| Library / Tipiṭaka / திபிடக • Tipiṭaka / சூளனித்³தே³ஸ-அட்ட²கதா² • Cūḷaniddesa-aṭṭhakathā |
4. மெத்தகூ³மாணவஸுத்தனித்³தே³ஸவண்ணனா
4. Mettagūmāṇavasuttaniddesavaṇṇanā
18. சதுத்தே² மெத்தகூ³ஸுத்தே – மஞ்ஞாமி தங் வேத³கூ³ பா⁴விதத்தந்தி ‘‘அயங் வேத³கூ³’’தி ச ‘‘பா⁴விதத்தோ’’தி ச ஏவங் தங் மஞ்ஞாமி.
18. Catutthe mettagūsutte – maññāmi taṃ vedagū bhāvitattanti ‘‘ayaṃ vedagū’’ti ca ‘‘bhāvitatto’’ti ca evaṃ taṃ maññāmi.
அபரித்தோதி ந அப்போ. மஹந்தோதி ந கு²த்³த³கோ. க³ம்பீ⁴ரோதி ந உத்தானோ. அப்பமெய்யோதி மினிதுங் ந ஸக்குணெய்யோ. து³ப்பரியோகா³ள்ஹோதி அவகா³ஹிதுங் ஓதரிதுங் து³க்கோ². ப³ஹுரதனோ ஸாக³ரூபமோதி ப³ஹூனங் த⁴ம்மரதனானங் ஆகரத்தா அனேகவித⁴ரதனஸம்பன்னோ மஹாஸமுத்³தோ³ விய ப³ஹுரதனோ ஸாக³ரஸதி³ஸோ.
Aparittoti na appo. Mahantoti na khuddako. Gambhīroti na uttāno. Appameyyoti minituṃ na sakkuṇeyyo. Duppariyogāḷhoti avagāhituṃ otarituṃ dukkho. Bahuratano sāgarūpamoti bahūnaṃ dhammaratanānaṃ ākarattā anekavidharatanasampanno mahāsamuddo viya bahuratano sāgarasadiso.
ந மங்கு ஹோதீதி ந விகுணிதமுகோ² ஹோதி. அப்பதிட்டி²தசித்தோதி தோ³ஸவஸேன ந க⁴னீபூ⁴தசித்தோ. அலீனமனஸோதி ந ஸங்குசிதசித்தோ. அப்³யாபன்னசேதஸோதி ந பூதிசித்தோ.
Na maṅku hotīti na vikuṇitamukho hoti. Appatiṭṭhitacittoti dosavasena na ghanībhūtacitto. Alīnamanasoti na saṅkucitacitto. Abyāpannacetasoti na pūticitto.
தி³ட்டே² தி³ட்ட²மத்தோதி சக்கு²விஸயே ரூபாரம்மணே தி³ட்ட²மத்தோயேவ தங் ஆரம்மணங் ப⁴விஸ்ஸதி, கத்தா வா காரேதா வா நத்தி². யங் சக்கு²னா தி³ட்ட²ங் வண்ணாயதனமேவ. ஸுதாதீ³ஸுபி ஏஸேவ நயோ. அபி ச தி³ட்டே²தி த³ஸ்ஸனயோகே³ன வண்ணாயதனங், ஸவனயோகே³ன ஸத்³தா³யதனங், முதயோகே³ன கா⁴னஜிவ்ஹாகாயாயதனானி த³ஸ்ஸேதி. கா⁴னஸ்ஸ க³ந்தா⁴யதனங், ஜிவ்ஹாய ரஸாயதனங், காயஸ்ஸ பத²வீ தேஜோ வாயூதி பொ²ட்ட²ப்³பா³யதனங், விஞ்ஞாதயோகே³ன த⁴ம்மாயதனங் த³ஸ்ஸேதி. தி³ட்டே² அனூபயோதி சக்கு²விஞ்ஞாணேன தி³ட்டே² ராகூ³பயவிரஹிதோ. அனபாயோதி கோத⁴விரஹிதோ அப்படிகோ⁴ . அனிஸ்ஸிதோதி தண்ஹாய அனல்லீனோ. அப்படிப³த்³தோ⁴தி மானேன ந ப³த்³தோ⁴. விப்பமுத்தோதி ஸப்³பா³ரம்மணதோ முத்தோ. விஸஞ்ஞுத்தோதி கிலேஸேஹி வியுத்தோ ஹுத்வா டி²தோ.
Diṭṭhe diṭṭhamattoti cakkhuvisaye rūpārammaṇe diṭṭhamattoyeva taṃ ārammaṇaṃ bhavissati, kattā vā kāretā vā natthi. Yaṃ cakkhunā diṭṭhaṃ vaṇṇāyatanameva. Sutādīsupi eseva nayo. Api ca diṭṭheti dassanayogena vaṇṇāyatanaṃ, savanayogena saddāyatanaṃ, mutayogena ghānajivhākāyāyatanāni dasseti. Ghānassa gandhāyatanaṃ, jivhāya rasāyatanaṃ, kāyassa pathavī tejo vāyūti phoṭṭhabbāyatanaṃ, viññātayogena dhammāyatanaṃ dasseti. Diṭṭhe anūpayoti cakkhuviññāṇena diṭṭhe rāgūpayavirahito. Anapāyoti kodhavirahito appaṭigho . Anissitoti taṇhāya anallīno. Appaṭibaddhoti mānena na baddho. Vippamuttoti sabbārammaṇato mutto. Visaññuttoti kilesehi viyutto hutvā ṭhito.
ஸங்விஜ்ஜதி ப⁴க³வதோ சக்கூ²தி பு³த்³த⁴ஸ்ஸ ப⁴க³வதோ பகதிமங்ஸசக்கு² உபலப்³ப⁴தி. பஸ்ஸதீதி த³க்க²தி ஓலோகேதி. சக்கு²னா ரூபந்தி சக்கு²விஞ்ஞாணேன ரூபாரம்மணங். ச²ந்த³ராகோ³தி தண்ஹாச²ந்தோ³.
Saṃvijjati bhagavato cakkhūti buddhassa bhagavato pakatimaṃsacakkhu upalabbhati. Passatīti dakkhati oloketi. Cakkhunā rūpanti cakkhuviññāṇena rūpārammaṇaṃ. Chandarāgoti taṇhāchando.
த³ந்தங் நயந்தி ஸமிதிந்தி உய்யானகீளாமண்ட³லாதீ³ஸு ஹி மஹாஜனமஜ்ஜ²ங் க³ச்ச²ந்தா த³ந்தமேவ கோ³ணங் வா த³ந்தங் அஸ்ஸாஜானீயங் வா யானே யோஜெத்வா நயந்தி. ராஜாதி ததா²ரூபானேவ டா²னானி க³ச்ச²ந்தோ ராஜாபி த³ந்தமேவ அபி⁴ருஹதி. மனுஸ்ஸேஸூதி மனுஸ்ஸேஸுபி சதூஹி அரியமக்³கே³ஹி த³ந்தோ நிப்³பி³ஸேவனோவ ஸெட்டோ². யோதிவாக்யந்தி ஏவரூபங் அதிக்கம்மவசனங் புனப்புனங் வுச்சமானம்பி திதிக்க²தி நப்பதிப்ப²ரதி ந விஹஞ்ஞதி, ஏவரூபோ த³ந்தோ ஸெட்டோ²தி அத்தோ².
Dantaṃ nayanti samitinti uyyānakīḷāmaṇḍalādīsu hi mahājanamajjhaṃ gacchantā dantameva goṇaṃ vā dantaṃ assājānīyaṃ vā yāne yojetvā nayanti. Rājāti tathārūpāneva ṭhānāni gacchanto rājāpi dantameva abhiruhati. Manussesūti manussesupi catūhi ariyamaggehi danto nibbisevanova seṭṭho. Yotivākyanti evarūpaṃ atikkammavacanaṃ punappunaṃ vuccamānampi titikkhati nappatippharati na vihaññati, evarūpo danto seṭṭhoti attho.
