Library / Tipiṭaka / ติปิฎก • Tipiṭaka / ชาตกปาฬิ • Jātakapāḷi

    ๑๑. เอกาทสกนิปาโต

    11. Ekādasakanipāto

    ๔๕๕. มาตุโปสกชาตกํ (๑)

    455. Mātuposakajātakaṃ (1)

    ๑.

    1.

    ตสฺส นาคสฺส วิปฺปวาเสน, วิรูฬฺหา สลฺลกี จ กุฎชา จ;

    Tassa nāgassa vippavāsena, virūḷhā sallakī ca kuṭajā ca;

    กุรุวินฺทกรวีรา 1 ติสสามา จ, นิวาเต ปุปฺผิตา จ กณิการาฯ

    Kuruvindakaravīrā 2 tisasāmā ca, nivāte pupphitā ca kaṇikārā.

    ๒.

    2.

    โกจิเทว สุวณฺณกายุรา, นาคราชํ ภรนฺติ ปิเณฺฑน;

    Kocideva suvaṇṇakāyurā, nāgarājaṃ bharanti piṇḍena;

    ยตฺถ ราชา ราชกุมาโร วา, กวจมภิเหสฺสติ อฉมฺภิโต 3ฯ

    Yattha rājā rājakumāro vā, kavacamabhihessati achambhito 4.

    ๓.

    3.

    คณฺหาหิ นาค กพฬํ, มา นาค กิสโก ภว;

    Gaṇhāhi nāga kabaḷaṃ, mā nāga kisako bhava;

    พหูนิ ราชกิจฺจานิ, ตานิ 5 นาค กริสฺสสิฯ

    Bahūni rājakiccāni, tāni 6 nāga karissasi.

    ๔.

    4.

    สา นูนสา กปณิกา, อนฺธา อปริณายิกา;

    Sā nūnasā kapaṇikā, andhā apariṇāyikā;

    ขาณุํ ปาเทน ฆเฎฺฎติ, คิริํ จโณฺฑรณํ ปติฯ

    Khāṇuṃ pādena ghaṭṭeti, giriṃ caṇḍoraṇaṃ pati.

    ๕.

    5.

    กา นุ เต สา มหานาค, อนฺธา อปริณายิกา;

    Kā nu te sā mahānāga, andhā apariṇāyikā;

    ขาณุํ ปาเทน ฆเฎฺฎติ, คิริํ จโณฺฑรณํ ปติฯ

    Khāṇuṃ pādena ghaṭṭeti, giriṃ caṇḍoraṇaṃ pati.

    ๖.

    6.

    มาตา เม สา มหาราช, อนฺธา อปริณายิกา;

    Mātā me sā mahārāja, andhā apariṇāyikā;

    ขาณุํ ปาเทน ฆเฎฺฎติ, คิริํ จโณฺฑรณํ ปติฯ

    Khāṇuṃ pādena ghaṭṭeti, giriṃ caṇḍoraṇaṃ pati.

    ๗.

    7.

    มุญฺจเถตํ มหานาคํ, โยยํ ภรติ มาตรํ;

    Muñcathetaṃ mahānāgaṃ, yoyaṃ bharati mātaraṃ;

    สเมตุ มาตรา นาโค, สห สเพฺพหิ ญาติภิฯ

    Sametu mātarā nāgo, saha sabbehi ñātibhi.

    ๘.

    8.

    มุโตฺต จ พนฺธนา นาโค, มุตฺตมาทาย กุญฺชโร 7;

    Mutto ca bandhanā nāgo, muttamādāya kuñjaro 8;

    มุหุตฺตํ อสฺสาสยิตฺวา 9, อคมา เยน ปพฺพโตฯ

    Muhuttaṃ assāsayitvā 10, agamā yena pabbato.

    ๙.

    9.

    ตโต โส นฬินิํ 11 คนฺตฺวา, สีตํ กุญฺชรเสวิตํ;

    Tato so naḷiniṃ 12 gantvā, sītaṃ kuñjarasevitaṃ;

    โสณฺฑายูทกมาหตฺวา 13, มาตรํ อภิสิญฺจถฯ

    Soṇḍāyūdakamāhatvā 14, mātaraṃ abhisiñcatha.

    ๑๐.

    10.

    โกย อนริโย เทโว, อกาเลนปิ วสฺสติ 15;

    Koya anariyo devo, akālenapi vassati 16;

    คโต เม อตฺรโช ปุโตฺต, โย มยฺหํ ปริจารโกฯ

    Gato me atrajo putto, yo mayhaṃ paricārako.

    ๑๑.

    11.

    อุเฎฺฐหิ อมฺม กิํ เสสิ, อาคโต ตฺยาหมตฺรโช;

    Uṭṭhehi amma kiṃ sesi, āgato tyāhamatrajo;

    มุโตฺตมฺหิ กาสิราเชน, เวเทเหน ยสสฺสินาฯ

    Muttomhi kāsirājena, vedehena yasassinā.

    ๑๒.

    12.

    จิรํ ชีวตุ โส ราชา, กาสีนํ รฎฺฐวฑฺฒโน;

    Ciraṃ jīvatu so rājā, kāsīnaṃ raṭṭhavaḍḍhano;

    โย เม ปุตฺตํ ปโมเจสิ, สทา วุทฺธาปจายิกนฺติฯ

    Yo me puttaṃ pamocesi, sadā vuddhāpacāyikanti.

    มาตุโปสกชาตกํ ปฐมํฯ

    Mātuposakajātakaṃ paṭhamaṃ.




    Next: ๔๕๖. ชุณฺหชาตกํ • 456. Juṇhajātakaṃ




    Footnotes:
    1. กรวรา (สี. สฺยา.)
    2. karavarā (sī. syā.)
    3. อสมฺภีโต (สี. สฺยา. ปี.)
    4. asambhīto (sī. syā. pī.)
    5. ยานิ (สี. ปี.)
    6. yāni (sī. pī.)
    7. กาสิราเชน เปสิโต (สี. สฺยา.), มุโตฺต ทามาโต กุญฺชโร (ปี. สี. นิยฺย)
    8. kāsirājena pesito (sī. syā.), mutto dāmāto kuñjaro (pī. sī. niyya)
    9. วิสฺสมิตฺวาน (สี.)
    10. vissamitvāna (sī.)
    11. นิลินํ (สฺยา.)
    12. nilinaṃ (syā.)
    13. มาหิตฺวา (สฺยา. ก.)
    14. māhitvā (syā. ka.)
    15. อกาเลน ปวสฺสติ (สี. สฺยา.), อกาเลน’ติวสฺสติ (ปี.)
    16. akālena pavassati (sī. syā.), akālena’tivassati (pī.)



    Related texts:



    อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / ชาตก-อฎฺฐกถา • Jātaka-aṭṭhakathā / [๔๕๕] ๑. มาตุโปสกชาตกวณฺณนา • [455] 1. Mātuposakajātakavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact