| Library / Tipiṭaka / திபிடக • Tipiṭaka / படிஸம்பி⁴தா³மக்³க³பாளி • Paṭisambhidāmaggapāḷi |
4. மெத்தாகதா²
4. Mettākathā
22. ஸாவத்தி²னிதா³னங் . ‘‘மெத்தாய , பி⁴க்க²வே, சேதோவிமுத்தியா ஆஸேவிதாய பா⁴விதாய ப³ஹுலீகதாய யானீகதாய வத்து²கதாய அனுட்டி²தாய பரிசிதாய ஸுஸமாரத்³தா⁴ய ஏகாத³ஸானிஸங்ஸா பாடிகங்கா². கதமே ஏகாத³ஸ? ஸுக²ங் ஸுபதி, ஸுக²ங் படிபு³ஜ்ஜ²தி, ந பாபகங் ஸுபினங் பஸ்ஸதி, மனுஸ்ஸானங் பியோ ஹோதி, அமனுஸ்ஸானங் பியோ ஹோதி, தே³வதா ரக்க²ந்தி, நாஸ்ஸ அக்³கி³ வா விஸங் வா ஸத்த²ங் வா கமதி, துவடங் சித்தங் ஸமாதி⁴யதி, முக²வண்ணோ விப்பஸீத³தி, அஸம்மூள்ஹோ காலங்கரோதி, உத்தரி 1 அப்படிவிஜ்ஜ²ந்தோ ப்³ரஹ்மலோகூபகோ³ ஹோதி. மெத்தாய, பி⁴க்க²வே, சேதோவிமுத்தியா ஆஸேவிதாய பா⁴விதாய ப³ஹுலீகதாய யானீகதாய வத்து²கதாய அனுட்டி²தாய பரிசிதாய ஸுஸமாரத்³தா⁴ய – இமே ஏகாத³ஸானிஸங்ஸா பாடிகங்கா²’’ .
22. Sāvatthinidānaṃ . ‘‘Mettāya , bhikkhave, cetovimuttiyā āsevitāya bhāvitāya bahulīkatāya yānīkatāya vatthukatāya anuṭṭhitāya paricitāya susamāraddhāya ekādasānisaṃsā pāṭikaṅkhā. Katame ekādasa? Sukhaṃ supati, sukhaṃ paṭibujjhati, na pāpakaṃ supinaṃ passati, manussānaṃ piyo hoti, amanussānaṃ piyo hoti, devatā rakkhanti, nāssa aggi vā visaṃ vā satthaṃ vā kamati, tuvaṭaṃ cittaṃ samādhiyati, mukhavaṇṇo vippasīdati, asammūḷho kālaṅkaroti, uttari 2 appaṭivijjhanto brahmalokūpago hoti. Mettāya, bhikkhave, cetovimuttiyā āsevitāya bhāvitāya bahulīkatāya yānīkatāya vatthukatāya anuṭṭhitāya paricitāya susamāraddhāya – ime ekādasānisaṃsā pāṭikaṅkhā’’ .
அத்தி² அனோதி⁴ஸோ ப²ரணா மெத்தாசேதோவிமுத்தி, அத்தி² ஓதி⁴ஸோ ப²ரணா மெத்தாசேதோவிமுத்தி, அத்தி² தி³ஸாப²ரணா மெத்தாசேதோவிமுத்தி. கதிஹாகாரேஹி அனோதி⁴ஸோ ப²ரணா மெத்தாசேதோவிமுத்தி, கதிஹாகாரேஹி ஓதி⁴ஸோ ப²ரணா மெத்தாசேதோவிமுத்தி, கதிஹாகாரேஹி தி³ஸாப²ரணா மெத்தாசேதோவிமுத்தி? பஞ்சஹாகாரேஹி அனோதி⁴ஸோ ப²ரணா மெத்தாசேதோவிமுத்தி, ஸத்தஹாகாரேஹி ஓதி⁴ஸோ ப²ரணா மெத்தாசேதோவிமுத்தி, த³ஸஹாகாரேஹி தி³ஸாப²ரணா மெத்தாசேதோவிமுத்தி.
