| Library / Tipiṭaka / д̇ибидага • Tipiṭaka / ан̇г̇уд̇д̇аранигааяа (адтагат̇аа) • Aṅguttaranikāya (aṭṭhakathā) |
7. мзт̇унасуд̇д̇аван̣н̣анаа
7. Methunasuttavaṇṇanā
50. сад̇д̇амз убасан̇гамийд̇и бхуд̇д̇абаад̇араасо д̣̇аасагаммагарабаривуд̇о убасан̇гами. бхавамбинод̇и бхавамби ну. б̣рахмажаарий бадиж̇аанаад̇ийд̇и ‘‘ахам̣ б̣рахмажаарий’’д̇и звам̣ б̣рахмажарияаваасам̣ бадиж̇аанаад̇ийд̇и бужчад̇и. звам̣ гирасса ахоси – ‘‘б̣раахман̣асамаяз взд̣̇ам̣ уг̇г̇ан̣ханд̇аа адтажад̇д̇аалийса вассаани б̣рахмажарияам̣ жаранд̇и. саман̣о бана г̇од̇амо аг̇аарам̣ аж̇жхаавасанд̇о д̇ийсу баасаад̣̇зсу д̇ивид̇ханаадагарад̇ияаа абхирами, ид̣̇аани гим̣ ну ко вагкад̇ий’’д̇и имамад̇т̇ам̣ санд̇хааязвам̣ бужчад̇и. д̇ад̇о бхаг̇аваа манд̇зна ган̣хасаббам̣ г̇ан̣ханд̇о вияа амид̇д̇ам̣ г̇ийвааяа баад̣̇зна аггаманд̇о вияа ад̇д̇ано сам̣гилзсагаалз чаб̣б̣ассаани бад̇хаанажарияааяа раж̇ж̇асукам̣ ваа баасаад̣̇зсу наадагасамбад̇д̇им̣ ваа аараб̣бха вид̇аггамад̇д̇ассааби ануббаннабхаавам̣ санд̇хааяа сийханаад̣̇ам̣ над̣̇анд̇о яан̃хи д̇ам̣ б̣раахман̣аад̇иаад̣̇имааха. д̇ад̇т̇а д̣̇ваяам̣д̣̇ваяасамаабад̇д̇инд̇и д̣̇вийхи д̣̇вийхи самаабаж̇ж̇ид̇аб̣б̣абхаавам̣. д̣̇угкасмаад̇и сагалаваддад̣̇угкад̇о. сан̃ж̇аг̇гхад̇ийд̇и хасид̇агат̇ам̣ гат̇зд̇и. сам̣гийл̣ад̇ийд̇и гзл̣им̣ гарод̇и. сам̣гзл̣ааяад̇ийд̇и махаахасид̇ам̣ хасад̇и. жагкунаа жагкунд̇и ад̇д̇ано жагкунаа д̇ассаа жагкум̣ бадивиж̇жхид̇ваа убаниж̇жхааяад̇и. д̇ирогуддам̣ ваа д̇иробаагаарам̣ ваад̇и барагуддз ваа барабаагаарз ваа. д̣̇звод̇и зго д̣̇зварааж̇аа. д̣̇зван̃н̃ад̇арод̇и ан̃н̃ад̇аро д̣̇звабуд̇д̇о. ануд̇д̇арам̣ саммаасамб̣од̇хинд̇и арахад̇д̇ан̃жзва саб̣б̣ан̃н̃уд̇ан̃н̃аан̣ан̃жа.
50. Sattame upasaṅkamīti bhuttapātarāso dāsakammakaraparivuto upasaṅkami. Bhavampinoti bhavampi nu. Brahmacārī paṭijānātīti ‘‘ahaṃ brahmacārī’’ti evaṃ brahmacariyavāsaṃ paṭijānātīti pucchati. Evaṃ kirassa ahosi – ‘‘brāhmaṇasamaye vedaṃ uggaṇhantā aṭṭhacattālīsa vassāni brahmacariyaṃ caranti. Samaṇo pana gotamo agāraṃ ajjhāvasanto tīsu pāsādesu tividhanāṭakaratiyā abhirami, idāni kiṃ nu kho vakkhatī’’ti imamatthaṃ sandhāyevaṃ pucchati. Tato bhagavā mantena kaṇhasappaṃ gaṇhanto viya amittaṃ gīvāya pādena akkamanto viya attano saṃkilesakāle chabbassāni padhānacariyāya rajjasukhaṃ vā pāsādesu nāṭakasampattiṃ vā ārabbha vitakkamattassāpi anuppannabhāvaṃ sandhāya sīhanādaṃ nadanto yañhi taṃ brāhmaṇātiādimāha. Tattha dvayaṃdvayasamāpattinti dvīhi dvīhi samāpajjitabbabhāvaṃ. Dukkhasmāti sakalavaṭṭadukkhato. Sañjagghatīti hasitakathaṃ katheti. Saṃkīḷatīti keḷiṃ karoti. Saṃkeḷāyatīti mahāhasitaṃ hasati. Cakkhunā cakkhunti attano cakkhunā tassā cakkhuṃ paṭivijjhitvā upanijjhāyati. Tirokuṭṭaṃ vā tiropākāraṃ vāti parakuṭṭe vā parapākāre vā. Devoti eko devarājā. Devaññataroti aññataro devaputto. Anuttaraṃ sammāsambodhinti arahattañceva sabbaññutaññāṇañca.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / ан̇г̇уд̇д̇аранигааяа • Aṅguttaranikāya / 7. мзт̇унасуд̇д̇ам̣ • 7. Methunasuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / ан̇г̇уд̇д̇аранигааяа (дийгаа) • Aṅguttaranikāya (ṭīkā) / 7-8. мзт̇унасуд̇д̇аад̣̇иван̣н̣анаа • 7-8. Methunasuttādivaṇṇanā
