| Library / Tipiṭaka / တိပိဋက • Tipiṭaka / ပဋိသမ္ဘိဒာမဂ္ဂပာဠိ • Paṭisambhidāmaggapāḷi |
၄. မေတ္တာကထာ
4. Mettākathā
၂၂. သာဝတ္ထိနိဒာနံ ။ ‘‘မေတ္တာယ , ဘိက္ခဝေ, စေတောဝိမုတ္တိယာ အာသေဝိတာယ ဘာဝိတာယ ဗဟုလီကတာယ ယာနီကတာယ ဝတ္ထုကတာယ အနုဋ္ဌိတာယ ပရိစိတာယ သုသမာရဒ္ဓာယ ဧကာဒသာနိသံသာ ပာဋိကင္ခာ။ ကတမေ ဧကာဒသ? သုခံ သုပတိ, သုခံ ပဋိဗုဇ္ဈတိ, န ပာပကံ သုပိနံ ပသ္သတိ, မနုသ္သာနံ ပိယော ဟောတိ, အမနုသ္သာနံ ပိယော ဟောတိ, ဒေဝတာ ရက္ခန္တိ, နာသ္သ အဂ္ဂိ ဝာ ဝိသံ ဝာ သတ္ထံ ဝာ ကမတိ, တုဝဋံ စိတ္တံ သမာဓိယတိ, မုခဝဏ္ဏော ဝိပ္ပသီဒတိ, အသမ္မူဠ္ဟော ကာလင္ကရောတိ, ဥတ္တရိ 1 အပ္ပဋိဝိဇ္ဈန္တော ဗ္ရဟ္မလောကူပဂော ဟောတိ။ မေတ္တာယ, ဘိက္ခဝေ, စေတောဝိမုတ္တိယာ အာသေဝိတာယ ဘာဝိတာယ ဗဟုလီကတာယ ယာနီကတာယ ဝတ္ထုကတာယ အနုဋ္ဌိတာယ ပရိစိတာယ သုသမာရဒ္ဓာယ – ဣမေ ဧကာဒသာနိသံသာ ပာဋိကင္ခာ’’ ။
22. Sāvatthinidānaṃ . ‘‘Mettāya , bhikkhave, cetovimuttiyā āsevitāya bhāvitāya bahulīkatāya yānīkatāya vatthukatāya anuṭṭhitāya paricitāya susamāraddhāya ekādasānisaṃsā pāṭikaṅkhā. Katame ekādasa? Sukhaṃ supati, sukhaṃ paṭibujjhati, na pāpakaṃ supinaṃ passati, manussānaṃ piyo hoti, amanussānaṃ piyo hoti, devatā rakkhanti, nāssa aggi vā visaṃ vā satthaṃ vā kamati, tuvaṭaṃ cittaṃ samādhiyati, mukhavaṇṇo vippasīdati, asammūḷho kālaṅkaroti, uttari 2 appaṭivijjhanto brahmalokūpago hoti. Mettāya, bhikkhave, cetovimuttiyā āsevitāya bhāvitāya bahulīkatāya yānīkatāya vatthukatāya anuṭṭhitāya paricitāya susamāraddhāya – ime ekādasānisaṃsā pāṭikaṅkhā’’ .
အတ္ထိ အနောဓိသော ဖရဏာ မေတ္တာစေတောဝိမုတ္တိ, အတ္ထိ ဩဓိသော ဖရဏာ မေတ္တာစေတောဝိမုတ္တိ, အတ္ထိ ဒိသာဖရဏာ မေတ္တာစေတောဝိမုတ္တိ။ ကတိဟာကာရေဟိ အနောဓိသော ဖရဏာ မေတ္တာစေတောဝိမုတ္တိ, ကတိဟာကာရေဟိ ဩဓိသော ဖရဏာ မေတ္တာစေတောဝိမုတ္တိ, ကတိဟာကာရေဟိ ဒိသာဖရဏာ မေတ္တာစေတောဝိမုတ္တိ? ပဉ္စဟာကာရေဟိ အနောဓိသော ဖရဏာ မေတ္တာစေတောဝိမုတ္တိ, သတ္တဟာကာရေဟိ ဩဓိသော ဖရဏာ မေတ္တာစေတောဝိမုတ္တိ, ဒသဟာကာရေဟိ ဒိသာဖရဏာ မေတ္တာစေတောဝိမုတ္တိ။
Atthi anodhiso pharaṇā mettācetovimutti, atthi odhiso pharaṇā mettācetovimutti, atthi disāpharaṇā mettācetovimutti. Katihākārehi anodhiso pharaṇā mettācetovimutti, katihākārehi odhiso pharaṇā mettācetovimutti, katihākārehi disāpharaṇā mettācetovimutti? Pañcahākārehi anodhiso pharaṇā mettācetovimutti, sattahākārehi odhiso pharaṇā mettācetovimutti, dasahākārehi disāpharaṇā mettācetovimutti.
ကတမေဟိ ပဉ္စဟာကာရေဟိ အနောဓိသော ဖရဏာ မေတ္တာစေတောဝိမုတ္တိ? သဗ္ဗေ သတ္တာ အဝေရာ အဗ္ယာပဇ္ဇာ 3 အနီဃာ သုခီ အတ္တာနံ ပရိဟရန္တု။ သဗ္ဗေ ပာဏာ။ပေ.။ သဗ္ဗေ ဘူတာ။ပေ.။ သဗ္ဗေ ပုဂ္ဂလာ။ပေ.။ သဗ္ဗေ အတ္တဘာဝပရိယာပန္နာ အဝေရာ အဗ္ယာပဇ္ဇာ အနီဃာ သုခီ အတ္တာနံ ပရိဟရန္တူတိ။ ဣမေဟိ ပဉ္စဟာကာရေဟိ အနောဓိသော ဖရဏာ မေတ္တာစေတောဝိမုတ္တိ။
Katamehi pañcahākārehi anodhiso pharaṇā mettācetovimutti? Sabbe sattā averā abyāpajjā 4 anīghā sukhī attānaṃ pariharantu. Sabbe pāṇā…pe… sabbe bhūtā…pe… sabbe puggalā…pe… sabbe attabhāvapariyāpannā averā abyāpajjā anīghā sukhī attānaṃ pariharantūti. Imehi pañcahākārehi anodhiso pharaṇā mettācetovimutti.
ကတမေဟိ သတ္တဟာကာရေဟိ ဩဓိသော ဖရဏာ မေတ္တာစေတောဝိမုတ္တိ? သဗ္ဗာ ဣတ္ထိယော အဝေရာ အဗ္ယာပဇ္ဇာ အနီဃာ သုခီ အတ္တာနံ ပရိဟရန္တု။ သဗ္ဗေ ပုရိသာ။ပေ.။ သဗ္ဗေ အရိယာ။ပေ.။ သဗ္ဗေ အနရိယာ။ပေ.။ သဗ္ဗေ ဒေဝာ။ပေ.။ သဗ္ဗေ မနုသ္သာ။ပေ.။ သဗ္ဗေ ဝိနိပာတိကာ အဝေရာ အဗ္ယာပဇ္ဇာ အနီဃာ သုခီ အတ္တာနံ ပရိဟရန္တူတိ။ ဣမေဟိ သတ္တဟာကာရေဟိ ဩဓိသော ဖရဏာ မေတ္တာစေတောဝိမုတ္တိ။
Katamehi sattahākārehi odhiso pharaṇā mettācetovimutti? Sabbā itthiyo averā abyāpajjā anīghā sukhī attānaṃ pariharantu. Sabbe purisā…pe… sabbe ariyā…pe… sabbe anariyā…pe… sabbe devā…pe… sabbe manussā…pe… sabbe vinipātikā averā abyāpajjā anīghā sukhī attānaṃ pariharantūti. Imehi sattahākārehi odhiso pharaṇā mettācetovimutti.
