| Library / Tipiṭaka / ཏིཔིཊཀ • Tipiṭaka / མཧཱཝགྒཔཱལི༹ • Mahāvaggapāḷi |
༡༨༠. མེཎྜཀགཧཔཏིཝཏྠུ
180. Meṇḍakagahapativatthu
༢༩༦. ཏེན ཁོ པན སམཡེན བྷདྡིཡནགརེ མེཎྜཀོ གཧཔཏི པཊིཝསཏི། ཏསྶ ཨེཝརཱུཔོ ཨིདྡྷཱནུབྷཱཝོ ཧོཏི – སཱིསཾ ནཧཱཡིཏྭཱ དྷཉྙཱགཱརཾ སམྨཛྫཱཔེཏྭཱ བཧིདྭཱརེ ནིསཱིདཏི, ཨནྟལིཀྑཱ དྷཉྙསྶ དྷཱརཱ ཨོཔཏིཏྭཱ དྷཉྙཱགཱརཾ པཱུརེཏི། བྷརིཡཱཡ ཨེཝརཱུཔོ ཨིདྡྷཱནུབྷཱཝོ ཧོཏི – ཨེཀཾཡེཝ ཨཱལ༹ྷཀཐཱལིཀཾ ཨུཔནིསཱིདིཏྭཱ ཨེཀཉྩ སཱུཔབྷིཉྫནཀཾ 1 དཱསཀམྨཀརཔོརིསཾ བྷཏྟེན པརིཝིསཏི, ན ཏཱཝ ཏཾ ཁིཡྻཏི 2 ཡཱཝ སཱ ན ཝུཊྛཱཏི། པུཏྟསྶ ཨེཝརཱུཔོ ཨིདྡྷཱནུབྷཱཝོ ཧོཏི – ཨེཀཾཡེཝ སཧསྶཐཝིཀཾ གཧེཏྭཱ དཱསཀམྨཀརཔོརིསསྶ ཚམཱསིཀཾ ཝེཏནཾ དེཏི, ན ཏཱཝ ཏཾ ཁིཡྻཏི ཡཱཝསྶ ཧཏྠགཏཱ། སུཎིསཱཡ ཨེཝརཱུཔོ ཨིདྡྷཱནུབྷཱཝོ ཧོཏི – ཨེཀཾཡེཝ ཙཏུདོཎིཀཾ པིཊཀཾ ཨུཔནིསཱིདིཏྭཱ དཱསཀམྨཀརཔོརིསསྶ ཚམཱསིཀཾ བྷཏྟཾ དེཏི, ན ཏཱཝ ཏཾ ཁིཡྻཏི ཡཱཝ སཱ ན ཝུཊྛཱཏི། དཱསསྶ ཨེཝརཱུཔོ ཨིདྡྷཱནུབྷཱཝོ ཧོཏི – ཨེཀེན ནངྒལེན ཀསནྟསྶ སཏྟ སཱིཏཱཡོ གཙྪནྟི།
296. Tena kho pana samayena bhaddiyanagare meṇḍako gahapati paṭivasati. Tassa evarūpo iddhānubhāvo hoti – sīsaṃ nahāyitvā dhaññāgāraṃ sammajjāpetvā bahidvāre nisīdati, antalikkhā dhaññassa dhārā opatitvā dhaññāgāraṃ pūreti. Bhariyāya evarūpo iddhānubhāvo hoti – ekaṃyeva āḷhakathālikaṃ upanisīditvā ekañca sūpabhiñjanakaṃ 3 dāsakammakaraporisaṃ bhattena parivisati, na tāva taṃ khiyyati 4 yāva sā na vuṭṭhāti. Puttassa evarūpo iddhānubhāvo hoti – ekaṃyeva sahassathavikaṃ gahetvā dāsakammakaraporisassa chamāsikaṃ vetanaṃ deti, na tāva taṃ khiyyati yāvassa hatthagatā. Suṇisāya evarūpo iddhānubhāvo hoti – ekaṃyeva catudoṇikaṃ piṭakaṃ upanisīditvā dāsakammakaraporisassa chamāsikaṃ bhattaṃ deti, na tāva taṃ khiyyati yāva sā na vuṭṭhāti. Dāsassa evarūpo iddhānubhāvo hoti – ekena naṅgalena kasantassa satta sītāyo gacchanti.
ཨསྶོསི ཁོ རཱཛཱ མཱགདྷོ སེནིཡོ བིམྦིསཱརོ – ‘‘ཨམྷཱཀཾ ཀིར ཝིཛིཏེ བྷདྡིཡནགརེ མེཎྜཀོ གཧཔཏི པཊིཝསཏི། ཏསྶ ཨེཝརཱུཔོ ཨིདྡྷཱནུབྷཱཝོ – སཱིསཾ ནཧཱཡིཏྭཱ དྷཉྙཱགཱརཾ སམྨཛྫཱཔེཏྭཱ བཧིདྭཱརེ ནིསཱིདཏི, ཨནྟལིཀྑཱ དྷཉྙསྶ དྷཱརཱ ཨོཔཏིཏྭཱ དྷཉྙཱགཱརཾ པཱུརེཏི། བྷརིཡཱཡ ཨེཝརཱུཔོ ཨིདྡྷཱནུབྷཱཝོ – ཨེཀཾཡེཝ ཨཱལ༹ྷཀཐཱལིཀཾ ཨུཔནིསཱིདིཏྭཱ ཨེཀཉྩ སཱུཔབྷིཉྫནཀཾ དཱསཀམྨཀརཔོརིསཾ བྷཏྟེན པརིཝིསཏི, ན ཏཱཝ ཏཾ ཁིཡྻཏི ཡཱཝ སཱ ན ཝུཊྛཱཏི། པུཏྟསྶ ཨེཝརཱུཔོ ཨིདྡྷཱནུབྷཱཝོ – ཨེཀཾཡེཝ སཧསྶཐཝིཀཾ གཧེཏྭཱ དཱསཀམྨཀརཔོརིསསྶ ཚམཱསིཀཾ ཝེཏནཾ དེཏི, ན ཏཱཝ ཏཾ ཁིཡྻཏི ཡཱཝསྶ ཧཏྠགཏཱ། སུཎིསཱཡ ཨེཝརཱུཔོ ཨིདྡྷཱནུབྷཱཝོ – ཨེཀཾཡེཝ ཙཏུདོཎིཀཾ པིཊཀཾ ཨུཔནིསཱིདིཏྭཱ དཱསཀམྨཀརཔོརིསསྶ ཚམཱསིཀཾ བྷཏྟཾ དེཏི, ན ཏཱཝ ཏཾ ཁིཡྻཏི ཡཱཝ སཱ ན ཝུཊྛཱཏི། དཱསསྶ ཨེཝརཱུཔོ ཨིདྡྷཱནུབྷཱཝོ – ཨེཀེན ནངྒལེན ཀསནྟསྶ སཏྟ སཱིཏཱཡོ གཙྪནྟཱི’’ཏི། ཨཐ ཁོ རཱཛཱ མཱགདྷོ སེནིཡོ བིམྦིསཱརོ ཨཉྙཏརཾ སབྦཏྠཀཾ མཧཱམཏྟཾ ཨཱམནྟེསི – ‘‘ཨམྷཱཀཾ ཀིར, བྷཎེ, ཝིཛིཏེ བྷདྡིཡནགརེ མེཎྜཀོ གཧཔཏི པཊིཝསཏི། ཏསྶ ཨེཝརཱུཔོ ཨིདྡྷཱནུབྷཱཝོ – སཱིསཾ ནཧཱཡིཏྭཱ དྷཉྙཱགཱརཾ སམྨཛྫཱཔེཏྭཱ བཧིདྭཱརེ ནིསཱིདཏི, ཨནྟལིཀྑཱ དྷཉྙསྶ དྷཱརཱ ཨོཔཏིཏྭཱ དྷཉྙཱགཱརཾ པཱུརེཏི། བྷརིཡཱཡ…པེ॰… པུཏྟསྶ… སུཎིསཱཡ… དཱསསྶ ཨེཝརཱུཔོ ཨིདྡྷཱནུབྷཱཝོ, ཨེཀེན ནངྒལེན ཀསནྟསྶ སཏྟ སཱིཏཱཡོ གཙྪནྟཱིཏི། གཙྪ, བྷཎེ, ཛཱནཱཧི། ཡཐཱ མཡཱ སཱམཾ དིཊྛོ, ཨེཝཾ ཏཝ དིཊྛོ བྷཝིསྶཏཱི’’ཏི།
Assosi kho rājā māgadho seniyo bimbisāro – ‘‘amhākaṃ kira vijite bhaddiyanagare meṇḍako gahapati paṭivasati. Tassa evarūpo iddhānubhāvo – sīsaṃ nahāyitvā dhaññāgāraṃ sammajjāpetvā bahidvāre nisīdati, antalikkhā dhaññassa dhārā opatitvā dhaññāgāraṃ pūreti. Bhariyāya evarūpo iddhānubhāvo – ekaṃyeva āḷhakathālikaṃ upanisīditvā ekañca sūpabhiñjanakaṃ dāsakammakaraporisaṃ bhattena parivisati, na tāva taṃ khiyyati yāva sā na vuṭṭhāti. Puttassa evarūpo iddhānubhāvo – ekaṃyeva sahassathavikaṃ gahetvā dāsakammakaraporisassa chamāsikaṃ vetanaṃ deti, na tāva taṃ khiyyati yāvassa hatthagatā. Suṇisāya evarūpo iddhānubhāvo – ekaṃyeva catudoṇikaṃ piṭakaṃ upanisīditvā dāsakammakaraporisassa chamāsikaṃ bhattaṃ deti, na tāva taṃ khiyyati yāva sā na vuṭṭhāti. Dāsassa evarūpo iddhānubhāvo – ekena naṅgalena kasantassa satta sītāyo gacchantī’’ti. Atha kho rājā māgadho seniyo bimbisāro aññataraṃ sabbatthakaṃ mahāmattaṃ āmantesi – ‘‘amhākaṃ kira, bhaṇe, vijite bhaddiyanagare meṇḍako gahapati paṭivasati. Tassa evarūpo iddhānubhāvo – sīsaṃ nahāyitvā dhaññāgāraṃ sammajjāpetvā bahidvāre nisīdati, antalikkhā dhaññassa dhārā opatitvā dhaññāgāraṃ pūreti. Bhariyāya…pe… puttassa… suṇisāya… dāsassa evarūpo iddhānubhāvo, ekena naṅgalena kasantassa satta sītāyo gacchantīti. Gaccha, bhaṇe, jānāhi. Yathā mayā sāmaṃ diṭṭho, evaṃ tava diṭṭho bhavissatī’’ti.
༢༩༧. ཨེཝཾ , དེཝཱཏི ཁོ སོ མཧཱམཏྟོ རཉྙོ མཱགདྷསྶ སེནིཡསྶ བིམྦིསཱརསྶ པཊིསྶུཎིཏྭཱ ཙཏུརངྒིནིཡཱ སེནཱཡ ཡེན བྷདྡིཡཾ ཏེན པཱཡཱསི། ཨནུཔུབྦེན ཡེན བྷདྡིཡཾ ཡེན མེཎྜཀོ གཧཔཏི ཏེནུཔསངྐམི; ཨུཔསངྐམིཏྭཱ མེཎྜཀཾ གཧཔཏིཾ ཨེཏདཝོཙ – ‘‘ཨཧཉྷི, གཧཔཏི, རཉྙཱ ཨཱཎཏྟོ ‘ཨམྷཱཀཾ ཀིར, བྷཎེ, ཝིཛིཏེ བྷདྡིཡནགརེ མེཎྜཀོ གཧཔཏི པཊིཝསཏི, ཏསྶ ཨེཝརཱུཔོ ཨིདྡྷཱནུབྷཱཝོ, སཱིསཾ ནཧཱཡིཏྭཱ…པེ॰… བྷརིཡཱཡ… པུཏྟསྶ… སུཎིསཱཡ… དཱསསྶ ཨེཝརཱུཔོ ཨིདྡྷཱནུབྷཱཝོ, ཨེཀེན ནངྒལེན ཀསནྟསྶ སཏྟ སཱིཏཱཡོ གཙྪནྟཱི’ཏི, གཙྪ, བྷཎེ, ཛཱནཱཧི། ཡཐཱ མཡཱ སཱམཾ དིཊྛོ, ཨེཝཾ ཏཝ དིཊྛོ བྷཝིསྶཏཱི’ཏི། པསྶཱམ ཏེ, གཧཔཏི, ཨིདྡྷཱནུབྷཱཝ’’ནྟི། ཨཐ ཁོ མེཎྜཀོ གཧཔཏི སཱིསཾ ནཧཱཡིཏྭཱ དྷཉྙཱགཱརཾ སམྨཛྫཱཔེཏྭཱ བཧིདྭཱརེ ནིསཱིདི, ཨནྟལིཀྑཱ དྷཉྙསྶ དྷཱརཱ ཨོཔཏིཏྭཱ དྷཉྙཱགཱརཾ པཱུརེསི། ‘‘དིཊྛོ ཏེ, གཧཔཏི, ཨིདྡྷཱནུབྷཱཝོ། བྷརིཡཱཡ ཏེ ཨིདྡྷཱནུབྷཱཝཾ པསྶིསྶཱམཱ’’ཏི། ཨཐ ཁོ མེཎྜཀོ གཧཔཏི བྷརིཡཾ ཨཱཎཱཔེསི – ‘‘ཏེན ཧི ཙཏུརངྒིནིཾ སེནཾ བྷཏྟེན པརིཝིསཱ’’ཏི། ཨཐ ཁོ མེཎྜཀསྶ གཧཔཏིསྶ བྷརིཡཱ ཨེཀཾཡེཝ ཨཱལ༹ྷཀཐཱལིཀཾ ཨུཔནིསཱིདིཏྭཱ ཨེཀཉྩ སཱུཔབྷིཉྫནཀཾ ཙཏུརངྒིནིཾ སེནཾ བྷཏྟེན པརིཝིསི, ན ཏཱཝ ཏཾ ཁིཡྻཏི, ཡཱཝ སཱ ན ཝུཊྛཱཏི། ‘‘དིཊྛོ ཏེ, གཧཔཏི, བྷརིཡཱཡཔི ཨིདྡྷཱནུབྷཱཝོ། པུཏྟསྶ ཏེ ཨིདྡྷཱནུབྷཱཝཾ པསྶིསྶཱམཱ’’ཏི། ཨཐ ཁོ མེཎྜཀོ གཧཔཏི པུཏྟཾ ཨཱཎཱཔེསི – ‘‘ཏེན ཧི ཙཏུརངྒིནིཡཱ སེནཱཡ ཚམཱསིཀཾ ཝེཏནཾ དེཧཱི’’ཏི ། ཨཐ ཁོ མེཎྜཀསྶ གཧཔཏིསྶ པུཏྟོ ཨེཀཾཡེཝ སཧསྶཐཝིཀཾ གཧེཏྭཱ ཙཏུརངྒིནིཡཱ སེནཱཡ ཚམཱསིཀཾ ཝེཏནཾ ཨདཱསི, ན ཏཱཝ ཏཾ ཁིཡྻཏི, ཡཱཝསྶ ཧཏྠགཏཱ། ‘‘དིཊྛོ ཏེ, གཧཔཏི, པུཏྟསྶཔི ཨིདྡྷཱནུབྷཱཝོ། སུཎིསཱཡ ཏེ ཨིདྡྷཱནུབྷཱཝཾ པསྶིསྶཱམཱ’’ཏི། ཨཐ ཁོ མེཎྜཀོ གཧཔཏི སུཎིསཾ ཨཱཎཱཔེསི – ‘‘ཏེན ཧི ཙཏུརངྒིནིཡཱ སེནཱཡ ཚམཱསིཀཾ བྷཏྟཾ དེཧཱི’’ཏི། ཨཐ ཁོ མེཎྜཀསྶ གཧཔཏིསྶ སུཎིསཱ ཨེཀཾཡེཝ ཙཏུདོཎིཀཾ པིཊཀཾ ཨུཔནིསཱིདིཏྭཱ ཙཏུརངྒིནིཡཱ སེནཱཡ ཚམཱསིཀཾ བྷཏྟཾ ཨདཱསི, ན ཏཱཝ ཏཾ ཁིཡྻཏི ཡཱཝ སཱ ན ཝུཊྛཱཏི། ‘‘དིཊྛོ ཏེ, གཧཔཏི, སུཎིསཱཡཔི ཨིདྡྷཱནུབྷཱཝོ། དཱསསྶ ཏེ ཨིདྡྷཱནུབྷཱཝཾ པསྶིསྶཱམཱ’’ཏི། ‘‘མཡ྄ཧཾ ཁོ, སཱམི, དཱསསྶ ཨིདྡྷཱནུབྷཱཝོ ཁེཏྟེ པསྶིཏབྦོ’’ཏི། ‘‘ཨལཾ, གཧཔཏི, དིཊྛོ ཏེ དཱསསྶཔི ཨིདྡྷཱནུབྷཱཝོ’’ཏི། ཨཐ ཁོ སོ མཧཱམཏྟོ ཙཏུརངྒིནིཡཱ སེནཱཡ པུནདེཝ རཱཛགཧཾ པཙྩཱགཉྪི། ཡེན རཱཛཱ མཱགདྷོ སེནིཡོ བིམྦིསཱརོ ཏེནུཔསངྐམི; ཨུཔསངྐམིཏྭཱ རཉྙོ མཱགདྷསྶ སེནིཡསྶ བིམྦིསཱརསྶ ཨེཏམཏྠཾ ཨཱརོཙེསི།
297. Evaṃ , devāti kho so mahāmatto rañño māgadhassa seniyassa bimbisārassa paṭissuṇitvā caturaṅginiyā senāya yena bhaddiyaṃ tena pāyāsi. Anupubbena yena bhaddiyaṃ yena meṇḍako gahapati tenupasaṅkami; upasaṅkamitvā meṇḍakaṃ gahapatiṃ etadavoca – ‘‘ahañhi, gahapati, raññā āṇatto ‘amhākaṃ kira, bhaṇe, vijite bhaddiyanagare meṇḍako gahapati paṭivasati, tassa evarūpo iddhānubhāvo, sīsaṃ nahāyitvā…pe… bhariyāya… puttassa… suṇisāya… dāsassa evarūpo iddhānubhāvo, ekena naṅgalena kasantassa satta sītāyo gacchantī’ti, gaccha, bhaṇe, jānāhi. Yathā mayā sāmaṃ diṭṭho, evaṃ tava diṭṭho bhavissatī’ti. Passāma te, gahapati, iddhānubhāva’’nti. Atha kho meṇḍako gahapati sīsaṃ nahāyitvā dhaññāgāraṃ sammajjāpetvā bahidvāre nisīdi, antalikkhā dhaññassa dhārā opatitvā dhaññāgāraṃ pūresi. ‘‘Diṭṭho te, gahapati, iddhānubhāvo. Bhariyāya te iddhānubhāvaṃ passissāmā’’ti. Atha kho meṇḍako gahapati bhariyaṃ āṇāpesi – ‘‘tena hi caturaṅginiṃ senaṃ bhattena parivisā’’ti. Atha kho meṇḍakassa gahapatissa bhariyā ekaṃyeva āḷhakathālikaṃ upanisīditvā ekañca sūpabhiñjanakaṃ caturaṅginiṃ senaṃ bhattena parivisi, na tāva taṃ khiyyati, yāva sā na vuṭṭhāti. ‘‘Diṭṭho te, gahapati, bhariyāyapi iddhānubhāvo. Puttassa te iddhānubhāvaṃ passissāmā’’ti. Atha kho meṇḍako gahapati puttaṃ āṇāpesi – ‘‘tena hi caturaṅginiyā senāya chamāsikaṃ vetanaṃ dehī’’ti . Atha kho meṇḍakassa gahapatissa putto ekaṃyeva sahassathavikaṃ gahetvā caturaṅginiyā senāya chamāsikaṃ vetanaṃ adāsi, na tāva taṃ khiyyati, yāvassa hatthagatā. ‘‘Diṭṭho te, gahapati, puttassapi iddhānubhāvo. Suṇisāya te iddhānubhāvaṃ passissāmā’’ti. Atha kho meṇḍako gahapati suṇisaṃ āṇāpesi – ‘‘tena hi caturaṅginiyā senāya chamāsikaṃ bhattaṃ dehī’’ti. Atha kho meṇḍakassa gahapatissa suṇisā ekaṃyeva catudoṇikaṃ piṭakaṃ upanisīditvā caturaṅginiyā senāya chamāsikaṃ bhattaṃ adāsi, na tāva taṃ khiyyati yāva sā na vuṭṭhāti. ‘‘Diṭṭho te, gahapati, suṇisāyapi iddhānubhāvo. Dāsassa te iddhānubhāvaṃ passissāmā’’ti. ‘‘Mayhaṃ kho, sāmi, dāsassa iddhānubhāvo khette passitabbo’’ti. ‘‘Alaṃ, gahapati, diṭṭho te dāsassapi iddhānubhāvo’’ti. Atha kho so mahāmatto caturaṅginiyā senāya punadeva rājagahaṃ paccāgañchi. Yena rājā māgadho seniyo bimbisāro tenupasaṅkami; upasaṅkamitvā rañño māgadhassa seniyassa bimbisārassa etamatthaṃ ārocesi.
༢༩༨. ཨཐ ཁོ བྷགཝཱ ཝེསཱལིཡཾ ཡཐཱབྷིརནྟཾ ཝིཧརིཏྭཱ ཡེན བྷདྡིཡཾ ཏེན ཙཱརིཀཾ པཀྐཱམི མཧཏཱ བྷིཀྑུསངྒྷེན སདྡྷིཾ ཨཌྜྷཏེལསེཧི བྷིཀྑུསཏེཧི། ཨཐ ཁོ བྷགཝཱ ཨནུཔུབྦེན ཙཱརིཀཾ ཙརམཱནོ ཡེན བྷདྡིཡཾ ཏདཝསརི། ཏཏྲ སུདཾ བྷགཝཱ བྷདྡིཡེ ཝིཧརཏི ཛཱཏིཡཱ ཝནེ། ཨསྶོསི ཁོ མེཎྜཀོ གཧཔཏི – ‘‘སམཎོ ཁལུ བྷོ གོཏམོ སཀྱཔུཏྟོ སཀྱཀུལཱ པབྦཛིཏོ བྷདྡིཡཾ ཨནུཔྤཏྟོ བྷདྡིཡེ ཝིཧརཏི ཛཱཏིཡཱ ཝནེ། ཏཾ ཁོ པན བྷགཝནྟཾ གོཏམཾ ཨེཝཾ ཀལྱཱཎོ ཀིཏྟིསདྡོ ཨབྦྷུགྒཏོ – ‘ཨིཏིཔི སོ བྷགཝཱ ཨརཧཾ སམྨཱསམྦུདྡྷོ ཝིཛྫཱཙརཎསམྤནྣོ སུགཏོ ལོཀཝིདཱུ ཨནུཏྟརོ པུརིསདམྨསཱརཐི སཏྠཱ དེཝམནུསྶཱནཾ བུདྡྷོ བྷགཝཱ’ 5། སོ ཨིམཾ ལོཀཾ སདེཝཀཾ སམཱརཀཾ སབྲཧྨཀཾ སསྶམཎབྲཱཧྨཎིཾ པཛཾ སདེཝམནུསྶཾ སཡཾ ཨབྷིཉྙཱ སཙྪིཀཏྭཱ པཝེདེཏི། སོ དྷམྨཾ དེསེཏི ཨཱདིཀལྱཱཎཾ མཛ྄ཛྷེཀལྱཱཎཾ པརིཡོསཱནཀལྱཱཎཾ སཱཏྠཾ སབྱཉྫནཾ ཀེཝལཔརིཔུཎྞཾ པརིསུདྡྷཾ བྲཧྨཙརིཡཾ པཀཱསེཏི། སཱདྷུ ཁོ པན ཏཐཱརཱུཔཱནཾ ཨརཧཏཾ དསྶནཾ ཧོཏཱི’’ཏི། ཨཐ ཁོ མེཎྜཀོ གཧཔཏི བྷདྲཱནི བྷདྲཱནི ཡཱནཱནི ཡོཛཱཔེཏྭཱ བྷདྲཾ བྷདྲཾ ཡཱནཾ ཨབྷིརུཧིཏྭཱ བྷདྲེཧི བྷདྲེཧི ཡཱནེཧི བྷདྡིཡཱ ནིཡྻཱསི བྷགཝནྟཾ དསྶནཱཡ། ཨདྡསཾསུ ཁོ སམྦཧུལཱ ཏིཏྠིཡཱ མེཎྜཀཾ གཧཔཏིཾ དཱུརཏོཝ ཨཱགཙྪནྟཾ, དིསྭཱན མེཎྜཀཾ གཧཔཏིཾ ཨེཏདཝོཙུཾ – ‘‘ཀཧཾ ཏྭཾ, གཧཔཏི, གཙྪསཱི’’ཏི? ‘‘གཙྪཱམཧཾ, བྷནྟེ, བྷགཝནྟཾ 6 སམཎཾ གོཏམཾ དསྶནཱཡཱ’’ཏི། ‘‘ཀིཾ པན ཏྭཾ, གཧཔཏི, ཀིརིཡཝཱདོ སམཱནོ ཨཀིརིཡཝཱདཾ སམཎཾ གོཏམཾ དསྶནཱཡ ཨུཔསངྐམིསྶསི? སམཎོ ཧི, གཧཔཏི, གོཏམོ ཨཀིརིཡཝཱདོ ཨཀིརིཡཱཡ དྷམྨཾ དེསེཏི, ཏེན ཙ སཱཝཀེ ཝིནེཏཱི’’ཏི། ཨཐ ཁོ མེཎྜཀསྶ གཧཔཏིསྶ ཨེཏདཧོསི – ‘‘ནིསྶཾསཡཾ, ཁོ སོ བྷགཝཱ ཨརཧཾ སམྨཱསམྦུདྡྷོ བྷཝིསྶཏི, ཡཐཡིམེ ཏིཏྠིཡཱ ཨུསཱུཡནྟཱི’’ཏི། ཡཱཝཏིཀཱ ཡཱནསྶ བྷཱུམི, ཡཱནེན གནྟྭཱ ཡཱནཱ པཙྩོརོཧིཏྭཱ པཏྟིཀོཝ ཡེན བྷགཝཱ ཏེནུཔསངྐམི, ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣསྶ ཁོ མེཎྜཀསྶ གཧཔཏིསྶ བྷགཝཱ ཨནུཔུབྦིཾ ཀཐཾ ཀཐེསི, སེཡྻཐིདཾ – དཱནཀཐཾ…པེ॰… ཨཔརཔྤཙྩཡོ སཏྠུསཱསནེ བྷགཝནྟཾ ཨེཏདཝོཙ – ‘‘ཨབྷིཀྐནྟཾ, བྷནྟེ…པེ॰… ཨུཔཱསཀཾ མཾ བྷགཝཱ དྷཱརེཏུ ཨཛྫཏགྒེ པཱཎུཔེཏཾ སརཎཾ གཏཾ ། ཨདྷིཝཱསེཏུ ཙ མེ, བྷནྟེ, བྷགཝཱ སྭཱཏནཱཡ བྷཏྟཾ སདྡྷིཾ བྷིཀྑུསངྒྷེནཱ’’ཏི། ཨདྷིཝཱསེསི བྷགཝཱ ཏུཎྷཱིབྷཱཝེན། ཨཐ ཁོ མེཎྜཀོ གཧཔཏི བྷགཝཏོ ཨདྷིཝཱསནཾ ཝིདིཏྭཱ ཨུཊྛཱཡཱསནཱ བྷགཝནྟཾ ཨབྷིཝཱདེཏྭཱ པདཀྑིཎཾ ཀཏྭཱ པཀྐཱམི།
298. Atha kho bhagavā vesāliyaṃ yathābhirantaṃ viharitvā yena bhaddiyaṃ tena cārikaṃ pakkāmi mahatā bhikkhusaṅghena saddhiṃ aḍḍhatelasehi bhikkhusatehi. Atha kho bhagavā anupubbena cārikaṃ caramāno yena bhaddiyaṃ tadavasari. Tatra sudaṃ bhagavā bhaddiye viharati jātiyā vane. Assosi kho meṇḍako gahapati – ‘‘samaṇo khalu bho gotamo sakyaputto sakyakulā pabbajito bhaddiyaṃ anuppatto bhaddiye viharati jātiyā vane. Taṃ kho pana bhagavantaṃ gotamaṃ evaṃ kalyāṇo kittisaddo abbhuggato – ‘itipi so bhagavā arahaṃ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṃ buddho bhagavā’ 7. So imaṃ lokaṃ sadevakaṃ samārakaṃ sabrahmakaṃ sassamaṇabrāhmaṇiṃ pajaṃ sadevamanussaṃ sayaṃ abhiññā sacchikatvā pavedeti. So dhammaṃ deseti ādikalyāṇaṃ majjhekalyāṇaṃ pariyosānakalyāṇaṃ sātthaṃ sabyañjanaṃ kevalaparipuṇṇaṃ parisuddhaṃ brahmacariyaṃ pakāseti. Sādhu kho pana tathārūpānaṃ arahataṃ dassanaṃ hotī’’ti. Atha kho meṇḍako gahapati bhadrāni bhadrāni yānāni yojāpetvā bhadraṃ bhadraṃ yānaṃ abhiruhitvā bhadrehi bhadrehi yānehi bhaddiyā niyyāsi bhagavantaṃ dassanāya. Addasaṃsu kho sambahulā titthiyā meṇḍakaṃ gahapatiṃ dūratova āgacchantaṃ, disvāna meṇḍakaṃ gahapatiṃ etadavocuṃ – ‘‘kahaṃ tvaṃ, gahapati, gacchasī’’ti? ‘‘Gacchāmahaṃ, bhante, bhagavantaṃ 8 samaṇaṃ gotamaṃ dassanāyā’’ti. ‘‘Kiṃ pana tvaṃ, gahapati, kiriyavādo samāno akiriyavādaṃ samaṇaṃ gotamaṃ dassanāya upasaṅkamissasi? Samaṇo hi, gahapati, gotamo akiriyavādo akiriyāya dhammaṃ deseti, tena ca sāvake vinetī’’ti. Atha kho meṇḍakassa gahapatissa etadahosi – ‘‘nissaṃsayaṃ, kho so bhagavā arahaṃ sammāsambuddho bhavissati, yathayime titthiyā usūyantī’’ti. Yāvatikā yānassa bhūmi, yānena gantvā yānā paccorohitvā pattikova yena bhagavā tenupasaṅkami, upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnassa kho meṇḍakassa gahapatissa bhagavā anupubbiṃ kathaṃ kathesi, seyyathidaṃ – dānakathaṃ…pe… aparappaccayo satthusāsane bhagavantaṃ etadavoca – ‘‘abhikkantaṃ, bhante…pe… upāsakaṃ maṃ bhagavā dhāretu ajjatagge pāṇupetaṃ saraṇaṃ gataṃ . Adhivāsetu ca me, bhante, bhagavā svātanāya bhattaṃ saddhiṃ bhikkhusaṅghenā’’ti. Adhivāsesi bhagavā tuṇhībhāvena. Atha kho meṇḍako gahapati bhagavato adhivāsanaṃ viditvā uṭṭhāyāsanā bhagavantaṃ abhivādetvā padakkhiṇaṃ katvā pakkāmi.
ཨཐ ཁོ མེཎྜཀོ གཧཔཏི ཏསྶཱ རཏྟིཡཱ ཨཙྩཡེན པཎཱིཏཾ ཁཱདནཱིཡཾ བྷོཛནཱིཡཾ པཊིཡཱདཱཔེཏྭཱ བྷགཝཏོ ཀཱལཾ ཨཱརོཙཱཔེསི – ‘‘ཀཱལོ, བྷནྟེ, ནིཊྛིཏཾ བྷཏྟ’’ནྟི། ཨཐ ཁོ བྷགཝཱ པུབྦཎྷསམཡཾ ནིཝཱསེཏྭཱ པཏྟཙཱིཝརམཱདཱཡ ཡེན མེཎྜཀསྶ གཧཔཏིསྶ ནིཝེསནཾ ཏེནུཔསངྐམི; ཨུཔསངྐམིཏྭཱ པཉྙཏྟེ ཨཱསནེ ནིསཱིདི སདྡྷིཾ བྷིཀྑུསངྒྷེན། ཨཐ ཁོ མེཎྜཀསྶ གཧཔཏིསྶ བྷརིཡཱ ཙ པུཏྟོ ཙ སུཎིསཱ ཙ དཱསོ ཙ ཡེན བྷགཝཱ ཏེནུཔསངྐམིཾསུ , ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ནིསཱིདིཾསུ། ཏེསཾ བྷགཝཱ ཨནུཔུབྦིཾ ཀཐཾ ཀཐེསི, སེཡྻཐིདཾ – དཱནཀཐཾ…པེ॰… ཨཔརཔྤཙྩཡཱ སཏྠུསཱསནེ བྷགཝནྟཾ ཨེཏདཝོཙུཾ – ‘‘ཨབྷིཀྐནྟཾ, བྷནྟེ…པེ॰… ཨེཏེ མཡཾ, བྷནྟེ, བྷགཝནྟཾ སརཎཾ གཙྪཱམ དྷམྨཉྩ བྷིཀྑུསངྒྷཉྩ། ཨུཔཱསཀེ ནོ བྷགཝཱ དྷཱརེཏུ ཨཛྫཏགྒེ པཱཎུཔེཏེ སརཎཾ གཏེ’’ཏི། ཨཐ ཁོ མེཎྜཀོ གཧཔཏི བུདྡྷཔྤམུཁཾ བྷིཀྑུསངྒྷཾ པཎཱིཏེན ཁཱདནཱིཡེན བྷོཛནཱིཡེན སཧཏྠཱ སནྟཔྤེཏྭཱ སམྤཝཱརེཏྭཱ བྷགཝནྟཾ བྷུཏྟཱཝིཾ ཨོནཱིཏཔཏྟཔཱཎིཾ ཨེཀམནྟཾ ནིསཱིདི། ཨེཀམནྟཾ ནིསིནྣོ ཁོ མེཎྜཀོ གཧཔཏི བྷགཝནྟཾ ཨེཏདཝོཙ – ‘‘ཡཱཝ, བྷནྟེ, བྷགཝཱ བྷདྡིཡེ ཝིཧརཏི ཏཱཝ ཨཧཾ བུདྡྷཔྤམུཁསྶ བྷིཀྑུསངྒྷསྶ དྷུཝབྷཏྟེནཱ’’ཏི། ཨཐ ཁོ བྷགཝཱ མེཎྜཀཾ གཧཔཏིཾ དྷམྨིཡཱ ཀཐཱཡ སནྡསྶེཏྭཱ སམཱདཔེཏྭཱ སམུཏྟེཛེཏྭཱ སམྤཧཾསེཏྭཱ ཨུཊྛཱཡཱསནཱ པཀྐཱམི།
