| Library / Tipiṭaka / ཏིཔིཊཀ • Tipiṭaka / པཊིསམྦྷིདཱམགྒཔཱལི༹ • Paṭisambhidāmaggapāḷi |
༤. མེཏྟཱཀཐཱ
4. Mettākathā
༢༢. སཱཝཏྠིནིདཱནཾ ། ‘‘མེཏྟཱཡ , བྷིཀྑཝེ, ཙེཏོཝིམུཏྟིཡཱ ཨཱསེཝིཏཱཡ བྷཱཝིཏཱཡ བཧུལཱིཀཏཱཡ ཡཱནཱིཀཏཱཡ ཝཏྠུཀཏཱཡ ཨནུཊྛིཏཱཡ པརིཙིཏཱཡ སུསམཱརདྡྷཱཡ ཨེཀཱདསཱནིསཾསཱ པཱཊིཀངྑཱ། ཀཏམེ ཨེཀཱདས? སུཁཾ སུཔཏི, སུཁཾ པཊིབུཛ྄ཛྷཏི, ན པཱཔཀཾ སུཔིནཾ པསྶཏི, མནུསྶཱནཾ པིཡོ ཧོཏི, ཨམནུསྶཱནཾ པིཡོ ཧོཏི, དེཝཏཱ རཀྑནྟི, ནཱསྶ ཨགྒི ཝཱ ཝིསཾ ཝཱ སཏྠཾ ཝཱ ཀམཏི, ཏུཝཊཾ ཙིཏྟཾ སམཱདྷིཡཏི, མུཁཝཎྞོ ཝིཔྤསཱིདཏི, ཨསམྨཱུལ༹ྷོ ཀཱལངྐརོཏི, ཨུཏྟརི 1 ཨཔྤཊིཝིཛ྄ཛྷནྟོ བྲཧྨལོཀཱུཔགོ ཧོཏི། མེཏྟཱཡ, བྷིཀྑཝེ, ཙེཏོཝིམུཏྟིཡཱ ཨཱསེཝིཏཱཡ བྷཱཝིཏཱཡ བཧུལཱིཀཏཱཡ ཡཱནཱིཀཏཱཡ ཝཏྠུཀཏཱཡ ཨནུཊྛིཏཱཡ པརིཙིཏཱཡ སུསམཱརདྡྷཱཡ – ཨིམེ ཨེཀཱདསཱནིསཾསཱ པཱཊིཀངྑཱ’’ །
22. Sāvatthinidānaṃ . ‘‘Mettāya , bhikkhave, cetovimuttiyā āsevitāya bhāvitāya bahulīkatāya yānīkatāya vatthukatāya anuṭṭhitāya paricitāya susamāraddhāya ekādasānisaṃsā pāṭikaṅkhā. Katame ekādasa? Sukhaṃ supati, sukhaṃ paṭibujjhati, na pāpakaṃ supinaṃ passati, manussānaṃ piyo hoti, amanussānaṃ piyo hoti, devatā rakkhanti, nāssa aggi vā visaṃ vā satthaṃ vā kamati, tuvaṭaṃ cittaṃ samādhiyati, mukhavaṇṇo vippasīdati, asammūḷho kālaṅkaroti, uttari 2 appaṭivijjhanto brahmalokūpago hoti. Mettāya, bhikkhave, cetovimuttiyā āsevitāya bhāvitāya bahulīkatāya yānīkatāya vatthukatāya anuṭṭhitāya paricitāya susamāraddhāya – ime ekādasānisaṃsā pāṭikaṅkhā’’ .
ཨཏྠི ཨནོདྷིསོ ཕརཎཱ མེཏྟཱཙེཏོཝིམུཏྟི, ཨཏྠི ཨོདྷིསོ ཕརཎཱ མེཏྟཱཙེཏོཝིམུཏྟི, ཨཏྠི དིསཱཕརཎཱ མེཏྟཱཙེཏོཝིམུཏྟི། ཀཏིཧཱཀཱརེཧི ཨནོདྷིསོ ཕརཎཱ མེཏྟཱཙེཏོཝིམུཏྟི, ཀཏིཧཱཀཱརེཧི ཨོདྷིསོ ཕརཎཱ མེཏྟཱཙེཏོཝིམུཏྟི, ཀཏིཧཱཀཱརེཧི དིསཱཕརཎཱ མེཏྟཱཙེཏོཝིམུཏྟི? པཉྩཧཱཀཱརེཧི ཨནོདྷིསོ ཕརཎཱ མེཏྟཱཙེཏོཝིམུཏྟི, སཏྟཧཱཀཱརེཧི ཨོདྷིསོ ཕརཎཱ མེཏྟཱཙེཏོཝིམུཏྟི, དསཧཱཀཱརེཧི དིསཱཕརཎཱ མེཏྟཱཙེཏོཝིམུཏྟི།
Atthi anodhiso pharaṇā mettācetovimutti, atthi odhiso pharaṇā mettācetovimutti, atthi disāpharaṇā mettācetovimutti. Katihākārehi anodhiso pharaṇā mettācetovimutti, katihākārehi odhiso pharaṇā mettācetovimutti, katihākārehi disāpharaṇā mettācetovimutti? Pañcahākārehi anodhiso pharaṇā mettācetovimutti, sattahākārehi odhiso pharaṇā mettācetovimutti, dasahākārehi disāpharaṇā mettācetovimutti.
