| Library / Tipiṭaka / තිපිටක • Tipiṭaka / මිලින්‌දපඤ්‌හපාළි • Milindapañhapāḷi |
6. මෙඝඞ්‌ගපඤ්‌හො
6. Meghaṅgapañho
6. ‘‘භන්‌තෙ නාගසෙන, ‘මෙඝස්‌ස පඤ්‌ච අඞ්‌ගානි ගහෙතබ්‌බානී’ති යං වදෙසි, කතමානි තානි පඤ්‌ච අඞ්‌ගානි ගහෙතබ්‌බානී’’ති? ‘‘යථා, මහාරාජ, මෙඝො උප්‌පන්‌නං රජොජල්‌ලං වූපසමෙති, එවමෙව ඛො, මහාරාජ, යොගිනා යොගාවචරෙන උප්‌පන්‌නං කිලෙසරජොජල්‌ලං වූපසමෙතබ්‌බං. ඉදං, මහාරාජ, මෙඝස්‌ස පඨමං අඞ්‌ගං ගහෙතබ්‌බං.
6. ‘‘Bhante nāgasena, ‘meghassa pañca aṅgāni gahetabbānī’ti yaṃ vadesi, katamāni tāni pañca aṅgāni gahetabbānī’’ti? ‘‘Yathā, mahārāja, megho uppannaṃ rajojallaṃ vūpasameti, evameva kho, mahārāja, yoginā yogāvacarena uppannaṃ kilesarajojallaṃ vūpasametabbaṃ. Idaṃ, mahārāja, meghassa paṭhamaṃ aṅgaṃ gahetabbaṃ.
‘‘පුන චපරං, මහාරාජ, මෙඝො පථවියා උණ්‌හං නිබ්‌බාපෙති, එවමෙව ඛො, මහාරාජ, යොගිනා යොගාවචරෙන මෙත්‌තාභාවනාය සදෙවකො ලොකො නිබ්‌බාපෙතබ්‌බො. ඉදං, මහාරාජ, මෙඝස්‌ස දුතියං අඞ්‌ගං ගහෙතබ්‌බං.
‘‘Puna caparaṃ, mahārāja, megho pathaviyā uṇhaṃ nibbāpeti, evameva kho, mahārāja, yoginā yogāvacarena mettābhāvanāya sadevako loko nibbāpetabbo. Idaṃ, mahārāja, meghassa dutiyaṃ aṅgaṃ gahetabbaṃ.
‘‘පුන චපරං, මහාරාජ, මෙඝො සබ්‌බබීජානි විරුහාපෙති, එවමෙව ඛො, මහාරාජ, යොගිනා යොගාවචරෙන සබ්‌බසත්‌තානං සද්‌ධං උප්‌පාදෙත්‌වා තං සද්‌ධාබීජං තීසු සම්‌පත්‌තීසු රොපෙතබ්‌බං, දිබ්‌බමානුසිකාසු සුඛසම්‌පත්‌තීසු යාවපරමත්‌ථනිබ්‌බානසුඛසම්‌පත්‌ති. ඉදං, මහාරාජ, මෙඝස්‌ස තතියං අඞ්‌ගං ගහෙතබ්‌බං.
‘‘Puna caparaṃ, mahārāja, megho sabbabījāni viruhāpeti, evameva kho, mahārāja, yoginā yogāvacarena sabbasattānaṃ saddhaṃ uppādetvā taṃ saddhābījaṃ tīsu sampattīsu ropetabbaṃ, dibbamānusikāsu sukhasampattīsu yāvaparamatthanibbānasukhasampatti. Idaṃ, mahārāja, meghassa tatiyaṃ aṅgaṃ gahetabbaṃ.
‘‘පුන චපරං, මහාරාජ, මෙඝො උතුතො සමුට්‌ඨහිත්‌වා ධරණිතලරුහෙ තිණරුක්‌ඛලතාගුම්‌බඔසධිවනප්‌පතයො පරිරක්‌ඛති, එවමෙව ඛො, මහාරාජ, යොගිනා යොගාවචරෙන යොනිසො මනසිකාරං නිබ්‌බත්‌තෙත්‌වා තෙන යොනිසො මනසිකාරෙන සමණධම්‌මො පරිරක්‌ඛිතබ්‌බො, යොනිසො මනසිකාරමූලකා සබ්‌බෙ කුසලා ධම්‌මා. ඉදං, මහාරාජ, මෙඝස්‌ස චතුත්‌ථං අඞ්‌ගං ගහෙතබ්‌බං.
‘‘Puna caparaṃ, mahārāja, megho ututo samuṭṭhahitvā dharaṇitalaruhe tiṇarukkhalatāgumbaosadhivanappatayo parirakkhati, evameva kho, mahārāja, yoginā yogāvacarena yoniso manasikāraṃ nibbattetvā tena yoniso manasikārena samaṇadhammo parirakkhitabbo, yoniso manasikāramūlakā sabbe kusalā dhammā. Idaṃ, mahārāja, meghassa catutthaṃ aṅgaṃ gahetabbaṃ.
‘‘පුන චපරං , මහාරාජ, මෙඝො වස්‌සමානො නදිතළාකපොක්‌ඛරණියො කන්‌දරපදරසරසොබ්‌භඋදපානානි ච පරිපූරෙති උදකධාරාහි, එවමෙව ඛො, මහාරාජ, යොගිනා යොගාවචරෙන ආගමපරියත්‌තියා ධම්‌මමෙඝමභිවස්‌සයිත්‌වා අධිගමකාමානං මානසං පරිපූරයිතබ්‌බං. ඉදං, මහාරාජ, මෙඝස්‌ස පඤ්‌චමං අඞ්‌ගං ගහෙතබ්‌බං. භාසිතම්‌පෙතං, මහාරාජ, ථෙරෙන සාරිපුත්‌තෙන ධම්‌මසෙනාපතිනා –
‘‘Puna caparaṃ , mahārāja, megho vassamāno naditaḷākapokkharaṇiyo kandarapadarasarasobbhaudapānāni ca paripūreti udakadhārāhi, evameva kho, mahārāja, yoginā yogāvacarena āgamapariyattiyā dhammameghamabhivassayitvā adhigamakāmānaṃ mānasaṃ paripūrayitabbaṃ. Idaṃ, mahārāja, meghassa pañcamaṃ aṅgaṃ gahetabbaṃ. Bhāsitampetaṃ, mahārāja, therena sāriputtena dhammasenāpatinā –
‘‘‘බොධනෙය්‍යං ජනං දිස්‌වා, සතසහස්‌සෙපි යොජනෙ;
‘‘‘Bodhaneyyaṃ janaṃ disvā, satasahassepi yojane;
ඛණෙන උපගන්‌ත්‌වාන, බොධෙති තං මහාමුනී’’’ති.
Khaṇena upagantvāna, bodheti taṃ mahāmunī’’’ti.
මෙඝඞ්‌ගපඤ්‌හො ඡට්‌ඨො.
Meghaṅgapañho chaṭṭho.
