Library / Tipiṭaka / តិបិដក • Tipiṭaka / ជាតកបាឡិ • Jātakapāḷi

    ១១. ឯកាទសកនិបាតោ

    11. Ekādasakanipāto

    ៤៥៥. មាតុបោសកជាតកំ (១)

    455. Mātuposakajātakaṃ (1)

    ១.

    1.

    តស្ស នាគស្ស វិប្បវាសេន, វិរូឡ្ហា សល្លកី ច កុដជា ច;

    Tassa nāgassa vippavāsena, virūḷhā sallakī ca kuṭajā ca;

    កុរុវិន្ទករវីរា 1 តិសសាមា ច, និវាតេ បុប្ផិតា ច កណិការា។

    Kuruvindakaravīrā 2 tisasāmā ca, nivāte pupphitā ca kaṇikārā.

    ២.

    2.

    កោចិទេវ សុវណ្ណកាយុរា, នាគរាជំ ភរន្តិ បិណ្ឌេន;

    Kocideva suvaṇṇakāyurā, nāgarājaṃ bharanti piṇḍena;

    យត្ថ រាជា រាជកុមារោ វា, កវចមភិហេស្សតិ អឆម្ភិតោ 3។

    Yattha rājā rājakumāro vā, kavacamabhihessati achambhito 4.

    ៣.

    3.

    គណ្ហាហិ នាគ កពឡំ, មា នាគ កិសកោ ភវ;

    Gaṇhāhi nāga kabaḷaṃ, mā nāga kisako bhava;

    ពហូនិ រាជកិច្ចានិ, តានិ 5 នាគ ករិស្សសិ។

    Bahūni rājakiccāni, tāni 6 nāga karissasi.

    ៤.

    4.

    សា នូនសា កបណិកា, អន្ធា អបរិណាយិកា;

    Sā nūnasā kapaṇikā, andhā apariṇāyikā;

    ខាណុំ បាទេន ឃដ្ដេតិ, គិរិំ ចណ្ឌោរណំ បតិ។

    Khāṇuṃ pādena ghaṭṭeti, giriṃ caṇḍoraṇaṃ pati.

    ៥.

    5.

    កា នុ តេ សា មហានាគ, អន្ធា អបរិណាយិកា;

    Kā nu te sā mahānāga, andhā apariṇāyikā;

    ខាណុំ បាទេន ឃដ្ដេតិ, គិរិំ ចណ្ឌោរណំ បតិ។

    Khāṇuṃ pādena ghaṭṭeti, giriṃ caṇḍoraṇaṃ pati.

    ៦.

    6.

    មាតា មេ សា មហារាជ, អន្ធា អបរិណាយិកា;

    Mātā me sā mahārāja, andhā apariṇāyikā;

    ខាណុំ បាទេន ឃដ្ដេតិ, គិរិំ ចណ្ឌោរណំ បតិ។

    Khāṇuṃ pādena ghaṭṭeti, giriṃ caṇḍoraṇaṃ pati.

    ៧.

    7.

    មុញ្ចថេតំ មហានាគំ, យោយំ ភរតិ មាតរំ;

    Muñcathetaṃ mahānāgaṃ, yoyaṃ bharati mātaraṃ;

    សមេតុ មាតរា នាគោ, សហ សព្ពេហិ ញាតិភិ។

    Sametu mātarā nāgo, saha sabbehi ñātibhi.

    ៨.

    8.

    មុត្តោ ច ពន្ធនា នាគោ, មុត្តមាទាយ កុញ្ជរោ 7;

    Mutto ca bandhanā nāgo, muttamādāya kuñjaro 8;

    មុហុត្តំ អស្សាសយិត្វា 9, អគមា យេន បព្ពតោ។

    Muhuttaṃ assāsayitvā 10, agamā yena pabbato.

    ៩.

    9.

    តតោ សោ នឡិនិំ 11 គន្ត្វា, សីតំ កុញ្ជរសេវិតំ;

    Tato so naḷiniṃ 12 gantvā, sītaṃ kuñjarasevitaṃ;

    សោណ្ឌាយូទកមាហត្វា 13, មាតរំ អភិសិញ្ចថ។

    Soṇḍāyūdakamāhatvā 14, mātaraṃ abhisiñcatha.

    ១០.

    10.

    កោយ អនរិយោ ទេវោ, អកាលេនបិ វស្សតិ 15;

    Koya anariyo devo, akālenapi vassati 16;

    គតោ មេ អត្រជោ បុត្តោ, យោ មយ្ហំ បរិចារកោ។

    Gato me atrajo putto, yo mayhaṃ paricārako.

    ១១.

    11.

    ឧដ្ឋេហិ អម្ម កិំ សេសិ, អាគតោ ត្យាហមត្រជោ;

    Uṭṭhehi amma kiṃ sesi, āgato tyāhamatrajo;

    មុត្តោម្ហិ កាសិរាជេន, វេទេហេន យសស្សិនា។

    Muttomhi kāsirājena, vedehena yasassinā.

    ១២.

    12.

    ចិរំ ជីវតុ សោ រាជា, កាសីនំ រដ្ឋវឌ្ឍនោ;

    Ciraṃ jīvatu so rājā, kāsīnaṃ raṭṭhavaḍḍhano;

    យោ មេ បុត្តំ បមោចេសិ, សទា វុទ្ធាបចាយិកន្តិ។

    Yo me puttaṃ pamocesi, sadā vuddhāpacāyikanti.

    មាតុបោសកជាតកំ បឋមំ។

    Mātuposakajātakaṃ paṭhamaṃ.




    Next: ៤៥៦. ជុណ្ហជាតកំ • 456. Juṇhajātakaṃ




    Footnotes:
    1. ករវរា (សី. ស្យា.)
    2. karavarā (sī. syā.)
    3. អសម្ភីតោ (សី. ស្យា. បី.)
    4. asambhīto (sī. syā. pī.)
    5. យានិ (សី. បី.)
    6. yāni (sī. pī.)
    7. កាសិរាជេន បេសិតោ (សី. ស្យា.), មុត្តោ ទាមាតោ កុញ្ជរោ (បី. សី. និយ្យ)
    8. kāsirājena pesito (sī. syā.), mutto dāmāto kuñjaro (pī. sī. niyya)
    9. វិស្សមិត្វាន (សី.)
    10. vissamitvāna (sī.)
    11. និលិនំ (ស្យា.)
    12. nilinaṃ (syā.)
    13. មាហិត្វា (ស្យា. ក.)
    14. māhitvā (syā. ka.)
    15. អកាលេន បវស្សតិ (សី. ស្យា.), អកាលេន’តិវស្សតិ (បី.)
    16. akālena pavassati (sī. syā.), akālena’tivassati (pī.)



    Related texts:



    អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ជាតក-អដ្ឋកថា • Jātaka-aṭṭhakathā / [៤៥៥] ១. មាតុបោសកជាតកវណ្ណនា • [455] 1. Mātuposakajātakavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact