகா⁴தகோதிஆதி³னா ஸப்³ப³ங் வேதி³தப்³ப³ந்தி ஆஹ ‘‘பிதுகா⁴தகேபி ஏஸேவ நயோ’’தி.
112. Mātughātakādivatthūsu apavāhananti apagamanaṃ, patikaraṇanti attho. Yathā samānajātikassa vikopane kammaṃ garutaraṃ, na tathā vijātikassāti āha ‘‘manussitthibhūtā’’ti . Puttasambandhena mātupitusamaññā , dattakittimādivasenapi puttavohāro loke dissati, so ca kho pariyāyatoti nippariyāyasiddhataṃ dassetuṃ ‘‘janikā mātā’’ti vuttaṃ. Yathā manussattabhāve ṭhitasseva kusaladhammānaṃ tikkhavisadasūrabhāvāpatti yathā taṃ tiṇṇampi bodhisattānaṃ bodhittayanibbattiyaṃ, evaṃ manussattabhāve ṭhitasseva akusaladhammānampi tikkhavisadasūrabhāvāpattīti āha ‘‘sayampi manussajātikenevā’’ti. Cutianantaraṃ phalaṃ anantaraṃ nāma, tasmiṃ anantare niyuttaṃ, taṃnibbattanena anantarakaraṇasīlaṃ, anantarapayojanaṃ vā ānantariyaṃ, tena ānantariyena mātughātakakammena. Pitughātakepi yena manussabhūto janako pitā sayampi manussajātikeneva satā sañcicca jīvitā voropito, ayaṃ ānantariyena pitughātakakammena pitughātakotiādinā sabbaṃ veditabbanti āha ‘‘pitughātakepi eseva nayo’’ti.
பரிவத்திதலிங்க³ம்பி (ம॰ நி॰ அட்ட²॰ 3.128; அ॰ நி॰ அட்ட²॰ 1.1.275; விப⁴॰ அட்ட²॰ 809) மாதரங் பிதரங் வா ஜீவிதா வோரோபெந்தஸ்ஸ ஆனந்தரியகம்மங் ஹோதியேவ. ஸதிபி ஹி லிங்க³பரிவத்தே ஸோ ஏவ ஏககம்மனிப்³ப³த்தோ ப⁴வங்க³ப்பப³ந்தோ⁴ ஜீவிதிந்த்³ரியப்பப³ந்தோ⁴ ச, நாஞ்ஞோதி. யோ பன ஸயங் மனுஸ்ஸோ திரச்சா²னபூ⁴தங் மாதரங் வா பிதரங் வா, ஸயங் வா திரச்சா²னபூ⁴தோ மனுஸ்ஸபூ⁴தங், திரச்சா²னபூ⁴தோயேவ வா திரச்சா²னபூ⁴தங் ஜீவிதா வோரோபேதி, தஸ்ஸ கம்மங் ஆனந்தரியங் ந ஹோதி, பா⁴ரியங் பன ஹோதி, ஆனந்தரியங் ஆஹச்சேவ திட்ட²தி. ஏளகசதுக்கங் ஸங்கா³மசதுக்கங் சோரசதுக்கஞ்செத்த² கதே²தப்³ப³ங். ‘‘ஏளகங் மாரேமீ’’தி அபி⁴ஸந்தி⁴னாபி ஹி ஏளகட்டா²னே டி²தங் மனுஸ்ஸோ மனுஸ்ஸபூ⁴தங் மாதரங் வா பிதரங் வா மாரெந்தோ ஆனந்தரியங் பு²ஸதி மரணாதி⁴ப்பாயேனேவ ஆனந்தரியவத்து²னோ விகோபிதத்தா. ஏளகாபி⁴ஸந்தி⁴னா பன மாதாபிதிஅஅஸந்தி⁴னா வா ஏளகங் மாரெந்தோ ஆனந்தரியங் ந பு²ஸதி ஆனந்தரியவத்து²அபா⁴வதோ. மாதாபிதிஅபி⁴ஸந்தி⁴னா மாதாபிதரோ மாரெந்தோ பு²ஸதேவ. ஏஸ நயோ இதரஸ்மிம்பி சதுக்கத்³வயே. யதா² ச