Library / Tipiṭaka / ติปิฎก • Tipiṭaka / จริยาปิฎกปาฬิ • Cariyāpiṭakapāḷi

    ๒. หตฺถินาควโคฺค

    2. Hatthināgavaggo

    ๑. มาตุโปสกจริยา

    1. Mātuposakacariyā

    ๑.

    1.

    ‘‘ยทา อโหสิํ ปวเน, กุญฺชโร มาตุโปสโก;

    ‘‘Yadā ahosiṃ pavane, kuñjaro mātuposako;

    น ตทา อตฺถิ มหิยา, คุเณน มม สาทิโสฯ

    Na tadā atthi mahiyā, guṇena mama sādiso.

    ๒.

    2.

    ‘‘ปวเน ทิสฺวา วนจโร, รโญฺญ มํ ปฎิเวทยิ;

    ‘‘Pavane disvā vanacaro, rañño maṃ paṭivedayi;

    ‘ตวานุจฺฉโว มหาราช, คโช วสติ กานเนฯ

    ‘Tavānucchavo mahārāja, gajo vasati kānane.

    ๓.

    3.

    ‘‘‘น ตสฺส ปริกฺขายโตฺถ, นปิ อาฬกกาสุยา;

    ‘‘‘Na tassa parikkhāyattho, napi āḷakakāsuyā;

    สห คหิเต 1 โสณฺฑาย, สยเมว อิเธหิ’ติฯ

    Saha gahite 2 soṇḍāya, sayameva idhehi’ti.

    ๔.

    4.

    ‘‘ตสฺส ตํ วจนํ สุตฺวา, ราชาปิ ตุฎฺฐมานโส;

    ‘‘Tassa taṃ vacanaṃ sutvā, rājāpi tuṭṭhamānaso;

    เปเสสิ หตฺถิทมกํ, เฉกาจริยํ สุสิกฺขิตํฯ

    Pesesi hatthidamakaṃ, chekācariyaṃ susikkhitaṃ.

    ๕.

    5.

    ‘‘คนฺตฺวา โส หตฺถิทมโก, อทฺทส ปทุมสฺสเร;

    ‘‘Gantvā so hatthidamako, addasa padumassare;

    ภิสมุฬาลํ 3 อุทฺธรนฺตํ, ยาปนตฺถาย มาตุยาฯ

    Bhisamuḷālaṃ 4 uddharantaṃ, yāpanatthāya mātuyā.

    ๖.

    6.

    ‘‘วิญฺญาย เม สีลคุณํ, ลกฺขณํ อุปธารยิ;

    ‘‘Viññāya me sīlaguṇaṃ, lakkhaṇaṃ upadhārayi;

    ‘เอหิ ปุตฺตา’ติ ปตฺวาน, มม โสณฺฑาย อคฺคหิฯ

    ‘Ehi puttā’ti patvāna, mama soṇḍāya aggahi.

    ๗.

    7.

    ‘‘ยํ เม ตทา ปากติกํ, สรีรานุคตํ พลํ;

    ‘‘Yaṃ me tadā pākatikaṃ, sarīrānugataṃ balaṃ;

    อชฺช นาคสหสฺสานํ, พเลน สมสาทิสํฯ

    Ajja nāgasahassānaṃ, balena samasādisaṃ.

    ๘.

    8.

    ‘‘ยทิหํ เตสํ ปกุเปฺปยฺยํ, อุเปตานํ คหณาย มํ;

    ‘‘Yadihaṃ tesaṃ pakuppeyyaṃ, upetānaṃ gahaṇāya maṃ;

    ปฎิพโล ภเว เตสํ, ยาว รชฺชมฺปิ มานุสํฯ

    Paṭibalo bhave tesaṃ, yāva rajjampi mānusaṃ.

    ๙.

    9.

    ‘‘อปิ จาหํ สีลรกฺขาย, สีลปารมิปูริยา;

    ‘‘Api cāhaṃ sīlarakkhāya, sīlapāramipūriyā;

    น กโรมิ จิเตฺต อญฺญถตฺตํ, ปกฺขิปนฺตํ มมาฬเกฯ

    Na karomi citte aññathattaṃ, pakkhipantaṃ mamāḷake.

    ๑๐.

    10.

    ‘‘ยทิ เต มํ ตตฺถ โกเฎฺฎยฺยุํ, ผรสูหิ โตมเรหิ จ;

    ‘‘Yadi te maṃ tattha koṭṭeyyuṃ, pharasūhi tomarehi ca;

    เนว เตสํ ปกุเปฺปยฺยํ, สีลขณฺฑภยา มมา’’ติฯ

    Neva tesaṃ pakuppeyyaṃ, sīlakhaṇḍabhayā mamā’’ti.

    มาตุโปสกจริยํ ปฐมํฯ

    Mātuposakacariyaṃ paṭhamaṃ.




    Next: ๒. ภูริทตฺตจริยา • 2. Bhūridattacariyā




    Footnotes:
    1. สมํ คหิเต (สี.)
    2. samaṃ gahite (sī.)
    3. ภิสมูลํ (ก.)
    4. bhisamūlaṃ (ka.)



    Related texts:



    อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / จริยาปิฎก-อฎฺฐกถา • Cariyāpiṭaka-aṭṭhakathā / ๑. มาตุโปสกจริยาวณฺณนา • 1. Mātuposakacariyāvaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact