| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৯. মাতুপোসকসুত্তং
9. Mātuposakasuttaṃ
২০৫. সাৰত্থিনিদানং। অথ খো মাতুপোসকো ব্রাহ্মণো যেন ভগৰা তেনুপসঙ্কমি; উপসঙ্কমিত্ৰা ভগৰতা সদ্ধিং সম্মোদি। সম্মোদনীযং কথং সারণীযং ৰীতিসারেত্ৰা একমন্তং নিসীদি। একমন্তং নিসিন্নো খো মাতুপোসকো ব্রাহ্মণো ভগৰন্তং এতদৰোচ – ‘‘অহঞ্হি, ভো গোতম, ধম্মেন ভিক্খং পরিযেসামি, ধম্মেন ভিক্খং পরিযেসিত্ৰা মাতাপিতরো পোসেমি। কচ্চাহং, ভো গোতম, এৰংকারী কিচ্চকারী হোমী’’তি? ‘‘তগ্ঘ ত্ৰং, ব্রাহ্মণ, এৰংকারী কিচ্চকারী হোসি। যো খো, ব্রাহ্মণ, ধম্মেন ভিক্খং পরিযেসতি, ধম্মেন ভিক্খং পরিযেসিত্ৰা মাতাপিতরো পোসেতি, বহুং সো পুঞ্ঞং পসৰতী’’তি।
205. Sāvatthinidānaṃ. Atha kho mātuposako brāhmaṇo yena bhagavā tenupasaṅkami; upasaṅkamitvā bhagavatā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho mātuposako brāhmaṇo bhagavantaṃ etadavoca – ‘‘ahañhi, bho gotama, dhammena bhikkhaṃ pariyesāmi, dhammena bhikkhaṃ pariyesitvā mātāpitaro posemi. Kaccāhaṃ, bho gotama, evaṃkārī kiccakārī homī’’ti? ‘‘Taggha tvaṃ, brāhmaṇa, evaṃkārī kiccakārī hosi. Yo kho, brāhmaṇa, dhammena bhikkhaṃ pariyesati, dhammena bhikkhaṃ pariyesitvā mātāpitaro poseti, bahuṃ so puññaṃ pasavatī’’ti.
‘‘যো মাতরং পিতরং ৰা, মচ্চো ধম্মেন পোসতি।
‘‘Yo mātaraṃ pitaraṃ vā, macco dhammena posati;
তায নং পারিচরিযায, মাতাপিতূসু পণ্ডিতা।
Tāya naṃ pāricariyāya, mātāpitūsu paṇḍitā;
ইধেৰ নং পসংসন্তি, পেচ্চ সগ্গে পমোদতী’’তি॥
Idheva naṃ pasaṃsanti, pecca sagge pamodatī’’ti.
এৰং ৰুত্তে, মাতুপোসকো ব্রাহ্মণো ভগৰন্তং এতদৰোচ – ‘‘অভিক্কন্তং ভো গোতম, অভিক্কন্তং, ভো গোতম…পে॰… উপাসকং মং ভৰং গোতমো ধারেতু অজ্জতগ্গে পাণুপেতং সরণং গত’’ন্তি।
Evaṃ vutte, mātuposako brāhmaṇo bhagavantaṃ etadavoca – ‘‘abhikkantaṃ bho gotama, abhikkantaṃ, bho gotama…pe… upāsakaṃ maṃ bhavaṃ gotamo dhāretu ajjatagge pāṇupetaṃ saraṇaṃ gata’’nti.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৯. মাতুপোসকসুত্তৰণ্ণনা • 9. Mātuposakasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৯. মাতুপোসকসুত্তৰণ্ণনা • 9. Mātuposakasuttavaṇṇanā
