| Library / Tipiṭaka / तिपिटक • Tipiṭaka / जातकपाळि • Jātakapāḷi |
४७१. मेण्डकपञ्हजातकं (८)
471. Meṇḍakapañhajātakaṃ (8)
९४.
94.
येसं न कदाचि भूतपुब्बं, सख्यं 1 सत्तपदम्पिमस्मि लोके।
Yesaṃ na kadāci bhūtapubbaṃ, sakhyaṃ 2 sattapadampimasmi loke;
जाता अमित्ता दुवे सहाया, पटिसन्धाय चरन्ति किस्स हेतु॥
Jātā amittā duve sahāyā, paṭisandhāya caranti kissa hetu.
९५.
95.
यदि मे अज्ज पातरासकाले, पञ्हं न सक्कुणेय्याथ वत्तुमेतं।
Yadi me ajja pātarāsakāle, pañhaṃ na sakkuṇeyyātha vattumetaṃ;
रट्ठा पब्बाजयिस्सामि वो सब्बे, न हि मत्थो दुप्पञ्ञजातिकेहि॥
Raṭṭhā pabbājayissāmi vo sabbe, na hi mattho duppaññajātikehi.
९६.
96.
महाजनसमागमम्हि घोरे, जनकोलाहलसङ्गमम्हि जाते।
Mahājanasamāgamamhi ghore, janakolāhalasaṅgamamhi jāte;
विक्खित्तमना अनेकचित्ता, पञ्हं न सक्कुणोम वत्तुमेतं॥
Vikkhittamanā anekacittā, pañhaṃ na sakkuṇoma vattumetaṃ.
९७.
97.
एकग्गचित्ताव एकमेका, रहसि गता अत्थं निचिन्तयित्वा 3।
Ekaggacittāva ekamekā, rahasi gatā atthaṃ nicintayitvā 4;
पविवेके सम्मसित्वान धीरा, अथ वक्खन्ति जनिन्द एतमत्थं॥
Paviveke sammasitvāna dhīrā, atha vakkhanti janinda etamatthaṃ.
९८.
98.
उग्गपुत्त-राजपुत्तियानं, उरब्भस्स मंसं पियं मनापं।
Uggaputta-rājaputtiyānaṃ, urabbhassa maṃsaṃ piyaṃ manāpaṃ;
न सुनखस्स ते अदेन्ति मंसं, अथ मेण्डस्स सुणेन सख्यमस्स॥
Na sunakhassa te adenti maṃsaṃ, atha meṇḍassa suṇena sakhyamassa.
९९.
99.
चम्मं विहनन्ति एळकस्स, अस्सपिट्ठत्थरस्सुखस्स 5 हेतु।
Cammaṃ vihananti eḷakassa, assapiṭṭhattharassukhassa 6 hetu;
न च ते सुनखस्स अत्थरन्ति, अथ मेण्डस्स सुणेन सख्यमस्स॥
Na ca te sunakhassa attharanti, atha meṇḍassa suṇena sakhyamassa.
१००.
100.
आवेल्लितसिङ्गिको हि मेण्डो, न च सुनखस्स विसाणकानि अत्थि।
Āvellitasiṅgiko hi meṇḍo, na ca sunakhassa visāṇakāni atthi;
तिणभक्खो मंसभोजनो च, अथ मेण्डस्स सुणेन सख्यमस्स॥
Tiṇabhakkho maṃsabhojano ca, atha meṇḍassa suṇena sakhyamassa.
१०१.
101.
तिणमासि पलासमासि मेण्डो, न च सुनखो तिणमासि नो पलासं।
Tiṇamāsi palāsamāsi meṇḍo, na ca sunakho tiṇamāsi no palāsaṃ;
गण्हेय्य सुणो ससं बिळारं, अथ मेण्डस्स सुणेन सख्यमस्स॥
Gaṇheyya suṇo sasaṃ biḷāraṃ, atha meṇḍassa suṇena sakhyamassa.
१०२.
102.
अट्ठड्ढपदो चतुप्पदस्स, मेण्डो अट्ठनखो अदिस्समानो।
Aṭṭhaḍḍhapado catuppadassa, meṇḍo aṭṭhanakho adissamāno;
छादियमाहरती अयं इमस्स, मंसं आहरती अयं अमुस्स॥
Chādiyamāharatī ayaṃ imassa, maṃsaṃ āharatī ayaṃ amussa.
१०३.
103.
पासादवरगतो विदेहसेट्ठो, वितिहारं अञ्ञमञ्ञभोजनानं।
Pāsādavaragato videhaseṭṭho, vitihāraṃ aññamaññabhojanānaṃ;
१०४.
104.
लाभा वत मे अनप्परूपा, यस्स मेदिसा पण्डिता कुलम्हि।
Lābhā vata me anapparūpā, yassa medisā paṇḍitā kulamhi;
पञ्हस्स गम्भीरगतं निपुणमत्थं, पटिविज्झन्ति सुभासितेन धीरा॥
Pañhassa gambhīragataṃ nipuṇamatthaṃ, paṭivijjhanti subhāsitena dhīrā.
१०५.
105.
अस्सतरिरथञ्च एकमेकं, फीतं गामवरञ्च एकमेकं।
Assatarirathañca ekamekaṃ, phītaṃ gāmavarañca ekamekaṃ;
सब्बेसं वो दम्मि पण्डितानं, परमप्पतीतमनो सुभासितेनाति॥
Sabbesaṃ vo dammi paṇḍitānaṃ, paramappatītamano subhāsitenāti.
मेण्डकपञ्हजातकं अट्ठमं।
Meṇḍakapañhajātakaṃ aṭṭhamaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / जातक-अट्ठकथा • Jātaka-aṭṭhakathā / [४७१] ८. मेण्डकपञ्हजातकवण्णना • [471] 8. Meṇḍakapañhajātakavaṇṇanā
