| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
১৮০. মেণ্ডকগহপতিৰত্থুকথা
180. Meṇḍakagahapativatthukathā
২৯৬. ‘‘বহিদ্ৰারে’’তি এত্থ কস্স বহিদ্ৰারেতি আহ ‘‘ধঞ্ঞাগারস্স বহিদ্ৰারে’’তি। আল়কথালিকন্তি এত্থ আল়কতণ্ডুলপচনকং গণ্হকথালি আল়কথালি, তায পচিতং ভত্তং আল়কথালিকন্তি ৰচনত্থং দস্সেন্তো আহ ‘‘আল়কতণ্ডুলপচনকথালিক’’ন্তি। ব্যঞ্জনভণ্ডিকন্তি ব্যঞ্জনপরিক্খারিকং, ব্যঞ্জনপরিৰারকন্তি অত্থো। ইমিনা সূপভিঞ্জনকন্তি এত্থ সূপসদ্দো ব্যঞ্জনৰাচকো, ভিঞ্জনকসদ্দো ভণ্ডিকপরিযাযোতি দস্সেতি। দাসকম্মকরপোরিসন্তি এত্থ দাসপোরিসা চ কম্মকরপোরিসা চ দাসকম্মকরপোরিসং, সমাহারদ্ৰন্দো পুব্বপদে উত্তরলোপো, ইতি ইমমত্থং দস্সেন্তো আহ ‘‘দাসপুরিসে চ কম্মকরপুরিসে চা’’তি। পোরিসসদ্দোপি পুরিসসদ্দেন সমানো ‘‘পুরিসো এৰ পোরিসো’’তি অত্থেন। ধুৰভত্তেনাতি এত্থ ধুৰসদ্দো নিচ্চপরিযাযোতি আহ ‘‘নিচ্চকাল’’ন্তি। দুয্হেন খীরেনাতি সম্বন্ধো। ‘‘মেণ্ডকৰত্থুস্মিং পনা’’তি পাঠতো পট্ঠায যাৰ ‘‘খণঞ্ঞেৰ দুয্হেনা’’তি পাঠা কেসুচিযেৰ অট্ঠকথাপোত্থকেসু অত্থি। এত্থাতি মেণ্ডকৰত্থুম্হি। গোরসেতি গৰযেহি নিব্বত্তে খীরদধিতক্কনৰনীতসব্বিসঙ্খাতে রসে। পাথেয্যন্তি পথস্স হিতং পাথেয্যং। ঞত্ৰাতি পাথেয্যমিচ্ছতীতি ঞত্ৰা। ভিক্খাচারৰত্তেন ৰাতি অঞ্ঞাতকঅপৰারিতট্ঠানতো ভিক্খাচারৰত্তেন ৰা। যাচিত্ৰাপীতি পিসদ্দো পগেৰ ভিক্খাচারৰত্তেনাতি দস্সেতি। যত্তকেন পাথেয্যেনাতি সম্বন্ধো।
296. ‘‘Bahidvāre’’ti ettha kassa bahidvāreti āha ‘‘dhaññāgārassa bahidvāre’’ti. Āḷakathālikanti ettha āḷakataṇḍulapacanakaṃ gaṇhakathāli āḷakathāli, tāya pacitaṃ bhattaṃ āḷakathālikanti vacanatthaṃ dassento āha ‘‘āḷakataṇḍulapacanakathālika’’nti. Byañjanabhaṇḍikanti byañjanaparikkhārikaṃ, byañjanaparivārakanti attho. Iminā sūpabhiñjanakanti ettha sūpasaddo byañjanavācako, bhiñjanakasaddo bhaṇḍikapariyāyoti dasseti. Dāsakammakaraporisanti ettha dāsaporisā ca kammakaraporisā ca dāsakammakaraporisaṃ, samāhāradvando pubbapade uttaralopo, iti imamatthaṃ dassento āha ‘‘dāsapurise ca kammakarapurise cā’’ti. Porisasaddopi purisasaddena samāno ‘‘puriso eva poriso’’ti atthena. Dhuvabhattenāti ettha dhuvasaddo niccapariyāyoti āha ‘‘niccakāla’’nti. Duyhena khīrenāti sambandho. ‘‘Meṇḍakavatthusmiṃ panā’’ti pāṭhato paṭṭhāya yāva ‘‘khaṇaññeva duyhenā’’ti pāṭhā kesuciyeva aṭṭhakathāpotthakesu atthi. Etthāti meṇḍakavatthumhi. Goraseti gavayehi nibbatte khīradadhitakkanavanītasabbisaṅkhāte rase. Pātheyyanti pathassa hitaṃ pātheyyaṃ. Ñatvāti pātheyyamicchatīti ñatvā. Bhikkhācāravattena vāti aññātakaapavāritaṭṭhānato bhikkhācāravattena vā. Yācitvāpīti pisaddo pageva bhikkhācāravattenāti dasseti. Yattakena pātheyyenāti sambandho.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi / ১৮০. মেণ্ডকগহপতিৰত্থু • 180. Meṇḍakagahapativatthu
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / কপ্পিযভূমিঅনুজাননকথা • Kappiyabhūmianujānanakathā