ကတမေဟိ ဒသဟာကာရေဟိ ဒိသာဖရဏာ မေတ္တာစေတောဝိမုတ္တိ? သဗ္ဗေ ပုရတ္ထိမာယ ဒိသာယ သတ္တာ အဝေရာ အဗ္ယာပဇ္ဇာ အနီဃာ သုခီ အတ္တာနံ ပရိဟရန္တု ။ သဗ္ဗေ ပစ္ဆိမာယ ဒိသာယ သတ္တာ။ပေ.။ သဗ္ဗေ ဥတ္တရာယ ဒိသာယ သတ္တာ။ပေ.။ သဗ္ဗေ ဒက္ခိဏာယ ဒိသာယ သတ္တာ။ပေ.။ သဗ္ဗေ ပုရတ္ထိမာယ အနုဒိသာယ သတ္တာ။ပေ.။ သဗ္ဗေ ပစ္ဆိမာယ အနုဒိသာယ သတ္တာ။ပေ.။ သဗ္ဗေ ဥတ္တရာယ အနုဒိသာယ သတ္တာ။ပေ.။ သဗ္ဗေ ဒက္ခိဏာယ အနုဒိသာယ သတ္တာ။ပေ.။ သဗ္ဗေ ဟေဋ္ဌိမာယ ဒိသာယ သတ္တာ။ပေ.။ သဗ္ဗေ ဥပရိမာယ ဒိသာယ သတ္တာ အဝေရာ အဗ္ယာပဇ္ဇာ အနီဃာ သုခီ အတ္တာနံ ပရိဟရန္တု။ သဗ္ဗေ ပုရတ္ထိမာယ ဒိသာယ ပာဏာ။ပေ.။ ဘူတာ။ ပုဂ္ဂလာ။ အတ္တဘာဝပရိယာပန္နာ။ သဗ္ဗာ ဣတ္ထိယော။ သဗ္ဗေ ပုရိသာ။ သဗ္ဗေ အရိယာ။ သဗ္ဗေ အနရိယာ။ သဗ္ဗေ ဒေဝာ။ သဗ္ဗေ မနုသ္သာ။ သဗ္ဗေ ဝိနိပာတိကာ အဝေရာ အဗ္ယာပဇ္ဇာ အနီဃာ သုခီ အတ္တာနံ ပရိဟရန္တု။ သဗ္ဗေ ပစ္ဆိမာယ ဒိသာယ ဝိနိပာတိကာ။ပေ.။ သဗ္ဗေ ဥတ္တရာယ ဒိသာယ ဝိနိပာတိကာ။ သဗ္ဗေ ဒက္ခိဏာယ ဒိသာယ ဝိနိပာတိကာ။ သဗ္ဗေ ပုရတ္ထိမာယ အနုဒိသာယ ဝိနိပာတိကာ။ သဗ္ဗေ ပစ္ဆိမာယ အနုဒိသာယ ဝိနိပာတိကာ။ သဗ္ဗေ ဥတ္တရာယ အနုဒိသာယ ဝိနိပာတိကာ။ သဗ္ဗေ ဒက္ခိဏာယ အနုဒိသာယ ဝိနိပာတိကာ။ သဗ္ဗေ ဟေဋ္ဌိမာယ ဒိသာယ ဝိနိပာတိကာ။ သဗ္ဗေ ဥပရိမာယ ဒိသာယ ဝိနိပာတိကာ အဝေရာ အဗ္ယာပဇ္ဇာ အနီဃာ သုခီ အတ္တာနံ ပရိဟရန္တူတိ။ ဣမေဟိ ဒသဟာကာရေဟိ ဒိသာဖရဏာ မေတ္တာစေတောဝိမုတ္တိ။
Katamehi dasahākārehi disāpharaṇā mettācetovimutti? Sabbe puratthimāya disāya sattā averā abyāpajjā anīghā sukhī attānaṃ pariharantu . Sabbe pacchimāya disāya sattā…pe… sabbe uttarāya disāya sattā…pe… sabbe dakkhiṇāya disāya sattā…pe… sabbe puratthimāya anudisāya sattā…pe… sabbe pacchimāya anudisāya sattā…pe… sabbe uttarāya anudisāya sattā…pe… sabbe dakkhiṇāya anudisāya sattā…pe… sabbe heṭṭhimāya disāya sattā…pe… sabbe uparimāya disāya sattā averā abyāpajjā anīghā sukhī attānaṃ pariharantu. Sabbe puratthimāya disāya pāṇā…pe… bhūtā… puggalā… attabhāvapariyāpannā… sabbā itthiyo… sabbe purisā… sabbe ariyā… sabbe anariyā… sabbe devā… sabbe manussā… sabbe vinipātikā averā abyāpajjā anīghā sukhī attānaṃ pariharantu. Sabbe pacchimāya disāya vinipātikā…pe… sabbe uttarāya disāya vinipātikā… sabbe dakkhiṇāya disāya vinipātikā… sabbe puratthimāya anudisāya vinipātikā… sabbe pacchimāya anudisāya vinipātikā… sabbe uttarāya anudisāya vinipātikā… sabbe dakkhiṇāya anudisāya vinipātikā… sabbe heṭṭhimāya disāya vinipātikā… sabbe uparimāya disāya vinipātikā averā abyāpajjā anīghā sukhī attānaṃ pariharantūti. Imehi dasahākārehi disāpharaṇā mettācetovimutti.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / ခုဒ္ဒကနိကာယ (အဋ္ဌကထာ) • Khuddakanikāya (aṭṭhakathā) / ပဋိသမ္ဘိဒာမဂ္ဂ-အဋ္ဌကထာ • Paṭisambhidāmagga-aṭṭhakathā / မေတ္တာကထာဝဏ္ဏနာ • Mettākathāvaṇṇanā