மாதாபிதூஸு, ஏவங் அரஹந்தேபி ஏதானி சதுக்கானி வேதி³தப்³பா³னி. ஸப்³ப³த்த² ஹி புரிமங் அபி⁴ஸந்தி⁴சித்தங் அப்பமாணங், வத⁴கசித்தங் பன ததா³ரம்மணங் ஜீவிதிந்த்³ரியஞ்ச ஆனந்தரியானானந்தரபா⁴வே பமாணங். கதானந்தரியகம்மோ ச ‘‘தஸ்ஸ கம்மஸ்ஸ விபாகங் படிபா³ஹிஸ்ஸாமீ’’தி ஸகலசக்கவாளங் மஹாசேதியப்பமாணேஹி கஞ்சனதூ²பேஹி பூரெத்வாபி ஸகலசக்கவாளங் பூரெத்வா நிஸின்னஸ்ஸ பி⁴க்கு²ஸங்க⁴ஸ்ஸ மஹாதா³னங் த³த்வாபி பு³த்³த⁴ஸ்ஸ ப⁴க³வதோ ஸங்கா⁴டிகண்ணங் அமுஞ்சந்தோ விசரித்வாபி காயஸ்ஸ பே⁴தா³ நிரயமேவ உபபஜ்ஜதி, பப்³ப³ஜ்ஜஞ்ச ந லப⁴தி.
Parivattitaliṅgampi (ma. ni. aṭṭha. 3.128; a. ni. aṭṭha. 1.1.275; vibha. aṭṭha. 809) mātaraṃ pitaraṃ vā jīvitā voropentassa ānantariyakammaṃ hotiyeva. Satipi hi liṅgaparivatte so eva ekakammanibbatto bhavaṅgappabandho jīvitindriyappabandho ca, nāññoti. Yo pana sayaṃ manusso tiracchānabhūtaṃ mātaraṃ vā pitaraṃ vā, sayaṃ vā tiracchānabhūto manussabhūtaṃ, tiracchānabhūtoyeva vā tiracchānabhūtaṃ jīvitā voropeti, tassa kammaṃ ānantariyaṃ na hoti, bhāriyaṃ pana hoti, ānantariyaṃ āhacceva tiṭṭhati. Eḷakacatukkaṃ saṅgāmacatukkaṃ coracatukkañcettha kathetabbaṃ. ‘‘Eḷakaṃ māremī’’ti abhisandhināpi hi eḷakaṭṭhāne ṭhitaṃ manusso manussabhūtaṃ mātaraṃ vā pitaraṃ vā mārento ānantariyaṃ phusati maraṇādhippāyeneva ānantariyavatthuno vikopitattā. Eḷakābhisandhinā pana mātāpitiaasandhinā vā eḷakaṃ mārento ānantariyaṃ na phusati ānantariyavatthuabhāvato. Mātāpitiabhisandhinā mātāpitaro mārento phusateva. Esa nayo itarasmimpi catukkadvaye. Yathā ca mātāpitūsu, evaṃ arahantepi etāni catukkāni veditabbāni. Sabbattha hi purimaṃ abhisandhicittaṃ appamāṇaṃ, vadhakacittaṃ pana tadārammaṇaṃ jīvitindriyañca ānantariyānānantarabhāve pamāṇaṃ. Katānantariyakammo ca ‘‘tassa kammassa vipākaṃ paṭibāhissāmī’’ti sakalacakkavāḷaṃ mahācetiyappamāṇehi kañcanathūpehi pūretvāpi sakalacakkavāḷaṃ pūretvā nisinnassa bhikkhusaṅghassa mahādānaṃ datvāpi buddhassa bhagavato saṅghāṭikaṇṇaṃ amuñcanto vicaritvāpi kāyassa bhedā nirayameva upapajjati, pabbajjañca na labhati.
115. இச்ச²மானந்தி ஓதா³தவத்த²வஸனங் இச்ச²மானங். தேனேவாஹ ‘‘கி³ஹிபா⁴வே ஸம்படிச்சி²தமத்தேயேவா’’தி. ஸங்க⁴பே⁴த³ககதா²வித்தா²ரோ பரதோ ஆவி ப⁴விஸ்ஸதி. சதுன்னங் கம்மானந்தி அபலோகனாதீ³னங் சதுன்னங் கம்மானங். து³ட்ட²சித்தேனாதி வுத்தமேவத்த²ங் விபா⁴வேதி ‘‘வத⁴கசித்தேனா’’தி. வத⁴கசேதனாய ஹி தூ³ஸிதசித்தங் இத⁴ து³ட்ட²சித்தங் நாம. லோஹிதங் உப்பாதே³தீதி எத்த² ததா²க³தஸ்ஸ அபே⁴ஜ்ஜகாயதாய பரூபக்கமேன சம்மச்சே²த³ங் கத்வா லோஹிதபக்³க⁴ரணங் நாம நத்தி², ஸரீரஸ்ஸ பன அந்தோயேவ ஏகஸ்மிங் டா²னே லோஹிதங் ஸமோஸரதி, ஆகா⁴தேன பகுப்பமானங் ஸஞ்சிதங் ஹோதி. தே³வத³த்தேன பவித்³த⁴ஸிலதோ பி⁴ஜ்ஜித்வா க³தஸக்க²லிகாபி ததா²க³தஸ்ஸ பாத³ந்தங் பஹரி, ப²ரஸுனா பஹடோ விய பாதோ³ அந்தோலோஹிதோயேவ அஹோஸி. ஜீவகோ பன ததா²க³தஸ்ஸ ருசியா ஸத்த²கேன சம்மங் சி²ந்தி³த்வா தம்ஹா டா²னா து³ட்ட²லோஹிதங் நீஹரித்வா பா²ஸுமகாஸி, தேனஸ்ஸ புஞ்ஞகம்மமேவ அஹோஸி. தேனாஹ ‘‘ஜீவகோ வியா’’திஆதி³.
115.Icchamānanti odātavatthavasanaṃ icchamānaṃ. Tenevāha ‘‘gihibhāve sampaṭicchitamatteyevā’’ti. Saṅghabhedakakathāvitthāro parato āvi bhavissati. Catunnaṃ kammānanti apalokanādīnaṃ catunnaṃ kammānaṃ. Duṭṭhacittenāti vuttamevatthaṃ vibhāveti ‘‘vadhakacittenā’’ti. Vadhakacetanāya hi dūsitacittaṃ idha duṭṭhacittaṃ nāma. Lohitaṃ uppādetīti ettha tathāgatassa abhejjakāyatāya parūpakkamena cammacchedaṃ katvā lohitapaggharaṇaṃ nāma natthi, sarīrassa pana antoyeva ekasmiṃ ṭhāne lohitaṃ samosarati, āghātena pakuppamānaṃ sañcitaṃ hoti. Devadattena paviddhasilato bhijjitvā gatasakkhalikāpi tathāgatassa pādantaṃ pahari, pharasunā pahaṭo viya pādo antolohitoyeva ahosi. Jīvako pana tathāgatassa ruciyā satthakena cammaṃ chinditvā tamhā ṭhānā duṭṭhalohitaṃ nīharitvā phāsumakāsi, tenassa puññakammameva ahosi. Tenāha ‘‘jīvako viyā’’tiādi.