ཀཏམེཧི པཉྩཧཱཀཱརེཧི ཨནོདྷིསོ ཕརཎཱ མེཏྟཱཙེཏོཝིམུཏྟི? སབྦེ སཏྟཱ ཨཝེརཱ ཨབྱཱཔཛྫཱ 3 ཨནཱིགྷཱ སུཁཱི ཨཏྟཱནཾ པརིཧརནྟུ། སབྦེ པཱཎཱ…པེ॰… སབྦེ བྷཱུཏཱ…པེ॰… སབྦེ པུགྒལཱ…པེ॰… སབྦེ ཨཏྟབྷཱཝཔརིཡཱཔནྣཱ ཨཝེརཱ ཨབྱཱཔཛྫཱ ཨནཱིགྷཱ སུཁཱི ཨཏྟཱནཾ པརིཧརནྟཱུཏི། ཨིམེཧི པཉྩཧཱཀཱརེཧི ཨནོདྷིསོ ཕརཎཱ མེཏྟཱཙེཏོཝིམུཏྟི།
Katamehi pañcahākārehi anodhiso pharaṇā mettācetovimutti? Sabbe sattā averā abyāpajjā 4 anīghā sukhī attānaṃ pariharantu. Sabbe pāṇā…pe… sabbe bhūtā…pe… sabbe puggalā…pe… sabbe attabhāvapariyāpannā averā abyāpajjā anīghā sukhī attānaṃ pariharantūti. Imehi pañcahākārehi anodhiso pharaṇā mettācetovimutti.
ཀཏམེཧི སཏྟཧཱཀཱརེཧི ཨོདྷིསོ ཕརཎཱ མེཏྟཱཙེཏོཝིམུཏྟི? སབྦཱ ཨིཏྠིཡོ ཨཝེརཱ ཨབྱཱཔཛྫཱ ཨནཱིགྷཱ སུཁཱི ཨཏྟཱནཾ པརིཧརནྟུ། སབྦེ པུརིསཱ…པེ॰… སབྦེ ཨརིཡཱ…པེ॰… སབྦེ ཨནརིཡཱ…པེ॰… སབྦེ དེཝཱ…པེ॰… སབྦེ མནུསྶཱ…པེ॰… སབྦེ ཝིནིཔཱཏིཀཱ ཨཝེརཱ ཨབྱཱཔཛྫཱ ཨནཱིགྷཱ སུཁཱི ཨཏྟཱནཾ པརིཧརནྟཱུཏི། ཨིམེཧི སཏྟཧཱཀཱརེཧི ཨོདྷིསོ ཕརཎཱ མེཏྟཱཙེཏོཝིམུཏྟི།
Katamehi sattahākārehi odhiso pharaṇā mettācetovimutti? Sabbā itthiyo averā abyāpajjā anīghā sukhī attānaṃ pariharantu. Sabbe purisā…pe… sabbe ariyā…pe… sabbe anariyā…pe… sabbe devā…pe… sabbe manussā…pe… sabbe vinipātikā averā abyāpajjā anīghā sukhī attānaṃ pariharantūti. Imehi sattahākārehi odhiso pharaṇā mettācetovimutti.