அஸ்ஸதராதி வளவாய க³த்³ரபே⁴ன ஜாதா. ஆஜானீயாதி யங் அஸ்ஸத³ம்மஸாரதி² காரணங் காரேதி, தஸ்ஸ கி²ப்பங் ஜானநஸமத்தா². ஸிந்த⁴வாதி ஸிந்த⁴வரட்டே² ஜாதா அஸ்ஸா. மஹானாகா³தி குஞ்ஜரஸங்கா²தா மஹாஹத்தி²னோ. அத்தத³ந்தோதி ஏதே அஸ்ஸதரா வா ஸிந்த⁴வா வா குஞ்ஜரா வா த³ந்தாவ, ந அத³ந்தா. யோ பன சதுமக்³க³ஸங்கா²தேன அத்தனோ த³ந்ததாய அத்தத³ந்தோ நிப்³பி³ஸேவனோ, அயங் ததோபி வரங், ஸப்³பே³ஹிபி ஏதேஹி உத்தரிதரோதி அத்தோ².
Assatarāti vaḷavāya gadrabhena jātā. Ājānīyāti yaṃ assadammasārathi kāraṇaṃ kāreti, tassa khippaṃ jānanasamatthā. Sindhavāti sindhavaraṭṭhe jātā assā. Mahānāgāti kuñjarasaṅkhātā mahāhatthino. Attadantoti ete assatarā vā sindhavā vā kuñjarā vā dantāva, na adantā. Yo pana catumaggasaṅkhātena attano dantatāya attadanto nibbisevano, ayaṃ tatopi varaṃ, sabbehipi etehi uttaritaroti attho.
ந ஹி ஏதேஹி யானேஹீதி யானி ஏதானி ஹத்தி²யானாதீ³னி உத்தமயானானி, ஏதேஹி யானேஹி கோசி புக்³க³லோ ஸுபினந்தேனபி அக³தபுப்³ப³த்தா ‘‘அக³த’’ந்தி ஸங்கா²தங் நிப்³பா³னதி³ஸங் ததா² ந க³ச்செ²ய்ய. யதா² புப்³ப³பா⁴கே³ இந்த்³ரியத³மேன த³ந்தேன, அபரபா⁴கே³ அரியமக்³க³பா⁴வனாய ஸுத³ந்தேன த³ந்தோ நிப்³பி³ஸேவனோ ஸப்பஞ்ஞோ புக்³க³லோ தங் அக³தபுப்³ப³ங் தி³ஸங் க³ச்ச²தி, த³ந்தபூ⁴மிங் பாபுணாதி, தஸ்மா அத்தத³மனமேவ வரதரந்தி அத்தோ² (த⁴॰ ப॰ அட்ட²॰ 2.322; மஹானி॰ அட்ட²॰ 90).
Na hi etehi yānehīti yāni etāni hatthiyānādīni uttamayānāni, etehi yānehi koci puggalo supinantenapi agatapubbattā ‘‘agata’’nti saṅkhātaṃ nibbānadisaṃ tathā na gaccheyya. Yathā pubbabhāge indriyadamena dantena, aparabhāge ariyamaggabhāvanāya sudantena danto nibbisevano sappañño puggalo taṃ agatapubbaṃ disaṃ gacchati, dantabhūmiṃ pāpuṇāti, tasmā attadamanameva varataranti attho (dha. pa. aṭṭha. 2.322; mahāni. aṭṭha. 90).
விதா⁴ஸு ந விகம்பந்தீதி நவவித⁴மானகொட்டா²ஸேஸு ந சலந்தி ந வேதெ⁴ந்தி. விப்பமுத்தா புனப்³ப⁴வாதி கம்மகிலேஸதோ ஸமுச்சே²த³விமுத்தியா ஸுட்டு² முத்தா. த³ந்தபூ⁴மிங் அனுப்பத்தாதி அரஹத்தப²லங் பாபுணித்வா டி²தா. தே லோகே விஜிதாவினோதி தே வுத்தப்பகாரா கீ²ணாஸவா ஸத்தலோகே விஜிதவிஜயா நாம (ஸங்॰ நி॰ அட்ட²॰ 2.3.76; மஹானி॰ அட்ட²॰ 90).
Vidhāsu na vikampantīti navavidhamānakoṭṭhāsesu na calanti na vedhenti. Vippamuttā punabbhavāti kammakilesato samucchedavimuttiyā suṭṭhu muttā. Dantabhūmiṃ anuppattāti arahattaphalaṃ pāpuṇitvā ṭhitā. Te loke vijitāvinoti te vuttappakārā khīṇāsavā sattaloke vijitavijayā nāma (saṃ. ni. aṭṭha. 2.3.76; mahāni. aṭṭha. 90).
யஸ்ஸிந்த்³ரியானி பா⁴விதானீதி யஸ்ஸ கீ²ணாஸவஸ்ஸ ஸத்³தா⁴தி³பஞ்சிந்த்³ரியானி அரஹத்தப²லங் பாபெத்வா வட்³டி⁴தானி. அஜ்ஜ²த்தஞ்ச ப³ஹித்³தா⁴ சாதி சக்கா²தி³அஜ்ஜ²த்தாயதனானி ச ரூபாதி³ப³ஹித்³தா⁴யதனானி ச நிப்³பி³ஸேவனானி கதானி. ஸப்³ப³லோகேதி ஸகலதேதா⁴துகே லோகே ச. நிப்³பி³ஜ்ஜ² இமங் பரஞ்ச லோகந்தி இமஞ்ச அத்தபா⁴வங் பரலோகே ச அத்தபா⁴வங் அதிக்கமித்வா டி²தோ கீ²ணாஸவோ . காலங் கங்க²தி பா⁴விதோ ஸ த³ந்தோதி ஸோ கீ²ணாஸவோ சக்கா²தி³தோ த³ந்தோ வட்³டி⁴தசித்தோ மரணகாலங் பத்தே²தி (ஸு॰ நி॰ அட்ட²॰ 2.522; மஹானி॰ அட்ட²॰ 90).
Yassindriyāni bhāvitānīti yassa khīṇāsavassa saddhādipañcindriyāni arahattaphalaṃ pāpetvā vaḍḍhitāni. Ajjhattañca bahiddhā cāti cakkhādiajjhattāyatanāni ca rūpādibahiddhāyatanāni ca nibbisevanāni katāni. Sabbaloketi sakalatedhātuke loke ca. Nibbijjha imaṃ parañca lokanti imañca attabhāvaṃ paraloke ca attabhāvaṃ atikkamitvā ṭhito khīṇāsavo . Kālaṃ kaṅkhati bhāvito sa dantoti so khīṇāsavo cakkhādito danto vaḍḍhitacitto maraṇakālaṃ pattheti (su. ni. aṭṭha. 2.522; mahāni. aṭṭha. 90).
யேஸங் த⁴ம்மானங் ஆதி³தோ ஸமுதா³க³மனங் பஞ்ஞாயதீதி யேஸங் க²ந்தா⁴தி³த⁴ம்மானங் உப்பத்தி பஞ்ஞாயதி. அத்த²ங்க³மதோ நிரோதோ⁴தி அத்த²ங்க³மனவஸேன தேஸங்யேவ அபா⁴வோ பஞ்ஞாயதி. கம்மஸன்னிஸ்ஸிதோ விபாகோதி குஸலாகுஸலகம்மனிஸ்ஸிதோ விபாகோ கம்மங் அமுஞ்சித்வா பவத்தனதோ விபாகோபி கம்மஸன்னிஸ்ஸிதோவ நாம. நாமஸன்னிஸ்ஸிதங் ரூபந்தி ஸப்³ப³ரூபங் நாமங் க³ஹெத்வா பவத்தனதோ நாமஸன்னிஸ்ஸிதங் நாம ஜாதங். ஜாதியா அனுக³தந்தி ஸப்³ப³ங் கம்மாதி³கங் ஜாதியா அனுபவிட்ட²ங். ஜராய அனுஸடந்தி ஜராய பத்த²டங். ப்³யாதி⁴னா அபி⁴பூ⁴தந்தி ப்³யாதி⁴து³க்கே²ன அபி⁴மத்³தி³தங். மரணேன அப்³பா⁴ஹதந்தி மச்சுனா அபி⁴ஹடங் பஹடங். அதாணந்தி புத்தாதீ³ஹிபி தாயனஸ்ஸ அபா⁴வதோ அதாயனங் அனாரக்க²ங் அலப்³ப⁴ணெய்யங் கே²மங் வா. அலேணந்தி அல்லீயிதுங் நிஸ்ஸயிதுங் அனரஹங், அல்லீனானம்பி ந லேணகிச்சகரணங். அஸரணந்தி நிஸ்ஸிதானங் ந ப⁴யஹாரகங், ந ப⁴யவினாஸகங். அஸரணீபூ⁴தந்தி புரே உப்பத்தியா அத்தனோ அபா⁴வேனேவ அஸரணங், உப்பத்திஸமகாலமேவ அஸரணபூ⁴தந்தி அத்தோ².
