| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
7-8. மேது²னஸுத்தாதி³வண்ணனா
7-8. Methunasuttādivaṇṇanā
50-51. ஸத்தமே இதா⁴தி இமஸ்மிங் லோகே. ஏகச்சோதி ஏகோ. ஸமணோ வா ப்³ராஹ்மணோ வாதி பப்³ப³ஜ்ஜாமத்தேன ஸமணோ வா, ஜாதிமத்தேன ப்³ராஹ்மணோ வா. த்³வயங்த்³வயஸமாபத்திந்தி த்³வீஹி த்³வீஹி ஸமாபஜ்ஜிதப்³ப³ங், மேது²னந்தி அத்தோ². ந ஹேவ கோ² ஸமாபஜ்ஜதீதி ஸம்ப³ந்தோ⁴. உச்சா²த³னங் உப்³ப³ட்டனங். ஸம்பா³ஹனங் பரிமத்³த³னங். ஸாதி³யதீதி அதி⁴வாஸேதி. தத³ஸ்ஸாதே³தீதி உச்சா²த³னாதி³ங் அபி⁴ரமதி. நிகாமேதீதி இச்ச²தி. வித்திந்தி துட்டி²ங். இத³ம்பி கோ²தி எத்த² இத³ந்தி யதா²வுத்தங் ஸாதி³யனாதி³ங் க²ண்டா³தி³பா⁴வவஸேன ஏகங் கத்வா வுத்தங். பி-ஸத்³தோ³ வக்க²மானங் உபாதா³ய ஸமுச்சயத்தோ², கோ²-ஸத்³தோ³ அவதா⁴ரணத்தோ². இத³ங் வுத்தங் ஹோதி – யதே³தங் ப்³ரஹ்மசாரிபடிஞ்ஞஸ்ஸ அஸதிபி த்³வயங்த்³வயஸமாபத்தியங் மாதுகா³மஸ்ஸ உச்சா²த³னநஹாபனஸம்பா³ஹனஸாதி³யனாதி³. இத³ம்பி ஏகங்ஸேன தஸ்ஸ ப்³ரஹ்மசரியஸ்ஸ க²ண்டா³தி³பா⁴வாபாத³னதோ க²ண்ட³ம்பி சி²த்³த³ம்பி ஸப³லம்பி கம்மாஸம்பீதி. ஏவங் பன க²ண்டா³தி³பா⁴வாபத்தியா ஸோ அபரிஸுத்³த⁴ங் ப்³ரஹ்மசரியங் சரதி, ந பரிஸுத்³த⁴ங், ஸங்யுத்தோ மேது²னஸங்யோகே³ன, ந விஸங்யுத்தோ. ததோ சஸ்ஸ ந ஜாதிஆதீ³ஹி பரிமுத்தீதி த³ஸ்ஸெந்தோ ‘‘அயங் வுச்சதீ’’திஆதி³மாஹ.
50-51. Sattame idhāti imasmiṃ loke. Ekaccoti eko. Samaṇo vā brāhmaṇo vāti pabbajjāmattena samaṇo vā, jātimattena brāhmaṇo vā. Dvayaṃdvayasamāpattinti dvīhi dvīhi samāpajjitabbaṃ, methunanti attho. Na heva kho samāpajjatīti sambandho. Ucchādanaṃ ubbaṭṭanaṃ. Sambāhanaṃ parimaddanaṃ. Sādiyatīti adhivāseti. Tadassādetīti ucchādanādiṃ abhiramati. Nikāmetīti icchati. Vittinti tuṭṭhiṃ. Idampi khoti ettha idanti yathāvuttaṃ sādiyanādiṃ khaṇḍādibhāvavasena ekaṃ katvā vuttaṃ. Pi-saddo vakkhamānaṃ upādāya samuccayattho, kho-saddo avadhāraṇattho. Idaṃ vuttaṃ hoti – yadetaṃ brahmacāripaṭiññassa asatipi dvayaṃdvayasamāpattiyaṃ mātugāmassa ucchādananahāpanasambāhanasādiyanādi. Idampi ekaṃsena tassa brahmacariyassa khaṇḍādibhāvāpādanato khaṇḍampi chiddampi sabalampi kammāsampīti. Evaṃ pana khaṇḍādibhāvāpattiyā so aparisuddhaṃ brahmacariyaṃ carati, na parisuddhaṃ, saṃyutto methunasaṃyogena, na visaṃyutto. Tato cassa na jātiādīhi parimuttīti dassento ‘‘ayaṃ vuccatī’’tiādimāha.
