| Library / Tipiṭaka / திபிடக • Tipiṭaka / மிலிந்த³பஞ்ஹபாளி • Milindapañhapāḷi |
6. மேக⁴ங்க³பஞ்ஹோ
6. Meghaṅgapañho
6. ‘‘ப⁴ந்தே நாக³ஸேன, ‘மேக⁴ஸ்ஸ பஞ்ச அங்கா³னி க³ஹேதப்³பா³னீ’தி யங் வதே³ஸி, கதமானி தானி பஞ்ச அங்கா³னி க³ஹேதப்³பா³னீ’’தி? ‘‘யதா², மஹாராஜ, மேகோ⁴ உப்பன்னங் ரஜோஜல்லங் வூபஸமேதி, ஏவமேவ கோ², மஹாராஜ, யோகி³னா யோகா³வசரேன உப்பன்னங் கிலேஸரஜோஜல்லங் வூபஸமேதப்³ப³ங். இத³ங், மஹாராஜ, மேக⁴ஸ்ஸ பட²மங் அங்க³ங் க³ஹேதப்³ப³ங்.
6. ‘‘Bhante nāgasena, ‘meghassa pañca aṅgāni gahetabbānī’ti yaṃ vadesi, katamāni tāni pañca aṅgāni gahetabbānī’’ti? ‘‘Yathā, mahārāja, megho uppannaṃ rajojallaṃ vūpasameti, evameva kho, mahārāja, yoginā yogāvacarena uppannaṃ kilesarajojallaṃ vūpasametabbaṃ. Idaṃ, mahārāja, meghassa paṭhamaṃ aṅgaṃ gahetabbaṃ.
‘‘புன சபரங், மஹாராஜ, மேகோ⁴ பத²வியா உண்ஹங் நிப்³பா³பேதி, ஏவமேவ கோ², மஹாராஜ, யோகி³னா யோகா³வசரேன மெத்தாபா⁴வனாய ஸதே³வகோ லோகோ நிப்³பா³பேதப்³போ³. இத³ங், மஹாராஜ, மேக⁴ஸ்ஸ து³தியங் அங்க³ங் க³ஹேதப்³ப³ங்.
‘‘Puna caparaṃ, mahārāja, megho pathaviyā uṇhaṃ nibbāpeti, evameva kho, mahārāja, yoginā yogāvacarena mettābhāvanāya sadevako loko nibbāpetabbo. Idaṃ, mahārāja, meghassa dutiyaṃ aṅgaṃ gahetabbaṃ.
‘‘புன சபரங், மஹாராஜ, மேகோ⁴ ஸப்³ப³பீ³ஜானி விருஹாபேதி, ஏவமேவ கோ², மஹாராஜ, யோகி³னா யோகா³வசரேன ஸப்³ப³ஸத்தானங் ஸத்³த⁴ங் உப்பாதெ³த்வா தங் ஸத்³தா⁴பீ³ஜங் தீஸு ஸம்பத்தீஸு ரோபேதப்³ப³ங், தி³ப்³ப³மானுஸிகாஸு ஸுக²ஸம்பத்தீஸு யாவபரமத்த²னிப்³பா³னஸுக²ஸம்பத்தி. இத³ங், மஹாராஜ, மேக⁴ஸ்ஸ ததியங் அங்க³ங் க³ஹேதப்³ப³ங்.
‘‘Puna caparaṃ, mahārāja, megho sabbabījāni viruhāpeti, evameva kho, mahārāja, yoginā yogāvacarena sabbasattānaṃ saddhaṃ uppādetvā taṃ saddhābījaṃ tīsu sampattīsu ropetabbaṃ, dibbamānusikāsu sukhasampattīsu yāvaparamatthanibbānasukhasampatti. Idaṃ, mahārāja, meghassa tatiyaṃ aṅgaṃ gahetabbaṃ.
‘‘புன சபரங், மஹாராஜ, மேகோ⁴ உதுதோ ஸமுட்ட²ஹித்வா த⁴ரணிதலருஹே திணருக்க²லதாகு³ம்ப³ஓஸதி⁴வனப்பதயோ பரிரக்க²தி, ஏவமேவ கோ², மஹாராஜ, யோகி³னா யோகா³வசரேன யோனிஸோ மனஸிகாரங் நிப்³ப³த்தெத்வா தேன யோனிஸோ மனஸிகாரேன ஸமணத⁴ம்மோ பரிரக்கி²தப்³போ³, யோனிஸோ மனஸிகாரமூலகா ஸப்³பே³ குஸலா த⁴ம்மா. இத³ங், மஹாராஜ, மேக⁴ஸ்ஸ சதுத்த²ங் அங்க³ங் க³ஹேதப்³ப³ங்.
‘‘Puna caparaṃ, mahārāja, megho ututo samuṭṭhahitvā dharaṇitalaruhe tiṇarukkhalatāgumbaosadhivanappatayo parirakkhati, evameva kho, mahārāja, yoginā yogāvacarena yoniso manasikāraṃ nibbattetvā tena yoniso manasikārena samaṇadhammo parirakkhitabbo, yoniso manasikāramūlakā sabbe kusalā dhammā. Idaṃ, mahārāja, meghassa catutthaṃ aṅgaṃ gahetabbaṃ.
‘‘புன சபரங் , மஹாராஜ, மேகோ⁴ வஸ்ஸமானோ நதி³தளாகபொக்க²ரணியோ கந்த³ரபத³ரஸரஸொப்³ப⁴உத³பானானி ச பரிபூரேதி உத³கதா⁴ராஹி, ஏவமேவ கோ², மஹாராஜ, யோகி³னா யோகா³வசரேன ஆக³மபரியத்தியா த⁴ம்மமேக⁴மபி⁴வஸ்ஸயித்வா அதி⁴க³மகாமானங் மானஸங் பரிபூரயிதப்³ப³ங். இத³ங், மஹாராஜ, மேக⁴ஸ்ஸ பஞ்சமங் அங்க³ங் க³ஹேதப்³ப³ங். பா⁴ஸிதம்பேதங், மஹாராஜ, தே²ரேன ஸாரிபுத்தேன த⁴ம்மஸேனாபதினா –
‘‘Puna caparaṃ , mahārāja, megho vassamāno naditaḷākapokkharaṇiyo kandarapadarasarasobbhaudapānāni ca paripūreti udakadhārāhi, evameva kho, mahārāja, yoginā yogāvacarena āgamapariyattiyā dhammameghamabhivassayitvā adhigamakāmānaṃ mānasaṃ paripūrayitabbaṃ. Idaṃ, mahārāja, meghassa pañcamaṃ aṅgaṃ gahetabbaṃ. Bhāsitampetaṃ, mahārāja, therena sāriputtena dhammasenāpatinā –
‘‘‘போ³த⁴னெய்யங் ஜனங் தி³ஸ்வா, ஸதஸஹஸ்ஸேபி யோஜனே;
‘‘‘Bodhaneyyaṃ janaṃ disvā, satasahassepi yojane;
க²ணேன உபக³ந்த்வான, போ³தே⁴தி தங் மஹாமுனீ’’’தி.
Khaṇena upagantvāna, bodheti taṃ mahāmunī’’’ti.
மேக⁴ங்க³பஞ்ஹோ ச²ட்டோ².
Meghaṅgapañho chaṭṭho.