Yesaṃ dhammānaṃ ādito samudāgamanaṃ paññāyatīti yesaṃ khandhādidhammānaṃ uppatti paññāyati. Atthaṅgamato nirodhoti atthaṅgamanavasena tesaṃyeva abhāvo paññāyati. Kammasannissito vipākoti kusalākusalakammanissito vipāko kammaṃ amuñcitvā pavattanato vipākopi kammasannissitova nāma. Nāmasannissitaṃ rūpanti sabbarūpaṃ nāmaṃ gahetvā pavattanato nāmasannissitaṃ nāma jātaṃ. Jātiyā anugatanti sabbaṃ kammādikaṃ jātiyā anupaviṭṭhaṃ. Jarāya anusaṭanti jarāya patthaṭaṃ. Byādhinā abhibhūtanti byādhidukkhena abhimadditaṃ. Maraṇena abbhāhatanti maccunā abhihaṭaṃ pahaṭaṃ. Atāṇanti puttādīhipi tāyanassa abhāvato atāyanaṃ anārakkhaṃ alabbhaṇeyyaṃ khemaṃ vā. Aleṇanti allīyituṃ nissayituṃ anarahaṃ, allīnānampi na leṇakiccakaraṇaṃ. Asaraṇanti nissitānaṃ na bhayahārakaṃ, na bhayavināsakaṃ. Asaraṇībhūtanti pure uppattiyā attano abhāveneva asaraṇaṃ, uppattisamakālameva asaraṇabhūtanti attho.
19. அபுச்ச²ஸீதி எத்த² அ-இதி பத³பூரணமத்தே நிபாதோ, புச்ச²ஸித்வேவ அத்தோ². பவக்கா²மி யதா² பஜானந்தி யதா² பஜானந்தோ ஆசிக்க²தி, ஏவங் ஆசிக்கி²ஸ்ஸாமி. உபதி⁴னிதா³னா பப⁴வந்தி து³க்கா²தி தண்ஹாதி³உபதி⁴னிதா³னா ஜாதிஆதி³து³க்க²விஸேஸா பப⁴வந்தி.
19.Apucchasīti ettha a-iti padapūraṇamatte nipāto, pucchasitveva attho. Pavakkhāmi yathā pajānanti yathā pajānanto ācikkhati, evaṃ ācikkhissāmi. Upadhinidānā pabhavanti dukkhāti taṇhādiupadhinidānā jātiādidukkhavisesā pabhavanti.
தண்ஹூபதீ⁴தி தண்ஹா ஏவ தண்ஹூபதி⁴. ஸஸ்ஸதுச்சே²த³தி³ட்டி² ஏவ தி³ட்டூ²பதி⁴. ராகா³தி³கிலேஸா ஏவ கிலேஸூபதி⁴. புஞ்ஞாதி³கம்மானி ஏவ கம்மூபதி⁴. திவித⁴து³ச்சரிதானியேவ து³ச்சரிதூபதி⁴. கப³ளீகாராத³யோ ஆஹாரா ஏவ ஆஹாரூபதி⁴. தோ³ஸபடிகோ⁴ ஏவ படிகூ⁴பதி⁴. கம்மஸமுட்டா²னா கம்மேனேவ க³ஹிதா பத²வாத³யோ சதஸ்ஸோ தா⁴துயோவ சதஸ்ஸோ உபாதி³ன்னதா⁴துயோ உபதீ⁴. சக்கா²தி³ச²அஜ்ஜ²த்திகானி ஆயதனானி ஏவ ச² அஜ்ஜ²த்திகானி ஆயதனானி உபதீ⁴. சக்கு²விஞ்ஞாணாதி³ச²விஞ்ஞாணகாயாவ ச² விஞ்ஞாணகாயா உபதீ⁴. ஸப்³ப³ம்பி து³க்க²ங் து³க்க²மனட்டே²னாதி ஸப்³ப³தேபூ⁴மகங் து³க்க²ங் து³ஸ்ஸஹனட்டே²ன உபதி⁴.
Taṇhūpadhīti taṇhā eva taṇhūpadhi. Sassatucchedadiṭṭhi eva diṭṭhūpadhi. Rāgādikilesā eva kilesūpadhi. Puññādikammāni eva kammūpadhi. Tividhaduccaritāniyeva duccaritūpadhi. Kabaḷīkārādayo āhārā eva āhārūpadhi. Dosapaṭigho eva paṭighūpadhi. Kammasamuṭṭhānā kammeneva gahitā pathavādayo catasso dhātuyova catasso upādinnadhātuyo upadhī. Cakkhādichaajjhattikāni āyatanāni eva cha ajjhattikāni āyatanāni upadhī. Cakkhuviññāṇādichaviññāṇakāyāva cha viññāṇakāyā upadhī. Sabbampi dukkhaṃ dukkhamanaṭṭhenāti sabbatebhūmakaṃ dukkhaṃ dussahanaṭṭhena upadhi.
20. ஏவங் உபதி⁴னிதா³னதோ பப⁴வந்தேஸு து³க்கே²ஸு – யோ வே அவித்³வாதி கா³தா². தத்த² பஜானந்தி ஸங்கா²ரே அனிச்சாதி³வஸேன ஜானந்தோ. து³க்க²ஸ்ஸ ஜாதிப்பப⁴வானுபஸ்ஸீதி வட்டது³க்க²ஸ்ஸ ஜாதிகாரணங் ‘‘உபதீ⁴’’தி அனுபஸ்ஸந்தோ. இமிஸ்ஸா கா³தா²ய நித்³தே³ஸே வத்தப்³ப³ங் நத்தி².
20. Evaṃ upadhinidānato pabhavantesu dukkhesu – yo ve avidvāti gāthā. Tattha pajānanti saṅkhāre aniccādivasena jānanto. Dukkhassa jātippabhavānupassīti vaṭṭadukkhassa jātikāraṇaṃ ‘‘upadhī’’ti anupassanto. Imissā gāthāya niddese vattabbaṃ natthi.
21. ஸோகபரித்³த³வஞ்சாதி ஸோகஞ்ச பரிதே³வஞ்ச. ததா² ஹி தே விதி³தோ ஏஸ த⁴ம்மோதி யதா² யதா² ஸத்தா ஜானந்தி, ததா² ததா² ஞாபனவஸேன விதி³தோ ஏஸ தயா த⁴ம்மோதி.
21.Sokapariddavañcāti sokañca paridevañca. Tathā hi te vidito esa dhammoti yathā yathā sattā jānanti, tathā tathā ñāpanavasena vidito esa tayā dhammoti.
தத்த² தரந்தீதி பட²மமக்³கே³ன தி³ட்டோ²க⁴ங் தரந்தி. உத்தரந்தீதி து³தியமக்³கே³ன காமோக⁴ங் தனுகரணவஸேன உக்³க³ந்த்வா தரந்தி. பதரந்தீதி தமேவ நிரவஸேஸப்பஹானவஸேன ததியமக்³கே³ன விஸேஸேன தரந்தி. ஸமதிக்கமந்தீதி ப⁴வோக⁴அவிஜ்ஜோக⁴ப்பஹானவஸேன சதுத்த²மக்³கே³ன ஸம்மா அதிக்கமந்தி. வீதிவத்தந்தீதி ப²லங் பாபுணித்வா திட்ட²ந்தி.
