| Library / Tipiṭaka / ติปิฎก • Tipiṭaka / ชาตกปาฬิ • Jātakapāḷi |
๓๙๙. มาตุโปสกคิชฺฌชาตกํ (๗-๑-๔)
399. Mātuposakagijjhajātakaṃ (7-1-4)
๒๒.
22.
เต กถํ นุ กริสฺสนฺติ, วุทฺธา คิริทรีสยา;
Te kathaṃ nu karissanti, vuddhā giridarīsayā;
อหํ พโทฺธสฺมิ ปาเสน, นิลียสฺส วสํ คโตฯ
Ahaṃ baddhosmi pāsena, nilīyassa vasaṃ gato.
๒๓.
23.
กิํ คิชฺฌ ปริเทวสิ, กา นุ เต ปริเทวนา;
Kiṃ gijjha paridevasi, kā nu te paridevanā;
น เม สุโต วา ทิโฎฺฐ วา, ภาสโนฺต มานุสิํ ทิโชฯ
Na me suto vā diṭṭho vā, bhāsanto mānusiṃ dijo.
๒๔.
24.
ภรามิ มาตาปิตโร, วุเทฺธ คิริทรีสเย;
Bharāmi mātāpitaro, vuddhe giridarīsaye;
เต กถํ นุ กริสฺสนฺติ, อหํ วสํ คโต ตวฯ
Te kathaṃ nu karissanti, ahaṃ vasaṃ gato tava.
๒๕.
25.
ยํ นุ คิโชฺฌ โยชนสตํ, กุณปานิ อเวกฺขติ;
Yaṃ nu gijjho yojanasataṃ, kuṇapāni avekkhati;
กสฺมา ชาลญฺจ ปาสญฺจ, อาสชฺชาปิ น พุชฺฌสิฯ
Kasmā jālañca pāsañca, āsajjāpi na bujjhasi.
๒๖.
26.
ยทา ปราภโว โหติ, โปโส ชีวิตสงฺขเย;
Yadā parābhavo hoti, poso jīvitasaṅkhaye;
อถ ชาลญฺจ ปาสญฺจ, อาสชฺชาปิ น พุชฺฌติฯ
Atha jālañca pāsañca, āsajjāpi na bujjhati.
๒๗.
27.
ภรสฺสุ มาตาปิตโร, วุเทฺธ คิริทรีสเย;
Bharassu mātāpitaro, vuddhe giridarīsaye;
มยา ตฺวํ สมนุญฺญาโต, โสตฺถิํ ปสฺสาหิ ญาตเกฯ
Mayā tvaṃ samanuññāto, sotthiṃ passāhi ñātake.
๒๘.
28.
เอวํ ลุทฺทก นนฺทสฺสุ, สห สเพฺพหิ ญาติภิ;
Evaṃ luddaka nandassu, saha sabbehi ñātibhi;
ภริสฺสํ มาตาปิตโร, วุเทฺธ คิริทรีสเยติฯ
Bharissaṃ mātāpitaro, vuddhe giridarīsayeti.
มาตุโปสกคิชฺฌชาตกํ จตุตฺถํฯ
Mātuposakagijjhajātakaṃ catutthaṃ.
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / ชาตก-อฎฺฐกถา • Jātaka-aṭṭhakathā / [๓๙๙] ๔. มาตุโปสกคิชฺฌชาตกวณฺณนา • [399] 4. Mātuposakagijjhajātakavaṇṇanā