Atha kho meṇḍako gahapati tassā rattiyā accayena paṇītaṃ khādanīyaṃ bhojanīyaṃ paṭiyādāpetvā bhagavato kālaṃ ārocāpesi – ‘‘kālo, bhante, niṭṭhitaṃ bhatta’’nti. Atha kho bhagavā pubbaṇhasamayaṃ nivāsetvā pattacīvaramādāya yena meṇḍakassa gahapatissa nivesanaṃ tenupasaṅkami; upasaṅkamitvā paññatte āsane nisīdi saddhiṃ bhikkhusaṅghena. Atha kho meṇḍakassa gahapatissa bhariyā ca putto ca suṇisā ca dāso ca yena bhagavā tenupasaṅkamiṃsu , upasaṅkamitvā bhagavantaṃ abhivādetvā ekamantaṃ nisīdiṃsu. Tesaṃ bhagavā anupubbiṃ kathaṃ kathesi, seyyathidaṃ – dānakathaṃ…pe… aparappaccayā satthusāsane bhagavantaṃ etadavocuṃ – ‘‘abhikkantaṃ, bhante…pe… ete mayaṃ, bhante, bhagavantaṃ saraṇaṃ gacchāma dhammañca bhikkhusaṅghañca. Upāsake no bhagavā dhāretu ajjatagge pāṇupete saraṇaṃ gate’’ti. Atha kho meṇḍako gahapati buddhappamukhaṃ bhikkhusaṅghaṃ paṇītena khādanīyena bhojanīyena sahatthā santappetvā sampavāretvā bhagavantaṃ bhuttāviṃ onītapattapāṇiṃ ekamantaṃ nisīdi. Ekamantaṃ nisinno kho meṇḍako gahapati bhagavantaṃ etadavoca – ‘‘yāva, bhante, bhagavā bhaddiye viharati tāva ahaṃ buddhappamukhassa bhikkhusaṅghassa dhuvabhattenā’’ti. Atha kho bhagavā meṇḍakaṃ gahapatiṃ dhammiyā kathāya sandassetvā samādapetvā samuttejetvā sampahaṃsetvā uṭṭhāyāsanā pakkāmi.
མེཎྜཀགཧཔཏིཝཏྠ ནིཊྛིཏཾ།
Meṇḍakagahapativattha niṭṭhitaṃ.
Footnotes:
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / མཧཱཝགྒ-ཨཊྛཀཐཱ • Mahāvagga-aṭṭhakathā / ཀཔྤིཡབྷཱུམིཨནུཛཱནནཀཐཱ • Kappiyabhūmianujānanakathā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༡༨༠. མེཎྜཀགཧཔཏིཝཏྠུཀཐཱ • 180. Meṇḍakagahapativatthukathā