Tattha tarantīti paṭhamamaggena diṭṭhoghaṃ taranti. Uttarantīti dutiyamaggena kāmoghaṃ tanukaraṇavasena uggantvā taranti. Patarantīti tameva niravasesappahānavasena tatiyamaggena visesena taranti. Samatikkamantīti bhavoghaavijjoghappahānavasena catutthamaggena sammā atikkamanti. Vītivattantīti phalaṃ pāpuṇitvā tiṭṭhanti.
22. கித்தயிஸ்ஸாமி தே த⁴ம்மந்தி நிப்³பா³னத⁴ம்மங் நிப்³பா³னகா³மினிபடிபதா³த⁴ம்மஞ்ச தே தே³ஸயிஸ்ஸாமி. தி³ட்டே² த⁴ம்மேதி தி³ட்டே²வ து³க்கா²தி³த⁴ம்மே, இமஸ்மிங்யேவ வா அத்தபா⁴வே. அனீதிஹந்தி அத்தபச்சக்க²ங். யங் விதி³த்வாதி யங் த⁴ம்மங் ‘‘ஸப்³பே³ ஸங்கா²ரா அனிச்சா’’திஆதி³னா (த⁴॰ ப॰ 277; தே²ரகா³॰ 676; கதா²॰ 753) நயேன ஸம்மஸந்தோ விதி³த்வா.
22.Kittayissāmi te dhammanti nibbānadhammaṃ nibbānagāminipaṭipadādhammañca te desayissāmi. Diṭṭhe dhammeti diṭṭheva dukkhādidhamme, imasmiṃyeva vā attabhāve. Anītihanti attapaccakkhaṃ. Yaṃ viditvāti yaṃ dhammaṃ ‘‘sabbe saṅkhārā aniccā’’tiādinā (dha. pa. 277; theragā. 676; kathā. 753) nayena sammasanto viditvā.
தத்த² ஆதி³கல்யாணந்தி ஹித்வாபி அனுத்தரங் விவேகஸுக²ங் த⁴ம்மங் தவ கித்தயிஸ்ஸாமி, தஞ்ச கோ² அப்பங் வா ப³ஹுங் வா கித்தயந்தோ ஆதி³கல்யாணாதி³ப்பகாரமேவ கித்தயிஸ்ஸாமி. ஆதி³ம்ஹி கல்யாணங் ப⁴த்³த³கங் அனவஜ்ஜமேவ கத்வா கித்தயிஸ்ஸாமி . மஜ்ஜே²பி. பரியோஸானேபி ப⁴த்³த³கங் அனவஜ்ஜமேவ கத்வா கித்தயிஸ்ஸாமீதி வுத்தங் ஹோதி. யஸ்மிஞ்ஹி ப⁴க³வா ஏககா³த²ம்பி தே³ஸேஸி, ஸா ஸமந்தப⁴த்³த³கத்தா த⁴ம்மஸ்ஸ பட²மபாதே³ன ஆதி³கல்யாணா, து³தியததியபாதே³ஹி மஜ்ஜே²கல்யாணா, பச்சி²மபாதே³ன பரியோஸானகல்யாணா. ஏகானுஸந்தி⁴கங் ஸுத்தங் நிதா³னேன ஆதி³கல்யாணங், நிக³மனேன பரியோஸானகல்யாணங், ஸேஸேன மஜ்ஜே²கல்யாணங். நானானுஸந்தி⁴கங் ஸுத்தங் பட²மானுஸந்தி⁴னா ஆதி³கல்யாணங், பச்சி²மேன பரியோஸானகல்யாணங், ஸேஸேஹி மஜ்ஜே²கல்யாணங்.
Tattha ādikalyāṇanti hitvāpi anuttaraṃ vivekasukhaṃ dhammaṃ tava kittayissāmi, tañca kho appaṃ vā bahuṃ vā kittayanto ādikalyāṇādippakārameva kittayissāmi. Ādimhi kalyāṇaṃ bhaddakaṃ anavajjameva katvā kittayissāmi . Majjhepi. Pariyosānepi bhaddakaṃ anavajjameva katvā kittayissāmīti vuttaṃ hoti. Yasmiñhi bhagavā ekagāthampi desesi, sā samantabhaddakattā dhammassa paṭhamapādena ādikalyāṇā, dutiyatatiyapādehi majjhekalyāṇā, pacchimapādena pariyosānakalyāṇā. Ekānusandhikaṃ suttaṃ nidānena ādikalyāṇaṃ, nigamanena pariyosānakalyāṇaṃ, sesena majjhekalyāṇaṃ. Nānānusandhikaṃ suttaṃ paṭhamānusandhinā ādikalyāṇaṃ, pacchimena pariyosānakalyāṇaṃ, sesehi majjhekalyāṇaṃ.
அபி ச ஸனிதா³னஉப்பத்தித்தா ஆதி³கல்யாணங், வேனெய்யானங் அனுரூபதோ அத்த²ஸ்ஸ அவிபரீததாய ச ஹேதுதா³ஹரணயுத்ததோ ச மஜ்ஜே²கல்யாணங், ஸோதூனங் ஸத்³தா⁴படிலாப⁴ஜனநேன நிக³மனேன ச பரியோஸானகல்யாணங்.
Api ca sanidānauppattittā ādikalyāṇaṃ, veneyyānaṃ anurūpato atthassa aviparītatāya ca hetudāharaṇayuttato ca majjhekalyāṇaṃ, sotūnaṃ saddhāpaṭilābhajananena nigamanena ca pariyosānakalyāṇaṃ.
ஸகலோ ஹி ஸாஸனத⁴ம்மோ அத்தனோ அத்த²பூ⁴தேன ஸீலேன ஆதி³கல்யாணோ, ஸமத²விபஸ்ஸனாமக்³க³ப²லேஹி மஜ்ஜே²கல்யாணோ, நிப்³பா³னேன பரியோஸானகல்யாணோ. ஸீலஸமாதீ⁴ஹி வா ஆதி³கல்யாணோ, விபஸ்ஸனாமக்³கே³ஹி மஜ்ஜே²கல்யாணோ, ப²லனிப்³பா³னேஹி பரியோஸானகல்யாணோ. பு³த்³த⁴ஸுபோ³தி⁴தாய வா ஆதி³கல்யாணோ, த⁴ம்மஸுத⁴ம்மதாய மஜ்ஜே²கல்யாணோ, ஸங்க⁴ஸுப்படிபத்தியா பரியோஸானகல்யாணோ . தங் ஸுத்வா தத²த்தாய படிபன்னேன அதி⁴க³ந்தப்³பா³ய அபி⁴ஸம்போ³தி⁴யா வா ஆதி³கல்யாணோ, பச்சேகபோ³தி⁴யா மஜ்ஜே²கல்யாணோ, ஸாவகபோ³தி⁴யா பரியோஸானகல்யாணோ.
Sakalo hi sāsanadhammo attano atthabhūtena sīlena ādikalyāṇo, samathavipassanāmaggaphalehi majjhekalyāṇo, nibbānena pariyosānakalyāṇo. Sīlasamādhīhi vā ādikalyāṇo, vipassanāmaggehi majjhekalyāṇo, phalanibbānehi pariyosānakalyāṇo. Buddhasubodhitāya vā ādikalyāṇo, dhammasudhammatāya majjhekalyāṇo, saṅghasuppaṭipattiyā pariyosānakalyāṇo . Taṃ sutvā tathattāya paṭipannena adhigantabbāya abhisambodhiyā vā ādikalyāṇo, paccekabodhiyā majjhekalyāṇo, sāvakabodhiyā pariyosānakalyāṇo.
ஸுய்யமானோ சேஸ நீவரணவிக்க²ம்ப⁴னதோ ப⁴வனேனபி கல்யாணமேவ ஆவஹதீதி ஆதி³கல்யாணோ, படிபஜ்ஜியமானோ ஸமத²விபஸ்ஸனாஸுகா²வஹனதோ படிபத்தியாபி கல்யாணமேவ ஆவஹதீதி மஜ்ஜே²கல்யாணோ, ததா²படிபன்னோ (பாரா॰ அட்ட²॰ 1.1) ச படிபத்திப²லே நிட்டி²தே தாதி³பா⁴வாவஹனதோ படிபத்திப²லேனபி கல்யாணமேவ ஆவஹதீதி பரியோஸானகல்யாணோதி.
Suyyamāno cesa nīvaraṇavikkhambhanato bhavanenapi kalyāṇameva āvahatīti ādikalyāṇo, paṭipajjiyamāno samathavipassanāsukhāvahanato paṭipattiyāpi kalyāṇameva āvahatīti majjhekalyāṇo, tathāpaṭipanno (pārā. aṭṭha. 1.1) ca paṭipattiphale niṭṭhite tādibhāvāvahanato paṭipattiphalenapi kalyāṇameva āvahatīti pariyosānakalyāṇoti.
யங் பனேஸ ப⁴க³வா த⁴ம்மங் தே³ஸெந்தோ ஸாஸனப்³ரஹ்மசரியங் மக்³க³ப்³ரஹ்மசரியஞ்ச பகாஸேதி, நானானயேஹி தீ³பேதி. தங் யதா²னுரூபங் அத்த²ஸம்பத்தியா ஸாத்த²ங். ப்³யஞ்ஜனஸம்பத்தியா ஸப்³யஞ்ஜனங். ஸங்காஸனபகாஸனவிவரணவிப⁴ஜனஉத்தானீகரணபஞ்ஞத்திஅத்த²பத³ஸமாயோக³தோ ஸாத்த²ங். அக்க²ரபத³ப்³யஞ்ஜனாகாரனிருத்தினித்³தே³ஸஸம்பத்தியா ஸப்³யஞ்ஜனங். அத்த²க³ம்பீ⁴ரதாபடிவேத⁴க³ம்பீ⁴ரதாஹி ஸாத்த²ங் . த⁴ம்மக³ம்பீ⁴ரதாதே³ஸனாக³ம்பீ⁴ரதாஹி ஸப்³யஞ்ஜனங். அத்த²படிபா⁴னபடிஸம்பி⁴தா³விஸயதோ ஸாத்த²ங். த⁴ம்மனிருத்திபடிஸம்பி⁴தா³விஸயதோ ஸப்³யஞ்ஜனங். பண்டி³தவேத³னீயதோ ஸரிக்க²கஜனப்பஸாத³கந்தி ஸாத்த²ங். ஸத்³தெ⁴ய்யதோ லோகியஜனப்பஸாத³கந்தி ஸப்³யஞ்ஜனங். க³ம்பீ⁴ராதி⁴ப்பாயதோ ஸாத்த²ங். உத்தானபத³தோ ஸப்³யஞ்ஜனங். உபனேதப்³ப³ஸ்ஸ அபா⁴வதோ ஸகலபரிபுண்ணபா⁴வேன கேவலபரிபுண்ணங். அபனேதப்³ப³ஸ்ஸ அபா⁴வதோ நித்³தோ³ஸபா⁴வேன பரிஸுத்³த⁴ங்.
Yaṃ panesa bhagavā dhammaṃ desento sāsanabrahmacariyaṃ maggabrahmacariyañca pakāseti, nānānayehi dīpeti. Taṃ yathānurūpaṃ atthasampattiyā sātthaṃ. Byañjanasampattiyā sabyañjanaṃ. Saṅkāsanapakāsanavivaraṇavibhajanauttānīkaraṇapaññattiatthapadasamāyogato sātthaṃ. Akkharapadabyañjanākāraniruttiniddesasampattiyā sabyañjanaṃ. Atthagambhīratāpaṭivedhagambhīratāhi sātthaṃ. Dhammagambhīratādesanāgambhīratāhi sabyañjanaṃ. Atthapaṭibhānapaṭisambhidāvisayato sātthaṃ. Dhammaniruttipaṭisambhidāvisayato sabyañjanaṃ. Paṇḍitavedanīyato sarikkhakajanappasādakanti sātthaṃ. Saddheyyato lokiyajanappasādakanti sabyañjanaṃ. Gambhīrādhippāyato sātthaṃ. Uttānapadato sabyañjanaṃ. Upanetabbassa abhāvato sakalaparipuṇṇabhāvena kevalaparipuṇṇaṃ. Apanetabbassa abhāvato niddosabhāvena parisuddhaṃ.
அபி ச – படிபத்தியா அதி⁴க³மப்³யத்திதோ ஸாத்த²ங். பரியத்தியா ஆக³மப்³யத்திதோ ஸப்³யஞ்ஜனங். ஸீலாதி³பஞ்சத⁴ம்மக்க²ந்த⁴யுத்ததோ கேவலபரிபுண்ணங். நிருபக்கிலேஸதோ நித்த²ரணத்தா²ய பவத்திதோ லோகாமிஸனிரபெக்க²தோ ச பரிஸுத்³த⁴ங். ஸிக்க²த்தயபரிக்³க³ஹிதத்தா ப்³ரஹ்மபூ⁴தேஹி ஸெட்டே²ஹி சரிதப்³ப³தோ, தேஸஞ்ச சரியபா⁴வதோ ப்³ரஹ்மசரியங் (பாரா॰ அட்ட²॰ 1.1).
Api ca – paṭipattiyā adhigamabyattito sātthaṃ. Pariyattiyā āgamabyattito sabyañjanaṃ. Sīlādipañcadhammakkhandhayuttato kevalaparipuṇṇaṃ. Nirupakkilesato nittharaṇatthāya pavattito lokāmisanirapekkhato ca parisuddhaṃ. Sikkhattayapariggahitattā brahmabhūtehi seṭṭhehi caritabbato, tesañca cariyabhāvato brahmacariyaṃ (pārā. aṭṭha. 1.1).
ஏவங் பரியத்தித⁴ம்மங் த³ஸ்ஸெத்வா இதா³னி லோகுத்தரத⁴ம்மங் த³ஸ்ஸேதுங் ‘‘சத்தாரோ ஸதிபட்டா²னே’’தி ஆஹ. ஸத்ததிங்ஸபோ³தி⁴பக்கி²யத⁴ம்மே த³ஸ்ஸெத்வா நிப்³ப³த்திதலோகுத்தரங் த³ஸ்ஸேதுங் ‘‘நிப்³பா³னஞ்சா’’தி ஆஹ. நிப்³பா³னகா³மினிஞ்ச படிபத³ந்தி புப்³ப³பா⁴க³ஸீலஸமாதி⁴விபஸ்ஸனாத⁴ம்மஞ்ச கித்தயிஸ்ஸாமி.
Evaṃ pariyattidhammaṃ dassetvā idāni lokuttaradhammaṃ dassetuṃ ‘‘cattāro satipaṭṭhāne’’ti āha. Sattatiṃsabodhipakkhiyadhamme dassetvā nibbattitalokuttaraṃ dassetuṃ ‘‘nibbānañcā’’ti āha. Nibbānagāminiñca paṭipadanti pubbabhāgasīlasamādhivipassanādhammañca kittayissāmi.
து³க்கே² தி³ட்டே²தி து³க்க²ஸச்சே ஸரஸலக்க²ணேன தி³ட்டே² து³க்க²ஸச்சங் பகாஸெஸ்ஸாமி. ஸமுத³யாதீ³ஸுபி ஏஸேவ நயோ.
Dukkhe diṭṭheti dukkhasacce sarasalakkhaṇena diṭṭhe dukkhasaccaṃ pakāsessāmi. Samudayādīsupi eseva nayo.
23. தஞ்சாஹங் அபி⁴னந்தா³மீதி தங் வுத்தப்பகாரத⁴ம்மஜோதகங் தவ வசனங் அஹங் பத்த²யாமி. த⁴ம்மமுத்தமந்தி தஞ்ச த⁴ம்மமுத்தமங் அபி⁴னந்தா³மி.
23.Tañcāhaṃabhinandāmīti taṃ vuttappakāradhammajotakaṃ tava vacanaṃ ahaṃ patthayāmi. Dhammamuttamanti tañca dhammamuttamaṃ abhinandāmi.
தத்த² மஹதோ தமோகாயஸ்ஸ பதா³லனந்தி மஹதோ அவிஜ்ஜாராஸிஸ்ஸ சே²த³னங். அனிச்சலக்க²ணவஸேன ஏஸீ. து³க்க²லக்க²ணவஸேன க³வேஸீ. அனத்தலக்க²ணவஸேன ஸமந்ததோ பரியேஸீ. மஹதோ விபல்லாஸஸ்ஸ பபே⁴த³னந்தி மஹந்தஸ்ஸ அஸுபே⁴ ஸுப⁴ந்திஆதி³த்³வாத³ஸவித⁴ஸ்ஸ விபல்லாஸஸ்ஸ பே⁴த³னங். மஹதோ தண்ஹாஸல்லஸ்ஸ அப்³ப³ஹனந்தி மஹந்தஸ்ஸ அந்தோதுத³னட்டே²ன தண்ஹாகண்டகஸ்ஸ லுஞ்சனங். தி³ட்டி²ஸங்கா⁴டஸ்ஸ வினிவேட²னந்தி தி³ட்டி²யேவ அப்³பொ³ச்சி²ன்னப்பவத்திதோ ஸங்க⁴டிதட்டே²ன ஸங்கா⁴டோ, தஸ்ஸ தி³ட்டி²ஸங்கா⁴டஸ்ஸ நிவத்தனங். மானத⁴ஜஸ்ஸ பாதனந்தி உஸ்ஸிதட்டே²ன உன்னதிலக்க²ணஸ்ஸ மானத்³த⁴ஜஸ்ஸ பாதனங். அபி⁴ஸங்கா²ரஸ்ஸ வூபஸமந்தி புஞ்ஞாதி³அபி⁴ஸங்கா²ரஸ்ஸ உபஸமனங். ஓக⁴ஸ்ஸ நித்த²ரணந்தி வட்டே ஓஸீதா³பனஸ்ஸ காமோகா⁴தி³ஓக⁴ஸ்ஸ நித்த²ரணங் நிக்க²மனங். பா⁴ரஸ்ஸ நிக்கே²பனந்தி ரூபாதி³பஞ்சக்க²ந்த⁴பா⁴ரஸ்ஸ கி²பனங் ச²ட்³ட³னங். ஸங்ஸாரவட்டஸ்ஸ உபச்சே²த³ந்தி க²ந்தா⁴தி³படிபாடிஸங்ஸாரவட்டஸ்ஸ ஹேதுனஸ்ஸனேன உச்சி²ஜ்ஜனங். ஸந்தாபஸ்ஸ நிப்³பா³பனந்தி கிலேஸஸந்தாபஸ்ஸ நிப்³பு³திங். பரிளாஹஸ்ஸ படிபஸ்ஸத்³த⁴ந்தி கிலேஸபரிளாஹஸ்ஸ வூபஸமங் படிபஸ்ஸம்ப⁴னங். த⁴ம்மத⁴ஜஸ்ஸ உஸ்ஸாபனந்தி நவவித⁴லோகுத்தரத⁴ம்மஸ்ஸ உஸ்ஸாபெத்வா ட²பனங். பரமத்த²ங் அமதங் நிப்³பா³னந்தி உத்தமட்டே²ன பரமத்த²ங். நத்தி² ஏதஸ்ஸ மரணஸங்கா²தங் மதந்தி அமதங். கிலேஸவிஸபடிபக்க²த்தா அக³த³ந்திபி அமதங். ஸங்ஸாரது³க்க²படிபக்க²பூ⁴தத்தா நிப்³பு³தந்தி நிப்³பா³னங். நத்தெ²த்த² தண்ஹாஸங்கா²தங் வானந்திபி நிப்³பா³னங்.
Tattha mahato tamokāyassa padālananti mahato avijjārāsissa chedanaṃ. Aniccalakkhaṇavasena esī. Dukkhalakkhaṇavasena gavesī. Anattalakkhaṇavasena samantato pariyesī. Mahato vipallāsassa pabhedananti mahantassa asubhe subhantiādidvādasavidhassa vipallāsassa bhedanaṃ. Mahato taṇhāsallassa abbahananti mahantassa antotudanaṭṭhena taṇhākaṇṭakassa luñcanaṃ. Diṭṭhisaṅghāṭassa viniveṭhananti diṭṭhiyeva abbocchinnappavattito saṅghaṭitaṭṭhena saṅghāṭo, tassa diṭṭhisaṅghāṭassa nivattanaṃ. Mānadhajassa pātananti ussitaṭṭhena unnatilakkhaṇassa mānaddhajassa pātanaṃ. Abhisaṅkhārassa vūpasamanti puññādiabhisaṅkhārassa upasamanaṃ. Oghassa nittharaṇanti vaṭṭe osīdāpanassa kāmoghādioghassa nittharaṇaṃ nikkhamanaṃ. Bhārassa nikkhepananti rūpādipañcakkhandhabhārassa khipanaṃ chaḍḍanaṃ. Saṃsāravaṭṭassa upacchedanti khandhādipaṭipāṭisaṃsāravaṭṭassa hetunassanena ucchijjanaṃ. Santāpassa nibbāpananti kilesasantāpassa nibbutiṃ. Pariḷāhassa paṭipassaddhanti kilesapariḷāhassa vūpasamaṃ paṭipassambhanaṃ. Dhammadhajassa ussāpananti navavidhalokuttaradhammassa ussāpetvā ṭhapanaṃ. Paramatthaṃ amataṃ nibbānanti uttamaṭṭhena paramatthaṃ. Natthi etassa maraṇasaṅkhātaṃ matanti amataṃ. Kilesavisapaṭipakkhattā agadantipi amataṃ. Saṃsāradukkhapaṭipakkhabhūtattā nibbutanti nibbānaṃ. Natthettha taṇhāsaṅkhātaṃ vānantipi nibbānaṃ.
மஹேஸக்கே²ஹி ஸத்தேஹீதி மஹானுபா⁴வேஹி ஸக்காதீ³ஹி ஸத்தேஹி. பரியேஸிதோதி பரியிட்டோ². கஹங் தே³வதே³வோதி தே³வானங் அதிதே³வோ குஹிங். கஹங் நராஸபோ⁴தி உத்தமபுரிஸோ.
Mahesakkhehi sattehīti mahānubhāvehi sakkādīhi sattehi. Pariyesitoti pariyiṭṭho. Kahaṃ devadevoti devānaṃ atidevo kuhiṃ. Kahaṃ narāsabhoti uttamapuriso.
24. உத்³த⁴ங் அதோ⁴ திரியஞ்சாபி மஜ்ஜே²தி எத்த² உத்³த⁴ந்தி அனாக³தத்³தா⁴ வுச்சதி. அதோ⁴தி அதீதத்³தா⁴. திரியஞ்சாபி மஜ்ஜே²தி பச்சுப்பன்னத்³தா⁴. ஏதேஸு நந்தி³ஞ்ச நிவேஸனஞ்ச, பனுஜ்ஜ விஞ்ஞாணந்தி ஏதேஸு உத்³தா⁴தீ³ஸு தண்ஹஞ்ச தி³ட்டி²னிவேஸனஞ்ச அபி⁴ஸங்கா²ரவிஞ்ஞாணஞ்ச பனுதே³ஹி. பனுதி³த்வா ச ப⁴வே ந திட்டே²தி ஏவங் ஸந்தே து³விதே⁴பி ப⁴வே ந திட்டெ²ய்ய. ஏவங் தாவ பனுஜ்ஜஸத்³த³ஸ்ஸ பனுதே³ஹீதி இமஸ்மிங் அத்த²விகப்பே ஸம்ப³ந்தோ⁴. பனுதி³த்வாதி ஏதஸ்மிங் பன அத்த²விகப்பே ப⁴வே ந திட்டே²தி அயமேவ ஸம்ப³ந்தோ⁴. ஏதானி நந்தீ³னிவேஸனவிஞ்ஞாணானி பனுதி³த்வா து³விதே⁴பி ப⁴வே ந திட்டெ²ய்யாதி.