Atthi anodhiso pharaṇā mettācetovimutti, atthi odhiso pharaṇā mettācetovimutti, atthi disāpharaṇā mettācetovimutti. Katihākārehi anodhiso pharaṇā mettācetovimutti, katihākārehi odhiso pharaṇā mettācetovimutti, katihākārehi disāpharaṇā mettācetovimutti? Pañcahākārehi anodhiso pharaṇā mettācetovimutti, sattahākārehi odhiso pharaṇā mettācetovimutti, dasahākārehi disāpharaṇā mettācetovimutti.
கதமேஹி பஞ்சஹாகாரேஹி அனோதி⁴ஸோ ப²ரணா மெத்தாசேதோவிமுத்தி? ஸப்³பே³ ஸத்தா அவேரா அப்³யாபஜ்ஜா 3 அனீகா⁴ ஸுகீ² அத்தானங் பரிஹரந்து. ஸப்³பே³ பாணா…பே॰… ஸப்³பே³ பூ⁴தா…பே॰… ஸப்³பே³ புக்³க³லா…பே॰… ஸப்³பே³ அத்தபா⁴வபரியாபன்னா அவேரா அப்³யாபஜ்ஜா அனீகா⁴ ஸுகீ² அத்தானங் பரிஹரந்தூதி. இமேஹி பஞ்சஹாகாரேஹி அனோதி⁴ஸோ ப²ரணா மெத்தாசேதோவிமுத்தி.
Katamehi pañcahākārehi anodhiso pharaṇā mettācetovimutti? Sabbe sattā averā abyāpajjā 4 anīghā sukhī attānaṃ pariharantu. Sabbe pāṇā…pe… sabbe bhūtā…pe… sabbe puggalā…pe… sabbe attabhāvapariyāpannā averā abyāpajjā anīghā sukhī attānaṃ pariharantūti. Imehi pañcahākārehi anodhiso pharaṇā mettācetovimutti.
கதமேஹி ஸத்தஹாகாரேஹி ஓதி⁴ஸோ ப²ரணா மெத்தாசேதோவிமுத்தி? ஸப்³பா³ இத்தி²யோ அவேரா அப்³யாபஜ்ஜா அனீகா⁴ ஸுகீ² அத்தானங் பரிஹரந்து. ஸப்³பே³ புரிஸா…பே॰… ஸப்³பே³ அரியா…பே॰… ஸப்³பே³ அனரியா…பே॰… ஸப்³பே³ தே³வா…பே॰… ஸப்³பே³ மனுஸ்ஸா…பே॰… ஸப்³பே³ வினிபாதிகா அவேரா அப்³யாபஜ்ஜா அனீகா⁴ ஸுகீ² அத்தானங் பரிஹரந்தூதி. இமேஹி ஸத்தஹாகாரேஹி ஓதி⁴ஸோ ப²ரணா மெத்தாசேதோவிமுத்தி.
Katamehi sattahākārehi odhiso pharaṇā mettācetovimutti? Sabbā itthiyo averā abyāpajjā anīghā sukhī attānaṃ pariharantu. Sabbe purisā…pe… sabbe ariyā…pe… sabbe anariyā…pe… sabbe devā…pe… sabbe manussā…pe… sabbe vinipātikā averā abyāpajjā anīghā sukhī attānaṃ pariharantūti. Imehi sattahākārehi odhiso pharaṇā mettācetovimutti.
கதமேஹி த³ஸஹாகாரேஹி தி³ஸாப²ரணா மெத்தாசேதோவிமுத்தி? ஸப்³பே³ புரத்தி²மாய தி³ஸாய ஸத்தா அவேரா அப்³யாபஜ்ஜா அனீகா⁴ ஸுகீ² அத்தானங் பரிஹரந்து . ஸப்³பே³ பச்சி²மாய தி³ஸாய ஸத்தா…பே॰… ஸப்³பே³ உத்தராய தி³ஸாய ஸத்தா…பே॰… ஸப்³பே³ த³க்கி²ணாய தி³ஸாய ஸத்தா…பே॰… ஸப்³பே³ புரத்தி²மாய அனுதி³ஸாய ஸத்தா…பே॰… ஸப்³பே³ பச்சி²மாய அனுதி³ஸாய ஸத்தா…பே॰… ஸப்³பே³ உத்தராய அனுதி³ஸாய ஸத்தா…பே॰… ஸப்³பே³ த³க்கி²ணாய அனுதி³ஸாய ஸத்தா…பே॰… ஸப்³பே³ ஹெட்டி²மாய தி³ஸாய ஸத்தா…பே॰… ஸப்³பே³ உபரிமாய தி³ஸாய ஸத்தா அவேரா அப்³யாபஜ்ஜா அனீகா⁴ ஸுகீ² அத்தானங் பரிஹரந்து. ஸப்³பே³ புரத்தி²மாய தி³ஸாய பாணா…பே॰… பூ⁴தா… புக்³க³லா… அத்தபா⁴வபரியாபன்னா… ஸப்³பா³ இத்தி²யோ… ஸப்³பே³ புரிஸா… ஸப்³பே³ அரியா… ஸப்³பே³ அனரியா… ஸப்³பே³ தே³வா… ஸப்³பே³ மனுஸ்ஸா… ஸப்³பே³ வினிபாதிகா அவேரா அப்³யாபஜ்ஜா அனீகா⁴ ஸுகீ² அத்தானங் பரிஹரந்து. ஸப்³பே³ பச்சி²மாய தி³ஸாய வினிபாதிகா…பே॰… ஸப்³பே³ உத்தராய தி³ஸாய வினிபாதிகா… ஸப்³பே³ த³க்கி²ணாய தி³ஸாய வினிபாதிகா… ஸப்³பே³ புரத்தி²மாய அனுதி³ஸாய வினிபாதிகா… ஸப்³பே³ பச்சி²மாய அனுதி³ஸாய வினிபாதிகா… ஸப்³பே³ உத்தராய அனுதி³ஸாய வினிபாதிகா… ஸப்³பே³ த³க்கி²ணாய அனுதி³ஸாய வினிபாதிகா… ஸப்³பே³ ஹெட்டி²மாய தி³ஸாய வினிபாதிகா… ஸப்³பே³ உபரிமாய தி³ஸாய வினிபாதிகா அவேரா அப்³யாபஜ்ஜா அனீகா⁴ ஸுகீ² அத்தானங் பரிஹரந்தூதி. இமேஹி த³ஸஹாகாரேஹி தி³ஸாப²ரணா மெத்தாசேதோவிமுத்தி.
Katamehi dasahākārehi disāpharaṇā mettācetovimutti? Sabbe puratthimāya disāya sattā averā abyāpajjā anīghā sukhī attānaṃ pariharantu . Sabbe pacchimāya disāya sattā…pe… sabbe uttarāya disāya sattā…pe… sabbe dakkhiṇāya disāya sattā…pe… sabbe puratthimāya anudisāya sattā…pe… sabbe pacchimāya anudisāya sattā…pe… sabbe uttarāya anudisāya sattā…pe… sabbe dakkhiṇāya anudisāya sattā…pe… sabbe heṭṭhimāya disāya sattā…pe… sabbe uparimāya disāya sattā averā abyāpajjā anīghā sukhī attānaṃ pariharantu. Sabbe puratthimāya disāya pāṇā…pe… bhūtā… puggalā… attabhāvapariyāpannā… sabbā itthiyo… sabbe purisā… sabbe ariyā… sabbe anariyā… sabbe devā… sabbe manussā… sabbe vinipātikā averā abyāpajjā anīghā sukhī attānaṃ pariharantu. Sabbe pacchimāya disāya vinipātikā…pe… sabbe uttarāya disāya vinipātikā… sabbe dakkhiṇāya disāya vinipātikā… sabbe puratthimāya anudisāya vinipātikā… sabbe pacchimāya anudisāya vinipātikā… sabbe uttarāya anudisāya vinipātikā… sabbe dakkhiṇāya anudisāya vinipātikā… sabbe heṭṭhimāya disāya vinipātikā… sabbe uparimāya disāya vinipātikā averā abyāpajjā anīghā sukhī attānaṃ pariharantūti. Imehi dasahākārehi disāpharaṇā mettācetovimutti.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / படிஸம்பி⁴தா³மக்³க³-அட்ட²கதா² • Paṭisambhidāmagga-aṭṭhakathā / மெத்தாகதா²வண்ணனா • Mettākathāvaṇṇanā