ஸஞ்ஜக்³க⁴தீதி கிலேஸவஸேன மஹாஹஸிதங் ஹஸதி. ஸங்கீளதீதி காயஸங்ஸக்³க³வஸேன கீளதி. ஸங்கேலாயதீதி ஸப்³ப³ஸோ மாதுகா³மங் கேலாயந்தோ விஹரதி. சக்கு²னாதி அத்தனோ சக்கு²னா. சக்கு²ந்தி மாதுகா³மஸ்ஸ சக்கு²ங். உபனிஜ்ஜா²யதீதி உபேச்ச நிஜ்ஜா²யதி ஓலோகேதி. திரோகுட்டந்தி குட்டஸ்ஸ பரதோ. ததா² திரோபாகாரங், ‘‘மத்திகாமயா பி⁴த்தி குட்டங், இட்ட²காமயா பாகாரோ’’தி வத³ந்தி. யா காசி வா பி⁴த்தி போரிஸகா தி³யட்³ட⁴ரதனப்பமாணா குட்டங், ததோ அதி⁴கோ பாகாரோ. அஸ்ஸாதி ப்³ரஹ்மசாரிபடிஞ்ஞஸ்ஸ. புப்³பே³தி வதஸமாதா³னதோ புப்³பே³. காமகு³ணேஹீதி காமகொட்டா²ஸேஹி. ஸமப்பிதந்தி ஸுட்டு² அப்பிதங் ஸஹிதங். ஸமங்கி³பூ⁴தந்தி ஸமன்னாக³தங். பரிசாரயமானந்தி கீளந்தங், உபட்ட²ஹியமானங் வா. பணிதா⁴யாதி பத்தெ²த்வா. ஸீலேனாதிஆதீ³ஸு யமனியமாதி³ஸமாதா³னவஸேன ஸீலங், அவீதிக்கமவஸேன வதங். உப⁴யம்பி வா ஸீலங், து³க்கரசரியவஸேன பவத்திதங் வதங். தங்தங்அகிச்சஸம்மததோ வா நிவத்திலக்க²ணங் ஸீலங், தங்தங்ஸமாதா³னவதோ வேஸபோ⁴ஜனகிச்சகரணாதி³விஸேஸப்படிபத்தி வதங். ஸப்³ப³தா²பி து³க்கரசரியா தபோ. மேது²னா விரதி ப்³ரஹ்மசரியந்தி ஏவம்பெத்த² பாளிவண்ணனா வேதி³தப்³பா³. அட்ட²மங் உத்தானமேவ.
Sañjagghatīti kilesavasena mahāhasitaṃ hasati. Saṃkīḷatīti kāyasaṃsaggavasena kīḷati. Saṃkelāyatīti sabbaso mātugāmaṃ kelāyanto viharati. Cakkhunāti attano cakkhunā. Cakkhunti mātugāmassa cakkhuṃ. Upanijjhāyatīti upecca nijjhāyati oloketi. Tirokuṭṭanti kuṭṭassa parato. Tathā tiropākāraṃ, ‘‘mattikāmayā bhitti kuṭṭaṃ, iṭṭhakāmayā pākāro’’ti vadanti. Yā kāci vā bhitti porisakā diyaḍḍharatanappamāṇā kuṭṭaṃ, tato adhiko pākāro. Assāti brahmacāripaṭiññassa. Pubbeti vatasamādānato pubbe. Kāmaguṇehīti kāmakoṭṭhāsehi. Samappitanti suṭṭhu appitaṃ sahitaṃ. Samaṅgibhūtanti samannāgataṃ. Paricārayamānanti kīḷantaṃ, upaṭṭhahiyamānaṃ vā. Paṇidhāyāti patthetvā. Sīlenātiādīsu yamaniyamādisamādānavasena sīlaṃ, avītikkamavasena vataṃ. Ubhayampi vā sīlaṃ, dukkaracariyavasena pavattitaṃ vataṃ. Taṃtaṃakiccasammatato vā nivattilakkhaṇaṃ sīlaṃ, taṃtaṃsamādānavato vesabhojanakiccakaraṇādivisesappaṭipatti vataṃ. Sabbathāpi dukkaracariyā tapo. Methunā virati brahmacariyanti evampettha pāḷivaṇṇanā veditabbā. Aṭṭhamaṃ uttānameva.
மேது²னஸுத்தாதி³வண்ணனா நிட்டி²தா.
Methunasuttādivaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya
7. மேது²னஸுத்தங் • 7. Methunasuttaṃ
8. ஸங்யோக³ஸுத்தங் • 8. Saṃyogasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā)
7. மேது²னஸுத்தவண்ணனா • 7. Methunasuttavaṇṇanā
8. ஸங்யோக³ஸுத்தவண்ணனா • 8. Saṃyogasuttavaṇṇanā