அத² யே பரினிப்³பு³தே ததா²க³தே சேதியங் பி⁴ந்த³ந்தி, போ³தி⁴ங் சி²ந்த³ந்தி, தா⁴தும்ஹி உபக்கமந்தி, தேஸங் கிங் ஹோதீதி? பா⁴ரியங் கம்மங் ஹோதி ஆனந்தரியஸதி³ஸங். ஸதா⁴துகங் பன தூ²பங் வா படிமங் வா பா³த⁴மானங் போ³தி⁴ஸாக²ங் சி²ந்தி³துங் வட்டதி. ஸசேபி தத்த² நிலீனா ஸகுணா சேதியே வச்சங் பாதெந்தி, சி²ந்தி³துங் வட்டதியேவ. பரிபோ⁴க³சேதியதோ ஹி ஸரீரசேதியங் க³ருதரங். சேதியவத்து²ங் பி⁴ந்தி³த்வா க³ச்ச²ந்தே போ³தி⁴மூலேபி சி²ந்தி³த்வா ஹரிதுங் வட்டதி. யா பன போ³தி⁴ஸாகா² போ³தி⁴க⁴ரங் பா³த⁴தி, தங் கே³ஹரக்க²ணத்த²ங் சி²ந்தி³துங் ந லப⁴தி. போ³தி⁴அத்த²ஞ்ஹி கே³ஹங், ந கே³ஹத்தா²ய போ³தி⁴. ஆஸனக⁴ரேபி ஏஸேவ நயோ. யஸ்மிங் பன ஆஸனக⁴ரே தா⁴து நிஹிதா ஹோதி, தஸ்ஸ ரக்க²ணத்தா²ய போ³தி⁴ஸாக²ங் சி²ந்தி³துங் வட்டதி. போ³தி⁴ஜக்³க³னத்த²ங் ஓஜோஹரணஸாக²ங் வா பூதிட்டா²னங் வா சி²ந்தி³துங் வட்டதியேவ, ஸத்து² ரூபகாயபடிஜக்³க³னே விய புஞ்ஞம்பி ஹோதி.
Atha ye parinibbute tathāgate cetiyaṃ bhindanti, bodhiṃ chindanti, dhātumhi upakkamanti, tesaṃ kiṃ hotīti? Bhāriyaṃ kammaṃ hoti ānantariyasadisaṃ. Sadhātukaṃ pana thūpaṃ vā paṭimaṃ vā bādhamānaṃ bodhisākhaṃ chindituṃ vaṭṭati. Sacepi tattha nilīnā sakuṇā cetiye vaccaṃ pātenti, chindituṃ vaṭṭatiyeva. Paribhogacetiyato hi sarīracetiyaṃ garutaraṃ. Cetiyavatthuṃ bhinditvā gacchante bodhimūlepi chinditvā harituṃ vaṭṭati. Yā pana bodhisākhā bodhigharaṃ bādhati, taṃ geharakkhaṇatthaṃ chindituṃ na labhati. Bodhiatthañhi gehaṃ, na gehatthāya bodhi. Āsanagharepi eseva nayo. Yasmiṃ pana āsanaghare dhātu nihitā hoti, tassa rakkhaṇatthāya bodhisākhaṃ chindituṃ vaṭṭati. Bodhijagganatthaṃ ojoharaṇasākhaṃ vā pūtiṭṭhānaṃ vā chindituṃ vaṭṭatiyeva, satthu rūpakāyapaṭijaggane viya puññampi hoti.
மாதுகா⁴தகாதி³வத்து²கதா²வண்ணனா நிட்டி²தா.
Mātughātakādivatthukathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi
50. மாதுகா⁴தகவத்து² • 50. Mātughātakavatthu
53. பி⁴க்கு²னீதூ³ஸகவத்து² • 53. Bhikkhunīdūsakavatthu
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / மாதுகா⁴தகாதி³வத்து²கதா² • Mātughātakādivatthukathā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / மாதுகா⁴தகாதி³வத்து²கதா²வண்ணனா • Mātughātakādivatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / மாதுகா⁴தகாதி³கதா²வண்ணனா • Mātughātakādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 50. மாதுகா⁴தகாதி³வத்து²கதா² • 50. Mātughātakādivatthukathā