24.Uddhaṃ adho tiriyañcāpi majjheti ettha uddhanti anāgataddhā vuccati. Adhoti atītaddhā. Tiriyañcāpi majjheti paccuppannaddhā. Etesu nandiñca nivesanañca, panujja viññāṇanti etesu uddhādīsu taṇhañca diṭṭhinivesanañca abhisaṅkhāraviññāṇañca panudehi. Panuditvā ca bhave na tiṭṭheti evaṃ sante duvidhepi bhave na tiṭṭheyya. Evaṃ tāva panujjasaddassa panudehīti imasmiṃ atthavikappe sambandho. Panuditvāti etasmiṃ pana atthavikappe bhave na tiṭṭheti ayameva sambandho. Etāni nandīnivesanaviññāṇāni panuditvā duvidhepi bhave na tiṭṭheyyāti.
ஸஹோகாஸவஸேன தே³வலோகோ உத்³த⁴ங். அபாயலோகோ அதோ⁴. மனுஸ்ஸலோகோ மஜ்ஜே². தத்த² குஸலா த⁴ம்மாதி அபாயங் முஞ்சித்வா உபரி படிஸந்தி⁴தா³னதோ குஸலா த⁴ம்மா உத்³த⁴ந்தி வுச்சந்தி. அகுஸலா த⁴ம்மா அபாயேஸு படிஸந்தி⁴தா³னதோ அதோ⁴தி. தது³ப⁴யவிமுத்தத்தா அப்³யாகதா த⁴ம்மா திரியஞ்சாபி மஜ்ஜே²தி வுச்சந்தி. ஸப்³போ³பரிவஸேன அரூபதா⁴து உத்³த⁴ங். ஸப்³ப³அதோ⁴வஸேன காமதா⁴து அதோ⁴. தது³ப⁴யந்தரவஸேன ரூபதா⁴து மஜ்ஜே². காயசித்தாபா³த⁴க²னநவஸேன ஸுகா² வேத³னா உத்³த⁴ங் . து³க்க²மனவஸேன து³க்கா² வேத³னா அதோ⁴. அது³க்க²மஸுகா² வேத³னா மஜ்ஜே². அத்தபா⁴வவஸேன பரிச்சே²த³ங் த³ஸ்ஸெந்தோ ‘‘உத்³த⁴ந்தி உத்³த⁴ங் பாத³தலா’’திஆதி³மாஹ. தத்த² உத்³த⁴ங் பாத³தலாதி பாத³தலதோ உபரி. அதோ⁴ கேஸமத்த²காதி கேஸமத்த²கதோ அதோ⁴. மஜ்ஜே²தி த்³வின்னங் அந்தரங்.
Sahokāsavasena devaloko uddhaṃ. Apāyaloko adho. Manussaloko majjhe. Tattha kusalā dhammāti apāyaṃ muñcitvā upari paṭisandhidānato kusalā dhammā uddhanti vuccanti. Akusalādhammā apāyesu paṭisandhidānato adhoti. Tadubhayavimuttattā abyākatā dhammā tiriyañcāpi majjheti vuccanti. Sabboparivasena arūpadhātu uddhaṃ. Sabbaadhovasena kāmadhātu adho. Tadubhayantaravasena rūpadhātu majjhe. Kāyacittābādhakhananavasena sukhā vedanā uddhaṃ . Dukkhamanavasena dukkhā vedanā adho. Adukkhamasukhā vedanā majjhe. Attabhāvavasena paricchedaṃ dassento ‘‘uddhanti uddhaṃ pādatalā’’tiādimāha. Tattha uddhaṃ pādatalāti pādatalato upari. Adho kesamatthakāti kesamatthakato adho. Majjheti dvinnaṃ antaraṃ.
புஞ்ஞாபி⁴ஸங்கா²ரஸஹக³தங் விஞ்ஞாணந்தி தேரஸவித⁴புஞ்ஞாபி⁴ஸங்கா²ரஸம்பயுத்தங் கம்மவிஞ்ஞாணங். அபுஞ்ஞாபி⁴ஸங்கா²ரஸஹக³தங் விஞ்ஞாணந்தி த்³வாத³ஸவித⁴அபுஞ்ஞாபி⁴ஸங்கா²ரஸம்பயுத்தங் கம்மவிஞ்ஞாணங். ஆனேஞ்ஜாபி⁴ஸங்கா²ரஸஹக³தங் விஞ்ஞாணந்தி சதுப்³பி³த⁴ங் ஆனேஞ்ஜாபி⁴ஸங்கா²ரஸஹக³தங் கம்மவிஞ்ஞாணங். நுஜ்ஜாதி கி²ப. பனுஜ்ஜாதி அதீவ கி²ப. நுதா³தி லுஞ்ச. பனுதா³தி அதீவ லுஞ்ச. பஜஹாதி ச²ட்³டே³ஹி. வினோதே³ஹீதி தூ³ரங் கரோஹி.
Puññābhisaṅkhārasahagataṃviññāṇanti terasavidhapuññābhisaṅkhārasampayuttaṃ kammaviññāṇaṃ. Apuññābhisaṅkhārasahagataṃ viññāṇanti dvādasavidhaapuññābhisaṅkhārasampayuttaṃ kammaviññāṇaṃ. Āneñjābhisaṅkhārasahagataṃ viññāṇanti catubbidhaṃ āneñjābhisaṅkhārasahagataṃ kammaviññāṇaṃ. Nujjāti khipa. Panujjāti atīva khipa. Nudāti luñca. Panudāti atīva luñca. Pajahāti chaḍḍehi. Vinodehīti dūraṃ karohi.
கம்மப⁴வஞ்சாதி புஞ்ஞாபி⁴ஸங்கா²ரசேதனாவ. படிஸந்தி⁴கஞ்ச புனப்³ப⁴வந்தி படிஸந்தி⁴யா ரூபாதி³புனப்³ப⁴வஞ்ச. பஜஹந்தோ பட²மமக்³கே³ன, வினோதெ³ந்தோ து³தியமக்³கே³ன, ப்³யந்தீ கரொந்தோ ததியமக்³கே³ன, அனபா⁴வங் க³மெந்தோ சதுத்த²மக்³கே³ன. கம்மப⁴வே ந திட்டெ²ய்யாதி புஞ்ஞாதி³அபி⁴ஸங்கா²ரே ந திட்டெ²ய்ய.
Kammabhavañcāti puññābhisaṅkhāracetanāva. Paṭisandhikañca punabbhavanti paṭisandhiyā rūpādipunabbhavañca. Pajahanto paṭhamamaggena, vinodento dutiyamaggena, byantī karonto tatiyamaggena, anabhāvaṃ gamento catutthamaggena. Kammabhave na tiṭṭheyyāti puññādiabhisaṅkhāre na tiṭṭheyya.
25. ஏதானி வினோதெ³த்வா ப⁴வே அதிட்ட²ந்தோ ஏஸோ – ஏவங் விஹாரீதி கா³தா². தத்த² இதே⁴வாதி இமஸ்மிங்யேவ ஸாஸனே, இமஸ்மிங்யேவ வா அத்தபா⁴வே. இமிஸ்ஸா கா³தா²ய நித்³தே³ஸோ உத்தானத்தோ²வ.
25. Etāni vinodetvā bhave atiṭṭhanto eso – evaṃ vihārīti gāthā. Tattha idhevāti imasmiṃyeva sāsane, imasmiṃyeva vā attabhāve. Imissā gāthāya niddeso uttānatthova.
26. ஸுகித்திதங் கோ³தமனூபதீ⁴கந்தி எத்த² அனூபதீ⁴கந்தி நிப்³பா³னங், தங் ஸந்தா⁴ய ப⁴க³வந்தங் ஆலபந்தோ ஆஹ – ‘‘ஸுகித்திதங் கோ³தமனூபதீ⁴க’’ந்தி.
26.Sukittitaṃ gotamanūpadhīkanti ettha anūpadhīkanti nibbānaṃ, taṃ sandhāya bhagavantaṃ ālapanto āha – ‘‘sukittitaṃ gotamanūpadhīka’’nti.