ཀཏམེཧི དསཧཱཀཱརེཧི དིསཱཕརཎཱ མེཏྟཱཙེཏོཝིམུཏྟི? སབྦེ པུརཏྠིམཱཡ དིསཱཡ སཏྟཱ ཨཝེརཱ ཨབྱཱཔཛྫཱ ཨནཱིགྷཱ སུཁཱི ཨཏྟཱནཾ པརིཧརནྟུ ། སབྦེ པཙྪིམཱཡ དིསཱཡ སཏྟཱ…པེ॰… སབྦེ ཨུཏྟརཱཡ དིསཱཡ སཏྟཱ…པེ॰… སབྦེ དཀྑིཎཱཡ དིསཱཡ སཏྟཱ…པེ॰… སབྦེ པུརཏྠིམཱཡ ཨནུདིསཱཡ སཏྟཱ…པེ॰… སབྦེ པཙྪིམཱཡ ཨནུདིསཱཡ སཏྟཱ…པེ॰… སབྦེ ཨུཏྟརཱཡ ཨནུདིསཱཡ སཏྟཱ…པེ॰… སབྦེ དཀྑིཎཱཡ ཨནུདིསཱཡ སཏྟཱ…པེ॰… སབྦེ ཧེཊྛིམཱཡ དིསཱཡ སཏྟཱ…པེ॰… སབྦེ ཨུཔརིམཱཡ དིསཱཡ སཏྟཱ ཨཝེརཱ ཨབྱཱཔཛྫཱ ཨནཱིགྷཱ སུཁཱི ཨཏྟཱནཾ པརིཧརནྟུ། སབྦེ པུརཏྠིམཱཡ དིསཱཡ པཱཎཱ…པེ॰… བྷཱུཏཱ… པུགྒལཱ… ཨཏྟབྷཱཝཔརིཡཱཔནྣཱ… སབྦཱ ཨིཏྠིཡོ… སབྦེ པུརིསཱ… སབྦེ ཨརིཡཱ… སབྦེ ཨནརིཡཱ… སབྦེ དེཝཱ… སབྦེ མནུསྶཱ… སབྦེ ཝིནིཔཱཏིཀཱ ཨཝེརཱ ཨབྱཱཔཛྫཱ ཨནཱིགྷཱ སུཁཱི ཨཏྟཱནཾ པརིཧརནྟུ། སབྦེ པཙྪིམཱཡ དིསཱཡ ཝིནིཔཱཏིཀཱ…པེ॰… སབྦེ ཨུཏྟརཱཡ དིསཱཡ ཝིནིཔཱཏིཀཱ… སབྦེ དཀྑིཎཱཡ དིསཱཡ ཝིནིཔཱཏིཀཱ… སབྦེ པུརཏྠིམཱཡ ཨནུདིསཱཡ ཝིནིཔཱཏིཀཱ… སབྦེ པཙྪིམཱཡ ཨནུདིསཱཡ ཝིནིཔཱཏིཀཱ… སབྦེ ཨུཏྟརཱཡ ཨནུདིསཱཡ ཝིནིཔཱཏིཀཱ… སབྦེ དཀྑིཎཱཡ ཨནུདིསཱཡ ཝིནིཔཱཏིཀཱ… སབྦེ ཧེཊྛིམཱཡ དིསཱཡ ཝིནིཔཱཏིཀཱ… སབྦེ ཨུཔརིམཱཡ དིསཱཡ ཝིནིཔཱཏིཀཱ ཨཝེརཱ ཨབྱཱཔཛྫཱ ཨནཱིགྷཱ སུཁཱི ཨཏྟཱནཾ པརིཧརནྟཱུཏི། ཨིམེཧི དསཧཱཀཱརེཧི དིསཱཕརཎཱ མེཏྟཱཙེཏོཝིམུཏྟི།
Katamehi dasahākārehi disāpharaṇā mettācetovimutti? Sabbe puratthimāya disāya sattā averā abyāpajjā anīghā sukhī attānaṃ pariharantu . Sabbe pacchimāya disāya sattā…pe… sabbe uttarāya disāya sattā…pe… sabbe dakkhiṇāya disāya sattā…pe… sabbe puratthimāya anudisāya sattā…pe… sabbe pacchimāya anudisāya sattā…pe… sabbe uttarāya anudisāya sattā…pe… sabbe dakkhiṇāya anudisāya sattā…pe… sabbe heṭṭhimāya disāya sattā…pe… sabbe uparimāya disāya sattā averā abyāpajjā anīghā sukhī attānaṃ pariharantu. Sabbe puratthimāya disāya pāṇā…pe… bhūtā… puggalā… attabhāvapariyāpannā… sabbā itthiyo… sabbe purisā… sabbe ariyā… sabbe anariyā… sabbe devā… sabbe manussā… sabbe vinipātikā averā abyāpajjā anīghā sukhī attānaṃ pariharantu. Sabbe pacchimāya disāya vinipātikā…pe… sabbe uttarāya disāya vinipātikā… sabbe dakkhiṇāya disāya vinipātikā… sabbe puratthimāya anudisāya vinipātikā… sabbe pacchimāya anudisāya vinipātikā… sabbe uttarāya anudisāya vinipātikā… sabbe dakkhiṇāya anudisāya vinipātikā… sabbe heṭṭhimāya disāya vinipātikā… sabbe uparimāya disāya vinipātikā averā abyāpajjā anīghā sukhī attānaṃ pariharantūti. Imehi dasahākārehi disāpharaṇā mettācetovimutti.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཁུདྡཀནིཀཱཡ (ཨཊྛཀཐཱ) • Khuddakanikāya (aṭṭhakathā) / པཊིསམྦྷིདཱམགྒ-ཨཊྛཀཐཱ • Paṭisambhidāmagga-aṭṭhakathā / མེཏྟཱཀཐཱཝཎྞནཱ • Mettākathāvaṇṇanā
