| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
7. மேது²னஸுத்தவண்ணனா
7. Methunasuttavaṇṇanā
50. ஸத்தமே உபஸங்கமீதி பு⁴த்தபாதராஸோ தா³ஸகம்மகரபரிவுதோ உபஸங்கமி. ப⁴வம்பினோதி ப⁴வம்பி நு. ப்³ரஹ்மசாரீ படிஜானாதீதி ‘‘அஹங் ப்³ரஹ்மசாரீ’’தி ஏவங் ப்³ரஹ்மசரியவாஸங் படிஜானாதீதி புச்ச²தி. ஏவங் கிரஸ்ஸ அஹோஸி – ‘‘ப்³ராஹ்மணஸமயே வேத³ங் உக்³க³ண்ஹந்தா அட்ட²சத்தாலீஸ வஸ்ஸானி ப்³ரஹ்மசரியங் சரந்தி. ஸமணோ பன கோ³தமோ அகா³ரங் அஜ்ஜா²வஸந்தோ தீஸு பாஸாதே³ஸு திவித⁴னாடகரதியா அபி⁴ரமி, இதா³னி கிங் நு கோ² வக்க²தீ’’தி இமமத்த²ங் ஸந்தா⁴யேவங் புச்ச²தி. ததோ ப⁴க³வா மந்தேன கண்ஹஸப்பங் க³ண்ஹந்தோ விய அமித்தங் கீ³வாய பாதே³ன அக்கமந்தோ விய அத்தனோ ஸங்கிலேஸகாலே ச²ப்³ப³ஸ்ஸானி பதா⁴னசரியாய ரஜ்ஜஸுக²ங் வா பாஸாதே³ஸு நாடகஸம்பத்திங் வா ஆரப்³ப⁴ விதக்கமத்தஸ்ஸாபி அனுப்பன்னபா⁴வங் ஸந்தா⁴ய ஸீஹனாத³ங் நத³ந்தோ யஞ்ஹி தங் ப்³ராஹ்மணாதிஆதி³மாஹ. தத்த² த்³வயங்த்³வயஸமாபத்திந்தி த்³வீஹி த்³வீஹி ஸமாபஜ்ஜிதப்³ப³பா⁴வங். து³க்க²ஸ்மாதி ஸகலவட்டது³க்க²தோ. ஸஞ்ஜக்³க⁴தீதி ஹஸிதகத²ங் கதே²தி. ஸங்கீளதீதி கேளிங் கரோதி. ஸங்கேளாயதீதி மஹாஹஸிதங் ஹஸதி. சக்கு²னா சக்கு²ந்தி அத்தனோ சக்கு²னா தஸ்ஸா சக்கு²ங் படிவிஜ்ஜி²த்வா உபனிஜ்ஜா²யதி. திரோகுட்டங் வா திரோபாகாரங் வாதி பரகுட்டே வா பரபாகாரே வா. தே³வோதி ஏகோ தே³வராஜா. தே³வஞ்ஞதரோதி அஞ்ஞதரோ தே³வபுத்தோ. அனுத்தரங் ஸம்மாஸம்போ³தி⁴ந்தி அரஹத்தஞ்சேவ ஸப்³ப³ஞ்ஞுதஞ்ஞாணஞ்ச.
50. Sattame upasaṅkamīti bhuttapātarāso dāsakammakaraparivuto upasaṅkami. Bhavampinoti bhavampi nu. Brahmacārī paṭijānātīti ‘‘ahaṃ brahmacārī’’ti evaṃ brahmacariyavāsaṃ paṭijānātīti pucchati. Evaṃ kirassa ahosi – ‘‘brāhmaṇasamaye vedaṃ uggaṇhantā aṭṭhacattālīsa vassāni brahmacariyaṃ caranti. Samaṇo pana gotamo agāraṃ ajjhāvasanto tīsu pāsādesu tividhanāṭakaratiyā abhirami, idāni kiṃ nu kho vakkhatī’’ti imamatthaṃ sandhāyevaṃ pucchati. Tato bhagavā mantena kaṇhasappaṃ gaṇhanto viya amittaṃ gīvāya pādena akkamanto viya attano saṃkilesakāle chabbassāni padhānacariyāya rajjasukhaṃ vā pāsādesu nāṭakasampattiṃ vā ārabbha vitakkamattassāpi anuppannabhāvaṃ sandhāya sīhanādaṃ nadanto yañhi taṃ brāhmaṇātiādimāha. Tattha dvayaṃdvayasamāpattinti dvīhi dvīhi samāpajjitabbabhāvaṃ. Dukkhasmāti sakalavaṭṭadukkhato. Sañjagghatīti hasitakathaṃ katheti. Saṃkīḷatīti keḷiṃ karoti. Saṃkeḷāyatīti mahāhasitaṃ hasati. Cakkhunā cakkhunti attano cakkhunā tassā cakkhuṃ paṭivijjhitvā upanijjhāyati. Tirokuṭṭaṃ vā tiropākāraṃ vāti parakuṭṭe vā parapākāre vā. Devoti eko devarājā. Devaññataroti aññataro devaputto. Anuttaraṃ sammāsambodhinti arahattañceva sabbaññutaññāṇañca.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 7. மேது²னஸுத்தங் • 7. Methunasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 7-8. மேது²னஸுத்தாதி³வண்ணனா • 7-8. Methunasuttādivaṇṇanā
