| Library / Tipiṭaka / তিপিটক • Tipiṭaka / থেরগাথা-অট্ঠকথা • Theragāthā-aṭṭhakathā |
৪. মেত্তজিত্থেরগাথাৰণ্ণনা
4. Mettajittheragāthāvaṇṇanā
নমো হি তস্স ভগৰতোতি আযস্মতো মেত্তজিত্থেরস্স গাথা। কা উপ্পত্তি? সো কির অনোমদস্সিস্স ভগৰতো কালে কুলগেহে নিব্বত্তিত্ৰা ৰিঞ্ঞুতং পত্তো সাসনে অভিপ্পসন্নো হুত্ৰা বোধিরুক্খস্স ইট্ঠকাহি ৰেদিকং চিনিত্ৰা সুধাপরিকম্মং কারেসি। সত্থা তস্স অনুমোদনং অকাসি। সো তেন পুঞ্ঞকম্মেন দেৰলোকে নিব্বত্তিত্ৰা অপরাপরং পুঞ্ঞানি কত্ৰা দেৰমনুস্সেসু সংসরন্তো ইমস্মিং বুদ্ধুপ্পাদে মগধরট্ঠে অঞ্ঞতরস্স ব্রাহ্মণস্স পুত্তো হুত্ৰা নিব্বত্তি, মেত্তজীতিস্স নামং অহোসি। সো ৰযপ্পত্তো কামেসু আদীনৰং দিস্ৰা তাপসপব্বজ্জং পব্বজিত্ৰা অরঞ্ঞে ৰিহরন্তো বুদ্ধুপ্পাদং সুত্ৰা পুব্বহেতুনা চোদিযমানো সত্থু সন্তিকং গন্ত্ৰা পৰত্তিনিৰত্তিযো আরব্ভ পঞ্হং পুচ্ছিত্ৰা সত্থারা পঞ্হে ৰিস্সজ্জিতে পটিলদ্ধসদ্ধো পব্বজিত্ৰা ৰিপস্সনং পট্ঠপেত্ৰা অরহত্তং পাপুণি। তেন ৰুত্তং অপদানে (অপ॰ থের ১.১৫.২৬-৩১) –
Namohi tassa bhagavatoti āyasmato mettajittherassa gāthā. Kā uppatti? So kira anomadassissa bhagavato kāle kulagehe nibbattitvā viññutaṃ patto sāsane abhippasanno hutvā bodhirukkhassa iṭṭhakāhi vedikaṃ cinitvā sudhāparikammaṃ kāresi. Satthā tassa anumodanaṃ akāsi. So tena puññakammena devaloke nibbattitvā aparāparaṃ puññāni katvā devamanussesu saṃsaranto imasmiṃ buddhuppāde magadharaṭṭhe aññatarassa brāhmaṇassa putto hutvā nibbatti, mettajītissa nāmaṃ ahosi. So vayappatto kāmesu ādīnavaṃ disvā tāpasapabbajjaṃ pabbajitvā araññe viharanto buddhuppādaṃ sutvā pubbahetunā codiyamāno satthu santikaṃ gantvā pavattinivattiyo ārabbha pañhaṃ pucchitvā satthārā pañhe vissajjite paṭiladdhasaddho pabbajitvā vipassanaṃ paṭṭhapetvā arahattaṃ pāpuṇi. Tena vuttaṃ apadāne (apa. thera 1.15.26-31) –
‘‘অনোমদস্সীমুনিনো, বোধিৰেদিমকাসহং।
‘‘Anomadassīmunino, bodhivedimakāsahaṃ;
সুধায পিণ্ডং দত্ৰান, পাণিকম্মং অকাসহং॥
Sudhāya piṇḍaṃ datvāna, pāṇikammaṃ akāsahaṃ.
‘‘দিস্ৰা তং সুকতং কম্মং, অনোমদস্সী নরুত্তমো।
‘‘Disvā taṃ sukataṃ kammaṃ, anomadassī naruttamo;
ভিক্খুসঙ্ঘে ঠিতো সত্থা, ইমা গাথা অভাসথ॥
Bhikkhusaṅghe ṭhito satthā, imā gāthā abhāsatha.
‘‘ইমিনা সুধকম্মেন, চেতনাপণিধীহি চ।
‘‘Iminā sudhakammena, cetanāpaṇidhīhi ca;
সম্পত্তিং অনুভোত্ৰান, দুক্খস্সন্তং করিস্সতি॥
Sampattiṃ anubhotvāna, dukkhassantaṃ karissati.
‘‘পসন্নমুখৰণ্ণোম্হি, একগ্গো সুসমাহিতো।
‘‘Pasannamukhavaṇṇomhi, ekaggo susamāhito;
ধারেমি অন্তিমং দেহং, সম্মাসম্বুদ্ধসাসনে॥
Dhāremi antimaṃ dehaṃ, sammāsambuddhasāsane.
‘‘ইতো কপ্পসতে আসিং, পরিপুণ্ণে অনূনকে।
‘‘Ito kappasate āsiṃ, paripuṇṇe anūnake;
রাজা সব্বঘনো নাম, চক্কৰত্তী মহব্বলো॥
Rājā sabbaghano nāma, cakkavattī mahabbalo.
‘‘কিলেসা ঝাপিতা ময্হং…পে॰… কতং বুদ্ধস্স সাসন’’ন্তি॥
‘‘Kilesā jhāpitā mayhaṃ…pe… kataṃ buddhassa sāsana’’nti.
অরহত্তং পন পত্ৰা সত্থারং থোমেন্তো –
Arahattaṃ pana patvā satthāraṃ thomento –
৯৪.
94.
‘‘নমো হি তস্স ভগৰতো, সক্যপুত্তস্স সিরীমতো।
‘‘Namo hi tassa bhagavato, sakyaputtassa sirīmato;
তেনাযং অগ্গপ্পত্তেন, অগ্গধম্মো সুদেসিতো’’তি॥ – গাথং অভাসি।
Tenāyaṃ aggappattena, aggadhammo sudesito’’ti. – gāthaṃ abhāsi;
তত্থ নমোতি নমক্কারো। হীতি নিপাতমত্তং। তস্সাতি যো সো ভগৰা সমত্তিংসপারমিযো পূরেত্ৰা সব্বকিলেসে ভঞ্জিত্ৰা অনুত্তরং সম্মাসম্বোধিং অভিসম্বুদ্ধো, সক্যরাজস্স পুত্তোতি সক্যপুত্তো। অনঞ্ঞসাধারণায পুঞ্ঞসম্পত্তিযা চ সম্ভাৰিতো উত্তমায রূপকাযসিরিযা ধম্মকাযসিরিযা চ সমন্নাগতত্তা সিরীমা, তস্স ভগৰতো সক্যপুত্তস্স সিরীমতো নমো অত্থু, তং নমামীতি অত্থো। তেনাতি তেন ভগৰতা। অযন্তি তস্স ধম্মস্স অত্তনো পচ্চক্খতায ৰদতি। অগ্গপ্পত্তেনাতি অগ্গং সব্বঞ্ঞুতং, সব্বেহি ৰা গুণেহি অগ্গভাৰং সেট্ঠভাৰং পত্তেন। অগ্গধম্মোতি অগ্গো উত্তমো নৰৰিধলোকুত্তরো ধম্মো সুট্ঠু অৰিপরীতং দেসিতো পৰেদিতোতি।
Tattha namoti namakkāro. Hīti nipātamattaṃ. Tassāti yo so bhagavā samattiṃsapāramiyo pūretvā sabbakilese bhañjitvā anuttaraṃ sammāsambodhiṃ abhisambuddho, sakyarājassa puttoti sakyaputto. Anaññasādhāraṇāya puññasampattiyā ca sambhāvito uttamāya rūpakāyasiriyā dhammakāyasiriyā ca samannāgatattā sirīmā, tassa bhagavato sakyaputtassa sirīmato namo atthu, taṃ namāmīti attho. Tenāti tena bhagavatā. Ayanti tassa dhammassa attano paccakkhatāya vadati. Aggappattenāti aggaṃ sabbaññutaṃ, sabbehi vā guṇehi aggabhāvaṃ seṭṭhabhāvaṃ pattena. Aggadhammoti aggo uttamo navavidhalokuttaro dhammo suṭṭhu aviparītaṃ desito paveditoti.
মেত্তজিত্থেরগাথাৰণ্ণনা নিট্ঠিতা।
Mettajittheragāthāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / থেরগাথাপাল়ি • Theragāthāpāḷi / ৪. মেত্তজিত্থেরগাথা • 4. Mettajittheragāthā
