| Library / Tipiṭaka / তিপিটক • Tipiṭaka / থেরগাথা-অট্ঠকথা • Theragāthā-aṭṭhakathā |
৮. মেণ্ডসিরত্থেরগাথাৰণ্ণনা
8. Meṇḍasirattheragāthāvaṇṇanā
অনেকজাতিসংসারন্তি আযস্মতো মেণ্ডসিরত্থেরস্স গাথা। কা উপ্পত্তি? সোপি কির পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি করোন্তো ইতো একনৰুতে কপ্পে ব্রাহ্মণকুলে নিব্বত্তিত্ৰা ৰযপ্পত্তো কামে পহায ইসিপব্বজ্জং পব্বজিত্ৰা মহতা ইসিগণেন সদ্ধিং হিমৰন্তে ৰসন্তো সত্থারং দিস্ৰা পসন্নমানসো ইসিগণেন পদুমানি আহরাপেত্ৰা সত্থু পুপ্ফপূজং কত্ৰা সাৰকে অপ্পমাদপটিপত্তিযং ওৰদিত্ৰা কালং কত্ৰা দেৰলোকে নিব্বত্তো অপরাপরং সংসরন্তো ইমস্মিং বুদ্ধুপ্পাদে সাকেতে গহপতিকুলে নিব্বত্তি, তস্স মেণ্ডসরিক্খসীসতায মেণ্ডসিরোত্ৰেৰ সমঞ্ঞা অহোসি। সো ভগৰতি সাকেতে অঞ্জনৰনে ৰিহরন্তে সত্থারং উপসঙ্কমিত্ৰা পটিলদ্ধসদ্ধো পব্বজিত্ৰা সমথৰিপস্সনাসু কম্মং করোন্তো ছল়ভিঞ্ঞো অহোসি। তেৰ ৰুত্তং অপদানে (অপ॰ থের ১.১৩.৯৭-১০৫) –
Anekajātisaṃsāranti āyasmato meṇḍasirattherassa gāthā. Kā uppatti? Sopi kira purimabuddhesu katādhikāro tattha tattha bhave vivaṭṭūpanissayāni puññāni karonto ito ekanavute kappe brāhmaṇakule nibbattitvā vayappatto kāme pahāya isipabbajjaṃ pabbajitvā mahatā isigaṇena saddhiṃ himavante vasanto satthāraṃ disvā pasannamānaso isigaṇena padumāni āharāpetvā satthu pupphapūjaṃ katvā sāvake appamādapaṭipattiyaṃ ovaditvā kālaṃ katvā devaloke nibbatto aparāparaṃ saṃsaranto imasmiṃ buddhuppāde sākete gahapatikule nibbatti, tassa meṇḍasarikkhasīsatāya meṇḍasirotveva samaññā ahosi. So bhagavati sākete añjanavane viharante satthāraṃ upasaṅkamitvā paṭiladdhasaddho pabbajitvā samathavipassanāsu kammaṃ karonto chaḷabhiñño ahosi. Teva vuttaṃ apadāne (apa. thera 1.13.97-105) –
‘‘হিমৰন্তস্সাৰিদূরে, গোতমো নাম পব্বতো।
‘‘Himavantassāvidūre, gotamo nāma pabbato;
নানারুক্খেহি সঞ্ছন্নো, মহাভূতগণালযো॥
Nānārukkhehi sañchanno, mahābhūtagaṇālayo.
‘‘ৰেমজ্ঝম্হি চ তস্সাসি, অস্সমো অভিনিম্মিতো।
‘‘Vemajjhamhi ca tassāsi, assamo abhinimmito;
পুরক্খতো সসিস্সেহি, ৰসামি অস্সমে অহং॥
Purakkhato sasissehi, vasāmi assame ahaṃ.
‘‘আযন্তু মে সিস্সগণা, পদুমং আহরন্তু মে।
‘‘Āyantu me sissagaṇā, padumaṃ āharantu me;
বুদ্ধপূজং করিস্সামি, দ্ৰিপদিন্দস্স তাদিনো॥
Buddhapūjaṃ karissāmi, dvipadindassa tādino.
‘‘এৰন্তি তে পটিস্সুত্ৰা, পদুমং আহরিংসু মে।
‘‘Evanti te paṭissutvā, padumaṃ āhariṃsu me;
তথা নিমিত্তং কত্ৰাহং, বুদ্ধস্স অভিরোপযিং॥
Tathā nimittaṃ katvāhaṃ, buddhassa abhiropayiṃ.
‘‘সিস্সে তদা সমানেত্ৰা, সাধুকং অনুসাসহং।
‘‘Sisse tadā samānetvā, sādhukaṃ anusāsahaṃ;
মা খো তুম্হে পমজ্জিত্থ, অপ্পমাদো সুখাৰহো॥
Mā kho tumhe pamajjittha, appamādo sukhāvaho.
‘‘এৰং সমনুসাসিত্ৰা, তে সিস্সে ৰচনক্খমে।
‘‘Evaṃ samanusāsitvā, te sisse vacanakkhame;
অপ্পমাদগুণে যুত্তো, তদা কালঙ্কতো অহং॥
Appamādaguṇe yutto, tadā kālaṅkato ahaṃ.
‘‘একনৰুতিতো কপ্পে, যং পুপ্ফমভিরোপযিং।
‘‘Ekanavutito kappe, yaṃ pupphamabhiropayiṃ;
দুগ্গতিং নাভিজানামি, বুদ্ধপূজাযিদং ফলং॥
Duggatiṃ nābhijānāmi, buddhapūjāyidaṃ phalaṃ.
‘‘একপঞ্ঞাসকপ্পম্হি , রাজা আসিং জলুত্তমো।
‘‘Ekapaññāsakappamhi , rājā āsiṃ jaluttamo;
সত্তরতনসম্পন্নো, চক্কৰত্তী মহব্বলো॥
Sattaratanasampanno, cakkavattī mahabbalo.
‘‘কিলেসা ঝাপিতা ময্হং…পে॰… কতং বুদ্ধস্স সাসন’’ন্তি॥
‘‘Kilesā jhāpitā mayhaṃ…pe… kataṃ buddhassa sāsana’’nti.
সো অত্তনো পুব্বেনিৰাসং অনুস্সরন্তো –
So attano pubbenivāsaṃ anussaranto –
৭৮.
78.
‘‘অনেকজাতিসংসারং, সন্ধাৰিস্সং অনিব্বিসং।
‘‘Anekajātisaṃsāraṃ, sandhāvissaṃ anibbisaṃ;
তস্স মে দুক্খজাতস্স, দুক্খক্খন্ধো অপরদ্ধো’’তি॥ – গাথং অভাসি।
Tassa me dukkhajātassa, dukkhakkhandho aparaddho’’ti. – gāthaṃ abhāsi;
তত্থ অনেকজাতিসংসারন্তি অনেকজাতিসতসহস্সসঙ্খ্যং ইদং সংসারৰট্টং, অদ্ধুনো অধিপ্পেতত্তা অচ্চন্তসংযোগেকৰচনং। সন্ধাৰিস্সন্তি সংসরিং, অপরাপরং চৰনুপ্পজ্জনৰসেন পরিব্ভমিং। অনিব্বিসন্তি তস্স নিৰত্তকঞাণং অৰিন্দন্তো অলভন্তো। তস্স মেতি এৰং সংসরন্তস্স মে। দুক্খজাতস্সাতি জাতিআদিৰসেন উপ্পন্নদুক্খস্স, তিস্সন্নং ৰা দুক্খতানং ৰসেন দুক্খসভাৰস্স। দুক্খক্খন্ধোতি কম্মকিলেসৰিপাকৰট্টপ্পকারো দুক্খরাসি। অপরদ্ধোতি অরহত্তমগ্গপ্পত্তিতো পট্ঠায পরিব্ভট্ঠো চুতো ন অভিনিব্বত্তিস্সতি। ‘‘অপরট্ঠো’’তি ৰা পাঠো, অপগতসমিদ্ধিতো সমুচ্ছিন্নকারণত্তা অপগতোতি অত্থো। ইদমেৰ চ থেরস্স অঞ্ঞাব্যাকরণং অহোসি।
Tattha anekajātisaṃsāranti anekajātisatasahassasaṅkhyaṃ idaṃ saṃsāravaṭṭaṃ, addhuno adhippetattā accantasaṃyogekavacanaṃ. Sandhāvissanti saṃsariṃ, aparāparaṃ cavanuppajjanavasena paribbhamiṃ. Anibbisanti tassa nivattakañāṇaṃ avindanto alabhanto. Tassa meti evaṃ saṃsarantassa me. Dukkhajātassāti jātiādivasena uppannadukkhassa, tissannaṃ vā dukkhatānaṃ vasena dukkhasabhāvassa. Dukkhakkhandhoti kammakilesavipākavaṭṭappakāro dukkharāsi. Aparaddhoti arahattamaggappattito paṭṭhāya paribbhaṭṭho cuto na abhinibbattissati. ‘‘Aparaṭṭho’’ti vā pāṭho, apagatasamiddhito samucchinnakāraṇattā apagatoti attho. Idameva ca therassa aññābyākaraṇaṃ ahosi.
মেণ্ডসিরত্থেরগাথাৰণ্ণনা নিট্ঠিতা।
Meṇḍasirattheragāthāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / থেরগাথাপাল়ি • Theragāthāpāḷi / ৮. মেণ্ডসিরত্থেরগাথা • 8. Meṇḍasirattheragāthā