நித்³தே³ஸே கிலேஸா சாதி உபதாபனட்டே²ன ராகா³த³யோ கிலேஸா ச ராஸட்டே²ன விபாகபூ⁴தா பஞ்சக்க²ந்தா⁴ ச குஸலாதி³அபி⁴ஸங்கா²ரா சேதனா ச ‘‘உபதீ⁴’’தி வுச்சந்தி கதீ²யந்தி. உபதி⁴ப்பஹானங் தத³ங்க³ப்பஹானேன, உபதி⁴வூபஸமங் விக்க²ம்ப⁴னப்பஹானேன, உபதி⁴படினிஸ்ஸக்³க³ங் ஸமுச்சே²த³ப்பஹானேன உபதி⁴படிபஸ்ஸத்³த⁴ங் ப²லேனாதி.
Niddese kilesā cāti upatāpanaṭṭhena rāgādayo kilesā ca rāsaṭṭhena vipākabhūtā pañcakkhandhā ca kusalādiabhisaṅkhārā cetanā ca ‘‘upadhī’’ti vuccanti kathīyanti. Upadhippahānaṃ tadaṅgappahānena, upadhivūpasamaṃ vikkhambhanappahānena, upadhipaṭinissaggaṃ samucchedappahānena upadhipaṭipassaddhaṃ phalenāti.
27. ந கேவலங் து³க்க²மேவ பஹாஸி – தே சாபீதி கா³தா². தத்த² அட்டி²தந்தி ஸக்கச்சங், ஸதா³ வா. தங் தங் நமஸ்ஸாமீதி தஸ்மா தங் நமஸ்ஸாமி. ஸமேச்சாதி உபக³ந்த்வா. நாகா³தி ப⁴க³வந்தங் ஆலபந்தோ ஆஹ.
27. Na kevalaṃ dukkhameva pahāsi – te cāpīti gāthā. Tattha aṭṭhitanti sakkaccaṃ, sadā vā. Taṃ taṃ namassāmīti tasmā taṃ namassāmi. Sameccāti upagantvā. Nāgāti bhagavantaṃ ālapanto āha.
நித்³தே³ஸே ஸமேச்சாதி ஜானித்வா, ஏகதோ ஹுத்வா வா. அபி⁴ஸமேச்சாதி படிவிஜ்ஜி²த்வா. ஸமாக³ந்த்வாதி ஸம்முகா² ஹுத்வா. அபி⁴ஸமாக³ந்த்வாதி ஸமீபங் க³ந்த்வா. ஸம்முகா²தி ஸம்முகே². ஆகு³ங் ந கரோதீதி பாபங் ந கரோதி.
Niddese sameccāti jānitvā, ekato hutvā vā. Abhisameccāti paṭivijjhitvā. Samāgantvāti sammukhā hutvā. Abhisamāgantvāti samīpaṃ gantvā. Sammukhāti sammukhe. Āguṃ na karotīti pāpaṃ na karoti.
28. இதா³னி நங் ப⁴க³வா ‘‘அத்³தா⁴ ஹி ப⁴க³வா பஹாஸி து³க்க²’’ந்தி ஏவங் தேன ப்³ராஹ்மணேன விதி³தோபி அத்தானங் அனுபனெத்வாவ பஹீனது³க்கே²ன புக்³க³லேன ஓவத³ந்தோ ‘‘யங் ப்³ராஹ்மண’’ந்தி கா³த²மாஹ. தஸ்ஸத்தோ² – யங் தங் அபி⁴ஜானந்தோ ‘‘அயங் பா³ஹிதபாபத்தா ப்³ராஹ்மணோ, வேதே³ஹி க³தத்தா வேத³கூ³, கிஞ்சனாபா⁴வா அகிஞ்சனோ, காமேஸு ச ப⁴வேஸு ச அஸத்தத்தா காமப⁴வே அஸத்தோ’’தி ஜஞ்ஞா ஜானெய்யாஸி. அத்³தா⁴ ஹி ஸோ ஓக⁴மிமங் அதாரி, திண்ணோ ச பாரங் அகி²லோ அகங்கோ².
28. Idāni naṃ bhagavā ‘‘addhā hi bhagavā pahāsi dukkha’’nti evaṃ tena brāhmaṇena viditopi attānaṃ anupanetvāva pahīnadukkhena puggalena ovadanto ‘‘yaṃ brāhmaṇa’’nti gāthamāha. Tassattho – yaṃ taṃ abhijānanto ‘‘ayaṃ bāhitapāpattā brāhmaṇo, vedehi gatattā vedagū, kiñcanābhāvā akiñcano, kāmesu ca bhavesu ca asattattā kāmabhave asatto’’ti jaññā jāneyyāsi. Addhā hi so oghamimaṃ atāri, tiṇṇo ca pāraṃ akhilo akaṅkho.
நித்³தே³ஸே ராக³கிஞ்சனந்தி ராக³பலிபோ³த⁴ங். தோ³ஸகிஞ்சனந்திஆதி³பி ஏஸேவ நயோ. காமோக⁴ங் திண்ணோ அனாகா³மிமக்³கே³ன. ப⁴வோக⁴ங் திண்ணோ அரஹத்தமக்³கே³ன. தி³ட்டோ²க⁴ங் திண்ணோ ஸோதாபத்திமக்³கே³ன. அவிஜ்ஜோக⁴ங் திண்ணோ அரஹத்தமக்³கே³ன. ஸங்ஸாரபத²ங் திண்ணோ குஸலாகுஸலகம்மப்பபே⁴தே³னாதி. உத்திண்ணோ பட²மமக்³கே³ன. நித்திண்ணோ து³தியமக்³கே³ன. அதிக்கந்தோ ததியமக்³கே³ன. ஸமதிக்கந்தோ சதுத்த²மக்³கே³ன.வீதிவத்தோ ப²லேன.
Niddese rāgakiñcananti rāgapalibodhaṃ. Dosakiñcanantiādipi eseva nayo. Kāmoghaṃ tiṇṇo anāgāmimaggena. Bhavoghaṃ tiṇṇo arahattamaggena. Diṭṭhoghaṃ tiṇṇo sotāpattimaggena. Avijjoghaṃ tiṇṇo arahattamaggena. Saṃsārapathaṃ tiṇṇo kusalākusalakammappabhedenāti. Uttiṇṇo paṭhamamaggena. Nittiṇṇo dutiyamaggena. Atikkanto tatiyamaggena. Samatikkanto catutthamaggena.Vītivatto phalena.
29. கிஞ்ச பி⁴ய்யோ – வித்³வா ச யோதி கா³தா². தத்த² இதா⁴தி இமஸ்மிங் ஸாஸனே, அத்தபா⁴வே வா. விஸஜ்ஜாதி வோஸஜ்ஜித்வா.
29. Kiñca bhiyyo – vidvā ca yoti gāthā. Tattha idhāti imasmiṃ sāsane, attabhāve vā. Visajjāti vosajjitvā.
நித்³தே³ஸே ஸஜ்ஜந்தி முஞ்சனங். விஸஜ்ஜந்தி வோஸஜ்ஜனங். ஸேஸங் ஸப்³ப³த்த² பாகடமேவ. ஏவங் ப⁴க³வா இத³ம்பி ஸுத்தங் அரஹத்தனிகூடேனேவ தே³ஸேஸி. தே³ஸனாபரியோஸானே ச வுத்தஸதி³ஸோ ஏவ த⁴ம்மாபி⁴ஸமயோ அஹோஸீதி.
Niddese sajjanti muñcanaṃ. Visajjanti vosajjanaṃ. Sesaṃ sabbattha pākaṭameva. Evaṃ bhagavā idampi suttaṃ arahattanikūṭeneva desesi. Desanāpariyosāne ca vuttasadiso eva dhammābhisamayo ahosīti.
ஸத்³த⁴ம்மப்பஜ்ஜோதிகாய சூளனித்³தே³ஸ-அட்ட²கதா²ய
Saddhammappajjotikāya cūḷaniddesa-aṭṭhakathāya
மெத்தகூ³மாணவஸுத்தனித்³தே³ஸவண்ணனா நிட்டி²தா.
Mettagūmāṇavasuttaniddesavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / சூளனித்³தே³ஸபாளி • Cūḷaniddesapāḷi
4. மெத்தகூ³மாணவபுச்சா² • 4. Mettagūmāṇavapucchā
4. மெத்தகூ³மாணவபுச்சா²னித்³தே³ஸோ • 4. Mettagūmāṇavapucchāniddeso
